॥ নমো তস্স ভগৰতো অরহতো সম্মাসম্বুদ্ধস্স॥
ৰিনযপিটকে চূল়ৰগ্গপাল়ি ১. কম্মক্খন্ধকং ১. তজ্জনীযকম্মং ১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন পণ্ডুকলোহিতকা ভিক্খূ অত্তনা ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা, যেপি চঞ্ঞে ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা তে উপসঙ্কমিত্ৰা এৰং ৰদন্তি – ‘‘মা খো তুম্হে, আযস্মন্তো, এসো অজেসি। বলৰাবলৰং পটিমন্তেথ। তুম্হে তেন পণ্ডিততরা চ ব্যত্ততরা চ বহুস্সুততরা চ অলমত্ততরা চ [অলমত্থতরা চ (স্যা॰ ক॰)]। মা চস্স ভাযিত্থ। মযম্পি তুম্হাকং পক্খা ভৰিস্সামা’’তি। তেন অনুপ্পন্নানি চেৰ ভণ্ডনানি উপ্পজ্জন্তি উপ্পন্নানি চ ভণ্ডনানি ভিয্যোভাৰায ৰেপুল্লায সংৰত্তন্তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম পণ্ডুকলোহিতকা ভিক্খূ অত্তনা ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা, যেপি চঞ্ঞে ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা তে উপসঙ্কমিত্ৰা এৰং ৰক্খন্তি – ‘মা খো তুম্হে, আযস্মন্তো, এসো অজেসি। বলৰাবলৰং পটিমন্তেথ। তুম্হে তেন পণ্ডিততরা চ ব্যত্ততরা চ বহুস্সুততরা চ অলমত্ততরা চ। মা চস্স ভাযিত্থ। মযম্পি তুম্হাকং পক্খা ভৰিস্সামা’তি। তেন অনুপ্পন্নানি চেৰ ভণ্ডনানি উপ্পজ্জন্তি উপ্পন্নানি চ ভণ্ডনানি ভিয্যোভাৰায ৰেপুল্লায সংৰত্তন্তী’’তি। ২. অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ভিক্খূ পটিপুচ্ছি – ‘‘সচ্চং কির, ভিক্খৰে, পণ্ডুকলোহিতকা ভিক্খূ অত্তনা ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা, যেপি চঞ্ঞে ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা তে উপসঙ্কমিত্ৰা এৰং ৰদন্তি – ‘মা খো তুম্হে, আযস্মন্তো, এসো অজেসি। বলৰাবলৰং পটিমন্তেথ। তুম্হে তেন পণ্ডিততরা চ ব্যত্ততরা চ বহুস্সুততরা চ অলমত্ততরা চ। মা চস্স ভাযিত্থ। মযম্পি তুম্হাকং পক্খা ভৰিস্সামা’তি। তেন অনুপ্পন্নানি চেৰ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৰায ৰেপুল্লায সংৰত্তন্তী’’তি? ‘‘সচ্চং ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং, ভিক্খৰে, তেসং মোঘপুরিসানং অননুলোমিকং অপ্পতিরূপং অস্সামণকং অকপ্পিযং অকরণীযং। কথঞ্হি নাম তে, ভিক্খৰে, মোঘপুরিসা অত্তনা ভণ্ডনকারকা…পে॰… সঙ্ঘে অধিকরণকারকা, যেপি চঞ্ঞে ভিক্খূ ভণ্ডনকারকা…পে॰… সঙ্ঘে অধিকরণকারকা তে উপসঙ্কমিত্ৰা এৰং ৰক্খন্তি – ‘মা খো তুম্হে, আযস্মন্তো, এসো অজেসি। বলৰাবলৰং পটিমন্তেথ। তুম্হে তেন পণ্ডিততরা চ ব্যত্ততরা চ বহুস্সুততরা চ অলমত্ততরা চ। মা চস্স ভাযিত্থ। মযম্পি তুম্হাকং পক্খা ভৰিস্সামা’তি? তেন অনুপ্পন্নানি চেৰ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৰায ৰেপুল্লায সংৰত্তন্তি। নেতং, ভিক্খৰে, অপ্পসন্নানং ৰা পসাদায পসন্নানং ৰা ভিয্যোভাৰায। অথ খ্ৰেতং, ভিক্খৰে, অপ্পসন্নানঞ্চেৰ অপ্পসাদায পসন্নানঞ্চ একচ্চানং অঞ্ঞথত্তাযা’’তি। অথ খো ভগৰা তে [পণ্ডুকলোহিতকে (স্যা॰)] ভিক্খূ অনেকপরিযাযেন ৰিগরহিত্ৰা দুব্ভরতায দুপ্পোসতায মহিচ্ছতায অসন্তুট্ঠিতায [অসন্তুট্ঠতায (স্যা॰), অসন্তুট্ঠিযা (সী॰)] সঙ্গণিকায কোসজ্জস্স অৰণ্ণং ভাসিত্ৰা অনেকপরিযাযেন সুভরতায সুপোসতায অপ্পিচ্ছস্স সন্তুট্ঠস্স সল্লেখস্স ধুতস্স পাসাদিকস্স অপচযস্স ৰীরিযারম্ভস্স [ৰিরিযারম্ভস্স (সী॰), ৰীরিযারব্ভস্স (ক॰)] ৰণ্ণং ভাসিত্ৰা ভিক্খূনং তদনুচ্ছৰিকং তদনুলোমিকং ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, সঙ্ঘো পণ্ডুকলোহিতকানং ভিক্খূনং তজ্জনীযকম্মং করোতু। এৰঞ্চ পন, ভিক্খৰে, কাতব্বং। পঠমং পণ্ডুকলোহিতকা ভিক্খূ চোদেতব্বা, চোদেত্ৰা সারেতব্বা, সারেত্ৰা আপত্তিং [আপত্তি (সী॰ স্যা॰)]আরোপেতব্বা, আপত্তিং আরোপেত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো – ৩. ‘‘সুণাতু মে, ভন্তে, সঙ্ঘো। ইমে পণ্ডুকলোহিতকা ভিক্খূ অত্তনা ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা, যেপি চঞ্ঞে ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা তে উপসঙ্কমিত্ৰা এৰং ৰদন্তি – ‘মা খো তুম্হে, আযস্মন্তো, এসো অজেসি। বলৰাবলৰং পটিমন্তেথ। তুম্হে তেন পণ্ডিততরা চ ব্যত্ততরা চ বহুস্সুততরা চ অলমত্ততরা চ। মা চস্স ভাযিত্থ। মযম্পি তুম্হাকং পক্খা ভৰিস্সামা’তি। তেন অনুপ্পন্নানি চেৰ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৰায ৰেপুল্লায সংৰত্তন্তি। যদি সঙ্ঘস্স পত্তকল্লং, সঙ্ঘো পণ্ডুকলোহিতকানং ভিক্খূনং তজ্জনীযকম্মং করেয্য। এসা ঞত্তি। ‘‘সুণাতু মে, ভন্তে, সঙ্ঘো। ইমে পণ্ডুকলোহিতকা ভিক্খূ অত্তনা ভণ্ডনকারকা…পে॰… সঙ্ঘে অধিকরণকারকা, যেপি চঞ্ঞে ভিক্খূ ভণ্ডনকারকা…পে॰… সঙ্ঘে অধিকরণকারকা তে উপসঙ্কমিত্ৰা এৰং ৰদন্তি – ‘মা খো তুম্হে, আযস্মন্তো, এসো অজেসি। বলৰাবলৰং পটিমন্তেথ। তুম্হে তেন পণ্ডিততরা চ ব্যত্ততরা চ বহুস্সুততরা চ অলমত্ততরা চ। মা চস্স ভাযিত্থ। মযম্পি তুম্হাকং পক্খা ভৰিস্সামা’তি। তেন অনুপ্পন্নানি চেৰ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৰায ৰেপুল্লায সংৰত্তন্তি। সঙ্ঘো পণ্ডুকলোহিতকানং ভিক্খূনং তজ্জনীযকম্মং করোতি। যস্সাযস্মতো খমতি পণ্ডুকলোহিতকানং ভিক্খূনং তজ্জনীযস্স কম্মস্স করণং, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি – সুণাতু মে, ভন্তে, সঙ্ঘো। ইমে পণ্ডুকলোহিতকা ভিক্খূ অত্তনা ভণ্ডনকারকা…পে॰… সঙ্ঘে অধিকরণকারকা, যেপি চঞ্ঞে ভিক্খূ ভণ্ডনকারকা…পে॰… সঙ্ঘে অধিকরণকারকা তে উপসঙ্কমিত্ৰা এৰং ৰদন্তি – ‘মা খো তুম্হে , আযস্মন্তো, এসো অজেসি। বলৰাবলৰং পটিমন্তেথ। তুম্হে তেন পণ্ডিততরা চ ব্যত্ততরা চ বহুস্সুততরা চ অলমত্ততরা চ। মা চস্স ভাযিত্থ। মযম্পি তুম্হাকং পক্খা ভৰিস্সামা’তি। তেন অনুপ্পন্নানি চেৰ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৰায ৰেপুল্লায সংৰত্তন্তি। সঙ্ঘো পণ্ডুকলোহিতকানং ভিক্খূনং তজ্জনীযকম্মং করোতি। যস্সাযস্মতো খমতি পণ্ডুকলোহিতকানং ভিক্খূনং তজ্জনীযস্স কম্মস্স করণং, সো তুণ্হস্স; যস্স নক্খমতি, সো ভাসেয্য। ‘‘ততিযম্পি এতমত্থং ৰদামি – সুণাতু মে, ভন্তে, সঙ্ঘো । ইমে পণ্ডুকলোহিতকা ভিক্খূ অত্তনা ভণ্ডনকারকা…পে॰… সঙ্ঘে অধিকরণকারকা, যেপি চঞ্ঞে ভিক্খূ ভণ্ডনকারকা…পে॰… সঙ্ঘে অধিকরণকারকা তে উপসঙ্কমিত্ৰা এৰং ৰদন্তি – ‘মা খো তুম্হে, আযস্মন্তো, এসো অজেসি। বলৰাবলৰং পটিমন্তেথ। তুম্হে তেন পণ্ডিততরা চ ব্যত্ততরা চ বহুস্সুততরা চ অলমত্ততরা চ। মা চস্স ভাযিত্থ। মযম্পি তুম্হাকং পক্খা ভৰিস্সামা’তি। তেন অনুপ্পন্নানি চেৰ ভণ্ডনানি উপ্পজ্জন্তি, উপ্পন্নানি চ ভণ্ডনানি ভিয্যোভাৰায ৰেপুল্লায সংৰত্তন্তি। সঙ্ঘো পণ্ডুকলোহিতকানং ভিক্খূনং তজ্জনীযকম্মং করোতি। যস্সাযস্মতো খমতি পণ্ডুকলোহিতকানং ভিক্খূনং তজ্জনীযস্স কম্মস্স করণং, সো তুণ্হস্স; যস্স নক্খমতি, সো ভাসেয্য। ‘‘কতং সঙ্ঘেন পণ্ডুকলোহিতকানং ভিক্খূনং তজ্জনীযকম্মং। খমতি সঙ্ঘস্স, তস্মা তুণ্হী, এৰমেতং ধারযামী’’তি। অধম্মকম্মদ্ৰাদসকং ৪. ‘‘তীহি , ভিক্খৰে, অঙ্গেহি সমন্নাগতং তজ্জনীযকম্মং অধম্মকম্মঞ্চ [অধম্মকম্মঞ্চেৰ (স্যা॰)] হোতি, অৰিনযকম্মঞ্চ, দুৰূপসন্তঞ্চ। অসম্মুখা কতং হোতি, অপ্পটিপুচ্ছা কতং হোতি, অপ্পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অনাপত্তিযা কতং হোতি, অদেসনাগামিনিযা আপত্তিযা কতং হোতি, দেসিতায আপত্তিযা কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি , ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অচোদেত্ৰা কতং হোতি, অসারেত্ৰা কতং হোতি, আপত্তিং অনারোপেত্ৰা কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অসম্মুখা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অপ্পটিপুচ্ছা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অপ্পটিঞ্ঞায কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি , ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অনাপত্তিযা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অদেসনাগামিনিযা আপত্তিযা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি , ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। দেসিতায আপত্তিযা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অচোদেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অসারেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। আপত্তিং অনারোপেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে , তীহঙ্গেহি সমন্নাগতং তজ্জনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অধম্মকম্মদ্ৰাদসকং নিট্ঠিতং। ধম্মকম্মদ্ৰাদসকং ৫. ‘‘তীহি, ভিক্খৰে, অঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। সম্মুখা কতং হোতি, পটিপুচ্ছা কতং হোতি, পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। আপত্তিযা কতং হোতি, দেসনাগামিনিযা আপত্তিযা কতং হোতি , অদেসিতায আপত্তিযা কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। চোদেত্ৰা কতং হোতি, সারেত্ৰা কতং হোতি, আপত্তিং আরোপেত্ৰা কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। সম্মুখা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। পটিপুচ্ছা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি , ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। পটিঞ্ঞায কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। আপত্তিযা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। দেসনাগামিনিযা আপত্তিযা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। অদেসিতায আপত্তিযা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। চোদেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। সারেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। আপত্তিং আরোপেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং তজ্জনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ধম্মকম্মদ্ৰাদসকং নিট্ঠিতং। আকঙ্খমানছক্কং ৬. [পরি॰ ৩২৩] ‘‘তীহি, ভিক্খৰে, অঙ্গেহি সমন্নাগতস্স ভিক্খুনো, আকঙ্খমানো সঙ্ঘো, তজ্জনীযকম্মং করেয্য। ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; বালো হোতি অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো , আকঙ্খমানো সঙ্ঘো, তজ্জনীযকম্মং করেয্য। ‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, তজ্জনীযকম্মং করেয্য। অধিসীলে সীলৰিপন্নো হোতি, অজ্ঝাচারে আচারৰিপন্নো হোতি, অতিদিট্ঠিযা দিট্ঠিৰিপন্নো হোতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, তজ্জনীযকম্মং করেয্য। ‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, তজ্জনীযকম্মং করেয্য। বুদ্ধস্স অৰণ্ণং ভাসতি, ধম্মস্স অৰণ্ণং ভাসতি, সঙ্ঘস্স অৰণ্ণং ভাসতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, তজ্জনীযকম্মং করেয্য। ‘‘তিণ্ণং, ভিক্খৰে, ভিক্খূনং, আকঙ্খমানো সঙ্ঘো, তজ্জনীযকম্মং করেয্য। একো ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; একো বালো হোতি অব্যত্তো আপত্তিবহুলো অনপদানো; একো গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, তজ্জনীযকম্মং করেয্য। ‘‘অপরেসম্পি , ভিক্খৰে, তিণ্ণং ভিক্খূনং, আকঙ্খমানো সঙ্ঘো, তজ্জনীযকম্মং করেয্য। একো অধিসীলে সীলৰিপন্নো হোতি, একো অজ্ঝাচারে আচারৰিপন্নো হোতি, একো অতিদিট্ঠিযা দিট্ঠিৰিপন্নো হোতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, তজ্জনীযকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, তজ্জনীযকম্মং করেয্য । একো বুদ্ধস্স অৰণ্ণং ভাসতি, একো ধম্মস্স অৰণ্ণং ভাসতি, একো সঙ্ঘস্স অৰণ্ণং ভাসতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, তজ্জনীযকম্মং করেয্য। আকঙ্খমানছক্কং নিট্ঠিতং। অট্ঠারসৰত্তং ৭. ‘‘তজ্জনীযকম্মকতেন , ভিক্খৰে, ভিক্খুনা সম্মা ৰত্তিতব্বং। তত্রাযং সম্মাৰত্তনা – ন উপসম্পাদেতব্বং, ন নিস্সযো দাতব্বো, ন সামণেরো উপট্ঠাপেতব্বো, ন ভিক্খুনোৰাদকসম্মুতি [সম্মতি (স্যা॰)] সাদিতব্বা, সম্মতেনপি ভিক্খুনিযো ন ওৰদিতব্বা। যায আপত্তিযা সঙ্ঘেন তজ্জনীযকম্মং কতং হোতি সা আপত্তি ন আপজ্জিতব্বা, অঞ্ঞা ৰা তাদিসিকা, ততো ৰা পাপিট্ঠতরা; কম্মং ন গরহিতব্বং, কম্মিকা ন গরহিতব্বা। ন পকতত্তস্স ভিক্খুনো উপোসথো ঠপেতব্বো, ন পৰারণা ঠপেতব্বা, ন সৰচনীযং কাতব্বং, ন অনুৰাদো পট্ঠপেতব্বো, ন ওকাসো কারেতব্বো, ন চোদেতব্বো, ন সারেতব্বো, ন ভিক্খূহি [ন ভিক্খূ ভিক্খূহি (স্যা॰)] সম্পযোজেতব্ব’’ন্তি। তজ্জনীযকম্মে অট্ঠারসৰত্তং নিট্ঠিতং। নপ্পটিপ্পস্সম্ভেতব্বঅট্ঠারসকং ৮. অথ খো সঙ্ঘো পণ্ডুকলোহিতকানং ভিক্খূনং তজ্জনীযকম্মং অকাসি । তে সঙ্ঘেন তজ্জনীযকম্মকতা সম্মা ৰত্তন্তি, লোমং পাতেন্তি , নেত্থারং ৰত্তন্তি, ভিক্খূ উপসঙ্কমিত্ৰা এৰং ৰদন্তি – ‘‘মযং, আৰুসো, সঙ্ঘেন তজ্জনীযকম্মকতা সম্মা ৰত্তাম, লোমং পাতেম, নেত্থারং ৰত্তাম, কথং নু খো অম্হেহি পটিপজ্জিতব্ব’’ন্তি? ভিক্খূ ভগৰতো এতমত্থং আরোচেসুং…পে॰…। ‘‘তেন হি, ভিক্খৰে, সঙ্ঘো পণ্ডুকলোহিতকানং ভিক্খূনং তজ্জনীযকম্মং পটিপ্পস্সম্ভেতু। পঞ্চহি, ভিক্খৰে, অঙ্গেহি সমন্নাগতস্স ভিক্খুনো তজ্জনীযকম্মং নপ্পটিপ্পস্সম্ভেতব্বং। উপসম্পাদেতি, নিস্সযং দেতি, সামণেরং উপট্ঠাপেতি, ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো তজ্জনীযকম্মং নপ্পটিপ্পস্সম্ভেতব্বং। [পরি॰ ৪২০] ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো তজ্জনীযকম্মং নপ্পটিপ্পস্সম্ভেতব্বং। যায আপত্তিযা সঙ্ঘেন তজ্জনীযকম্মং কতং হোতি তং আপত্তিং আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং গরহতি, কম্মিকে গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো তজ্জনীযকম্মং নপ্পটিপ্পস্সম্ভেতব্বং। ‘‘অট্ঠহি , ভিক্খৰে, অঙ্গেহি সমন্নাগতস্স ভিক্খুনো তজ্জনীযকম্মং নপ্পটিপ্পস্সম্ভেতব্বং। পকতত্তস্স ভিক্খুনো উপোসথং ঠপেতি, পৰারণং ঠপেতি, সৰচনীযং করোতি, অনুৰাদং পট্ঠপেতি, ওকাসং কারেতি, চোদেতি, সারেতি, ভিক্খূহি সম্পযোজেতি [ভিক্খূ ভিক্খূহি সম্পযোজেতি (স্যা॰)] – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো তজ্জনীযকম্মং নপ্পটিপ্পস্সম্ভেতব্বং। নপ্পটিপ্পস্সম্ভেতব্বঅট্ঠারসকং নিট্ঠিতং। পটিপ্পস্সম্ভেতব্বঅট্ঠারসকং ৯. ‘‘পঞ্চহি, ভিক্খৰে, অঙ্গেহি সমন্নাগতস্স ভিক্খুনো তজ্জনীযকম্মং পটিপ্পস্সম্ভেতব্বং। ন উপসম্পাদেতি, ন নিস্সযং দেতি, ন সামণেরং উপট্ঠাপেতি, ন ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ন ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো তজ্জনীযকম্মং পটিপ্পস্সম্ভেতব্বং। ‘‘অপরেহিপি , ভিক্খৰে, পঞ্চহঙ্গেহি সমন্নাগতস্স ভিক্খুনো তজ্জনীযকম্মং পটিপ্পস্সম্ভেতব্বং। যায আপত্তিযা সঙ্ঘেন তজ্জনীযকম্মং কতং হোতি তং আপত্তিং ন আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং ন গরহতি, কম্মিকে ন গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো তজ্জনীযকম্মং পটিপ্পস্সম্ভেতব্বং। ‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো তজ্জনীযকম্মং পটিপ্পস্সম্ভেতব্বং। ন পকতত্তস্স ভিক্খুনো উপোসথং ঠপেতি, ন পৰারণং ঠপেতি, ন সৰচনীযং করোতি, ন অনুৰাদং পট্ঠপেতি, ন ওকাসং কারেতি, ন চোদেতি, ন সারেতি, ন ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো , তজ্জনীযকম্মং পটিপ্পস্সম্ভেতব্বং। পটিপ্পস্সম্ভেতব্বঅট্ঠারসকং নিট্ঠিতং। ১০. ‘‘এৰঞ্চ পন, ভিক্খৰে, পটিপ্পস্সম্ভেতব্বং। তেহি, ভিক্খৰে, পণ্ডুকলোহিতকেহি ভিক্খূহি সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘মযং, ভন্তে, সঙ্ঘেন তজ্জনীযকম্মকতা সম্মা ৰত্তাম, লোমং পাতেম, নেত্থারং ৰত্তাম, তজ্জনীযস্স কম্মস্স পটিপ্পস্সদ্ধিং যাচামা’তি। দুতিযম্পি যাচিতব্বা। ততিযম্পি যাচিতব্বা। ব্যত্তেন ভিক্খুনা পটিবলেন সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো। ইমে পণ্ডুকলোহিতকা ভিক্খূ সঙ্ঘেন তজ্জনীযকম্মকতা সম্মা ৰত্তন্তি, লোমং পাতেন্তি, নেত্থারং ৰত্তন্তি , তজ্জনীযস্স কম্মস্স পটিপ্পস্সদ্ধিং যাচন্তি। যদি সঙ্ঘস্স পত্তকল্লং, সঙ্ঘো পণ্ডুকলোহিতকানং ভিক্খূনং তজ্জনীযকম্মং পটিপ্পস্সম্ভেয্য। এসা ঞত্তি। ‘‘সুণাতু মে, ভন্তে, সঙ্ঘো। ইমে পণ্ডুকলোহিতকা ভিক্খূ সঙ্ঘেন তজ্জনীযকম্মকতা সম্মা ৰত্তন্তি, লোমং পাতেন্তি, নেত্থারং ৰত্তন্তি, তজ্জনীযস্স কম্মস্স পটিপ্পস্সদ্ধিং যাচন্তি। সঙ্ঘো পণ্ডুকলোহিতকানং ভিক্খূনং তজ্জনীযকম্মং পটিপ্পস্সম্ভেতি। যস্সাযস্মতো খমতি পণ্ডুকলোহিতকানং ভিক্খূনং তজ্জনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি – সুণাতু মে , ভন্তে, সঙ্ঘো। ইমে পণ্ডুকলোহিতকা ভিক্খূ সঙ্ঘেন তজ্জনীযকম্মকতা সম্মা ৰত্তন্তি, লোমং পাতেন্তি, নেত্থারং ৰত্তন্তি, তজ্জনীযস্স কম্মস্স পটিপ্পস্সদ্ধিং যাচন্তি। সঙ্ঘো পণ্ডুকলোহিতকানং ভিক্খূনং তজ্জনীযকম্মং পটিপ্পস্সম্ভেতি। যস্সাযস্মতো খমতি পণ্ডুকলোহিতকানং ভিক্খূনং তজ্জনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘ততিযম্পি এতমত্থং ৰদামি – সুণাতু মে, ভন্তে, সঙ্ঘো। ইমে পণ্ডুকলোহিতকা ভিক্খূ সঙ্ঘেন তজ্জনীযকম্মকতা সম্মা ৰত্তন্তি, লোমং পাতেন্তি, নেত্থারং ৰত্তন্তি, তজ্জনীযস্স কম্মস্স পটিপ্পস্সদ্ধিং যাচন্তি। সঙ্ঘো পণ্ডুকলোহিতকানং ভিক্খূনং তজ্জনীযকম্মং পটিপ্পস্সম্ভেতি। যস্সাযস্মতো খমতি পণ্ডুকলোহিতকানং ভিক্খূনং তজ্জনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘পটিপ্পস্সদ্ধং সঙ্ঘেন পণ্ডুকলোহিতকানং ভিক্খূনং তজ্জনীযকম্মং। খমতি সঙ্ঘস্স, তস্মা তুণ্হী, এৰমেতং ধারযামী’’তি। তজ্জনীযকম্মং নিট্ঠিতং পঠমং। ২. নিযস্সকম্মং ১১. তেন খো পন সমযেন আযস্মা সেয্যসকো বালো হোতি অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি; অপিস্সু ভিক্খূ পকতা [পকতত্তা (সী॰ স্যা॰)] পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা সেয্যসকো বালো ভৰিস্সতি অব্যত্তো আপত্তিবহুলো অনপদানো; গিহিসংসট্ঠো ৰিহরিস্সতি অননুলোমিকেহি গিহিসংসগ্গেহি ; অপিস্সু ভিক্খূ পকতা পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা’’তি। অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ভিক্খূ পটিপুচ্ছি – ‘‘সচ্চং কির, ভিক্খৰে, সেয্যসকো ভিক্খু বালো অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি; অপিস্সু ভিক্খূ পকতা পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা’’তি? ‘‘সচ্চং ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং, ভিক্খৰে, তস্স মোঘপুরিসস্স অননুলোমিকং অপ্পতিরূপং অস্সামণকং অকপ্পিযং অকরণীযং। কথঞ্হি নাম সো, ভিক্খৰে, মোঘপুরিসো বালো ভৰিস্সতি অব্যত্তো আপত্তিবহুলো অনপদানো; গিহিসংসট্ঠো ৰিহরিস্সতি অননুলোমিকেহি গিহিসংসগ্গেহি; অপিস্সু ভিক্খূ পকতা পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা। নেতং, ভিক্খৰে, অপ্পসন্নানং ৰা পসাদায…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, সঙ্ঘো সেয্যসকস্স ভিক্খুনো নিযস্সকম্মং [নিযসকম্মং (ক॰)] করোতু – নিস্সায তে ৰত্থব্বন্তি। এৰঞ্চ পন, ভিক্খৰে, কাতব্বং। পঠমং সেয্যসকো ভিক্খু চোদেতব্বো, চোদেত্ৰা সারেতব্বো, সারেত্ৰা আপত্তিং আরোপেতব্বো [আপত্তি আরোপেতব্বা (সী॰ স্যা॰)], আপত্তিং আরোপেত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো – ১২. ‘‘সুণাতু মে, ভন্তে, সঙ্ঘো। অযং সেয্যসকো ভিক্খু বালো অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি; অপিস্সু ভিক্খূ পকতা পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা। যদি সঙ্ঘস্স পত্তকল্লং, সঙ্ঘো সেয্যসকস্স ভিক্খুনো নিযস্সকম্মং করেয্য – নিস্সায তে ৰত্থব্বন্তি। এসা ঞত্তি। ‘‘সুণাতু মে, ভন্তে, সঙ্ঘো। অযং সেয্যসকো ভিক্খু বালো অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি; অপিস্সু ভিক্খূ পকতা পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা। সঙ্ঘো সেয্যসকস্স ভিক্খুনো নিযস্সকম্মং করোতি – নিস্সায তে ৰত্থব্বন্তি। যস্সাযস্মতো খমতি সেয্যসকস্স ভিক্খুনো নিযস্সস্স কম্মস্স করণং – নিস্সায তে ৰত্থব্বন্তি, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি – সুণাতু মে, ভন্তে, সঙ্ঘো। অযং সেয্যসকো ভিক্খু বালো অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি; অপিস্সু ভিক্খূ পকতা পরিৰাসং দেন্তা মূলায পটিকস্সন্তা মানত্তং দেন্তা অব্ভেন্তা। সঙ্ঘো সেয্যসকস্স ভিক্খুনো নিযস্সকম্মং করোতি – নিস্সায তে ৰত্থব্বন্তি। যস্সাযস্মতো খমতি সেয্যসকস্স ভিক্খুনো নিযস্সস্স কম্মস্স করণং – নিস্সায তে ৰত্থব্বন্তি, সো তুণ্হস্স; যস্স নক্খমতি, সো ভাসেয্য। ‘‘কতং সঙ্ঘেন সেয্যসকস্স ভিক্খুনো নিযস্সকম্মং – নিস্সায তে ৰত্থব্বন্তি। খমতি সঙ্ঘস্স, তস্মা তুণ্হী, এৰমেতং ধারযামী’’তি। অধম্মকম্মদ্ৰাদসকং ১৩. ‘‘তীহি, ভিক্খৰে, অঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অসম্মুখা কতং হোতি, অপ্পটিপুচ্ছা কতং হোতি, অপ্পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অনাপত্তিযা কতং হোতি, অদেসনাগামিনিযা আপত্তিযা কতং হোতি, দেসিতায আপত্তিযা কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অচোদেত্ৰা কতং হোতি, অসারেত্ৰা কতং হোতি, আপত্তিং অনারোপেত্ৰা কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে…পে॰… অসম্মুখা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে॰…। ‘‘অপরেহিপি , ভিক্খৰে…পে॰… অপ্পটিপুচ্ছা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে॰…। ‘‘অপরেহিপি, ভিক্খৰে…পে॰… অপ্পটিঞ্ঞায কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে॰…। ‘‘অপরেহিপি, ভিক্খৰে…পে॰… অনাপত্তিযা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে॰… । ‘‘অপরেহিপি, ভিক্খৰে…পে॰… অদেসনাগামিনিযা আপত্তিযা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে॰…। ‘‘অপরেহিপি, ভিক্খৰে…পে॰… দেসিতায আপত্তিযা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে॰…। ‘‘অপরেহিপি, ভিক্খৰে…পে॰… অচোদেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে॰…। ‘‘অপরেহিপি, ভিক্খৰে…পে॰… অসারেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে…পে॰… । ‘‘অপরেহিপি, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। আপত্তিং অনারোপেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অধম্মকম্মদ্ৰাদসকং নিট্ঠিতং। ধম্মকম্মদ্ৰাদসকং ১৪. ‘‘তীহি, ভিক্খৰে, অঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। সম্মুখা কতং হোতি, পটিপুচ্ছা কতং হোতি, পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি , ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। আপত্তিযা কতং হোতি, দেসনাগামিনিযা আপত্তিযা কতং হোতি, অদেসিতায আপত্তিযা কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। চোদেত্ৰা কতং হোতি, সারেত্ৰা কতং হোতি, আপত্তিং আরোপেত্ৰা কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে…পে॰… সম্মুখা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে॰…। ‘‘অপরেহিপি, ভিক্খৰে…পে॰… পটিপুচ্ছা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে॰…। ‘‘অপরেহিপি, ভিক্খৰে…পে॰… পটিঞ্ঞায কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে॰…। ‘‘অপরেহিপি , ভিক্খৰে…পে॰… আপত্তিযা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে॰… । ‘‘অপরেহিপি, ভিক্খৰে…পে॰… দেসনাগামিনিযা আপত্তিযা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে॰…। ‘‘অপরেহিপি, ভিক্খৰে…পে॰… অদেসিতায আপত্তিযা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে॰…। ‘‘অপরেহিপি, ভিক্খৰে…পে॰… চোদেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে॰…। ‘‘অপরেহিপি, ভিক্খৰে…পে॰… সারেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে…পে॰… । ‘‘অপরেহিপি , ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। আপত্তিং আরোপেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং নিযস্সকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ধম্মকম্মদ্ৰাদসকং নিট্ঠিতং। আকঙ্খমানছক্কং ১৫. [পরি॰ ৩২৩] ‘‘তীহি, ভিক্খৰে, অঙ্গেহি সমন্নাগতস্স ভিক্খুনো, আকঙ্খমানো সঙ্ঘো, নিযস্সকম্মং করেয্য। ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; বালো হোতি অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, নিযস্সকম্মং করেয্য। ‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, নিযস্সকম্মং করেয্য। অধিসীলে সীলৰিপন্নো হোতি, অজ্ঝাচারে আচারৰিপন্নো হোতি, অতিদিট্ঠিযা দিট্ঠিৰিপন্নো হোতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, নিযস্সকম্মং করেয্য। ‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, নিযস্সকম্মং করেয্য। বুদ্ধস্স অৰণ্ণং ভাসতি, ধম্মস্স অৰণ্ণং ভাসতি, সঙ্ঘস্স অৰণ্ণং ভাসতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, নিযস্সকম্মং করেয্য। ‘‘তিণ্ণং, ভিক্খৰে, ভিক্খূনং, আকঙ্খমানো সঙ্ঘো, নিযস্সকম্মং করেয্য। একো ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; একো বালো হোতি, অব্যত্তো আপত্তিবহুলো অনপদানো; একো গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, নিযস্সকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, নিযস্সকম্মং করেয্য। একো অধিসীলে সীলৰিপন্নো হোতি, একো অজ্ঝাচারে আচারৰিপন্নো হোতি, একো অতিদিট্ঠিযা দিট্ঠিৰিপন্নো হোতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, নিযস্সকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, নিযস্সকম্মং করেয্য। একো বুদ্ধস্স অৰণ্ণং ভাসতি, একো ধম্মস্স অৰণ্ণং ভাসতি, একো সঙ্ঘস্স অৰণ্ণং ভাসতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, নিযস্সকম্মং করেয্য। আকঙ্খমানছক্কং নিট্ঠিতং। অট্ঠারসৰত্তং ১৬. ‘‘নিযস্সকম্মকতেন , ভিক্খৰে, ভিক্খুনা সম্মা ৰত্তিতব্বং। তত্রাযং সম্মাৰত্তনা – ন উপসম্পাদেতব্বং, ন নিস্সযো দাতব্বো, ন সামণেরো উপট্ঠাপেতব্বো, ন ভিক্খুনোৰাদকসম্মুতি সাদিতব্বা, সম্মতেনপি ভিক্খুনিযো ন ওৰদিতব্বা। যায আপত্তিযা সঙ্ঘেন নিযস্সকম্মং কতং হোতি সা আপত্তি ন আপজ্জিতব্বা, অঞ্ঞা ৰা তাদিসিকা, ততো ৰা পাপিট্ঠতরা; কম্মং ন গরহিতব্বং, কম্মিকা ন গরহিতব্বা। ন পকতত্তস্স ভিক্খুনো উপোসথো ঠপেতব্বো, ন পৰারণা ঠপেতব্বা, ন সৰচনীযং কাতব্বং, ন অনুৰাদো পট্ঠপেতব্বো, ন ওকাসো কারাপেতব্বো, ন চোদেতব্বো, ন সারেতব্বো, ন ভিক্খূহি সম্পযোজেতব্ব’’ন্তি। নিযস্সকম্মে অট্ঠারসৰত্তং নিট্ঠিতং। ১৭. অথ খো সঙ্ঘো সেয্যসকস্স ভিক্খুনো নিযস্সকম্মং অকাসি – নিস্সায তে ৰত্থব্বন্তি। সো সঙ্ঘেন নিযস্সকম্মকতো কল্যাণমিত্তে সেৰমানো ভজমানো পযিরুপাসমানো উদ্দিসাপেন্তো পরিপুচ্ছন্তো বহুস্সুতো হোতি, আগতাগমো ধম্মধরো ৰিনযধরো মাতিকাধরো পণ্ডিতো ৰিযত্তো মেধাৰী লজ্জী কুক্কুচ্চকো সিক্খাকামো। সম্মা ৰত্ততি, লোমং পাতেতি, নেত্থারং ৰত্ততি, ভিক্খূ উপসঙ্কমিত্ৰা এৰং ৰদেতি – ‘‘অহং, আৰুসো, সঙ্ঘেন নিযস্সকম্মকতো সম্মা ৰত্তামি, লোমং পাতেমি, নেত্থারং ৰত্তামি। কথং নু খো মযা পটিপজ্জিতব্ব’’ন্তি? ভিক্খূ ভগৰতো এতমত্থং আরোচেসুং…পে॰…। ‘‘তেন হি, ভিক্খৰে, সঙ্ঘো সেয্যসকস্স ভিক্খুনো নিযস্সকম্মং পটিপ্পস্সম্ভেতু। নপ্পটিপ্পস্সম্ভেতব্বঅট্ঠারসকং ১৮. ‘‘পঞ্চহি, ভিক্খৰে, অঙ্গেহি সমন্নাগতস্স ভিক্খুনো নিযস্সকম্মং নপ্পটিপ্পস্সম্ভেতব্বং। উপসম্পাদেতি, নিস্সযং দেতি, সামণেরং উপট্ঠাপেতি, ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো নিযস্সকম্মং নপ্পটিপ্পস্সম্ভেতব্বং। [পরি॰ ৪২০] ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো নিযস্সকম্মং নপ্পটিপ্পস্সম্ভেতব্বং। যায আপত্তিযা সঙ্ঘেন নিযস্সকম্মং কতং হোতি তং আপত্তিং আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং গরহতি, কম্মিকে গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো নিযস্সকম্মং নপ্পটিপ্পস্সম্ভেতব্বং। ‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো নিযস্সকম্মং নপ্পটিপ্পস্সম্ভেতব্বং। পকতত্তস্স ভিক্খুনো উপোসথং ঠপেতি, পৰারণং ঠপেতি, সৰচনীযং করোতি, অনুৰাদং পট্ঠপেতি , ওকাসং কারেতি, চোদেতি, সারেতি, ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো নিযস্সকম্মং নপ্পটিপ্পস্সম্ভেতব্বং। নপ্পটিপ্পস্সম্ভেতব্বঅট্ঠারসকং নিট্ঠিতং। পটিপ্পস্সম্ভেতব্বঅট্ঠারসকং ১৯. ‘‘পঞ্চহি , ভিক্খৰে, অঙ্গেহি সমন্নাগতস্স ভিক্খুনো নিযস্সকম্মং পটিপ্পস্সম্ভেতব্বং । ন উপসম্পাদেতি, ন নিস্সযং দেতি, ন সামণেরং উপট্ঠাপেতি, ন ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ন ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো নিযস্সকম্মং পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো নিযস্সকম্মং পটিপ্পস্সম্ভেতব্বং। যায আপত্তিযা সঙ্ঘেন নিযস্সকম্মং কতং হোতি তং আপত্তিং ন আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং ন গরহতি, কম্মিকে ন গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো নিযস্সকম্মং পটিপ্পস্সম্ভেতব্বং। ‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো নিযস্সকম্মং পটিপ্পস্সম্ভেতব্বং। ন পকতত্তস্স ভিক্খুনো উপোসথং ঠপেতি, ন পৰারণং ঠপেতি, ন সৰচনীযং করোতি, ন অনুৰাদং পট্ঠপেতি, ন ওকাসং কারেতি, ন চোদেতি, ন সারেতি, ন ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো নিযস্সকম্মং পটিপ্পস্সম্ভেতব্বং। পটিপ্পস্সম্ভেতব্বঅট্ঠারসকং নিট্ঠিতং। ২০. ‘‘এৰঞ্চ পন, ভিক্খৰে, পটিপ্পস্সম্ভেতব্বং। তেন, ভিক্খৰে, সেয্যসকেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘অহং, ভন্তে, সঙ্ঘেন নিযস্সকম্মকতো সম্মা ৰত্তামি, লোমং পাতেমি, নেত্থারং ৰত্তামি, নিযস্সস্স কম্মস্স পটিপ্পস্সদ্ধিং যাচামী’তি। দুতিযম্পি যাচিতব্বা। ততিযম্পি যাচিতব্বা । ব্যত্তেন ভিক্খুনা পটিবলেন সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো। অযং সেয্যসকো ভিক্খু সঙ্ঘেন নিযস্সকম্মকতো সম্মা ৰত্ততি, লোমং পাতেতি, নেত্থারং ৰত্ততি, নিযস্সস্স কম্মস্স পটিপ্পস্সদ্ধিং যাচতি। যদি সঙ্ঘস্স পত্তকল্লং, সঙ্ঘো সেয্যসকস্স ভিক্খুনো নিযস্সকম্মং পটিপ্পস্সম্ভেয্য। এসা ঞত্তি। ‘‘সুণাতু মে, ভন্তে, সঙ্ঘো। অযং সেয্যসকো ভিক্খু সঙ্ঘেন নিযস্সকম্মকতো সম্মা ৰত্ততি, লোমং পাতেতি, নেত্থারং ৰত্ততি, নিযস্সস্স কম্মস্স পটিপ্পস্সদ্ধিং যাচতি। সঙ্ঘো সেয্যসকস্স ভিক্খুনো নিযস্সকম্মং পটিপ্পস্সম্ভেতি। যস্সাযস্মতো খমতি সেয্যসকস্স ভিক্খুনো নিযস্সস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি – সুণাতু মে, ভন্তে, সঙ্ঘো। অযং সেয্যসকো ভিক্খু সঙ্ঘেন নিযস্সকম্মকতো সম্মা ৰত্ততি, লোমং পাতেতি, নেত্থারং ৰত্ততি, নিযস্সস্স কম্মস্স পটিপ্পস্সদ্ধিং যাচতি। সঙ্ঘো সেয্যসকস্স ভিক্খুনো নিযস্সকম্মং পটিপ্পস্সম্ভেতি। যস্সাযস্মতো খমতি সেয্যসকস্স ভিক্খুনো নিযস্সস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘ততিযম্পি এতমত্থং ৰদামি – সুণাতু মে, ভন্তে, সঙ্ঘো। অযং সেয্যসকো ভিক্খু সঙ্ঘেন নিযস্সকম্মকতো সম্মা ৰত্ততি, লোমং পাতেতি, নেত্থারং ৰত্ততি, নিযস্সস্স কম্মস্স পটিপ্পস্সদ্ধিং যাচতি। সঙ্ঘো সেয্যসকস্স ভিক্খুনো নিযস্সকম্মং পটিপ্পস্সম্ভেতি। যস্সাযস্মতো খমতি সেয্যসকস্স ভিক্খুনো নিযস্সস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘পটিপ্পস্সদ্ধং সঙ্ঘেন সেয্যসকস্স ভিক্খুনো নিযস্সকম্মং। খমতি সঙ্ঘস্স, তস্মা তুণ্হী, এৰমেতং ধারযামী’’তি। নিযস্সকম্মং নিট্ঠিতং দুতিযং। ৩. পব্বাজনীযকম্মং ২১. [ইদং ৰত্থু পারা॰ ৪৩১ আদযো] তেন খো পন সমযেন অস্সজিপুনব্বসুকা নাম [নাম ভিক্খূ (ক॰)] কীটাগিরিস্মিং আৰাসিকা হোন্তি অলজ্জিনো পাপভিক্খূ। তে [চূল়ৰ॰ ২৯২ আদযো] এৰরূপং অনাচারং আচরন্তি – মালাৰচ্ছং রোপেন্তিপি রোপাপেন্তিপি, সিঞ্চন্তিপি সিঞ্চাপেন্তিপি, ওচিনন্তিপি ওচিনাপেন্তিপি, গন্থেন্তিপি গন্থাপেন্তিপি , একতোৰণ্টিকমালং করোন্তিপি কারাপেন্তিপি, উভতোৰণ্টিকমালং করোন্তিপি কারাপেন্তিপি, মঞ্জরিকং করোন্তিপি কারাপেন্তিপি, ৰিধূতিকং[ৰিধুতিকং (স্যা॰)] করোন্তিপি কারাপেন্তিপি, ৰটংসকং করোন্তিপি কারাপেন্তিপি, আৰেল়ং করোন্তিপি কারাপেন্তিপি, উরচ্ছদং করোন্তিপি কারাপেন্তিপি। তে কুলিত্থীনং কুলধীতানং কুলকুমারীনং কুলসুণ্হানং কুলদাসীনং একতোৰণ্টিকমালং হরন্তিপি হরাপেন্তিপি, উভতোৰণ্টিকমালং হরন্তিপি হরাপেন্তিপি, মঞ্জরিকং হরন্তিপি হরাপেন্তিপি, ৰিধূতিকং হরন্তিপি হরাপেন্তিপি, ৰটংসকং হরন্তিপি হরাপেন্তিপি, আৰেল়ং হরন্তিপি হরাপেন্তিপি, উরচ্ছদং হরন্তিপি হরাপেন্তিপি। তে কুলিত্থীহি কুলধীতাহি কুলকুমারীহি কুলসুণ্হাহি কুলদাসীহি সদ্ধিং একভাজনেপি ভুঞ্জন্তি, একথালকেপি পিৰন্তি, একাসনেপি নিসীদন্তি, একমঞ্চেপি তুৰট্টেন্তি, একত্থরণাপি তুৰট্টেন্তি, একপাৰুরণাপি তুৰট্টেন্তি, একত্থরণপাৰুরণাপি তুৰট্টেন্তি, ৰিকালেপি ভুঞ্জন্তি, মজ্জম্পি পিৰন্তি, মালাগন্ধৰিলেপনম্পি ধারেন্তি, নচ্চন্তিপি, গাযন্তিপি, ৰাদেন্তিপি, লাসেন্তিপি; নচ্চন্তিযাপি নচ্চন্তি, নচ্চন্তিযাপি গাযন্তি, নচ্চন্তিযাপি ৰাদেন্তি, নচ্চন্তিযাপি লাসেন্তি; গাযন্তিযাপি নচ্চন্তি, গাযন্তিযাপি গাযন্তি, গাযন্তিযাপি ৰাদেন্তি, গাযন্তিযাপি লাসেন্তি; ৰাদেন্তিযাপি নচ্চন্তি, ৰাদেন্তিযাপি গাযন্তি, ৰাদেন্তিযাপি ৰাদেন্তি, ৰাদেন্তিযাপি লাসেন্তি; লাসেন্তিযাপি নচ্চন্তি, লাসেন্তিযাপি গাযন্তি, লাসেন্তিযাপি ৰাদেন্তি, লাসেন্তিযাপি লাসেন্তি; অট্ঠপদেপি কীল়ন্তি, দসপদেপি কীল়ন্তি, আকাসেপি কীল়ন্তি, পরিহারপথেপি কীল়ন্তি, সন্তিকাযপি কীল়ন্তি, খলিকাযপি কীল়ন্তি, ঘটিকাযপি কীল়ন্তি, সলাকহত্থেনপি কীল়ন্তি, অক্খেনপি কীল়ন্তি, পঙ্গচীরেনপি কীল়ন্তি, ৰঙ্ককেনপি কীল়ন্তি, মোক্খচিকাযপি কীল়ন্তি, চিঙ্গুলকেনপি কীল়ন্তি, পত্তাল়্হকেনপি কীল়ন্তি, রথকেনপি কীল়ন্তি, ধনুকেনপি কীল়ন্তি, অক্খরিকাযপি কীল়ন্তি, মনেসিকাযপি কীল়ন্তি, যথাৰজ্জেনপি কীল়ন্তি; হত্থিস্মিম্পি সিক্খন্তি, অস্সস্মিম্পি সিক্খন্তি, রথস্মিম্পি সিক্খন্তি, ধনুস্মিম্পি সিক্খন্তি, থরুস্মিম্পি সিক্খন্তি; হত্থিস্সপি পুরতো ধাৰন্তি, অস্সস্সপি পুরতো ধাৰন্তি, রথস্সপি পুরতো [পুরতো ধাৰন্তি (স্যা॰)] ধাৰন্তিপি আধাৰন্তিপি; উস্সেল়েন্তিপি, অপ্ফোটেন্তিপি , নিব্বুজ্ঝন্তিপি, মুট্ঠীহিপি যুজ্ঝন্তি; রঙ্গমজ্ঝেপি সঙ্ঘাটিং পত্থরিত্ৰা নচ্চকিং [নচ্চন্তিং (সী॰ স্যা॰)] এৰং ৰদন্তি – ‘‘ইধ, ভগিনি, নচ্চস্সূ’’তি; নলাটিকম্পি দেন্তি; ৰিৰিধম্পি অনাচারং আচরন্তি। ২২. তেন খো পন সমযেন অঞ্ঞতরো ভিক্খু কাসীসু ৰস্সংৰুট্ঠো [ৰস্সংৰুত্থো (সী॰ স্যা॰)] সাৰত্থিং গচ্ছন্তো ভগৰন্তং দস্সনায যেন কীটাগিরি তদৰসরি। অথ খো সো ভিক্খু পুব্বণ্হসমযং নিৰাসেত্ৰা পত্তচীৰরমাদায কীটাগিরিং পিণ্ডায পাৰিসি পাসাদিকেন অভিক্কন্তেন পটিক্কন্তেন আলোকিতেন ৰিলোকিতেন সমিঞ্জিতেন [সম্মিঞ্জিতেন (সী॰ স্যা॰ কং॰)] পসারিতেন, ওক্খিত্তচক্খু ইরিযাপথসম্পন্নো। মনুস্সা তং ভিক্খুং পস্সিত্ৰা এৰমাহংসু – ‘‘ক্ৰাযং অবলবলো ৰিয মন্দমন্দো ৰিয ভাকুটিকভাকুটিকো ৰিয? কো ইমস্স উপগতস্স পিণ্ডকম্পি দস্সতি? অম্হাকং পন অয্যা অস্সজিপুনব্বসুকা সণ্হা সখিলা সুখসম্ভাসা মিহিতপুব্বঙ্গমা এহিস্ৰাগতৰাদিনো অব্ভাকুটিকা উত্তানমুখা পুব্বভাসিনো। তেসং খো নাম পিণ্ডো দাতব্বো’’তি। অদ্দসা খো অঞ্ঞতরো উপাসকো তং ভিক্খুং কীটাগিরিস্মিং পিণ্ডায চরন্তং; দিস্ৰান যেন সো ভিক্খু তেনুপসঙ্কমি, উপসঙ্কমিত্ৰা তং ভিক্খুং অভিৰাদেত্ৰা এতদৰোচ – ‘‘অপি, ভন্তে, পিণ্ডো লব্ভতী’’তি? ‘‘ন খো, আৰুসো, পিণ্ডো লব্ভতী’’তি। ‘‘এহি, ভন্তে, ঘরং গমিস্সামা’’তি। অথ খো সো উপাসকো তং ভিক্খুং ঘরং নেত্ৰা ভোজেত্ৰা এতদৰোচ – ‘‘কহং, ভন্তে, অয্যো গমিস্সতী’’তি? ‘‘সাৰত্থিং খো অহং, আৰুসো, গমিস্সামি ভগৰন্তং দস্সনাযা’’তি। ‘‘তেন হি, ভন্তে, মম ৰচনেন ভগৰতো পাদে সিরসা ৰন্দ, এৰঞ্চ ৰদেহি – ‘দুট্ঠো, ভন্তে, কীটাগিরিস্মিং আৰাসো। অস্সজিপুনব্বসুকা নাম কীটাগিরিস্মিং আৰাসিকা অলজ্জিনো পাপভিক্খূ। তে এৰরূপং অনাচারং আচরন্তি – মালাৰচ্ছং রোপেন্তিপি রোপাপেন্তিপি, সিঞ্চন্তিপি সিঞ্চাপেন্তিপি, ওচিনন্তিপি, ওচিনাপেন্তিপি, গন্থেন্তিপি গন্থাপেন্তিপি, একতোৰণ্টিকমালং করোন্তিপি কারাপেন্তিপি, উভতোৰণ্টিকমালং করোন্তিপি কারাপেন্তিপি, মঞ্জরিকং করোন্তিপি কারাপেন্তিপি, ৰিধূতিকং করোন্তিপি কারাপেন্তিপি, ৰটংসকং করোন্তিপি কারাপেন্তিপি, আৰেল়ং করোন্তিপি কারাপেন্তিপি, উরচ্ছদং করোন্তিপি কারাপেন্তিপি। তে কুলিত্থীনং কুলধীতানং কুলকুমারীনং কুলসুণ্হানং কুলদাসীনং একতোৰণ্টিকমালং হরন্তিপি হরাপেন্তিপি, উভতোৰণ্টিকমালং হরন্তিপি হরাপেন্তিপি, মঞ্জরিকং হরন্তিপি হরাপেন্তিপি, ৰিধূতিকং হরন্তিপি হরাপেন্তিপি, ৰটংসকং হরন্তিপি হরাপেন্তিপি, আৰেল়ং হরন্তিপি হরাপেন্তিপি, উরচ্ছদং হরন্তিপি হরাপেন্তিপি। তে কুলিত্থীহি কুলধীতাহি কুলকুমারীহি কুলসুণ্হাহি কুলদাসীহি সদ্ধিং একভাজনেপি ভুঞ্জন্তি, একথালকেপি পিৰন্তি, একাসনেপি নিসীদন্তি, একমঞ্চেপি তুৰট্টেন্তি, একত্থরণাপি তুৰট্টেন্তি, একপাৰুরণাপি তুৰট্টেন্তি, একত্থরণপাৰুরণাপি তুৰট্টেন্তি, ৰিকালেপি ভুঞ্জন্তি, মজ্জম্পি পিৰন্তি, মালাগন্ধৰিলেপনম্পি ধারেন্তি, নচ্চন্তিপি, গাযন্তিপি, ৰাদেন্তিপি, লাসেন্তিপি; নচ্চন্তিযাপি নচ্চন্তি, নচ্চন্তিযাপি গাযন্তি, নচ্চন্তিযাপি ৰাদেন্তি, নচ্চন্তিযাপি লাসেন্তি…পে॰… (চক্কং কাতব্বং)। লাসেন্তিযাপি নচ্চন্তি, লাসেন্তিযাপি গাযন্তি, লাসেন্তিযাপি ৰাদেন্তি, লাসেন্তিযাপি লাসেন্তি; অট্ঠপদেপি কীল়ন্তি, দসপদেপি কীল়ন্তি, আকাসেপি কীল়ন্তি, পরিহারপথেপি কীল়ন্তি, সন্তিকাযপি কীল়ন্তি, খলিকাযপি কীল়ন্তি, ঘটিকাযপি কীল়ন্তি, সলাকহত্থেনপি কীল়ন্তি, অক্খেনপি কীল়ন্তি, পঙ্গচীরেনপি কীল়ন্তি, ৰঙ্ককেনপি কীল়ন্তি, মোক্খচিকাযপি কীল়ন্তি, চিঙ্গুলকেনপি কীল়ন্তি, পত্তাল়্হকেনপি কীল়ন্তি, রথকেনপি কীল়ন্তি, ধনুকেনপি কীল়ন্তি, অক্খরিকাযপি কীল়ন্তি, মনেসিকাযপি কীল়ন্তি, যথাৰজ্জেনপি কীল়ন্তি; হত্থিস্মিম্পি সিক্খন্তি, অস্সস্মিম্পি সিক্খন্তি, রথস্মিম্পি সিক্খন্তি, ধনুস্মিম্পি সিক্খন্তি, থরুস্মিম্পি সিক্খন্তি; হত্থিস্সপি পুরতো ধাৰন্তি, অস্সস্সপি পুরতো ধাৰন্তি, রথস্সপি পুরতো ধাৰন্তিপি আধাৰন্তিপি; উস্সেল়েন্তিপি, অপ্ফোটেন্তিপি, নিব্বুজ্ঝন্তিপি, মুট্ঠীহিপি যুজ্ঝন্তি; রঙ্গমজ্ঝেপি সঙ্ঘাটিং পত্থরিত্ৰা নচ্চকিং এৰং ৰদন্তি – ‘ইধ, ভগিনি, নচ্চস্সূ’তি; নলাটিকম্পি দেন্তি; ৰিৰিধম্পি অনাচারং আচরন্তি। যেপি তে, ভন্তে, মনুস্সা পুব্বে সদ্ধা অহেসুং পসন্না তেপি এতরহি অস্সদ্ধা অপ্পসন্না। যানিপি তানি সঙ্ঘস্স পুব্বে দানপথানি তানিপি এতরহি উপচ্ছিন্নানি। রিঞ্চন্তি পেসলা ভিক্খূ , নিৰসন্তি পাপভিক্খূ। সাধু, ভন্তে, ভগৰা কীটাগিরিং ভিক্খূ পহিণেয্য, যথাযং কীটাগিরিস্মিং আৰাসো সণ্ঠহেয্যা’’তি। ‘‘এৰমাৰুসো’’তি খো সো ভিক্খু তস্স উপাসকস্স পটিস্সুণিত্ৰা উট্ঠাযাসনা যেন সাৰত্থি তেন পক্কামি। অনুপুব্বেন যেন সাৰত্থি জেতৰনং অনাথপিণ্ডিকস্স আরামো যেন ভগৰা তেনুপসঙ্কমি, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। আচিণ্ণং খো পনেতং বুদ্ধানং ভগৰন্তানং আগন্তুকেহি ভিক্খূহি সদ্ধিং পটিসম্মোদিতুং। অথ খো ভগৰা তং ভিক্খুং এতদৰোচ – ‘‘কচ্চি, ভিক্খু, খমনীযং, কচ্চি যাপনীযং, কচ্চিসি অপ্পকিলমথেন অদ্ধানং আগতো, কুতো চ ত্ৰং ভিক্খু আগচ্ছসী’’তি? ‘‘খমনীযং, ভগৰা, যাপনীযং ভগৰা; অপ্পকিলমথেন চ অহং, ভন্তে, অদ্ধানং আগতো। ইধাহং, ভন্তে, কাসীসু ৰস্সংৰুট্ঠো সাৰত্থিং আগচ্ছন্তো ভগৰন্তং দস্সনায যেন কীটাগিরি তদৰসরিং। অথ খ্ৰাহং, ভন্তে, পুব্বণ্হসমযং নিৰাসেত্ৰা পত্তচীৰরমাদায কীটাগিরিং পিণ্ডায পাৰিসিং। অদ্দসা খো মং, ভন্তে, অঞ্ঞতরো উপাসকো কীটাগিরিস্মিং পিণ্ডায চরন্তং ; দিস্ৰান যেনাহং তেনুপসঙ্কমি, উপসঙ্কমিত্ৰা মং অভিৰাদেত্ৰা এতদৰোচ – ‘অপি, ভন্তে, পিণ্ডো লব্ভতী’তি। ‘ন খো, আৰুসো, পিণ্ডো লব্ভতী’তি। ‘এহি, ভন্তে, ঘরং গমিস্সামা’তি। অথ খো, ভন্তে, সো উপাসকো মং ঘরং নেত্ৰা ভোজেত্ৰা এতদৰোচ – ‘কহং, ভন্তে, অয্যো গমিস্সতী’তি? ‘সাৰত্থিং খো অহং, আৰুসো, গমিস্সামি ভগৰন্তং দস্সনাযা’তি । ‘তেন হি, ভন্তে, মম ৰচনেন ভগৰতো পাদে সিরসা ৰন্দ, এৰঞ্চ ৰদেহি – দুট্ঠো, ভন্তে, কীটাগিরিস্মিং আৰাসো। অস্সজিপুনব্বসুকা নাম কীটাগিরিস্মিং আৰাসিকা অলজ্জিনো পাপভিক্খূ । তে এৰরূপং অনাচারং আচরন্তি – মালাৰচ্ছং রোপেন্তিপি রোপাপেন্তিপি…পে॰… ৰিৰিধম্পি অনাচারং আচরন্তি। যেপি তে, ভন্তে, মনুস্সা পুব্বে সদ্ধা অহেসুং পসন্না তেপি এতরহি অস্সদ্ধা অপ্পসন্না। যানিপি তানি সঙ্ঘস্স পুব্বে দানপথানি তানিপি এতরহি উপচ্ছিন্নানি। রিঞ্চন্তি পেসলা ভিক্খূ, নিৰসন্তি পাপভিক্খূ। সাধু, ভন্তে, ভগৰা কীটাগিরিং ভিক্খূ পহিণেয্য, যথাযং কীটাগিরিস্মিং আৰাসো সণ্ঠহেয্যা’তি। ততো অহং ভগৰা আগচ্ছামী’’তি। ২৩. অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ভিক্খূ পটিপুচ্ছি – ‘‘সচ্চং কির, ভিক্খৰে, অস্সজিপুনব্বসুকা নাম কীটাগিরিস্মিং আৰাসিকা অলজ্জিনো পাপভিক্খূ? তে এৰরূপং অনাচারং আচরন্তি – মালাৰচ্ছং রোপেন্তিপি…পে॰… ৰিৰিধম্পি অনাচারং আচরন্তি? যেপি তে মনুস্সা পুব্বে সদ্ধা অহেসুং পসন্না তেপি এতরহি অস্সদ্ধা অপ্পসন্না? যানিপি তানি সঙ্ঘস্স পুব্বে দানপথানি তানিপি এতরহি উপচ্ছিন্নানি? রিঞ্চন্তি পেসলা ভিক্খূ নিৰসন্তি পাপভিক্খূ’’তি? ‘‘সচ্চং ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং…পে॰… কথঞ্হি নাম তে, ভিক্খৰে , মোঘপুরিসা এৰরূপং অনাচারং আচরিস্সন্তি – মালাৰচ্ছং রোপেস্সন্তিপি রোপাপেস্সন্তিপি, সিঞ্চিস্সন্তিপি সিঞ্চাপেস্সন্তিপি, ওচিনিস্সন্তিপি ওচিনাপেস্সন্তিপি, গন্থেস্সন্তিপি গন্থাপেস্সন্তিপি, একতোৰণ্টিকমালং করিস্সন্তিপি কারাপেস্সন্তিপি, উভতোৰণ্টিকমালং করিস্সন্তিপি কারাপেস্সন্তিপি, মঞ্জরিকং করিস্সন্তিপি কারাপেস্সন্তিপি, ৰিধূতিকং করিস্সন্তিপি কারাপেস্সন্তিপি, ৰটংসকং করিস্সন্তিপি কারাপেস্সন্তিপি, আৰেল়ং করিস্সন্তিপি কারাপেস্সন্তিপি, উরচ্ছদং করিস্সন্তিপি কারাপেস্সন্তিপি। তে কুলিত্থীনং কুলধীতানং কুলকুমারীনং কুলসুণ্হানং কুলদাসীনং একতোৰণ্টিকমালং হরিস্সন্তিপি হরাপেস্সন্তিপি, উভতোৰণ্টিকমালং হরিস্সন্তিপি হরাপেস্সন্তিপি, মঞ্জরিকং হরিস্সন্তিপি হরাপেস্সন্তিপি, ৰিধূতিকং হরিস্সন্তিপি হরাপেস্সন্তিপি, ৰটংসকং হরিস্সন্তিপি হরাপেস্সন্তিপি, আৰেল়ং হরিস্সন্তিপি হরাপেস্সন্তিপি, উরচ্ছদং হরিস্সন্তিপি হরাপেস্সন্তিপি। তে কুলিত্থীহি কুলধীতাহি কুলকুমারীহি কুলসুণ্হাহি কুলদাসীহি সদ্ধিং একভাজনেপি ভুঞ্জিস্সন্তি, একথালকেপি পিৰিস্সন্তি, একাসনেপি নিসীদিস্সন্তি, একমঞ্চেপি তুৰট্টিস্সন্তি, একত্থরণাপি তুৰট্টিস্সন্তি, একপাৰুরণাপি তুৰট্টিস্সন্তি, একত্থরণপাৰুরণাপি তুৰট্টিস্সন্তি, ৰিকালেপি ভুঞ্জিস্সন্তি, মজ্জম্পি পিৰিস্সন্তি, মালাগন্ধৰিলেপনম্পি ধারেস্সন্তি, নচ্চিস্সন্তিপি, গাযিস্সন্তিপি, ৰাদেস্সন্তিপি, লাসেস্সন্তিপি; নচ্চন্তিযাপি নচ্চিস্সন্তি, নচ্চন্তিযাপি গাযিস্সন্তি, নচ্চন্তিযাপি ৰাদেস্সন্তি, নচ্চন্তিযাপি লাসেস্সন্তি; গাযন্তিযাপি নচ্চিস্সন্তি , গাযন্তিযাপি গাযিস্সন্তি, গাযন্তিযাপি ৰাদেস্সন্তি, গাযন্তিযাপি লাসেস্সন্তি; ৰাদেন্তিযাপি নচ্চিস্সন্তি, ৰাদেন্তিযাপি গাযিস্সন্তি, ৰাদেন্তিযাপি ৰাদেস্সন্তি, ৰাদেন্তিযাপি লাসেস্সন্তি; লাসেন্তিযাপি নচ্চিস্সন্তি, লাসেন্তিযাপি গাযিস্সন্তি, লাসেন্তিযাপি ৰাদেস্সন্তি; লাসেন্তিযাপি লাসেস্সন্তি; অট্ঠপদেপি কীল়িস্সন্তি, দসপদেপি কীল়িস্সন্তি, আকাসেপি কীল়িস্সন্তি, পরিহারপথেপি কীল়িস্সন্তি, সন্তিকাযপি কীল়িস্সন্তি, খলিকাযপি কীল়িস্সন্তি, ঘটিকাযপি কীল়িস্সন্তি, সলাকহত্থেনপি কীল়িস্সন্তি, অক্খেনপি কীল়িস্সন্তি, পঙ্গচীরেনপি কীল়িস্সন্তি, ৰঙ্ককেনপি কীল়িস্সন্তি মোক্খচিকাযপি কীল়িস্সন্তি, চিঙ্গুলকেনপি কীল়িস্সন্তি, পত্তাল়্হকেনপি কীল়িস্সন্তি, রথকেনপি কীল়িস্সন্তি, ধনুকেনপি কীল়িস্সন্তি, অক্খরিকাযপি কীল়িস্সন্তি, মনেসিকাযপি কীল়িস্সন্তি, যথাৰজ্জেনপি কীল়িস্সন্তি; হত্থিস্মিম্পি সিক্খিস্সন্তি, অস্সস্মিম্পি সিক্খিস্সন্তি, রথস্মিম্পি সিক্খিস্সন্তি, ধনুস্মিম্পি সিক্খিস্সন্তি, থরুস্মিম্পি সিক্খিস্সন্তি; হত্থিস্সপি পুরতো ধাৰিস্সন্তি , অস্সস্সপি পুরতো ধাৰিস্সন্তি, রথস্সপি পুরতো [পুরতো ধাৰিস্সন্তি (স্যা॰)] ধাৰিস্সন্তিপি আধাৰিস্সন্তিপি; উস্সেল়েস্সন্তিপি, অপ্ফোটেস্সন্তিপি, নিব্বুজ্ঝিস্সন্তিপি, মুট্ঠীহিপি যুজ্ঝিস্সন্তি; রঙ্গমজ্ঝেপি সঙ্ঘাটিং পত্থরিত্ৰা নচ্চকিং এৰং ৰক্খন্তি [ৰদিস্সন্তি (ক॰)] – ‘ইধ, ভগিনি, নচ্চস্সূ’তি; নলাটিকম্পি দস্সন্তি; ৰিৰিধম্পি অনাচারং আচরিস্সন্তি। নেতং , ভিক্খৰে, অপ্পসন্নানং ৰা পসাদায…পে॰… ৰিগরহিত্ৰা…পে॰… ধম্মিং কথং কত্ৰা সারিপুত্তমোগ্গল্লানে আমন্তেসি – ‘‘গচ্ছথ তুম্হে, সারিপুত্তা, কীটাগিরিং গন্ত্ৰা অস্সজিপুনব্বসুকানং ভিক্খূনং কীটাগিরিস্মা পব্বাজনীযকম্মং করোথ, তুম্হাকং এতে সদ্ধিৰিহারিনো’’তি। ‘‘কথং মযং, ভন্তে, অস্সজিপুনব্বসুকানং ভিক্খূনং কীটাগিরিস্মা পব্বাজনীযকম্মং করোম, চণ্ডা তে ভিক্খূ ফরুসা’’তি? ‘‘তেন হি তুম্হে, সারিপুত্তা, বহুকেহি ভিক্খূহি সদ্ধিং গচ্ছথা’’তি। ‘‘এৰং, ভন্তে’’তি খো সারিপুত্তমোগ্গল্লানা ভগৰতো পচ্চস্সোসুং। এৰঞ্চ পন, ভিক্খৰে, কাতব্বং – পঠমং অস্সজিপুনব্বসুকা ভিক্খূ চোদেতব্বা, চোদেত্ৰা সারেতব্বা, সারেত্ৰা আপত্তিং আরোপেতব্বা, আপত্তিং আরোপেত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো – ২৪. ‘‘সুণাতু মে, ভন্তে, সঙ্ঘো। ইমে অস্সজিপুনব্বসুকা ভিক্খূ কুলদূসকা পাপসমাচারা। ইমেসং পাপকা সমাচারা দিস্সন্তি চেৰ সুয্যন্তি চ। কুলানি চ ইমেহি দুট্ঠানি দিস্সন্তি চেৰ সুয্যন্তি চ। যদি সঙ্ঘস্স পত্তকল্লং, সঙ্ঘো অস্সজিপুনব্বসুকানং ভিক্খূনং কীটাগিরিস্মা পব্বাজনীযকম্মং করেয্য – ন অস্সজিপুনব্বসুকেহি ভিক্খূহি কীটাগিরিস্মিং ৰত্থব্বন্তি। এসা ঞত্তি। ‘‘সুণাতু মে, ভন্তে, সঙ্ঘো। ইমে অস্সজিপুনব্বসুকা ভিক্খূ কুলদূসকা পাপসমাচারা। ইমেসং পাপকা সমাচারা দিস্সন্তি চেৰ সুয্যন্তি চ। কুলানি চ ইমেহি দুট্ঠানি দিস্সন্তি চেৰ সুয্যন্তি চ। সঙ্ঘো অস্সজিপুনব্বসুকানং ভিক্খূনং কীটাগিরিস্মা পব্বাজনীযকম্মং করোতি – ন অস্সজিপুনব্বসুকেহি ভিক্খূহি কীটাগিরিস্মিং ৰত্থব্বন্তি। যস্সাযস্মতো খমতি অস্সজিপুনব্বসুকানং ভিক্খূনং কীটাগিরিস্মা পব্বাজনীযস্স কম্মস্স করণং – ন অস্সজিপুনব্বসুকেহি ভিক্খূহি কীটাগিরিস্মিং ৰত্থব্বন্তি, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি। সুণাতু মে, ভন্তে, সঙ্ঘো। ইমে অস্সজিপুনব্বসুকা ভিক্খূ কুলদূসকা পাপসমাচারা। ইমেসং পাপকা সমাচারা দিস্সন্তি চেৰ সুয্যন্তি চ। কুলানি চ ইমেহি দুট্ঠানি দিস্সন্তি চেৰ সুয্যন্তি চ। সঙ্ঘো অস্সজিপুনব্বসুকানং ভিক্খূনং কীটাগিরিস্মা পব্বাজনীযকম্মং করোতি – ন অস্সজিপুনব্বসুকেহি ভিক্খূহি কীটাগিরিস্মিং ৰত্থব্বন্তি। যস্সাযস্মতো খমতি অস্সজিপুনব্বসুকানং ভিক্খূনং কীটাগিরিস্মা পব্বাজনীযস্স কম্মস্স করণং – ন অস্সজিপুনব্বসুকেহি ভিক্খূহি কীটাগিরিস্মিং ৰত্থব্বন্তি, সো তুণ্হস্স; যস্স নক্খমতি, সো ভাসেয্য। ‘‘কতং সঙ্ঘেন অস্সজিপুনব্বসুকানং ভিক্খূনং কীটাগিরিস্মা পব্বাজনীযকম্মং – ন অস্সজিপুনব্বসুকেহি ভিক্খূহি কীটাগিরিস্মিং ৰত্থব্বন্তি। খমতি সঙ্ঘস্স, তস্মা তুণ্হী, এৰমেতং ধারযামী’’তি। অধম্মকম্মদ্ৰাদসকং ২৫. ‘‘তীহি, ভিক্খৰে, অঙ্গেহি সমন্নাগতং পব্বাজনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অসম্মুখা কতং হোতি, অপ্পটিপুচ্ছা কতং হোতি, অপ্পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং পব্বাজনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি , ভিক্খৰে, তীহঙ্গেহি সমন্নাগতং পব্বাজনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অনাপত্তিযা কতং হোতি, অদেসনাগামিনিযা আপত্তিযা কতং হোতি, দেসিতায আপত্তিযা কতং হোতি…পে॰… অচোদেত্ৰা কতং হোতি, অসারেত্ৰা কতং হোতি, আপত্তিং অনারোপেত্ৰা কতং হোতি…পে॰… অসম্মুখা কতং হোতি, অধম্মেন কতং হোতি, ৰগ্গেন কতং হোতি…পে॰… অপ্পটিপুচ্ছা কতং হোতি, অধম্মেন কতং হোতি, ৰগ্গেন কতং হোতি…পে॰… অপ্পটিঞ্ঞায কতং হোতি, অধম্মেন কতং হোতি, ৰগ্গেন কতং হোতি…পে॰… অনাপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… অদেসনাগামিনিযা আপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… দেসিতায আপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… অচোদেত্ৰা কতং হোতি, অধম্মেন কতং হোতি, ৰগ্গেন কতং হোতি …পে॰… অসারেত্ৰা কতং হোতি, অধম্মেন কতং হোতি, ৰগ্গেন কতং হোতি…পে॰… আপত্তিং অনারোপেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং পব্বাজনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অধম্মকম্মদ্ৰাদসকং নিট্ঠিতং। ধম্মকম্মদ্ৰাদসকং ২৬. ‘‘তীহি, ভিক্খৰে, অঙ্গেহি সমন্নাগতং পব্বাজনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। সম্মুখা কতং হোতি, পটিপুচ্ছা কতং হোতি, পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং পব্বাজনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং পব্বাজনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। আপত্তিযা কতং হোতি দেসনাগামিনিযা আপত্তিযা কতং হোতি অদেসিতায আপত্তিযা কতং হোতি…পে॰… চোদেত্ৰা কতং হোতি, সারেত্ৰা কতং হোতি, আপত্তিং আরোপেত্ৰা কতং হোতি…পে॰… সম্মুখা কতং হোতি, ধম্মেন কতং হোতি, সমগ্গেন কতং হোতি…পে॰… পটিপুচ্ছা কতং হোতি, ধম্মেন কতং হোতি, সমগ্গেন কতং হোতি…পে॰… পটিঞ্ঞায কতং হোতি, ধম্মেন কতং হোতি, সমগ্গেন কতং হোতি…পে॰… আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… দেসনাগামিনিযা আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… অদেসিতায আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… চোদেত্ৰা কতং হোতি, ধম্মেন কতং হোতি, সমগ্গেন কতং হোতি…পে॰… সারেত্ৰা কতং হোতি, ধম্মেন কতং হোতি, সমগ্গেন কতং হোতি…পে॰…আপত্তিং আরোপেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং পব্বাজনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ধম্মকম্মদ্ৰাদসকং নিট্ঠিতং। আকঙ্খমানচুদ্দসকং ২৭. [পরি॰ ৩২৩] ‘‘তীহি, ভিক্খৰে, অঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; বালো হোতি অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। ‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। অধিসীলে সীলৰিপন্নো হোতি, অজ্ঝাচারে আচারৰিপন্নো হোতি, অতিদিট্ঠিযা দিট্ঠিৰিপন্নো হোতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। ‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। বুদ্ধস্স অৰণ্ণং ভাসতি, ধম্মস্স অৰণ্ণং ভাসতি, সঙ্ঘস্স অৰণ্ণং ভাসতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। ‘‘অপরেহিপি , ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। কাযিকেন দৰেন সমন্নাগতো হোতি, ৰাচসিকেন দৰেন সমন্নাগতো হোতি, কাযিকৰাচসিকেন দৰেন সমন্নাগতো হোতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। ‘‘অপরেহিপি , ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। কাযিকেন অনাচারেন সমন্নাগতো হোতি, ৰাচসিকেন অনাচারেন সমন্নাগতো হোতি, কাযিকৰাচসিকেন অনাচারেন সমন্নাগতো হোতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। ‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। কাযিকেন উপঘাতিকেন সমন্নাগতো হোতি, ৰাচসিকেন উপঘাতিকেন সমন্নাগতো হোতি, কাযিকৰাচসিকেন উপঘাতিকেন সমন্নাগতো হোতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। ‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। কাযিকেন মিচ্ছাজীৰেন সমন্নাগতো হোতি, ৰাচসিকেন মিচ্ছাজীৰেন সমন্নাগতো হোতি, কাযিকৰাচসিকেন মিচ্ছাজীৰেন সমন্নাগতো হোতি – ইমেহি, খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পব্বাজনীযকম্মং করেয্য। ‘‘তিণ্ণং, ভিক্খৰে, ভিক্খূনং , আকঙ্খমানো সঙ্ঘো, পব্বাজনীযকম্মং করেয্য। একো ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; একো বালো হোতি অব্যত্তো আপত্তিবহুলো অনপদানো; একো গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পব্বাজনীযকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পব্বাজনীযকম্মং করেয্য। একো অধিসীলে সীলৰিপন্নো হোতি, একো অজ্ঝাচারে আচারৰিপন্নো হোতি, একো অতিদিট্ঠিযা দিট্ঠিৰিপন্নো হোতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পব্বাজনীযকম্মং করেয্য। ‘‘অপরেসম্পি , ভিক্খৰে, তিণ্ণং ভিক্খূনং, আকঙ্খমানো সঙ্ঘো, পব্বাজনীযকম্মং করেয্য। একো বুদ্ধস্স অৰণ্ণং ভাসতি, একো ধম্মস্স অৰণ্ণং ভাসতি, একো সঙ্ঘস্স অৰণ্ণং ভাসতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পব্বাজনীযকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পব্বাজনীযকম্মং করেয্য। একো কাযিকেন দৰেন সমন্নাগতো হোতি, একো ৰাচসিকেন দৰেন সমন্নাগতো হোতি, একো কাযিকৰাচসিকেন দৰেন সমন্নাগতো হোতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পব্বাজনীযকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পব্বাজনীযকম্মং করেয্য। একো কাযিকেন অনাচারেন সমন্নাগতো হোতি, একো ৰাচসিকেন অনাচারেন সমন্নাগতো হোতি, একো কাযিকৰাচসিকেন অনাচারেন সমন্নাগতো হোতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পব্বাজনীযকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পব্বাজনীযকম্মং করেয্য। একো কাযিকেন উপঘাতিকেন সমন্নাগতো হোতি, একো ৰাচসিকেন উপঘাতিকেন সমন্নাগতো হোতি, একো কাযিকৰাচসিকেন উপঘাতিকেন সমন্নাগতো হোতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পব্বাজনীযকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পব্বাজনীযকম্মং করেয্য। একো কাযিকেন মিচ্ছাজীৰেন সমন্নাগতো হোতি, একো ৰাচসিকেন মিচ্ছাজীৰেন সমন্নাগতো হোতি, একো কাযিকৰাচসিকেন মিচ্ছাজীৰেন সমন্নাগতো হোতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পব্বাজনীযকম্মং করেয্য। আকঙ্খমানচুদ্দসকং নিট্ঠিতং। অট্ঠারসৰত্তং ২৮. ‘‘পব্বাজনীযকম্মকতেন , ভিক্খৰে, ভিক্খুনা সম্মা ৰত্তিতব্বং। তত্রাযং সম্মাৰত্তনা – ন উপসম্পাদেতব্বং, ন নিস্সযো দাতব্বো, ন সামণেরো উপট্ঠাপেতব্বো, ন ভিক্খুনোৰাদকসম্মুতি সাদিতব্বা, সম্মতেনপি ভিক্খুনিযো ন ওৰদিতব্বা। যায আপত্তিযা সঙ্ঘেন পব্বাজনীযকম্মং কতং হোতি সা আপত্তি ন আপজ্জিতব্বা, অঞ্ঞা ৰা তাদিসিকা , ততো ৰা পাপিট্ঠতরা; কম্মং ন গরহিতব্বং, কম্মিকা ন গরহিতব্বা। ন পকতত্তস্স ভিক্খুনো উপোসথো ঠপেতব্বো, ন পৰারণা ঠপেতব্বা, ন সৰচনীযং কাতব্বং, ন অনুৰাদো পট্ঠপেতব্বো, ন ওকাসো কারেতব্বো, ন চোদেতব্বো, ন সারেতব্বো, ন ভিক্খূহি সম্পযোজেতব্ব’’ন্তি। পব্বাজনীযকম্মে অট্ঠারসৰত্তং নিট্ঠিতং। ২৯. অথ খো সারিপুত্তমোগ্গল্লানপ্পমুখো ভিক্খুসঙ্ঘো কীটাগিরিং গন্ত্ৰা অস্সজিপুনব্বসুকানং ভিক্খূনং কীটাগিরিস্মা পব্বাজনীযকম্মং অকাসি – ন অস্সজিপুনব্বসুকেহি ভিক্খূহি কীটাগিরিস্মিং ৰত্থব্বন্তি। তে সঙ্ঘেন পব্বাজনীযকম্মকতা ন সম্মা ৰত্তন্তি, ন লোমং পাতেন্তি, ন নেত্থারং ৰত্তন্তি; ন ভিক্খূ খমাপেন্তি, অক্কোসন্তি, পরিভাসন্তি; ছন্দগামিতা দোসগামিতা মোহগামিতা ভযগামিতা পাপেন্তি; পক্কমন্তিপি, ৰিব্ভমন্তিপি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অস্সজিপুনব্বসুকা ভিক্খূ সঙ্ঘেন পব্বাজনীযকম্মকতা ন সম্মা ৰত্তিস্সন্তি, ন লোমং পাতেস্সন্তি, ন নেত্থারং ৰত্তিস্সন্তি; ন ভিক্খূ খমাপেস্সন্তি, অক্কোসিস্সন্তি, পরিভাসিস্সন্তি; ছন্দগামিতা দোসগামিতা মোহগামিতা ভযগামিতা পাপেস্সন্তি; পক্কমিস্সন্তিপি, ৰিব্ভমিস্সন্তিপী’’তি। অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ভিক্খূ পটিপুচ্ছি – ‘‘সচ্চং কির, ভিক্খৰে, অস্সজিপুনব্বসুকা ভিক্খূ সঙ্ঘেন পব্বাজনীযকম্মকতা ন সম্মা ৰত্তন্তি, ন লোমং পাতেন্তি, ন নেত্থারং ৰত্তন্তি; ন ভিক্খূ খমাপেন্তি, অক্কোসন্তি, পরিভাসন্তি; ছন্দগামিতা দোসগামিতা মোহগামিতা ভযগামিতা পাপেন্তি; পক্কমন্তিপি, ৰিব্ভমন্তিপী’’তি? ‘‘সচ্চং ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং …পে॰… কথঞ্হি নাম তে, ভিক্খৰে, মোঘপুরিসা সঙ্ঘেন পব্বাজনীযকম্মকতা ন সম্মা ৰত্তিস্সন্তি, ন লোমং পাতেস্সন্তি, ন নেত্থারং ৰত্তিস্সন্তি; ন ভিক্খূ খমাপেস্সন্তি, অক্কোসিস্সন্তি, পরিভাসিস্সন্তি; ছন্দগামিতা দোসগামিতা মোহগামিতা ভযগামিতা পাপেস্সন্তি; পক্কমিস্সন্তিপি, ৰিব্ভমিস্সন্তিপি। নেতং, ভিক্খৰে, অপ্পসন্নানং ৰা পসাদায…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, সঙ্ঘো পব্বাজনীযকম্মং পটিপ্পস্সম্ভেতু। নপ্পটিপ্পস্সম্ভেতব্বঅট্ঠারসকং ৩০. ‘‘পঞ্চহি , ভিক্খৰে, অঙ্গেহি সমন্নাগতস্স ভিক্খুনো পব্বাজনীযকম্মং নপ্পটিপ্পস্সম্ভেতব্বং। উপসম্পাদেতি, নিস্সযং দেতি, সামণেরং উপট্ঠাপেতি, ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো পব্বাজনীযকম্মং নপ্পটিপ্পস্সম্ভেতব্বং। [পরি॰ ৪২০] ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো পব্বাজনীযকম্মং নপ্পটিপ্পস্সম্ভেতব্বং। যায আপত্তিযা সঙ্ঘেন পব্বাজনীযকম্মং কতং হোতি তং আপত্তিং আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং গরহতি, কম্মিকে গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো পব্বাজনীযকম্মং নপ্পটিপ্পস্সম্ভেতব্বং। ‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো পব্বাজনীযকম্মং নপ্পটিপ্পস্সম্ভেতব্বং। পকতত্তস্স ভিক্খুনো উপোসথং ঠপেতি, পৰারণং ঠপেতি, সৰচনীযং করোতি, অনুৰাদং পট্ঠপেতি, ওকাসং কারেতি, চোদেতি, সারেতি, ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো পব্বাজনীযকম্মং নপ্পটিপ্পস্সম্ভেতব্বং। পব্বাজনীযকম্মে নপ্পটিপ্পস্সম্ভেতব্বঅট্ঠারসকং নিট্ঠিতং। পটিপ্পস্সম্ভেতব্বঅট্ঠারসকং ৩১. ‘‘পঞ্চহি, ভিক্খৰে, অঙ্গেহি সমন্নাগতস্স ভিক্খুনো পব্বাজনীযকম্মং পটিপ্পস্সম্ভেতব্বং। ন উপসম্পাদেতি, ন নিস্সযং দেতি, ন সামণেরং উপট্ঠাপেতি , ন ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ন ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো পব্বাজনীযকম্মং পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো পব্বাজনীযকম্মং পটিপ্পস্সম্ভেতব্বং। যায আপত্তিযা সঙ্ঘেন পব্বাজনীযকম্মং কতং হোতি তং আপত্তিং ন আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং ন গরহতি, কম্মিকে ন গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো পব্বাজনীযকম্মং পটিপ্পস্সম্ভেতব্বং। ‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো পব্বাজনীযকম্মং পটিপ্পস্সম্ভেতব্বং। ন পকতত্তস্স ভিক্খুনো উপোসথং ঠপেতি, ন পৰারণং ঠপেতি, ন সৰচনীযং করোতি, ন অনুৰাদং পট্ঠপেতি, ন ওকাসং কারেতি, ন চোদেতি, ন সারেতি, ন ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো পব্বাজনীযকম্মং পটিপ্পস্সম্ভেতব্বং। পব্বাজনীযকম্মে পটিপ্পস্সম্ভেতব্বঅট্ঠারসকং নিট্ঠিতং। ৩২. ‘‘এৰঞ্চ পন, ভিক্খৰে, পটিপ্পস্সম্ভেতব্বং। তেন, ভিক্খৰে, পব্বাজনীযকম্মকতেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘অহং, ভন্তে, সঙ্ঘেন পব্বাজনীযকম্মকতো সম্মা ৰত্তামি, লোমং পাতেমি, নেত্থারং ৰত্তামি, পব্বাজনীযস্স কম্মস্স পটিপ্পস্সদ্ধিং যাচামী’তি। দুতিযম্পি যাচিতব্বা। ততিযম্পি যাচিতব্বা। ব্যত্তেন ভিক্খুনা পটিবলেন সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো। অযং ইত্থন্নামো ভিক্খু সঙ্ঘেন পব্বাজনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, পব্বাজনীযস্স কম্মস্স পটিপ্পস্সদ্ধিং যাচতি। যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো পব্বাজনীযকম্মং পটিপ্পস্সম্ভেয্য। এসা ঞত্তি। ‘‘সুণাতু মে, ভন্তে, সঙ্ঘো। অযং ইত্থন্নামো ভিক্খু সঙ্ঘেন পব্বাজনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, পব্বাজনীযস্স কম্মস্স পটিপ্পস্সদ্ধিং যাচতি। সঙ্ঘো ইত্থন্নামস্স ভিক্খুনো পব্বাজনীযকম্মং পটিপ্পস্সম্ভেতি। যস্সাযস্মতো খমতি ইত্থন্নামস্স ভিক্খুনো পব্বাজনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি। সুণাতু মে, ভন্তে, সঙ্ঘো । অযং ইত্থন্নামো ভিক্খু সঙ্ঘেন পব্বাজনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, পব্বাজনীযস্স কম্মস্স পটিপ্পস্সদ্ধিং যাচতি। সঙ্ঘো ইত্থন্নামস্স ভিক্খুনো পব্বাজনীযকম্মং পটিপ্পস্সম্ভেতি। যস্সাযস্মতো খমতি ইত্থন্নামস্স ভিক্খুনো পব্বাজনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘পটিপ্পস্সদ্ধং সঙ্ঘেন ইত্থন্নামস্স ভিক্খুনো পব্বাজনীযকম্মং। খমতি সঙ্ঘস্স, তস্মা তুণ্হী, এৰমেতং ধারযামী’’তি। পব্বাজনীযকম্মং নিট্ঠিতং ততিযং। ৪. পটিসারণীযকম্মং ৩৩. তেন খো পন সমযেন আযস্মা সুধম্মো মচ্ছিকাসণ্ডে চিত্তস্স গহপতিনো আৰাসিকো হোতি, নৰকম্মিকো ধুৰভত্তিকো। যদা চিত্তো গহপতি সঙ্ঘং ৰা গণং ৰা পুগ্গলং ৰা নিমন্তেতুকামো হোতি তদা ন আযস্মন্তং সুধম্মং অনপলোকেত্ৰা সঙ্ঘং ৰা গণং ৰা পুগ্গলং ৰা নিমন্তেতি। তেন খো পন সমযেন সম্বহুলা থেরা ভিক্খূ, আযস্মা চ সারিপুত্তো, আযস্মা চ মহামোগ্গল্লানো, আযস্মা চ মহাকচ্চানো, আযস্মা চ মহাকোট্ঠিকো , আযস্মা চ মহাকপ্পিনো, আযস্মা চ মহাচুন্দো, আযস্মা চ অনুরুদ্ধো, আযস্মা চ রেৰতো, আযস্মা চ উপালি, আযস্মা চ আনন্দো, আযস্মা চ রাহুলো, কাসীসু চারিকং চরমানা যেন মচ্ছিকাসণ্ডো তদৰসরুং। অস্সোসি খো চিত্তো গহপতি থেরা কির ভিক্খূ মচ্ছিকাসণ্ডং অনুপ্পত্তাতি। অথ খো চিত্তো গহপতি যেন থেরা ভিক্খূ তেনুপসঙ্কমি , উপসঙ্কমিত্ৰা থেরে ভিক্খূ অভিৰাদেত্ৰা একমন্তং নিসীদি। একমন্তং নিসিন্নং খো চিত্তং গহপতিং আযস্মা সারিপুত্তো ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো চিত্তো গহপতি আযস্মতা সারিপুত্তেন ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো থেরে ভিক্খূ এতদৰোচ – ‘‘অধিৰাসেন্তু মে, ভন্তে, থেরা স্ৰাতনায আগন্তুকভত্ত’’ন্তি। অধিৰাসেসুং খো থেরা ভিক্খূ[অধিৰাসেসুং খো তে থেরা ভিক্খূ (স্যা॰)] তুণ্হীভাৰেন। অথ খো চিত্তো গহপতি থেরানং ভিক্খূনং অধিৰাসনং ৰিদিত্ৰা উট্ঠাযাসনা থেরে ভিক্খূ অভিৰাদেত্ৰা পদক্খিণং কত্ৰা যেনাযস্মা সুধম্মো তেনুপসঙ্কমি, উপসঙ্কমিত্ৰা আযস্মন্তং সুধম্মং অভিৰাদেত্ৰা একমন্তং অট্ঠাসি। একমন্তং ঠিতো খো চিত্তো গহপতি আযস্মন্তং সুধম্মং এতদৰোচ – ‘‘অধিৰাসেতু মে, ভন্তে, অয্যো সুধম্মো স্ৰাতনায ভত্তং সদ্ধিং থেরেহী’’তি। অথ খো আযস্মা সুধম্মো ‘পুব্বে খ্ৰাযং চিত্তো গহপতি যদা সঙ্ঘং ৰা গণং ৰা পুগ্গলং ৰা নিমন্তেতুকামো ন মং অনপলোকেত্ৰা সঙ্ঘং ৰা গণং ৰা পুগ্গলং ৰা নিমন্তেতি; সোদানি মং অনপলোকেত্ৰা থেরে ভিক্খূ নিমন্তেসি; দুট্ঠোদানাযং চিত্তো গহপতি অনপেক্খো ৰিরত্তরূপো মযী’তি চিত্তং গহপতিং এতদৰোচ – ‘‘অলং, গহপতি, নাধিৰাসেমী’’তি। দুতিযম্পি খো…পে॰… ততিযম্পি খো চিত্তো গহপতি আযস্মন্তং সুধম্মং এতদৰোচ – ‘‘অধিৰাসেতু মে, ভন্তে, অয্যো সুধম্মো স্ৰাতনায ভত্তং সদ্ধিং থেরেহী’’তি। ‘‘অলং, গহপতি, নাধিৰাসেমী’’তি। অথ খো চিত্তো গহপতি ‘কিং মে করিস্সতি অয্যো সুধম্মো অধিৰাসেন্তো ৰা অনধিৰাসেন্তো ৰা’তি আযস্মন্তং সুধম্মং অভিৰাদেত্ৰা পদক্খিণং কত্ৰা পক্কামি। ৩৪. অথ খো চিত্তো গহপতি তস্সা রত্তিযা অচ্চযেন থেরানং ভিক্খূনং পণীতং খাদনীযং ভোজনীযং পটিযাদাপেসি। অথ খো আযস্মা সুধম্মো ‘যংনূনাহং চিত্তস্স গহপতিনো থেরানং ভিক্খূনং পটিযত্তং পস্সেয্য’ন্তি পুব্বণ্হসমযং নিৰাসেত্ৰা পত্তচীৰরমাদায যেন চিত্তস্স গহপতিনো নিৰেসনং তেনুপসঙ্কমি, উপসঙ্কমিত্ৰা পঞ্ঞত্তে আসনে নিসীদি। অথ খো চিত্তো গহপতি যেনাযস্মা সুধম্মো তেনুপসঙ্কমি, উপসঙ্কমিত্ৰা আযস্মন্তং সুধম্মং অভিৰাদেত্ৰা একমন্তং নিসীদি। একমন্তং নিসিন্নং খো চিত্তং গহপতিং আযস্মা সুধম্মো এতদৰোচ – ‘‘পহূতং খো তে ইদং, গহপতি, খাদনীযং ভোজনীযং পটিযত্তং; একা চ খো ইধ নত্থি যদিদং তিলসঙ্গুল়িকা’’তি। ‘‘বহুম্হি ৰত, ভন্তে, রতনে বুদ্ধৰচনে [ভন্তে বুদ্ধৰচনে (স্যা॰)]ৰিজ্জমানে অয্যেন সুধম্মেন যদেৰ কিঞ্চি ভাসিতং যদিদং তিলসঙ্গুল়িকাতি। ভূতপুব্বং, ভন্তে, দক্খিণাপথকা ৰাণিজা পুরত্থিমং জনপদং অগমংসু ৰাণিজ্জায। তে ততো কুক্কুটিং আনেসুং। অথ খো সা, ভন্তে, কুক্কুটী কাকেন সদ্ধিং সংৰাসং কপ্পেসি। সা পোতকং জনেসি। যদা খো সো, ভন্তে, কুক্কুটপোতকো কাকৰস্সং ৰস্সিতুকামো হোতি, কাককুক্কুটীতি ৰস্সতি; যদা কুক্কুটিৰস্সং ৰস্সিতুকামো হোতি, কুক্কুটিকাকাতি ৰস্সতি। এৰমেৰ খো, ভন্তে, বহুম্হি রতনে বুদ্ধৰচনে ৰিজ্জমানে অয্যেন সুধম্মেন যদেৰ কিঞ্চি ভাসিতং যদিদং তিলসংগুল়িকা’’তি। ‘‘অক্কোসসি মং ত্ৰং, গহপতি, পরিভাসসি মং ত্ৰং, গহপতি। এসো তে, গহপতি, আৰাসো, পক্কমিস্সামী’’তি। ‘‘নাহং, ভন্তে, অয্যং সুধম্মং অক্কোসামি, পরিভাসামি [ন পরিভাসামি (সী॰ স্যা॰)]। ৰসতু, ভন্তে, অয্যো সুধম্মো মচ্ছিকাসণ্ডে। রমণীযং অম্বাটকৰনং। অহং অয্যস্স সুধম্মস্স উস্সুক্কং করিস্সামি, চীৰরপিণ্ডপাতসেনাসনগিলানপ্পচ্চযভেসজ্জপরিক্খারান’’ন্তি। দুতিযম্পি খো…পে॰… ততিযম্পি খো আযস্মা সুধম্মো চিত্তং গহপতিং এতদৰোচ – ‘‘অক্কোসসি মং ত্ৰং, গহপতি, পরিভাসসি মং ত্ৰং, গহপতি। এসো তে, গহপতি, আৰাসো, পক্কমিস্সামী’’তি। ‘‘কহং, ভন্তে, অয্যো সুধম্মো গমিস্সতী’’তি? ‘‘সাৰত্থিং খো অহং, গহপতি, গমিস্সামি ভগৰন্তং দস্সনাযা’’তি। ‘‘তেন হি, ভন্তে, যঞ্চ অত্তনা ভণিতং, যঞ্চ মযা ভণিতং তং সব্বং ভগৰতো আরোচেহি। অনচ্ছরিযং খো পনেতং, ভন্তে, যং অয্যো সুধম্মো পুনদেৰ মচ্ছিকাসণ্ডং পচ্চাগচ্ছেয্যা’’তি। ৩৫. অথ খো আযস্মা সুধম্মো সেনাসনং সংসামেত্ৰা পত্তচীৰরমাদায যেন সাৰত্থি তেন পক্কামি। অনুপুব্বেন যেন সাৰত্থি জেতৰনং অনাথপিণ্ডিকস্স আরামো যেন ভগৰা তেনুপসঙ্কমি, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা সুধম্মো যঞ্চ অত্তনা ভণিতং যঞ্চ চিত্তেন গহপতিনা ভণিতং তং সব্বং ভগৰতো আরোচেসি। ৰিগরহি বুদ্ধো ভগৰা – ‘‘অননুচ্ছৰিকং, মোঘপুরিস, অননুলোমিকং অপ্পতিরূপং অস্সামণকং অকপ্পিযং অকরণীযং। কথঞ্হি নাম ত্ৰং, মোঘপুরিস, চিত্তং গহপতিং সদ্ধং পসন্নং দাযকং কারকং সঙ্ঘুপট্ঠাকং হীনেন খুংসেস্সসি, হীনেন ৰম্ভেস্সসি? নেতং, মোঘপুরিস, অপ্পসন্নানং ৰা পসাদায…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি – তেন হি, ভিক্খৰে, সঙ্ঘো সুধম্মস্স ভিক্খুনো পটিসারণীযকম্মং করোতু – চিত্তো তে গহপতি খমাপেতব্বোতি। এৰঞ্চ পন, ভিক্খৰে, কাতব্বং – পঠমং সুধম্মো ভিক্খু চোদেতব্বো, চোদেত্ৰা সারেতব্বো, সারেত্ৰা আপত্তিং আরোপেতব্বো, আপত্তিং আরোপেত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো – ৩৬. ‘‘সুণাতু মে, ভন্তে, সঙ্ঘো। অযং সুধম্মো ভিক্খু চিত্তং গহপতিং সদ্ধং পসন্নং দাযকং কারকং সঙ্ঘুপট্ঠাকং হীনেন খুংসেতি, হীনেন ৰম্ভেতি। যদি সঙ্ঘস্স পত্তকল্লং, সঙ্ঘো সুধম্মস্স ভিক্খুনো পটিসারণীযকম্মং করেয্য – চিত্তো তে গহপতি খমাপেতব্বোতি। এসা ঞত্তি। ‘‘সুণাতু মে, ভন্তে, সঙ্ঘো। অযং সুধম্মো ভিক্খু চিত্তং গহপতিং সদ্ধং পসন্নং দাযকং কারকং সঙ্ঘুপট্ঠাকং হীনেন খুংসেতি, হীনেন ৰম্ভেতি। সঙ্ঘো সুধম্মস্স ভিক্খুনো পটিসারণীযকম্মং করোতি – চিত্তো তে গহপতি খমাপেতব্বোতি। যস্সাযস্মতো খমতি সুধম্মস্স ভিক্খুনো পটিসারণীযস্স কম্মস্স করণং – চিত্তো তে গহপতি খমাপেতব্বোতি, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি – সুণাতু মে, ভন্তে, সঙ্ঘো। অযং সুধম্মো ভিক্খু চিত্তং গহপতিং সদ্ধং পসন্নং দাযকং কারকং সঙ্ঘুপট্ঠাকং হীনেন খুংসেতি, হীনেন ৰম্ভেতি। সঙ্ঘো সুধম্মস্স ভিক্খুনো পটিসারণীযকম্মং করোতি – চিত্তো তে গহপতি খমাপেতব্বোতি। যস্সাযস্মতো খমতি সুধম্মস্স ভিক্খুনো পটিসারণীযস্স কম্মস্স করণং – চিত্তো তে গহপতি খমাপেতব্বোতি, সো তুণ্হস্স; যস্স নক্খমতি, সো ভাসেয্য। ‘‘কতং সঙ্ঘেন সুধম্মস্স ভিক্খুনো পটিসারণীযকম্মং – চিত্তো তে গহপতি খমাপেতব্বোতি। খমতি সঙ্ঘস্স, তস্মা তুণ্হী, এৰমেতং ধারযামী’’তি। অধম্মকম্মদ্ৰাদসকং ৩৭. ‘‘তীহি , ভিক্খৰে, অঙ্গেহি সমন্নাগতং পটিসারণীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অসম্মুখা কতং হোতি, অপ্পটিপুচ্ছা কতং হোতি, অপ্পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং পটিসারণীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং পটিসারণীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অনাপত্তিযা কতং হোতি, অদেসনাগামিনিযা আপত্তিযা কতং হোতি, দেসিতায আপত্তিযা কতং হোতি…পে॰… অচোদেত্ৰা কতং হোতি, অসারেত্ৰা কতং হোতি, আপত্তিং অনারোপেত্ৰা কতং হোতি…পে॰… অসম্মুখা কতং হোতি, অধম্মেন কতং হোতি, ৰগ্গেন কতং হোতি…পে॰… অপ্পটিপুচ্ছা কতং হোতি, অধম্মেন কতং হোতি, ৰগ্গেন কতং হোতি…পে॰… অপ্পটিঞ্ঞায কতং হোতি, অধম্মেন কতং হোতি, ৰগ্গেন কতং হোতি…পে॰… অনাপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… অদেসনাগামিনিযা আপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… দেসিতায আপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… অচোদেত্ৰা কতং হোতি, অধম্মেন কতং হোতি, ৰগ্গেন কতং হোতি…পে॰… অসারেত্ৰা কতং হোতি , অধম্মেন কতং হোতি, ৰগ্গেন কতং হোতি…পে॰… আপত্তিং অনারোপেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং পটিসারণীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। পটিসারণীযকম্মে অধম্মকম্মদ্ৰাদসকং নিট্ঠিতং। ধম্মকম্মদ্ৰাদসকং ৩৮. ‘‘তীহি, ভিক্খৰে, অঙ্গেহি সমন্নাগতং পটিসারণীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। সম্মুখা কতং হোতি, পটিপুচ্ছা কতং হোতি, পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং পটিসারণীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি , ভিক্খৰে, তীহঙ্গেহি সমন্নাগতং পটিসারণীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। আপত্তিযা কতং হোতি, দেসনাগামিনিযা আপত্তিযা কতং হোতি, অদেসিতায আপত্তিযা কতং হোতি…পে॰… চোদেত্ৰা কতং হোতি, সারেত্ৰা কতং হোতি, আপত্তিং আরোপেত্ৰা কতং হোতি…পে॰… সম্মুখা কতং হোতি, ধম্মেন কতং হোতি, সমগ্গেন কতং হোতি…পে॰… পটিপুচ্ছা কতং হোতি, ধম্মেন কতং হোতি, সমগ্গেন কতং হোতি…পে॰… পটিঞ্ঞায কতং হোতি, ধম্মেন কতং হোতি, সমগ্গেন কতং হোতি…পে॰… আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… দেসনাগামিনিযা আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… অদেসিতায আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… চোদেত্ৰা কতং হোতি, ধম্মেন কতং হোতি, সমগ্গেন কতং হোতি…পে॰… সারেত্ৰা কতং হোতি, ধম্মেন কতং হোতি, সমগ্গেন কতং হোতি…পে॰… আপত্তিং আরোপেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং পটিসারণীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। পটিসারণীযকম্মে ধম্মকম্মদ্ৰাদসকং নিট্ঠিতং। আকঙ্খমানচতুক্কং |
Copyright © 2011 Bangladesh Buddhist. All rights reserved |