৩৯. ‘‘পঞ্চহি, ভিক্খৰে, অঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পটিসারণীযকম্মং করেয্য। গিহীনং অলাভায পরিসক্কতি, গিহীনং অনত্থায পরিসক্কতি, গিহীনং অনাৰাসায [অৰাসায (সী॰)] পরিসক্কতি, গিহী অক্কোসতি পরিভাসতি, গিহী গিহীহি ভেদেতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পটিসারণীযকম্মং করেয্য।
‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পটিসারণীযকম্মং করেয্য। গিহীনং বুদ্ধস্স অৰণ্ণং ভাসতি , গিহীনং ধম্মস্স অৰণ্ণং ভাসতি, গিহীনং সঙ্ঘস্স অৰণ্ণং ভাসতি, গিহী হীনেন খুংসেতি হীনেন ৰম্ভেতি, গিহীনং ধম্মিকং পটিস্সৰং ন সচ্চাপেতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পটিসারণীযকম্মং করেয্য। ‘‘পঞ্চন্নং, ভিক্খৰে, ভিক্খূনং, আকঙ্খমানো সঙ্ঘো, পটিসারণীযকম্মং করেয্য। একো গিহীনং অলাভায পরিসক্কতি, একো গিহীনং অনত্থায পরিসক্কতি, একো গিহীনং অনাৰাসায পরিসক্কতি, একো গিহী অক্কোসতি পরিভাসতি, একো গিহী গিহীহি ভেদেতি – ইমেসং খো, ভিক্খৰে, পঞ্চন্নং ভিক্খূনং, আকঙ্খমানো সঙ্ঘো, পটিসারণীযকম্মং করেয্য। ‘‘অপরেসম্পি, ভিক্খৰে, পঞ্চন্নং ভিক্খূনং, আকঙ্খমানো সঙ্ঘো, পটিসারণীযকম্মং করেয্য। একো গিহীনং বুদ্ধস্স অৰণ্ণং ভাসতি, একো গিহীনং ধম্মস্স অৰণ্ণং ভাসতি, একো গিহীনং সঙ্ঘস্স অৰণ্ণং ভাসতি, একো গিহী হীনেন খুংসেতি হীনেন ৰম্ভেতি, একো গিহীনং ধম্মিকং পটিস্সৰং ন সচ্চাপেতি – ইমেসং খো, ভিক্খৰে, পঞ্চন্নং ভিক্খূনং, আকঙ্খমানো সঙ্ঘো, পটিসারণীযকম্মং করেয্য। আকঙ্খমানচতুক্কং নিট্ঠিতং। অট্ঠারসৰত্তং ৪০. ‘‘পটিসারণীযকম্মকতেন, ভিক্খৰে, ভিক্খুনা সম্মা ৰত্তিতব্বং। তত্রাযং সম্মাৰত্তনা – ন উপসম্পাদেতব্বং, ন নিস্সযো দাতব্বো, ন সামণেরো উপট্ঠাপেতব্বো, ন ভিক্খুনোৰাদকসম্মুতি সাদিতব্বা, সম্মতেনপি ভিক্খুনিযো ন ওৰদিতব্বা। যায আপত্তিযা সঙ্ঘেন পটিসারণীযকম্মং কতং হোতি সা আপত্তি ন আপজ্জিতব্বা, অঞ্ঞা ৰা তাদিসিকা , ততো ৰা পাপিট্ঠতরা; কম্মং ন গরহিতব্বং, কম্মিকা ন গরহিতব্বা। ন পকতত্তস্স ভিক্খুনো উপোসথো ঠপেতব্বো, ন পৰারণা ঠপেতব্বা, ন সৰচনীযং কাতব্বং, ন অনুৰাদো পট্ঠপেতব্বো, ন ওকাসো কারেতব্বো , ন চোদেতব্বো, ন সারেতব্বো, ন ভিক্খূহি সম্পযোজেতব্ব’’ন্তি। পটিসারণীযকম্মে অট্ঠারসৰত্তং নিট্ঠিতং। ৪১. অথ খো সঙ্ঘো সুধম্মস্স ভিক্খুনো পটিসারণীযকম্মং অকাসি – ‘‘চিত্তো তে গহপতি খমাপেতব্বো’’তি। সো সঙ্ঘেন পটিসারণীযকম্মকতো মচ্ছিকাসণ্ডং গন্ত্ৰা মঙ্কুভূতো নাসক্খি চিত্তং গহপতিং খমাপেতুং। পুনদেৰ সাৰত্থিং পচ্চাগঞ্ছি। ভিক্খূ এৰমাহংসু – ‘‘খমাপিতো তযা, আৰুসো সুধম্ম, চিত্তো গহপতী’’তি? ‘‘ইধাহং, আৰুসো, মচ্ছিকাসণ্ডং গন্ত্ৰা মঙ্কুভূতো নাসক্খিং চিত্তং গহপতিং খমাপেতু’’ন্তি। ভিক্খূ ভগৰতো এতমত্থং আরোচেসুং…পে॰…। ‘‘তেন হি, ভিক্খৰে, সঙ্ঘো সুধম্মস্স ভিক্খুনো অনুদূতং দেতু – চিত্তং গহপতিং খমাপেতুং। এৰঞ্চ পন ভিক্খৰে দাতব্বো – পঠমং ভিক্খু যাচিতব্বো, যাচিত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো। যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুং সুধম্মস্স ভিক্খুনো অনুদূতং দদেয্য চিত্তং গহপতিং খমাপেতুং। এসা ঞত্তি। ‘‘সুণাতু মে, ভন্তে, সঙ্ঘো। সঙ্ঘো ইত্থন্নামং ভিক্খুং সুধম্মস্স ভিক্খুনো অনুদূতং দেতি চিত্তং গহপতিং খমাপেতুং। যস্সাযস্মতো খমতি ইত্থন্নামস্স ভিক্খুনো সুধম্মস্স ভিক্খুনো অনুদূতস্স দানং চিত্তং গহপতিং খমাপেতুং, সো তুণ্হস্স; যস্স নক্খমতি, সো ভাসেয্য। ‘‘দিন্নো সঙ্ঘেন ইত্থন্নামো ভিক্খু সুধম্মস্স ভিক্খুনো অনুদূতো চিত্তং গহপতিং খমাপেতুং। খমতি সঙ্ঘস্স, তস্মা তুণ্হী, এৰমেতং ধারযামী’’তি। ৪২. ‘‘তেন, ভিক্খৰে, সুধম্মেন ভিক্খুনা অনুদূতেন ভিক্খুনা সদ্ধিং মচ্ছিকাসণ্ডং গন্ত্ৰা চিত্তো গহপতি খমাপেতব্বো – ‘খম, গহপতি, পসাদেমি ত’ন্তি। এৰঞ্চে ৰুচ্চমানো খমতি, ইচ্চেতং কুসলং। নো চে খমতি, অনুদূতেন ভিক্খুনা ৰত্তব্বো – ‘খম, গহপতি, ইমস্স ভিক্খুনো, পসাদেতি ত’ন্তি। এৰঞ্চে ৰুচ্চমানো খমতি, ইচ্চেতং কুসলং। নো চে খমতি, অনুদূতেন ভিক্খুনা ৰত্তব্বো – ‘খম, গহপতি, ইমস্স ভিক্খুনো, অহং তং পসাদেমী’তি। এৰঞ্চে ৰুচ্চমানো খমতি, ইচ্চেতং কুসলং। নো চে খমতি, অনুদূতেন ভিক্খুনা ৰত্তব্বো – ‘খম, গহপতি, ইমস্স ভিক্খুনো, সঙ্ঘস্স ৰচনেনা’তি। এৰঞ্চে ৰুচ্চমানো খমতি, ইচ্চেতং কুসলং। নো চে খমতি, অনুদূতেন ভিক্খুনা সুধম্মো ভিক্খু [সুধম্মং ভিক্খুং… সা আপত্তি দেসাপেতব্বাতি (সী॰ স্যা॰)] চিত্তস্স গহপতিনো দস্সনূপচারং অৰিজহাপেত্ৰা সৰনূপচারং অৰিজহাপেত্ৰা একংসং উত্তরাসঙ্গং কারাপেত্ৰা উক্কুটিকং নিসীদাপেত্ৰা অঞ্জলিং পগ্গণ্হাপেত্ৰা তং আপত্তিং দেসাপেতব্বো’’তি [সুধম্মং ভিক্খুং… সা আপত্তি দেসাপেতব্বাতি (সী॰ স্যা॰)]। অথ খো আযস্মা সুধম্মো অনুদূতেন ভিক্খুনা সদ্ধিং মচ্ছিকাসণ্ডং গন্ত্ৰা চিত্তং গহপতিং খমাপেসি। সো সম্মা ৰত্ততি, লোমং পাতেতি, নেত্থারং ৰত্ততি, ভিক্খূ উপসঙ্কমিত্ৰা এৰং ৰদেতি – ‘‘অহং, আৰুসো, সঙ্ঘেন পটিসারণীযকম্মকতো সম্মা ৰত্তামি, লোমং পাতেমি, নেত্থারং ৰত্তামি। কথং নু খো মযা পটিপজ্জিতব্ব’’ন্তি? ভিক্খূ ভগৰতো এতমত্থং আরোচেসুং…পে॰… ‘‘তেন হি, ভিক্খৰে, সঙ্ঘো সুধম্মস্স ভিক্খুনো পটিসারণীযকম্মং পটিপ্পস্সম্ভেতু। নপ্পটিপ্পস্সম্ভেতব্বঅট্ঠারসকং ৪৩. ‘‘পঞ্চহি, ভিক্খৰে, অঙ্গেহি সমন্নাগতস্স ভিক্খুনো পটিসারণীযকম্মং নপ্পটিপ্পস্সম্ভেতব্বং। উপসম্পাদেতি, নিস্সযং দেতি, সামণেরং উপট্ঠাপেতি, ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো পটিসারণীযকম্মং নপ্পটিপ্পস্সম্ভেতব্বং। [পরি॰ ৪২০] ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো পটিসারণীযকম্মং নপ্পটিপ্পস্সম্ভেতব্বং। যায আপত্তিযা সঙ্ঘেন পটিসারণীযকম্মং কতং হোতি তং আপত্তিং আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং গরহতি, কম্মিকে গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো পটিসারণীযকম্মং নপ্পটিপ্পস্সম্ভেতব্বং। ‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো পটিসারণীযকম্মং নপ্পটিপ্পস্সম্ভেতব্বং। পকতত্তস্স ভিক্খুনো উপোসথং ঠপেতি, পৰারণং ঠপেতি, সৰচনীযং করোতি, অনুৰাদং পট্ঠপেতি, ওকাসং কারেতি, চোদেতি , সারেতি, ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো পটিসারণীযকম্মং নপ্পটিপ্পস্সম্ভেতব্বং’’। পটিসারণীযকম্মে নপ্পটিপ্পস্সম্ভেতব্বঅট্ঠারসকং নিট্ঠিতং। পটিপ্পস্সম্ভেতব্বঅট্ঠারসকং ৪৪. ‘‘পঞ্চহি, ভিক্খৰে, অঙ্গেহি সমন্নাগতস্স ভিক্খুনো পটিসারণীযকম্মং পটিপ্পস্সম্ভেতব্বং। ন উপসম্পাদেতি, ন নিস্সযং দেতি, ন সামণেরং উপট্ঠাপেতি, ন ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ন ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো পটিসারণীযকম্মং পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো পটিসারণীযকম্মং পটিপ্পস্সম্ভেতব্বং। যায আপত্তিযা সঙ্ঘেন পটিসারণীযকম্মং কতং হোতি তং আপত্তিং ন আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং ন গরহতি, কম্মিকে ন গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো পটিসারণীযকম্মং পটিপ্পস্সম্ভেতব্বং। ‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো পটিসারণীযকম্মং পটিপ্পস্সম্ভেতব্বং। ন পকতত্তস্স ভিক্খুনো উপোসথং ঠপেতি, ন পৰারণং ঠপেতি, ন সৰচনীযং করোতি, ন অনুৰাদং পট্ঠপেতি, ন ওকাসং কারেতি, ন চোদেতি, ন সারেতি, ন ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো পটিসারণীযকম্মং পটিপ্পস্সম্ভেতব্বং। পটিসারণীযকম্মে পটিপ্পস্সম্ভেতব্বঅট্ঠারসকং নিট্ঠিতং। ৪৫. ‘‘এৰঞ্চ পন, ভিক্খৰে, পটিপ্পস্সম্ভেতব্বং। তেন [তেন হি (স্যা॰ ক॰)], ভিক্খৰে, সুধম্মেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘অহং, ভন্তে, সঙ্ঘেন পটিসারণীযকম্মকতো সম্মা ৰত্তামি, লোমং পাতেমি, নেত্থারং ৰত্তামি, পটিসারণীযস্স কম্মস্স পটিপ্পস্সদ্ধিং যাচামী’তি । দুতিযম্পি যাচিতব্বা। ততিযম্পি যাচিতব্বা। ব্যত্তেন ভিক্খুনা পটিবলেন সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো। অযং সুধম্মো ভিক্খু সঙ্ঘেন পটিসারণীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, পটিসারণীযস্স কম্মস্স পটিপ্পস্সদ্ধিং যাচতি। যদি সঙ্ঘস্স পত্তকল্লং, সঙ্ঘো সুধম্মস্স ভিক্খুনো পটিসারণীযকম্মং পটিপ্পস্সম্ভেয্য। এসা ঞত্তি। ‘‘সুণাতু মে, ভন্তে, সঙ্ঘো। অযং সুধম্মো ভিক্খু সঙ্ঘেন পটিসারণীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, পটিসারণীযস্স কম্মস্স পটিপ্পস্সদ্ধিং যাচতি। সঙ্ঘো সুধম্মস্স ভিক্খুনো পটিসারণীযকম্মং পটিপ্পস্সম্ভেতি। যস্সাযস্মতো খমতি সুধম্মস্স ভিক্খুনো পটিসারণীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি – সুণাতু মে, ভন্তে, সঙ্ঘো। অযং সুধম্মো ভিক্খু সঙ্ঘেন পটিসারণীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, পটিসারণীযস্স কম্মস্স পটিপ্পস্সদ্ধিং যাচতি। সঙ্ঘো সুধম্মস্স ভিক্খুনো পটিসারণীযকম্মং পটিপ্পস্সম্ভেতি। যস্সাযস্মতো খমতি সুধম্মস্স ভিক্খুনো পটিসারণীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘পটিপ্পস্সদ্ধং সঙ্ঘেন সুধম্মস্স ভিক্খুনো পটিসারণীযকম্মং। খমতি সঙ্ঘস্স, তস্মা তুণ্হী, এৰমেতং ধারযামী’’তি। পটিসারণীযকম্মং নিট্ঠিতং চতুত্থং। ৫. আপত্তিযা অদস্সনে উক্খেপনীযকম্মং ৪৬. তেন সমযেন বুদ্ধো ভগৰা কোসম্বিযং ৰিহরতি ঘোসিতারামে। তেন খো পন সমযেন আযস্মা ছন্নো আপত্তিং আপজ্জিত্ৰা ন ইচ্ছতি আপত্তিং পস্সিতুং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা ছন্নো আপত্তিং আপজ্জিত্ৰা ন ইচ্ছিস্সতি আপত্তিং পস্সিতু’’ন্তি। অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ভিক্খূ পটিপুচ্ছি – ‘‘সচ্চং কির, ভিক্খৰে, ছন্নো ভিক্খু আপত্তিং আপজ্জিত্ৰা ন ইচ্ছতি আপত্তিং পস্সিতু’’ন্তি? ‘‘সচ্চং ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং…পে॰… কথঞ্হি নাম সো, ভিক্খৰে, মোঘপুরিসো আপত্তিং আপজ্জিত্ৰা ন ইচ্ছিস্সতি আপত্তিং পস্সিতুং? নেতং, ভিক্খৰে, অপ্পসন্নানং ৰা পসাদায…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি – তেন হি, ভিক্খৰে, সঙ্ঘো ছন্নস্স ভিক্খুনো, আপত্তিযা অদস্সনে, উক্খেপনীযকম্মং করোতু – অসম্ভোগং সঙ্ঘেন। এৰঞ্চ পন, ভিক্খৰে, কাতব্বং – পঠমং ছন্নো ভিক্খু চোদেতব্বো, চোদেত্ৰা সারেতব্বো, সারেত্ৰা আপত্তিং আরোপেতব্বো, আপত্তিং আরোপেত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো – ৪৭. ‘‘সুণাতু মে, ভন্তে, সঙ্ঘো। অযং ছন্নো ভিক্খু আপত্তিং আপজ্জিত্ৰা ন ইচ্ছতি আপত্তিং পস্সিতুং। যদি সঙ্ঘস্স পত্তকল্লং, সঙ্ঘো ছন্নস্স ভিক্খুনো, আপত্তিযা অদস্সনে, উক্খেপনীযকম্মং করেয্য – অসম্ভোগং সঙ্ঘেন। এসা ঞত্তি। ‘‘সুণাতু মে, ভন্তে, সঙ্ঘো। অযং ছন্নো ভিক্খু আপত্তিং আপজ্জিত্ৰা ন ইচ্ছতি আপত্তিং পস্সিতুং। সঙ্ঘো ছন্নস্স ভিক্খুনো, আপত্তিযা অদস্সনে, উক্খেপনীযকম্মং করোতি – অসম্ভোগং সঙ্ঘেন। যস্সাযস্মতো খমতি ছন্নস্স ভিক্খুনো, আপত্তিযা অদস্সনে, উক্খেপনীযস্স কম্মস্স করণং – অসম্ভোগং সঙ্ঘেন, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি – সুণাতু মে, ভন্তে, সঙ্ঘো। অযং ছন্নো ভিক্খু আপত্তিং আপজ্জিত্ৰা ন ইচ্ছতি আপত্তিং পস্সিতুং। সঙ্ঘো ছন্নস্স ভিক্খুনো, আপত্তিযা অদস্সনে, উক্খেপনীযকম্মং করোতি – অসম্ভোগং সঙ্ঘেন। যস্সাযস্মতো খমতি ছন্নস্স ভিক্খুনো, আপত্তিযা অদস্সনে, উক্খেপনীযস্স কম্মস্স করণং – অসম্ভোগং সঙ্ঘেন, সো তুণ্হস্স; যস্স নক্খমতি, সো ভাসেয্য। ‘‘কতং সঙ্ঘেন ছন্নস্স ভিক্খুনো, আপত্তিযা অদস্সনে, উক্খেপনীযকম্মং – অসম্ভোগং সঙ্ঘেন। খমতি সঙ্ঘস্স, তস্মা তুণ্হী, এৰমেতং ধারযামীতি। ‘‘আৰাসপরম্পরঞ্চ, ভিক্খৰে, সংসথ – ‘ছন্নো ভিক্খু সঙ্ঘেন আপত্তিযা [ছন্নো ভিক্খু আপত্তিযা (সী॰ ক॰)] অদস্সনে উক্খেপনীযকম্মকতো – অসম্ভোগং সঙ্ঘেনা’তি। অধম্মকম্মদ্ৰাদসকং ৪৮. ‘‘তীহি, ভিক্খৰে, অঙ্গেহি সমন্নাগতং, আপত্তিযা অদস্সনে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অসম্মুখা কতং হোতি, অপ্পটিপুচ্ছা কতং হোতি, অপ্পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং, আপত্তিযা অদস্সনে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং, আপত্তিযা অদস্সনে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অনাপত্তিযা কতং হোতি, অদেসনাগামিনিযা আপত্তিযা কতং হোতি, দেসিতায আপত্তিযা কতং হোতি…পে॰… অচোদেত্ৰা কতং হোতি, অসারেত্ৰা কতং হোতি, আপত্তিং অনারোপেত্ৰা কতং হোতি…পে॰… অসম্মুখা কতং হোতি, অধম্মেন কতং হোতি, ৰগ্গেন কতং হোতি…পে॰… অপ্পটিপুচ্ছা কতং হোতি, অধম্মেন কতং হোতি, ৰগ্গেন কতং হোতি…পে॰… অপ্পটিঞ্ঞায কতং হোতি, অধম্মেন কতং হোতি, ৰগ্গেন কতং হোতি…পে॰… অনাপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… অদেসনাগামিনিযা আপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… দেসিতায আপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… অচোদেত্ৰা কতং হোতি, অধম্মেন কতং হোতি, ৰগ্গেন কতং হোতি…পে॰… অসারেত্ৰা কতং হোতি, অধম্মেন কতং হোতি, ৰগ্গেন কতং হোতি…পে॰… আপত্তিং অনারোপেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং, আপত্তিযা অদস্সনে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। আপত্তিযা অদস্সনে উক্খেপনীযকম্মে অধম্মকম্মদ্ৰাদসকং নিট্ঠিতং। ধম্মকম্মদ্ৰাদসকং ৪৯. ‘‘তীহি , ভিক্খৰে, অঙ্গেহি সমন্নাগতং, আপত্তিযা অদস্সনে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। সম্মুখা কতং হোতি, পটিপুচ্ছা কতং হোতি, পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং, আপত্তিযা অদস্সনে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং…পে॰…। আপত্তিযা কতং হোতি, দেসনাগামিনিযা আপত্তিযা কতং হোতি, অদেসিতায আপত্তিযা কতং হোতি…পে॰… চোদেত্ৰা কতং হোতি, সারেত্ৰা কতং হোতি, আপত্তিং আরোপেত্ৰা কতং হোতি…পে॰… সম্মুখা কতং হোতি, ধম্মেন কতং হোতি, সমগ্গেন কতং হোতি…পে॰… পটিপুচ্ছা কতং হোতি, ধম্মেন কতং হোতি, সমগ্গেন কতং হোতি…পে॰… পটিঞ্ঞায কতং হোতি, ধম্মেন কতং হোতি, সমগ্গেন কতং হোতি…পে॰… আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… দেসনাগামিনিযা আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… অদেসিতায আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… চোদেত্ৰা কতং হোতি, ধম্মেন কতং হোতি, সমগ্গেন কতং হোতি…পে॰… সারেত্ৰা কতং হোতি, ধম্মেন কতং হোতি, সমগ্গেন কতং হোতি…পে॰… আপত্তিং আরোপেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং, আপত্তিযা অদস্সনে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। আপত্তিযা অদস্সনে উক্খেপনীযকম্মে ধম্মকম্মদ্ৰাদসকং নিট্ঠিতং। আকঙ্খমানছক্কং ৫০. [পরি॰ ৩২৩] ‘‘তীহি , ভিক্খৰে, অঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অদস্সনে, উক্খেপনীযকম্মং করেয্য। ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো ; বালো হোতি অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অদস্সনে, উক্খেপনীযকম্মং করেয্য। ‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অদস্সনে, উক্খেপনীযকম্মং করেয্য। অধিসীলে সীলৰিপন্নো হোতি, অজ্ঝাচারে আচারৰিপন্নো হোতি, অতিদিট্ঠিযা দিট্ঠিৰিপন্নো হোতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অদস্সনে, উক্খেপনীযকম্মং করেয্য। ‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অদস্সনে, উক্খেপনীযকম্মং করেয্য। বুদ্ধস্স অৰণ্ণং ভাসতি, ধম্মস্স অৰণ্ণং ভাসতি, সঙ্ঘস্স অৰণ্ণং ভাসতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অদস্সনে, উক্খেপনীযকম্মং করেয্য। ‘‘তিণ্ণং, ভিক্খৰে, ভিক্খূনং, আকঙ্খমানো সঙ্ঘো, আপত্তিযা অদস্সনে, উক্খেপনীযকম্মং করেয্য। একো ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; একো বালো হোতি অব্যত্তো আপত্তিবহুলো অনপদানো; একো গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অদস্সনে, উক্খেপনীযকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অদস্সনে, উক্খেপনীযকম্মং করেয্য। একো অধিসীলে সীলৰিপন্নো হোতি , একো অজ্ঝাচারে আচারৰিপন্নো হোতি, একো অতিদিট্ঠিযা দিট্ঠিৰিপন্নো হোতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অদস্সনে, উক্খেপনীযকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অদস্সনে, উক্খেপনীযকম্মং করেয্য। একো বুদ্ধস্স অৰণ্ণং ভাসতি, একো ধম্মস্স অৰণ্ণং ভাসতি, একো সঙ্ঘস্স অৰণ্ণং ভাসতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অদস্সনে, উক্খেপনীযকম্মং করেয্য। আপত্তিযা অদস্সনে উক্খেপনীযকম্মে আকঙ্খমানছক্কং নিট্ঠিতং। তেচত্তালীসৰত্তং ৫১. ‘‘আপত্তিযা অদস্সনে উক্খেপনীযকম্মকতেন, ভিক্খৰে, ভিক্খুনা সম্মা ৰত্তিতব্বং । তত্রাযং সম্মাৰত্তনা – ন উপসম্পাদেতব্বং, ন নিস্সযো দাতব্বো, ন সামণেরো উপট্ঠাপেতব্বো, ন ভিক্খুনোৰাদকসম্মুতি সাদিতব্বা, সম্মতেনপি ভিক্খুনিযো ন ওৰদিতব্বা। যায আপত্তিযা সঙ্ঘেন, আপত্তিযা অদস্সনে, উক্খেপনীযকম্মং কতং হোতি সা আপত্তি ন আপজ্জিতব্বা, অঞ্ঞা ৰা তাদিসিকা, ততো ৰা পাপিট্ঠতরা; কম্মং ন গরহিতব্বং, কম্মিকা ন গরহিতব্বা। ন পকতত্তস্স ভিক্খুনো অভিৰাদনং, পচ্চুট্ঠানং, অঞ্জলিকম্মং, সামীচিকম্মং, আসনাভিহারো, সেয্যাভিহারো, পাদোদকং, পাদপীঠং পাদকথলিকং, পত্তচীৰরপ্পটিগ্গহণং, নহানে পিট্ঠিপরিকম্মং সাদিতব্বং। ন পকতত্তো ভিক্খু সীলৰিপত্তিযা অনুদ্ধংসেতব্বো, ন আচারৰিপত্তিযা অনুদ্ধংসেতব্বো, ন দিট্ঠিৰিপত্তিযা অনুদ্ধংসেতব্বো, ন আজীৰৰিপত্তিযা অনুদ্ধংসেতব্বো, ন ভিক্খু ভিক্খূহি ভেদেতব্বো [ন ভিক্খূ ভিক্খূহি ভেদেতব্বা (স্যা॰)], ন গিহিদ্ধজো ধারেতব্বো, ন তিত্থিযদ্ধজো ধারেতব্বো, ন তিত্থিযা সেৰিতব্বা; ভিক্খূ সেৰিতব্বা, ভিক্খুসিক্খায সিক্খিতব্বং [ভিক্খুসিক্খা সিক্খিতব্বা (স্যা॰)]। ন পকতত্তেন ভিক্খুনা সদ্ধিং একচ্ছন্নে আৰাসে ৰত্থব্বং, ন একচ্ছন্নে অনাৰাসেৰত্থব্বং, ন একচ্ছন্নে আৰাসে ৰা অনাৰাসে ৰা ৰত্থব্বং, পকতত্তং ভিক্খুং দিস্ৰা আসনা ৰুট্ঠাতব্বং, ন পকতত্তো ভিক্খু আসাদেতব্বো অন্তো ৰা বহি ৰা। ন পকতত্তস্স ভিক্খুনো উপোসথো ঠপেতব্বো, ন পৰারণা ঠপেতব্বা, ন সৰচনীযং কাতব্বং, ন অনুৰাদো পট্ঠপেতব্বো, ন ওকাসো কারেতব্বো, ন চোদেতব্বো, ন সারেতব্বো, ন ভিক্খূহি সম্পযোজেতব্ব’’ন্তি। আপত্তিযা অদস্সনে উক্খেপনীযকম্মে তেচত্তালীসৰত্তং নিট্ঠিতং। ৫২. অথ খো সঙ্ঘো ছন্নস্স ভিক্খুনো, আপত্তিযা অদস্সনে, উক্খেপনীযকম্মং অকাসি – অসম্ভোগং সঙ্ঘেন। সো সঙ্ঘেন, আপত্তিযা অদস্সনে, উক্খেপনীযকম্মকতো তম্হা আৰাসা অঞ্ঞং আৰাসং অগমাসি। তত্থ ভিক্খূ নেৰ অভিৰাদেসুং, ন পচ্চুট্ঠেসুং, ন অঞ্জলিকম্মং ন সামীচিকম্মং অকংসু, ন সক্করিংসু, ন গরু করিংসু [ন গরুকরিংসু (ক॰)], ন মানেসুং, ন পূজেসুং। সো ভিক্খূহি অসক্করিযমানো অগরুকরিযমানো অমানিযমানো অপূজিযমানো অসক্কারপকতো তম্হাপি আৰাসা অঞ্ঞং আৰাসং অগমাসি। তত্থপি ভিক্খূ নেৰ অভিৰাদেসুং, ন পচ্চুট্ঠেসুং, ন অঞ্জলিকম্মং ন সামীচিকম্মং অকংসু, ন সক্করিংসু, ন গরুং করিংসু, ন মানেসুং, ন পূজেসুং। সো ভিক্খূহি অসক্করিযমানো অগরুকরিযমানো অমানিযমানো অপূজিযমানো অসক্কারপকতো তম্হাপি আৰাসা অঞ্ঞং আৰাসং অগমাসি। তত্থপি ভিক্খূ নেৰ অভিৰাদেসুং, ন পচ্চুট্ঠেসুং, ন অঞ্জলিকম্মং ন সামীচিকম্মং অকংসু, ন সক্করিংসু, ন গরুং করিংসু, ন মানেসুং, ন পূজেসুং। সো ভিক্খূহি অসক্করিযমানো অগরুকরিযমানো অমানিযমানো অপূজিযমানো অসক্কারপকতো পুনদেৰ কোসম্বিং পচ্চাগঞ্ছি। সো সম্মা ৰত্ততি, লোমং পাতেতি, নেত্থারং ৰত্ততি, ভিক্খূ উপসঙ্কমিত্ৰা এৰং ৰদেতি – ‘‘অহং, আৰুসো, সঙ্ঘেন, আপত্তিযা অদস্সনে, উক্খেপনীযকম্মকতো সম্মা ৰত্তামি, লোমং পাতেমি, নেত্থারং ৰত্তামি। কথং নু খো মযা পটিপজ্জিতব্ব’’ন্তি? ভিক্খূ ভগৰতো এতমত্থং আরোচেসুং…পে॰…। ‘‘তেন হি, ভিক্খৰে, সঙ্ঘো ছন্নস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতু। নপ্পটিপ্পস্সম্ভেতব্ব-তেচত্তালীসকং ৫৩. ‘‘পঞ্চহি , ভিক্খৰে, অঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। উপসম্পাদেতি, নিস্সযং দেতি, সামণেরং উপট্ঠাপেতি, ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। [পরি॰ ৪২০] ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। যায আপত্তিযা সঙ্ঘেন, আপত্তিযা অদস্সনে, উক্খেপনীযকম্মং কতং হোতি তং আপত্তিং আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং গরহতি, কম্মিকে গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। পকতত্তস্স ভিক্খুনো অভিৰাদনং, পচ্চুট্ঠানং, অঞ্জলিকম্মং, সামীচিকম্মং, আসনাভিহারং সাদিযতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। পকতত্তস্স ভিক্খুনো সেয্যাভিহারং, পাদোদকং পাদপীঠং, পাদকথলিকং, পত্তচীৰরপ্পটিগ্গহণং , নহানে পিট্ঠিপরিকম্মং সাদিযতি – ইমেহি খো, ভিক্খৰে , পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। পকতত্তং ভিক্খুং সীলৰিপত্তিযা অনুদ্ধংসেতি, আচারৰিপত্তিযা অনুদ্ধংসেতি, দিট্ঠিৰিপত্তিযা অনুদ্ধংসেতি, আজীৰৰিপত্তিযা অনুদ্ধংসেতি, ভিক্খুং [ভিক্খূ (সী॰ স্যা॰)] ভিক্খূহি ভেদেতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। গিহিদ্ধজং ধারেতি, তিত্থিযদ্ধজং ধারেতি, তিত্থিযে সেৰতি; ভিক্খূ ন সেৰতি, ভিক্খুসিক্খায ন সিক্খতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। পকতত্তেন ভিক্খুনা সদ্ধিং একচ্ছন্নে আৰাসে ৰসতি, একচ্ছন্নে অনাৰাসে ৰসতি, একচ্ছন্নে আৰাসে ৰা অনাৰাসে ৰা ৰসতি; পকতত্তং ভিক্খুং দিস্ৰা আসনা ন ৰুট্ঠাতি; পকতত্তং ভিক্খুং আসাদেতি অন্তো ৰা বহি ৰা – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। ‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। পকতত্তস্স ভিক্খুনো উপোসথং ঠপেতি, পৰারণং ঠপেতি, সৰচনীযং করোতি, অনুৰাদং পট্ঠপেতি, ওকাসং কারেতি, চোদেতি, সারেতি, ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং নপ্পটিপ্পস্সম্ভেতব্বং। আপত্তিযা অদস্সনে উক্খেপনীযকম্মে নপ্পটিপ্পস্সম্ভেতব্ব-তেচত্তালীসকং নিট্ঠিতং। পটিপ্পস্সম্ভেতব্ব-তেচত্তালীসকং ৫৪. ‘‘পঞ্চহি , ভিক্খৰে, অঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ন উপসম্পাদেতি, ন নিস্সযং দেতি, ন সামণেরং উপট্ঠাপেতি, ন ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ন ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। যায আপত্তিযা সঙ্ঘেন আপত্তিযা অদস্সনে উক্খেপনীযকম্মং কতং হোতি তং আপত্তিং ন আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং ন গরহতি, কম্মিকে ন গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ন পকতত্তস্স ভিক্খুনো অভিৰাদনং, পচ্চুট্ঠানং, অঞ্জলিকম্মং, সামীচিকম্মং, আসনাভিহারং সাদিযতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ন পকতত্তস্স ভিক্খুনো সেয্যাভিহারং, পাদোদকং পাদপীঠং, পাদকথলিকং, পত্তচীৰরপ্পটিগ্গহণং, নহানে পিট্ঠিপরিকম্মং সাদিযতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ন পকতত্তং ভিক্খুং সীলৰিপত্তিযা অনুদ্ধংসেতি, ন আচারৰিপত্তিযা অনুদ্ধংসেতি, ন দিট্ঠিৰিপত্তিযা অনুদ্ধংসেতি, ন আজীৰৰিপত্তিযা অনুদ্ধংসেতি, ন ভিক্খুং ভিক্খূহি ভেদেতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ‘‘অপরেহিপি , ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ন গিহিদ্ধজং ধারেতি, ন তিত্থিযদ্ধজং ধারেতি, ন তিত্থিযে সেৰতি, ভিক্খূ সেৰতি, ভিক্খুসিক্খায সিক্খতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ন পকতত্তেন ভিক্খুনা সদ্ধিং একচ্ছন্নে আৰাসে ৰসতি, ন একচ্ছন্নে অনাৰাসে ৰসতি, ন একচ্ছন্নে আৰাসে ৰা অনাৰাসে ৰা ৰসতি, পকতত্তং ভিক্খুং দিস্ৰা আসনা ৰুট্ঠাতি, ন পকতত্তং ভিক্খুং আসাদেতি অন্তো ৰা বহি ৰা – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। ন পকতত্তস্স ভিক্খুনো উপোসথং ঠপেতি, ন পৰারণং ঠপেতি, ন সৰচনীযং করোতি, ন অনুৰাদং পট্ঠপেতি, ন ওকাসং কারেতি, ন চোদেতি, ন সারেতি, ন ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতব্বং। আপত্তিযা অদস্সনে উক্খেপনীযকম্মে পটিপ্পস্সম্ভেতব্বতেচত্তালীসকং নিট্ঠিতং। ৫৫. ‘‘এৰঞ্চ পন, ভিক্খৰে, পটিপ্পস্সম্ভেতব্বং। তেন, ভিক্খৰে, ছন্নেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘অহং, ভন্তে, সঙ্ঘেন, আপত্তিযা অদস্সনে, উক্খেপনীযকম্মকতো সম্মা ৰত্তামি, লোমং পাতেমি, নেত্থারং ৰত্তামি, আপত্তিযা অদস্সনে উক্খেপনীযস্স কম্মস্স পটিপ্পস্সদ্ধিং যাচামী’তি। দুতিযম্পি যাচিতব্বা। ততিযম্পি যাচিতব্বা। ব্যত্তেন ভিক্খুনা পটিবলেন সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো। অযং ছন্নো ভিক্খু সঙ্ঘেন, আপত্তিযা অদস্সনে, উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, আপত্তিযা অদস্সনে উক্খেপনীযস্স কম্মস্স পটিপ্পস্সদ্ধিং যাচতি । যদি সঙ্ঘস্স পত্তকল্লং, সঙ্ঘো ছন্নস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেয্য। এসা ঞত্তি। ‘‘সুণাতু মে, ভন্তে, সঙ্ঘো। অযং ছন্নো ভিক্খু সঙ্ঘেন, আপত্তিযা অদস্সনে, উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, আপত্তিযা অদস্সনে, উক্খেপনীযস্স কম্মস্স পটিপ্পস্সদ্ধিং যাচতি। সঙ্ঘো ছন্নস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতি। যস্সাযস্মতো খমতি ছন্নস্স ভিক্খুনো, আপত্তিযা অদস্সনে, উক্খেপনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি – সুণাতু মে, ভন্তে, সঙ্ঘো। অযং ছন্নো ভিক্খু সঙ্ঘেন, আপত্তিযা অদস্সনে, উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, আপত্তিযা অদস্সনে, উক্খেপনীযস্স কম্মস্স পটিপ্পস্সদ্ধিং যাচতি। সঙ্ঘো ছন্নস্স ভিক্খুনো, আপত্তিযা অদস্সনে, উক্খেপনীযকম্মং পটিপ্পস্সম্ভেতি। যস্সাযস্মতো খমতি ছন্নস্স ভিক্খুনো, আপত্তিযা অদস্সনে, উক্খেপনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘পটিপ্পস্সদ্ধং সঙ্ঘেন ছন্নস্স ভিক্খুনো, আপত্তিযা অদস্সনে, উক্খেপনীযকম্মং। খমতি সঙ্ঘস্স, তস্মা তুণ্হী, এৰমেতং ধারযামী’’তি। আপত্তিযা অদস্সনে উক্খেপনীযকম্মং নিট্ঠিতং পঞ্চমং। ৬. আপত্তিযা অপ্পটিকম্মে উক্খেপনীযকম্মং ৫৬. তেন সমযেন বুদ্ধো ভগৰা কোসম্বিযং ৰিহরতি ঘোসিতারামে। তেন খো পন সমযেন আযস্মা ছন্নো আপত্তিং আপজ্জিত্ৰা ন ইচ্ছতি আপত্তিং পটিকাতুং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা ছন্নো আপত্তিং আপজ্জিত্ৰা ন ইচ্ছিস্সতি আপত্তিং পটিকাতু’’ন্তি? অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ভিক্খূ পটিপুচ্ছি – ‘‘সচ্চং কির, ভিক্খৰে, ছন্নো ভিক্খু আপত্তিং আপজ্জিত্ৰা ন ইচ্ছতি আপত্তিং পটিকাতু’’ন্তি? ‘‘সচ্চং ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং…পে॰… কথঞ্হি নাম সো, ভিক্খৰে, মোঘপুরিসো আপত্তিং আপজ্জিত্ৰা ন ইচ্ছিস্সতি আপত্তিং পটিকাতুং। নেতং, ভিক্খৰে, অপ্পসন্নানং ৰা পসাদায…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি – তেন হি, ভিক্খৰে, সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং করোতু – অসম্ভোগং সঙ্ঘেন। এৰঞ্চ পন, ভিক্খৰে, কাতব্বং – পঠমং ছন্নো ভিক্খু চোদেতব্বো, চোদেত্ৰা সারেতব্বো, সারেত্ৰা আপত্তিং আরোপেতব্বো, আপত্তিং আরোপেত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো। অযং ছন্নো ভিক্খু আপত্তিং আপজ্জিত্ৰা ন ইচ্ছতি আপত্তিং পটিকাতুং। যদি সঙ্ঘস্স পত্তকল্লং, সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং করেয্য – অসম্ভোগং সঙ্ঘেন। এসা ঞত্তি। ‘‘সুণাতু মে, ভন্তে, সঙ্ঘো। অযং ছন্নো ভিক্খু আপত্তিং আপজ্জিত্ৰা ন ইচ্ছতি আপত্তিং পটিকাতুং। সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং করোতি – অসম্ভোগং সঙ্ঘেন। যস্সাযস্মতো খমতি ছন্নস্স ভিক্খুনো, আপত্তিযা অপ্পটিকম্মে, উক্খেপনীযস্স কম্মস্স করণং – অসম্ভোগং সঙ্ঘেন, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি – সুণাতু মে, ভন্তে, সঙ্ঘো। অযং ছন্নো ভিক্খু আপত্তিং আপজ্জিত্ৰা ন ইচ্ছতি আপত্তিং পটিকাতুং। সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং করোতি – অসম্ভোগং সঙ্ঘেন। যস্সাযস্মতো খমতি ছন্নস্স ভিক্খুনো, আপত্তিযা অপ্পটিকম্মে, উক্খেপনীযস্স কম্মস্স করণং – অসম্ভোগং সঙ্ঘেন, সো তুণ্হস্স; যস্স নক্খমতি, সো ভাসেয্য। ‘‘কতং সঙ্ঘেন ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং – অসম্ভোগং সঙ্ঘেন। খমতি সঙ্ঘস্স, তস্মা তুণ্হী, এৰমেতং ধারযামীতি। ‘‘আৰাসপরম্পরঞ্চ , ভিক্খৰে, সংসথ – ‘ছন্নো ভিক্খু, সঙ্ঘেন আপত্তিযা [ছন্নো ভিক্খু আপত্তিযা (সী॰ ক॰)] অপ্পটিকম্মে, উক্খেপনীযকম্মকতো – অসম্ভোগং সঙ্ঘেনা’তি। অধম্মকম্মদ্ৰাদসকং ৫৭. ‘‘তীহি, ভিক্খৰে, অঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অসম্মুখা কতং হোতি, অপ্পটিপুচ্ছা কতং হোতি, অপ্পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অনাপত্তিযা কতং হোতি, অদেসনাগামিনিযা আপত্তিযা কতং হোতি, দেসিতায আপত্তিযা কতং হোতি…পে॰… অচোদেত্ৰা কতং হোতি, অসারেত্ৰা কতং হোতি, আপত্তিং অনারোপেত্ৰা কতং হোতি…পে॰… অসম্মুখা কতং হোতি, অধম্মেন কতং হোতি, ৰগ্গেন কতং হোতি…পে॰… অপ্পটিপুচ্ছা কতং হোতি, অধম্মেন কতং হোতি, ৰগ্গেন কতং হোতি…পে॰… অপ্পটিঞ্ঞায কতং হোতি, অধম্মেন কতং হোতি, ৰগ্গেন কতং হোতি…পে॰… অনাপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… অদেসনাগামিনিযা আপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… দেসিতায আপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… অচোদেত্ৰা কতং হোতি, অধম্মেন কতং হোতি, ৰগ্গেন কতং হোতি…পে॰… অসারেত্ৰা কতং হোতি, অধম্মেন কতং হোতি, ৰগ্গেন কতং হোতি…পে॰… আপত্তিং অনারোপেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। আপত্তিযা অপ্পটিকম্মে উক্খেপনীযকম্মে অধম্মকম্মদ্ৰাদসকং নিট্ঠিতং। ধম্মকম্মদ্ৰাদসকং ৫৮. ‘‘তীহি , ভিক্খৰে, অঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। সম্মুখা কতং হোতি, পটিপুচ্ছা কতং হোতি, পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। আপত্তিযা কতং হোতি, দেসনাগামিনিযা আপত্তিযা কতং হোতি, অদেসিতায আপত্তিযা কতং হোতি…পে॰… চোদেত্ৰা কতং হোতি, সারেত্ৰা কতং হোতি, আপত্তিং আরোপেত্ৰা কতং হোতি…পে॰… সম্মুখা কতং হোতি, ধম্মেন কতং হোতি, সমগ্গেন কতং হোতি…পে॰… পটিপুচ্ছা কতং হোতি, ধম্মেন কতং হোতি, সমগ্গেন কতং হোতি…পে॰… পটিঞ্ঞায কতং হোতি, ধম্মেন কতং হোতি, সমগ্গেন কতং হোতি…পে॰… আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… দেসনাগামিনিযা আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… অদেসিতায আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… চোদেত্ৰা কতং হোতি, ধম্মেন কতং হোতি, সমগ্গেন কতং হোতি…পে॰… সারেত্ৰা কতং হোতি, ধম্মেন কতং হোতি, সমগ্গেন কতং হোতি…পে॰… আপত্তিং আরোপেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং, আপত্তিযা অপ্পটিকম্মে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। আপত্তিযা অপ্পটিকম্মে উক্খেপনীযকম্মে ধম্মকম্মদ্ৰাদসকং নিট্ঠিতং। আকঙ্খমানছক্কং ৫৯. [পরি॰ ৩২৩] ‘‘তীহি , ভিক্খৰে, অঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য। ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; বালো হোতি অব্যত্তো আপত্তিবহুলো অনপদানো; গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য। ‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য । অধিসীলে সীলৰিপন্নো হোতি, অজ্ঝাচারে আচারৰিপন্নো হোতি, অতিদিট্ঠিযা দিট্ঠিৰিপন্নো হোতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য। ‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য। বুদ্ধস্স অৰণ্ণং ভাসতি, ধম্মস্স অৰণ্ণং ভাসতি, সঙ্ঘস্স অৰণ্ণং ভাসতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য। ‘‘তিণ্ণং, ভিক্খৰে, ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য। একো ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; একো বালো হোতি অব্যত্তো আপত্তিবহুলো অনপদানো; একো গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য। একো অধিসীলে সীলৰিপন্নো হোতি, একো অজ্ঝাচারে আচারৰিপন্নো হোতি, একো অতিদিট্ঠিযা দিট্ঠিৰিপন্নো হোতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য। একো বুদ্ধস্স অৰণ্ণং ভাসতি, একো ধম্মস্স অৰণ্ণং ভাসতি, একো সঙ্ঘস্স অৰণ্ণং ভাসতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, আপত্তিযা অপ্পটিকম্মে, উক্খেপনীযকম্মং করেয্য। আপত্তিযা অপ্পটিকম্মে উক্খেপনীযকম্মে আকঙ্খমানছক্কং নিট্ঠিতং। তেচত্তালীসৰত্তং ৬০. ‘‘আপত্তিযা অপ্পটিকম্মে উক্খেপনীযকম্মকতেন, ভিক্খৰে, ভিক্খুনা সম্মা ৰত্তিতব্বং। তত্রাযং সম্মাৰত্তনা – ন উপসম্পাদেতব্বং, ন নিস্সযো দাতব্বো, ন সামণেরো উপট্ঠাপেতব্বো, ন ভিক্খুনোৰাদকসম্মুতি সাদিতব্বা, সম্মতেনপি ভিক্খুনিযো ন ওৰদিতব্বা। যায আপত্তিযা সঙ্ঘেন, আপত্তিযা অপ্পটিকম্মে, উক্খেপনীযকম্মং কতং হোতি সা আপত্তি ন আপজ্জিতব্বা, অঞ্ঞা ৰা তাদিসিকা, ততো ৰা পাপিট্ঠতরা; কম্মং ন গরহিতব্বং, কম্মিকা ন গরহিতব্বা। ন পকতত্তস্স ভিক্খুনো অভিৰাদনং, পচ্চুট্ঠানং, অঞ্জলিকম্মং, সামীচিকম্মং, আসনাভিহারো, সেয্যাভিহারো, পাদোদকং পাদপীঠং, পাদকথলিকং, পত্তচীৰরপ্পটিগ্গহণং, নহানে পিট্ঠিপরিকম্মং সাদিতব্বং। ন পকতত্তো ভিক্খু সীলৰিপত্তিযা অনুদ্ধংসেতব্বো , ন আচারৰিপত্তিযা অনুদ্ধংসেতব্বো, ন দিট্ঠিৰিপত্তিযা অনুদ্ধংসেতব্বো, ন আজীৰৰিপত্তিযা অনুদ্ধংসেতব্বো, ন ভিক্খু ভিক্খূহি ভেদেতব্বো। ন গিহিদ্ধজো ধারেতব্বো, ন তিত্থিযদ্ধজো ধারেতব্বো, ন তিত্থিযা সেৰিতব্বা; ভিক্খূ সেৰিতব্বা, ভিক্খুসিক্খায সিক্খিতব্বং। ন পকতত্তেন ভিক্খুনা সদ্ধিং একচ্ছন্নে আৰাসে ৰত্থব্বং, ন একচ্ছন্নে অনাৰাসে ৰত্থব্বং, ন একচ্ছন্নে আৰাসে ৰা অনাৰাসে ৰা ৰত্থব্বং, পকতত্তং ভিক্খুং দিস্ৰা আসনা ৰুট্ঠাতব্বং, ন পকতত্তো ভিক্খু আসাদেতব্বো অন্তো ৰা বহি ৰা। ন পকতত্তস্স ভিক্খুনো উপোসথো ঠপেতব্বো, ন পৰারণা ঠপেতব্বা, ন সৰচনীযং কাতব্বং, ন অনুৰাদো পট্ঠপেতব্বো, ন ওকাসো কারেতব্বো, ন চোদেতব্বো, ন সারেতব্বো, ন ভিক্খূহি সম্পযোজেতব্ব’’ন্তি। আপত্তিযা অপ্পটিকম্মে উক্খেপনীযকম্মে তেচত্তালীসৰত্তং নিট্ঠিতং। ৬১. অথ খো সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং অকাসি – অসম্ভোগং সঙ্ঘেন। সো সঙ্ঘেন, আপত্তিযা অপ্পটিকম্মে, উক্খেপনীযকম্মকতো তম্হা আৰাসা অঞ্ঞং আৰাসং অগমাসি। তত্থ ভিক্খূ নেৰ অভিৰাদেসুং, ন পচ্চুট্ঠেসুং, ন অঞ্জলিকম্মং ন সামীচিকম্মং অকংসু, ন সক্করিংসু, ন গরুং করিংসু, ন মানেসুং, ন পূজেসুং। সো ভিক্খূহি অসক্করিযমানো অগরুকরিযমানো অমানিযমানো অপূজিযমানো অসক্কারপকতো তম্হাপি আৰাসা অঞ্ঞং আৰাসং অগমাসি। তত্থপি ভিক্খূ নেৰ অভিৰাদেসুং, ন পচ্চুট্ঠেসুং, ন অঞ্জলিকম্মং ন সামীচিকম্মং অকংসু, ন সক্করিংসু, ন গরুং করিংসু, ন মানেসুং, ন পূজেসুং। সো ভিক্খূহি অসক্করিযমানো অগরুকরিযমানো অমানিযমানোঅপূজিযমানো অসক্কারপকতো তম্হাপি আৰাসা অঞ্ঞং আৰাসং অগমাসি। তত্থপি ভিক্খূ নেৰ অভিৰাদেসুং, ন পচ্চুট্ঠেসুং, ন অঞ্জলিকম্মং ন সামীচিকম্মং অকংসু, ন সক্করিংসু, ন গরুং করিংসু, ন মানেসুং, ন পূজেসুং। সো ভিক্খূহি অসক্করিযমানো অগরুকরিযমানো অমানিযমানো অপূজিযমানো অসক্কারপকতো পুনদেৰ কোসম্বিং পচ্চাগঞ্ছি। সো সম্মা ৰত্ততি, লোমং পাতেতি, নেত্থারং ৰত্ততি, ভিক্খূ উপসঙ্কমিত্ৰা এৰং ৰদেতি – ‘‘অহং, আৰুসো, সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৰত্তামি, লোমং পাতেমি, নেত্থারং ৰত্তামি। কথং নু খো মযা পটিপজ্জিতব্ব’’ন্তি? ভিক্খূ ভগৰতো এতমত্থং আরোচেসুং…পে॰…। ‘‘তেন হি, ভিক্খৰে, সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতু। নপ্পটিপ্পস্সম্ভেতব্বতেচত্তালীসকং ৬২. ‘‘পঞ্চহি , ভিক্খৰে, অঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং। উপসম্পাদেতি, নিস্সযং দেতি, সামণেরং উপট্ঠাপেতি, ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং। [পরি॰ ৪২০] ‘‘অপরেহিপি , ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং। যায আপত্তিযা সঙ্ঘেন, আপত্তিযা অপ্পটিকম্মে, উক্খেপনীযকম্মং কতং হোতি তং আপত্তিং আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং গরহতি, কম্মিকে গরহতি…পে॰… পকতত্তস্স ভিক্খুনো অভিৰাদনং, পচ্চুট্ঠানং, অঞ্জলিকম্মং, সামীচিকম্মং, আসনাভিহারং সাদিযতি…পে॰… পকতত্তস্স ভিক্খুনো সেয্যাভিহারং, পাদোদকং পাদপীঠং, পাদকথলিকং, পত্তচীৰরপ্পটিগ্গহণং, নহানে পিট্ঠিপরিকম্মং সাদিযতি…পে॰… পকতত্তং ভিক্খুং সীলৰিপত্তিযা অনুদ্ধংসেতি, আচারৰিপত্তিযা অনুদ্ধংসেতি, দিট্ঠিৰিপত্তিযা অনুদ্ধংসেতি, আজীৰৰিপত্তিযা অনুদ্ধংসেতি, ভিক্খুং ভিক্খূহি ভেদেতি…পে॰… গিহিদ্ধজং ধারেতি, তিত্থিযদ্ধজং ধারেতি, তিত্থিযে সেৰতি, ভিক্খূ ন সেৰতি, ভিক্খুসিক্খায ন সিক্খতি…পে॰… পকতত্তেন ভিক্খুনা সদ্ধিং একচ্ছন্নে আৰাসে ৰসতি, একচ্ছন্নে অনাৰাসে ৰসতি, একচ্ছন্নে আৰাসে ৰা অনাৰাসে ৰা ৰসতি, পকতত্তং ভিক্খুং দিস্ৰা আসনা ন ৰুট্ঠাতি, পকতত্তং ভিক্খুং আসাদেতি অন্তো ৰা বহি ৰা – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে , উক্খেপনীযকম্মং নপ্পটিপ্পস্সম্ভেতব্বং। ‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং। পকতত্তস্স ভিক্খুনো উপোসথং ঠপেতি, পৰারণং ঠপেতি, সৰচনীযং করোতি, অনুৰাদং পট্ঠপেতি, ওকাসং কারেতি, চোদেতি, সারেতি, ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং নপ্পটিপ্পস্সম্ভেতব্বং। আপত্তিযা অপ্পটিকম্মে উক্খেপনীযকম্মে নপ্পটিপ্পস্সম্ভেতব্বতেচত্তালীসকং নিট্ঠিতং। পটিপ্পস্সম্ভেতব্বতেচত্তালীসকং ৬৩. ‘‘পঞ্চহি, ভিক্খৰে, অঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং। ন উপসম্পাদেতি, ন নিস্সযং দেতি, ন সামণেরং উপট্ঠাপেতি, ন ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ন ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং। যায আপত্তিযা সঙ্ঘেন, আপত্তিযা অপ্পটিকম্মে, উক্খেপনীযকম্মং কতং হোতি তং আপত্তিং ন আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং ; কম্মং ন গরহতি, কম্মিকে ন গরহতি…পে॰… ন পকতত্তস্স ভিক্খুনো অভিৰাদনং, পচ্চুট্ঠানং, অঞ্জলিকম্মং, সামীচিকম্মং, আসনাভিহারং সাদিযতি…পে॰… ন পকতত্তস্স ভিক্খুনো সেয্যাভিহারং, পাদোদকং পাদপীঠং, পাদকথলিকং, পত্তচীৰরপ্পটিগ্গহণং, নহানে পিট্ঠিপরিকম্মং সাদিযতি…পে॰… ন পকতত্তং ভিক্খুং সীলৰিপত্তিযা অনুদ্ধংসেতি, ন আচারৰিপত্তিযা অনুদ্ধংসেতি, ন দিট্ঠিৰিপত্তিযা অনুদ্ধংসেতি, ন আজীৰৰিপত্তিযা অনুদ্ধংসেতি, ন ভিক্খুং ভিক্খূহি ভেদেতি…পে॰… ন গিহিদ্ধজং ধারেতি, ন তিত্থিযদ্ধজং ধারেতি, ন তিত্থিযে সেৰতি, ভিক্খূ সেৰতি, ভিক্খুসিক্খায সিক্খতি…পে॰… ন পকতত্তেন ভিক্খুনা সদ্ধিং একচ্ছন্নে আৰাসে ৰসতি, ন একচ্ছন্নে অনাৰাসে ৰসতি, ন একচ্ছন্নে আৰাসে ৰা অনাৰাসে ৰা ৰসতি, পকতত্তং ভিক্খুং দিস্ৰা আসনা ৰুট্ঠাতি, ন পকতত্তং ভিক্খুং আসাদেতি অন্তো ৰা বহি ৰা – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং। ‘‘অট্ঠহি , ভিক্খৰে, অঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং। ন পকতত্তস্স ভিক্খুনো উপোসথং ঠপেতি, ন পৰারণং ঠপেতি, ন সৰচনীযং করোতি, ন অনুৰাদং পট্ঠপেতি, ন ওকাসং কারেতি, ন চোদেতি, ন সারেতি, ন ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতব্বং। আপত্তিযা অপ্পটিকম্মে উক্খেপনীযকম্মে পটিপ্পস্সম্ভেতব্বতেচত্তালীসকং নিট্ঠিতং। ৬৪. ‘‘এৰঞ্চ পন, ভিক্খৰে, পটিপ্পস্সম্ভেতব্বং। তেন ভিক্খৰে, ছন্নেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘অহং, ভন্তে, সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৰত্তামি, লোমং পাতেমি, নেত্থারং ৰত্তামি, আপত্তিযা অপ্পটিকম্মে উক্খেপনীযস্স কম্মস্স পটিপ্পস্সদ্ধিং যাচামী’তি। দুতিযম্পি যাচিতব্বা। ততিযম্পি যাচিতব্বা। ব্যত্তেন ভিক্খুনা পটিবলেন সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো। অযং ছন্নো ভিক্খু সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, আপত্তিযা অপ্পটিকম্মে উক্খেপনীযস্স কম্মস্স পটিপ্পস্সদ্ধিং যাচতি। যদি সঙ্ঘস্স পত্তকল্লং, সঙ্ঘো ছন্নস্স ভিক্খুনো , আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেয্য। এসা ঞত্তি। ‘‘সুণাতু মে, ভন্তে, সঙ্ঘো। অযং ছন্নো ভিক্খু সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, আপত্তিযা অপ্পটিকম্মে উক্খেপনীযস্স কম্মস্স পটিপ্পস্সদ্ধিং যাচতি। সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতি। যস্সাযস্মতো খমতি ছন্নস্স ভিক্খুনো, আপত্তিযা অপ্পটিকম্মে, উক্খেপনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি – সুণাতু মে, ভন্তে, সঙ্ঘো। অযং ছন্নো ভিক্খু সঙ্ঘেন, আপত্তিযা অপ্পটিকম্মে, উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, আপত্তিযা অপ্পটিকম্মে, উক্খেপনীযস্স কম্মস্স পটিপ্পস্সদ্ধিং যাচতি। সঙ্ঘো ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং পটিপ্পস্সম্ভেতি। যস্সাযস্মতো খমতি ছন্নস্স ভিক্খুনো, আপত্তিযা অপ্পটিকম্মে, উক্খেপনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘পটিপ্পস্সদ্ধং সঙ্ঘেন ছন্নস্স ভিক্খুনো, আপত্তিযা অপ্পটিকম্মে, উক্খেপনীযকম্মং। খমতি সঙ্ঘস্স, তস্মা তুণ্হী, এৰমেতং ধারযামী’’তি। আপত্তিযা অপ্পটিকম্মে উক্খেপনীযকম্মং নিট্ঠিতং ছট্ঠং। ৭. পাপিকায দিট্ঠিযা অপ্পটিনিস্সগ্গে উক্খেপনীযকম্মং ৬৫. [ইদং ৰত্থু পাচি॰ ৪১৭; ম॰ নি॰ ২৩৪ আদযো] তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন অরিট্ঠস্স নাম ভিক্খুনো গদ্ধবাধিপুব্বস্স [গন্ধবাধিপুব্বস্স (ক॰)]এৰরূপং পাপকং দিট্ঠিগতং উপ্পন্নং হোতি – ‘‘তথাহং ভগৰতা ধম্মং দেসিতং আজানামি যথা যেমে অন্তরাযিকা ধম্মা ৰুত্তা ভগৰতা তে পটিসেৰতো নালং অন্তরাযাযা’’তি। অস্সোসুং খো সম্বহুলা ভিক্খূ অরিট্ঠস্স নাম কির ভিক্খুনো গদ্ধবাধিপুব্বস্স এৰরূপং পাপকং দিট্ঠিগতং উপ্পন্নং – ‘‘তথাহং ভগৰতা ধম্মং দেসিতং আজানামি যথা যেমে অন্তরাযিকা ধম্মা ৰুত্তা ভগৰতা তে পটিসেৰতো নালং অন্তরাযাযা’’তি। অথ খো তে ভিক্খূ যেন অরিট্ঠো ভিক্খু গদ্ধবাধিপুব্বো তেনুপসঙ্কমিংসু। উপসঙ্কমিত্ৰা অরিট্ঠং ভিক্খুং গদ্ধবাধিপুব্বং এতদৰোচুং – ‘‘সচ্চং কির তে, আৰুসো অরিট্ঠ, এৰরূপং পাপকং দিট্ঠিগতং উপ্পন্নং – তথাহং ভগৰতা ধম্মং দেসিতং আজানামি যথা যেমে অন্তরাযিকা ধম্মা ৰুত্তা ভগৰতা তে পটিসেৰতো নালং অন্তরাযাযা’’তি? ‘‘এৰংব্যা খো অহং, আৰুসো, ভগৰতা ধম্মং দেসিতং আজানামি, যথা যেমে অন্তরাযিকা ধম্মা ৰুত্তা ভগৰতা তে পটিসেৰতো নালং অন্তরাযাযা’’তি। ‘‘মাৰুসো অরিট্ঠ, এৰং অৰচ। মা ভগৰন্তং অব্ভাচিক্খি। ন হি সাধু ভগৰতো অব্ভক্খানং [অব্ভাচিক্খনং (ক॰)]। ন হি ভগৰা এৰং ৰদেয্য। অনেকপরিযাযেনাৰুসো অরিট্ঠ, অন্তরাযিকা ধম্মা অন্তরাযিকা ৰুত্তা ভগৰতা। অলঞ্চ পন তে পটিসেৰতো অন্তরাযায। অপ্পস্সাদা কামা ৰুত্তা ভগৰতা, বহুদুক্খা বহুপাযাসা [বহূপাযাসা (সী॰ স্যা॰)], আদীনৰো এত্থ ভিয্যো। অট্ঠিকঙ্কলূপমা কামা ৰুত্তা ভগৰতা, বহুদুক্খা বহূপাযাসা, আদীনৰো এত্থ ভিয্যো। মংসপেসূপমা কামা ৰুত্তা ভগৰতা…পে॰… তিণুক্কূপমা কামা ৰুত্তা ভগৰতা…পে॰… অঙ্গারকাসূপমা কামা ৰুত্তা ভগৰতা… সুপিনকূপমা কামা ৰুত্তা ভগৰতা… যাচিতকূপমা কামা ৰুত্তা ভগৰতা… রুক্খফলূপমা কামা ৰুত্তা ভগৰতা… অসিসূনূপমা কামা ৰুত্তা ভগৰতা… সত্তিসূলূপমা কামা ৰুত্তা ভগৰতা… সপ্পসিরূপমা কামা ৰুত্তা ভগৰতা, বহুদুক্খা বহূপাযাসা, আদীনৰো এত্থ ভিয্যো’’তি। এৰম্পি খো অরিট্ঠো ভিক্খু গদ্ধবাধিপুব্বো তেহি ভিক্খূহি ৰুচ্চমানো তথেৰ তং পাপকং দিট্ঠিগতং থামসা পরামাসা অভিনিৰিস্স ৰোহরতি – ‘‘এৰংব্যা খো অহং, আৰুসো, ভগৰতা ধম্মং দেসিতং আজানামি, যথা যেমে অন্তরাযিকা ধম্মা ৰুত্তা ভগৰতা তে পটিসেৰতো নালং অন্তরাযাযা’’তি। যতো চ খো তে ভিক্খূ নাসক্খিংসু অরিট্ঠং ভিক্খুং গদ্ধবাধিপুব্বং এতস্মা পাপকা দিট্ঠিগতা ৰিৰেচেতুং, অথ খো তে ভিক্খূ যেন ভগৰা তেনুপসঙ্কমিংসু, উপসঙ্কমিত্ৰা ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা অরিট্ঠং ভিক্খুং গদ্ধবাধিপুব্বং পটিপুচ্ছি – ‘‘সচ্চং কির তে, অরিট্ঠ, এৰরূপং পাপকং দিট্ঠিগতং উপ্পন্নং – তথাহং ভগৰতা ধম্মং দেসিতং আজানামি যথা যেমে অন্তরাযিকা ধম্মা ৰুত্তা ভগৰতা তে পটিসেৰতো নালং অন্তরাযাযা’’তি? ‘‘এৰংব্যা খো অহং, ভন্তে, ভগৰতা ধম্মং দেসিতং আজানামি, যথা যেমে অন্তরাযিকা ধম্মা ৰুত্তা ভগৰতা তে পটিসেৰতো নালং অন্তরাযাযা’’তি। ‘‘কস্স নু খো নাম ত্ৰং, মোঘপুরিস, মযা এৰং ধম্মং দেসিতং আজানাসি? ননু মযা, মোঘপুরিস, অনেকপরিযাযেন অন্তরাযিকা ধম্মা অন্তরাযিকা ৰুত্তা? অলঞ্চ পন তে পটিসেৰতো অন্তরাযায। অপ্পস্সাদা কামা ৰুত্তা মযা, বহুদুক্খা বহুপাযাসা, আদীনৰো এত্থ ভিয্যো। অট্ঠিকঙ্কলূপমা কামা ৰুত্তা মযা, বহুদুক্খা বহুপাযাসা, আদীনৰো এত্থ ভিয্যো। মংসপেসূপমা কামা ৰুত্তা মযা…পে॰… তিণুক্কূপমা কামা ৰুত্তা মযা… অঙ্গারকাসূপমা কামা ৰুত্তা মযা… সুপিনকূপমা কামা ৰুত্তা মযা…পে॰… যাচিতকূপমা কামা ৰুত্তা মযা… রুক্খফলূপমা কামা ৰুত্তা মযা… অসিসূনূপমা কামা ৰুত্তা মযা… সত্তিসূলূপমা কামা ৰুত্তা মযা… সপ্পসিরূপমা কামা ৰুত্তা মযা, বহুদুক্খা বহুপাযাসা, আদীনৰো এত্থ ভিয্যো। অথ চ পন ত্ৰং, মোঘপুরিস, অত্তনা দুগ্গহিতেন [দুগ্গহিতেন দিট্ঠিগতেন (স্যা॰)] অম্হে চেৰ অব্ভাচিক্খসি, অত্তানঞ্চ খণসি , বহুঞ্চ অপুঞ্ঞং পসৰসি। তঞ্হি তে, মোঘপুরিস, ভৰিস্সতি দীঘরত্তং অহিতায দুক্খায। নেতং, মোঘপুরিস, অপ্পসন্নানং ৰা পসাদায…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি – তেন হি, ভিক্খৰে, সঙ্ঘো অরিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করোতু – অসম্ভোগং সঙ্ঘেন। এৰঞ্চ পন ভিক্খৰে কাতব্বং – পঠমং অরিট্ঠো ভিক্খু চোদেতব্বো, চোদেত্ৰা সারেতব্বো, সারেত্ৰা আপত্তিং আরোপেতব্বো, আপত্তিং আরোপেত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো – ৬৬. ‘‘সুণাতু মে, ভন্তে, সঙ্ঘো। অরিট্ঠস্স ভিক্খুনো গদ্ধবাধিপুব্বস্স এৰরূপং পাপকং দিট্ঠিগতং উপ্পন্নং – তথাহং ভগৰতা ধম্মং দেসিতং আজানামি যথা যেমে অন্তরাযিকা ধম্মা ৰুত্তা ভগৰতা তে পটিসেৰতো নালং অন্তরাযাযাতি। সো তং দিট্ঠিং ন পটিনিস্সজ্জতি। যদি সঙ্ঘস্স পত্তকল্লং, সঙ্ঘো অরিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করেয্য – অসম্ভোগং সঙ্ঘেন। এসা ঞত্তি। ‘‘সুণাতু মে, ভন্তে, সঙ্ঘো। অরিট্ঠস্স ভিক্খুনো গদ্ধবাধিপুব্বস্স এৰরূপং পাপকং দিট্ঠিগতং উপ্পন্নং – তথাহং ভগৰতা ধম্মং দেসিতং আজানামি যথা যেমে অন্তরাযিকা ধম্মা ৰুত্তা ভগৰতা তে পটিসেৰতো নালং অন্তরাযাযাতি। সো তং দিট্ঠিং ন পটিনিস্সজ্জতি । সঙ্ঘো অরিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করোতি – অসম্ভোগং সঙ্ঘেন। যস্সাযস্মতো খমতি অরিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযস্স কম্মস্স করণং – অসম্ভোগং সঙ্ঘেন, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি – সুণাতু মে, ভন্তে, সঙ্ঘো। অরিট্ঠস্স ভিক্খুনো গদ্ধবাধিপুব্বস্স এৰরূপং পাপকং দিট্ঠিগতং উপ্পন্নং – তথাহং ভগৰতা ধম্মং দেসিতং আজানামি যথা যেমে অন্তরাযিকা ধম্মা ৰুত্তা ভগৰতা তে পটিসেৰতো নালং অন্তরাযাযাতি। সো তং দিট্ঠিং ন পটিনিস্সজ্জতি। সঙ্ঘো অরিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করোতি – অসম্ভোগংসঙ্ঘেন। যস্সাযস্মতো খমতি অরিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযস্স কম্মস্স করণং – অসম্ভোগং সঙ্ঘেন, সো তুণ্হস্স; যস্স নক্খমতি, সো ভাসেয্য। ‘‘কতং সঙ্ঘেন অরিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযকম্মং – অসম্ভোগং সঙ্ঘেন। খমতি সঙ্ঘস্স, তস্মা তুণ্হী, এৰমেতং ধারযামীতি। ‘‘আৰাসপরম্পরঞ্চ, ভিক্খৰে, সংসথ – ‘অরিট্ঠো ভিক্খু গদ্ধবাধিপুব্বো, সঙ্ঘেন পাপিকায [গদ্ধবাধিপুব্বো পাপিকায (সী॰ ক॰)] দিট্ঠিযা অপ্পটিনিস্সগ্গে , উক্খেপনীযকম্মকতো – অসম্ভোগং সঙ্ঘেনা’’’তি। অধম্মকম্মদ্ৰাদসকং ৬৭. ‘‘তীহি, ভিক্খৰে, অঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অসম্মুখা কতং হোতি, অপ্পটিপুচ্ছা কতং হোতি, অপ্পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। ‘‘অপরেহিপি, ভিক্খৰে, তীহঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। অনাপত্তিযা কতং হোতি, অদেসনাগামিনিযা আপত্তিযা কতং হোতি, দেসিতায আপত্তিযা কতং হোতি…পে॰… অচোদেত্ৰা কতং হোতি, অসারেত্ৰা কতং হোতি, আপত্তিং অনারোপেত্ৰা কতং হোতি…পে॰… অসম্মুখা কতং হোতি, অধম্মেন কতং হোতি, ৰগ্গেন কতং হোতি…পে॰… অপ্পটিপুচ্ছা কতং হোতি, অধম্মেন কতং হোতি, ৰগ্গেন কতং হোতি…পে॰… অপ্পটিঞ্ঞায কতং হোতি, অধম্মেন কতং হোতি, ৰগ্গেন কতং হোতি…পে॰… অনাপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… অদেসনাগামিনিযা আপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… দেসিতায আপত্তিযা কতং হোতি, অধম্মেন কতং হোতি, ৰগ্গেন কতং হোতি…পে॰… অচোদেত্ৰা কতং হোতি, অধম্মেন কতং হোতি, ৰগ্গেন কতং হোতি…পে॰… অসারেত্ৰা কতং হোতি, অধম্মেন কতং হোতি, ৰগ্গেন কতং হোতি…পে॰… আপত্তিং অনারোপেত্ৰা কতং হোতি, অধম্মেন কতং হোতি, ৰগ্গেন কতং হোতি – ইমেহি খো, ভিক্খৰে , তীহঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং অধম্মকম্মঞ্চ হোতি, অৰিনযকম্মঞ্চ, দুৰূপসন্তঞ্চ। পাপিকায দিট্ঠিযা অপ্পটিনিস্সগ্গে উক্খেপনীযকম্মে অধম্মকম্মদ্ৰাদসকং নিট্ঠিতং। ধম্মকম্মদ্ৰাদসকং ৬৮. ‘‘তীহি , ভিক্খৰে, অঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। সম্মুখা কতং হোতি, পটিপুচ্ছা কতং হোতি, পটিঞ্ঞায কতং হোতি – ইমেহি খো, ভিক্খৰে, তীহঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। ‘‘অপরেহিপি , ভিক্খৰে, তীহঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। আপত্তিযা কতং হোতি, দেসনাগামিনিযা আপত্তিযা কতং হোতি, অদেসিতায আপত্তিযা কতং হোতি…পে॰… চোদেত্ৰা কতং হোতি, সারেত্ৰা কতং হোতি, আপত্তিং আরোপেত্ৰা কতং হোতি…পে॰… সম্মুখা কতং হোতি, ধম্মেন কতং হোতি, সমগ্গেন কতং হোতি…পে॰… পটিপুচ্ছা কতং হোতি, ধম্মেন কতং হোতি, সমগ্গেন কতং হোতি…পে॰… পটিঞ্ঞায কতং হোতি, ধম্মেন কতং হোতি, সমগ্গেন কতং হোতি…পে॰… আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… দেসনাগামিনিযা আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… অদেসিতায আপত্তিযা কতং হোতি, ধম্মেন কতং হোতি, সমগ্গেন কতং হোতি…পে॰… চোদেত্ৰা কতং হোতি, ধম্মেন কতং হোতি, সমগ্গেন কতং হোতি…পে॰… সারেত্ৰা কতং হোতি, ধম্মেন কতং হোতি, সমগ্গেন কতং হোতি…পে॰… আপত্তিং আরোপেত্ৰা কতং হোতি, ধম্মেন কতং হোতি, সমগ্গেন কতং হোতি – ইমেহি খো, ভিক্খৰে, তীহঙ্গেহি সমন্নাগতং, পাপিকায দিট্ঠিযা অপ্পটিনিস্সগ্গে, উক্খেপনীযকম্মং ধম্মকম্মঞ্চ হোতি, ৰিনযকম্মঞ্চ, সুৰূপসন্তঞ্চ। পাপিকায দিট্ঠিযা অপ্পটিনিস্সগ্গে উক্খেপনীযকম্মে ধম্মকম্মদ্ৰাদসকং নিট্ঠিতং। আকঙ্খমানছক্কং ৬৯. [পরি॰ ৩২৩] ‘‘তীহি , ভিক্খৰে, অঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করেয্য। ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; বালো হোতি অব্যত্তো আপত্তিবহুলো অনপদানো ; গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করেয্য। ‘‘অপরেহিপি , ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করেয্য। অধিসীলে সীলৰিপন্নো হোতি, অজ্ঝাচারে আচারৰিপন্নো হোতি, অতিদিট্ঠিযা দিট্ঠিৰিপন্নো হোতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করেয্য। ‘‘অপরেহিপি, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করেয্য। বুদ্ধস্স অৰণ্ণং ভাসতি, ধম্মস্স অৰণ্ণং ভাসতি, সঙ্ঘস্স অৰণ্ণং ভাসতি – ইমেহি খো, ভিক্খৰে, তীহঙ্গেহি সমন্নাগতস্স ভিক্খুনো, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করেয্য। ‘‘তিণ্ণং, ভিক্খৰে, ভিক্খূনং, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করেয্য। একো ভণ্ডনকারকো হোতি কলহকারকো ৰিৰাদকারকো ভস্সকারকো সঙ্ঘে অধিকরণকারকো; একো বালো হোতি অব্যত্তো আপত্তিবহুলো অনপদানো; একো গিহিসংসট্ঠো ৰিহরতি অননুলোমিকেহি গিহিসংসগ্গেহি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্কমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করেয্য। একো অধিসীলে সীলৰিপন্নো হোতি, একো অজ্ঝাচারে আচারৰিপন্নো হোতি, একো অতিদিট্ঠিযা দিট্ঠিৰিপন্নো হোতি – ইমেসং খো, ভিক্খৰে , তিণ্ণং ভিক্খূনং, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করেয্য। ‘‘অপরেসম্পি, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং করেয্য। একো বুদ্ধস্স অৰণ্ণং ভাসতি, একো ধম্মস্স অৰণ্ণং ভাসতি, একো সঙ্ঘস্স অৰণ্ণং ভাসতি – ইমেসং খো, ভিক্খৰে, তিণ্ণং ভিক্খূনং, আকঙ্খমানো সঙ্ঘো, পাপিকায দিট্ঠিযা অপ্পটিনিস্সগে, উক্খেপনীযকম্মং করেয্য। পাপিকায দিট্ঠিযা অপ্পটিনিস্সগে উক্খেপনীযকম্মে আকঙ্খমানছক্কং নিট্ঠিতং। তেচত্তালীসৰত্তং ৭০. ‘‘পাপিকায দিট্ঠিযা অপ্পটিনিস্সগ্গে উক্খেপনীযকম্মকতেন, ভিক্খৰে, ভিক্খুনা সম্মা ৰত্তিতব্বং। তত্রাযং সম্মাৰত্তনা – ন উপসম্পাদেতব্বং, ন নিস্সযো দাতব্বো, ন সামণেরো উপট্ঠাপেতব্বো, ন ভিক্খুনোৰাদকসম্মুতি সাদিতব্বা, সম্মতেনপি ভিক্খুনিযো ন ওৰদিতব্বা। যায আপত্তিযা সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কতং হোতি সা আপত্তি ন আপজ্জিতব্বা, অঞ্ঞা ৰা তাদিসিকা, ততো ৰা পাপিট্ঠতরা; কম্মং ন গরহিতব্বং, কম্মিকা ন গরহিতব্বা…পে॰… ন পকতত্তস্স ভিক্খুনো উপোসথো ঠপেতব্বো, ন পৰারণা ঠপেতব্বা, ন সৰচনীযং কাতব্বং, ন অনুৰাদো পট্ঠপেতব্বো, ন ওকাসো কারেতব্বো, ন চোদেতব্বো, ন সারেতব্বো, ন ভিক্খূহি সম্পযোজেতব্ব’’ন্তি। পাপিকায দিট্ঠিযা অপ্পটিনিস্সগ্গে উক্খেপনীযকম্মে তেচত্তালীসৰত্তং নিট্ঠিতং। ৭১. অথ খো সঙ্ঘো অরিট্ঠস্স ভিক্খুনো গদ্ধবাধিপুব্বস্স, পাপিকায দিট্ঠিযা অপ্পটিনিস্সগ্গে, উক্খেপনীযকম্মং অকাসি – অসম্ভোগং সঙ্ঘেন। সো সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো ৰিব্ভমি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অরিট্ঠো ভিক্খু গদ্ধবাধিপুব্বো সঙ্ঘেন , পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো ৰিব্ভমিস্সতী’’তি? অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ভিক্খূ পটিপুচ্ছি – ‘‘সচ্চং কির, ভিক্খৰে, অরিট্ঠো ভিক্খু গদ্ধবাধিপুব্বো সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো ৰিব্ভমতী’’তি[ৰিব্ভমীতি (সী॰ ক॰)]? ‘‘সচ্চং ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং…পে॰… কথঞ্হি নাম সো, ভিক্খৰে, মোঘপুরিসো সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো ৰিব্ভমিস্সতি? নেতং, ভিক্খৰে, অপ্পসন্নানং ৰা পসাদায…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, সঙ্ঘো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতু। নপ্পটিপ্পস্সম্ভেতব্বতেচত্তালীসকং ৭২. ‘‘পঞ্চহি, ভিক্খৰে, অঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং। উপসম্পাদেতি, নিস্সযং দেতি, সামণেরং উপট্ঠাপেতি, ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগে, উক্খেপনীযকম্মং নপ্পটিপ্পস্সম্ভেতব্বং। [পরি॰ ৪২০] ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং। যায আপত্তিযা সঙ্ঘেন পাপিকায দিট্ঠিযা অপ্পটিনিস্সগ্গে উক্খেপনীযকম্মং কতং হোতি তং আপত্তিং আপজ্জতি, অঞ্ঞং ৰা তাদিসিকং, ততো ৰা পাপিট্ঠতরং; কম্মং গরহতি, কম্মিকে গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং…পে॰… । ‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং। পকতত্তস্স ভিক্খুনো উপোসথং ঠপেতি, পৰারণং ঠপেতি, সৰচনীযং করোতি, অনুৰাদং পট্ঠপেতি, ওকাসং কারেতি, চোদেতি, সারেতি , ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং নপ্পটিপ্পস্সম্ভেতব্বং। পাপিকায দিট্ঠিযা অপ্পটিনিস্সগ্গে উক্খেপনীযকম্মে নপ্পটিপ্পস্সম্ভেতব্বতেচত্তালীসকং নিট্ঠিতং। পটিপ্পস্সম্ভেতব্বতেচত্তালীসকং ৭৩. ‘‘পঞ্চহি , ভিক্খৰে, অঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতব্বং। ন উপসম্পাদেতি, ন নিস্সযং দেতি, ন সামণেরং উপট্ঠাপেতি, ন ভিক্খুনোৰাদকসম্মুতিং সাদিযতি, সম্মতোপি ভিক্খুনিযো ন ওৰদতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতব্বং। ‘‘অপরেহিপি, ভিক্খৰে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতব্বং। যায আপত্তিযা সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মং কতং হোতি তং আপত্তিং ন আপজ্জতি, অঞ্ঞং ৰা তাদিসিকং , ততো ৰা পাপিট্ঠতরং; কম্মং ন গরহতি, কম্মিকে ন গরহতি – ইমেহি খো, ভিক্খৰে, পঞ্চহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতব্বং…পে॰…। ‘‘অট্ঠহি, ভিক্খৰে, অঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতব্বং। ন পকতত্তস্স ভিক্খুনো উপোসথং ঠপেতি, ন পৰারণং ঠপেতি, ন সৰচনীযং করোতি, ন অনুৰাদং পট্ঠপেতি, ন ওকাসং কারেতি, ন চোদেতি, ন সারেতি, ন ভিক্খূহি সম্পযোজেতি – ইমেহি খো, ভিক্খৰে, অট্ঠহঙ্গেহি সমন্নাগতস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতব্বং’’। পাপিকায দিট্ঠিযা অপ্পটিনিস্সগ্গে উক্খেপনীযকম্মে পটিপ্পস্সম্ভেতব্বতেচত্তালীসকং নিট্ঠিতং। ৭৪. ‘‘এৰঞ্চ পন, ভিক্খৰে, পটিপ্পস্সম্ভেতব্বং। তেন, ভিক্খৰে, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘অহং, ভন্তে, সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো সম্মা ৰত্তামি, লোমং পাতেমি, নেত্থারং ৰত্তামি, পাপিকায দিট্ঠিযা অপ্পটিনিস্সগ্গে, উক্খেপনীযস্স কম্মস্স পটিপ্পস্সদ্ধিং যাচামী’তি। দুতিযম্পি যাচিতব্বা। ততিযম্পি যাচিতব্বা। ব্যত্তেন ভিক্খুনা পটিবলেন সঙ্ঘো ঞাপেতব্বো – ‘‘সুণাতু মে, ভন্তে, সঙ্ঘো। অযং ইত্থন্নামো ভিক্খু সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, পাপিকায দিট্ঠিযা অপ্পটিনিস্সগ্গে, উক্খেপনীযস্স কম্মস্স পটিপ্পস্সদ্ধিং যাচতি। যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেয্য। এসা ঞত্তি। ‘‘সুণাতু মে, ভন্তে, সঙ্ঘো। অযং ইত্থন্নামো ভিক্খু সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, পাপিকায দিট্ঠিযা অপ্পটিনিস্সগ্গে , উক্খেপনীযস্স কম্মস্স পটিপ্পস্সদ্ধিং যাচতি। সঙ্ঘো ইত্থন্নামস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতি। যস্সাযস্মতো খমতি ইত্থন্নামস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি – সুণাতু মে, ভন্তে, সঙ্ঘো। অযং ইত্থন্নামো ভিক্খু সঙ্ঘেন, পাপিকায দিট্ঠিযা অপ্পটিনিস্সগ্গে, উক্খেপনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, পাপিকায দিট্ঠিযা অপ্পটিনিস্সগ্গে উক্খেপনীযস্স কম্মস্স পটিপ্পস্সদ্ধিং যাচতি। সঙ্ঘো ইত্থন্নামস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং পটিপ্পস্সম্ভেতি। যস্সাযস্মতো খমতি ইত্থন্নামস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযস্স কম্মস্স পটিপ্পস্সদ্ধি, সো তুণ্হস্স; যস্স নক্খমতি, সো ভাসেয্য। ‘‘পটিপ্পস্সদ্ধং সঙ্ঘেন ইত্থন্নামস্স ভিক্খুনো, পাপিকায দিট্ঠিযা অপ্পটিনিস্সগ্গে, উক্খেপনীযকম্মং। খমতি সঙ্ঘস্স, তস্মা তুণ্হী, এৰমেতং ধারযামী’’তি। পাপিকায দিট্ঠিযা অপ্পটিনিস্সগ্গে উক্খেপনীযকম্মং নিট্ঠিতং সত্তমং। কম্মক্খন্ধকো পঠমো। ইমম্হি খন্ধকে ৰত্থূ সত্ত। তস্সুদ্দানং – পণ্ডুলোহিতকা ভিক্খূ, সযং ভণ্ডনকারকা। তাদিসে উপসঙ্কম্ম, উস্সহিংসু চ ভণ্ডনে॥ অনুপ্পন্নাপি জাযন্তি [অনুপ্পন্নানি জাযন্তি (সী॰ স্যা॰)], উপ্পন্নানিপি ৰড্ঢরে [উপ্পন্নানি পৰড্ঢরে (সী॰), উপ্পন্নাপি পৰড্ঢন্তি (ক॰)]। অপ্পিচ্ছা পেসলা ভিক্খূ, উজ্ঝাযন্তি পদস্সতো [পরীসতো (স্যা॰), পরস্সতো (সী॰)]॥ সদ্ধম্মট্ঠিতিকো বুদ্ধো, সযম্ভূ অগ্গপুগ্গলো। আণাপেসি তজ্জনীযকম্মং সাৰত্থিযং জিনো॥ অসম্মুখাপ্পটিপুচ্ছাপ্পটিঞ্ঞায কতঞ্চ যং। অনাপত্তি অদেসনে, দেসিতায কতঞ্চ যং॥ অচোদেত্ৰা অসারেত্ৰা, অনারোপেত্ৰা চ যং কতং। অসম্মুখা অধম্মেন, ৰগ্গেন চাপি [ৰগ্গেনাপি চ (সী॰ স্যা॰)] যং কতং॥ অপ্পটিপুচ্ছা অধম্মেন, পুন ৰগ্গেন [ৰগ্গেনাপি চ (সী॰ স্যা॰)] যং কতং। অপ্পটিঞ্ঞায অধম্মেন, ৰগ্গেন চাপি [ৰগ্গেনাপি চ (সী॰ স্যা॰)] যং কতং॥ অনাপত্তি [অনাপত্তিযা (সী॰ স্যা॰)] অধম্মেন, ৰগ্গেন চাপি [ৰগ্গেনাপি চ (সী॰ স্যা॰)] যং কতং। অদেসনাগামিনিযা, অধম্মৰগ্গমেৰ চ॥ দেসিতায অধম্মেন, ৰগ্গেনাপি তথেৰ চ। অচোদেত্ৰা অধম্মেন, ৰগ্গেনাপি তথেৰ চ॥ অসারেত্ৰা অধম্মেন, ৰগ্গেনাপি তথেৰ চ। অনারোপেত্ৰা অধম্মেন, ৰগ্গেনাপি তথেৰ চ॥ কণ্হৰারনযেনেৰ, সুক্কৰারং ৰিজানিযা। সঙ্ঘো আকঙ্খমানো চ যস্স তজ্জনিযং করে॥ ভণ্ডনং বালো সংসট্ঠো, অধিসীলে অজ্ঝাচারে। অতিদিট্ঠিৰিপন্নস্স, সঙ্ঘো তজ্জনিযং করে॥ বুদ্ধধম্মস্স সঙ্ঘস্স, অৰণ্ণং যো চ ভাসতি। তিণ্ণন্নম্পি চ ভিক্খূনং, সঙ্ঘো তজ্জনিযং করে॥ ভণ্ডনং কারকো একো, বালো সংসগ্গনিস্সিতো। অধিসীলে অজ্ঝাচারে, তথেৰ অতিদিট্ঠিযা॥ বুদ্ধধম্মস্স সঙ্ঘস্স, অৰণ্ণং যো চ ভাসতি। তজ্জনীযকম্মকতো, এৰং সম্মানুৰত্তনা॥ উপসম্পদনিস্সযা, সামণেরং উপট্ঠনা। ওৰাদসম্মতেনাপি, ন করে তজ্জনীকতো॥ নাপজ্জে তঞ্চ আপত্তিং, তাদিসঞ্চ ততো পরং। কম্মঞ্চ কম্মিকে চাপি, ন গরহে তথাৰিধো॥ উপোসথং পৰারণং, পকতত্তস্স নট্ঠপে। সৰচনিং [ন সৰচনিযং (সী॰ স্যা॰)] অনুৰাদো, ওকাসো চোদনেন চ॥ সারণং সম্পযোগঞ্চ, ন করেয্য তথাৰিধো। উপসম্পদনিস্সযা, সামণেরং উপট্ঠনা॥ ওৰাদসম্মতেনাপি, পঞ্চহঙ্গেহি [পঞ্চঅঙ্গো (ক॰)] ন সম্মতি। তঞ্চাপজ্জতি আপত্তিং, তাদিসঞ্চ ততো পরং॥ কম্মঞ্চ কম্মিকে চাপি, গরহন্তো ন সম্মতি। উপোসথং পৰারণং, সৰচনীযা চ নোৰাদো॥ ওকাসো চোদনঞ্চেৰ, সারণা সম্পযোজনা। ইমেহট্ঠঙ্গেহি যো যুত্তো, তজ্জনানুপসম্মতি॥ কণ্হৰারনযেনেৰ, সুক্কৰারং ৰিজানিযা। বালো আপত্তিবহুলো, সংসট্ঠোপি চ সেয্যসো॥ নিযস্সকম্মং সম্বুদ্ধো, আণাপেসি মহামুনি। কীটাগিরিস্মিং দ্ৰে ভিক্খূ, অস্সজিপুনব্বসুকা॥ অনাচারঞ্চ ৰিৰিধং, আচরিংসু অসঞ্ঞতা। পব্বাজনীযং সম্বুদ্ধো, কম্মং সাৰত্থিযং জিনো। মচ্ছিকাসণ্ডে সুধম্মো, চিত্তস্সাৰাসিকো অহু॥ জাতিৰাদেন খুংসেতি, সুধম্মো চিত্তুপাসকং। পটিসারণীযকম্মং, আণাপেসি তথাগতো॥ কোসম্বিযং ছন্নং ভিক্খুং, নিচ্ছন্তাপত্তিং পস্সিতুং। অদস্সনে উক্খিপিতুং, আণাপেসি জিনুত্তমো॥ ছন্নো তংযেৰ আপত্তিং, পটিকাতুং ন ইচ্ছতি। উক্খেপনাপ্পটিকম্মে, আণাপেসি ৰিনাযকো॥ পাপদিট্ঠি অরিট্ঠস্স, আসি অঞ্ঞাণনিস্সিতা। দিট্ঠিযাপ্পটিনিস্সগ্গে [দিট্ঠিঅপ্পটিনিস্সগ্গে (ক॰)], উক্খেপং জিনভাসিতং॥ নিযস্সকম্মং পব্বজ্জং [পব্বাজং (ক॰)], তথেৰ পটিসারণী। অদস্সনাপ্পটিকম্মে , অনিস্সগ্গে চ দিট্ঠিযা॥ দৰানাচারূপঘাতি, মিচ্ছাআজীৰমেৰ চ। পব্বাজনীযকম্মম্হি, অতিরেকপদা ইমে॥ অলাভাৰণ্ণা দ্ৰে পঞ্চ, দ্ৰে পঞ্চকাতি নামকা [দ্ৰে পঞ্চকোতি নামকো (ক॰)]। পটিসারণীযকম্মম্হি, অতিরেকপদা ইমে॥ তজ্জনীযং নিযস্সঞ্চ, দুৰে কম্মাপি সাদিসা [কম্মেসু সদিসং (ক॰)]। পব্বজ্জা [পব্বাজা (ক॰)] পটিসারী চ, অত্থি পদাতিরিত্ততা॥ তযো উক্খেপনা কম্মা, সদিসা তে ৰিভত্তিতো। তজ্জনীযনযেনাপি, সেসকম্মং ৰিজানিযাতি॥ কম্মক্খন্ধকং নিট্ঠিতং। |