২. উদুম্বরিকসুত্তং
নিগ্রোধপরিব্বাজকৰত্থু ৪৯. এৰং মে সুতং – একং সমযং ভগৰা রাজগহে ৰিহরতি গিজ্ঝকূটে পব্বতে। তেন খো পন সমযেন নিগ্রোধো পরিব্বাজকো উদুম্বরিকায পরিব্বাজকারামে পটিৰসতি মহতিযা পরিব্বাজকপরিসায সদ্ধিং তিংসমত্তেহি পরিব্বাজকসতেহি। অথ খো সন্ধানো গহপতি দিৰা দিৰস্স [দিৰাদিৰস্সেৰ (সী॰ স্যা॰ পী॰)] রাজগহা নিক্খমি ভগৰন্তং দস্সনায। অথ খো সন্ধানস্স গহপতিস্স এতদহোসি – ‘‘অকালো খো ভগৰন্তং দস্সনায। পটিসল্লীনো ভগৰা। মনোভাৰনীযানম্পি ভিক্খূনং অসমযো দস্সনায। পটিসল্লীনা মনোভাৰনীযা ভিক্খূ। যংনূনাহং যেন উদুম্বরিকায পরিব্বাজকারামো, যেন নিগ্রোধো পরিব্বাজকো তেনুপসঙ্কমেয্য’’ন্তি। অথ খো সন্ধানো গহপতি যেন উদুম্বরিকায পরিব্বাজকারামো, তেনুপসঙ্কমি। ৫০. তেন খো পন সমযেন নিগ্রোধো পরিব্বাজকো মহতিযা পরিব্বাজকপরিসায সদ্ধিং নিসিন্নো হোতি উন্নাদিনিযা উচ্চাসদ্দমহাসদ্দায অনেকৰিহিতং তিরচ্ছানকথং কথেন্তিযা। সেয্যথিদং – রাজকথং চোরকথং মহামত্তকথং সেনাকথং ভযকথং যুদ্ধকথং অন্নকথং পানকথং ৰত্থকথং সযনকথং মালাকথং গন্ধকথং ঞাতিকথং যানকথং গামকথং নিগমকথং নগরকথং জনপদকথং ইত্থিকথং সূরকথং ৰিসিখাকথং কুম্ভট্ঠানকথং পুব্বপেতকথং নানত্তকথং লোকক্খাযিকং সমুদ্দক্খাযিকং ইতিভৰাভৰকথং ইতি ৰা। ৫১. অদ্দসা খো নিগ্রোধো পরিব্বাজকো সন্ধানং গহপতিং দূরতোৰ আগচ্ছন্তং। দিস্ৰা সকং পরিসং সণ্ঠাপেসি – ‘‘অপ্পসদ্দা ভোন্তো হোন্তু, মা ভোন্তো সদ্দমকত্থ। অযং সমণস্স গোতমস্স সাৰকো আগচ্ছতি সন্ধানো গহপতি। যাৰতা খো পন সমণস্স গোতমস্স সাৰকা গিহী ওদাতৰসনা রাজগহে পটিৰসন্তি, অযং তেসং অঞ্ঞতরো সন্ধানো গহপতি। অপ্পসদ্দকামা খো পনেতে আযস্মন্তো অপ্পসদ্দৰিনীতা , অপ্পসদ্দস্স ৰণ্ণৰাদিনো। অপ্পেৰ নাম অপ্পসদ্দং পরিসং ৰিদিত্ৰা উপসঙ্কমিতব্বং মঞ্ঞেয্যা’’তি। এৰং ৰুত্তে তে পরিব্বাজকা তুণ্হী অহেসুং। ৫২. অথ খো সন্ধানো গহপতি যেন নিগ্রোধো পরিব্বাজকো তেনুপসঙ্কমি, উপসঙ্কমিত্ৰা নিগ্রোধেন পরিব্বাজকেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো সন্ধানো গহপতি নিগ্রোধং পরিব্বাজকং এতদৰোচ – ‘‘অঞ্ঞথা খো ইমে ভোন্তো অঞ্ঞতিত্থিযা পরিব্বাজকা সঙ্গম্ম সমাগম্ম উন্নাদিনো উচ্চাসদ্দমহাসদ্দা অনেকৰিহিতং তিরচ্ছানকথং অনুযুত্তা ৰিহরন্তি। সেয্যথিদং – রাজকথং…পে॰… ইতিভৰাভৰকথং ইতি ৰা। অঞ্ঞথা খো [চ (সী॰ পী॰)] পন সো ভগৰা অরঞ্ঞৰনপত্থানি পন্তানি সেনাসনানি পটিসেৰতি অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি পটিসল্লানসারুপ্পানী’’তি। ৫৩. এৰং ৰুত্তে নিগ্রোধো পরিব্বাজকো সন্ধানং গহপতিং এতদৰোচ – ‘‘যগ্ঘে গহপতি, জানেয্যাসি, কেন সমণো গোতমো সদ্ধিং সল্লপতি, কেন সাকচ্ছং সমাপজ্জতি, কেন পঞ্ঞাৰেয্যত্তিযং সমাপজ্জতি? সুঞ্ঞাগারহতা সমণস্স গোতমস্স পঞ্ঞা অপরিসাৰচরো সমণো গোতমো নালং সল্লাপায। সো অন্তমন্তানেৰ সেৰতি [অন্তপন্তানেৰ (স্যা॰)]। সেয্যথাপি নাম গোকাণা পরিযন্তচারিনী অন্তমন্তানেৰ সেৰতি। এৰমেৰ সুঞ্ঞাগারহতা সমণস্স গোতমস্স পঞ্ঞা; অপরিসাৰচরো সমণো গোতমো; নালং সল্লাপায। সো অন্তমন্তানেৰ সেৰতি। ইঙ্ঘ, গহপতি, সমণো গোতমো ইমং পরিসং আগচ্ছেয্য, একপঞ্হেনেৰ নং সংসাদেয্যাম [সংহরেয্যাম (ক॰)], তুচ্ছকুম্ভীৰ নং মঞ্ঞে ওরোধেয্যামা’’তি। ৫৪. অস্সোসি খো ভগৰা দিব্বায সোতধাতুযা ৰিসুদ্ধায অতিক্কন্তমানুসিকায সন্ধানস্স গহপতিস্স নিগ্রোধেন পরিব্বাজকেন সদ্ধিং ইমং কথাসল্লাপং। অথ খো ভগৰা গিজ্ঝকূটা পব্বতা ওরোহিত্ৰা যেন সুমাগধায তীরে মোরনিৰাপো তেনুপসঙ্কমি; উপসঙ্কমিত্ৰা সুমাগধায তীরে মোরনিৰাপে অব্ভোকাসে চঙ্কমি। অদ্দসা খো নিগ্রোধো পরিব্বাজকো ভগৰন্তং সুমাগধায তীরে মোরনিৰাপে অব্ভোকাসে চঙ্কমন্তং। দিস্ৰান সকং পরিসং সণ্ঠাপেসি – ‘‘অপ্পসদ্দা ভোন্তো হোন্তু, মা ভোন্তো সদ্দমকত্থ, অযং সমণো গোতমো সুমাগধায তীরে মোরনিৰাপে অব্ভোকাসে চঙ্কমতি। অপ্পসদ্দকামো খো পন সো আযস্মা, অপ্পসদ্দস্স ৰণ্ণৰাদী। অপ্পেৰ নাম অপ্পসদ্দং পরিসং ৰিদিত্ৰা উপসঙ্কমিতব্বং মঞ্ঞেয্য। সচে সমণো গোতমো ইমং পরিসং আগচ্ছেয্য, ইমং তং পঞ্হং পুচ্ছেয্যাম – ‘কো নাম সো, ভন্তে, ভগৰতো ধম্মো, যেন ভগৰা সাৰকে ৰিনেতি, যেন ভগৰতা সাৰকা ৰিনীতা অস্সাসপ্পত্তা পটিজানন্তি অজ্ঝাসযং আদিব্রহ্মচরিয’ন্তি? এৰং ৰুত্তে তে পরিব্বাজকা তুণ্হী অহেসুং। তপোজিগুচ্ছাৰাদো ৫৫. অথ খো ভগৰা যেন নিগ্রোধো পরিব্বাজকো তেনুপসঙ্কমি। অথ খো নিগ্রোধো পরিব্বাজকো ভগৰন্তং এতদৰোচ – ‘‘এতু খো, ভন্তে, ভগৰা, স্ৰাগতং, ভন্তে, ভগৰতো। চিরস্সং খো, ভন্তে, ভগৰা ইমং পরিযাযমকাসি যদিদং ইধাগমনায। নিসীদতু, ভন্তে, ভগৰা, ইদমাসনং পঞ্ঞত্ত’’ন্তি। নিসীদি ভগৰা পঞ্ঞত্তে আসনে। নিগ্রোধোপি খো পরিব্বাজকো অঞ্ঞতরং নীচাসনং গহেত্ৰা একমন্তং নিসীদি। একমন্তং নিসিন্নং খো নিগ্রোধং পরিব্বাজকং ভগৰা এতদৰোচ – ‘‘কায নুত্থ, নিগ্রোধ, এতরহি কথায সন্নিসিন্না, কা চ পন ৰো অন্তরাকথা ৰিপ্পকতা’’তি? এৰং ৰুত্তে, নিগ্রোধো পরিব্বাজকো ভগৰন্তং এতদৰোচ, ‘‘ইধ মযং, ভন্তে, অদ্দসাম ভগৰন্তং সুমাগধায তীরে মোরনিৰাপে অব্ভোকাসে চঙ্কমন্তং, দিস্ৰান এৰং অৰোচুম্হা – ‘সচে সমণো গোতমো ইমং পরিসং আগচ্ছেয্য, ইমং তং পঞ্হং পুচ্ছেয্যাম – কো নাম সো, ভন্তে, ভগৰতো ধম্মো, যেন ভগৰা সাৰকে ৰিনেতি, যেন ভগৰতা সাৰকা ৰিনীতা অস্সাসপ্পত্তা পটিজানন্তি অজ্ঝাসযং আদিব্রহ্মচরিয’ন্তি? অযং খো নো, ভন্তে, অন্তরাকথা ৰিপ্পকতা; অথ ভগৰা অনুপ্পত্তো’’তি। ৫৬. ‘‘দুজ্জানং খো এতং, নিগ্রোধ, তযা অঞ্ঞদিট্ঠিকেন অঞ্ঞখন্তিকেন অঞ্ঞরুচিকেন অঞ্ঞত্রাযোগেন অঞ্ঞত্রাচরিযকেন, যেনাহং সাৰকে ৰিনেমি , যেন মযা সাৰকা ৰিনীতা অস্সাসপ্পত্তা পটিজানন্তি অজ্ঝাসযং আদিব্রহ্মচরিযং। ইঙ্ঘ ত্ৰং মং, নিগ্রোধ, সকে আচরিযকে অধিজেগুচ্ছে পঞ্হং পুচ্ছ – ‘কথং সন্তা নু খো, ভন্তে, তপোজিগুচ্ছা পরিপুণ্ণা হোতি, কথং অপরিপুণ্ণা’তি? এৰং ৰুত্তে তে পরিব্বাজকা উন্নাদিনো উচ্চাসদ্দমহাসদ্দা অহেসুং – ‘‘অচ্ছরিযং ৰত ভো, অব্ভুতং ৰত ভো, সমণস্স গোতমস্স মহিদ্ধিকতা মহানুভাৰতা, যত্র হি নাম সকৰাদং ঠপেস্সতি, পরৰাদেন পৰারেস্সতী’’তি। ৫৭. অথ খো নিগ্রোধো পরিব্বাজকো তে পরিব্বাজকে অপ্পসদ্দে কত্ৰা ভগৰন্তং এতদৰোচ – ‘‘মযং খো, ভন্তে, তপোজিগুচ্ছাৰাদা [তরোজিগুচ্ছংসারোদা (ক॰)]তপোজিগুচ্ছাসারা তপোজিগুচ্ছাঅল্লীনা ৰিহরাম । কথং সন্তা নু খো, ভন্তে, তপোজিগুচ্ছা পরিপুণ্ণা হোতি, কথং অপরিপুণ্ণা’’তি? ‘‘ইধ, নিগ্রোধ, তপস্সী অচেলকো হোতি মুত্তাচারো, হত্থাপলেখনো [হত্থাৰলেখনো (স্যা॰)], ন এহিভদ্দন্তিকো, ন তিট্ঠভদ্দন্তিকো, নাভিহটং , ন উদ্দিস্সকতং, ন নিমন্তনং সাদিযতি, সো ন কুম্ভিমুখা পটিগ্গণ্হাতি, ন কল়োপিমুখা পটিগ্গণ্হাতি, ন এল়কমন্তরং, ন দণ্ডমন্তরং, ন মুসলমন্তরং, ন দ্ৰিন্নং ভুঞ্জমানানং, ন গব্ভিনিযা, ন পাযমানায, নপুরিসন্তরগতায, ন সঙ্কিত্তীসু, ন যত্থ সা উপট্ঠিতো হোতি, ন যত্থ মক্খিকা সণ্ডসণ্ডচারিনী, ন মচ্ছং, ন মংসং, ন সুরং, ন মেরযং, ন থুসোদকং পিৰতি, সো একাগারিকো ৰা হোতি একালোপিকো, দ্ৰাগারিকো ৰা হোতি দ্ৰালোপিকো, সত্তাগারিকো ৰা হোতি সত্তালোপিকো, একিস্সাপি দত্তিযা যাপেতি, দ্ৰীহিপি দত্তীহি যাপেতি, সত্তহিপি দত্তীহি যাপেতি; একাহিকম্পি আহারং আহারেতি, দ্ৰীহিকম্পি [দ্ৰাহিকংপি (সী॰ স্যা॰)] আহারং আহারেতি, সত্তাহিকম্পি আহারং আহারেতি, ইতি এৰরূপং অদ্ধমাসিকম্পি পরিযাযভত্তভোজনানুযোগমনুযুত্তো ৰিহরতি। সো সাকভক্খো ৰা হোতি, সামাকভক্খো ৰা হোতি, নীৰারভক্খো ৰা হোতি, দদ্দুলভক্খো ৰা হোতি, হটভক্খো ৰা হোতি, কণভক্খো ৰা হোতি, আচামভক্খো ৰা হোতি, পিঞ্ঞাকভক্খো ৰা হোতি, তিণভক্খো ৰা হোতি, গোমযভক্খো ৰা হোতি; ৰনমূলফলাহারো যাপেতি পৰত্তফলভোজী। সো সাণানিপি ধারেতি , মসাণানিপি ধারেতি, ছৰদুস্সানিপি ধারেতি, পংসুকূলানিপি ধারেতি, তিরীটানিপি ধারেতি, অজিনম্পি ধারেতি, অজিনক্খিপম্পি ধারেতি, কুসচীরম্পি ধারেতি, ৰাকচীরম্পি ধারেতি, ফলকচীরম্পি ধারেতি, কেসকম্বলম্পি ধারেতি, ৰাল়কম্বলম্পি ধারেতি, উলূকপক্খম্পি ধারেতি, কেসমস্সুলোচকোপি হোতি কেসমস্সুলোচনানুযোগমনুযুত্তো , উব্ভট্ঠকোপি [উভট্ঠকোপি (স্যা॰), উব্ভট্ঠিকোপি (ক॰)] হোতি আসনপটিক্খিত্তো, উক্কুটিকোপি হোতি উক্কুটিকপ্পধানমনুযুত্তো, কণ্টকাপস্সযিকোপি হোতি কণ্টকাপস্সযে সেয্যং কপ্পেতি, ফলকসেয্যম্পি কপ্পেতি, থণ্ডিলসেয্যম্পি কপ্পেতি, একপস্সযিকোপি হোতি রজোজল্লধরো, অব্ভোকাসিকোপি হোতি যথাসন্থতিকো, ৰেকটিকোপি হোতি ৰিকটভোজনানুযোগমনুযুত্তো, অপানকোপি হোতি অপানকত্তমনুযুত্তো, সাযততিযকম্পি উদকোরোহনানুযোগমনুযুত্তো ৰিহরতি। তং কিং মঞ্ঞসি, নিগ্রোধ, যদি এৰং সন্তে তপোজিগুচ্ছা পরিপুণ্ণা ৰা হোতি অপরিপুণ্ণা ৰা’’তি? ‘‘অদ্ধা খো, ভন্তে, এৰং সন্তে তপোজিগুচ্ছা পরিপুণ্ণা হোতি, নো অপরিপুণ্ণা’’তি। ‘‘এৰং পরিপুণ্ণাযপি খো অহং, নিগ্রোধ, তপোজিগুচ্ছায অনেকৰিহিতে উপক্কিলেসে ৰদামী’’তি। উপক্কিলেসো ৫৮. ‘‘যথা কথং পন, ভন্তে, ভগৰা এৰং পরিপুণ্ণায তপোজিগুচ্ছায অনেকৰিহিতে উপক্কিলেসে ৰদতী’’তি? ‘‘ইধ, নিগ্রোধ, তপস্সী তপং সমাদিযতি, সো তেন তপসা অত্তমনো হোতি পরিপুণ্ণসঙ্কপ্পো। যম্পি, নিগ্রোধ, তপস্সী তপং সমাদিযতি, সো তেন তপসা অত্তমনো হোতি পরিপুণ্ণসঙ্কপ্পো। অযম্পি খো, নিগ্রোধ, তপস্সিনো উপক্কিলেসো হোতি। ‘‘পুন চপরং, নিগ্রোধ, তপস্সী তপং সমাদিযতি, সো তেন তপসা অত্তানুক্কংসেতি পরং ৰম্ভেতি। যম্পি, নিগ্রোধ, তপস্সী তপং সমাদিযতি, সো তেন তপসা অত্তানুক্কংসেতি পরং ৰম্ভেতি। অযম্পি খো, নিগ্রোধ, তপস্সিনো উপক্কিলেসো হোতি। ‘‘পুন চপরং, নিগ্রোধ, তপস্সী তপং সমাদিযতি, সো তেন তপসা মজ্জতি মুচ্ছতি পমাদমাপজ্জতি [মদমাপজ্জতি (স্যা॰)]। যম্পি, নিগ্রোধ, তপস্সী তপং সমাদিযতি, সো তেন তপসা মজ্জতি মুচ্ছতি পমাদমাপজ্জতি। অযম্পি খো, নিগ্রোধ, তপস্সিনো উপক্কিলেসো হোতি। ৫৯. ‘‘পুন চপরং, নিগ্রোধ, তপস্সী তপং সমাদিযতি, সো তেন তপসা লাভসক্কারসিলোকং অভিনিব্বত্তেতি, সো তেন লাভসক্কারসিলোকেন অত্তমনো হোতি পরিপুণ্ণসঙ্কপ্পো। যম্পি, নিগ্রোধ, তপস্সী তপং সমাদিযতি, সো তেন তপসা লাভসক্কারসিলোকং অভিনিব্বত্তেতি, সো তেন লাভসক্কারসিলোকেন অত্তমনো হোতি পরিপুণ্ণসঙ্কপ্পো। অযম্পি খো, নিগ্রোধ, তপস্সিনো উপক্কিলেসো হোতি। ‘‘পুন চপরং, নিগ্রোধ, তপস্সী তপং সমাদিযতি, সো তেন তপসা লাভসক্কারসিলোকং অভিনিব্বত্তেতি, সো তেন লাভসক্কারসিলোকেন অত্তানুক্কংসেতি পরং ৰম্ভেতি। যম্পি, নিগ্রোধ, তপস্সী তপং সমাদিযতি, সো তেন তপসা লাভসক্কারসিলোকং অভিনিব্বত্তেতি, সো তেন লাভসক্কারসিলোকেন অত্তানুক্কংসেতি পরং ৰম্ভেতি। অযম্পি খো, নিগ্রোধ, তপস্সিনো উপক্কিলেসো হোতি। ‘‘পুন চপরং, নিগ্রোধ, তপস্সী তপং সমাদিযতি, সো তেন তপসা লাভসক্কারসিলোকং অভিনিব্বত্তেতি, সো তেন লাভসক্কারসিলোকেন মজ্জতি মুচ্ছতি পমাদমাপজ্জতি। যম্পি, নিগ্রোধ, তপস্সী তপং সমাদিযতি, সো তেন তপসা লাভসক্কারসিলোকং অভিনিব্বত্তেতি, সো তেন লাভসক্কারসিলোকেন মজ্জতি মুচ্ছতি পমাদমাপজ্জতি। অযম্পি খো, নিগ্রোধ, তপস্সিনো উপক্কিলেসো হোতি। ৬০. ‘‘পুন চপরং, নিগ্রোধ, তপস্সী ভোজনেসু ৰোদাসং আপজ্জতি – ‘ইদং মে খমতি, ইদং মে নক্খমতী’তি। সো যঞ্চ [যং হি (সী॰ পী॰)] খ্ৰস্স নক্খমতি, তং সাপেক্খো পজহতি। যং পনস্স খমতি, তং গধিতো [গথিতো (সী॰ পী॰)] মুচ্ছিতো অজ্ঝাপন্নো অনাদীনৰদস্সাৰী অনিস্সরণপঞ্ঞো পরিভুঞ্জতি…পে॰… অযম্পি খো, নিগ্রোধ, তপস্সিনো উপক্কিলেসো হোতি। ‘‘পুন চপরং, নিগ্রোধ, তপস্সী তপং সমাদিযতি লাভসক্কারসিলোকনিকন্তিহেতু – ‘সক্করিস্সন্তি মং রাজানো রাজমহামত্তা খত্তিযা ব্রাহ্মণা গহপতিকা তিত্থিযা’তি…পে॰… অযম্পি খো, নিগ্রোধ, তপস্সিনো উপক্কিলেসো হোতি। ৬১. ‘‘পুন চপরং, নিগ্রোধ, তপস্সী অঞ্ঞতরং সমণং ৰা ব্রাহ্মণং ৰা অপসাদেতা [অপসারেতা (ক॰)] হোতি – ‘কিং পনাযং সম্বহুলাজীৰো [বহুলাজীৰো (সী॰ পী॰)]সব্বং সংভক্খেতি। সেয্যথিদং – মূলবীজং খন্ধবীজং ফল়ুবীজং অগ্গবীজং বীজবীজমেৰ পঞ্চমং, অসনিৰিচক্কং দন্তকূটং, সমণপ্পৰাদেনা’তি…পে॰… অযম্পি খো, নিগ্রোধ, তপস্সিনো উপক্কিলেসো হোতি। ‘‘পুন চপরং, নিগ্রোধ, তপস্সী পস্সতি অঞ্ঞতরং সমণং ৰা ব্রাহ্মণং ৰা কুলেসু সক্করিযমানং গরুকরিযমানং মানিযমানং পূজিযমানং। দিস্ৰা তস্স এৰং হোতি – ‘ইমঞ্হি নাম সম্বহুলাজীৰং কুলেসু সক্করোন্তি গরুং করোন্তি মানেন্তি পূজেন্তি। মং পন তপস্সিং লূখাজীৰিং কুলেসু ন সক্করোন্তি ন গরুং করোন্তি ন মানেন্তি ন পূজেন্তী’তি, ইতি সো ইস্সামচ্ছরিযং কুলেসু উপ্পাদেতা হোতি…পে॰… অযম্পি খো, নিগ্রোধ, তপস্সিনো উপক্কিলেসো হোতি। ৬২. ‘‘পুন চপরং, নিগ্রোধ, তপস্সী আপাথকনিসাদী হোতি…পে॰… অযম্পি খো, নিগ্রোধ, তপস্সিনো উপক্কিলেসো হোতি। ‘‘পুন চপরং, নিগ্রোধ, তপস্সী অত্তানং অদস্সযমানো কুলেসু চরতি – ‘ইদম্পি মে তপস্মিং ইদম্পি মে তপস্মি’ন্তি…পে॰… অযম্পি খো, নিগ্রোধ, তপস্সিনো উপক্কিলেসো হোতি। ‘‘পুন চপরং, নিগ্রোধ, তপস্সী কিঞ্চিদেৰ পটিচ্ছন্নং সেৰতি। সো ‘খমতি তে ইদ’ন্তি পুট্ঠো সমানো অক্খমমানং আহ – ‘খমতী’তি। খমমানং আহ – ‘নক্খমতী’তি। ইতি সো সম্পজানমুসা ভাসিতা হোতি…পে॰… অযম্পি খো, নিগ্রোধ, তপস্সিনো উপক্কিলেসো হোতি। ‘‘পুন চপরং, নিগ্রোধ, তপস্সী তথাগতস্স ৰা তথাগতসাৰকস্স ৰা ধম্মং দেসেন্তস্স সন্তংযেৰ পরিযাযং অনুঞ্ঞেয্যং নানুজানাতি…পে॰… অযম্পি খো, নিগ্রোধ, তপস্সিনো উপক্কিলেসো হোতি। ৬৩. ‘‘পুন চপরং, নিগ্রোধ, তপস্সী কোধনো হোতি উপনাহী। যম্পি, নিগ্রোধ, তপস্সী কোধনো হোতি উপনাহী। অযম্পি খো, নিগ্রোধ, তপস্সিনো উপক্কিলেসো হোতি। ‘‘পুন চপরং, নিগ্রোধ, তপস্সী মক্খী হোতি পল়াসী [পলাসী (সী॰ স্যা॰ পী॰)] …পে॰… ইস্সুকী হোতি মচ্ছরী… সঠো হোতি মাযাৰী… থদ্ধো হোতি অতিমানী… পাপিচ্ছো হোতি পাপিকানং ইচ্ছানং ৰসং গতো… মিচ্ছাদিট্ঠিকো হোতি অন্তগ্গাহিকায দিট্ঠিযা সমন্নাগতো… সন্দিট্ঠিপরামাসী হোতি আধানগ্গাহী দুপ্পটিনিস্সগ্গী। যম্পি, নিগ্রোধ, তপস্সী সন্দিট্ঠিপরামাসী হোতি আধানগ্গাহী দুপ্পটিনিস্সগ্গী। অযম্পি খো, নিগ্রোধ, তপস্সিনো উপক্কিলেসো হোতি। ‘‘তং কিং মঞ্ঞসি, নিগ্রোধ, যদিমে তপোজিগুচ্ছা [তপোজিগুচ্ছায (?)] উপক্কিলেসা ৰা অনুপক্কিলেসা ৰা’’তি? ‘‘অদ্ধা খো ইমে, ভন্তে, তপোজিগুচ্ছা [তপোজিগুচ্ছায (?)]উপক্কিলেসা [উপক্কিলেসা হোতি (ক॰)], নো অনুপক্কিলেসা। ঠানং খো পনেতং, ভন্তে, ৰিজ্জতি যং ইধেকচ্চো তপস্সী সব্বেহেৰ ইমেহি উপক্কিলেসেহি সমন্নাগতো অস্স; কো পন ৰাদো অঞ্ঞতরঞ্ঞতরেনা’’তি। পরিসুদ্ধপপটিকপ্পত্তকথা ৬৪. ‘‘ইধ, নিগ্রোধ, তপস্সী তপং সমাদিযতি, সো তেন তপসা ন অত্তমনো হোতি ন পরিপুণ্ণসঙ্কপ্পো। যম্পি, নিগ্রোধ, তপস্সী তপং সমাদিযতি, সো তেন তপসা ন অত্তমনো হোতি ন পরিপুণ্ণসঙ্কপ্পো। এৰং সো তস্মিং ঠানে পরিসুদ্ধো হোতি। ‘‘পুন চপরং, নিগ্রোধ, তপস্সী তপং সমাদিযতি, সো তেন তপসা ন অত্তানুক্কংসেতি ন পরং ৰম্ভেতি…পে॰… এৰং সো তস্মিং ঠানে পরিসুদ্ধো হোতি। ‘‘পুন চপরং, নিগ্রোধ, তপস্সী তপং সমাদিযতি, সো তেন তপসা ন মজ্জতি ন মুচ্ছতি ন পমাদমাপজ্জতি…পে॰… এৰং সো তস্মিং ঠানে পরিসুদ্ধো হোতি। ৬৫. ‘‘পুন চপরং, নিগ্রোধ, তপস্সী তপং সমাদিযতি, সো তেন তপসা লাভসক্কারসিলোকং অভিনিব্বত্তেতি, সো তেন লাভসক্কারসিলোকেন ন অত্তমনো হোতি ন পরিপুণ্ণসঙ্কপ্পো…পে॰… এৰং সো তস্মিং ঠানে পরিসুদ্ধো হোতি। ‘‘পুন চপরং, নিগ্রোধ, তপস্সী তপং সমাদিযতি, সো তেন তপসা লাভসক্কারসিলোকং অভিনিব্বত্তেতি, সো তেন লাভসক্কারসিলোকেন ন অত্তানুক্কংসেতি ন পরং ৰম্ভেতি…পে॰… এৰং সো তস্মিং ঠানে পরিসুদ্ধো হোতি। ‘‘পুন চপরং, নিগ্রোধ, তপস্সী তপং সমাদিযতি, সো তেন তপসা লাভসক্কারসিলোকং অভিনিব্বত্তেতি, সো তেন লাভসক্কারসিলোকেন ন মজ্জতি ন মুচ্ছতি ন পমাদমাপজ্জতি…পে॰… এৰং সো তস্মিং ঠানে পরিসুদ্ধো হোতি। ৬৬. ‘‘পুন চপরং, নিগ্রোধ, তপস্সী ভোজনেসু ন ৰোদাসং আপজ্জতি – ‘ইদং মে খমতি, ইদং মে নক্খমতী’তি। সো যঞ্চ খ্ৰস্স নক্খমতি, তং অনপেক্খো পজহতি। যং পনস্স খমতি , তং অগধিতো অমুচ্ছিতো অনজ্ঝাপন্নো আদীনৰদস্সাৰী নিস্সরণপঞ্ঞো পরিভুঞ্জতি…পে॰… এৰং সো তস্মিং ঠানে পরিসুদ্ধো হোতি। ‘‘পুন চপরং, নিগ্রোধ, তপস্সী ন তপং সমাদিযতি লাভসক্কারসিলোকনিকন্তিহেতু – ‘সক্করিস্সন্তি মং রাজানো রাজমহামত্তা খত্তিযা ব্রাহ্মণা গহপতিকা তিত্থিযা’তি…পে॰… এৰং সো তস্মিং ঠানে পরিসুদ্ধো হোতি। ৬৭. ‘‘পুন চপরং, নিগ্রোধ, তপস্সী অঞ্ঞতরং সমণং ৰা ব্রাহ্মণং ৰা নাপসাদেতা হোতি – ‘কিং পনাযং সম্বহুলাজীৰো সব্বং সংভক্খেতি। সেয্যথিদং – মূলবীজং খন্ধবীজং ফল়ুবীজং অগ্গবীজং বীজবীজমেৰ পঞ্চমং, অসনিৰিচক্কং দন্তকূটং, সমণপ্পৰাদেনা’তি…পে॰… এৰং সো তস্মিং ঠানে পরিসুদ্ধো হোতি। ‘‘পুন চপরং, নিগ্রোধ, তপস্সী পস্সতি অঞ্ঞতরং সমণং ৰা ব্রাহ্মণং ৰা কুলেসু সক্করিযমানং গরু করিযমানং মানিযমানং পূজিযমানং। দিস্ৰা তস্স ন এৰং হোতি – ‘ইমঞ্হি নাম সম্বহুলাজীৰং কুলেসু সক্করোন্তি গরুং করোন্তি মানেন্তি পূজেন্তি। মং পন তপস্সিং লূখাজীৰিং কুলেসু ন সক্করোন্তি ন গরুং করোন্তি ন মানেন্তি ন পূজেন্তী’তি, ইতি সো ইস্সামচ্ছরিযং কুলেসু নুপ্পাদেতা হোতি…পে॰… এৰং সো তস্মিং ঠানে পরিসুদ্ধো হোতি। ৬৮. ‘‘পুন চপরং, নিগ্রোধ, তপস্সী ন আপাথকনিসাদী হোতি…পে॰… এৰং সো তস্মিং ঠানে পরিসুদ্ধো হোতি। ‘‘পুন চপরং, নিগ্রোধ, তপস্সী ন অত্তানং অদস্সযমানো কুলেসু চরতি – ‘ইদম্পি মে তপস্মিং, ইদম্পি মে তপস্মি’ন্তি…পে॰… এৰং সো তস্মিং ঠানে পরিসুদ্ধো হোতি। ‘‘পুন চপরং, নিগ্রোধ, তপস্সী ন কঞ্চিদেৰ পটিচ্ছন্নং সেৰতি, সো – ‘খমতি তে ইদ’ন্তি পুট্ঠো সমানো অক্খমমানং আহ – ‘নক্খমতী’তি। খমমানং আহ – ‘খমতী’তি। ইতি সো সম্পজানমুসা ন ভাসিতা হোতি…পে॰… এৰং সো তস্মিং ঠানে পরিসুদ্ধো হোতি। ‘‘পুন চপরং, নিগ্রোধ, তপস্সী তথাগতস্স ৰা তথাগতসাৰকস্স ৰা ধম্মং দেসেন্তস্স সন্তংযেৰ পরিযাযং অনুঞ্ঞেয্যং অনুজানাতি…পে॰… এৰং সো তস্মিং ঠানে পরিসুদ্ধো হোতি। ৬৯. ‘‘পুন চপরং, নিগ্রোধ, তপস্সী অক্কোধনো হোতি অনুপনাহী। যম্পি, নিগ্রোধ, তপস্সী অক্কোধনো হোতি অনুপনাহী এৰং সো তস্মিং ঠানে পরিসুদ্ধো হোতি। ‘‘পুন চপরং, নিগ্রোধ, তপস্সী অমক্খী হোতি অপল়াসী…পে॰… অনিস্সুকী হোতি অমচ্ছরী… অসঠো হোতি অমাযাৰী… অত্থদ্ধো হোতি অনতিমানী… ন পাপিচ্ছো হোতি ন পাপিকানং ইচ্ছানং ৰসং গতো… ন মিচ্ছাদিট্ঠিকো হোতি ন অন্তগ্গাহিকায দিট্ঠিযা সমন্নাগতো… ন সন্দিট্ঠিপরামাসী হোতি ন আধানগ্গাহী সুপ্পটিনিস্সগ্গী। যম্পি, নিগ্রোধ, তপস্সী ন সন্দিট্ঠিপরামাসী হোতি ন আধানগ্গাহী সুপ্পটিনিস্সগ্গী। এৰং সো তস্মিং ঠানে পরিসুদ্ধো হোতি। ‘‘তং কিং মঞ্ঞসি, নিগ্রোধ, যদি এৰং সন্তে তপোজিগুচ্ছা পরিসুদ্ধা ৰা হোতি অপরিসুদ্ধা ৰা’’তি? ‘‘অদ্ধা খো, ভন্তে, এৰং সন্তে তপোজিগুচ্ছা পরিসুদ্ধা হোতি নো অপরিসুদ্ধা, অগ্গপ্পত্তা চ সারপ্পত্তা চা’’তি। ‘‘ন খো, নিগ্রোধ, এত্তাৰতা তপোজিগুচ্ছা অগ্গপ্পত্তা চ হোতি সারপ্পত্তা চ; অপি চ খো পপটিকপ্পত্তা [পপ্পটিকপত্তা (ক॰)] হোতী’’তি। পরিসুদ্ধতচপ্পত্তকথা ৭০. ‘‘কিত্তাৰতা পন, ভন্তে, তপোজিগুচ্ছা অগ্গপ্পত্তা চ হোতি সারপ্পত্তা চ? সাধু মে, ভন্তে, ভগৰা তপোজিগুচ্ছায অগ্গঞ্ঞেৰ পাপেতু, সারঞ্ঞেৰ পাপেতূ’’তি। ‘‘ইধ, নিগ্রোধ, তপস্সী চাতুযামসংৰরসংৰুতো হোতি। কথঞ্চ, নিগ্রোধ, তপস্সী চাতুযামসংৰরসংৰুতো হোতি? ইধ, নিগ্রোধ, তপস্সী ন পাণং অতিপাতেতি [অতিপাপেতি (ক॰ সী॰ পী॰ ক॰)], ন পাণং অতিপাতযতি, ন পাণমতিপাতযতো সমনুঞ্ঞো হোতি । ন অদিন্নং আদিযতি, ন অদিন্নং আদিযাপেতি, ন অদিন্নং আদিযতো সমনুঞ্ঞো হোতি। ন মুসা ভণতি, ন মুসা ভণাপেতি, ন মুসা ভণতো সমনুঞ্ঞো হোতি। ন ভাৰিতমাসীসতি [ন ভাৰিতমাসিং সতি (সী॰ স্যা॰ পী॰)], ন ভাৰিতমাসীসাপেতি, ন ভাৰিতমাসীসতো সমনুঞ্ঞো হোতি। এৰং খো, নিগ্রোধ, তপস্সী চাতুযামসংৰরসংৰুতো হোতি। ‘‘যতো খো, নিগ্রোধ, তপস্সী চাতুযামসংৰরসংৰুতো হোতি, অদুং চস্স হোতি তপস্সিতায। সো অভিহরতি নো হীনাযাৰত্ততি। সো ৰিৰিত্তং সেনাসনং ভজতি অরঞ্ঞং রুক্খমূলং পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জং। সো পচ্ছাভত্তং পিণ্ডপাতপ্পটিক্কন্তো নিসীদতি পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা। সো অভিজ্ঝং লোকে পহায ৰিগতাভিজ্ঝেন চেতসা ৰিহরতি, অভিজ্ঝায চিত্তং পরিসোধেতি। ব্যাপাদপ্পদোসং পহায অব্যাপন্নচিত্তো ৰিহরতি সব্বপাণভূতহিতানুকম্পী, ব্যাপাদপ্পদোসা চিত্তং পরিসোধেতি। থিনমিদ্ধং [থীনমিদ্ধং (সী॰ স্যা॰ পী॰)] পহায ৰিগতথিনমিদ্ধো ৰিহরতি আলোকসঞ্ঞী সতো সম্পজানো, থিনমিদ্ধা চিত্তং পরিসোধেতি। উদ্ধচ্চকুক্কুচ্চং পহায অনুদ্ধতো ৰিহরতি অজ্ঝত্তং ৰূপসন্তচিত্তো, উদ্ধচ্চকুক্কুচ্চা চিত্তং পরিসোধেতি। ৰিচিকিচ্ছং পহায তিণ্ণৰিচিকিচ্ছো ৰিহরতি অকথংকথী কুসলেসু ধম্মেসু, ৰিচিকিচ্ছায চিত্তং পরিসোধেতি। ৭১. ‘‘সো ইমে পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে মেত্তাসহগতেন চেতসা একং দিসং ফরিত্ৰা ৰিহরতি। তথা দুতিযং। তথা ততিযং। তথা চতুত্থং। ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি। করুণাসহগতেন চেতসা…পে॰… মুদিতাসহগতেন চেতসা…পে॰… উপেক্খাসহগতেন চেতসা একং দিসং ফরিত্ৰা ৰিহরতি। তথা দুতিযং। তথা ততিযং। তথা চতুত্থং। ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি। ‘‘তং কিং মঞ্ঞসি, নিগ্রোধ। যদি এৰং সন্তে তপোজিগুচ্ছা পরিসুদ্ধা ৰা হোতি অপরিসুদ্ধা ৰা’’তি? ‘‘অদ্ধা খো, ভন্তে, এৰং সন্তে তপোজিগুচ্ছা পরিসুদ্ধা হোতি নো অপরিসুদ্ধা, অগ্গপ্পত্তা চ সারপ্পত্তা চা’’তি। ‘‘ন খো, নিগ্রোধ, এত্তাৰতা তপোজিগুচ্ছা অগ্গপ্পত্তা চ হোতি সারপ্পত্তা চ; অপি চ খো তচপ্পত্তা হোতী’’তি। পরিসুদ্ধফেগ্গুপ্পত্তকথা ৭২. ‘‘কিত্তাৰতা পন, ভন্তে, তপোজিগুচ্ছা অগ্গপ্পত্তা চ হোতি সারপ্পত্তা চ? সাধু মে, ভন্তে, ভগৰা তপোজিগুচ্ছায অগ্গঞ্ঞেৰ পাপেতু, সারঞ্ঞেৰ পাপেতূ’’তি। ‘‘ইধ, নিগ্রোধ, তপস্সী চাতুযামসংৰরসংৰুতো হোতি। কথঞ্চ, নিগ্রোধ, তপস্সী চাতুযামসংৰরসংৰুতো হোতি…পে॰… যতো খো, নিগ্রোধ, তপস্সী চাতুযামসংৰরসংৰুতো হোতি, অদুং চস্স হোতি তপস্সিতায। সো অভিহরতি নো হীনাযাৰত্ততি। সো ৰিৰিত্তং সেনাসনং ভজতি…পে॰… সো ইমে পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে মেত্তাসহগতেন চেতসা…পে॰… করুণাসহগতেন চেতসা…পে॰… মুদিতাসহগতেন চেতসা…পে॰… উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি। সো অনেকৰিহিতং পুব্বেনিৰাসং অনুস্সরতি সেয্যথিদং – একম্পি জাতিং দ্ৰেপি জাতিযো তিস্সোপি জাতিযো চতস্সোপি জাতিযো পঞ্চপি জাতিযো দসপি জাতিযো ৰীসম্পি জাতিযো তিংসম্পি জাতিযো চত্তালীসম্পি জাতিযো পঞ্ঞাসম্পি জাতিযো জাতিসতম্পি জাতিসহস্সম্পি জাতিসতসহস্সম্পি অনেকেপি সংৰট্টকপ্পে অনেকেপি ৰিৰট্টকপ্পে অনেকেপি সংৰট্টৰিৰট্টকপ্পে – ‘অমুত্রাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো, সো ততো চুতো অমুত্র উদপাদিং, তত্রাপাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো, সো ততো চুতো ইধূপপন্নো’তি। ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি। ‘‘তং কিং মঞ্ঞসি, নিগ্রোধ, যদি এৰং সন্তে তপোজিগুচ্ছা পরিসুদ্ধা ৰা হোতি অপরিসুদ্ধা ৰা’’তি? ‘‘অদ্ধা খো, ভন্তে, এৰং সন্তে তপোজিগুচ্ছা পরিসুদ্ধা হোতি, নো অপরিসুদ্ধা, অগ্গপ্পত্তা চ সারপ্পত্তা চা’’তি। ‘‘ন খো, নিগ্রোধ, এত্তাৰতা তপোজিগুচ্ছা অগ্গপ্পত্তা চ হোতি সারপ্পত্তা চ; অপি চ খো ফেগ্গুপ্পত্তা হোতী’’তি। পরিসুদ্ধঅগ্গপ্পত্তসারপ্পত্তকথা ৭৩. ‘‘কিত্তাৰতা পন, ভন্তে, তপোজিগুচ্ছা অগ্গপ্পত্তা চ হোতি সারপ্পত্তা চ? সাধু মে, ভন্তে, ভগৰা তপোজিগুচ্ছায অগ্গঞ্ঞেৰ পাপেতু, সারঞ্ঞেৰ পাপেতূ’’তি। ‘‘ইধ, নিগ্রোধ, তপস্সী চাতুযামসংৰরসংৰুতো হোতি। কথঞ্চ, নিগ্রোধ, তপস্সী চাতুযামসংৰরসংৰুতো হোতি…পে॰… যতো খো, নিগ্রোধ, তপস্সী চাতুযামসংৰরসংৰুতো হোতি, অদুং চস্স হোতি তপস্সিতায। সো অভিহরতি নো হীনাযাৰত্ততি। সো ৰিৰিত্তং সেনাসনং ভজতি…পে॰… সো ইমে পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে মেত্তাসহগতেন চেতসা…পে॰… উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি। সো অনেকৰিহিতং পুব্বেনিৰাসং অনুস্সরতি। সেয্যথিদং – একম্পি জাতিং দ্ৰেপি জাতিযো তিস্সোপি জাতিযো চতস্সোপি জাতিযো পঞ্চপি জাতিযো…পে॰… ইতি সাকারং সউদ্দেসংঅনেকৰিহিতং পুব্বেনিৰাসং অনুস্সরতি। সো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে, যথাকম্মূপগে সত্তে পজানাতি – ‘ইমে ৰত ভোন্তো সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা। তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না। ইমে ৰা পন ভোন্তো সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা। তে কাযস্স ভেদা পরং মরণা সুগতিং সগ্গং লোকং উপপন্না’তি। ইতি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে, যথাকম্মূপগে সত্তে পজানাতি। ‘‘তং কিং মঞ্ঞসি, নিগ্রোধ, যদি এৰং সন্তে তপোজিগুচ্ছা পরিসুদ্ধা ৰা হোতি অপরিসুদ্ধা ৰা’’তি? ‘‘অদ্ধা খো, ভন্তে, এৰং সন্তে তপোজিগুচ্ছা পরিসুদ্ধা হোতি নো অপরিসুদ্ধা, অগ্গপ্পত্তা চ সারপ্পত্তা চা’’তি। ৭৪. ‘‘এত্তাৰতা খো, নিগ্রোধ, তপোজিগুচ্ছা অগ্গপ্পত্তা চ হোতি সারপ্পত্তা চ। ইতি খো, নিগ্রোধ [ইতি নিগ্রোধ (স্যা॰)], যং মং ত্ৰং অৰচাসি – ‘কো নাম সো, ভন্তে, ভগৰতো ধম্মো, যেন ভগৰা সাৰকে ৰিনেতি, যেন ভগৰতা সাৰকা ৰিনীতা অস্সাসপ্পত্তা পটিজানন্তি অজ্ঝাসযং আদিব্রহ্মচরিয’ন্তি। ইতি খো তং, নিগ্রোধ, ঠানং উত্তরিতরঞ্চ পণীততরঞ্চ, যেনাহং সাৰকে ৰিনেমি, যেন মযা সাৰকা ৰিনীতা অস্সাসপ্পত্তা পটিজানন্তি অজ্ঝাসযং আদিব্রহ্মচরিয’’ন্তি। এৰং ৰুত্তে, তে পরিব্বাজকা উন্নাদিনো উচ্চাসদ্দমহাসদ্দা অহেসুং – ‘‘এত্থ মযং অনস্সাম সাচরিযকা, ন মযং ইতো ভিয্যো উত্তরিতরং পজানামা’’তি। নিগ্রোধস্স পজ্ঝাযনং ৭৫. যদা অঞ্ঞাসি সন্ধানো গহপতি – ‘‘অঞ্ঞদত্থু খো দানিমে অঞ্ঞতিত্থিযা পরিব্বাজকা ভগৰতো ভাসিতং সুস্সূসন্তি, সোতং ওদহন্তি, অঞ্ঞাচিত্তং উপট্ঠাপেন্তী’’তি। অথ [অথ নং (ক॰)] নিগ্রোধং পরিব্বাজকং এতদৰোচ – ‘‘ইতি খো, ভন্তে নিগ্রোধ, যং মং ত্ৰং অৰচাসি – ‘যগ্ঘে, গহপতি, জানেয্যাসি, কেন সমণো গোতমো সদ্ধিং সল্লপতি, কেন সাকচ্ছং সমাপজ্জতি, কেন পঞ্ঞাৰেয্যত্তিযং সমাপজ্জতি, সুঞ্ঞাগারহতা সমণস্স গোতমস্স পঞ্ঞা, অপরিসাৰচরো সমণো গোতমো নালং সল্লাপায, সো অন্তমন্তানেৰ সেৰতি; সেয্যথাপি নাম গোকাণা পরিযন্তচারিনী অন্তমন্তানেৰ সেৰতি। এৰমেৰ সুঞ্ঞাগারহতা সমণস্স গোতমস্স পঞ্ঞা, অপরিসাৰচরো সমণো গোতমো নালং সল্লাপায; সো অন্তমন্তানেৰ সেৰতি; ইঙ্ঘ, গহপতি, সমণো গোতমো ইমং পরিসং আগচ্ছেয্য, একপঞ্হেনেৰ নং সংসাদেয্যাম, তুচ্ছকুম্ভীৰ নং মঞ্ঞে ওরোধেয্যামা’তি। অযং খো সো, ভন্তে, ভগৰা অরহং সম্মাসম্বুদ্ধো ইধানুপ্পত্তো, অপরিসাৰচরং পন নং করোথ, গোকাণং পরিযন্তচারিনিং করোথ, একপঞ্হেনেৰ নং সংসাদেথ, তুচ্ছকুম্ভীৰ নং ওরোধেথা’’তি। এৰং ৰুত্তে, নিগ্রোধো পরিব্বাজকো তুণ্হীভূতো মঙ্কুভূতো পত্তক্খন্ধো অধোমুখো পজ্ঝাযন্তো অপ্পটিভানো নিসীদি। ৭৬. অথ খো ভগৰা নিগ্রোধং পরিব্বাজকং তুণ্হীভূতং মঙ্কুভূতং পত্তক্খন্ধং অধোমুখং পজ্ঝাযন্তং অপ্পটিভানং ৰিদিত্ৰা নিগ্রোধং পরিব্বাজকং এতদৰোচ – ‘‘সচ্চং কির, নিগ্রোধ, ভাসিতা তে এসা ৰাচা’’তি? ‘‘সচ্চং , ভন্তে, ভাসিতা মে এসা ৰাচা, যথাবালেন যথামূল়্হেন যথাঅকুসলেনা’’তি। ‘‘তং কিং মঞ্ঞসি, নিগ্রোধ। কিন্তি তে সুতং পরিব্বাজকানং ৰুড্ঢানং মহল্লকানং আচরিযপাচরিযানং ভাসমানানং – ‘যে তে অহেসুং অতীতমদ্ধানং অরহন্তো সম্মাসম্বুদ্ধা, এৰং সু তে ভগৰন্তো সংগম্ম সমাগম্ম উন্নাদিনো উচ্চাসদ্দমহাসদ্দা অনেকৰিহিতং তিরচ্ছানকথং অনুযুত্তা ৰিহরন্তি। সেয্যথিদং – রাজকথং চোরকথং…পে॰… ইতিভৰাভৰকথং ইতি ৰা। সেয্যথাপি ত্ৰং এতরহি সাচরিযকো। উদাহু, এৰং সু তে ভগৰন্তো অরঞ্ঞৰনপত্থানি পন্তানি সেনাসনানি পটিসেৰন্তি অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি পটিসল্লানসারুপ্পানি, সেয্যথাপাহং এতরহী’তি। ‘‘সুতং মেতং, ভন্তে। পরিব্বাজকানং ৰুড্ঢানং মহল্লকানং আচরিযপাচরিযানং ভাসমানানং – ‘যে তে অহেসুং অতীতমদ্ধানং অরহন্তো সম্মাসম্বুদ্ধা , ন এৰং সু [নাস্সু (সী॰ পী॰)] তে ভগৰন্তো সংগম্ম সমাগম্ম উন্নাদিনো উচ্চাসদ্দমহাসদ্দা অনেকৰিহিতং তিরচ্ছানকথং অনুযুত্তা ৰিহরন্তি। সেয্যথিদং – রাজকথং চোরকথং…পে॰… ইতিভৰাভৰকথং ইতি ৰা, সেয্যথাপাহং এতরহি সাচরিযকো। এৰং সু তে ভগৰন্তো অরঞ্ঞৰনপত্থানি পন্তানি সেনাসনানি পটিসেৰন্তি অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি পটিসল্লানসারুপ্পানি, সেয্যথাপি ভগৰা এতরহী’’’তি। ‘‘তস্স তে, নিগ্রোধ, ৰিঞ্ঞুস্স সতো মহল্লকস্স ন এতদহোসি – ‘বুদ্ধো সো ভগৰা বোধায ধম্মং দেসেতি, দন্তো সো ভগৰা দমথায ধম্মং দেসেতি, সন্তো সো ভগৰা সমথায ধম্মং দেসেতি, তিণ্ণো সো ভগৰা তরণায ধম্মং দেসেতি, পরিনিব্বুতো সো ভগৰা পরিনিব্বানায ধম্মং দেসেতী’’’তি? ব্রহ্মচরিযপরিযোসানসচ্ছিকিরিযা ৭৭. এৰং ৰুত্তে, নিগ্রোধো পরিব্বাজকো ভগৰন্তং এতদৰোচ – ‘‘অচ্চযো মং, ভন্তে, অচ্চগমা যথাবালং যথামূল়্হং যথাঅকুসলং, য্ৰাহং এৰং ভগৰন্তং অৰচাসিং। তস্স মে, ভন্তে, ভগৰা অচ্চযং অচ্চযতো পটিগ্গণ্হাতু আযতিং সংৰরাযা’’তি। ‘‘তগ্ঘ ত্ৰং [তং (সী॰ স্যা॰ পী॰)], নিগ্রোধ, অচ্চযো অচ্চগমা যথাবালং যথামূল়্হং যথাঅকুসলং, যো মং ত্ৰং এৰং অৰচাসি। যতো চ খো ত্ৰং, নিগ্রোধ, অচ্চযং অচ্চযতো দিস্ৰা যথাধম্মং পটিকরোসি, তং তে মযং পটিগ্গণ্হাম। ৰুদ্ধি হেসা, নিগ্রোধ, অরিযস্স ৰিনযে, যো অচ্চযং অচ্চযতো দিস্ৰা যথাধম্মং পটিকরোতি আযতিং সংৰরং আপজ্জতি। অহং খো পন, নিগ্রোধ, এৰং ৰদামি – ‘এতু ৰিঞ্ঞূ পুরিসো অসঠো অমাযাৰী উজুজাতিকো, অহমনুসাসামি অহং ধম্মং দেসেমি। যথানুসিট্ঠং তথা [যথানুসিট্ঠং (?)] পটিপজ্জমানো, যস্সত্থায কুলপুত্তা সম্মদেৰ অগারস্মা অনগারিযং পব্বজন্তি, তদনুত্তরং ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিস্সতি সত্তৰস্সানি। তিট্ঠন্তু, নিগ্রোধ, সত্ত ৰস্সানি। এতু ৰিঞ্ঞূ পুরিসো অসঠো অমাযাৰী উজুজাতিকো, অহমনুসাসামি অহং ধম্মং দেসেমি। যথানুসিট্ঠং তথা পটিপজ্জমানো, যস্সত্থায কুলপুত্তা সম্মদেৰ অগারস্মা অনগারিযং পব্বজন্তি, তদনুত্তরং ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিস্সতি ছ ৰস্সানি। পঞ্চ ৰস্সানি… চত্তারি ৰস্সানি… তীণি ৰস্সানি… দ্ৰে ৰস্সানি… একং ৰস্সং। তিট্ঠতু, নিগ্রোধ, একং ৰস্সং। এতু ৰিঞ্ঞূ পুরিসো অসঠো অমাযাৰী উজুজাতিকো অহমনুসাসামি অহং ধম্মং দেসেমি। যথানুসিট্ঠং তথা পটিপজ্জমানো, যস্সত্থায কুলপুত্তা সম্মদেৰ অগারস্মা অনগারিযং পব্বজন্তি, তদনুত্তরং ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিস্সতি সত্ত মাসানি। তিট্ঠন্তু, নিগ্রোধ, সত্ত মাসানি… ছ মাসানি… পঞ্চ মাসানি … চত্তারি মাসানি… তীণি মাসানি… দ্ৰে মাসানি… একং মাসং… অড্ঢমাসং। তিট্ঠতু, নিগ্রোধ, অড্ঢমাসো। এতু ৰিঞ্ঞূ পুরিসো অসঠো অমাযাৰী উজুজাতিকো, অহমনুসাসামি অহং ধম্মং দেসেমি। যথানুসিট্ঠং তথা পটিপজ্জমানো, যস্সত্থায কুলপুত্তা সম্মদেৰ অগারস্মা অনগারিযং পব্বজন্তি, তদনুত্তরং ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিস্সতি সত্তাহং’। পরিব্বাজকানং পজ্ঝাযনং ৭৮. ‘‘সিযা খো পন তে, নিগ্রোধ, এৰমস্স – ‘অন্তেৰাসিকম্যতা নো সমণো গোতমো এৰমাহা’তি। ন খো পনেতং, নিগ্রোধ, এৰং দট্ঠব্বং। যো এৰ ৰো [তে (সী॰ স্যা॰)]আচরিযো, সো এৰ ৰো আচরিযো হোতু। সিযা খো পন তে, নিগ্রোধ, এৰমস্স – ‘উদ্দেসা নো চাৰেতুকামো সমণো গোতমো এৰমাহা’তি। ন খো পনেতং, নিগ্রোধ , এৰং দট্ঠব্বং। যো এৰ ৰো উদ্দেসো সো এৰ ৰো উদ্দেসো হোতু। সিযা খো পন তে, নিগ্রোধ, এৰমস্স – ‘আজীৰা নো চাৰেতুকামো সমণো গোতমো এৰমাহা’তি। ন খো পনেতং, নিগ্রোধ, এৰং দট্ঠব্বং। যো এৰ ৰো আজীৰো, সো এৰ ৰো আজীৰো হোতু। সিযা খো পন তে, নিগ্রোধ, এৰমস্স – ‘যে নো ধম্মা অকুসলা অকুসলসঙ্খাতা সাচরিযকানং, তেসু পতিট্ঠাপেতুকামো সমণো গোতমো এৰমাহা’তি। ন খো পনেতং, নিগ্রোধ, এৰং দট্ঠব্বং। অকুসলা চেৰ ৰো তে ধম্মা [ৰোধম্মা (ক॰), তে ধম্মা (স্যা॰)] হোন্তু অকুসলসঙ্খাতা চ সাচরিযকানং। সিযা খো পন তে , নিগ্রোধ, এৰমস্স – ‘যে নো ধম্মা কুসলা কুসলসঙ্খাতা সাচরিযকানং, তেহি ৰিৰেচেতুকামো সমণো গোতমো এৰমাহা’তি। ন খো পনেতং, নিগ্রোধ, এৰং দট্ঠব্বং। কুসলা চেৰ ৰো তে ধম্মা হোন্তু কুসলসঙ্খাতা চ সাচরিযকানং। ইতি খ্ৰাহং, নিগ্রোধ, নেৰ অন্তেৰাসিকম্যতা এৰং ৰদামি, নপি উদ্দেসা চাৰেতুকামো এৰং ৰদামি, নপি আজীৰা চাৰেতুকামো এৰং ৰদামি, নপি যে ৰো ধম্মা [নপি যে খো ধম্মা (সী॰), নপি যে তে ধম্মা (স্যা॰), নপি যে চ ৰো ধম্মা (ক॰)] অকুসলা অকুসলসঙ্খাতা সাচরিযকানং, তেসু পতিট্ঠাপেতুকামো এৰং ৰদামি, নপি যে ৰো ধম্মা [নপি যে খো ধম্মা (সী॰), নপি যে তে ধম্মা (স্যা॰), নপি যে চ ৰো ধম্মা (ক॰)] কুসলা কুসলসঙ্খাতা সাচরিযকানং, তেহি ৰিৰেচেতুকামো এৰং ৰদামি। সন্তি চ খো, নিগ্রোধ, অকুসলা ধম্মা অপ্পহীনা সংকিলেসিকা পোনোব্ভৰিকা[পোনোভৰিকা (ক॰)] সদরা [সদ্দরা (পী॰ ক॰), সদরথা (স্যা॰ ক॰)] দুক্খৰিপাকা আযতিং জাতিজরামরণিযা, যেসাহং পহানায ধম্মং দেসেমি। যথাপটিপন্নানং ৰো সংকিলেসিকা ধম্মা পহীযিস্সন্তি, ৰোদানীযা ধম্মা অভিৰড্ঢিস্সন্তি, পঞ্ঞাপারিপূরিং ৰেপুল্লত্তঞ্চ দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরিস্সথা’’তি। ৭৯. এৰং ৰুত্তে, তে পরিব্বাজকা তুণ্হীভূতা মঙ্কুভূতা পত্তক্খন্ধা অধোমুখা পজ্ঝাযন্তা অপ্পটিভানা নিসীদিংসু যথা তং মারেন পরিযুট্ঠিতচিত্তা। অথ খো ভগৰতো এতদহোসি – ‘‘সব্বে পিমে মোঘপুরিসা ফুট্ঠা পাপিমতা। যত্র হি নাম একস্সপি ন এৰং ভৰিস্সতি – ‘হন্দ মযং অঞ্ঞাণত্থম্পি সমণে গোতমে ব্রহ্মচরিযং চরাম, কিং করিস্সতি সত্তাহো’’’তি? অথ খো ভগৰা উদুম্বরিকায পরিব্বাজকারামে সীহনাদং নদিত্ৰা ৰেহাসং অব্ভুগ্গন্ত্ৰা গিজ্ঝকূটে পব্বতে পচ্চুপট্ঠাসি [পচ্চুট্ঠাসি (সী॰ স্যা॰ পী॰)]। সন্ধানো পন গহপতি তাৰদেৰ রাজগহং পাৰিসীতি। উদুম্বরিকসুত্তং নিট্ঠিতং দুতিযং। |