১০. সুভসুত্তং
সুভমাণৰৰত্থু ৪৪৪. এৰং মে সুতং – একং সমযং আযস্মা আনন্দো সাৰত্থিযং ৰিহরতি জেতৰনে অনাথপিণ্ডিকস্স আরামে অচিরপরিনিব্বুতে ভগৰতি। তেন খো পন সমযেন সুভো মাণৰো তোদেয্যপুত্তো সাৰত্থিযং পটিৰসতি কেনচিদেৰ করণীযেন। ৪৪৫. অথ খো সুভো মাণৰো তোদেয্যপুত্তো অঞ্ঞতরং মাণৰকং আমন্তেসি – ‘‘এহি ত্ৰং, মাণৰক, যেন সমণো আনন্দো তেনুপসঙ্কম; উপসঙ্কমিত্ৰা মম ৰচনেন সমণং আনন্দং অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছ – ‘সুভো মাণৰো তোদেয্যপুত্তো ভৰন্তং আনন্দং অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতী’তি। এৰঞ্চ ৰদেহি – ‘সাধু কির ভৰং আনন্দো যেন সুভস্স মাণৰস্স তোদেয্যপুত্তস্স নিৰেসনং তেনুপসঙ্কমতু অনুকম্পং উপাদাযা’’’তি। ৪৪৬. ‘‘এৰং, ভো’’তি খো সো মাণৰকো সুভস্স মাণৰস্স তোদেয্যপুত্তস্স পটিস্সুত্ৰা যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মতা আনন্দেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো সো মাণৰকো আযস্মন্তং আনন্দং এতদৰোচ – ‘‘সুভো মাণৰো তোদেয্যপুত্তো ভৰন্তং আনন্দং অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতি; এৰঞ্চ ৰদেতি – ‘সাধু কির ভৰং আনন্দো যেন সুভস্স মাণৰস্স তোদেয্যপুত্তস্স নিৰেসনং তেনুপসঙ্কমতু অনুকম্পং উপাদাযা’’’তি। ৪৪৭. এৰং ৰুত্তে, আযস্মা আনন্দো তং মাণৰকং এতদৰোচ – ‘‘অকালো খো, মাণৰক । অত্থি মে অজ্জ ভেসজ্জমত্তা পীতা। অপ্পেৰনাম স্ৰেপি উপসঙ্কমেয্যাম কালঞ্চ সমযঞ্চ উপাদাযা’’তি। ‘‘এৰং, ভো’’তি খো সো মাণৰকো আযস্মতো আনন্দস্স পটিস্সুত্ৰা উট্ঠাযাসনা যেন সুভো মাণৰো তোদেয্যপুত্তো তেনুপসঙ্কমি ; উপসঙ্কমিত্ৰা সুভং মাণৰং তোদেয্যপুত্তং এতদৰোচ, ‘‘অৰোচুম্হা খো মযং ভোতো ৰচনেন তং ভৰন্তং আনন্দং – ‘সুভো মাণৰো তোদেয্যপুত্তো ভৰন্তং আনন্দং অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতি, এৰঞ্চ ৰদেতি – ‘‘সাধু কির ভৰং আনন্দো যেন সুভস্স মাণৰস্স তোদেয্যপুত্তস্স নিৰেসনং তেনুপসঙ্কমতু অনুকম্পং উপাদাযা’’’তি। এৰং ৰুত্তে, ভো, সমণো আনন্দো মং এতদৰোচ – ‘অকালো খো, মাণৰক। অত্থি মে অজ্জ ভেসজ্জমত্তা পীতা। অপ্পেৰনাম স্ৰেপি উপসঙ্কমেয্যাম কালঞ্চ সমযঞ্চ উপাদাযা’তি। এত্তাৰতাপি খো, ভো, কতমেৰ এতং, যতো খো সো ভৰং আনন্দো ওকাসমকাসি স্ৰাতনাযপি উপসঙ্কমনাযা’’তি। ৪৪৮. অথ খো আযস্মা আনন্দো তস্সা রত্তিযা অচ্চযেন পুব্বণ্হসমযং নিৰাসেত্ৰা পত্তচীৰরমাদায চেতকেন ভিক্খুনা পচ্ছাসমণেন যেন সুভস্স মাণৰস্স তোদেয্যপুত্তস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি। অথ খো সুভো মাণৰো তোদেয্যপুত্তো যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মতা আনন্দেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো সুভো মাণৰো তোদেয্যপুত্তো আযস্মন্তং আনন্দং এতদৰোচ – ‘‘ভৰঞ্হি আনন্দো তস্স ভোতো গোতমস্স দীঘরত্তং উপট্ঠাকো সন্তিকাৰচরো সমীপচারী। ভৰমেতং আনন্দো জানেয্য, যেসং সো ভৰং গোতমো ধম্মানং ৰণ্ণৰাদী অহোসি, যত্থ চ ইমং জনতং সমাদপেসি নিৰেসেসি পতিট্ঠাপেসি। কতমেসানং খো, ভো আনন্দ, ধম্মানং সো ভৰং গোতমো ৰণ্ণৰাদী অহোসি; কত্থ চ ইমং জনতং সমাদপেসি নিৰেসেসি পতিট্ঠাপেসী’’তি? ৪৪৯. ‘‘তিণ্ণং খো, মাণৰ, খন্ধানং সো ভগৰা ৰণ্ণৰাদী অহোসি; এত্থ চ ইমং জনতং সমাদপেসি নিৰেসেসি পতিট্ঠাপেসি। কতমেসং তিণ্ণং? অরিযস্স সীলক্খন্ধস্স, অরিযস্স সমাধিক্খন্ধস্স, অরিযস্স পঞ্ঞাক্খন্ধস্স। ইমেসং খো, মাণৰ, তিণ্ণং খন্ধানং সো ভগৰা ৰণ্ণৰাদী অহোসি; এত্থ চ ইমং জনতং সমাদপেসি নিৰেসেসি পতিট্ঠাপেসী’’তি। সীলক্খন্ধো ৪৫০. ‘‘কতমো পন সো, ভো আনন্দ, অরিযো সীলক্খন্ধো, যস্স সো ভৰং গোতমো ৰণ্ণৰাদী অহোসি, যত্থ চ ইমং জনতং সমাদপেসি নিৰেসেসি পতিট্ঠাপেসী’’তি? ‘‘ইধ, মাণৰ, তথাগতো লোকে উপ্পজ্জতি অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা। সো ইমং লোকং সদেৰকং সমারকং সব্রহ্মকং সস্সমণব্রাহ্মণিং পজং সদেৰমনুস্সং সযং অভিঞ্ঞা সচ্ছিকত্ৰা পৰেদেতি। সো ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেতি। তং ধম্মং সুণাতি গহপতি ৰা গহপতিপুত্তো ৰা অঞ্ঞতরস্মিং ৰা কুলে পচ্চাজাতো। সো তং ধম্মং সুত্ৰা তথাগতে সদ্ধং পটিলভতি। সো তেন সদ্ধাপটিলাভেন সমন্নাগতো ইতি পটিসঞ্চিক্খতি – ‘সম্বাধো ঘরাৰাসো রজোপথো, অব্ভোকাসো পব্বজ্জা, নযিদং সুকরং অগারং অজ্ঝাৰসতা একন্তপরিপুণ্ণং একন্তপরিসুদ্ধং সঙ্খলিখিতং ব্রহ্মচরিযং চরিতুং। যংনূনাহং কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজেয্য’ন্তি। সো অপরেন সমযেন অপ্পং ৰা ভোগক্খন্ধং পহায মহন্তং ৰা ভোগক্খন্ধং পহায অপ্পং ৰা ঞাতিপরিৰট্টং পহায মহন্তং ৰা ঞাতিপরিৰট্টং পহায কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজতি। সো এৰং পব্বজিতো সমানো পাতিমোক্খসংৰরসংৰুতো ৰিহরতি, আচারগোচরসম্পন্নো, অনুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু, কাযকম্মৰচীকম্মেন সমন্নাগতো কুসলেন, পরিসুদ্ধাজীৰো, সীলসম্পন্নো, ইন্দ্রিযেসু গুত্তদ্ৰারো, সতিসম্পজঞ্ঞেন সমন্নাগতো, সন্তুট্ঠো। ৪৫১. ‘‘কথঞ্চ, মাণৰ, ভিক্খু সীলসম্পন্নো হোতি? ইধ, মাণৰ, ভিক্খু পাণাতিপাতং পহায পাণাতিপাতা পটিৰিরতো হোতি, নিহিতদণ্ডো নিহিতসত্থো লজ্জী দযাপন্নো, সব্বপাণভূতহিতানুকম্পী ৰিহরতি। যম্পি, মাণৰ, ভিক্খু পাণাতিপাতং পহায পাণাতিপাতা পটিৰিরতো হোতি, নিহিতদণ্ডো নিহিতসত্থো লজ্জী দযাপন্নো, সব্বপাণভূতহিতানুকম্পী ৰিহরতি; ইদম্পিস্স হোতি সীলস্মিং। (যথা ১৯৪ যাৰ ২১০ অনুচ্ছেদেসু এৰং ৰিত্থারেতব্বং)। ‘‘যথা ৰা পনেকে ভোন্তো সমণব্রাহ্মণা সদ্ধাদেয্যানি ভোজনানি ভুঞ্জিত্ৰা তে এৰরূপায তিরচ্ছানৰিজ্জায মিচ্ছাজীৰেন জীৰিতং কপ্পেন্তি, সেয্যথিদং – সন্তিকম্মং পণিধিকম্মং ভূতকম্মং ভূরিকম্মং ৰস্সকম্মং ৰোস্সকম্মং ৰত্থুকম্মং ৰত্থুপরিকম্মং আচমনং ন্হাপনং জুহনং ৰমনং ৰিরেচনং উদ্ধংৰিরেচনং অধোৰিরেচনং সীসৰিরেচনং কণ্ণতেলং নেত্ততপ্পনং নত্থুকম্মং অঞ্জনং পচ্চঞ্জনং সালাকিযং সল্লকত্তিযং দারকতিকিচ্ছা মূলভেসজ্জানং অনুপ্পদানং ওসধীনং পটিমোক্খো ইতি ৰা ইতি এৰরূপায তিরচ্ছানৰিজ্জায মিচ্ছাজীৰা পটিৰিরতো হোতি। যম্পি, মাণৰ, ভিক্খু যথা ৰা পনেকে ভোন্তো সমণব্রাহ্মণা সদ্ধাদেয্যানি ভোজনানি ভুঞ্জিত্ৰা তে এৰরূপায তিরচ্ছানৰিজ্জায মিচ্ছাজীৰেন জীৰিতং কপ্পেন্তি, সেয্যথিদং, সন্তিকম্মং পণিধিকম্মং…পে॰… ওসধীনং পটিমোক্খো ইতি ৰা ইতি এৰরূপায তিরচ্ছানৰিজ্জায মিচ্ছাজীৰা পটিৰিরতো হোতি। ইদম্পিস্স হোতি সীলস্মিং। ৪৫২. ‘‘স খো সো [অযং খো সো (ক॰)], মাণৰ, ভিক্খু এৰং সীলসম্পন্নো ন কুতোচি ভযং সমনুপস্সতি, যদিদং সীলসংৰরতো। সেয্যথাপি, মাণৰ, রাজা খত্তিযো মুদ্ধাৰসিত্তো নিহতপচ্চামিত্তো ন কুতোচি ভযং সমনুপস্সতি, যদিদং পচ্চত্থিকতো। এৰমেৰ খো, মাণৰ, ভিক্খু এৰং সীলসম্পন্নো ন কুতোচি ভযং সমনুপস্সতি, যদিদং সীলসংৰরতো। সো ইমিনা অরিযেন সীলক্খন্ধেন সমন্নাগতো অজ্ঝত্তং অনৰজ্জসুখং পটিসংৰেদেতি। এৰং খো, মাণৰ, ভিক্খু সীলসম্পন্নো হোতি। ৪৫৩. ‘‘অযং খো সো, মাণৰ, অরিযো সীলক্খন্ধো যস্স সো ভগৰা ৰণ্ণৰাদী অহোসি, যত্থ চ ইমং জনতং সমাদপেসি নিৰেসেসি পতিট্ঠাপেসি। অত্থি চেৰেত্থ উত্তরিকরণীয’’ন্তি। ‘‘অচ্ছরিযং, ভো আনন্দ, অব্ভুতং, ভো আনন্দ! সো চাযং, ভো আনন্দ, অরিযো সীলক্খন্ধো পরিপুণ্ণো, নো অপরিপুণ্ণো। এৰং পরিপুণ্ণং চাহং, ভো, আনন্দ, অরিযং সীলক্খন্ধং ইতো বহিদ্ধা অঞ্ঞেসু সমণব্রাহ্মণেসু ন সমনুপস্সামি। এৰং পরিপুণ্ণঞ্চ, ভো আনন্দ, অরিযং সীলক্খন্ধং ইতো বহিদ্ধা অঞ্ঞে সমণব্রাহ্মণা অত্তনি সমনুপস্সেয্যুং, তে তাৰতকেনেৰ অত্তমনা অস্সু – ‘অলমেত্তাৰতা, কতমেত্তাৰতা, অনুপ্পত্তো নো সামঞ্ঞত্থো, নত্থি নো কিঞ্চি উত্তরিকরণীয’ন্তি। অথ চ পন ভৰং আনন্দো এৰমাহ – ‘অত্থি চেৰেত্থ উত্তরিকরণীয’’’ন্তি [ইমস্স অনন্তরং সী॰ পী॰ পোত্থকেসু ‘‘পঠমভাণৰারং’’তি পাঠো দিস্সতি]। সমাধিক্খন্ধো ৪৫৪. ‘‘কতমো পন সো, ভো আনন্দ, অরিযো সমাধিক্খন্ধো, যস্স সো ভৰং গোতমো ৰণ্ণৰাদী অহোসি, যত্থ চ ইমং জনতং সমাদপেসি নিৰেসেসি পতিট্ঠাপেসী’’তি? ‘‘কথঞ্চ, মাণৰ, ভিক্খু ইন্দ্রিযেসু গুত্তদ্ৰারো হোতি? ইধ, মাণৰ, ভিক্খু চক্খুনা রূপং দিস্ৰা ন নিমিত্তগ্গাহী হোতি নানুব্যঞ্জনগ্গাহী; যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং তস্স সংৰরায পটিপজ্জতি, রক্খতি চক্খুন্দ্রিযং, চক্খুন্দ্রিযে সংৰরং আপজ্জতি। সোতেন সদ্দং সুত্ৰা…পে॰… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায ন নিমিত্তগ্গাহী হোতি নানুব্যঞ্জনগ্গাহী; যত্ৰাধিকরণমেনং মনিন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং তস্স সংৰরায পটিপজ্জতি, রক্খতি মনিন্দ্রিযং, মনিন্দ্রিযে সংৰরং আপজ্জতি। সো ইমিনা অরিযেন ইন্দ্রিযসংৰরেন সমন্নাগতো অজ্ঝত্তং অব্যাসেকসুখং পটিসংৰেদেতি। এৰং খো, মাণৰ, ভিক্খু ইন্দ্রিযেসু গুত্তদ্ৰারো হোতি। ৪৫৫. ‘‘কথঞ্চ, মাণৰ, ভিক্খু সতিসম্পজঞ্ঞেন সমন্নাগতো হোতি? ইধ, মাণৰ, ভিক্খু অভিক্কন্তে পটিক্কন্তে সম্পজানকারী হোতি, আলোকিতে ৰিলোকিতে সম্পজানকারী হোতি, সমিঞ্জিতে পসারিতে সম্পজানকারী হোতি, সঙ্ঘাটিপত্তচীৰরধারণে সম্পজানকারী হোতি, অসিতে পীতে খাযিতে সাযিতে সম্পজানকারী হোতি, উচ্চারপস্সাৰকম্মে সম্পজানকারী হোতি, গতে ঠিতে নিসিন্নে সুত্তে জাগরিতে ভাসিতে তুণ্হীভাৰে সম্পজানকারী হোতি। এৰং খো, মাণৰ, ভিক্খু সতিসম্পজঞ্ঞেন সমন্নাগতো হোতি। ৪৫৬. ‘‘কথঞ্চ, মাণৰ, ভিক্খু সন্তুট্ঠো হোতি? ইধ, মাণৰ, ভিক্খু সন্তুট্ঠো হোতি কাযপরিহারিকেন চীৰরেন কুচ্ছিপরিহারিকেন পিণ্ডপাতেন। সো যেন যেনেৰ পক্কমতি, সমাদাযেৰ পক্কমতি। সেয্যথাপি, মাণৰ, পক্খী সকুণো যেন যেনেৰ ডেতি, সপত্তভারোৰ ডেতি ; এৰমেৰ খো, মাণৰ, ভিক্খু সন্তুট্ঠো হোতি কাযপরিহারিকেন চীৰরেন কুচ্ছিপরিহারিকেন পিণ্ডপাতেন। সো যেন যেনেৰ পক্কমতি, সমাদাযেৰ পক্কমতি। এৰং খো, মাণৰ, ভিক্খু সন্তুট্ঠো হোতি। ৪৫৭. ‘‘সো ইমিনা চ অরিযেন সীলক্খন্ধেন সমন্নাগতো, ইমিনা চ অরিযেন ইন্দ্রিযসংৰরেন সমন্নাগতো, ইমিনা চ অরিযেন সতিসম্পজঞ্ঞেন সমন্নাগতো, ইমায চ অরিযায সন্তুট্ঠিযা সমন্নাগতো ৰিৰিত্তং সেনাসনং ভজতি অরঞ্ঞং রুক্খমূলং পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জং। সো পচ্ছাভত্তং পিণ্ডপাতপ্পটিক্কন্তো নিসীদতি পল্লঙ্কং আভুজিত্ৰা, উজুং কাযং পণিধায, পরিমুখং সতিং উপট্ঠপেত্ৰা। ৪৫৮. ‘‘সো অভিজ্ঝং লোকে পহায ৰিগতাভিজ্ঝেন চেতসা ৰিহরতি অভিজ্ঝায চিত্তং পরিসোধেতি। ব্যাপাদপদোসং পহায অব্যাপন্নচিত্তো ৰিহরতি সব্বপাণভূতহিতানুকম্পী ব্যাপাদপদোসা চিত্তং পরিসোধেতি। থিনমিদ্ধং পহায ৰিগতথিনমিদ্ধো ৰিহরতি আলোকসঞ্ঞী সতো সম্পজানো, থিনমিদ্ধা চিত্তং পরিসোধেতি। উদ্ধচ্চকুক্কুচ্চং পহায অনুদ্ধতো ৰিহরতি অজ্ঝত্তং ৰূপসন্তচিত্তো উদ্ধচ্চকুক্কুচ্চা চিত্তং পরিসোধেতি। ৰিচিকিচ্ছং পহায তিণ্ণৰিচিকিচ্ছো ৰিহরতি অকথংকথী কুসলেসু ধম্মেসু, ৰিচিকিচ্ছায চিত্তং পরিসোধেতি। ৪৫৯. ‘‘সেয্যথাপি, মাণৰ, পুরিসো ইণং আদায কম্মন্তে পযোজেয্য। তস্স তে কম্মন্তা সমিজ্ঝেয্যুং। সো যানি চ পোরাণানি ইণমূলানি তানি চ ব্যন্তিং করেয্য, সিযা চস্স উত্তরিং অৰসিট্ঠং দারভরণায। তস্স এৰমস্স – ‘অহং খো পুব্বে ইণং আদায কম্মন্তে পযোজেসিং । তস্স মে তে কম্মন্তা সমিজ্ঝিংসু। সোহং যানি চ পোরাণানি ইণমূলানি তানি চ ব্যন্তিং অকাসিং, অত্থি চ মে উত্তরিং অৰসিট্ঠং দারভরণাযা’তি। সো ততোনিদানং লভেথ পামোজ্জং, অধিগচ্ছেয্য সোমনস্সং। ৪৬০. ‘‘সেয্যথাপি, মাণৰ, পুরিসো আবাধিকো অস্স দুক্খিতো বাল়্হগিলানো; ভত্তঞ্চস্স নচ্ছাদেয্য, ন চস্স কাযে বলমত্তা। সো অপরেন সমযেন তম্হা আবাধা মুচ্চেয্য, ভত্তঞ্চস্স ছাদেয্য, সিযা চস্স কাযে বলমত্তা। তস্স এৰমস্স – ‘অহং খো পুব্বে আবাধিকো অহোসিং দুক্খিতো বাল়্হগিলানো, ভত্তঞ্চ মে নচ্ছাদেসি, ন চ মে আসি কাযে বলমত্তা। সোম্হি এতরহি তম্হা আবাধা মুত্তো ভত্তঞ্চ মে ছাদেতি, অত্থি চ মে কাযে বলমত্তা’তি। সো ততোনিদানং লভেথ পামোজ্জং, অধিগচ্ছেয্য সোমনস্সং। ৪৬১. ‘‘সেয্যথাপি, মাণৰ, পুরিসো বন্ধনাগারে বদ্ধো অস্স। সো অপরেন সমযেন তম্হা বন্ধনাগারা মুচ্চেয্য সোত্থিনা অব্ভযেন, ন চস্স কিঞ্চি ভোগানং ৰযো। তস্স এৰমস্স – ‘অহং খো পুব্বে বন্ধনাগারে বদ্ধো অহোসিং। সোম্হি এতরহি তম্হা বন্ধনাগারা মুত্তো সোত্থিনা অব্ভযেন, নত্থি চ মে কিঞ্চি ভোগানং ৰযো’তি। সো ততোনিদানং লভেথ পামোজ্জং, অধিগচ্ছেয্য সোমনস্সং। ৪৬২. ‘‘সেয্যথাপি, মাণৰ, পুরিসো দাসো অস্স অনত্তাধীনো পরাধীনো ন যেনকামংগমো। সো অপরেন সমযেন তম্হা দাসব্যা মুচ্চেয্য, অত্তাধীনো অপরাধীনো ভুজিস্সো যেনকামংগমো। তস্স এৰমস্স – ‘অহং খো পুব্বে দাসো অহোসিং অনত্তাধীনো পরাধীনো ন যেনকামংগমো। সোম্হি এতরহি তম্হা দাসব্যা মুত্তো অত্তাধীনো অপরাধীনো ভুজিস্সো যেনকামংগমো’তি। সো ততোনিদানং লভেথ পামোজ্জং, অধিগচ্ছেয্য সোমনস্সং। ৪৬৩. ‘‘সেয্যথাপি, মাণৰ, পুরিসো সধনো সভোগো কন্তারদ্ধানমগ্গং পটিপজ্জেয্য দুব্ভিক্খং সপ্পটিভযং। সো অপরেন সমযেন তং কন্তারং নিত্থরেয্য, সোত্থিনা গামন্তং অনুপাপুণেয্য খেমং অপ্পটিভযং। তস্স এৰমস্স – ‘অহং খো পুব্বে সধনো সভোগো কন্তারদ্ধানমগ্গং পটিপজ্জিং দুব্ভিক্খং সপ্পটিভযং। সোম্হি এতরহি কন্তারং নিত্থিণ্ণো, সোত্থিনা গামন্তং অনুপ্পত্তো খেমং অপ্পটিভয’ন্তি। সো ততোনিদানং লভেথ পামোজ্জং, অধিগচ্ছেয্য সোমনস্সং। ৪৬৪. ‘‘এৰমেৰ খো, মাণৰ, ভিক্খু যথা ইণং যথা রোগং যথা বন্ধনাগারং যথা দাসব্যং যথা কন্তারদ্ধানমগ্গং, এৰং ইমে পঞ্চ নীৰরণে অপ্পহীনে অত্তনি সমনুপস্সতি। ৪৬৫. ‘‘সেয্যথাপি, মাণৰ, যথা আণণ্যং যথা আরোগ্যং যথা বন্ধনামোক্খং যথা ভুজিস্সং যথা খেমন্তভূমিং। এৰমেৰ ভিক্খু ইমে পঞ্চ নীৰরণে পহীনে অত্তনি সমনুপস্সতি। ৪৬৬. ‘‘তস্সিমে পঞ্চ নীৰরণে পহীনে অত্তনি সমনুপস্সতো পামোজ্জং জাযতি, পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৰেদেতি, সুখিনো চিত্তং সমাধিযতি। ৪৬৭. ‘‘সো ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি। সো ইমমেৰ কাযং ৰিৰেকজেন পীতিসুখেন অভিসন্দেতি পরিসন্দেতি পরিপূরেতি পরিপ্ফরতি, নাস্স কিঞ্চি সব্বাৰতো কাযস্স ৰিৰেকজেন পীতিসুখেন অপ্ফুটং হোতি। ‘‘সেয্যথাপি, মাণৰ, দক্খো ন্হাপকো ৰা ন্হাপকন্তেৰাসী ৰা কংসথালে ন্হানীযচুণ্ণানি আকিরিত্ৰা উদকেন পরিপ্ফোসকং পরিপ্ফোসকং সন্দেয্য। সাযং ন্হানীযপিণ্ডি স্নেহানুগতা স্নেহপরেতা সন্তরবাহিরা ফুটা স্নেহেন, ন চ পগ্ঘরণী। এৰমেৰ খো, মাণৰ, ভিক্খু ইমমেৰ কাযং ৰিৰেকজেন পীতিসুখেন অভিসন্দেতি পরিসন্দেতি পরিপূরেতি পরিপ্ফরতি, নাস্স কিঞ্চি সব্বাৰতো কাযস্স ৰিৰেকজেন পীতিসুখেন অপ্ফুটং হোতি। যম্পি, মাণৰ, ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি। সো ইমমেৰ কাযং ৰিৰেকজেন পীতিসুখেন অভিসন্দেতি পরিসন্দেতি পরিপূরেতি পরিপ্ফরতি, নাস্স কিঞ্চি সব্বাৰতো কাযস্স ৰিৰেকজেন পীতিসুখেন অপ্ফুটং হোতি। ইদম্পিস্স হোতি সমাধিস্মিং। ৪৬৮. ‘‘পুন চপরং, মাণৰ, ভিক্খু ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি। সো ইমমেৰ কাযং সমাধিজেন পীতিসুখেন অভিসন্দেতি পরিসন্দেতি পরিপূরেতি পরিপ্ফরতি, নাস্স কিঞ্চি সব্বাৰতো কাযস্স সমাধিজেন পীতিসুখেন অপ্ফুটং হোতি। ‘‘সেয্যথাপি , মাণৰ, উদকরহদো গম্ভীরো উব্ভিদোদকো। তস্স নেৰস্স পুরত্থিমায দিসায উদকস্স আযমুখং, ন দক্খিণায দিসায উদকস্স আযমুখং, ন পচ্ছিমায দিসায উদকস্স আযমুখং, ন উত্তরায দিসায উদকস্স আযমুখং, দেৰো চ ন কালেন কালং সম্মা ধারং অনুপৰেচ্ছেয্য। অথ খো তম্হাৰ উদকরহদা সীতা ৰারিধারা উব্ভিজ্জিত্ৰা তমেৰ উদকরহদং সীতেন ৰারিনা অভিসন্দেয্য পরিসন্দেয্য পরিপূরেয্য পরিপ্ফরেয্য, নাস্স কিঞ্চি সব্বাৰতো উদকরহদস্স সীতেন ৰারিনা অপ্ফুটং অস্স। এৰমেৰ খো, মাণৰ, ভিক্খু…পে॰… যম্পি, মাণৰ, ভিক্খু ৰিতক্কৰিচারানং ৰূপসমা… পে॰… দুতিযং ঝানং উপসম্পজ্জ ৰিহরতি, সো ইমমেৰ কাযং সমাধিজেন পীতিসুখেন অভিসন্দেতি পরিসন্দেতি পরিপূরেতি পরিপ্ফরতি, নাস্স কিঞ্চি সব্বাৰতো কাযস্স সমাধিজেন পীতিসুখেন অপ্ফুটং হোতি। ইদম্পিস্স হোতি সমাধিস্মিং। ৪৬৯. ‘‘পুন চপরং, মাণৰ, ভিক্খু পীতিযা চ ৰিরাগা উপেক্খকো চ ৰিহরতি সতো সম্পজানো , সুখঞ্চ কাযেন পটিসংৰেদেতি, যং তং অরিযা আচিক্খন্তি – ‘‘উপেক্খকো সতিমা সুখৰিহারী’’তি, ততিযং ঝানং উপসম্পজ্জ ৰিহরতি। সো ইমমেৰ কাযং নিপ্পীতিকেন সুখেন অভিসন্দেতি পরিসন্দেতি পরিপূরেতি পরিপ্ফরতি, নাস্স কিঞ্চি সব্বাৰতো কাযস্স নিপ্পীতিকেন সুখেন অপ্ফুটং হোতি। ‘‘সেয্যথাপি, মাণৰ, উপ্পলিনিযং ৰা পদুমিনিযং ৰা পুণ্ডরীকিনিযং ৰা অপ্পেকচ্চানি উপ্পলানি ৰা পদুমানি ৰা পুণ্ডরীকানি ৰা উদকে জাতানি উদকে সংৰড্ঢানি উদকানুগ্গতানি অন্তোনিমুগ্গপোসীনি, তানি যাৰ চগ্গা যাৰ চ মূলা সীতেন ৰারিনা অভিসন্নানি পরিসন্নানি পরিপূরানি পরিপ্ফুটানি, নাস্স কিঞ্চি সব্বাৰতং উপ্পলানং ৰা পদুমানং ৰা পুণ্ডরীকানং ৰা সীতেন ৰারিনা অপ্ফুটং অস্স। এৰমেৰ খো, মাণৰ, ভিক্খু…পে॰… যম্পি, মাণৰ, ভিক্খু পীতিযা চ ৰিরাগা…পে॰… ততিযং ঝানং উপসম্পজ্জ ৰিহরতি। সো ইমমেৰ কাযং নিপ্পীতিকেন সুখেন অভিসন্দেতি পরিসন্দেতি পরিপূরেতি পরিপ্ফরতি, নাস্স কিঞ্চি সব্বাৰতো কাযস্স নিপ্পীতিকেন সুখেন অপ্ফুটং হোতি। ইদম্পিস্স হোতি সমাধিস্মিং। ৪৭০. ‘‘পুন চপরং, মাণৰ, ভিক্খু সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি। সো ইমমেৰ কাযং পরিসুদ্ধেন চেতসা পরিযোদাতেন ফরিত্ৰা নিসিন্নো হোতি; নাস্স কিঞ্চি সব্বাৰতো কাযস্স পরিসুদ্ধেন চেতসা পরিযোদাতেন অপ্ফুটং হোতি। ‘‘সেয্যথাপি, মাণৰ, পুরিসো ওদাতেন ৰত্থেন সসীসং পারুপিত্ৰা নিসিন্নো অস্স, নাস্স কিঞ্চি সব্বাৰতো কাযস্স ওদাতেন ৰত্থেন অপ্ফুটং অস্স। এৰমেৰ খো, মাণৰ, ভিক্খু…পে॰… যম্পি, মাণৰ, ভিক্খু সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি। সো ইমমেৰ কাযং পরিসুদ্ধেন চেতসা পরিযোদাতেন ফরিত্ৰা নিসিন্নো হোতি; নাস্স কিঞ্চি সব্বাৰতো কাযস্স পরিসুদ্ধেন চেতসা পরিযোদাতেন অপ্ফুটং হোতি। ইদম্পিস্স হোতি সমাধিস্মিং। ৪৭১. ‘‘অযং খো সো, মাণৰ, অরিযো সমাধিক্খন্ধো যস্স সো ভগৰা ৰণ্ণৰাদী অহোসি , যত্থ চ ইমং জনতং সমাদপেসি নিৰেসেসি পতিট্ঠাপেসি। অত্থি চেৰেত্থ উত্তরিকরণীয’’ন্তি। ‘‘অচ্ছরিযং, ভো আনন্দ, অব্ভুতং, ভো আনন্দ! সো চাযং, ভো আনন্দ, অরিযো সমাধিক্খন্ধো পরিপুণ্ণো, নো অপরিপুণ্ণো। এৰং পরিপুণ্ণং চাহং, ভো আনন্দ, অরিযং সমাধিক্খন্ধং ইতো বহিদ্ধা অঞ্ঞেসু সমণব্রাহ্মণেসু ন সমনুপস্সামি। এৰং পরিপুণ্ণঞ্চ, ভো আনন্দ, অরিযং সমাধিক্খন্ধং ইতো বহিদ্ধা অঞ্ঞে সমণব্রাহ্মণা অত্তনি সমনুপস্সেয্যুং, তে তাৰতকেনেৰ অত্তমনা অস্সু – ‘অলমেত্তাৰতা, কতমেত্তাৰতা, অনুপ্পত্তো নো সামঞ্ঞত্থো, নত্থি নো কিঞ্চি উত্তরিকরণীয’ন্তি। অথ চ পন ভৰং আনন্দো এৰমাহ – ‘অত্থি চেৰেত্থ উত্তরিকরণীয’’’ন্তি। পঞ্ঞাক্খন্ধো ৪৭২. ‘‘কতমো পন সো, ভো আনন্দ, অরিযো পঞ্ঞাক্খন্ধো, যস্স ভো ভৰং গোতমো ৰণ্ণৰাদী অহোসি, যত্থ চ ইমং জনতং সমাদপেসি নিৰেসেসি পতিট্ঠাপেসী’’তি? ‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে ঞাণদস্সনায চিত্তং অভিনীহরতি অভিনিন্নামেতি। সো এৰং পজানাতি – ‘অযং খো মে কাযো রূপী চাতুমহাভূতিকো মাতাপেত্তিকসম্ভৰো ওদনকুম্মাসূপচযো অনিচ্চুচ্ছাদনপরিমদ্দনভেদনৰিদ্ধংসনধম্মো; ইদঞ্চ পন মে ৰিঞ্ঞাণং এত্থ সিতং এত্থ পটিবদ্ধ’ন্তি। ‘‘সেয্যথাপি, মাণৰ, মণি ৰেল়ুরিযো সুভো জাতিমা অট্ঠংসো সুপরিকম্মকতো অচ্ছো ৰিপ্পসন্নো অনাৰিলো সব্বাকারসম্পন্নো। তত্রাস্স সুত্তং আৰুতং নীলং ৰা পীতং ৰা লোহিতং ৰা ওদাতং ৰা পণ্ডুসুত্তং ৰা। তমেনং চক্খুমা পুরিসো হত্থে করিত্ৰা পচ্চৰেক্খেয্য – ‘অযং খো মণি ৰেল়ুরিযো সুভো জাতিমা অট্ঠংসো সুপরিকম্মকতো অচ্ছো ৰিপ্পসন্নো অনাৰিলো সব্বাকারসম্পন্নো। তত্রিদং সুত্তং আৰুতং নীলং ৰা পীতং ৰা লোহিতং ৰা ওদাতং ৰা পণ্ডুসুত্তং ৰা’তি। এৰমেৰ খো, মাণৰ, ভিক্খু এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে ঞাণদস্সনায চিত্তং অভিনীহরতি অভিনিন্নামেতি। সো এৰং পজানাতি – ‘অযং খো মে কাযো রূপী চাতুমহাভূতিকো মাতাপেত্তিকসম্ভৰো ওদনকুম্মাসূপচযো অনিচ্চুচ্ছাদনপরিমদ্দনভেদন-ৰিদ্ধংসনধম্মো। ইদঞ্চ পন মে ৰিঞ্ঞাণং এত্থ সিতং এত্থ পটিবদ্ধ’ন্তি। যম্পি, মাণৰ, ভিক্খু এৰং সমাহিতে চিত্তে…পে॰… আনেঞ্জপ্পত্তে ঞাণদস্সনায চিত্তং অভিনীহরতি অভিনিন্নামেতি। সো এৰং পজানাতি…পে॰… এত্থ পটিবদ্ধন্তি। ইদম্পিস্স হোতি পঞ্ঞায। ৪৭৩. ‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে মনোমযং কাযং অভিনিম্মানায চিত্তং অভিনীহরতি অভিনিন্নামেতি। সো ইমম্হা কাযা অঞ্ঞং কাযং অভিনিম্মিনাতি রূপিং মনোমযং সব্বঙ্গপচ্চঙ্গিং অহীনিন্দ্রিযং। ‘‘সেয্যথাপি , মাণৰ, পুরিসো মুঞ্জম্হা ঈসিকং পৰাহেয্য। তস্স এৰমস্স – ‘অযং মুঞ্জো অযং ঈসিকা; অঞ্ঞো মুঞ্জো অঞ্ঞা ঈসিকা; মুঞ্জম্হা ত্ৰেৰ ঈসিকা পৰাল়্হা’তি। সেয্যথা ৰা পন, মাণৰ, পুরিসো অসিং কোসিযা পৰাহেয্য। তস্স এৰমস্স – ‘অযং অসি, অযং কোসি; অঞ্ঞো অসি, অঞ্ঞা কোসি; কোসিযা ত্ৰেৰ অসি পৰাল়্হো’তি। সেয্যথা ৰা পন, মাণৰ, পুরিসো অহিং করণ্ডা উদ্ধরেয্য। তস্স এৰমস্স – ‘অযং অহি, অযং করণ্ডো; অঞ্ঞো অহি, অঞ্ঞো করণ্ডো; করণ্ডা ত্ৰেৰ অহি উব্ভতো’তি । এৰমেৰ খো, মাণৰ, ভিক্খু…পে॰… যম্পি, মাণৰ, ভিক্খু এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে মনোমযং কাযং অভিনিম্মানায চিত্তং অভিনীহরতি অভিনিন্নামেতি…পে॰…। ইদম্পিস্স হোতি পঞ্ঞায। ৪৭৪. ‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে ইদ্ধিৰিধায চিত্তং অভিনীহরতি অভিনিন্নামেতি। সো অনেকৰিহিতং ইদ্ধিৰিধং পচ্চনুভোতি। একোপি হুত্ৰা বহুধা হোতি, বহুধাপি হুত্ৰা একো হোতি। আৰিভাৰং তিরোভাৰং তিরোকুট্টং তিরোপাকারং তিরোপব্বতং অসজ্জমানো গচ্ছতি সেয্যথাপি আকাসে। পথৰিযাপি উম্মুজ্জনিমুজ্জং করোতি, সেয্যথাপি উদকে। উদকেপি অভিজ্জমানে গচ্ছতি সেয্যথাপি পথৰিযং। আকাসেপি পল্লঙ্কেন কমতি সেয্যথাপি পক্খী সকুণো। ইমেপি চন্দিমসূরিযে এৰং মহিদ্ধিকে এৰং মহানুভাৰে পাণিনা পরামসতি পরিমজ্জতি। যাৰ ব্রহ্মলোকাপি কাযেন ৰসং ৰত্তেতি। ‘‘সেয্যথাপি , মাণৰ, দক্খো কুম্ভকারো ৰা কুম্ভকারন্তেৰাসী ৰা সুপরিকম্মকতায মত্তিকায যঞ্ঞদেৰ ভাজনৰিকতিং আকঙ্খেয্য, তং তদেৰ করেয্য অভিনিপ্ফাদেয্য। সেয্যথা ৰা পন, মাণৰ, দক্খো দন্তকারো ৰা দন্তকারন্তেৰাসী ৰা সুপরিকম্মকতস্মিং দন্তস্মিং যঞ্ঞদেৰ দন্তৰিকতিং আকঙ্খেয্য, তং তদেৰ করেয্য অভিনিপ্ফাদেয্য। সেয্যথা ৰা পন, মাণৰ, দক্খো সুৰণ্ণকারো ৰা সুৰণ্ণকারন্তেৰাসী ৰা সুপরিকম্মকতস্মিং সুৰণ্ণস্মিং যঞ্ঞদেৰ সুৰণ্ণৰিকতিং আকঙ্খেয্য, তং তদেৰ করেয্য অভিনিপ্ফাদেয্য। এৰমেৰ খো, মাণৰ, ভিক্খু …পে॰… যম্পি মাণৰ ভিক্খু এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে ইদ্ধিৰিধায চিত্তং অভিনীহরতি অভিনিন্নামেতি। সো অনেকৰিহিতং ইদ্ধিৰিধং পচ্চনুভোতি। একোপি হুত্ৰা বহুধা হোতি …পে॰… যাৰ ব্রহ্মলোকাপি কাযেন ৰসং ৰত্তেতি। ইদম্পিস্স হোতি পঞ্ঞায। ৪৭৫. ‘‘সো এৰং সমাহিতে চিত্তে…পে॰… আনেঞ্জপ্পত্তে দিব্বায সোতধাতুযা চিত্তং অভিনীহরতি অভিনিন্নামেতি। সো দিব্বায সোতধাতুযা ৰিসুদ্ধায অতিক্কন্তমানুসিকায উভো সদ্দে সুণাতি দিব্বে চ মানুসে চ যে দূরে সন্তিকে চ। সেয্যথাপি, মাণৰ, পুরিসো অদ্ধানমগ্গপ্পটিপন্নো। সো সুণেয্য ভেরিসদ্দম্পি মুদিঙ্গসদ্দম্পি সঙ্খপণৰদিন্দিমসদ্দম্পি। তস্স এৰমস্স – ‘ভেরিসদ্দো ইতিপি মুদিঙ্গসদ্দো ইতিপি সঙ্খপণৰদিন্দিমসদ্দো ইতি’পি [ইতিপীতি (ক॰)]। এৰমেৰ খো, মাণৰ, ভিক্খু…পে॰…। যম্পি মাণৰ, ভিক্খু এৰং সমাহিতে চিত্তে…পে॰… আনেঞ্জপ্পত্তে দিব্বায সোতধাতুযা চিত্তং অভিনীহরতি অভিনিন্নামেতি। সো দিব্বায সোতধাতুযা ৰিসুদ্ধায অতিক্কন্তমানুসিকায উভো সদ্দে সুণাতি দিব্বে চ মানুসে চ যে দূরে সন্তিকে চ। ইদম্পিস্স হোতি পঞ্ঞায। ৪৭৬. ‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে চেতোপরিযঞাণায চিত্তং অভিনীহরতি অভিনিন্নামেতি। সো পরসত্তানং পরপুগ্গলানং চেতসা চেতো পরিচ্চ পজানাতি, ‘সরাগং ৰা চিত্তং সরাগং চিত্ত’ন্তি পজানাতি, ‘ৰীতরাগং ৰা চিত্তং ৰীতরাগং চিত্ত’ন্তি পজানাতি, ‘সদোসং ৰা চিত্তং সদোসং চিত্ত’ন্তি পজানাতি, ‘ৰীতদোসং ৰা চিত্তং ৰীতদোসং চিত্ত’ন্তি পজানাতি, ‘সমোহং ৰা চিত্তং সমোহং চিত্ত’ন্তি পজানাতি, ‘ৰীতমোহং ৰা চিত্তং ৰীতমোহং চিত্ত’ন্তি পজানাতি, ‘সঙ্খিত্তং ৰা চিত্তং সঙ্খিত্তং চিত্ত’ন্তি পজানাতি, ‘ৰিক্খিত্তং ৰা চিত্তং ৰিক্খিত্তং চিত্ত’ন্তি পজানাতি, ‘মহগ্গতং ৰা চিত্তং মহগ্গতং চিত্ত’ন্তি পজানাতি, ‘অমহগ্গতং ৰা চিত্তং অমহগ্গতং চিত্ত’ন্তি পজানাতি, ‘সউত্তরং ৰা চিত্তং সউত্তরং চিত্ত’ন্তি পজানাতি, ‘অনুত্তরং ৰা চিত্তং অনুত্তরং চিত্ত’ন্তি পজানাতি, ‘সমাহিতং ৰা চিত্তং সমাহিতং চিত্ত’ন্তি পজানাতি, ‘অসমাহিতং ৰা চিত্তং অসমাহিতং চিত্ত’ন্তি পজানাতি, ‘ৰিমুত্তং ৰা চিত্তং ৰিমুত্তং চিত্ত’ন্তি পজানাতি, ‘অৰিমুত্তং ৰা চিত্তং অৰিমুত্তং চিত্ত’ন্তি পজানাতি। ‘‘সেয্যথাপি, মাণৰ, ইত্থী ৰা পুরিসো ৰা দহরো যুৰা মণ্ডনজাতিকো আদাসে ৰা পরিসুদ্ধে পরিযোদাতে অচ্ছে ৰা উদকপত্তে সকং মুখনিমিত্তং পচ্চৰেক্খমানো সকণিকং ৰা সকণিকন্তি জানেয্য, অকণিকং ৰা অকণিকন্তি জানেয্য। এৰমেৰ খো, মাণৰ, ভিক্খু…পে॰… যম্পি, মাণৰ, ভিক্খু এৰং সমাহিতে…পে॰… আনেঞ্জপ্পত্তে চেতোপরিযঞাণায চিত্তং অভিনীহরতি অভিনিন্নামেতি। সো পরসত্তানং পুরপুগ্গলানং চেতসা চেতো পরিচ্চ পজানাতি, সরাগং ৰা চিত্তং সরাগং চিত্তন্তি পজানাতি…পে॰… অৰিমুত্তং ৰা চিত্তং অৰিমুত্তং চিত্তন্তি পজানাতি। ইদম্পিস্স হোতি পঞ্ঞায। ৪৭৭. ‘‘সো এৰং সমাহিতে চিত্তে…পে॰… আনেঞ্জপ্পত্তে পুব্বেনিৰাসানুস্সতিঞাণায চিত্তং অভিনীহরতি অভিনিন্নামেতি। সো অনেকৰিহিতং পুব্বেনিৰাসং অনুস্সরতি। সেয্যথিদং, একম্পি জাতিং দ্ৰেপি জাতিযো তিস্সোপি জাতিযো চতস্সোপি জাতিযো পঞ্চপি জাতিযো দসপি জাতিযো ৰীসম্পি জাতিযো তিংসম্পি জাতিযো চত্তালীসম্পি জাতিযো পঞ্ঞাসম্পি জাতিযো জাতিসতম্পি জাতিসহস্সম্পি জাতিসতসহস্সম্পি অনেকেপি সংৰট্টকপ্পে অনেকেপি ৰিৰট্টকপ্পে অনেকেপি সংৰট্টৰিৰট্টকপ্পে – ‘অমুত্রাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো। সো ততো চুতো অমুত্র উদপাদিং; তত্রাপাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো; সো ততো চুতো ইধূপপন্নো’তি। ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি। ‘‘সেয্যথাপি, মাণৰ, পুরিসো সকম্হা গামা অঞ্ঞং গামং গচ্ছেয্য; তম্হাপি গামা অঞ্ঞং গামং গচ্ছেয্য; সো তম্হা গামা সকংযেৰ গামং পচ্চাগচ্ছেয্য । তস্স এৰমস্স – ‘অহং খো সকম্হা গামা অমুং গামং অগচ্ছিং, তত্র এৰং অট্ঠাসিং এৰং নিসীদিং এৰং অভাসিং এৰং তুণ্হী অহোসিং। সো তম্হাপি গামা অমুং গামং গচ্ছিং, তত্রাপি এৰং অট্ঠাসিং এৰং নিসীদিং এৰং অভাসিং এৰং তুণ্হী অহোসিং। সোম্হি তম্হা গামা সকংযেৰ গামং পচ্চাগতো’তি। এৰমেৰ খো, মাণৰ, ভিক্খু…পে॰… যম্পি, মাণৰ, ভিক্খু এৰং সমাহিতে চিত্তে…পে॰… আনেঞ্জপ্পত্তে পুব্বেনিৰাসানুস্সতিঞাণায চিত্তং অভিনীহরতি অভিনিন্নামেতি । সো অনেকৰিহিতং পুব্বেনিৰাসং অনুস্সরতি। সেয্যথিদং – একম্পি জাতিং…পে॰… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি। ইদম্পিস্স হোতি পঞ্ঞায। ৪৭৮. ‘‘সো এৰং সমাহিতে চিত্তে…পে॰… আনেঞ্জপ্পত্তে সত্তানং চুতূপপাতঞাণায চিত্তং অভিনীহরতি অভিনিন্নামেতি। সো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে, যথাকম্মূপগে সত্তে পজানাতি – ‘ইমে ৰত ভোন্তো সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা। তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না। ইমে ৰা পন ভোন্তো সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা। তে কাযস্স ভেদা পরং মরণা সুগতিং সগ্গং লোকং উপপন্না’তি। ইতি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে, যথাকম্মূপগে সত্তে পজানাতি। ‘‘সেয্যথাপি, মাণৰ, মজ্ঝেসিঙ্ঘাটকে পাসাদো, তত্থ চক্খুমা পুরিসো ঠিতো পস্সেয্য মনুস্সে গেহং পৰিসন্তেপি নিক্খমন্তেপি রথিকাযপি ৰীথিং সঞ্চরন্তে মজ্ঝেসিঙ্ঘাটকে নিসিন্নেপি। তস্স এৰমস্স – ‘এতে মনুস্সা গেহং পৰিসন্তি, এতে নিক্খমন্তি, এতে রথিকায ৰীথিং সঞ্চরন্তি, এতে মজ্ঝেসিঙ্ঘাটকে নিসিন্না’তি। এৰমেৰ খো, মাণৰ, ভিক্খু…পে॰… যম্পি, মাণৰ, ভিক্খু এৰং সমাহিতে চিত্তে…পে॰… আনেঞ্জপ্পত্তে সত্তানং চুতূপপাতঞাণায চিত্তং অভিনীহরতি অভিনিন্নামেতি। সো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে, যথাকম্মূপগে সত্তে পজানাতি। ইদম্পিস্স হোতি পঞ্ঞায। ৪৭৯. ‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে আসৰানং খযঞাণায চিত্তং অভিনীহরতি অভিনিন্নামেতি। সো ইদং দুক্খন্তি যথাভূতং পজানাতি, অযং দুক্খসমুদযোতি যথাভূতং পজানাতি, অযং দুক্খনিরোধোতি যথাভূতং পজানাতি, অযং দুক্খনিরোধগামিনী পটিপদাতি যথাভূতং পজানাতি; ইমে আসৰাতি যথাভূতং পজানাতি, অযং আসৰসমুদযোতি যথাভূতং পজানাতি, অযং আসৰনিরোধোতি যথাভূতং পজানাতি , অযং আসৰনিরোধগামিনী পটিপদাতি যথাভূতং পজানাতি। তস্স এৰং জানতো এৰং পস্সতো কামাসৰাপি চিত্তং ৰিমুচ্চতি, ভৰাসৰাপি চিত্তং ৰিমুচ্চতি, অৰিজ্জাসৰাপি চিত্তং ৰিমুচ্চতি, ৰিমুত্তস্মিং ৰিমুত্তমিতি ঞাণং হোতি। ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি। ‘‘সেয্যথাপি, মাণৰ, পব্বতসঙ্খেপে উদকরহদো অচ্ছো ৰিপ্পসন্নো অনাৰিলো। তত্থ চক্খুমা পুরিসো তীরে ঠিতো পস্সেয্য সিপ্পিকসম্বুকম্পি সক্খরকথলম্পি মচ্ছগুম্বম্পি চরন্তম্পি তিট্ঠন্তম্পি। তস্স এৰমস্স – ‘অযং খো উদকরহদো অচ্ছো ৰিপ্পসন্নো অনাৰিলো। তত্রিমে সিপ্পিকসম্বুকাপি সক্খরকথলাপি মচ্ছগুম্বাপি চরন্তিপি তিট্ঠন্তিপী’তি। এৰমেৰ খো, মাণৰ, ভিক্খু…পে॰… যম্পি, মাণৰ, ভিক্খু এৰং সমাহিতে চিত্তে…পে॰… আনেঞ্জপ্পত্তে আসৰানং খযঞাণায চিত্তং অভিনীহরতি অভিনিন্নামেতি। সো ইদং দুক্খন্তি যথাভূতং পজানাতি…পে॰… আসৰনিরোধগামিনী পটিপদাতি যথাভূতং পজানাতি। তস্স এৰং জানতো এৰং পস্সতো কামাসৰাপি চিত্তং ৰিমুচ্চতি, ভৰাসৰাপি চিত্তং ৰিমুচ্চতি, অৰিজ্জাসৰাপি চিত্তং ৰিমুচ্চতি, ৰিমুত্তস্মিং ৰিমুত্তমিতি ঞাণং হোতি, ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি । ইদম্পিস্স হোতি পঞ্ঞায। ৪৮০. ‘‘অযং খো, সো মাণৰ, অরিযো পঞ্ঞাক্খন্ধো যস্স সো ভগৰা ৰণ্ণৰাদী অহোসি, যত্থ চ ইমং জনতং সমাদপেসি নিৰেসেসি পতিট্ঠাপেসি। নত্থি চেৰেত্থ উত্তরিকরণীয’’ন্তি। ‘‘অচ্ছরিযং , ভো আনন্দ, অব্ভুতং, ভো আনন্দ! সো চাযং, ভো আনন্দ, অরিযো পঞ্ঞাক্খন্ধো পরিপুণ্ণো, নো অপরিপুণ্ণো। এৰং পরিপুণ্ণং চাহং, ভো আনন্দ, অরিযং পঞ্ঞাক্খন্ধং ইতো বহিদ্ধা অঞ্ঞেসু সমণব্রাহ্মণেসু ন সমনুপস্সামি। নত্থি চেৰেত্থ [ন সমনুপস্সামি…পে॰… নত্থি নো কিঞ্চি (স্যা॰ ক॰)] উত্তরিকরণীযং [উত্তরিং করণীযন্তি (সী॰ স্যা॰ পী॰) উত্তরিকরণীযন্তি (ক॰)]। অভিক্কন্তং, ভো আনন্দ, অভিক্কন্তং, ভো আনন্দ! সেয্যথাপি, ভো আনন্দ, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য ‘চক্খুমন্তো রূপানি দক্খন্তী’তি। এৰমেৰং ভোতা আনন্দেন অনেকপরিযাযেন ধম্মো পকাসিতো। এসাহং, ভো আনন্দ, তং ভৰন্তং গোতমং সরণং গচ্ছামি ধম্মঞ্চ ভিক্খুসঙ্ঘঞ্চ। উপাসকং মং ভৰং আনন্দো ধারেতু অজ্জতগ্গে পাণুপেতং সরণং গত’’ন্তি। সুভসুত্তং নিট্ঠিতং দসমং। |