৭. সেখিযকণ্ডং
১. পরিমণ্ডলৰগ্গো ইমে খো পনাযস্মন্তো সেখিযা ধম্মা উদ্দেসং আগচ্ছন্তি। ৫৭৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ পুরতোপি পচ্ছতোপি ওলম্বেন্তা নিৰাসেন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা পুরতোপি পচ্ছতোপি ওলম্বেন্তা নিৰাসেস্সন্তি, সেয্যথাপি গিহী কামভোগিনো’’তি। অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ পুরতোপি পচ্ছতোপি ওলম্বেন্তা নিৰাসেস্সন্তী’’তি! অথ খো তে ভিক্খূ ছব্বগ্গিযে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ছব্বগ্গিযে ভিক্খূ পটিপুচ্ছি – ‘‘সচ্চং কির তুম্হে, ভিক্খৰে, পুরতোপি পচ্ছতোপি ওলম্বেন্তা নিৰাসেথা’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, পুরতোপি পচ্ছতোপি ওলম্বেন্তা নিৰাসেস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘পরিমণ্ডলং নিৰাসেস্সামীতি সিক্খা করণীযা’’তি। পরিমণ্ডলং নিৰাসেতব্বং নাভিমণ্ডলং জাণুমণ্ডলং পটিচ্ছাদেন্তেন। যো অনাদরিযং পটিচ্চ পুরতো ৰা পচ্ছতো ৰা ওলম্বেন্তো নিৰাসেতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স, আদিকম্মিকস্সাতি। পঠমসিক্খাপদং নিট্ঠিতং। ৫৭৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ পুরতোপি পচ্ছতোপি ওলম্বেন্তা পারুপন্তি…পে॰…। ‘‘পরিমণ্ডলং পারুপিস্সামীতি সিক্খা করণীযা’’তি। পরিমণ্ডলং পারুপিতব্বং উভো কণ্ণে সমং কত্ৰা। যো অনাদরিযং পটিচ্চ পুরতো ৰা পচ্ছতো ৰা ওলম্বেন্তো পারুপতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স, আদিকম্মিকস্সাতি। দুতিযসিক্খাপদং নিট্ঠিতং। ৫৭৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ কাযং ৰিৰরিত্ৰা অন্তরঘরে গচ্ছন্তি…পে॰…। ‘‘সুপ্পটিচ্ছন্নো অন্তরঘরে গমিস্সামীতি সিক্খা করণীযা’’তি। সুপ্পটিচ্ছন্নেন অন্তরঘরে গন্তব্বং। যো অনাদরিযং পটিচ্চ কাযং ৰিৰরিত্ৰা অন্তরঘরে গচ্ছতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স, আদিকম্মিকস্সাতি। ততিযসিক্খাপদং নিট্ঠিতং। ৫৭৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ কাযং ৰিৰরিত্ৰা অন্তরঘরে নিসীদন্তি…পে॰…। ‘‘সুপ্পটিচ্ছন্নো অন্তরঘরে নিসীদিস্সামীতি সিক্খা করণীযা’’তি। সুপ্পটিচ্ছন্নেন অন্তরঘরে নিসীদিতব্বং। যো অনাদরিযং পটিচ্চ কাযং ৰিৰরিত্ৰা অন্তরঘরে নিসীদতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৰাসূপগতস্স, আপদাসু, উম্মত্তকস্স, আদিকম্মিকস্সাতি। চতুত্থসিক্খাপদং নিট্ঠিতং। ৫৮০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ হত্থম্পি পাদম্পি কীল়াপেন্তা অন্তরঘরে গচ্ছন্তি…পে॰…। ‘‘সুসংৰুতো অন্তরঘরে গমিস্সামীতি সিক্খা করণীযা’’তি। সুসংৰুতেন অন্তরঘরে গন্তব্বং। যো অনাদরিযং পটিচ্চ হত্থং ৰা পাদং ৰা কীল়াপেন্তো অন্তরঘরে গচ্ছতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, উম্মত্তকস্স, আদিকম্মিকস্সাতি। পঞ্চমসিক্খাপদং নিট্ঠিতং। ৫৮১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ হত্থম্পি পাদম্পি কীল়াপেন্তা অন্তরঘরে নিসীদন্তি…পে॰…। ‘‘সুসংৰুতো অন্তরঘরে নিসীদিস্সামীতি সিক্খা করণীযা’’তি। সুসংৰুতেন অন্তরঘরে নিসীদিতব্বং। যো অনাদরিযং পটিচ্চ হত্থং ৰা পাদং ৰা কীল়াপেন্তো অন্তরঘরে নিসীদতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, উম্মত্তকস্স, আদিকম্মিকস্সাতি। ছট্ঠসিক্খাপদং নিট্ঠিতং। ৫৮২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ তহং তহং ওলোকেন্তা অন্তরঘরে গচ্ছন্তি…পে॰…। ‘‘ওক্খিত্তচক্খু অন্তরঘরে গমিস্সামীতি সিক্খা করণীযা’’তি। ওক্খিত্তচক্খুনা অন্তরঘরে গন্তব্বং যুগমত্তং পেক্খন্তেন। যো অনাদরিযং পটিচ্চ তহং তহং ওলোকেন্তো অন্তরঘরে গচ্ছতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স, আদিকম্মিকস্সাতি। সত্তমসিক্খাপদং নিট্ঠিতং। ৫৮৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ তহং তহং ওলোকেন্তা অন্তরঘরে নিসীদন্তি…পে॰…। ‘‘ওক্খিত্তচক্খু অন্তরঘরে নিসীদিস্সামীতি সিক্খা করণীযা’’তি। ওক্খিত্তচক্খুনা অন্তরঘরে নিসীদিতব্বং যুগমত্তং পেক্খন্তেন। যো অনাদরিযং পটিচ্চ তহং তহং ওলোকেন্তো অন্তরঘরে নিসীদতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স, আদিকম্মিকস্সাতি। অট্ঠমসিক্খাপদং নিট্ঠিতং। ৫৮৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ উক্খিত্তকায অন্তরঘরে গচ্ছন্তি…পে॰…। ‘‘ন উক্খিত্তকায অন্তরঘরে গমিস্সামীতি সিক্খা করণীযা’’তি। ন উক্খিত্তকায অন্তরঘরে গন্তব্বং। যো অনাদরিযং পটিচ্চ একতো ৰা উভতো ৰা উক্খিপিত্ৰা অন্তরঘরে গচ্ছতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স, আদিকম্মিকস্সাতি। নৰমসিক্খাপদং নিট্ঠিতং। ৫৮৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ উক্খিত্তকায অন্তরঘরে নিসীদন্তি…পে॰…। ‘‘ন উক্খিত্তকায অন্তরঘরে নিসীদিস্সামীতি সিক্খা করণীযা’’তি। ন উক্খিত্তকায অন্তরঘরে নিসীদিতব্বং। যো অনাদরিযং পটিচ্চ একতো ৰা উভতো ৰা উক্খিপিত্ৰা অন্তরঘরে নিসীদতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৰাসূপগতস্স, আপদাসু, উম্মত্তকস্স, আদিকম্মিকস্সাতি। দসমসিক্খাপদং নিট্ঠিতং। পরিমণ্ডলৰগ্গো পঠমো। ২. উজ্জগ্ঘিকৰগ্গো ৫৮৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ মহাহসিতং হসন্তা অন্তরঘরে গচ্ছন্তি…পে॰…। ‘‘ন উজ্জগ্ঘিকায অন্তরঘরে গমিস্সামীতি সিক্খা করণীযা’’তি। ন উজ্জগ্ঘিকায অন্তরঘরে গন্তব্বং। যো অনাদরিযং পটিচ্চ মহাহসিতং হসন্তো অন্তরঘরে গচ্ছতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, হসনীযস্মিং ৰত্থুস্মিং মিহিতমত্তং করোতি, আপদাসু, উম্মত্তকস্স, আদিকম্মিকস্সাতি। পঠমসিক্খাপদং নিট্ঠিতং। ৫৮৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ মহাহসিতং হসন্তা অন্তরঘরে নিসীদন্তি…পে॰…। ‘‘ন উজ্জগ্ঘিকায অন্তরঘরে নিসীদিস্সামীতি সিক্খা করণীযা’’তি। ন উজ্জগ্ঘিকায অন্তরঘরে নিসীদিতব্বং। যো অনাদরিযং পটিচ্চ মহাহসিতং হসন্তো অন্তরঘরে নিসীদতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, হসনীযস্মিং ৰত্থুস্মিং মিহিতমত্তং করোতি, আপদাসু, উম্মত্তকস্স, আদিকম্মিকস্সাতি। দুতিযসিক্খাপদং নিট্ঠিতং। ৫৮৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ উচ্চাসদ্দং মহাসদ্দং করোন্তা অন্তরঘরে গচ্ছন্তি…পে॰…। ‘‘অপ্পসদ্দো অন্তরঘরে গমিস্সামীতি সিক্খা করণীযা’’তি। অপ্পসদ্দেন অন্তরঘরে গন্তব্বং। যো অনাদরিযং পটিচ্চ উচ্চাসদ্দং মহাসদ্দং করোন্তো অন্তরঘরে গচ্ছতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স, আদিকম্মিকস্সাতি। ততিযসিক্খাপদং নিট্ঠিতং। ৫৮৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ উচ্চাসদ্দং মহাসদ্দং করোন্তা অন্তরঘরে নিসীদন্তি…পে॰…। ‘‘অপ্পসদ্দো অন্তরঘরে নিসীদিস্সামীতি সিক্খা করণীযা’’তি। অপ্পসদ্দেন অন্তরঘরে নিসীদিতব্বং। যো অনাদরিযং পটিচ্চ উচ্চাসদ্দং মহাসদ্দং করোন্তো অন্তরঘরে নিসীদতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। চতুত্থসিক্খাপদং নিট্ঠিতং। ৫৯০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ কাযপ্পচালকং অন্তরঘরে গচ্ছন্তি কাযং ওলম্বেন্তা…পে॰…। ‘‘ন কাযপ্পচালকং অন্তরঘরে গমিস্সামীতি সিক্খা করণীযা’’তি। ন কাযপ্পচালকং অন্তরঘরে গন্তব্বং। কাযং পগ্গহেত্ৰা গন্তব্বং । যো অনাদরিযং পটিচ্চ কাযপ্পচালকং অন্তরঘরে গচ্ছতি কাযং ওলম্বেন্তো, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। পঞ্চমসিক্খাপদং নিট্ঠিতং। ৫৯১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ কাযপ্পচালকং অন্তরঘরে নিসীদন্তি, কাযং ওলম্বেন্তা…পে॰…। ‘‘ন কাযপ্পচালকং অন্তরঘরে নিসীদিস্সামীতি সিক্খা করণীযা’’তি। ন কাযপ্পচালকং অন্তরঘরে নিসীদিতব্বং। কাযং পগ্গহেত্ৰা নিসীদিতব্বং। যো অনাদরিযং পটিচ্চ কাযপ্পচালকং অন্তরঘরে নিসীদতি কাযং ওলম্বেন্তো, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৰাসূপগতস্স, আপদাসু, উম্মত্তকস্স, আদিকম্মিকস্সাতি। ছট্ঠসিক্খাপদং নিট্ঠিতং। ৫৯২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ বাহুপ্পচালকং অন্তরঘরে গচ্ছন্তি বাহুং ওলম্বেন্তা…পে॰…। ‘‘ন বাহুপ্পচালকং অন্তরঘরে গমিস্সামীতি সিক্খা করণীযা’’তি। ন বাহুপ্পচালকং অন্তরঘরে গন্তব্বং। বাহুং পগ্গহেত্ৰা গন্তব্বং। যো অনাদরিযং পটিচ্চ বাহুপ্পচালকং অন্তরঘরে গচ্ছতি বাহুং ওলম্বেন্তো, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। সত্তমসিক্খাপদং নিট্ঠিতং। ৫৯৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ বাহুপ্পচালকং অন্তরঘরে নিসীদন্তি বাহুং ওলম্বেন্তা…পে॰…। ‘‘ন বাহুপ্পচালকং অন্তরঘরে নিসীদিস্সামীতি সিক্খা করণীযা’’তি। ন বাহুপ্পচালকং অন্তরঘরে নিসীদিতব্বং। বাহুং পগ্গহেত্ৰা নিসীদিতব্বং। যো অনাদরিযং পটিচ্চ বাহুপ্পচালকং অন্তরঘরে নিসীদতি বাহুং ওলম্বেন্তো, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৰাসূপগতস্স, আপদাসু, উম্মত্তকস্স, আদিকম্মিকস্সাতি। অট্ঠমসিক্খাপদং নিট্ঠিতং। ৫৯৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডকস্স আরামে । তেন খো পন সমযেন ছব্বগ্গিযা ভিক্খূ সীসপ্পচালকং অন্তরঘরে গচ্ছন্তি সীসং ওলম্বেন্তা…পে॰…। ‘‘ন সীসপ্পচালকং অন্তরঘরে গমিস্সামীতি সিক্খা করণীযা’’তি। ন সীসপ্পচালকং অন্তরঘরে গন্তব্বং। সীসং পগ্গহেত্ৰা গন্তব্বং। যো অনাদরিযং পটিচ্চ সীসপ্পচালকং অন্তরঘরে গচ্ছতি সীসং ওলম্বেন্তো, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। নৰমসিক্খাপদং নিট্ঠিতং। ৫৯৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ সীসপ্পচালকং অন্তরঘরে নিসীদন্তি সীসং ওলম্বেন্তা…পে॰…। ‘‘ন সীসপ্পচালকং অন্তরঘরে নিসীদিস্সামীতি সিক্খা করণীযা’’তি। ন সীসপ্পচালকং অন্তরঘরে নিসীদিতব্বং। সীসং পগ্গহেত্ৰা নিসীদিতব্বং । যো অনাদরিযং পটিচ্চ সীসপ্পচালকং অন্তরঘরে নিসীদতি সীসং ওলম্বেন্তো, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৰাসূপগতস্স, আপদাসু, উম্মত্তকস্স, আদিকম্মিকস্সাতি। দসমসিক্খাপদং নিট্ঠিতং। উজ্জগ্ঘিকৰগ্গো দুতিযো। ৩. খম্ভকতৰগ্গো ৫৯৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ খম্ভকতা অন্তরঘরে গচ্ছন্তি…পে॰…। ‘‘ন খম্ভকতো অন্তরঘরে গমিস্সামীতি সিক্খা করণীযা’’তি। ন খম্ভকতেন অন্তরঘরে গন্তব্বং। যো অনাদরিযং পটিচ্চ একতো ৰা উভতো ৰা খম্ভং কত্ৰা অন্তরঘরে গচ্ছতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। পঠমসিক্খাপদং নিট্ঠিতং। ৫৯৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ খম্ভকতা অন্তরঘরে নিসীদন্তি…পে॰…। ‘‘ন খম্ভকতো অন্তরঘরে নিসীদিস্সামীতি সিক্খা করণীযা’’তি। ন খম্ভকতেন অন্তরঘরে নিসীদিতব্বং। যো অনাদরিযং পটিচ্চ একতো ৰা উভতো ৰা খম্ভং কত্ৰা অন্তরঘরে নিসীদতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৰাসূপগতস্স, আপদাসু, উম্মত্তকস্স, আদিকম্মিকস্সাতি। দুতিযসিক্খাপদং নিট্ঠিতং। ৫৯৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ সসীসং পারুপিত্ৰা অন্তরঘরে গচ্ছন্তি…পে॰…। ‘‘ন ওগুণ্ঠিতো অন্তরঘরে গমিস্সামীতি সিক্খা করণীযা’’তি। ন ওগুণ্ঠিতেন অন্তরঘরে গন্তব্বং। যো অনাদরিযং পটিচ্চ সসীসং পারুপিত্ৰা অন্তরঘরে গচ্ছতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। ততিযসিক্খাপদং নিট্ঠিতং। ৫৯৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ সসীসং পারুপিত্ৰা অন্তরঘরে নিসীদন্তি…পে॰…। ‘‘ন ওগুণ্ঠিতো অন্তরঘরে নিসীদিস্সামীতি সিক্খা করণীযা’’তি। ন ওগুণ্ঠিতেন অন্তরঘরে নিসীদিতব্বং। যো অনাদরিযং পটিচ্চ সসীসং পারুপিত্ৰা অন্তরঘরে নিসীদতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৰাসূপগতস্স, আপদাসু, উম্মত্তকস্স, আদিকম্মিকস্সাতি। চতুত্থসিক্খাপদং নিট্ঠিতং। ৬০০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ উক্কুটিকায অন্তরঘরে গচ্ছন্তি…পে॰…। ‘‘ন উক্কুটিকায অন্তরঘরে গমিস্সামীতি সিক্খা করণীযা’’তি। ন উক্কুটিকায অন্তরঘরে গন্তব্বং। যো অনাদরিযং পটিচ্চ উক্কুটিকায অন্তরঘরে গচ্ছতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। পঞ্চমসিক্খাপদং নিট্ঠিতং। ৬০১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ পল্লত্থিকায [পল্লত্তিকায (ক॰)] অন্তরঘরে নিসীদন্তি…পে॰…। ‘‘ন পল্লত্থিকায অন্তরঘরে নিসীদিস্সামীতি সিক্খা করণীযা’’তি। ন পল্লত্থিকায অন্তরঘরে নিসীদিতব্বং। যো অনাদরিযং পটিচ্চ হত্থপল্লত্থিকায ৰা দুস্সপল্লত্থিকায ৰা অন্তরঘরে নিসীদতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৰাসূপগতস্স, আপদাসু, উম্মত্তকস্স, আদিকম্মিকস্সাতি। ছট্ঠসিক্খাপদং নিট্ঠিতং। ৬০২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ অসক্কচ্চং পিণ্ডপাতং পটিগ্গণ্হন্তি ছড্ডেতুকামা ৰিয…পে॰…। ‘‘সক্কচ্চং পিণ্ডপাতং পটিগ্গহেস্সামীতি সিক্খা করণীযা’’তি। সক্কচ্চং পিণ্ডপাতো পটিগ্গহেতব্বো। যো অনাদরিযং পটিচ্চ অসক্কচ্চং পিণ্ডপাতং পটিগ্গণ্হাতি ছড্ডেতুকামো ৰিয, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। সত্তমসিক্খাপদং নিট্ঠিতং। ৬০৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ তহং তহং ওলোকেন্তা পিণ্ডপাতং পটিগ্গণ্হন্তি, আকিরন্তেপি অতিক্কন্তেপি [অতিক্কমন্তেপি (সী॰)] ন জানন্তি…পে॰…। ‘‘পত্তসঞ্ঞী পিণ্ডপাতং পটিগ্গহেস্সামীতি সিক্খা করণীযা’’তি। পত্তসঞ্ঞিনা পিণ্ডপাতো পটিগ্গহেতব্বো। যো অনাদরিযং পটিচ্চ তহং তহং ওলোকেন্তো পিণ্ডপাতং পটিগ্গণ্হাতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। অট্ঠমসিক্খাপদং নিট্ঠিতং। ৬০৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ পিণ্ডপাতং পটিগ্গণ্হন্তা সূপঞ্ঞেৰ বহুং পটিগ্গণ্হন্তি…পে॰…। ‘‘সমসূপকং পিণ্ডপাতং পটিগ্গহেস্সামীতি সিক্খা করণীযা’’তি। সূপো নাম দ্ৰে সূপা – মুগ্গসূপো, মাসসূপো। হত্থহারিযো সমসূপকো পিণ্ডপাতো পটিগ্গহেতব্বো। যো অনাদরিযং পটিচ্চ সূপঞ্ঞেৰ বহুং পটিগ্গণ্হাতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, রসরসে, ঞাতকানং পৰারিতানং, অঞ্ঞস্সত্থায, অত্তনো ধনেন, আপদাসু, উম্মত্তকস্স, আদিকম্মিকস্সাতি। নৰমসিক্খাপদং নিট্ঠিতং। ৬০৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ থূপীকতং পিণ্ডপাতং পটিগ্গণ্হন্তি…পে॰…। ‘‘সমতিত্তিকং [সমতিত্থিকং (ক॰)] পিণ্ডপাতং পটিগ্গহেস্সামীতি সিক্খা করণীযা’’তি। সমতিত্তিকো [সমতিত্থিকং (ক॰)] পিণ্ডপাতো পটিগ্গহেতব্বো। যো অনাদরিযং পটিচ্চ থূপীকতং পিণ্ডপাতং পটিগ্গণ্হাতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, আপদাসু, উম্মত্তকস্স, আদিকম্মিকস্সাতি। দসমসিক্খাপদং নিট্ঠিতং। খম্ভকতৰগ্গো ততিযো। ৪. সক্কচ্চৰগ্গো ৬০৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ অসক্কচ্চং পিণ্ডপাতং ভুঞ্জন্তি অভুঞ্জিতুকামা ৰিয…পে॰…। ‘‘সক্কচ্চং পিণ্ডপাতং ভুঞ্জিস্সামীতি সিক্খা করণীযা’’তি। সক্কচ্চং পিণ্ডপাতো ভুঞ্জিতব্বো। যো অনাদরিযং পটিচ্চ অসক্কচ্চং পিণ্ডপাতং ভুঞ্জতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স, আদিকম্মিকস্সাতি। পঠমসিক্খাপদং নিট্ঠিতং। ৬০৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ তহং তহং ওলোকেন্তা পিণ্ডপাতং ভুঞ্জন্তি, আকিরন্তেপি অতিক্কন্তেপি ন জানন্তি…পে॰… । ‘‘পত্তসঞ্ঞী পিণ্ডপাতং ভুঞ্জিস্সামীতি সিক্খা করণীযা’’তি। পত্তসঞ্ঞিনা পিণ্ডপাতো ভুঞ্জিতব্বো। যো অনাদরিযং পটিচ্চ তহং তহং ওলোকেন্তো পিণ্ডপাতং ভুঞ্জতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। দুতিযসিক্খাপদং নিট্ঠিতং। ৬০৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ তহং তহং ওমসিত্ৰা [ওমদ্দিত্ৰা (ক॰)] পিণ্ডপাতং ভুঞ্জন্তি…পে॰…। ‘‘সপদানং পিণ্ডপাতং ভুঞ্জিস্সামীতি সিক্খা করণীযা’’তি। সপদানং পিণ্ডপাতো ভুঞ্জিতব্বো। যো অনাদরিযং পটিচ্চ তহং তহং ওমসিত্ৰা [ওমদ্দিত্ৰা (ক॰)] পিণ্ডপাতং ভুঞ্জতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, অঞ্ঞেসং দেন্তো ওমসতি, অঞ্ঞস্স ভাজনে আকিরন্তো ওমসতি, উত্তরিভঙ্গে, আপদাসু, উম্মত্তকস্স, আদিকম্মিকস্সাতি। ততিযসিক্খাপদং নিট্ঠিতং। ৬০৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে । তেন খো পন সমযেন ছব্বগ্গিযা ভিক্খূ পিণ্ডপাতং ভুঞ্জন্তা সূপঞ্ঞেৰ বহুং ভুঞ্জন্তি…পে॰…। ‘‘সমসূপকং পিণ্ডপাতং ভুঞ্জিস্সামীতি সিক্খা করণীযা’’তি। সূপো নাম দ্ৰে সূপা – মুগ্গসূপো, মাসসূপো হত্থহারিযো। সমসূপকো পিণ্ডপাতো ভুঞ্জিতব্বো। যো অনাদরিযং পটিচ্চ সূপঞ্ঞেৰ বহুং ভুঞ্জতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, রসরসে , ঞাতকানং পৰারিতানং, অত্তনো ধনেন, আপদাসু, উম্মত্তকস্স, আদিকম্মিকস্সাতি। চতুত্থসিক্খাপদং নিট্ঠিতং। ৬১০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ থূপকতো ওমদ্দিত্ৰা পিণ্ডপাতং ভুঞ্জন্তি…পে॰…। ‘‘ন থূপকতো ওমদ্দিত্ৰা পিণ্ডপাতং ভুঞ্জিস্সামীতি সিক্খা করণীযা’’তি। ন থূপকতো ওমদ্দিত্ৰা পিণ্ডপাতো ভুঞ্জিতব্বো। যো অনাদরিযং পটিচ্চ থূপকতো ওমদ্দিত্ৰা পিণ্ডপাতং ভুঞ্জতি আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, পরিত্তকে সেসে একতো সংকড্ঢিত্ৰা ওমদ্দিত্ৰা ভুঞ্জতি, আপদাসু, উম্মত্তকস্স, আদিকম্মিকস্সাতি। পঞ্চমসিক্খাপদং নিট্ঠিতং। ৬১১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ সূপম্পি ব্যঞ্জনম্পি ওদনেন পটিচ্ছাদেন্তি ভিয্যোকম্যতং উপাদায…পে॰…। ‘‘ন সূপং ৰা ব্যঞ্জনং ৰা ওদনেন পটিচ্ছাদেস্সামি ভিয্যোকম্যতং উপাদাযাতি সিক্খা করণীযা’’তি। ন সূপং ৰা ব্যঞ্জনং ৰা ওদনেন পটিচ্ছাদেতব্বং ভিয্যোকম্যতং উপাদায। যো অনাদরিযং পটিচ্চ সূপং ৰা ব্যঞ্জনং ৰা ওদনেন পটিচ্ছাদেতি ভিয্যোকম্যতং উপাদায, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, সামিকা পটিচ্ছাদেত্ৰা দেন্তি, ন ভিয্যোকম্যতং উপাদায, আপদাসু, উম্মত্তকস্স , আদিকম্মিকস্সাতি। ছট্ঠসিক্খাপদং নিট্ঠিতং। ৬১২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জিস্সন্তি! কস্স সম্পন্নং ন মনাপং ! কস্স সাদুং ন রুচ্চতী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জিস্সন্তী’’তি…পে॰… সচ্চং কির তুম্হে, ভিক্খৰে, সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জিস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘ন সূপং ৰা ওদনং ৰা অত্তনো অত্থায ৰিঞ্ঞাপেত্ৰা ভুঞ্জিস্সামীতি সিক্খা করণীযা’’তি। এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি। ৬১৩. তেন খো পন সমযেন ভিক্খূ গিলানা হোন্তি। গিলানপুচ্ছকা ভিক্খূ গিলানে ভিক্খূ এতদৰোচুং – ‘‘কচ্চাৰুসো, খমনীযং, কচ্চি যাপনীয’’ন্তি? ‘‘পুব্বে মযং, আৰুসো, সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জাম, তেন নো ফাসু হোতি। ইদানি পন – ‘‘ভগৰতা পটিক্খিত্ত’’ন্তি কুক্কুচ্চাযন্তা ন ৰিঞ্ঞাপেম, তেন নো ন ফাসু হোতী’’তি। ভগৰতো এতমত্থং আরোচেসুং…পে॰… অনুজানামি, ভিক্খৰে, গিলানেন ভিক্খুনা সূপম্পি ওদনম্পি অত্তনো অত্থায ৰিঞ্ঞাপেত্ৰা ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘ন সূপং ৰা ওদনং ৰা অগিলানো অত্তনো অত্থায ৰিঞ্ঞাপেত্ৰা ভুঞ্জিস্সামীতি সিক্খা করণীযা’’তি। ন সূপং ৰা ওদনং ৰা অগিলানেন অত্তনো অত্থায ৰিঞ্ঞাপেত্ৰা ভুঞ্জিতব্বং। যো অনাদরিযং পটিচ্চ সূপং ৰা ওদনং ৰা অগিলানো অত্তনো অত্থায ৰিঞ্ঞাপেত্ৰা ভুঞ্জতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ঞাতকানং পৰারিতানং, অঞ্ঞস্সত্থায, অত্তনো ধনেন, আপদাসু, উম্মত্তকস্স, আদিকম্মিকস্সাতি। সত্তমসিক্খাপদং নিট্ঠিতং। ৬১৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ উজ্ঝানসঞ্ঞী পরেসং পত্তং ওলোকেন্তি…পে॰…। ‘‘ন উজ্ঝানসঞ্ঞী পরেসং পত্তং ওলোকেস্সামীতি সিক্খা করণীযা’’তি। ন উজ্ঝানসঞ্ঞিনা পরেসং পত্তো ওলোকেতব্বো। যো অনাদরিযং পটিচ্চ উজ্ঝানসঞ্ঞী পরেসং পত্তং ওলোকেতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, ‘‘দস্সামী’’তি ৰা ‘‘দাপেস্সামী’’তি ৰা ওলোকেতি, ন উজ্ঝানসঞ্ঞিস্স, আপদাসু, উম্মত্তকস্স, আদিকম্মিকস্সাতি। অট্ঠমসিক্খাপদং নিট্ঠিতং। ৬১৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ মহন্তং কবল়ং করোন্তি…পে॰…। ‘‘নাতিমহন্তং কবল়ং করিস্সামীতি সিক্খা করণীযা’’তি। নাতিমহন্তো কবল়ো কাতব্বো। যো অনাদরিযং পটিচ্চ মহন্তং কবল়ং করোতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, খজ্জকে, ফলাফলে, উত্তরিভঙ্গে, আপদাসু, উম্মত্তকস্স, আদিকম্মিকস্সাতি। নৰমসিক্খাপদং নিট্ঠিতং। ৬১৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ দীঘং আলোপং করোন্তি…পে॰…। ‘‘পরিমণ্ডলং আলোপং করিস্সামীতি সিক্খা করণীযা’’তি। পরিমণ্ডলো আলোপো কাতব্বো। যো অনাদরিযং পটিচ্চ দীঘং আলোপং করোতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, খজ্জকে, ফলাফলে, উত্তরিভঙ্গে, আপদাসু, উম্মত্তকস্স, আদিকম্মিকস্সাতি। দসমসিক্খাপদং নিট্ঠিতং। সক্কচ্চৰগ্গো চতুত্থো। ৫. কবল়ৰগ্গো ৬১৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ অনাহটে কবল়ে মুখদ্ৰারং ৰিৰরন্তি…পে॰…। ‘‘ন অনাহটে কবল়ে মুখদ্ৰারং ৰিৰরিস্সামীতি সিক্খা করণীযা’’তি। ন অনাহটে কবল়ে মুখদ্ৰারং ৰিৰরিতব্বং। যো অনাদরিযং পটিচ্চ অনাহটে কবল়ে মুখদ্ৰারং ৰিৰরতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। পঠমসিক্খাপদং নিট্ঠিতং। ৬১৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ ভুঞ্জমানা সব্বং হত্থং মুখে পক্খিপন্তি…পে॰…। ‘‘ন ভুঞ্জমানো সব্বং হত্থং মুখে পক্খিপিস্সামীতি সিক্খাকরণীযা’’তি। ন ভুঞ্জমানেন সব্বো হত্থো মুখে পক্খিপিতব্বো। যো অনাদরিযং পটিচ্চ ভুঞ্জমানো সব্বং হত্থং মুখে পক্খিপতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। দুতিযসিক্খাপদং নিট্ঠিতং। ৬১৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ সকবল়েন মুখেন ব্যাহরন্তি…পে॰…। ‘‘ন সকবল়েন মুখেন ব্যাহরিস্সামীতি সিক্খা করণীযা’’তি। ন সকবল়েন মুখেন ব্যাহরিতব্বং। যো অনাদরিযং পটিচ্চ সকবল়েন মুখেন ব্যাহরতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। ততিযসিক্খাপদং নিট্ঠিতং। ৬২০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ পিণ্ডুক্খেপকং ভুঞ্জন্তি…পে॰…। ‘‘ন পিণ্ডুক্খেপকং ভুঞ্জিস্সামীতি সিক্খা করণীযা’’তি। ন পিণ্ডুক্খেপকং ভুঞ্জিতব্বং। যো অনাদরিযং পটিচ্চ পিণ্ডুক্খেপকং ভুঞ্জতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, খজ্জকে, ফলাফলে, আপদাসু, উম্মত্তকস্স, আদিকম্মিকস্সাতি। চতুত্থসিক্খাপদং নিট্ঠিতং। ৬২১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ কবল়াৰচ্ছেদকং ভুঞ্জন্তি…পে॰…। ‘‘ন কবল়াৰচ্ছেদকং ভুঞ্জিস্সামীতি সিক্খা করণীযা’’তি। ন কবল়াৰচ্ছেদকং ভুঞ্জিতব্বং। যো অনাদরিযং পটিচ্চ কবল়াৰচ্ছেদকং ভুঞ্জতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, খজ্জকে ফলাফলে, উত্তরিভঙ্গে, আপদাসু, উম্মত্তকস্স, আদিকম্মিকস্সাতি। পঞ্চমসিক্খাপদং নিট্ঠিতং। ৬২২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ অৰগণ্ডকারকং ভুঞ্জন্তি…পে॰…। ‘‘ন অৰগণ্ডকারকং ভুঞ্জিস্সামীতি সিক্খা করণীযা’’তি। ন অৰগণ্ডকারকং ভুঞ্জিতব্বং। যো অনাদরিযং পটিচ্চ একতো ৰা উভতো ৰা গণ্ডং কত্ৰা ভুঞ্জতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ফলাফলে, আপদাসু, উম্মত্তকস্স, আদিকম্মিকস্সাতি। ছট্ঠসিক্খাপদং নিট্ঠিতং। ৬২৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ হত্থনিদ্ধুনকং ভুঞ্জন্তি…পে॰…। ‘‘ন হত্থনিদ্ধুনকং ভুঞ্জিস্সামীতি সিক্খা করণীযা’’তি। ন হত্থনিদ্ধুনকং ভুঞ্জিতব্বং। যো অনাদরিযং পটিচ্চ হত্থনিদ্ধুনকং ভুঞ্জতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, কচৰরং ছড্ডেন্তো হত্থং নিদ্ধুনাতি, আপদাসু, উম্মত্তকস্স, আদিকম্মিকস্সাতি। সত্তমসিক্খাপদং নিট্ঠিতং। ৬২৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ সিত্থাৰকারকং ভুঞ্জন্তি…পে॰…। ‘‘ন সিত্থাৰকারকং ভুঞ্জিস্সামীতি সিক্খা করণীযা’’তি। ন সিত্থাৰকারকং ভুঞ্জিতব্বং। যো অনাদরিযং পটিচ্চ সিত্থাৰকারকং ভুঞ্জতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, কচৰরং ছড্ডেন্তো সিত্থং ছড্ডযতি, আপদাসু, উম্মত্তকস্স, আদিকম্মিকস্সাতি । অট্ঠমসিক্খাপদং নিট্ঠিতং। ৬২৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ জিৰ্হানিচ্ছারকং ভুঞ্জন্তি…পে॰…। ‘‘ন জিৰ্হানিচ্ছারকং ভুঞ্জিস্সামীতি সিক্খা করণীযা’’তি। ন জিৰ্হানিচ্ছারকং ভুঞ্জিতব্বং। যো অনাদরিযং পটিচ্চ জিৰ্হানিচ্ছারকং ভুঞ্জতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। নৰমসিক্খাপদং নিট্ঠিতং। ৬২৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ চপুচপুকারকং ভুঞ্জন্তি…পে॰…। ‘‘ন চপুচপুকারকং ভুঞ্জিস্সামীতি সিক্খা করণীযা’’তি। ন চপুচপুকারকং ভুঞ্জিতব্বং। যো অনাদরিযং পটিচ্চ চপুচপুকারকং ভুঞ্জতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। দসমসিক্খাপদং নিট্ঠিতং। কবল়ৰগ্গো পঞ্চমো। ৬. সুরুসুরুৰগ্গো ৬২৭. তেন সমযেন বুদ্ধো ভগৰা কোসম্বিযং ৰিহরতি ঘোসিতারামে। তেন খো পন সমযেন অঞ্ঞতরেন ব্রাহ্মণেন সঙ্ঘস্স পযোপানং পটিযত্তং হোতি। ভিক্খূ সুরুসুরুকারকং খীরং পিৰন্তি। অঞ্ঞতরো নটপুব্বকো ভিক্খু এৰমাহ – ‘‘সব্বোযং মঞ্ঞে সঙ্ঘো সীতীকতো’’তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খু সঙ্ঘং আরব্ভ দৰং করিস্সতী’’তি…পে॰… সচ্চং কির ত্ৰং, ভিক্খু, সঙ্ঘং আরব্ভ দৰং অকাসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, সঙ্ঘং আরব্ভ দৰং করিস্সসি! নেতং, মোঘপুরিস, অপ্পসন্নানং ৰা পসাদায…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি – ‘‘ন, ভিক্খৰে, বুদ্ধং ৰা ধম্মং ৰা সঙ্ঘং ৰা আরব্ভ দৰো কাতব্বো। যো করেয্য, আপত্তি দুক্কটস্সা’’তি। অথ খো ভগৰা তং ভিক্খুং অনেকপরিযাযেন ৰিগরহিত্ৰা দুব্ভরতায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘ন সুরুসুরুকারকং ভুঞ্জিস্সামীতি সিক্খা করণীযা’’তি। ন সুরুসুরুকারকং ভুঞ্জিতব্বং। যো অনাদরিযং পটিচ্চ সুরুসুরুকারকং ভুঞ্জতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। পঠমসিক্খাপদং নিট্ঠিতং। ৬২৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ হত্থনিল্লেহকং ভুঞ্জন্তি…পে॰…। ‘‘ন হত্থনিল্লেহকং ভুঞ্জিস্সামীতি সিক্খা করণীযা’’তি। ন হত্থনিল্লেহকং ভুঞ্জিতব্বং। যো অনাদরিযং পটিচ্চ হত্থনিল্লেহকং ভুঞ্জতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। দুতিযসিক্খাপদং নিট্ঠিতং। ৬২৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ পত্তনিল্লেহকং ভুঞ্জন্তি…পে॰…। ‘‘ন পত্তনিল্লেহকং ভুঞ্জিস্সামীতি সিক্খা করণীযা’’তি। ন পত্তনিল্লেহকং ভুঞ্জিতব্বং। যো অনাদরিযং পটিচ্চ পত্তনিল্লেহকং ভুঞ্জতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, পরিত্তকে সেসে একতো সঙ্কড্ঢিত্ৰা নিল্লেহিত্ৰা ভুঞ্জতি, আপদাসু, উম্মত্তকস্স, আদিকম্মিকস্সাতি। ততিযসিক্খাপদং নিট্ঠিতং। ৬৩০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ ওট্ঠনিল্লেহকং ভুঞ্জন্তি…পে॰…। ‘‘ন ওট্ঠনিল্লেহকং ভুঞ্জিস্সামীতি সিক্খা করণীযা’’তি। ন ওট্ঠনিল্লেহকং ভুঞ্জিতব্বং। যো অনাদরিযং পটিচ্চ ওট্ঠনিল্লেহকং ভুঞ্জতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। চতুত্থসিক্খাপদং নিট্ঠিতং। ৬৩১. তেন সমযেন বুদ্ধো ভগৰা ভগ্গেসু ৰিহরতি সুসুমারগিরে [সুংসুমারগিরে (সী॰ স্যা॰), সংসুমারগিরে (ক॰)] ভেসকল়াৰনে মিগদাযে। তেন খো পন সমযেন ভিক্খূ কোকনদে [কোকনুদে (ক॰)] পাসাদে সামিসেন হত্থেন পানীযথালকং পটিগ্গণ্হন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা সামিসেন হত্থেন পানীযথালকং পটিগ্গহেস্সন্তি, সেয্যথাপি গিহী কামভোগিনো’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খূ সামিসেন হত্থেন পানীযথালকং পটিগ্গহেস্সন্তী’’তি…পে॰… সচ্চং কির, ভিক্খৰে, ভিক্খূ সামিসেন হত্থেন পানীযথালকং পটিগ্গণ্হন্তীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তে, ভিক্খৰে, মোঘপুরিসা সামিসেন হত্থেন পানীযথালকং পটিগ্গহেস্সন্তি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘ন সামিসেন হত্থেন পানীযথালকং পটিগ্গহেস্সামীতি সিক্খা করণীযা’’তি। ন সামিসেন হত্থেন পানীযথালকো পটিগ্গহেতব্বো। যো অনাদরিযং পটিচ্চ সামিসেন হত্থেন পানীযথালকং পটিগ্গণ্হাতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ‘‘ধোৰিস্সামী’’তি ৰা ‘‘ধোৰাপেস্সামী’’তি ৰা পটিগ্গণ্হাতি, আপদাসু, উম্মত্তকস্স, আদিকম্মিকস্সাতি। পঞ্চমসিক্খাপদং নিট্ঠিতং। ৬৩২. তেন সমযেন বুদ্ধো ভগৰা ভগ্গেসু ৰিহরতি সুসুমারগিরে ভেসকল়াৰনে মিগদাযে। তেন খো পন সমযেন ভিক্খূ কোকনদে পাসাদে সসিত্থকং পত্তধোৰনং অন্তরঘরে ছড্ডেন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা সসিত্থকং পত্তধোৰনং অন্তরঘরে ছড্ডেস্সন্তি, সেয্যথাপি গিহী কামভোগিনো’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খূ সসিত্থকং পত্তধোৰনং অন্তরঘরে ছড্ডেস্সন্তী’’তি…পে॰… সচ্চং কির, ভিক্খৰে, ভিক্খূ সসিত্থকং পত্তধোৰনং অন্তরঘরে ছড্ডেন্তীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তে, ভিক্খৰে, মোঘপুরিসা সসিত্থকং পত্তধোৰনং অন্তরঘরে ছড্ডেস্সন্তি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘ন সসিত্থকং পত্তধোৰনং অন্তরঘরে ছড্ডেস্সামীতি সিক্খা করণীযা’’তি। ন সসিত্থকং পত্তধোৰনং অন্তরঘরে ছড্ডেতব্বং। যো অনাদরিযং পটিচ্চ সসিত্থকং পত্তধোৰনং অন্তরঘরে ছড্ডেতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, উদ্ধরিত্ৰা ৰা ভিন্দিত্ৰা ৰা পটিগ্গহে ৰা নীহরিত্ৰা ৰা ছড্ডেতি, আপদাসু, উম্মত্তকস্স, আদিকম্মিকস্সাতি। ছট্ঠসিক্খাপদং নিট্ঠিতং। ৬৩৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ ছত্তপাণিস্স ধম্মং দেসেন্তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ ছত্তপাণিস্স ধম্মং দেসেস্সন্তী’’তি…পে॰… সচ্চং কির তুম্হে, ভিক্খৰে, ছত্তপাণিস্স ধম্মং দেসেথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, ছত্তপাণিস্স ধম্মং দেসেস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘ন ছত্তপাণিস্স ধম্মং দেসেস্সামীতি সিক্খা করণীযা’’তি। এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি। ৬৩৪. তেন খো পন সমযেন ভিক্খূ ছত্তপাণিস্স গিলানস্স ধম্মং দেসেতুং কুক্কুচ্চাযন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা ছত্তপাণিস্স গিলানস্স ধম্মং ন দেসেস্সন্তী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, ছত্তপাণিস্স গিলানস্স ধম্মং দেসেতুং। এৰঞ্চ পন , ভিক্খৰে, ইমং সিক্খাপদং উদ্দিসেয্যাথ – ‘‘ন ছত্তপাণিস্স অগিলানস্স ধম্মং দেসেস্সামীতি সিক্খা করণীযা’’তি। ছত্তং নাম তীণি ছত্তানি – সেতচ্ছত্তং, কিলঞ্জচ্ছত্তং, পণ্ণচ্ছত্তং মণ্ডলবদ্ধং সলাকবদ্ধং। ধম্মো নাম বুদ্ধভাসিতো সাৰকভাসিতো ইসিভাসিতো দেৰতাভাসিতো অত্থূপসঞ্হিতো ধম্মূপসঞ্হিতো। দেসেয্যাতি পদেন দেসেতি, পদে পদে আপত্তি দুক্কটস্স। অক্খরায দেসেতি, অক্খরক্খরায আপত্তি দুক্কটস্স। ন ছত্তপাণিস্স অগিলানস্স ধম্মো দেসেতব্বো। যো অনাদরিযং পটিচ্চ ছত্তপাণিস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। সত্তমসিক্খাপদং নিট্ঠিতং। ৬৩৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ দণ্ডপাণিস্স ধম্মং দেসেন্তি…পে॰…। ‘‘ন দণ্ডপাণিস্স অগিলানস্স ধম্মং দেসেস্সামীতি সিক্খা করণীযা’’তি। দণ্ডো নাম মজ্ঝিমস্স পুরিসস্স চতুহত্থো দণ্ডো। ততো উক্কট্ঠো অদণ্ডো, ওমকো অদণ্ডো। ন দণ্ডপাণিস্স অগিলানস্স ধম্মো দেসেতব্বো। যো অনাদরিযং পটিচ্চ দণ্ডপাণিস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। অট্ঠমসিক্খাপদং নিট্ঠিতং। ৬৩৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ সত্থপাণিস্স ধম্মং দেসেন্তি…পে॰…। ‘‘ন সত্থপাণিস্স অগিলানস্স ধম্মং দেসেস্সামীতি সিক্খা করণীযা’’তি। সত্থং নাম একতোধারং উভতোধারং পহরণং। ন সত্থপাণিস্স অগিলানস্স ধম্মো দেসেতব্বো। যো অনাদরিযং পটিচ্চ সত্থপাণিস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। নৰমসিক্খাপদং নিট্ঠিতং। ৬৩৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ আৰুধপাণিস্স ধম্মং দেসেন্তি…পে॰…। ‘‘ন আৰুধপাণিস্স অগিলানস্স ধম্মং দেসেস্সামীতি সিক্খা করণীযা’’তি। আৰুধং নাম চাপো কোদণ্ডো। ন আৰুধপাণিস্স অগিলানস্স ধম্মো দেসেতব্বো। যো অনাদরিযং পটিচ্চ আৰুধপাণিস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। দসমসিক্খাপদং নিট্ঠিতং। সুরুসুরুৰগ্গো ছট্ঠো। ৭. পাদুকৰগ্গো ৬৩৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ পাদুকারুল়্হস্স ধম্মং দেসেন্তি…পে॰…। ‘‘ন পাদুকারুল়্হস্স অগিলানস্স ধম্মং দেসেস্সামীতি সিক্খা করণীযা’’তি। ন পাদুকারুল়্হস্স অগিলানস্স ধম্মো দেসেতব্বো। যো অনাদরিযং পটিচ্চ অক্কন্তস্স ৰা পটিমুক্কস্স ৰা ওমুক্কস্স ৰা অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। পঠমসিক্খাপদং নিট্ঠিতং। ৬৩৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ উপাহনারুল়্হস্স ধম্মং দেসেন্তি…পে॰…। ‘‘ন উপাহনারুল়্হস্স অগিলানস্স ধম্মং দেসেস্সামীতি সিক্খাকরণীযা’’তি। ন উপাহনারুল়্হস্স অগিলানস্স ধম্মো দেসেতব্বো। যো অনাদরিযং পটিচ্চ অক্কন্তস্স ৰা পটিমুক্কস্স ৰা ওমুক্কস্স ৰা অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। দুতিযসিক্খাপদং নিট্ঠিতং। ৬৪০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ যানগতস্স ধম্মং দেসেন্তি…পে॰…। ‘‘ন যানগতস্স অগিলানস্স ধম্মং দেসেস্সামীতি সিক্খা করণীযা’’তি। যানং নাম ৰয্হং রথো সকটং সন্দমানিকা সিৰিকা পাটঙ্কী। ন যানগতস্স অগিলানস্স ধম্মো দেসেতব্বো। যো অনাদরিযং পটিচ্চ যানগতস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। ততিযসিক্খাপদং নিট্ঠিতং। ৬৪১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ সযনগতস্স ধম্মং দেসেন্তি…পে॰…। ‘‘ন সযনগতস্স অগিলানস্স ধম্মং দেসেস্সামীতি সিক্খা করণীযা’’তি। ন সযনগতস্স অগিলানস্স ধম্মো দেসেতব্বো। যো অনাদরিযং পটিচ্চ অন্তমসো ছমাযম্পি নিপন্নস্স সযনগতস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। চতুত্থসিক্খাপদং নিট্ঠিতং। ৬৪২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ পল্লত্থিকায নিসিন্নস্স ধম্মং দেসেন্তি…পে॰…। ‘‘ন পল্লত্থিকায নিসিন্নস্স অগিলানস্স ধম্মং দেসেস্সামীতি সিক্খা করণীযা’’তি। ন পল্লত্থিকায নিসিন্নস্স অগিলানস্স ধম্মো দেসেতব্বো। যো অনাদরিযং পটিচ্চ হত্থপল্লত্থিকায ৰা দুস্সপল্লত্থিকায ৰা নিসিন্নস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। পঞ্চমসিক্খাপদং নিট্ঠিতং। ৬৪৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ ৰেঠিতসীসস্স ধম্মং দেসেন্তি…পে॰…। ‘‘ন ৰেঠিতসীসস্স অগিলানস্স ধম্মং দেসেস্সামীতি সিক্খা করণীযা’’তি। ৰেঠিতসীসো নাম কেসন্তং ন দস্সাপেত্ৰা ৰেঠিতো হোতি। ন ৰেঠিতসীসস্স অগিলানস্স ধম্মো দেসেতব্বো। যো অনাদরিযং পটিচ্চ ৰেঠিতসীসস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, কেসন্তং ৰিৰরাপেত্ৰা দেসেতি, আপদাসু, উম্মত্তকস্স, আদিকম্মিকস্সাতি। ছট্ঠসিক্খাপদং নিট্ঠিতং। ৬৪৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ ওগুণ্ঠিতসীসস্স ধম্মং দেসেন্তি…পে॰…। ‘‘ন ওগুণ্ঠিতসীসস্স অগিলানস্স ধম্মং দেসেস্সামীতি সিক্খা করণীযা’’তি। ওগুণ্ঠিতসীসো নাম সসীসং পারুতো ৰুচ্চতি। ন ওগুণ্ঠিতসীসস্স অগিলানস্স ধম্মো দেসেতব্বো। যো অনাদরিযং পটিচ্চ ওগুণ্ঠিতসীসস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, সীসং ৰিৰরাপেত্ৰা দেসেতি, আপদাসু, উম্মত্তকস্স, আদিকম্মিকস্সাতি। সত্তমসিক্খাপদং নিট্ঠিতং। ৬৪৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ ছমায নিসীদিত্ৰা আসনে নিসিন্নস্স ধম্মং দেসেন্তি…পে॰…। ‘‘ন ছমাযং নিসীদিত্ৰা আসনে নিসিন্নস্স অগিলানস্স ধম্মং দেসেস্সামীতি সিক্খা করণীযা’’তি। ন ছমাযং নিসীদিত্ৰা [নিসিন্নেন (অট্ঠকথা)] আসনে নিসিন্নস্স অগিলানস্স ধম্মো দেসেতব্বো। যো অনাদরিযং পটিচ্চ ছমাযং নিসীদিত্ৰা আসনে নিসিন্নস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। অট্ঠমসিক্খাপদং নিট্ঠিতং। ৬৪৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ নীচে আসনে নিসীদিত্ৰা উচ্চে আসনে নিসিন্নস্স ধম্মং দেসেন্তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ নীচে আসনে নিসীদিত্ৰা উচ্চে আসনে নিসিন্নস্স ধম্মং দেসেস্সন্তী’’তি…পে॰… সচ্চং কির তুম্হে, ভিক্খৰে, নীচে আসনে নিসীদিত্ৰা উচ্চে আসনে নিসিন্নস্স ধম্মং দেসেথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, নীচে আসনে নিসীদিত্ৰা উচ্চে আসনে নিসিন্নস্স ধম্মং দেসেস্সথ! নেতং, মোঘপুরিসা, অপ্পসন্নানং ৰা পসাদায…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি – ৬৪৭. ‘‘ভূতপুব্বং , ভিক্খৰে, বারাণসিযং অঞ্ঞতরস্স ছপকস্স [ছৰকস্স (স্যা॰)] পজাপতি গব্ভিনী অহোসি। অথ খো, ভিক্খৰে, সা ছপকী তং ছপকং এতদৰোচ – ‘গব্ভিনীম্হি, অয্যপুত্ত! ইচ্ছামি অম্বং খাদিতু’ন্তি। ‘নত্থি অম্বং[অম্বো (স্যা॰)], অকালো অম্বস্সা’তি। ‘সচে ন লভিস্সামি মরিস্সামী’তি। তেন খো পন সমযেন, রঞ্ঞো অম্বো ধুৰফলো হোতি। অথ খো, ভিক্খৰে, সো ছপকো যেন সো অম্বো তেনুপসঙ্কমি; উপসঙ্কমিত্ৰা তং অম্বং অভিরুহিত্ৰা নিলীনো অচ্ছি । অথ খো, ভিক্খৰে, রাজা পুরোহিতেন ব্রাহ্মণেন সদ্ধিং যেন সো অম্বো তেনুপসঙ্কমি; উপসঙ্কমিত্ৰা উচ্চে আসনে নিসীদিত্ৰা মন্তং পরিযাপুণাতি । অথ খো, ভিক্খৰে , তস্স ছপকস্স এতদহোসি – ‘যাৰ অধম্মিকো অযং রাজা, যত্র হি নাম উচ্চে আসনে নিসীদিত্ৰা মন্তং পরিযাপুণিস্সতি। অযঞ্চ ব্রাহ্মণো অধম্মিকো, যত্র হি নাম নীচে আসনে নিসীদিত্ৰা উচ্চে আসনে নিসিন্নস্স মন্তং ৰাচেস্সতি। অহঞ্চম্হি অধম্মিকো, যোহং ইত্থিযা কারণা রঞ্ঞো অম্বং অৰহরামি। সব্বমিদং চরিমং কত’ন্তি তত্থেৰ পরিপতি। [ইমা গাথাযো জা॰ ১.৪.৩৩-৩৫ জাতকে অঞ্ঞথা দিস্সন্তি] ‘‘উভো অত্থং ন জানন্তি, উভো ধম্মং ন পস্সরে। যো চাযং মন্তং ৰাচেতি, যো চাধম্মেনধীযতি॥ ‘‘সালীনং ওদনো ভুত্তো, সুচিমংসূপসেচনো। তস্মা ধম্মে ন ৰত্তামি, ধম্মো অরিযেভি ৰণ্ণিতো॥ ‘‘ধিরত্থু তং ধনলাভং, যসলাভঞ্চ ব্রাহ্মণ। যা ৰুত্তি ৰিনিপাতেন, অধম্মচরণেন ৰা॥ ‘‘পরিব্বজ মহাব্রহ্মে, পচন্তঞ্ঞেপি পাণিনো। মা ত্ৰং অধম্মো আচরিতো, অস্মা কুম্ভমিৰাভিদা’’তি॥ ‘‘তদাপি মে, ভিক্খৰে, অমনাপা নীচে আসনে নিসীদিত্ৰা উচ্চে আসনে নিসিন্নস্স মন্তং ৰাচেতুং, কিমঙ্গ পন এতরহি ন অমনাপা ভৰিস্সতি নীচে আসনে নিসীদিত্ৰা উচ্চে আসনে নিসিন্নস্স ধম্মং দেসেতুং। নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘ন নীচে আসনে নিসীদিত্ৰা উচ্চে আসনে নিসিন্নস্স অগিলানস্স ধম্মং দেসেস্সামীতি সিক্খা করণীযা’’তি। ন নীচে আসনে নিসীদিত্ৰা উচ্চে আসনে নিসিন্নস্স অগিলানস্স ধম্মো দেসেতব্বো। যো অনাদরিযং পটিচ্চ নীচে আসনে নিসীদিত্ৰা উচ্চে আসনে নিসিন্নস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। নৰমসিক্খাপদং নিট্ঠিতং। ৬৪৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ ঠিতা নিসিন্নস্স ধম্মং দেসেন্তি…পে॰…। ‘‘ন ঠিতো নিসিন্নস্স অগিলানস্স ধম্মং দেসেস্সামীতি সিক্খা করণীযা’’তি। ন ঠিতেন নিসিন্নস্স অগিলানস্স ধম্মো দেসেতব্বো। যো অনাদরিযং পটিচ্চ ঠিতো নিসিন্নস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। দসমসিক্খাপদং নিট্ঠিতং। ৬৪৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ পচ্ছতো গচ্ছন্তা পুরতো গচ্ছন্তস্স ধম্মং দেসেন্তি…পে॰…। ‘‘ন পচ্ছতো গচ্ছন্তো পুরতো গচ্ছন্তস্স অগিলানস্স ধম্মং দেসেস্সামীতি সিক্খা করণীযা’’তি। ন পচ্ছতো গচ্ছন্তেন পুরতো গচ্ছন্তস্স অগিলানস্স ধম্মো দেসেতব্বো। যো অনাদরিযং পটিচ্চ পচ্ছতো গচ্ছন্তো পুরতো গচ্ছন্তস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। একাদসমসিক্খাপদং নিট্ঠিতং। ৬৫০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ উপ্পথেন গচ্ছন্তা পথেন গচ্ছন্তস্স ধম্মং দেসেন্তি…পে॰…। ‘‘ন উপ্পথেন গচ্ছন্তো পথেন গচ্ছন্তস্স অগিলানস্স ধম্মং দেসেস্সামীতি সিক্খা করণীযা’’তি। ন উপ্পথেন গচ্ছন্তেন পথেন গচ্ছন্তস্স অগিলানস্স ধম্মো দেসেতব্বো। যো অনাদরিযং পটিচ্চ উপ্পথেন গচ্ছন্তো পথেন গচ্ছন্তস্স অগিলানস্স ধম্মং দেসেতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। দ্ৰাদসমসিক্খাপদং নিট্ঠিতং। ৬৫১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ ঠিতা উচ্চারম্পি পস্সাৰম্পি করোন্তি…পে॰…। ‘‘ন ঠিতো অগিলানো উচ্চারং ৰা পস্সাৰং ৰা করিস্সামীতি সিক্খা করণীযা’’তি। ন ঠিতেন অগিলানেন উচ্চারো ৰা পস্সাৰো ৰা কাতব্বো। যো অনাদরিযং পটিচ্চ ঠিতো অগিলানো উচ্চারং ৰা পস্সাৰং ৰা করোতি, আপত্তি দুক্কটস্স। অনাপত্তি অসঞ্চিচ্চ…পে॰… আদিকম্মিকস্সাতি। তেরসমসিক্খাপদং নিট্ঠিতং। ৬৫২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ হরিতে উচ্চারম্পি পস্সাৰম্পি খেল়ম্পি করোন্তি…পে॰…। ‘‘ন হরিতে অগিলানো উচ্চারং ৰা পস্সাৰং ৰা খেল়ং ৰা করিস্সামীতি সিক্খা করণীযা’’তি। ন হরিতে অগিলানেন উচ্চারো ৰা পস্সাৰো ৰা খেল়ো ৰা কাতব্বো। যো অনাদরিযং পটিচ্চ হরিতে অগিলানো উচ্চারং ৰা পস্সাৰং ৰা খেল়ং ৰা করোতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, অপ্পহরিতে কতো হরিতং ওত্থরতি, আপদাসু, উম্মত্তকস্স, আদিকম্মিকস্সাতি। চুদ্দসমসিক্খাপদং নিট্ঠিতং। ৬৫৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ উদকে উচ্চারম্পি পস্সাৰম্পি খেল়ম্পি করোন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা উদকে উচ্চারম্পি পস্সাৰম্পি খেল়ম্পি করিস্সন্তি, সেয্যথাপি গিহী কামভোগিনো’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ উদকে উচ্চারম্পি পস্সাৰম্পি খেল়ম্পি করিস্সন্তী’’তি…পে॰… সচ্চং কির তুম্হে, ভিক্খৰে, উদকে উচ্চারম্পি পস্সাৰম্পি খেল়ম্পি করোথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, উদকে উচ্চারম্পি পস্সাৰম্পি খেল়ম্পি করিস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘ন উদকে উচ্চারং ৰা পস্সাৰং ৰা খেল়ং ৰা করিস্সামীতি সিক্খা করণীযা’’তি। এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি। ৬৫৪. তেন খো পন সমযেন গিলানা ভিক্খূ উদকে উচ্চারম্পি পস্সাৰম্পি খেল়ম্পি কাতুং কুক্কুচ্চাযন্তি। ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, গিলানেন ভিক্খুনা উদকে উচ্চারম্পি পস্সাৰম্পি খেল়ম্পি কাতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘ন উদকে অগিলানো উচ্চারং ৰা পস্সাৰং ৰা খেল়ং ৰা করিস্সামীতি সিক্খা করণীযা’’তি। ন উদকে অগিলানেন উচ্চারো ৰা পস্সাৰো ৰা খেল়ো ৰা কাতব্বো। যো অনাদরিযং পটিচ্চ উদকে অগিলানো উচ্চারং ৰা পস্সাৰং ৰা খেল়ং ৰা করোতি, আপত্তি দুক্কটস্স। অনাপত্তি অসঞ্চিচ্চ, অস্সতিযা, অজানন্তস্স, গিলানস্স, থলে কতো উদকং ওত্থরতি, আপদাসু, উম্মত্তকস্স, খিত্তচিত্তস্স, ৰেদনাট্টস্স, আদিকম্মিকস্সাতি। পন্নরসমসিক্খাপদং নিট্ঠিতং। পাদুকৰগ্গো সত্তমো। উদ্দিট্ঠা খো, আযস্মন্তো, সেখিযা ধম্মা। তত্থাযস্মন্তে পুচ্ছামি – ‘‘কচ্চিত্থ পরিসুদ্ধা’’? দুতিযম্পি পুচ্ছামি – ‘‘কচ্চিত্থ পরিসুদ্ধা’’? ততিযম্পি পুচ্ছামি – ‘‘কচ্চিত্থ পরিসুদ্ধা’’? পরিসুদ্ধেত্থাযস্মন্তো, তস্মা তুণ্হী, এৰমেতং ধারযামীতি। সেখিযা নিট্ঠিতা। সেখিযকণ্ডং নিট্ঠিতং। |
Copyright © 2011 Bangladesh Buddhist. All rights reserved. |