 |
সেদমোচনগাথা
১. অৰিপ্পৰাসপঞ্হা ৪৭৯. অসংৰাসো ভিক্খূহি চ ভিক্খুনীহি চ। সম্ভোগো একচ্চো তহিং ন লব্ভতি। অৰিপ্পৰাসেন অনাপত্তি। পঞ্হা মেসা কুসলেহি চিন্তিতা॥ অৰিস্সজ্জিযং অৰেভঙ্গিযং। পঞ্চ ৰুত্তা মহেসিনা। ৰিস্সজ্জন্তস্স পরিভুঞ্জন্তস্স অনাপত্তি। পঞ্হা মেসা কুসলেহি চিন্তিতা॥ দস পুগ্গলে ন ৰদামি, একাদস ৰিৰজ্জিয। ৰুড্ঢং ৰন্দন্তস্স আপত্তি, পঞ্হা মেসা কুসলেহি চিন্তিতা॥ ন উক্খিত্তকো ন চ পন পারিৰাসিকো। ন সঙ্ঘভিন্নো ন চ পন পক্খসঙ্কন্তো। সমানসংৰাসকভূমিযা ঠিতো। কথং নু সিক্খায অসাধারণো সিযা। পঞ্হা মেসা কুসলেহি চিন্তিতা॥ উপেতি ধম্মং পরিপুচ্ছমানো, কুসলং অত্থূপসঞ্হিতং। ন জীৰতি ন মতো ন নিব্বুতো, তং পুগ্গলং কতমং ৰদন্তি বুদ্ধা। পঞ্হা মেসা কুসলেহি চিন্তিতা॥ উব্ভক্খকে ন ৰদামি, অধো নাভিং ৰিৰজ্জিয। মেথুনধম্মপচ্চযা, কথং পারাজিকো সিযা। পঞ্হা মেসা কুসলেহি চিন্তিতা॥ ভিক্খু সঞ্ঞাচিকায কুটিং করোতি। অদেসিতৰত্থুকং পমাণাতিক্কন্তং। সারম্ভং অপরিক্কমনং অনাপত্তি। পঞ্হা মেসা কুসলেহি চিন্তিতা॥ ভিক্খু সঞ্ঞাচিকায কুটিং করোতি। দেসিতৰত্থুকং পমাণিকং। অনারম্ভং সপরিক্কমনং আপত্তি। পঞ্হা মেসা কুসলেহি চিন্তিতা॥ ন কাযিকং কিঞ্চি পযোগমাচরে। ন চাপি ৰাচায পরে ভণেয্য। আপজ্জেয্য গরুকং ছেজ্জৰত্থুং। পঞ্হা মেসা কুসলেহি চিন্তিতা॥ ন কাযিকং ৰাচসিকঞ্চ কিঞ্চি। মনসাপি সন্তো ন করেয্য পাপং। সো নাসিতো কিন্তি সুনাসিতো ভৰে। পঞ্হা মেসা কুসলেহি চিন্তিতা॥ অনালপন্তো মনুজেন কেনচি। ৰাচাগিরং নো চ পরে ভণেয্য। আপজ্জেয্য ৰাচসিকং ন কাযিকং। পঞ্হা মেসা কুসলেহি চিন্তিতা॥ সিক্খাপদা বুদ্ধৰরেন ৰণ্ণিতা। সঙ্ঘাদিসেসা চতুরো ভৰেয্যুং। আপজ্জেয্য একপযোগেন সব্বে। পঞ্হা মেসা কুসলেহি চিন্তিতা॥ উভো একতো উপসম্পন্না। উভিন্নং হত্থতো চীৰরং পটিগ্গণ্হেয্য। সিযা আপত্তিযো নানা। পঞ্হা মেসা কুসলেহি চিন্তিতা॥ চতুরো জনা সংৰিধায। গরুভণ্ডং অৰাহরুং। তযো পারাজিকা একো ন পারাজিকো। পঞ্হা মেসা কুসলেহি চিন্তিতা॥ ২. পারাজিকাদিপঞ্হা ৪৮০. ইত্থী চ অব্ভন্তরে সিযা, ভিক্খু চ বহিদ্ধা সিযা। ছিদ্দং তস্মিং ঘরে নত্থি। মেথুনধম্মপচ্চযা। কথং পারাজিকো সিযা। পঞ্হা মেসা কুসলেহি চিন্তিতা॥ তেলং মধুং ফাণিতঞ্চাপি সপ্পিং। সামং গহেত্ৰান নিক্খিপেয্য। অৰীতিৰত্তে সত্তাহে। সতি পচ্চযে পরিভুঞ্জন্তস্স আপত্তি। পঞ্হা মেসা কুসলেহি চিন্তিতা॥ নিস্সগ্গিযেন আপত্তি। সুদ্ধকেন পাচিত্তিযং। আপজ্জন্তস্স একতো। পঞ্হা মেসা কুসলেহি চিন্তিতা॥ ভিক্খূ সিযা ৰীসতিযা সমাগতা। কম্মং করেয্যুং সমগ্গসঞ্ঞিনো। ভিক্খু সিযা দ্ৰাদসযোজনে ঠিতো। কম্মঞ্চ তং কুপ্পেয্য ৰগ্গপচ্চযা। পঞ্হা মেসা কুসলেহি চিন্তিতা॥ পদৰীতিহারমত্তেন ৰাচায ভণিতেন চ। সব্বানি গরুকানি সপ্পটিকম্মানি। চতুসট্ঠি আপত্তিযো আপজ্জেয্য একতো। পঞ্হা মেসা কুসলেহি চিন্তিতা॥ নিৰত্থো অন্তরৰাসকেন। দিগুণং সঙ্ঘাটিং পারুতো। সব্বানি তানি নিস্সগ্গিযানি হোন্তি। পঞ্হা মেসা কুসলেহি চিন্তিতা॥ ন চাপি ঞত্তি ন চ পন কম্মৰাচা। ন চেহি ভিক্খূতি জিনো অৰোচ। সরণগমনম্পি ন তস্স অত্থি। উপসম্পদা চস্স অকুপ্পা। পঞ্হা মেসা কুসলেহি চিন্তিতা॥ ইত্থিং হনে ন মাতরং, পুরিসঞ্চ ন পিতরং হনে। হনেয্য অনরিযং মন্দো, তেন চানন্তরং ফুসে। পঞ্হা মেসা কুসলেহি চিন্তিতা॥ ইত্থিং হনে চ মাতরং, পুরিসঞ্চ পিতরং হনে। মাতরং পিতরং হন্ত্ৰা, ন তেনানন্তরং ফুসে। পঞ্হা মেসা কুসলেহি চিন্তিতা॥ অচোদযিত্ৰা অস্সারযিত্ৰা। অসম্মুখীভূতস্স করেয্য কম্মং। কতঞ্চ কম্মং সুকতং ভৰেয্য। কারকো চ সঙ্ঘো অনাপত্তিকো সিযা। পঞ্হা মেসা কুসলেহি চিন্তিতা॥ চোদযিত্ৰা সারযিত্ৰা। সম্মুখীভূতস্স করেয্য কম্মং। কতঞ্চ কম্মং অকতং ভৰেয্য। কারকো চ সঙ্ঘো সাপত্তিকো সিযা। পঞ্হা মেসা কুসলেহি চিন্তিতা॥ ছিন্দন্তস্স আপত্তি, ছিন্দন্তস্স অনাপত্তি। ছাদেন্তস্স আপত্তি, ছাদেন্তস্স অনাপত্তি। পঞ্হা মেসা কুসলেহি চিন্তিতা॥ সচ্চং ভণন্তো গরুকং, মুসা চ লহু ভাসতো। মুসা ভণন্তো গরুকং, সচ্চঞ্চ লহু ভাসতো। পঞ্হা মেসা কুসলেহি চিন্তিতা॥ ৩. পাচিত্তিযাদিপঞ্হা ৪৮১. অধিট্ঠিতং রজনায রত্তং। কপ্পকতম্পি সন্তং। পরিভুঞ্জন্তস্স আপত্তি। পঞ্হা মেসা কুসলেহি চিন্তিতা॥ অত্থঙ্গতে সূরিযে ভিক্খু মংসানি খাদতি। ন উম্মত্তকো ন চ পন খিত্তচিত্তো। ন চাপি সো ৰেদনাট্টো ভৰেয্য। ন চস্স হোতি আপত্তি। সো চ ধম্মো সুগতেন দেসিতো। পঞ্হা মেসা কুসলেহি চিন্তিতা॥ ন রত্তচিত্তো ন চ পন থেয্যচিত্তো। ন চাপি সো পরং মরণায চেতযি। সলাকং দেন্তস্স হোতি ছেজ্জং। পটিগ্গণ্হন্তস্স থুল্লচ্চযং। পঞ্হা মেসা কুসলেহি চিন্তিতা॥ ন চাপি আরঞ্ঞকং সাসঙ্কসম্মতং। ন চাপি সঙ্ঘেন সম্মুতি দিন্না। ন চস্স কথিনং অত্থতং তত্থেৰ। চীৰরং নিক্খিপিত্ৰা গচ্ছেয্য অড্ঢযোজনং। তত্থেৰ অরুণং উগ্গচ্ছন্তস্স অনাপত্তি। পঞ্হা মেসা কুসলেহি চিন্তিতা॥ কাযিকানি ন ৰাচসিকানি। সব্বানি নানাৰত্থুকানি। অপুব্বং অচরিমং আপজ্জেয্য একতো। পঞ্হা মেসা কুসলেহি চিন্তিতা॥ ৰাচসিকানি ন কাযিকানি। সব্বানি নানাৰত্থুকানি। অপুব্বং অচরিমং আপজ্জেয্য একতো। পঞ্হা মেসা কুসলেহি চিন্তিতা॥ তিস্সিত্থিযো মেথুনং তং ন সেৰে। তযো পুরিসে তযো অনরিযপণ্ডকে। ন চাচরে মেথুনং ব্যঞ্জনস্মিং। ছেজ্জং সিযা মেথুনধম্মপচ্চযা। পঞ্হা মেসা কুসলেহি চিন্তিতা॥ মাতরং চীৰরং যাচে, নো চ সঙ্ঘে [নো সংঘস্স (ক॰), নো চ সংঘস্স (স্যা॰), নো চে সংঘস্স (সী॰)] পরিণতং। কেনস্স হোতি আপত্তি, অনাপত্তি চ ঞাতকে। পঞ্হা মেসা কুসলেহি চিন্তিতা॥ কুদ্ধো আরাধকো হোতি, কুদ্ধো হোতি গরহিযো। অথ কো নাম সো ধম্মো, যেন কুদ্ধো পসংসিযো। পঞ্হা মেসা কুসলেহি চিন্তিতা॥ তুট্ঠো আরাধকো হোতি, তুট্ঠো হোতি গরহিযো। অথ কো নাম সো ধম্মো, যেন তুট্ঠো গরহিযো। পঞ্হা মেসা কুসলেহি চিন্তিতা॥ সঙ্ঘাদিসেসং থুল্লচ্চযং। পাচিত্তিযং পাটিদেসনীযং। দুক্কটং আপজ্জেয্য একতো। পঞ্হা মেসা কুসলেহি চিন্তিতা॥ উভো পরিপুণ্ণৰীসতিৰস্সা। উভিন্নং একুপজ্ঝাযো। একাচরিযো একা কম্মৰাচা। একো উপসম্পন্নো একো অনুপসম্পন্নো। পঞ্হা মেসা কুসলেহি চিন্তিতা॥ অকপ্পকতং নাপি রজনায রত্তং। তেন নিৰত্থো যেন কামং ৰজেয্য। ন চস্স হোতি আপত্তি। সো চ ধম্মো সুগতেন দেসিতো। পঞ্হা মেসা কুসলেহি চিন্তিতা॥ ন দেতি ন পটিগ্গণ্হাতি, পটিগ্গহো তেন ন ৰিজ্জতি। আপজ্জতি গরুকং ন লহুকং, তঞ্চ পরিভোগপচ্চযা। পঞ্হা মেসা কুসলেহি চিন্তিতা॥ ন দেতি ন পটিগ্গণ্হাতি, পটিগ্গহো তেন ন ৰিজ্জতি। আপজ্জতি লহুকং ন গরুকং, তঞ্চ পরিভোগপচ্চযা। পঞ্হা মেসা কুসলেহি চিন্তিতা॥ আপজ্জতি গরুকং সাৰসেসং। ছাদেতি অনাদরিযং পটিচ্চ। ন ভিক্খুনী নো চ ফুসেয্য ৰজ্জং। পঞ্হা মেসা কুসলেহি চিন্তিতা॥ সেদমোচনগাথা নিট্ঠিতা। তস্সুদ্দানং – অসংৰাসো অৰিস্সজ্জি, দস চ অনুক্খিত্তকো। উপেতি ধম্মং উব্ভক্খকং, ততো সঞ্ঞাচিকা চ দ্ৰে॥ ন কাযিকঞ্চ গরুকং, ন কাযিকং ন ৰাচসিকং [ন কাযিকং সুনাসিতং (স্যা॰)]। অনালপন্তো সিক্খা চ, উভো চ চতুরো জনা॥ ইত্থী তেলঞ্চ নিস্সগ্গি, ভিক্খু চ পদৰীতিযো। নিৰত্থো চ ন চ ঞত্তি, ন মাতরং পিতরং হনে॥ অচোদযিত্ৰা চোদযিত্ৰা, ছিন্দন্তং সচ্চমেৰ চ। অধিট্ঠিতঞ্চত্থঙ্গতে, ন রত্তং ন চারঞ্ঞকং॥ কাযিকা ৰাচসিকা চ, তিস্সিত্থী চাপি মাতরং। কুদ্ধো আরাধকো তুট্ঠো, সঙ্ঘাদিসেসা চ উভো॥ অকপ্পকতং ন দেতি, ন দেতাপজ্জতী গরুং। সেদমোচনিকা গাথা, পঞ্হা ৰিঞ্ঞূহি ৰিভাৰিতাতি [ৰিঞ্ঞূৰিভাৰিতা (সী॰ স্যা॰)]॥ |
Copyright © 2011 Bangladesh Buddhist. All rights reserved |
