২. সঙ্ঘাদিসেসকণ্ডং
১. সুক্কৰিস্সট্ঠিসিক্খাপদং ইমে খো পনাযস্মন্তো তেরস সঙ্ঘাদিসেসা ধম্মা উদ্দেসং আগচ্ছন্তি। ২৩৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা সেয্যসকো অনভিরতো ব্রহ্মচরিযং চরতি। সো তেন কিসো হোতি লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো। অদ্দস খো আযস্মা উদাযী আযস্মন্তং সেয্যসকং কিসং লূখং দুব্বণ্ণং উপ্পণ্ডুপ্পণ্ডুকজাতং ধমনিসন্থতগত্তং। দিস্ৰান আযস্মন্তং সেয্যসকং এতদৰোচ – ‘‘কিস্স ত্ৰং, আৰুসো সেয্যসক, কিসো লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো? কচ্চি নো ত্ৰং, আৰুসো সেয্যসক, অনভিরতো ব্রহ্মচরিযং চরসী’’তি? ‘‘এৰমাৰুসো’’তি। ‘‘তেন হি ত্ৰং, আৰুসো সেয্যসক, যাৰদত্থং ভুঞ্জ যাৰদত্থং সুপ যাৰদত্থং ন্হায। যাৰদত্থং ভুঞ্জিত্ৰা যাৰদত্থং সুপিত্ৰা যাৰদত্থং ন্হাযিত্ৰা যদা তে অনভিরতি উপ্পজ্জতি রাগো চিত্তং অনুদ্ধংসেতি তদা হত্থেন উপক্কমিত্ৰা অসুচিং মোচেহী’’তি। ‘‘কিং নু খো, আৰুসো, কপ্পতি এৰরূপং কাতু’’ন্তি? ‘‘আম, আৰুসো। অহম্পি এৰং করোমী’’তি। অথ খো আযস্মা সেয্যসকো যাৰদত্থং ভুঞ্জি যাৰদত্থং সুপি যাৰদত্থং ন্হাযি। যাৰদত্থং ভুঞ্জিত্ৰা যাৰদত্থং সুপিত্ৰা যাৰদত্থং ন্হাযিত্ৰা যদা অনভিরতি উপ্পজ্জতি রাগো চিত্তং অনুদ্ধংসেতি তদা হত্থেন উপক্কমিত্ৰা অসুচিং মোচেসি । অথ খো আযস্মা সেয্যসকো অপরেন সমযেন ৰণ্ণৰা অহোসি পীণিন্দ্রিযো পসন্নমুখৰণ্ণো ৰিপ্পসন্নছৰিৰণ্ণো। অথ খো আযস্মতো সেয্যসকস্স সহাযকা ভিক্খূ আযস্মন্তং সেয্যসকং এতদৰোচুং – ‘‘পুব্বে খো ত্ৰং, আৰুসো সেয্যসক, কিসো অহোসি লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো। সো দানি ত্ৰং এতরহি ৰণ্ণৰা পীণিন্দ্রিযো পসন্নমুখৰণ্ণো ৰিপ্পসন্নছৰিৰণ্ণো। কিং নু খো ত্ৰং, আৰুসো সেয্যসক, ভেসজ্জং করোসী’’তি? ‘‘ন খো অহং, আৰুসো, ভেসজ্জং করোমি । অপিচাহং যাৰদত্থং ভুঞ্জামি যাৰদত্থং সুপামি যাৰদত্থং ন্হাযামি। যাৰদত্থং ভুঞ্জিত্ৰা যাৰদত্থং সুপিত্ৰা যাৰদত্থং ন্হাযিত্ৰা যদা মে অনভিরতি উপ্পজ্জতি রাগো চিত্তং অনুদ্ধংসেতি তদা হত্থেন উপক্কমিত্ৰা অসুচিং মোচেমী’’তি। ‘‘কিং পন ত্ৰং, আৰুসো সেয্যসক, যেনেৰ হত্থেন সদ্ধাদেয্যং ভুঞ্জসি তেনেৰ হত্থেন উপক্কমিত্ৰা অসুচিং মোচেসী’’তি? ‘‘এৰমাৰুসো’’তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা সেয্যসকো হত্থেন উপক্কমিত্ৰা অসুচিং মোচেস্সতী’’তি! অথ খো তে ভিক্খূ আযস্মন্তং সেয্যসকং অনেকপরিযাযেন ৰিগরহিত্ৰা ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং সেয্যসকং পটিপুচ্ছি – ‘‘সচ্চং কির ত্ৰং, সেয্যসক, হত্থেন উপক্কমিত্ৰা অসুচিং মোচেসী’’তি? ‘‘সচ্চং, ভগৰা’’তি । ৰিগরহি বুদ্ধো ভগৰা – ‘‘অননুচ্ছৰিকং, মোঘপুরিস, অননুলোমিকং অপ্পতিরূপং অস্সামণকং অকপ্পিযং অকরণীযং। কথঞ্হি নাম ত্ৰং, মোঘপুরিস, হত্থেন উপক্কমিত্ৰা অসুচিং মোচেস্সসি! ননু মযা, মোঘপুরিস, অনেকপরিযাযেন ৰিরাগায ধম্মো দেসিতো নো সরাগায, ৰিসঞ্ঞোগায ধম্মো দেসিতো নো সঞ্ঞোগায, অনুপাদানায ধম্মো দেসিতো নো সউপাদানায! তত্থ নাম ত্ৰং, মোঘপুরিস, মযা ৰিরাগায ধম্মে দেসিতে সরাগায চেতেস্সসি, ৰিসঞ্ঞোগায ধম্মে দেসিতে সঞ্ঞোগায চেতেস্সসি, অনুপাদানায ধম্মে দেসিতে সউপাদানায চেতেস্সসি! ননু মযা, মোঘপুরিস, অনেকপরিযাযেন রাগৰিরাগায ধম্মো দেসিতো, মদনিম্মদনায পিপাসৰিনযায আলযসমুগ্ঘাতায ৰট্টুপচ্ছেদায তণ্হক্খযায ৰিরাগায নিরোধায নিব্বানায ধম্মো দেসিতো? ননু মযা, মোঘপুরিস, অনেকপরিযাযেন কামানং পহানং অক্খাতং, কামসঞ্ঞানং পরিঞ্ঞা অক্খাতা, কামপিপাসানং পটিৰিনযো অক্খাতো, কামৰিতক্কানং সমুগ্ঘাতো অক্খাতো, কামপরিল়াহানং ৰূপসমো অক্খাতো? নেতং, মোঘপুরিস, অপ্পসন্নানং ৰা পসাদায, পসন্নানং ৰা ভিয্যোভাৰায। অথ খ্ৰেতং, মোঘপুরিস, অপ্পসন্নানঞ্চেৰ অপ্পসাদায, পসন্নানঞ্চ একচ্চানং অঞ্ঞথত্তাযা’’তি। অথ খো ভগৰা আযস্মন্তং সেয্যসকং অনেকপরিযাযেন ৰিগরহিত্ৰা দুব্ভরতায…পে॰… ‘‘এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘সঞ্চেতনিকা সুক্কৰিস্সট্ঠি [ৰিসট্ঠি (সী॰ স্যা॰)] সঙ্ঘাদিসেসো’’তি। এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি। ২৩৫. তেন খো পন সমযেন ভিক্খূ পণীতভোজনানি ভুঞ্জিত্ৰা মুট্ঠস্সতী অসম্পজানা নিদ্দং ওক্কমন্তি। তেসং মুট্ঠস্সতীনং অসম্পজানানং নিদ্দং ওক্কমন্তানং সুপিনন্তেন অসুচি মুচ্চতি। তেসং কুক্কুচ্চং অহোসি – ‘‘ভগৰতা সিক্খাপদং পঞ্ঞত্তং – ‘সঞ্চেতনিকা সুক্কৰিস্সট্ঠি সঙ্ঘাদিসেসো’তি। অম্হাকঞ্চ সুপিনন্তেন অসুচি মুচ্চতি। অত্থি চেত্থ চেতনা লব্ভতি। কচ্চি নু খো মযং সঙ্ঘাদিসেসং আপত্তিং আপন্না’’তি? ভগৰতো এতমত্থং আরোচেসুং। ‘‘অত্থেসা, ভিক্খৰে, চেতনা; সা চ খো অব্বোহারিকাতি। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ২৩৬. ‘‘সঞ্চেতনিকা সুক্কৰিস্সট্ঠি অঞ্ঞত্র সুপিনন্তা সঙ্ঘাদিসেসো’’তি। ২৩৭. সঞ্চেতনিকাতি জানন্তো সঞ্জানন্তো চেচ্চ অভিৰিতরিত্ৰা ৰীতিক্কমো। সুক্কন্তি দস সুক্কানি – নীলং পীতকং লোহিতকং ওদাতং তক্কৰণ্ণং দকৰণ্ণং তেলৰণ্ণং খীরৰণ্ণং দধিৰণ্ণং সপ্পিৰণ্ণং। ৰিস্সট্ঠীতি ঠানতো চাৰনা ৰুচ্চতি ৰিস্সট্ঠীতি। অঞ্ঞত্র সুপিনন্তাতি ঠপেত্ৰা সুপিনন্তং। সঙ্ঘাদিসেসোতি সঙ্ঘোৰ তস্সা আপত্তিযা পরিৰাসং দেতি, মূলায পটিকস্সতি, মানত্তং দেতি , অব্ভেতি; ন সম্বহুলা, ন একপুগ্গলো। তেন ৰুচ্চতি – ‘‘সঙ্ঘাদিসেসো’’তি। তস্সেৰ আপত্তিনিকাযস্স নামকম্মং অধিৰচনং। তেনপি ৰুচ্চতি – ‘‘সঙ্ঘাদিসেসো’’তি। অজ্ঝত্তরূপে মোচেতি, বহিদ্ধারূপে মোচেতি, অজ্ঝত্তবহিদ্ধারূপে মোচেতি, আকাসে কটিং কম্পেন্তো মোচেতি; রাগূপত্থম্ভে মোচেতি, ৰচ্চূপত্থম্ভে মোচেতি, পস্সাৰূপত্থম্ভে মোচেতি, ৰাতূপত্থম্ভে মোচেতি , উচ্চালিঙ্গপাণকদট্ঠূপত্থম্ভে মোচেতি; আরোগ্যত্থায মোচেতি, সুখত্থায মোচেতি, ভেসজ্জত্থায মোচেতি, দানত্থায মোচেতি, পুঞ্ঞত্থায মোচেতি, যঞ্ঞত্থায মোচেতি, সগ্গত্থায মোচেতি, বীজত্থায মোচেতি, ৰীমংসত্থায মোচেতি, দৰত্থায মোচেতি; নীলং মোচেতি, পীতকং মোচেতি, লোহিতকং মোচেতি, ওদাতং মোচেতি, তক্কৰণ্ণং মোচেতি, দকৰণ্ণং মোচেতি, তেলৰণ্ণং মোচেতি, খীরৰণ্ণং মোচেতি, দধিৰণ্ণং মোচেতি, সপ্পিৰণ্ণং মোচেতি। ২৩৮. অজ্ঝত্তরূপেতি অজ্ঝত্তং উপাদিন্নে [উপাদিণ্ণে (সী॰ ক॰)] রূপে। বহিদ্ধারূপেতি বহিদ্ধা উপাদিন্নে ৰা অনুপাদিন্নে ৰা। অজ্ঝত্তবহিদ্ধারূপেতি তদুভযে। আকাসে কটিং কম্পেন্তোতি আকাসে ৰাযমন্তস্স অঙ্গজাতং কম্মনিযং হোতি। রাগূপত্থম্ভেতি রাগেন পীল়িতস্স অঙ্গজাতং কম্মনিযং হোতি। ৰচ্চূপত্থম্ভেতি ৰচ্চেন পীল়িতস্স অঙ্গজাতং কম্মনিযং হোতি। পস্সাৰূপত্থম্ভেতি পস্সাৰেন পীল়িতস্স অঙ্গজাতং কম্মনিযং হোতি। ৰাতূপত্থম্ভেতি ৰাতেন পীল়িতস্স অঙ্গজাতং কম্মনিযং হোতি। উচ্চালিঙ্গপাণকদট্ঠূপত্থম্ভেতি উচ্চালিঙ্গপাণকদট্ঠেন অঙ্গজাতং কম্মনিযং হোতি। ২৩৯. আরোগ্যত্থাযাতি অরোগো ভৰিস্সামি। সুখত্থাযাতি সুখং ৰেদনং উপ্পাদেস্সামি। ভেসজ্জত্থাযাতি ভেসজ্জং ভৰিস্সতি। দানত্থাযাতি দানং দস্সামি। পুঞ্ঞত্থাযাতি পুঞ্ঞং ভৰিস্সতি। যঞ্ঞত্থাযাতি যঞ্ঞং যজিস্সামি। সগ্গত্থাযাতি সগ্গং গমিস্সামি। বীজত্থাযাতি বীজং ভৰিস্সতি। ৰীমংসত্থাযাতি নীলং ভৰিস্সতি, পীতকং ভৰিস্সতি, লোহিতকং ভৰিস্সতি, ওদাতং ভৰিস্সতি, তক্কৰণ্ণং ভৰিস্সতি, দকৰণ্ণং ভৰিস্সতি, তেলৰণ্ণং ভৰিস্সতি, খীরৰণ্ণং ভৰিস্সতি, দধিৰণ্ণং ভৰিস্সতি, সপ্পিৰণ্ণং ভৰিস্সতীতি। দৰত্থাযাতি খিড্ডাধিপ্পাযো। ২৪০. অজ্ঝত্তরূপে চেতেতি উপক্কমতি মুচ্চতি, আপত্তি সঙ্ঘাদিসেসস্স। বহিদ্ধারূপে চেতেতি উপক্কমতি মুচ্চতি, আপত্তি সঙ্ঘাদিসেসস্স। অজ্ঝত্তবহিদ্ধারূপে চেতেতি উপক্কমতি মুচ্চতি, আপত্তি সঙ্ঘাদিসেসস্স। আকাসে কটিং কম্পেন্তো চেতেতি উপক্কমতি মুচ্চতি, আপত্তি সঙ্ঘাদিসেসস্স। রাগূপত্থম্ভে চেতেতি উপক্কমতি মুচ্চতি, আপত্তি সঙ্ঘাদিসেসস্স। ৰচ্চূপত্থম্ভে চেতেতি উপক্কমতি মুচ্চতি, আপত্তি সঙ্ঘাদিসেসস্স। পস্সাৰূপত্থম্ভে চেতেতি উপক্কমতি মুচ্চতি, আপত্তি সঙ্ঘাদিসেসস্স। ৰাতূপত্থম্ভে চেতেতি উপক্কমতি মুচ্চতি, আপত্তি সঙ্ঘাদিসেসস্স। উচ্চালিঙ্গপাণকদট্ঠূপত্থম্ভে চেতেতি উপক্কমতি মুচ্চতি, আপত্তি সঙ্ঘাদিসেসস্স। আরোগ্যত্থায চেতেতি উপক্কমতি মুচ্চতি, আপত্তি সঙ্ঘাদিসেসস্স। সুখত্থায…পে॰… ভেসজ্জত্থায… দানত্থায… পুঞ্ঞত্থায… যঞ্ঞত্থায… সগ্গত্থায… বীজত্থায… ৰীমংসত্থায… দৰত্থায চেতেতি উপক্কমতি মুচ্চতি, আপত্তি সঙ্ঘাদিসেসস্স। নীলং চেতেতি উপক্কমতি মুচ্চতি, আপত্তি সঙ্ঘাদিসেসস্স । পীতকং… লোহিতকং… ওদাতং… তক্কৰণ্ণং… দকৰণ্ণং… তেলৰণ্ণং… খীরৰণ্ণং… দধিৰণ্ণং… সপ্পিৰণ্ণং চেতেতি উপক্কমতি মুচ্চতি, আপত্তি সঙ্ঘাদিসেসস্স। সুদ্ধিকং নিট্ঠিতং। আরোগ্যত্থঞ্চ সুখত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। আরোগ্যত্থঞ্চ ভেসজ্জত্থঞ্চ…পে॰… আরোগ্যত্থঞ্চ দানত্থঞ্চ… আরোগ্যত্থঞ্চ পুঞ্ঞত্থঞ্চ… আরোগ্যত্থঞ্চ যঞ্ঞত্থঞ্চ… আরোগ্যত্থঞ্চ সগ্গত্থঞ্চ… আরোগ্যত্থঞ্চ বীজত্থঞ্চ… আরোগ্যত্থঞ্চ ৰীমংসত্থঞ্চ… আরোগ্যত্থঞ্চ দৰত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। একমূলকস্স খণ্ডচক্কং নিট্ঠিতং। ২৪১. সুখত্থঞ্চ ভেসজ্জত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। সুখত্থঞ্চ দানত্থঞ্চ…পে॰… সুখত্থঞ্চ পুঞ্ঞত্থঞ্চ… সুখত্থঞ্চ যঞ্ঞত্থঞ্চ… সুখত্থঞ্চ সগ্গত্থঞ্চ… সুখত্থঞ্চ বীজত্থঞ্চ… সুখত্থঞ্চ ৰীমংসত্থঞ্চ… সুখত্থঞ্চ দৰত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। সুখত্থঞ্চ আরোগ্যত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। ২৪২. ভেসজ্জত্থঞ্চ দানত্থঞ্চ…পে॰… ভেসজ্জত্থঞ্চ পুঞ্ঞত্থঞ্চ… ভেসজ্জত্থঞ্চ যঞ্ঞত্থঞ্চ… ভেসজ্জত্থঞ্চ সগ্গত্থঞ্চ… ভেসজ্জত্থঞ্চ বীজত্থঞ্চ… ভেসজ্জত্থঞ্চ ৰীমংসত্থঞ্চ… ভেসজ্জত্থঞ্চ দৰত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। ভেসজ্জত্থঞ্চ আরোগ্যত্থঞ্চ…পে॰… ভেসজ্জত্থঞ্চ সুখত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। দানত্থঞ্চ পুঞ্ঞত্থঞ্চ…পে॰… দানত্থঞ্চ যঞ্ঞত্থঞ্চ… দানত্থঞ্চ সগ্গত্থঞ্চ… দানত্থঞ্চ বীজত্থঞ্চ… দানত্থঞ্চ ৰীমংসত্থঞ্চ… দানত্থঞ্চ দৰত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। দানত্থঞ্চ আরোগ্যত্থঞ্চ…পে॰… দানত্থঞ্চ সুখত্থঞ্চ… দানত্থঞ্চ ভেসজ্জত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। পুঞ্ঞত্থঞ্চ যঞ্ঞত্থঞ্চ…পে॰… পুঞ্ঞত্থঞ্চ সগ্গত্থঞ্চ… পুঞ্ঞত্থঞ্চ বীজত্থঞ্চ… পুঞ্ঞত্থঞ্চ ৰীমংসত্থঞ্চ… পুঞ্ঞত্থঞ্চ দৰত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। পুঞ্ঞত্থঞ্চ আরোগ্যত্থঞ্চ…পে॰… পুঞ্ঞত্থঞ্চ সুখত্থঞ্চ… পুঞ্ঞত্থঞ্চ ভেসজ্জত্থঞ্চ… পুঞ্ঞত্থঞ্চ দানত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। যঞ্ঞত্থঞ্চ সগ্গত্থঞ্চ…পে॰… যঞ্ঞত্থঞ্চ বীজত্থঞ্চ… যঞ্ঞত্থঞ্চ ৰীমংসত্থঞ্চ … যঞ্ঞত্থঞ্চ দৰত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। যঞ্ঞত্থঞ্চ আরোগ্যত্থঞ্চ…পে॰… যঞ্ঞত্থঞ্চ সুখত্থঞ্চ… যঞ্ঞত্থঞ্চ ভেসজ্জত্থঞ্চ… যঞ্ঞত্থঞ্চ দানত্থঞ্চ… যঞ্ঞত্থঞ্চ পুঞ্ঞত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। সগ্গত্থঞ্চ বীজত্থঞ্চ…পে॰… সগ্গত্থঞ্চ ৰীমংসত্থঞ্চ… সগ্গত্থঞ্চ দৰত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। সগ্গত্থঞ্চ আরোগ্যত্থঞ্চ…পে॰… সগ্গত্থঞ্চ সুখত্থঞ্চ… সগ্গত্থঞ্চ ভেসজ্জত্থঞ্চ… সগ্গত্থঞ্চ দানত্থঞ্চ… সগ্গত্থঞ্চ পুঞ্ঞত্থঞ্চ… সগ্গত্থঞ্চ যঞ্ঞত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। বীজত্থঞ্চ ৰীমংসত্থঞ্চ…পে॰… বীজত্থঞ্চ দৰত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। বীজত্থঞ্চ আরোগ্যত্থঞ্চ…পে॰… বীজত্থঞ্চ সুখত্থঞ্চ… বীজত্থঞ্চ ভেসজ্জত্থঞ্চ… বীজত্থঞ্চ দানত্থঞ্চ… বীজত্থঞ্চ পুঞ্ঞত্থঞ্চ… বীজত্থঞ্চ যঞ্ঞত্থঞ্চ… বীজত্থঞ্চ সগ্গত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। ৰীমংসত্থঞ্চ দৰত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। ৰীমংসত্থঞ্চ আরোগ্যত্থঞ্চ…পে॰… ৰীমংসত্থঞ্চ সুখত্থঞ্চ… ৰীমংসত্থঞ্চ ভেসজ্জত্থঞ্চ… ৰীমংসত্থঞ্চ দানত্থঞ্চ… ৰীমংসত্থঞ্চ পুঞ্ঞত্থঞ্চ… ৰীমংসত্থঞ্চ যঞ্ঞত্থঞ্চ… ৰীমংসত্থঞ্চ সগ্গত্থঞ্চ… ৰীমংসত্থঞ্চ বীজত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। দৰত্থঞ্চ আরোগ্যত্থঞ্চ…পে॰… দৰত্থঞ্চ সুখত্থঞ্চ… দৰত্থঞ্চ ভেসজ্জত্থঞ্চ… দৰত্থঞ্চ দানত্থঞ্চ… দৰত্থঞ্চ পুঞ্ঞত্থঞ্চ… দৰত্থঞ্চ যঞ্ঞত্থঞ্চ… দৰত্থঞ্চ সগ্গত্থঞ্চ… দৰত্থঞ্চ বীজত্থঞ্চ… দৰত্থঞ্চ ৰীমংসত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। একমূলকস্স বদ্ধচক্কং নিট্ঠিতং। আরোগ্যত্থঞ্চ সুখত্থঞ্চ ভেসজ্জত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স…পে॰… আরোগ্যত্থঞ্চ সুখত্থঞ্চ দৰত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। দুমূলকস্স খণ্ডচক্কং। সুখত্থঞ্চ ভেসজ্জত্থঞ্চ দানত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স…পে॰… সুখত্থঞ্চ ভেসজ্জত্থঞ্চ দৰত্থঞ্চ…পে॰… সুখত্থঞ্চ ভেসজ্জত্থঞ্চ আরোগ্যত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। দুমূলকস্স বদ্ধচক্কং সংখিত্তং। ৰীমংসত্থঞ্চ দৰত্থঞ্চ আরোগ্যত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। ৰীমংসত্থঞ্চ দৰত্থঞ্চ বীজত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। দুমূলকং নিট্ঠিতং। তিমূলকম্পি চতুমূলকম্পি পঞ্চমূলকম্পি ছমূলকম্পি সত্তমূলকম্পি অট্ঠমূলকম্পি নৰমূলকম্পি এৰমেৰ ৰিত্থারেতব্বং। ইদং সব্বমূলকং। ২৪৩. আরোগ্যত্থঞ্চ সুখত্থঞ্চ ভেসজ্জত্থঞ্চ দানত্থঞ্চ পুঞ্ঞত্থঞ্চ যঞ্ঞত্থঞ্চ সগ্গত্থঞ্চ বীজত্থঞ্চ ৰীমংসত্থঞ্চ দৰত্থঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। সব্বমূলকং নিট্ঠিতং। ২৪৪. নীলঞ্চ পীতকঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। নীলঞ্চ লোহিতকঞ্চ…পে॰… নীলঞ্চ ওদাতঞ্চ… নীলঞ্চ তক্কৰণ্ণঞ্চ… নীলঞ্চ দকৰণ্ণঞ্চ… নীলঞ্চ তেলৰণ্ণঞ্চ… নীলঞ্চ খীরৰণ্ণঞ্চ… নীলঞ্চ দধিৰণ্ণঞ্চ… নীলঞ্চ সপ্পিৰণ্ণঞ্চ চেতেতি উপক্কমতি মুচ্চত্তি, আপত্তি সঙ্ঘাদিসেসস্স। একমূলকস্স খণ্ডচক্কং নিট্ঠিতং। ২৪৫. পীতকঞ্চ লোহিতকঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। পীতকঞ্চ ওদাতঞ্চ…পে॰… পীতকঞ্চ তক্কৰণ্ণঞ্চ… পীতকঞ্চ দকৰণ্ণঞ্চ… পীতকঞ্চ তেলৰণ্ণঞ্চ… পীতকঞ্চ খীরৰণ্ণঞ্চ… পীতকঞ্চ দধিৰণ্ণঞ্চ… পীতকঞ্চ সপ্পিৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। পীতকঞ্চ নীলঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। একমূলকস্স বদ্ধচক্কং। ২৪৬. লোহিতকঞ্চ ওদাতঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। লোহিতকঞ্চ তক্কৰণ্ণঞ্চ…পে॰… লোহিতকঞ্চ দকৰণ্ণঞ্চ… লোহিতকঞ্চ তেলৰণ্ণঞ্চ… লোহিতকঞ্চ খীরৰণ্ণঞ্চ… লোহিতকঞ্চ দধিৰণ্ণঞ্চ… লোহিতকঞ্চ সপ্পিৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। লোহিতকঞ্চ নীলঞ্চ…পে॰… লোহিতকঞ্চ পীতকঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। ওদাতঞ্চ তক্কৰণ্ণঞ্চ…পে॰… ওদাতঞ্চ দকৰণ্ণঞ্চ… ওদাতঞ্চ তেলৰণ্ণঞ্চ… ওদাতঞ্চ খীরৰণ্ণঞ্চ… ওদাতঞ্চ দধিৰণ্ণঞ্চ… ওদাতঞ্চ সপ্পিৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। ওদাতঞ্চ নীলঞ্চ…পে॰… ওদাতঞ্চ পীতকঞ্চ… ওদাতঞ্চ লোহিতকঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। তক্কৰণ্ণঞ্চ দকৰণ্ণঞ্চ…পে॰… তক্কৰণ্ণঞ্চ তেলৰণ্ণঞ্চ… তক্কৰণ্ণঞ্চ খীরৰণ্ণঞ্চ… তক্কৰণ্ণঞ্চ দধিৰণ্ণঞ্চ… তক্কৰণ্ণঞ্চ সপ্পিৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। তক্কৰণ্ণঞ্চ নীলঞ্চ…পে॰… তক্কৰণ্ণঞ্চ পীতকঞ্চ… তক্কৰণ্ণঞ্চ লোহিতকঞ্চ… তক্কৰণ্ণঞ্চ ওদাতঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। দকৰণ্ণঞ্চ তেলৰণ্ণঞ্চ…পে॰… দকৰণ্ণঞ্চ খীরৰণ্ণঞ্চ… দকৰণ্ণঞ্চ দধিৰণ্ণঞ্চ… দকৰণ্ণঞ্চ সপ্পিৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। দকৰণ্ণঞ্চ নীলঞ্চ…পে॰… দকৰণ্ণঞ্চ পীতকঞ্চ… দকৰণ্ণঞ্চ লোহিতকঞ্চ… দকৰণ্ণঞ্চ ওদাতঞ্চ… দকৰণ্ণঞ্চ তক্কৰণ্ণঞ্চ চেতেতি উপক্কমতি মুচ্চতি , আপত্তি সঙ্ঘাদিসেসস্স। তেলৰণ্ণঞ্চ খীরৰণ্ণঞ্চ…পে॰… তেলৰণ্ণঞ্চ দধিৰণ্ণঞ্চ… তেলৰণ্ণঞ্চ সপ্পিৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। তেলৰণ্ণঞ্চ নীলঞ্চ…পে॰… তেলৰণ্ণঞ্চ পীতকঞ্চ… তেলৰণ্ণঞ্চ লোহিতকঞ্চ… তেলৰণ্ণঞ্চ ওদাতঞ্চ… তেলৰণ্ণঞ্চ তক্কৰণ্ণঞ্চ… তেলৰণ্ণঞ্চ দকৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। খীরৰণ্ণঞ্চ দধিৰণ্ণঞ্চ…পে॰… খীরৰণ্ণঞ্চ সপ্পিৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। খীরৰণ্ণঞ্চ নীলঞ্চ…পে॰… খীরৰণ্ণঞ্চ পীতকঞ্চ… খীরৰণ্ণঞ্চ লোহিতকঞ্চ… খীরৰণ্ণঞ্চ ওদাতঞ্চ… খীরৰণ্ণঞ্চ তক্কৰণ্ণঞ্চ… খীরৰণ্ণঞ্চ দকৰণ্ণঞ্চ… খীরৰণ্ণঞ্চ তেলৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। দধিৰণ্ণঞ্চ সপ্পিৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। দধিৰণ্ণঞ্চ নীলঞ্চ…পে॰… দধিৰণ্ণঞ্চ পীতকঞ্চ… দধিৰণ্ণঞ্চ লোহিতকঞ্চ… দধিৰণ্ণঞ্চ ওদাতঞ্চ… দধিৰণ্ণঞ্চ তক্কৰণ্ণঞ্চ… দধিৰণ্ণঞ্চ দকৰণ্ণঞ্চ… দধিৰণ্ণঞ্চ তেলৰণ্ণঞ্চ… দধিৰণ্ণঞ্চ খীরৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। সপ্পিৰণ্ণঞ্চ নীলঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। সপ্পিৰণ্ণঞ্চ পীতকঞ্চ…পে॰… সপ্পিৰণ্ণঞ্চ লোহিতকঞ্চ… সপ্পিৰণ্ণঞ্চ ওদাতঞ্চ… সপ্পিৰণ্ণঞ্চ তক্কৰণ্ণঞ্চ… সপ্পিৰণ্ণঞ্চ দকৰণ্ণঞ্চ… সপ্পিৰণ্ণঞ্চ তেলৰণ্ণঞ্চ… সপ্পিৰণ্ণঞ্চ খীরৰণ্ণঞ্চ … সপ্পিৰণ্ণঞ্চ দধিৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। একমূলকস্স বদ্ধচক্কং নিট্ঠিতং। নীলঞ্চ পীতকঞ্চ লোহিতকঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স…পে॰… নীলঞ্চ পীতকঞ্চ সপ্পিৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। দুমূলকস্স খণ্ডচক্কং। পীতকঞ্চ লোহিতকঞ্চ ওদাতঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স…পে॰… পীতকঞ্চ লোহিতকঞ্চ সপ্পিৰণ্ণঞ্চ…পে॰… পীতকঞ্চ লোহিতকঞ্চ নীলঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। দুমূলকস্স বদ্ধচক্কং সংখিত্তং। দধিৰণ্ণঞ্চ সপ্পিৰণ্ণঞ্চ নীলঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স…পে॰… দধিৰণ্ণঞ্চ সপ্পিৰণ্ণঞ্চ খীরৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। দুমূলকং নিট্ঠিতং। তিমূলকম্পি চতুমূলকম্পি পঞ্চমূলকম্পি ছমূলকম্পি সত্তমূলকম্পি অট্ঠমূলকম্পি নৰমূলকম্পি এৰমেৰ ৰিত্থারেতব্বং। ইদং সব্বমূলকং। ২৪৭. নীলঞ্চ পীতকঞ্চ লোহিতকঞ্চ ওদাতঞ্চ তক্কৰণ্ণঞ্চ দকৰণ্ণঞ্চ তেলৰণ্ণঞ্চ খীরৰণ্ণঞ্চ দধিৰণ্ণঞ্চ সপ্পিৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। সব্বমূলকং নিট্ঠিতং। ২৪৮. আরোগ্যত্থঞ্চ নীলঞ্চ [আরোগ্যত্থং নীলং (?)] চেতেতি উপক্কমতি মুচ্চতি, আপত্তি সঙ্ঘাদিসেসস্স। আরোগ্যত্থঞ্চ সুখত্থঞ্চ নীলঞ্চ পীতকঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। আরোগ্যত্থঞ্চ সুখত্থঞ্চ ভেসজ্জত্থঞ্চ নীলঞ্চ পীতকঞ্চ লোহিতকঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। উভতো ৰড্ঢকং এৰমেৰ ৰড্ঢেতব্বং। আরোগ্যত্থঞ্চ সুখত্থঞ্চ ভেসজ্জত্থঞ্চ দানত্থঞ্চ পুঞ্ঞত্থঞ্চ যঞ্ঞত্থঞ্চ সগ্গত্থঞ্চ বীজত্থঞ্চ ৰীমংসত্থঞ্চ দৰত্থঞ্চ নীলঞ্চ পীতকঞ্চ লোহিতকঞ্চ ওদাতঞ্চ তক্কৰণ্ণঞ্চ দকৰণ্ণঞ্চ তেলৰণ্ণঞ্চ খীরৰণ্ণঞ্চ দধিৰণ্ণঞ্চ সপ্পিৰণ্ণঞ্চ চেতেতি উপক্কমতি মুচ্চতি, আপত্তি সঙ্ঘাদিসেসস্স। মিস্সকচক্কং নিট্ঠিতং। ২৪৯. নীলং মোচেস্সামীতি চেতেতি উপক্কমতি পীতকং মুচ্চতি, আপত্তি সঙ্ঘাদিসেসস্স। নীলং মোচেস্সামীতি চেতেতি উপক্কমতি লোহিতকং…পে॰… ওদাতং … তক্কৰণ্ণং… দকৰণ্ণং… তেলৰণ্ণং… খীরৰণ্ণং… দধিৰণ্ণং… সপ্পিৰণ্ণং মুচ্চতি, আপত্তি সঙ্ঘাদিসেসস্স। খণ্ডচক্কং নিট্ঠিতং। ২৫০. পীতকং মোচেস্সামীতি চেতেতি উপক্কমতি লোহিতকং মুচ্চতি, আপত্তি সঙ্ঘাদিসেসস্স। পীতকং মোচেস্সামীতি চেতেতি উপক্কমতি ওদাতং…পে॰… তক্কৰণ্ণং… দকৰণ্ণং… তেলৰণ্ণং… খীরৰণ্ণং… দধিৰণ্ণং… সপ্পিৰণ্ণং… নীলং মুচ্চতি, আপত্তি সঙ্ঘাদিসেসস্স। বদ্ধচক্কমূলং সংখিত্তং। ২৫১. সপ্পিৰণ্ণং মোচেস্সামীতি চেতেতি উপক্কমতি নীলং মুচ্চতি, আপত্তি সঙ্ঘাদিসেসস্স। সপ্পিৰণ্ণং মোচেস্সামীতি চেতেতি উপক্কমতি পীতকং…পে॰… লোহিতকং… ওদাতং … তক্কৰণ্ণং… দকৰণ্ণং… তেলৰণ্ণং… খীরৰণ্ণং… দধিৰণ্ণং মুচ্চতি, আপত্তি সঙ্ঘাদিসেসস্স। কুচ্ছিচক্কং নিট্ঠিতং। ২৫২. পীতকং মোচেস্সামীতি চেতেতি উপক্কমতি নীলং মুচ্চতি, আপত্তি সঙ্ঘাদিসেসস্স। লোহিতকং…পে॰… ওদাতং… তক্কৰণ্ণং… দকৰণ্ণং… তেলৰণ্ণং… খীরৰণ্ণং… দধিৰণ্ণং… সপ্পিৰণ্ণং মোচেস্সামীতি চেতেতি উপক্কমতি নীলং মুচ্চতি, আপত্তি সঙ্ঘাদিসেসস্স। পিট্ঠিচক্কস্স পঠমং গমনং নিট্ঠিতং। ২৫৩. লোহিতকং মোচেস্সামীতি চেতেতি উপক্কমতি পীতকং মুচ্চতি, আপত্তি সঙ্ঘাদিসেসস্স। ওদাতং…পে॰… তক্কৰণ্ণং… দকৰণ্ণং… তেলৰণ্ণং… খীরৰণ্ণং … দধিৰণ্ণং… সপ্পিৰণ্ণং… নীলং মোচেস্সামীতি চেতেতি উপক্কমতি পীতকং মুচ্চতি, আপত্তি সঙ্ঘাদিসেসস্স। পিট্ঠিচক্কস্স দুতিযং গমনং নিট্ঠিতং। ২৫৪. ওদাতং মোচেস্সামীতি চেতেতি উপক্কমতি লোহিতকং মুচ্চতি, আপত্তি সঙ্ঘাদিসেসস্স। তক্কৰণ্ণং…পে॰… দকৰণ্ণং… তেলৰণ্ণং… খীরৰণ্ণং… দধিৰণ্ণং… সপ্পিৰণ্ণং… নীলং … পীতকং মোচেস্সামীতি চেতেতি উপক্কমতি লোহিতকং মুচ্চতি, আপত্তি সঙ্ঘাদিসেসস্স। পিট্ঠিচক্কস্স ততিযং গমনং নিট্ঠিতং। ২৫৫. তক্কৰণ্ণং মোচেস্সামীতি চেতেতি উপক্কমতি ওদাতং মুচ্চতি, আপত্তি সঙ্ঘাদিসেসস্স। দকৰণ্ণং…পে॰… তেলৰণ্ণং… খীরৰণ্ণং… দধিৰণ্ণং… সপ্পিৰণ্ণং… নীলং… পীতকং… লোহিতকং মোচেস্সামীতি চেতেতি উপক্কমতি ওদাতং মুচ্চতি, আপত্তি সঙ্ঘাদিসেসস্স। পিট্ঠিচক্কস্স চতুত্থং গমনং নিট্ঠিতং। ২৫৬. দকৰণ্ণং মোচেস্সামীতি চেতেতি উপক্কমতি তক্কৰণ্ণং মুচ্চতি, আপত্তি সঙ্ঘাদিসেসস্স। তেলৰণ্ণং …পে॰… খীরৰণ্ণং… দধিৰণ্ণং… সপ্পিৰণ্ণং… নীল… পীতকং… লোহিতকং… ওদাতং মোচেস্সামীতি চেতেতি উপক্কমতি তক্কৰণ্ণং মুচ্চতি, আপত্তি সঙ্ঘাদিসেসস্স। পিট্ঠিচক্কস্স পঞ্চমং গমনং নিট্ঠিতং। ২৫৭. তেলৰণ্ণং মোচেস্সামীতি চেতেতি উপক্কমতি দকৰণ্ণং মুচ্চতি, আপত্তি সঙ্ঘাদিসেসস্স। খীরৰণ্ণং…পে॰… দধিৰণ্ণং… সপ্পিৰণ্ণং… নীলং … পীতকং… লোহিতকং… ওদাতং… তক্কৰণ্ণং মোচেস্সামীতি চেতেতি উপক্কমতি দকৰণ্ণং মুচ্চতি, আপত্তি সঙ্ঘাদিসেসস্স। পিট্ঠিচক্কস্স ছট্ঠং গমনং নিট্ঠিতং। ২৫৮. খীরৰণ্ণং মোচেস্সামীতি চেতেতি উপক্কমতি তেলৰণ্ণং মুচ্চতি, আপত্তি সঙ্ঘাদিসেসস্স। দধিৰণ্ণং…পে॰… সপ্পিৰণ্ণং… নীলং… পীতকং… লোহিতকং… ওদাতং… তক্কৰণ্ণং… দকৰণ্ণং মোচেস্সামীতি চেতেতি উপক্কমতি তেলৰণ্ণং মুচ্চতি, আপত্তি সঙ্ঘাদিসেসস্স। পিট্ঠিচক্কস্স সত্তমং গমনং নিট্ঠিতং। ২৫৯. দধিৰণ্ণং মোচেস্সামীতি চেতেতি উপক্কমতি খীরৰণ্ণং মুচ্চতি, আপত্তি সঙ্ঘাদিসেসস্স। সপ্পিৰণ্ণং…পে॰… নীলং… পীতকং… লোহিতকং… ওদাতং… তক্কৰণ্ণং… দকৰণ্ণং… তেলৰণ্ণং মোচেস্সামীতি চেতেতি উপক্কমতি খীরৰণ্ণং মুচ্চতি, আপত্তি সঙ্ঘাদিসেসস্স। পিট্ঠিচক্কস্স অট্ঠমং গমনং নিট্ঠিতং। ২৬০. সপ্পিৰণ্ণং মোচেস্সামীতি চেতেতি উপক্কমতি দধিৰণ্ণং মুচ্চতি, আপত্তি সঙ্ঘাদিসেসস্স। নীলং…পে॰… পীতকং… লোহিতকং… ওদাতং… তক্কৰণ্ণং… দকৰণ্ণং… তেলৰণ্ণং… খীরৰণ্ণং মোচেস্সামীতি চেতেতি উপক্কমতি দধিৰণ্ণং মুচ্চতি, আপত্তি সঙ্ঘাদিসেসস্স। পিট্ঠিচক্কস্স নৰমং গমনং নিট্ঠিতং। ২৬১. নীলং মোচেস্সামীতি চেতেতি উপক্কমতি সপ্পিৰণ্ণং মুচ্চতি, আপত্তি সঙ্ঘাদিসেসস্স। পীতকং …পে॰… লোহিতকং… ওদাতং… তক্কৰণ্ণং… দকৰণ্ণং … তেলৰণ্ণং… খীরৰণ্ণং… দধিৰণ্ণং মোচেস্সামীতি চেতেতি উপক্কমতি সপ্পিৰণ্ণং মুচ্চতি, আপত্তি সঙ্ঘাদিসেসস্স। পিট্ঠিচক্কস্স দসমং গমনং নিট্ঠিতং। পিট্ঠিচক্কং নিট্ঠিতং। ২৬২. চেতেতি উপক্কমতি মুচ্চতি, আপত্তি সঙ্ঘাদিসেসস্স। চেতেতি উপক্কমতি ন মুচ্চতি, আপত্তি থুল্লচ্চযস্স। চেতেতি ন উপক্কমতি মুচ্চতি, অনাপত্তি। চেতেতি ন উপক্কমতি ন মুচ্চতি, অনাপত্তি। ন চেতেতি উপক্কমতি মুচ্চতি, অনাপত্তি। ন চেতেতি উপক্কমতি ন মুচ্চতি, অনাপত্তি। ন চেতেতি ন উপক্কমতি মুচ্চতি, অনাপত্তি। ন চেতেতি ন উপক্কমতি ন মুচ্চতি, অনাপত্তি। অনাপত্তি সুপিনন্তেন, নমোচনাধিপ্পাযস্স, উম্মত্তকস্স, খিত্তচিত্তস্স, ৰেদনাট্টস্স, আদিকম্মিকস্সাতি। ৰিনীতৰত্থুউদ্দানগাথা সুপিনোচ্চারপস্সাৰো , ৰিতক্কুণ্হোদকেন চ। ভেসজ্জং কণ্ডুৰং মগ্গো, ৰত্থি জন্তাঘরুপক্কমো [জন্তগ্গুপক্কমো (সী॰), জন্তাঘরং ঊরু (স্যা॰)]॥ সামণেরো চ সুত্তো চ, ঊরু মুট্ঠিনা পীল়যি। আকাসে থম্ভং নিজ্ঝাযি, ছিদ্দং কট্ঠেন ঘট্টযি॥ সোতো উদঞ্জলং ধাৰং, পুপ্ফাৰলিযং পোক্খরং। ৰালিকা কদ্দমুস্সেকো [কদ্দমোসেকো (?)], সযনঙ্গুট্ঠকেন চাতি॥ ৰিনীতৰত্থু ২৬৩. তেন খো পন সমযেন অঞ্ঞতরস্স ভিক্খুনো সুপিনন্তেন অসুচি মুচ্চি। তস্স কুক্কুচ্চং অহোসি – ‘‘ভগৰতা সিক্খাপদং পঞ্ঞত্তং, কচ্চি নু খো অহং সঙ্ঘাদিসেসং আপত্তিং আপন্নো’’তি? ভগৰতো এতমত্থং আরোচেসি। ‘‘অনাপত্তি, ভিক্খু, সুপিনন্তেনা’’তি। তেন খো পন সমযেন অঞ্ঞতরস্স ভিক্খুনো উচ্চারং করোন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘কিংচিত্তো ত্ৰং, ভিক্খূ’’তি? ‘‘নাহং, ভগৰা, মোচনাধিপ্পাযো’’তি। ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো পস্সাৰং করোন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো কামৰিতক্কং ৰিতক্কেন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, ৰিতক্কেন্তস্সা’’তি। তেন খো পন সমযেন অঞ্ঞতরস্স ভিক্খুনো উণ্হোদকেন ন্হাযন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘কিংচিত্তো ত্ৰং, ভিক্খূ’’তি? ‘‘নাহং, ভগৰা, মোচনাধিপ্পাযো’’তি। ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স উণ্হোদকেন ন্হাযন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স উণ্হোদকেন ন্হাযন্তস্স অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো অঙ্গজাতে ৰণো হোতি। ভেসজ্জেন [তস্স ভেসজ্জেন (?)] আলিম্পেন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো অঙ্গজাতে ৰণো হোতি। মোচনাধিপ্পাযস্স [তস্স মোচনামিপ্পাযস্স (স্যা॰)] ভেসজ্জেন আলিম্পেন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো অণ্ডং কণ্ডুৰন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি , ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স অণ্ডং কণ্ডুৰন্তস্স [কণ্ডূৰন্তস্স (সী॰)] অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। ২৬৪. তেন খো পন সমযেন অঞ্ঞতরস্স ভিক্খুনো মগ্গং গচ্ছন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স মগ্গং গচ্ছন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো ৰত্থিং গহেত্ৰা পস্সাৰং করোন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স ৰত্থিং গহেত্ৰা পস্সাৰং করোন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো জন্তাঘরে উদরৰট্টিং তাপেন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স জন্তাঘরে উদরৰট্টিং তাপেন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো জন্তাঘরে উপজ্ঝাযস্স পিট্ঠিপরিকম্মং করোন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স জন্তাঘরে উপজ্ঝাযস্স পিট্ঠিপরিকম্মং করোন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। ২৬৫. তেন খো পন সমযেন অঞ্ঞতরস্স ভিক্খুনো ঊরুং ঘট্টাপেন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স ঊরুং ঘট্টাপেন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরো ভিক্খু মোচনাধিপ্পাযো অঞ্ঞতরং সামণেরং এতদৰোচ – ‘‘এহি মে ত্ৰং, আৰুসো সামণের, অঙ্গজাতং গণ্হাহী’’তি। সো তস্স অঙ্গজাতং অগ্গহেসি। তস্সেৰ অসুচি মুচ্চি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরো ভিক্খু সুত্তস্স সামণেরস্স অঙ্গজাতং অগ্গহেসি। তস্সেৰ অসুচি মুচ্চি। তস্স কুক্কুচ্চং অহোসি …পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। ২৬৬. তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স ঊরূহি অঙ্গজাতং পীল়েন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স মুট্ঠিনা অঙ্গজাতং পীল়েন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স আকাসে কটিং কম্পেন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো কাযং থম্ভেন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স কাযং থম্ভেন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরো ভিক্খু সারত্তো মাতুগামস্স অঙ্গজাতং উপনিজ্ঝাযি। তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স। ন চ, ভিক্খৰে, সারত্তেন মাতুগামস্স অঙ্গজাতং উপনিজ্ঝাযিতব্বং। যো উপনিজ্ঝাযেয্য, আপত্তি দুক্কটস্সা’’তি। ২৬৭. তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স তাল়চ্ছিদ্দং অঙ্গজাতং পৰেসেন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স কট্ঠেন অঙ্গজাতং ঘট্টেন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স ; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো পটিসোতে ন্হাযন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স পটিসোতে ন্হাযন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো উদঞ্জলং কীল়ন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স উদঞ্জলং কীল়ন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো উদকে ধাৰন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স উদকে ধাৰন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো পুপ্ফাৰলিযং [পুপ্ফাৰল়িযং (স্যা॰ ক॰)] কীল়ন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স পুপ্ফাৰলিযং কীল়ন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। ২৬৮. তেন খো পন সমযেন অঞ্ঞতরস্স ভিক্খুনো পোক্খরৰনে ধাৰন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স পোক্খরৰনে ধাৰন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স ৰালিকং অঙ্গজাতং পৰেসেন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স কদ্দমং অঙ্গজাতং পৰেসেন্তস্স অসুচি মুচ্চি…পে॰… অসুচি ন মুচ্চি । তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো উদকেন অঙ্গজাতং ওসিঞ্চন্তস্স অসুচি মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নমোচনাধিপ্পাযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স উদকেন অঙ্গজাতং ওসিঞ্চন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স সযনে অঙ্গজাতং ঘট্টেন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরস্স ভিক্খুনো মোচনাধিপ্পাযস্স অঙ্গুট্ঠেন অঙ্গজাতং ঘট্টেন্তস্স অসুচি মুচ্চি…পে॰… অসুচি ন মুচ্চি। তস্স কুক্কুচ্চং অহোসি – ‘‘ভগৰতা সিক্খাপদং পঞ্ঞত্তং, কচ্চি নু খো অহং সঙ্ঘাদিসেসং আপত্তিং আপন্নো’’তি? ভগৰতো এতমত্থং আরোচেসি। ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। সুক্কৰিস্সট্ঠিসিক্খাপদং নিট্ঠিতং পঠমং। ২. কাযসংসগ্গসিক্খাপদং ২৬৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা উদাযী অরঞ্ঞে ৰিহরতি। তস্সাযস্মতো ৰিহারো অভিরূপো হোতি দস্সনীযো পাসাদিকো, মজ্ঝেগব্ভো, সমন্তাপরিযাগারো, সুপঞ্ঞত্তং মঞ্চপীঠং ভিসিবিম্বোহনং, পানীযং পরিভোজনীযং সুপট্ঠিতং, পরিৰেণং সুসম্মট্ঠং। বহূ মনুস্সা আযস্মতো উদাযিস্স ৰিহারপেক্খকা আগচ্ছন্তি। অঞ্ঞতরোপি ব্রাহ্মণো সপজাপতিকো যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং এতদৰোচ – ‘‘ইচ্ছাম মযং ভোতো উদাযিস্স ৰিহারং পেক্খিতু’’ন্তি। ‘‘তেন হি, ব্রাহ্মণ, পেক্খস্সূ’’তি, অৰাপুরণং [অপাপুরণং (স্যা॰)] আদায ঘটিকং উগ্ঘাটেত্ৰা কৰাটং পণামেত্ৰা ৰিহারং পাৰিসি। সোপি খো ব্রাহ্মণো আযস্মতো উদাযিস্স পিট্ঠিতো পাৰিসি। সাপি খো ব্রাহ্মণী তস্স ব্রাহ্মণস্স পিট্ঠিতো পাৰিসি। অথ খো আযস্মা উদাযী একচ্চে ৰাতপানে ৰিৰরন্তো একচ্চে ৰাতপানে থকেন্তো গব্ভং অনুপরিগন্ত্ৰা পিট্ঠিতো আগন্ত্ৰা তস্সা ব্রাহ্মণিযা অঙ্গমঙ্গানি পরামসি। অথ খো সো ব্রাহ্মণো আযস্মতা উদাযিনা সদ্ধিং পটিসম্মোদিত্ৰা অগমাসি। অথ খো সো ব্রাহ্মণো অত্তমনো অত্তমনৰাচং নিচ্ছারেসি – ‘‘উল়ারা ইমে সমণা সক্যপুত্তিযা যে ইমে এৰরূপে অরঞ্ঞে ৰিহরন্তি। ভৰম্পি উদাযী উল়ারো যো এৰরূপে অরঞ্ঞে ৰিহরতী’’তি। এৰং ৰুত্তে সা ব্রাহ্মণী তং ব্রাহ্মণং এতদৰোচ – ‘‘কুতো তস্স উল়ারত্ততা! যথেৰ মে ত্ৰং অঙ্গমঙ্গানি পরামসি এৰমেৰ মে সমণো উদাযী অঙ্গমঙ্গানি পরামসী’’তি। অথ খো সো ব্রাহ্মণো উজ্ঝাযতি খিয্যতি ৰিপাচেতি – ‘‘অলজ্জিনো ইমে সমণা সক্যপুত্তিযা দুস্সীলা মুসাৰাদিনো। ইমে হি নাম ধম্মচারিনো সমচারিনো ব্রহ্মচারিনো সচ্চৰাদিনো সীলৰন্তো কল্যাণধম্মা পটিজানিস্সন্তি! নত্থি ইমেসং সামঞ্ঞং নত্থি ইমেসং ব্রহ্মঞ্ঞং, নট্ঠং ইমেসং সামঞ্ঞং নট্ঠং ইমেসং ব্রহ্মঞ্ঞং, কুতো ইমেসং সামঞ্ঞং কুতো ইমেসং ব্রহ্মঞ্ঞং, অপগতা ইমে সামঞ্ঞা অপগতা ইমে ব্রহ্মঞ্ঞা। কথঞ্হি নাম সমণো উদাযী মম ভরিযায অঙ্গমঙ্গানি পরামসিস্সতি! ন হি সক্কা কুলিত্থীহি কুলধীতাহি কুলকুমারীহি কুলসুণ্হাহি কুলদাসীহি আরামং ৰা ৰিহারং ৰা গন্তুং। সচে [সচে হি (স্যা॰)] কুলিত্থিযো কুলধীতরো [কুলধীতাযো (সী॰ স্যা॰)] কুলকুমারিযো কুলসুণ্হাযো কুলদাসিযো আরামং ৰা ৰিহারং ৰা গচ্ছেয্যুং, তাপি সমণা সক্যপুত্তিযা দূসেয্যু’’ন্তি! অস্সোসুং খো ভিক্খু তস্স ব্রাহ্মণস্স উজ্ঝাযন্তস্স খিয্যন্তস্স ৰিপাচেন্তস্স। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী মাতুগামেন সদ্ধিং কাযসংসগ্গং সমাপজ্জিস্সতী’’তি! অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং উদাযিং পটিপুচ্ছি – ‘‘সচ্চং কির ত্ৰং, উদাযি, মাতুগামেন সদ্ধিং কাযসংসগ্গং সমাপজ্জসী’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং, মোঘপুরিস, অননুলোমিকং অপ্পতিরূপং অস্সামণকং অকপ্পিযং অকরণীযং। কথঞ্হি নাম ত্ৰং, মোঘপুরিস, মাতুগামেন সদ্ধিং কাযসংসগ্গং সমাপজ্জিস্সসি! ননু মযা, মোঘপুরিস, অনেকপরিযাযেন ৰিরাগায ধম্মো দেসিতো নো সরাগায…পে॰… কামপরিল়াহানং ৰূপসমো অক্খাতো। নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ২৭০. ‘‘যো পন ভিক্খু ওতিণ্ণো ৰিপরিণতেন চিত্তেন মাতুগামেন সদ্ধিং কাযসংসগ্গং সমাপজ্জেয্য হত্থগ্গাহং ৰা ৰেণিগ্গাহং ৰা অঞ্ঞতরস্স ৰা অঞ্ঞতরস্স ৰা অঙ্গস্স পরামসনং, সঙ্ঘাদিসেসো’’তি। ২৭১. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি। ওতিণ্ণো নাম সারত্তো অপেক্খৰা পটিবদ্ধচিত্তো। ৰিপরিণতন্তি রত্তম্পি চিত্তং ৰিপরিণতং। দুট্ঠম্পি চিত্তং ৰিপরিণতং। মূল়্হম্পি চিত্তং ৰিপরিণতং। অপিচ, রত্তং চিত্তং ইমস্মিং অত্থে অধিপ্পেতং ৰিপরিণতন্তি। মাতুগামো নাম মনুস্সিত্থী, ন যক্খী ন পেতী, ন তিরচ্ছানগতা। অন্তমসো তদহুজাতাপি দারিকা, পগেৰ মহত্তরী। সদ্ধিন্তি একতো। কাযসংসগ্গং সমাপজ্জেয্যাতি অজ্ঝাচারো ৰুচ্চতি। হত্থো নাম কপ্পরং উপাদাযং যাৰ অগ্গনখা। ৰেণী নাম সুদ্ধকেসা ৰা, সুত্তমিস্সা ৰা, মালামিস্সা ৰা, হিরঞ্ঞমিস্সা ৰা, সুৰণ্ণমিস্সা ৰা, মুত্তামিস্সা ৰা, মণিমিস্সা ৰা। অঙ্গং নাম হত্থঞ্চ ৰেণিঞ্চ ঠপেত্ৰা অৰসেসং অঙ্গং নাম। ২৭২. আমসনা , পরামসনা, ওমসনা, উম্মসনা, ওলঙ্ঘনা, উল্লঙ্ঘনা, আকড্ঢনা, পতিকড্ঢনা, অভিনিগ্গণ্হনা, অভিনিপ্পীল়না, গহণং, ছুপনং। আমসনা নাম আমট্ঠমত্তা। পরামসনা নাম ইতোচিতো চ সংচোপনা। ওমসনা নাম হেট্ঠা ওরোপনা। উম্মসনা নাম উদ্ধং উচ্চারণা। ওলঙ্ঘনা নাম হেট্ঠা ওনমনা। উল্লঙ্ঘনা নাম উদ্ধং উচ্চারণা। আকড্ঢনা নাম আৰিঞ্ছনা [আৰিঞ্জনা (সী॰ স্যা॰)]। পতিকড্ঢনা নাম পতিপ্পণামনা। অভিনিগ্গণ্হনা নাম অঙ্গং গহেত্ৰা নিপ্পীল়না। অভিনিপ্পীল়না নাম কেনচি সহ নিপ্পীল়না। গহণং নাম গহিতমত্তং। ছুপনং নাম ফুট্ঠমত্তং। সঙ্ঘাদিসেসোতি…পে॰… তেনপি ৰুচ্চতি সঙ্ঘাদিসেসোতি। ২৭৩. ইত্থী চ হোতি ইত্থিসঞ্ঞী সারত্তো চ ভিক্খু চ। নং ইত্থিযা কাযেন কাযং আমসতি পরামসতি ওমসতি উম্মসতি ওলঙ্ঘেতি উল্লঙ্ঘেতি আকড্ঢতি পতিকড্ঢতি অভিনিগ্গণ্হাতি অভিনিপ্পীল়েতি গণ্হাতি ছুপতি, আপত্তি সঙ্ঘাদিসেসস্স। ইত্থী চ হোতি ৰেমতিকো সারত্তো চ। ভিক্খু চ নং ইত্থিযা কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স। ইত্থী চ হোতি পণ্ডকসঞ্ঞী সারত্তো চ। ভিক্খু চ নং ইত্থিযা কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স। ইত্থী চ হোতি পুরিসসঞ্ঞী সারত্তো চ। ভিক্খু চ নং ইত্থিযা কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স। ইত্থী চ হোতি তিরচ্ছানগতসঞ্ঞী সারত্তো চ। ভিক্খু চ নং ইত্থিযা কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স। পণ্ডকো চ হোতি পণ্ডকসঞ্ঞী সারত্তো চ। ভিক্খু চ নং পণ্ডকস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স। পণ্ডকো চ হোতি ৰেমতিকো সারত্তো চ। ভিক্খু চ নং পণ্ডকস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স। পণ্ডকো চ হোতি পুরিসসঞ্ঞী সারত্তো চ। ভিক্খু চ নং পণ্ডকস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স। পণ্ডকো চ হোতি তিরচ্ছানগতসঞ্ঞী সারত্তো চ। ভিক্খু চ নং পণ্ডকস্স কাযেন কাযং আমসতি পরামসতি…পে॰… গণ্হাতি ছুপতি , আপত্তি দুক্কটস্স। পণ্ডকো চ হোতি ইত্থিসঞ্ঞী সারত্তো চ। ভিক্খু চ নং পণ্ডকস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স। পুরিসো চ হোতি পুরিসসঞ্ঞী সারত্তো চ। ভিক্খু চ নং পুরিসস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স। পুরিসো চ হোতি ৰেমতিকো…পে॰… পুরিসো চ হোতি তিরচ্ছানগতসঞ্ঞী… পুরিসো চ হোতি ইত্থিসঞ্ঞী… পুরিসো চ হোতি পণ্ডকসঞ্ঞী সারত্তো চ। ভিক্খু চ নং পুরিসস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স। তিরচ্ছানগতো চ হোতি তিরচ্ছানগতসঞ্ঞী সারত্তো চ। ভিক্খু চ নং তিরচ্ছানগতস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স। তিরচ্ছানগতো চ হোতি ৰেমতিকো…পে॰… তিরচ্ছানগতো চ হোতি ইত্থিসঞ্ঞী… তিরচ্ছানগতো চ হোতি পণ্ডকসঞ্ঞী… তিরচ্ছানগতো চ হোতি। পুরিসসঞ্ঞী সারত্তো চ। ভিক্খু চ নং তিরচ্ছানগতস্স কাযেন কাযং আমসতি পরামসতি…পে॰… গণ্হাতি ছুপতি, আপত্তি দুক্কটস্স। একমূলকং নিট্ঠিতং। ২৭৪. দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং সঙ্ঘাদিসেসানং। দ্ৰে ইত্থিযো দ্ৰিন্নং ইত্থীনং ৰেমতিকো সারত্তো চ। ভিক্খু চ নং দ্ৰিন্নং ইত্থীনং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং থুল্লচ্চযানং। দ্ৰে ইত্থিযো দ্ৰিন্নং ইত্থীনং পণ্ডকসঞ্ঞী…পে॰… পুরিসসঞ্ঞী… তিরচ্ছানগতসঞ্ঞী সারত্তো চ। ভিক্খু চ দ্ৰিন্নং ইত্থীনং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং থুল্লচ্চযানং। দ্ৰে পণ্ডকা দ্ৰিন্নং পণ্ডকানং পণ্ডকসঞ্ঞী সারত্তো চ ভিক্খু চ নং দ্ৰিন্নং পণ্ডকানং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং থুল্লচ্চযানং। দ্ৰে পণ্ডকা দ্ৰিন্নং পণ্ডকানং ৰেমতিকো…পে॰… পুরিসসঞ্ঞী… তিরচ্ছানগতসঞ্ঞী… ইত্থিসঞ্ঞী সারত্তো চ। ভিক্খু চ নং দ্ৰিন্নং পণ্ডকানং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং। দ্ৰে পুরিসা দ্ৰিন্নং পুরিসানং পুরিসসঞ্ঞী সারত্তো চ ভিক্খু চ নং দ্ৰিন্নং পুরিসানং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং। দ্ৰে পুরিসা দ্ৰিন্নং পুরিসানং ৰেমতিকো…পে॰… তিরচ্ছানগতসঞ্ঞী… ইত্থিসঞ্ঞী… পণ্ডকসঞ্ঞী সারত্তো চ। ভিক্খু চ নং দ্ৰিন্নং পুরিসানং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং। দ্ৰে তিরচ্ছানগতা দ্ৰিন্নং তিরচ্ছানগতানং তিরচ্ছানগতসঞ্ঞী সারত্তো চ। ভিক্খু চ নং দ্ৰিন্নং তিরচ্ছানগতানং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং। দ্ৰে তিরচ্ছানগতা দ্ৰিন্নং তিরচ্ছানগতানং ৰেমতিকো…পে॰… ইত্থিসঞ্ঞী… পণ্ডকসঞ্ঞী … পুরিসসঞ্ঞী সারত্তো চ। ভিক্খু চ নং দ্ৰিন্নং তিরচ্ছানগতানং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং। ২৭৫. ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি সঙ্ঘাদিসেসেন দুক্কটস্স। ইত্থী চ পণ্ডকো চ উভিন্নং ৰেমতিকো সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স। ইত্থী চ পণ্ডকো চ উভিন্নং পণ্ডকসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং থুল্লচ্চযানং। ইত্থী চ পণ্ডকো চ উভিন্নং পুরিসসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স। ইত্থী চ পণ্ডকো চ উভিন্নং তিরচ্ছানগতসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স। ইত্থী চ পুরিসো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি সঙ্ঘাদিসেসেন দুক্কটস্স। ইত্থী চ পুরিসো চ উভিন্নং ৰেমতিকো…পে॰… পণ্ডকসঞ্ঞী… পুরিসসঞ্ঞী… তিরচ্ছানগতসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স। ইত্থী চ তিরচ্ছানগতো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি সঙ্ঘাদিসেসেন দুক্কটস্স। ইত্থী চ তিরচ্ছানগতো চ উভিন্নং ৰেমতিকো…পে॰… পণ্ডকসঞ্ঞী… পুরিসসঞ্ঞী … তিরচ্ছানগতসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স। পণ্ডকো চ পুরিসো চ উভিন্নং পণ্ডকসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স। পণ্ডকো চ পুরিসো চ উভিন্নং ৰেমতিকো…পে॰… পুরিসসঞ্ঞী… তিরচ্ছানগতসঞ্ঞী… ইত্থিসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং। পণ্ডকো চ তিরচ্ছানগতো চ উভিন্নং পণ্ডকসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স। পণ্ডকো চ তিরচ্ছানগতো চ উভিন্নং ৰেমতিকো…পে॰… পুরিসসঞ্ঞী… তিরচ্ছানগতসঞ্ঞী… ইত্থিসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং। পুরিসো চ তিরচ্ছানগতো চ উভিন্নং পুরিসসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং। পুরিসো চ তিরচ্ছানগতো চ উভিন্নং ৰেমতিকো…পে॰… তিরচ্ছানগতসঞ্ঞী… ইত্থিসঞ্ঞী… পণ্ডকসঞ্ঞী সারত্তো চ। ভিক্খু চ নং উভিন্নং কাযেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং। দুমূলকং নিট্ঠিতং। ২৭৬. ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা কাযেন কাযপটিবদ্ধং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং কাযেন কাযপটিবদ্ধং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং থুল্লচ্চযানং …পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং কাযেন কাযপটিবদ্ধং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স…পে॰…। ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা কাযপটিবদ্ধেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং কাযপটিবদ্ধেন কাযং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং থুল্লচ্চযানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং কাযপটিবদ্ধেন কাযং আমসতি পরামসতি…পে॰… গণ্হাতি ছুপতি, আপত্তি থুল্লচ্চযেন দুক্কটস্স…পে॰…। ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা কাযপটিবদ্ধেন কাযপটিবদ্ধং আমসতি পরামসতি…পে॰… গণ্হাতি ছুপতি, আপত্তি দুক্কটস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং কাযপটিবদ্ধেন কাযপটিবদ্ধং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং কাযপটিবদ্ধেন কাযপটিবদ্ধং আমসতি পরামসতি…পে॰… গণ্হাতি ছুপতি, আপত্তি দ্ৰিন্নং দুক্কটানং…পে॰…। ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা নিস্সগ্গিযেন কাযং আমসতি আপত্তি দুক্কটস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং নিস্সগ্গিযেন কাযং আমসতি, আপত্তি দ্ৰিন্নং দুক্কটানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং নিস্সগ্গিযেন কাযং আমসতি, আপত্তি দ্ৰিন্নং দুক্কটানং…পে॰…। ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা নিস্সগ্গিযেন কাযপটিবদ্ধং আমসতি, আপত্তি দুক্কটস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং নিস্সগ্গিযেন কাযপটিবদ্ধং আমসতি, আপত্তি দ্ৰিন্নং দুক্কটানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং নিস্সগ্গিযেন কাযপটিবদ্ধং আমসতি, আপত্তি দ্ৰিন্নং দুক্কটানং…পে॰…। ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা নিস্সগ্গিযেন নিস্সগ্গিযং আমসতি, আপত্তি দুক্কটস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং নিস্সগ্গিযেন নিস্সগ্গিযং আমসতি, আপত্তি দ্ৰিন্নং দুক্কটানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং নিস্সগ্গিযেন নিস্সগ্গিযং আমসতি, আপত্তি দ্ৰিন্নং দুক্কটানং…পে॰…। ভিক্খুপেয্যালো নিট্ঠিতো। ২৭৭. ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স কাযেন কাযং আমসতি পরামসতি ওমসতি উম্মসতি ওলঙ্ঘেতি উল্লঙ্ঘেতি আকড্ঢতি পতিকড্ঢতি অভিনিগ্গণ্হাতি অভিনিপ্পীল়েতি গণ্হাতি ছুপতি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি সঙ্ঘাদিসেসস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স কাযেন কাযং আমসন্তি পরামসন্তি ওমসন্তি উম্মসন্তি ওলঙ্ঘেন্তি উল্লঙ্ঘেন্তি আকড্ঢন্তি পতিকড্ঢন্তি অভিনিগ্গণ্হন্তি অভিনিপ্পীল়েন্তি গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং সঙ্ঘাদিসেসানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স কাযেন কাযং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি সঙ্ঘাদিসেসেন দুক্কটস্স…পে॰…। ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স কাযেন কাযপটিবদ্ধং আমসতি পরামসতি…পে॰… গণ্হাতি ছুপতি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি থুল্লচ্চযস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স কাযেন কাযপটিবদ্ধং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং থুল্লচ্চযানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স কাযেন কাযপটিবদ্ধং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি থুল্লচ্চযেন দুক্কটস্স…পে॰…। ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স কাযপটিবদ্ধেন কাযং আমসতি পরামসতি…পে॰… গণ্হাতি ছুপতি সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি থুল্লচ্চযস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স কাযপটিবদ্ধেন কাযং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং থুল্লচ্চযানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স কাযপটিবদ্ধেন কাযং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি থুল্লচ্চযেন দুক্কটস্স…পে॰…। ২৭৮. ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স কাযপটিবদ্ধেন কাযপটিবদ্ধং আমসতি পরামসতি…পে॰… গণ্হাতি ছুপতি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দুক্কটস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স কাযপটিবদ্ধেন কাযপটিবদ্ধং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং দুক্কটানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স কাযপটিবদ্ধেন কাযপটিবদ্ধং আমসন্তি পরামসন্তি…পে॰… গণ্হন্তি ছুপন্তি, সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং দুক্কটানং…পে॰…। ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স নিস্সগ্গিযেন কাযং আমসতি। সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দুক্কটস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স নিস্সগ্গিযেন কাযং আমসন্তি। সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং দুক্কটানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স নিস্সগ্গিযেন কাযং আমসন্তি। সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং দুক্কটানং…পে॰…। ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স নিস্সগ্গিযেন কাযপটিবদ্ধং আমসতি। সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দুক্কটস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স নিস্সগ্গিযেন কাযপটিবদ্ধং আমসন্তি। সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং দুক্কটানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স নিস্সগ্গিযেন কাযপটিবদ্ধং আমসন্তি। সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি দ্ৰিন্নং দুক্কটানং…পে॰…। ইত্থী চ হোতি ইত্থিসঞ্ঞী সারত্তো চ। ইত্থী চ নং ভিক্খুস্স নিস্সগ্গিযেন নিস্সগ্গিযং আমসতি। সেৰনাধিপ্পাযো কাযেন ৰাযমতি, ন চ ফস্সং পটিৰিজানাতি, আপত্তি দুক্কটস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ইত্থিযো চ নং ভিক্খুস্স নিস্সগ্গিযেন নিস্সগ্গিযং আমসন্তি। সেৰনাধিপ্পাযো কাযেন ৰাযমতি, ন চ ফস্সং পটিৰিজানাতি, আপত্তি দ্ৰিন্নং দুক্কটানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। উভো চ নং ভিক্খুস্স নিস্সগ্গিযেন নিস্সগ্গিযং আমসন্তি। সেৰনাধিপ্পাযো কাযেন ৰাযমতি, ন চ ফস্সং পটিৰিজানাতি, আপত্তি দ্ৰিন্নং দুক্কটানং…পে॰…। ২৭৯. সেৰনাধিপ্পাযো কাযেন ৰাযমতি ফস্সং পটিৰিজানাতি, আপত্তি সঙ্ঘাদিসেসস্স। সেৰনাধিপ্পাযো কাযেন ৰাযমতি, ন চ ফস্সং পটিৰিজানাতি, আপত্তি দুক্কটস্স। সেৰনাধিপ্পাযো ন চ কাযেন ৰাযমতি, ফস্সং পটিৰিজানাতি, অনাপত্তি। সেৰনাধিপ্পাযো ন চ কাযেন ৰাযমতি, ন চ ফস্সং পটিৰিজানাতি, অনাপত্তি। মোক্খাধিপ্পাযো কাযেন ৰাযমতি, ফস্সং পটিৰিজানাতি, অনাপত্তি। মোক্খাধিপ্পাযো কাযেন ৰাযমতি, ন চ ফস্সং পটিৰিজানাতি , অনাপত্তি। মোক্খাধিপ্পাযো ন চ কাযেন ৰাযমতি, ফস্সং পটিৰিজানাতি, অনাপত্তি। মোক্খাধিপ্পাযো ন চ কাযেন ৰাযমতি, ন চ ফস্সং পটিৰিজানাতি, অনাপত্তি। ২৮০. অনাপত্তি অসঞ্চিচ্চ, অসতিযা, অজানন্তস্স, অসাদিযন্তস্স, উম্মত্তকস্স, খিত্তচিত্তস্স, ৰেদনাট্টস্স, আদিকম্মিকস্সাতি। ৰিনীতৰত্থুউদ্দানগাথা মাতা ধীতা ভগিনী চ, জাযা যক্খী চ পণ্ডকো। সুত্তা মতা তিরচ্ছানা, দারুধিতলিকায চ॥ সম্পীল়ে সঙ্কমো মগ্গো, রুক্খো নাৰা চ রজ্জু চ। দণ্ডো পত্তং পণামেসি, ৰন্দে ৰাযমি নচ্ছুপেতি॥ ৰিনীতৰত্থু ২৮১. তেন খো পন সমযেন অঞ্ঞতরো ভিক্খু মাতুযা মাতুপেমেন আমসি। তস্স কুক্কুচ্চং অহোসি – ‘‘ভগৰতা সিক্খাপদং পঞ্ঞত্তং, কচ্চি নু খো অহং সঙ্ঘাদিসেসং আপত্তিং আপন্নো’’তি? ভগৰতো এতমত্থং আরোচেসি। ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। তেন খো পন সমযেন অঞ্ঞতরো ভিক্খু ধীতুযা ধীতুপেমেন আমসি…পে॰… ভগিনিযা ভগিনিপেমেন আমসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। তেন খো পন সমযেন অঞ্ঞতরো ভিক্খু পুরাণদুতিযিকায কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরো ভিক্খু যক্খিনিযা কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরো ভিক্খু পণ্ডকস্স কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘অনাপত্তি , ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরো ভিক্খু সুত্তিত্থিযা কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরো ভিক্খু মতিত্থিযা কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরো ভিক্খু তিরচ্ছানগতিত্থিযা কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। তেন খো পন সমযেন অঞ্ঞতরো ভিক্খু দারুধীতলিকায কাযসংসগ্গং সমাপজ্জি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। ২৮২. তেন খো পন সমযেন সম্বহুলা ইত্থিযো অঞ্ঞতরং ভিক্খুং সম্পীল়েত্ৰা বাহাপরম্পরায আনেসুং। তস্স কুক্কুচ্চং অহোসি…পে॰… ‘‘সাদিযি ত্ৰং, ভিক্খূ’’তি? ‘‘নাহং, ভগৰা, সাদিযি’’ন্তি। ‘‘অনাপত্তি, ভিক্খূ, অসাদিযন্তস্সা’’তি। তেন খো পন সমযেন অঞ্ঞতরো ভিক্খু ইত্থিযা অভিরূল়্হং সঙ্কমং সারত্তো সঞ্চালেসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। তেন খো পন সমযেন অঞ্ঞতরো ভিক্খু ইত্থিং পটিপথে পস্সিত্ৰা সারত্তো অংসকূটেন পহারং অদাসি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরো ভিক্খু ইত্থিযা অভিরূল়্হং রুক্খং সারত্তো সঞ্চালেসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। তেন খো পন সমযেন অঞ্ঞতরো ভিক্খু ইত্থিযা অভিরূল়্হং নাৰং সারত্তো সঞ্চালেসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। তেন খো পন সমযেন অঞ্ঞতরো ভিক্খু ইত্থিযা গহিতং রজ্জুং সারত্তো আৰিঞ্ছি [আৰিঞ্জি (সী॰ স্যা॰)]। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরো ভিক্খু ইত্থিযা গহিতং দণ্ডং সারত্তো আৰিঞ্ছি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরো ভিক্খু সারত্তো ইত্থিং পত্তেন পণামেসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরো ভিক্খু ইত্থিযা ৰন্দন্তিযা সারত্তো পাদং উচ্চারেসি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরো ভিক্খু ইত্থিং গহেস্সামীতি ৰাযমিত্ৰা ন ছুপি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। কাযসংসগ্গসিক্খাপদং নিট্ঠিতং দুতিযং। ৩. দুট্ঠুল্লৰাচাসিক্খাপদং ২৮৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা উদাযী অরঞ্ঞে ৰিহরতি। তস্সাযস্মতো ৰিহারো অভিরূপো হোতি দস্সনীযো পাসাদিকো। তেন খো পন সমযেন সম্বহুলা ইত্থিযো আরামং আগমংসু ৰিহারপেক্খিকাযো। অথ খো তা ইত্থিযো যেনাযস্মা উদাযী তেনুপসঙ্কমিংসু; উপসঙ্কমিত্ৰা আযস্মন্তং উদাযিং এতদৰোচুং – ‘‘ইচ্ছাম মযং, ভন্তে, অয্যস্স ৰিহারং পেক্খিতু’’ন্তি। অথ খো আযস্মা উদাযী তা ইত্থিযো ৰিহারং পেক্খাপেত্ৰা তাসং ইত্থীনং ৰচ্চমগ্গং পস্সাৰমগ্গং আদিস্স ৰণ্ণম্পি ভণতি অৰণ্ণম্পি ভণতি যাচতিপি আযাচতিপি পুচ্ছতিপি পটিপুচ্ছতিপি আচিক্খতিপি অনুসাসতিপি অক্কোসতিপি। যা তা ইত্থিযো ছিন্নিকা ধুত্তিকা অহিরিকাযো তা আযস্মতা উদাযিনা সদ্ধিং উহসন্তিপি উল্লপন্তিপি উজ্জগ্ঘন্তিপি উপ্পণ্ডেন্তিপি। যা পন তা ইত্থিযো হিরিমনা তা নিক্খমিত্ৰা ভিক্খূ উজ্ঝাপেন্তি – ‘‘ইদং, ভন্তে, নচ্ছন্নং নপ্পতিরূপং। সামিকেনপি মযং এৰং ৰুত্তা ন ইচ্ছেয্যাম, কিং পনায্যেন উদাযিনা’’তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী মাতুগামং দুট্ঠুল্লাহি ৰাচাহি ওভাসিস্সতী’’তি! অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং উদাযিং পটিপুচ্ছি – ‘‘সচ্চং কির ত্ৰং, উদাযি, মাতুগামং দুট্ঠুল্লাহি ৰাচাহি ওভাসসী’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং, মোঘপুরিস, অননুলোমিকং অপ্পতিরূপং অস্সামণকং অকপ্পিযং অকরণীযং। কথঞ্হি নাম ত্ৰং, মোঘপুরিস, মাতুগামং দুট্ঠুল্লাহি ৰাচাহি ওভাসিস্সসি! ননু মযা, মোঘপুরিস, অনেকপরিযাযেন ৰিরাগায ধম্মো দেসিতো নো সরাগায…পে॰… কামপরিল়াহানং ৰূপসমো অক্খাতো। নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ২৮৪. ‘‘যো পন ভিক্খু ওতিণ্ণো ৰিপরিণতেন চিত্তেন মাতুগামং দুট্ঠুল্লাহি ৰাচাহি ওভাসেয্য যথা তং যুৰা যুৰতিং মেথুনুপসংহিতাহি, সঙ্ঘাদিসেসো’’তি। ২৮৫. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি। ওতিণ্ণো নাম সারত্তো অপেক্খৰা পটিবদ্ধচিত্তো। ৰিপরিণতন্তি রত্তম্পি চিত্তং ৰিপরিণতং, দুট্ঠম্পি চিত্তং ৰিপরিণতং মূল়্হম্পি চিত্তং ৰিপরিণতং। অপিচ, রত্তং চিত্তং ইমস্মিং অত্থে অধিপ্পেতং ৰিপরিণতন্তি। মাতুগামো নাম মনুস্সিত্থী, ন যক্খী, ন পেতী, ন তিরচ্ছানগতা। ৰিঞ্ঞূ পটিবলা সুভাসিতদুব্ভাসিতং দুট্ঠুল্লাদুট্ঠুল্লং আজানিতুং। দুট্ঠুল্লা নাম ৰাচা ৰচ্চমগ্গপস্সাৰমগ্গমেথুনধম্মপ্পটিসংযুত্তা ৰাচা। ওভাসেয্যাতি অজ্ঝাচারো ৰুচ্চতি। যথা তং যুৰা যুৰতিন্তি দহরো দহরিং, তরুণো তরুণিং, কামভোগী কামভোগিনিং। মেথুনুপসংহিতাহীতি মেথুনধম্মপ্পটিসংযুত্তাহি। সঙ্ঘাদিসেসোতি …পে॰… তেনপি ৰুচ্চতি সঙ্ঘাদিসেসোতি। দ্ৰে মগ্গে আদিস্স ৰণ্ণম্পি ভণতি, অৰণ্ণম্পি ভণতি, যাচতিপি, আযাচতিপি, পুচ্ছতিপি, পটিপুচ্ছতিপি, আচিক্খতিপি, অনুসাসতিপি, অক্কোসতিপি। ৰণ্ণং ভণতি নাম দ্ৰে মগ্গে থোমেতি ৰণ্ণেতি পসংসতি। অৰণ্ণং ভণতি নাম দ্ৰে মগ্গে খুংসেতি ৰম্ভেতি গরহতি। যাচতি নাম দেহি মে, অরহসি মে দাতুন্তি। আযাচতি নাম কদা তে মাতা পসীদিস্সতি, কদা তে পিতা পসীদিস্সতি, কদা তে দেৰতাযো পসীদিস্সন্তি, কদা [কদা তে (স্যা॰)] সুখণো সুলযো সুমুহুত্তো ভৰিস্সতি, কদা তে মেথুনং ধম্মং লভিস্সামীতি। পুচ্ছতি নাম কথং ত্ৰং সামিকস্স দেসি, কথং জারস্স দেসীতি? পটিপুচ্ছতি নাম এৰং কির ত্ৰং সামিকস্স দেসি, এৰং জারস্স দেসীতি। আচিক্খতি নাম পুট্ঠো ভণতি – ‘‘এৰং দেহি। এৰং দেন্তা সামিকস্স পিযা ভৰিস্সসি মনাপা চা’’তি। অনুসাসতি নাম অপুট্ঠো ভণতি – ‘‘এৰং দেহি। এৰং দেন্তা সামিকস্স পিযা ভৰিস্সতি মনাপা চা’’তি। অক্কোসতি নাম অনিমিত্তাসি, নিমিত্তমত্তাসি, অলোহিতাসি, ধুৰলোহিতাসি , ধুৰচোল়াসি, পগ্ঘরন্তীসি, সিখরণীসি, ইত্থিপণ্ডকাসি, ৰেপুরিসিকাসি, সম্ভিন্নাসি, উভতোব্যঞ্জনাসীতি। ২৮৬. ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা ৰচ্চমগ্গং পস্সাৰমগ্গং আদিস্স ৰণ্ণম্পি ভণতি অৰণ্ণম্পি ভণতি যাচতিপি আযাচতিপি পুচ্ছতিপি পটিপুচ্ছতিপি আচিক্খতিপি অনুসাসতিপি অক্কোসতিপি, আপত্তি সঙ্ঘাদিসেসস্স…পে॰… । দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং ৰচ্চমগ্গং পস্সাৰমগ্গং আদিস্স ৰণ্ণম্পি ভণতি অৰণ্ণংপি ভণতি…পে॰… অক্কোসতিপি, আপত্তি দ্ৰিন্নং সঙ্ঘাদিসেসানং…পে॰… । ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং ৰচ্চমগ্গং পস্সাৰমগ্গং আদিস্স ৰণ্ণম্পি ভণতি অৰণ্ণম্পি ভণতি…পে॰… অক্কোসতিপি, আপত্তি সঙ্ঘাদিসেসেন দুক্কটস্স…পে॰… । ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা ৰচ্চমগ্গং পস্সাৰমগ্গং ঠপেত্ৰা অধক্খকং উব্ভজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি…পে॰… অক্কোসতিপি , আপত্তি থুল্লচ্চযস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং ৰচ্চমগ্গং পস্সাৰমগ্গং ঠপেত্ৰা অধক্খকং উব্ভজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি…পে॰… অক্কোসতিপি, আপত্তি দ্ৰিন্নং থুল্লচ্চযানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং ৰচ্চমগ্গং পস্সাৰমগ্গং ঠপেত্ৰা অধক্খকং উব্ভজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি…পে॰… অক্কোসতিপি, আপত্তি থুল্লচ্চযেন দুক্কটস্স…পে॰…। ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা উব্ভক্খকং অধোজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি…পে॰… অক্কোসতিপি, আপত্তি দুক্কটস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং উব্ভক্খকং অধোজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি…পে॰… অক্কোসতিপি, আপত্তি দ্ৰিন্নং দুক্কটানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং উব্ভক্খকং অধোজাণুমণ্ডলং আদিস্স ৰণ্ণম্পি ভণতি অৰণ্ণম্পি ভণতি…পে॰… অক্কোসতিপি, আপত্তি দ্ৰিন্নং দুক্কটানং…পে॰…। ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা কাযপটিবদ্ধং আদিস্স ৰণ্ণম্পি ভণতি অৰণ্ণম্পি ভণতি…পে॰… অক্কোসতিপি, আপত্তি দুক্কটস্স…পে॰…। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং কাযপটিবদ্ধং আদিস্স ৰণ্ণম্পি ভণতি অৰণ্ণম্পি ভণতি…পে॰… অক্কোসতিপি, আপত্তি দ্ৰিন্নং দুক্কটানং…পে॰…। ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং কাযপটিবদ্ধং আদিস্স ৰণ্ণম্পি ভণতি অৰণ্ণম্পি ভণতি…পে॰… অক্কোসতিপি, আপত্তি দ্ৰিন্নং দুক্কটানং…পে॰…। ২৮৭. অনাপত্তি অত্থপুরেক্খারস্স, ধম্মপুরেক্খারস্স, অনুসাসনিপুরেক্খারস্স, উম্মত্তকস্স, আদিকম্মিকস্সাতি। ৰিনীতৰত্থুউদ্দানগাথা লোহিতং কক্কসাকিণ্ণং, খরং দীঘঞ্চ ৰাপিতং। কচ্চি সংসীদতি মগ্গো, সদ্ধা দানেন কম্মুনাতি॥ ৰিনীতৰত্থু ২৮৮. তেন খো পন সমযেন অঞ্ঞতরা ইত্থী নৰরত্তং কম্বলং পারুতা হোতি। অঞ্ঞতরো ভিক্খু সারত্তো তং ইত্থিং এতদৰোচ – ‘‘লোহিতং খো তে, ভগিনী’’তি। সা ন পটিৰিজানি। ‘‘আমায্য, নৰরত্তো কম্বলো’’তি। তস্স কুক্কুচ্চং অহোসি ‘‘ভগৰতা সিক্খাপদং পঞ্ঞত্তং, কচ্চি নু খো অহং সঙ্ঘাদিসেসং আপত্তিং আপন্নো’’তি? ভগৰতো এতমত্থং আরোচেসি। ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। তেন খো পন সমযেন অঞ্ঞতরা ইত্থী খরকম্বলং পারুতা হোতি। অঞ্ঞতরো ভিক্খু সারত্তো তং ইত্থিং এতদৰোচ – ‘‘কক্কসলোমং খো তে, ভগিনী’’তি। সা ন পটিৰিজানি। ‘‘আমায্য, খরকম্বলকো’’তি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। তেন খো পন সমযেন অঞ্ঞতরা ইত্থী নৰাৰুতং কম্বলং পারুতা হোতি। অঞ্ঞতরো ভিক্খু সারত্তো তং ইত্থিং এতদৰোচ – ‘‘আকিণ্ণলোমং খো তে, ভগিনী’’তি। সা ন পটিৰিজানি। ‘‘আমায্য, নৰাৰুতো কম্বলো’’তি। তস্স কুক্কুচ্চংঅহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। তেন খো পন সমযেন অঞ্ঞতরা ইত্থী খরকম্বলং পারুতা হোতি। অঞ্ঞতরো ভিক্খু সারত্তো তং ইত্থিং এতদৰোচ – ‘‘খরলোমং খো তে, ভগিনী’’তি। সা ন পটিৰিজানি। ‘‘আমায্য, খরকম্বলকো’’তি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। তেন খো পন সমযেন অঞ্ঞতরা ইত্থী পাৰারং [দীঘপাৰারং (স্যা॰)] পারুতা হোতি। অঞ্ঞতরো ভিক্খু সারত্তো তং ইত্থিং এতদৰোচ – ‘‘দীঘলোমং খো তে, ভগিনী’’তি। সা ন পটিৰিজানি। ‘‘আমায্য, পাৰারো’’ [দীঘপাৰারো (স্যা॰)] তি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। ২৮৯. তেন খো পন সমযেন অঞ্ঞতরা ইত্থী খেত্তং ৰপাপেত্ৰা আগচ্ছতি। অঞ্ঞতরো ভিক্খু সারত্তো তং ইত্থিং এতদৰোচ – ‘‘ৰাপিতং খো তে, ভগিনী’’তি? সা ন পটিৰিজানি। ‘‘আমায্য, নো চ খো পটিৰুত্ত’’ন্তি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। তেন খো পন সমযেন অঞ্ঞতরো ভিক্খু পরিব্বাজিকং পটিপথে পস্সিত্ৰা সারত্তো তং পরিব্বাজিকং এতদৰোচ – ‘‘কচ্চি, ভগিনি, মগ্গো সংসীদতী’’তি? সা ন পটিৰিজানি। ‘‘আম ভিক্খু, পটিপজ্জিস্সসী’’তি । তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি। তেন খো পন সমযেন অঞ্ঞতরো ভিক্খু সারত্তো অঞ্ঞতরং ইত্থিং এতদৰোচ – ‘‘সদ্ধাসি ত্ৰং, ভগিনি। অপিচ, যং সামিকস্স দেসি তং নাম্হাকং দেসী’’তি । ‘‘কিং, ভন্তে’’তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরো ভিক্খু সারত্তো অঞ্ঞতরং ইত্থিং এতদৰোচ – ‘‘সদ্ধাসি ত্ৰং, ভগিনি। অপিচ, যং অগ্গদানং তং নাম্হাকং দেসী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরা ইত্থী কম্মং করোতি। অঞ্ঞতরো ভিক্খু সারত্তো তং ইত্থিং এতদৰোচ – ‘‘তিট্ঠ, ভগিনি, অহং করিস্সামীতি…পে॰… নিসীদ, ভগিনি, অহং করিস্সামীতি…পে॰… নিপজ্জ, ভগিনি, অহং করিস্সামী’’তি। সা ন পটিৰিজানি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি। দুট্ঠুল্লৰাচাসিক্খাপদং নিট্ঠিতং ততিযং। ৪. অত্তকামপারিচরিযসিক্খাপদং ২৯০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা উদাযী সাৰত্থিযং কুলূপকো হোতি, বহুকানি কুলানি উপসঙ্কমতি। তেন খো পন সমযেন অঞ্ঞতরা ইত্থী মতপতিকা অভিরূপা হোতি দস্সনীযা পাসাদিকা। অথ খো আযস্মা উদাযী পুব্বণ্হসমযং নিৰাসেত্ৰা পত্তচীৰরমাদায যেন তস্সা ইত্থিযা নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি। অথ খো সা ইত্থী যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং অভিৰাদেত্ৰা একমন্তং নিসীদি। একমন্তং নিসিন্নং খো তং ইত্থিং আযস্মা উদাযী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো সা ইত্থী আযস্মতা উদাযিনা ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা আযস্মন্তং উদাযিং এতদৰোচ – ‘‘ৰদেয্যাথ, ভন্তে, যেন অত্থো। পটিবলা মযং অয্যস্স দাতুং যদিদং চীৰরপিণ্ডপাতসেনাসনগিলানপ্পচ্চযভেসজ্জপরিক্খার’’ন্তি। ‘‘ন খো তে, ভগিনি, অম্হাকং দুল্লভা যদিদং চীৰরপিণ্ডপাতসেনাসনগিলানপ্পচ্চযভেসজ্জপরিক্খারা। অপিচ, যো অম্হাকং দুল্লভো তং দেহী’’তি। ‘‘কিং, ভন্তে’’তি? ‘‘মেথুনধম্ম’’ন্তি। ‘‘অত্থো , ভন্তে’’তি? ‘‘অত্থো, ভগিনী’’তি। ‘‘এহি, ভন্তে’’তি, ওৰরকং পৰিসিত্ৰা সাটকং নিক্খিপিত্ৰা মঞ্চকে উত্তানা নিপজ্জি। অথ খো আযস্মা উদাযী যেন সা ইত্থী তেনুপসঙ্কমি; উপসঙ্কমিত্ৰা – ‘‘কো ইমং ৰসলং দুগ্গন্ধং আমসিস্সতী’’তি, নিট্ঠুহিত্ৰা পক্কামি। অথ খো সা ইত্থী উজ্ঝাযতি খিয্যতি ৰিপাচেতি – ‘‘অলজ্জিনো ইমে সমণা সক্যপুত্তিযা দুস্সীলা মুসাৰাদিনো। ইমে হি নাম ধম্মচারিনো সমচারিনো ব্রহ্মচারিনো সচ্চৰাদিনো সীলৰন্তো কল্যাণধম্মা পটিজানিস্সন্তি! নত্থি ইমেসং সামঞ্ঞং নত্থি ইমেসং ব্রহ্মঞ্ঞং, নট্ঠং ইমেসং সামঞ্ঞং নট্ঠং ইমেসং ব্রহ্মঞ্ঞং, কুতো ইমেসং সামঞ্ঞং কুতো ইমেসং ব্রহ্মঞ্ঞং, অপগতা ইমে সামঞ্ঞা অপগতা ইমে ব্রহ্মঞ্ঞা। কথঞ্হি নাম সমণো উদাযী মং সামং মেথুনধম্মং যাচিত্ৰা, ‘কো ইমং ৰসলং দুগ্গন্ধং আমসিস্সতী’’তি নিট্ঠুহিত্ৰা পক্কমিস্সতি! কিং মে পাপকং কিং মে দুগ্গন্ধং, কস্সাহং কেন হাযামী’’তি? অঞ্ঞাপি ইত্থিযো উজ্ঝাযন্তি খিয্যন্তি ৰিপাচেন্তি – ‘‘অলজ্জিনো ইমে সমণা সক্যপুত্তিযা দুস্সীলা মুসাৰাদিনো…পে॰… কথঞ্হি নাম সমণো উদাযী ইমিস্সা সামং মেথুনধম্মং যাচিত্ৰা, ‘কো ইমং ৰসলং দুগ্গন্ধং আমসিস্সতী’তি নিট্ঠুহিত্ৰা পক্কমিস্সতি! কিং ইমিস্সা পাপকং কিং ইমিস্সা দুগ্গন্ধং, কস্সাযং কেন হাযতী’’তি? অস্সোসুং খো ভিক্খূ তাসং ইত্থীনং উজ্ঝাযন্তীনং খিয্যন্তীনং ৰিপাচেন্তীনং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী মাতুগামস্স সন্তিকে অত্তকামপারিচরিযায ৰণ্ণং ভাসিস্সতী’’তি! অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং উদাযিং পটিপুচ্ছি – ‘‘সচ্চং কির ত্ৰং, উদাযি, মাতুগামস্স সন্তিকে অত্তকামপারিচরিযায ৰণ্ণং ভাসসী’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং, মোঘপুরিস, অননুলোমিকং অপ্পতিরূপং অস্সামণকং অকপ্পিযং অকরণীযং। কথঞ্হি নাম ত্ৰং, মোঘপুরিস, মাতুগামস্স সন্তিকে অত্তকামপারিচরিযায ৰণ্ণং ভাসিস্সসি! ননু মযা , মোঘপুরিস, অনেকপরিযাযেন ৰিরাগায ধম্মো দেসিতো নো সরাগায…পে॰… কামপরিল়াহানং ৰূপসমো অক্খাতো? নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ২৯১. ‘‘যো পন ভিক্খু ওতিণ্ণো ৰিপরিণতেন চিত্তেন মাতুগামস্স সন্তিকে অত্তকামপারিচরিযায ৰণ্ণং ভাসেয্য – ‘এতদগ্গং, ভগিনি, পারিচরিযানং যা মাদিসং সীলৰন্তং কল্যাণধম্মং ব্রহ্মচারিং এতেন ধম্মেন পরিচরেয্যাতি মেথুনুপসংহিতেন’, সঙ্ঘাদিসেসো’’তি। ২৯২. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি। ওতিণ্ণো নাম সারত্তো অপেক্খৰা পটিবদ্ধচিত্তো। ৰিপরিণতন্তি রত্তম্পি চিত্তং ৰিপরিণত্তং, দুট্ঠম্পি চিত্তং ৰিপরিণতং, মূল়্হম্পি চিত্তং ৰিপরিণতং। অপিচ, রত্তং চিত্তং ইমস্মিং অত্থে অধিপ্পেতং ৰিপরিণতন্তি। মাতুগামো নাম মনুস্সিত্থী, ন যক্খী, ন পেতী, ন তিরচ্ছানগতা। ৰিঞ্ঞূ পটিবলা সুভাসিতদুব্ভাসিতং দুট্ঠল্লাদুট্ঠুল্লং আজানিতুং। মাতুগামস্স সন্তিকেতি মাতুগামস্স সামন্তা, মাতুগামস্স অৰিদূরে। অত্তকামন্তি অত্তনো কামং অত্তনো হেতুং অত্তনো অধিপ্পাযং অত্তনো পারিচরিযং। এতদগ্গন্তি এতং অগ্গং এতং সেট্ঠং এতং মোক্খং এতং উত্তমং এতং পৰরং। যাতি খত্তিযী [খত্তিযা (স্যা॰)] ৰা ব্রাহ্মণী ৰা ৰেস্সী ৰা সুদ্দী ৰা। মাদিসন্তি খত্তিযং ৰা ব্রাহ্মণং ৰা ৰেস্সং ৰা সুদ্দং ৰা। সীলৰন্তন্তি পাণাতিপাতা পটিৰিরতং, অদিন্নাদানা পটিৰিরতং, মুসাৰাদা পটিৰিরতং। ব্রহ্মচারিন্তি মেথুনধম্মা পটিৰিরতং। কল্যাণধম্মো নাম তেন চ সীলেন তেন চ ব্রহ্মচরিযেন কল্যাণধম্মো হোতি। এতেন ধম্মেনাতি মেথুনধম্মেন। পরিচরেয্যাতি অভিরমেয্য। মেথুনুপসংহিতেনাতি মেথুনধম্মপ্পটিসংযুত্তেন। সঙ্ঘাদিসেসোতি…পে॰… তেনপি ৰুচ্চতি সঙ্ঘাদিসেসোতি। ২৯৩. ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা সন্তিকে অত্তকামপারিচরিযায ৰণ্ণং ভাসতি, আপত্তি সঙ্ঘাদিসেসস্স । ইত্থী চ হোতি ৰেমতিকো…পে॰… পণ্ডকসঞ্ঞী… পুরিসসঞ্ঞী… তিরচ্ছানগতসঞ্ঞী সারত্তো চ। ভিক্খু চ নং ইত্থিযা সন্তিকে অত্তকামপারিচরিযায ৰণ্ণং ভাসতি, আপত্তি থুল্লচ্চযস্স। পণ্ডকো চ হোতি পণ্ডকসঞ্ঞী সারত্তো চ। ভিক্খু চ নং পণ্ডকস্স সন্তিকে অত্তকামপারিচরিযায ৰণ্ণং ভাসতি, আপত্তি থুল্লচ্চযস্স। পণ্ডকো চ হোতি ৰেমতিকো…পে॰… পুরিসসঞ্ঞী… তিরচ্ছানগতসঞ্ঞী… ইত্থিসঞ্ঞী সারত্তো চ। ভিক্খু চ নং পণ্ডকস্স সন্তিকে অত্তকামপারিচরিযায ৰণ্ণং ভাসতি, আপত্তি দুক্কটস্স। পুরিসো চ হোতি…পে॰… তিরচ্ছানগতো চ হোতি তিরচ্ছানগতসঞ্ঞী…পে॰… ৰেমতিকো ইত্থিসঞ্ঞী… পণ্ডকসঞ্ঞী… পুরিসসঞ্ঞী সারত্তো চ। ভিক্খু চ নং তিরচ্ছানগতস্স সন্তিকে অত্তকামপারিচরিযায ৰণ্ণং ভাসতি, আপত্তি দুক্কটস্স। দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং সন্তিকে অত্তকামপারিচরিযায ৰণ্ণং ভাসতি, আপত্তি দ্ৰিন্নং সঙ্ঘাদিসেসানং…পে॰… । ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং সন্তিকে অত্তকামপারিচরিযায ৰণ্ণং ভাসতি, আপত্তি সঙ্ঘাদিসেসেন দুক্কটস্স…পে॰… । ২৯৪. অনাপত্তি ‘‘চীৰরপিণ্ডপাতসেনাসনগিলানপ্পচ্চযভেসজ্জপরিক্খারেন উপট্ঠহা’’তি ভণতি, উম্মত্তকস্স আদিকম্মিকস্সাতি। ৰিনীতৰত্থুউদ্দানগাথা কথং ৰঞ্ঝা লভে পুত্তং, পিযা চ সুভগা সিযং। কিং দজ্জং কেনুপট্ঠেয্যং, কথং গচ্ছেয্যং সুগ্গতিন্তি॥ ৰিনীতৰত্থু ২৯৫. তেন খো পন সমযেন অঞ্ঞতরা ৰঞ্ঝা ইত্থী কুলূপকং ভিক্খুং এতদৰোচ – ‘‘কথাহং, ভন্তে, ৰিজাযেয্য’’ন্তি? ‘‘তেন হি, ভগিনি, অগ্গদানং দেহী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরা ৰিজাযিনী ইত্থী কুলূপকং ভিক্খুং এতদৰোচ – ‘‘কথাহং, ভন্তে, পুত্তং লভেয্য’’ন্তি? ‘‘তেন হি, ভগিনি, অগ্গদানং দেহী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরা ইত্থী কুলূপকং ভিক্খুং এতদৰোচ – ‘‘কথাহং, ভন্তে, সামিকস্স পিযা অস্স’’ন্তি? ‘‘তেন হি, ভগিনি, অগ্গদানং দেহী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরা ইত্থী কুলূপকং ভিক্খুং এতদৰোচ – ‘‘কথাহং, ভন্তে, সুভগা অস্স’’ন্তি? ‘‘তেন হি , ভগিনি, অগ্গদানং দেহী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরা ইত্থী কুলূপকং ভিক্খুং এতদৰোচ – ‘‘ক্যাহং, ভন্তে, অয্যস্স দজ্জামী’’তি? ‘‘অগ্গদানং, ভগিনী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরা ইত্থী কুলূপকং ভিক্খুং এতদৰোচ – ‘‘কেনাহং, ভন্তে, অয্যং উপট্ঠেমী’’তি? ‘‘অগ্গদানেন, ভগিনী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। তেন খো পন সমযেন অঞ্ঞতরা ইত্থী কুলূপকং ভিক্খুং এতদৰোচ – ‘‘কথাহং, ভন্তে, সুগতিং গচ্ছেয্য’’ন্তি? ‘‘তেন হি, ভগিনি, অগ্গদানং দেহী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি। অত্তকামপারিচরিযসিক্খাপদং নিট্ঠিতং চতুত্থং। ৫. সঞ্চরিত্তসিক্খাপদং ২৯৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা উদাযী সাৰত্থিযং কুলূপকো হোতি। বহুকানি কুলানি উপসঙ্কমতি। যত্থ পস্সতি কুমারকং ৰা অপজাপতিকং, কুমারিকং ৰা অপতিকং, কুমারকস্স মাতাপিতূনং সন্তিকে কুমারিকায ৰণ্ণং ভণতি – ‘‘অমুকস্স কুলস্স কুমারিকা অভিরূপা দস্সনীযা পাসাদিকা পণ্ডিতা ব্যত্তা মেধাৰিনী দক্খা অনলসা। ছন্না সা কুমারিকা ইমস্স কুমারকস্সা’’তি। তে এৰং ৰদন্তি – ‘‘এতে খো, ভন্তে, অম্হে ন জানন্তি – ‘কে ৰা ইমে কস্স ৰা’তি। সচে, ভন্তে, অয্যো দাপেয্য আনেয্যাম মযং তং কুমারিকং ইমস্স কুমারকস্সা’’তি। কুমারিকায মাতাপিতূনং সন্তিকে কুমারকস্স ৰণ্ণং ভণতি – ‘‘অমুকস্স কুলস্স কুমারকো অভিরূপো দস্সনীযো পাসাদিকো পণ্ডিতো ব্যত্তো মেধাৰী দক্খো অনলসো। ছন্নাযং কুমারিকা তস্স কুমারকস্সা’’তি [ছন্নো সো কুমারকো ইমিস্সা কুমারিকাযাতি (স্যা॰)]। তে এৰং ৰদন্তি – ‘‘এতে খো, ভন্তে, অম্হে ন জানন্তি – ‘কে ৰা ইমে কস্স ৰা’তি, কিস্মিং ৰিয কুমারিকায ৰত্তুং। সচে, ভন্তে, অয্যো যাচাপেয্য দজ্জেয্যাম মযং ইমং কুমারিকং তস্স কুমারকস্সা’’তি। এতেনেৰ উপাযেন আৰাহানিপি কারাপেতি , ৰিৰাহানিপি কারাপেতি, ৰারেয্যানিপি কারাপেতি। ২৯৭. তেন খো পন সমযেন অঞ্ঞতরিস্সা পুরাণগণকিযা ধীতা অভিরূপা হোতি দস্সনীযা পাসাদিকা। তিরোগামকা আজীৰকসাৰকা আগন্ত্ৰা তং গণকিং এতদৰোচুং – ‘‘দেহায্যে, ইমং কুমারিকং অম্হাকং কুমারকস্সা’’তি। সা এৰমাহ – ‘‘অহং খ্ৰয্যো [খ্ৰয্যা (স্যা॰), খ্ৰায্যো (ক॰)] তুম্হে ন জানামি – ‘কে ৰা ইমে কস্স ৰা’তি। অযঞ্চ মে একধীতিকা, তিরোগামো চ গন্তব্বো, নাহং দস্সামী’’তি। মনুস্সা তে আজীৰকসাৰকে এতদৰোচুং – ‘‘কিস্স তুম্হে, অয্যো , আগতত্থা’’তি? ‘‘ইধ মযং, অয্যো, অমুকং নাম গণকিং ধীতরং যাচিম্হা অম্হাকং কুমারকস্স। সা এৰমাহ – ‘অহং, খ্ৰয্যো তুম্হে ন জানামি – কে ৰা ইমে কস্স ৰা’তি। অযঞ্চ মে একধীতিকা, তিরোগামো চ গন্তব্বো, নাহং দস্সামী’’তি। ‘‘কিস্স তুম্হে, অয্যো, তং গণকিং ধীতরং যাচিত্থ? ননু অয্যো উদাযী ৰত্তব্বো। অয্যো উদাযী দাপেস্সতী’’তি। অথ খো তে আজীৰকসাৰকা যেনাযস্মা উদাযী তেনুপসঙ্কমিংসু; উপসঙ্কমিত্ৰা আযস্মন্তং উদাযিং এতদৰোচুং – ‘‘ইধ মযং, ভন্তে, অমুকং নাম গণকিং ধীতরং যাচিম্হা অম্হাকং কুমারকস্স। সা এৰমাহ – ‘অহং খ্ৰয্যো তুম্হে ন জানামি – কে ৰা ইমে কস্স ৰাতি। অযঞ্চ মে একধীতিকা, তিরোগামো চ গন্তব্বো, নাহং দস্সামী’তি। সাধু, ভন্তে, অয্যো তং গণকিং ধীতরং দাপেতু অম্হাকং কুমারকস্সা’’তি। অথ খো আযস্মা উদাযী যেন সা গণকী তেনুপসঙ্কমি; উপসঙ্কমিত্ৰা তং গণকিং এতদৰোচ – ‘‘কিস্সিমেসং ধীতরং ন দেসী’’তি? ‘‘অহং খ্ৰয্য, ইমে ন জানামি – ‘কে ৰা ইমে কস্স ৰা’তি। অযঞ্চ মে একধীতিকা, তিরোগামো চ গন্তব্বো, নাহং দস্সামী’’তি। ‘‘দেহিমেসং। অহং ইমে জানামী’’তি। ‘‘সচে, ভন্তে, অয্যো জানাতি, দস্সামী’’তি। অথ খো সা গণকী তেসং আজীৰকসাৰকানং ধীতরং অদাসি। অথ খো তে আজীৰকসাৰকা তং কুমারিকং নেত্ৰা মাসংযেৰ সুণিসভোগেন ভুঞ্জিংসু। ততো অপরেন দাসিভোগেন ভুঞ্জন্তি। অথ খো সা কুমারিকা মাতুযা সন্তিকে দূতং পাহেসি – ‘‘অহম্হি দুগ্গতা দুক্খিতা, ন সুখং লভামি। মাসংযেৰ মং সুণিসভোগেন ভুঞ্জিংসু। ততো অপরেন দাসিভোগেন ভুঞ্জন্তি। আগচ্ছতু মে মাতা, মং নেস্সতূ’’তি। অথ খো সা গণকী যেন তে আজীৰকসাৰকা তেনুপসঙ্কমি; উপসঙ্কমিত্ৰা তে আজীৰকসাৰকে এতদৰোচ – ‘‘মায্যো, ইমং কুমারিকং দাসিভোগেন ভুঞ্জিত্থ। সুণিসভোগেন ইমং কুমারিকং ভুঞ্জথা’’তি। তে এৰমাহংসু – ‘‘নত্থম্হাকং তযা সদ্ধিং আহারূপহারো, সমণেন সদ্ধিং অম্হাকং আহারূপহারো । গচ্ছ ত্ৰং। ন মযং তং জানামা’’তি। অথ খো সা গণকী তেহি আজীৰকসাৰকেহি অপসাদিতা পুনদেৰ সাৰত্থিং পচ্চাগঞ্ছি। দুতিযম্পি খো সা কুমারিকা মাতুযা সন্তিকে দূতং পাহেসি – ‘‘অহম্হি দুগ্গতা দুক্খিতা, ন সুখং লভামি। মাসংযেৰ মং সুণিসভোগেন ভুঞ্জিংসু। ততো অপরেন দাসিভোগেন ভুঞ্জন্তি। আগচ্ছতু মে মাতা, মং নেস্সতূ’’তি। অথ খো সা গণকী যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিংএতদৰোচ – ‘‘সা কির, ভন্তে, কুমারিকা দুগ্গতা দুক্খিতা, ন সুখং লভতি। মাসংযেৰ নং সুণিসভোগেন ভুঞ্জিংসু। ততো অপরেন দাসিভোগেন ভুঞ্জন্তি। ৰদেয্যাথ, ভন্তে – ‘মায্যো, ইমং কুমারিকং দাসিভোগেন ভুঞ্জিত্থ। সুণিসভোগেন ইমং কুমারিকং ভুঞ্জিথা’’’তি। অথ খো আযস্মা উদাযী যেন তে আজীৰকসাৰকা তেনুপসঙ্কমি; উপসঙ্কমিত্ৰা তে আজীৰকসাৰকে এতদৰোচ – ‘‘মায্যো, ইমং কুমারিকং দাসিভোগেন ভুজ্জিত্থ। সুণিসভোগেন ইমং কুমারিকং ভুঞ্জথা’’তি। তে এৰমাহংসু – ‘‘নত্থম্হাকং তযা সদ্ধিং আহারূপহারো, গণকিযা সদ্ধিং অম্হাকং আহারূপহারো। সমণেন ভৰিতব্বং অব্যাৰটেন। সমণো অস্স সুসমণো, গচ্ছ ত্ৰং, ন মযং তং জানামা’’তি। অথ খো আযস্মা উদাযী তেহি আজীৰকসাৰকেহি অপসাদিতো পুনদেৰ সাৰত্থিং পচ্চাগঞ্ছি। ততিযম্পি খো সা কুমারিকা মাতুযা সন্তিকে দূতং পাহেসি – ‘‘অহম্হি দুগ্গতা দুক্খিতা, ন সুখং লভামি। মাসংযেৰ মং সুণিসভোগেন ভুঞ্জিংসু। ততো অপরেন দাসিভোগেন ভুঞ্জন্তি। আগচ্ছতু মে মাতা, মং নেস্সতূ’’তি। দুতিযম্পি খো সা গণকী যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং এতদৰোচ – ‘‘সা কির, ভন্তে, কুমারিকা দুগ্গতা দুক্খিতা, ন সুখং লভতি। মাসংযেৰ নং সুণিসভোগেন ভুঞ্জিংসু। ততো অপরেন দাসিভোগেন ভুঞ্জন্তি। ৰদেয্যাথ, ভন্তে – ‘মায্যো, ইমং কুমারিকং দাসিভোগেন ভুঞ্জিত্থ, সুণিসভোগেন ইমং কুমারিকং ভুঞ্জথা’’’তি। ‘‘পঠমংপাহং তেহি আজীৰকসাৰকেহি অপসাদিতো। গচ্ছ ত্ৰং। নাহং গমিস্সামী’’তি। ২৯৮. অথ খো সা গণকী উজ্ঝাযতি খিয্যতি ৰিপাচেতি – ‘‘এৰং দুগ্গতো হোতু অয্যো উদাযী, এৰং দুক্খিতো হোতু অয্যো উদাযী, এৰং মা সুখং লভতু অয্যো উদাযী, যথা মে কুমারিকা দুগ্গতা দুক্খিতা ন সুখং লভতি পাপিকায সস্সুযা পাপকেন সসুরেন পাপকেন সামিকেনা’’তি। সাপি খো কুমারিকা উজ্ঝাযতি খিয্যতি ৰিপাচেতি – ‘‘এৰং দুগ্গতো হোতু অয্যো উদাযী, এৰং দুক্খিতো হোতু অয্যো উদাযী, এৰং মা সুখং লভতু অয্যো উদাযী, যথাহং দুগ্গতা দুক্খিতা ন সুখং লভামি পাপিকায সস্সুযা পাপকেন সসুরেন পাপকেন সামিকেনা’’তি। অঞ্ঞাপি ইত্থিযো অসন্তুট্ঠা সস্সূহি ৰা সসুরেহি ৰা সামিকেহি ৰা, তা এৰং ওযাচন্তি – ‘‘এৰং দুগ্গতো হোতু অয্যো উদাযী, এৰং দুক্খিতো হোতু অয্যো উদাযী, এৰং মা সুখং লভতু অয্যো উদাযী, যথা মযং দুগ্গতা দুক্খিতা ন সুখং লভাম পাপিকাহি সস্সূহি পাপকেহি সসুরেহি পাপকেহি সামিকেহী’’তি। যা পন তা ইত্থিযো সন্তুট্ঠা সস্সূহি ৰা সসুরেহি ৰা সামিকেহি ৰা তা এৰং আযাচন্তি – ‘‘এৰং সুখিতো হোতু অয্যো উদাযী, এৰং সজ্জিতো হোতু অয্যো উদাযী, এৰং সুখমেধো [সুখমেধিতো (সী॰ ক॰)] হোতু অয্যো উদাযী, যথা মযং সুখিতা সজ্জিতা সুখমেধা ভদ্দিকাহি সস্সূহি ভদ্দকেহি সসুরেহি ভদ্দকেহি সামিকেহী’’তি। অস্সোসুং খো ভিক্খূ একচ্চানং ইত্থীনং ওযাচন্তীনং একচ্চানং ইত্থীনং আযাচন্তীনং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী সঞ্চরিত্তং সমাপজ্জিস্সতী’’তি! অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং উদাযিং পটিপুচ্ছি – ‘‘সচ্চং কির ত্ৰং, উদাযি, সঞ্চরিত্তং সমাপজ্জসী’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, সঞ্চরিত্তং সমাপজ্জসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ২৯৯. ‘‘যো পন ভিক্খু সঞ্চরিত্তং সমাপজ্জেয্য, ইত্থিযা ৰা পুরিসমতিং পুরিসস্স ৰা ইত্থিমতিং, জাযত্তনে ৰা জারত্তনে ৰা, সঙ্ঘাদিসেসো’’তি। এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি। ৩০০. তেন খো পন সমযেন সম্বহুলা ধুত্তা উয্যানে পরিচারেন্তা অঞ্ঞতরিস্সা ৰেসিযা সন্তিকে দূতং পাহেসুং – ‘‘আগচ্ছতু উয্যানে, পরিচারেস্সামা’’তি। সা এৰমাহ – ‘‘অহং খ্ৰয্যো তুম্হে ন জানামি – ‘কে ৰা ইমে কস্স ৰা’তি। অহঞ্চম্হি বহুভণ্ডা বহুপরিক্খারা, বহিনগরঞ্চ গন্তব্বং। নাহং গমিস্সামী’’তি। অথ খো সো দূতো তেসং ধুত্তানং এতমত্থং আরোচেসি। এৰং ৰুত্তে, অঞ্ঞতরো পুরিসো তে ধুত্তে এতদৰোচ – ‘‘কিস্স তুম্হে অয্যো এতং ৰেসিং যাচিত্থ? ননু অয্যো উদাযী ৰত্তব্বো! অয্যো উদাযী উয্যোজেস্সতী’’তি। এৰং ৰুত্তে, অঞ্ঞতরো উপাসকো তং পুরিসং এতদৰোচ – ‘‘মায্যো এৰং অৰচ। ন কপ্পতি সমণানং সক্যপুত্তিযানং এৰরূপং কাতুং। নায্যো উদাযী এৰং করিস্সতী’’তি। এৰং ৰুত্তে, ‘‘করিস্সতি ন করিস্সতী’’তি অব্ভুতমকংসু। অথ খো তে ধুত্তা যেনাযস্মা উদাযী তেনুপসঙ্কমিংসু; উপসঙ্কমিত্ৰা আযস্মন্তং উদাযিং এতদৰোচুং – ‘‘ইধ মযং, ভন্তে, উয্যানে পরিচারেন্তা অসুকায নাম ৰেসিযা সন্তিকে দূতং পহিণিম্হা – ‘আগচ্ছতু উয্যানে, পরিচারেস্সামা’তি। সা এৰমাহ – ‘অহং খ্ৰয্যো তুম্হে ন জানামি – কে ৰা ইমে কস্স ৰাতি, অহঞ্চম্হি বহুভণ্ডা বহুপরিক্খারা, বহিনগরঞ্চ গন্তব্বং। নাহং গমিস্সামী’তি। সাধু, ভন্তে, অয্যো তং ৰসিং উয্যোজেতূ’’তি। অথ খো আযস্মা উদাযী যেন সা ৰেসী তেনুপসঙ্কমি; উপসঙ্কমিত্ৰা তং ৰেসিং এতদৰোচ – ‘‘কিস্সিমেসং ন গচ্ছসী’’তি? ‘‘অহং খ্ৰয্য ইমে ন জানামি – ‘কে ৰা ইমে কস্স ৰা’তি। অহঞ্চম্হি বহুভণ্ডা বহুপরিক্খারা, বহিনগরঞ্চ গন্তব্বং। নাহং গমিস্সামী’’তি। ‘‘গচ্ছিমেসং। অহং ইমে জানামী’’তি। ‘‘সচে, ভন্তে, অয্যো জানাতি অহং গমিস্সামী’’তি। অথ খো তে ধুত্তা তং ৰেসিং আদায উয্যানং অগমংসু। অথ খো সো উপাসকো উজ্ঝাযতি খিয্যতি ৰিপাচেতি – ‘‘কথঞ্হি নাম অয্যো উদাযী তঙ্খণিকং সঞ্চরিত্তং সমাপজ্জিস্সতী’’তি। অস্সোসুং খো ভিক্খূ তস্স উপাসকস্স উজ্ঝাযন্তস্স খিয্যন্তস্স ৰিপাচেন্তস্স। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী তঙ্খণিকং সঞ্চরিত্তং সমাপজ্জিস্সতী’’তি! অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে॰… ‘‘সচ্চং কির ত্ৰং, উদাযি, তঙ্খণিকং সঞ্চরিত্তং সমাপজ্জসী’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… ‘‘কথঞ্হি নাম ত্ৰং, মোঘপুরিস, তঙ্খণিকং সঞ্চরিত্তং সমাপজ্জিস্সসি? নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ৩০১. ‘‘যো পন ভিক্খু সঞ্চরিত্তং সমাপজ্জেয্য, ইত্থিযা ৰা পুরিসমতিং পুরিসস্স ৰা ইত্থিমতিং, জাযত্তনে ৰা জারত্তনে ৰা, অন্তমসো তঙ্খণিকাযপি, সঙ্ঘাদিসেসো’’তি। ৩০২. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি। সঞ্চরিত্তং সমাপজ্জেয্যাতি ইত্থিযা ৰা পহিতো পুরিসস্স সন্তিকে গচ্ছতি, পুরিসেন ৰা পহিতো ইত্থিযা সন্তিকে গচ্ছতি। ইত্থিযা ৰা পুরিসমতিন্তি পুরিসস্স মতিং ইত্থিযা আরোচেতি। পুরিসস্স ৰা ইত্থিমতিন্তি ইত্থিযা মতিং পুরিসস্স আরোচেতি। জাযত্তনে ৰাতি জাযা ভৰিস্সসি। জারত্তনে ৰাতি জারী ভৰিস্সসি। অন্তমসো তঙ্খণিকাযপীতি মুহুত্তিকা ভৰিস্সসি । সঙ্ঘাদিসেসোতি…পে॰… তেনপি ৰুচ্চতি সঙ্ঘাদিসেসোতি। ৩০৩. দস ইত্থিযো – মাতুরক্খিতা পিতুরক্খিতা মাতাপিতুরক্খিতা ভাতুরক্খিতা ভগিনিরক্খিতা ঞাতিরক্খিতা গোত্তরক্খিতা ধম্মরক্খিতা সারক্খা সপরিদণ্ডা। দস ভরিযাযো – ধনক্কীতা ছন্দৰাসিনী ভোগৰাসিনী পটৰাসিনী ওদপত্তকিনী ওভটচুম্বটা দাসী চ ভরিযা চ কম্মকারী চ ভরিযা চ ধজাহটা মুহুত্তিকা। ৩০৪. মাতুরক্খিতা নাম মাতা রক্খতি গোপেতি ইস্সরিযং কারেতি ৰসং ৰত্তেতি। পিতুরক্খিতা নাম পিতা রক্খতি গোপেতি ইস্সরিযং কারেতি ৰসং ৰত্তেতি। মাতাপিতুরক্খিতা নাম মাতাপিতরো রক্খন্তি গোপেন্তি ইস্সরিযং কারেন্তি ৰসং ৰত্তেন্তি। ভাতুরক্খিতা নাম ভাতা রক্খতি গোপেতি ইস্সরিযং কারেতি ৰসং ৰত্তেতি। ভগিনিরক্খিতা নাম ভগিনী রক্খতি গোপেতি ইস্সরিযং কারেতি ৰসং ৰত্তেতি। ঞাতিরক্খিতা নাম ঞাতকা রক্খন্তি গোপেন্তি ইস্সরিযং কারেন্তি ৰসং ৰত্তেন্তি। গোত্তরক্খিতা নাম সগোত্তা রক্খন্তি গোপেন্তি ইস্সরিযং কারেন্তি ৰসং ৰত্তেন্তি। ধম্মরক্খিতা নাম সহধম্মিকা রক্খন্তি গোপেন্তি ইস্সরিযং কারেন্তি ৰসং ৰত্তেন্তি। সারক্খা নাম গব্ভেপি পরিগ্গহিতা হোতি – ময্হং এসাতি। অন্তমসো মালাগুল়পরিক্খিত্তাপি। সপরিদণ্ডা নাম কেহিচি দণ্ডো ঠপিতো হোতি – যো ইত্থন্নামং ইত্থিং গচ্ছতি এত্তকো দণ্ডোতি। ধনক্কীতা নাম ধনেন কিণিত্ৰা ৰাসেতি। ছন্দৰাসিনী নাম পিযো পিযং ৰাসেতি। ভোগৰাসিনী নাম ভোগং দত্ৰা ৰাসেতি। পটৰাসিনী নাম পটং দত্ৰা ৰাসেতি। ওদপত্তকিনী নাম উদকপত্তং আমসিত্ৰা ৰাসেতি। ওভটচুম্বটা নাম চুম্বটং ওরোপেত্ৰা ৰাসেতি। দাসী নাম দাসী চেৰ হোতি ভরিযা চ। কম্মকারী নাম কম্মকারী চেৰ হোতি ভরিযা চ। ধজাহটা নাম করমরানীতা ৰুচ্চতি। মুহুত্তিকা নাম তঙ্খণিকা ৰুচ্চতি। ৩০৫. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ধনক্কীতা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতং ব্রূহি…পে॰… মাতাপিতুরক্খিতং ব্রূহি… ভাতুরক্খিতং ব্রূহি… ভগিনিরক্খিতং ব্রূহি… ঞাতিরক্খিতং ব্রূহি… গোত্তরক্খিতং ব্রূহি… ধম্মরক্খিতং ব্রূহি… সারক্খং ব্রূহি… সপরিদণ্ডং ব্রূহি – ‘হোহি কির ইত্থন্নামস্স ভরিযা ধনক্কীতা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। নিক্খেপপদানি। ৩০৬. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ পিতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ মাতাপিতুরঅখতঞ্চ…পে॰… মাতুরক্খিতঞ্চ ভাতুরক্খিতঞ্চ… মাতুরক্খিতঞ্চ ভগিনিরক্খিতঞ্চ… মাতুরক্খিতঞ্চ ঞাতিরক্খিতঞ্চ… মাতুরক্খিতঞ্চ গোত্তরক্খিতঞ্চ… মাতুরক্খিতঞ্চ ধম্মরক্খিতঞ্চ… মাতুরক্খিতঞ্চ সারক্খঞ্চ… মাতুরক্খিতঞ্চ সপরিদণ্ডঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। খণ্ডচক্কং। ৩০৭. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতঞ্চ মাতাপিতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতঞ্চ ভাতুরক্খিতঞ্চ…পে॰… পিতুরক্খিতঞ্চ ভগিনিরক্খিতঞ্চ… পিতুরক্খিতঞ্চ ঞাতিরক্খিতঞ্চ… পিতুরক্খিতঞ্চ গোত্তরক্খিতঞ্চ… পিতুরক্খিতঞ্চ ধম্মরক্খিতঞ্চ… পিতুরক্খিতঞ্চ সারক্খঞ্চ… পিতুরক্খিতঞ্চ সপরিদণ্ডঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতঞ্চ মাতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। বদ্ধচক্কং মূলং সংখিত্তং। ৩০৮. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডঞ্চ মাতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডঞ্চ পিতুরঅখতঞ্চ…পে॰… সপরিদণ্ডঞ্চ মাতাপিতুরক্খিতঞ্চ… সপরিদণ্ডঞ্চ ভাতুরক্খিতঞ্চ… সপরিদণ্ডঞ্চ ভগিনিরক্খিতঞ্চ… সপরিদণ্ডঞ্চ ঞাতিরক্খিতঞ্চ… সপরিদণ্ডঞ্চ গোত্তরক্খিতঞ্চ… সপরিদণ্ডঞ্চ ধম্মরক্খিতঞ্চ… সপরিদণ্ডঞ্চ সারক্খঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। একমূলকং নিট্ঠিতং। এৰং দুমূলকম্পি তিমূলকম্পি যাৰ নৰমূলকং কাতব্বং। ইদং দসমূলকং ৩০৯. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ পিতুরক্খিতঞ্চ মাতাপিতুরক্খিতঞ্চ ভাতুরক্খিতঞ্চ ভগিনিরক্খিতঞ্চ ঞাতিরক্খিতঞ্চ গোত্তরক্খিতঞ্চ ধম্মরক্খিতঞ্চ সারক্খঞ্চ সপরিদণ্ডঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। ধনক্কীতাচক্কং নিট্ঠিতং। ৩১০. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ছন্দৰাসিনী…পে॰… ভোগৰাসিনী… পটৰাসিনী… ওদপত্তকিনী… ওভটচুম্বটা… দাসী চ ভরিযা চ… কম্মকারী চ ভরিযা চ… ধজাহটা… মুহুত্তিকা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতং ব্রূহি…পে॰… মাতাপিতুরক্খিতং ব্রূহি… ভাতুরক্খিতং ব্রূহি… ভগিনিরক্খিতং ব্রূহি… ঞাতিরক্খিতং ব্রূহি… গোত্তরক্খিতং ব্রূহি… ধম্মরক্খিতং ব্রূহি… সারক্খং ব্রূহি… সপরিদণ্ডং ব্রূহি – ‘হোহি কির ইত্থন্নামস্স ভরিযা মুহুত্তিকা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। নিক্খেপপদানি। ৩১১. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ পিতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ মাতাপিতুরক্খিতঞ্চ…পে॰… মাতুরক্খিতঞ্চ সপরিদণ্ডঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। খণ্ডচক্কং। ৩১২. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতঞ্চ মাতাপিতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতঞ্চ ভাতুরক্খিতঞ্চ…পে॰… পিতুরক্খিতঞ্চ সপরিদণ্ডঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতঞ্চ মাতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। বদ্ধচক্কং মূলং সংখিত্তং। ৩১৩. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডঞ্চ মাতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি । পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডঞ্চ পিতুরক্খিতঞ্চ…পে॰… সপরিদণ্ডঞ্চ সারক্খঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। একমূলকং নিট্ঠিতং। দুমূলকাদীনিপি এৰমেৰ কাতব্বানি। ইদং দসমূলকং ৩১৪. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ পিতুরক্খিতঞ্চ মাতাপিতুরক্খিতঞ্চ ভাতুরক্খিতঞ্চ ভগিনিরক্খিতঞ্চ ঞাতিরক্খিতঞ্চ গোত্তরক্খিতঞ্চ ধম্মরক্খিতঞ্চ সারক্খঞ্চ সপরিদণ্ডঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। মুহুত্তিকাচক্কং নিট্ঠিতং। ৩১৫. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ধনক্কীতা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ছন্দৰাসিনী…পে॰… ভোগৰাসিনী… পটৰাসিনী… ওদপত্তকিনী… ওভটচুম্বটা… দাসী চ ভরিযা চ… কম্মকারী চ ভরিযা চ… ধজাহটা… মুহুত্তিকা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। নিক্খেপপদানি। ৩১৬. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ধনক্কীতা চ ছন্দৰাসিনী চা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ধনক্কীতা চ ভোগৰাসিনী চ…পে॰… ধনক্কীতা চ পটৰাসিনী চ… ধনক্কীতা চ ওদপত্তকিনী চ… ধনক্কীতা চ ওভটচুম্বটা চ… ধনক্কীতা চ দাসী চ ভরিযা চ… ধনক্কীতা চ কম্মকারী চ ভরিযা চ… ধনক্কীতা চ ধজাহটা চ… ধনক্কীতা চ মুহুত্তিকা চা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। খণ্ডচক্কং। ৩১৭. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ছন্দৰাসিনী চ ভোগৰাসিনী চ…পে॰… ছন্দৰাসিনী চ মুহুত্তিকা চ… ছন্দৰাসিনী চ ধনক্কীতা চা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। বদ্ধচক্কং মূলং সংখিত্তং। ৩১৮. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা মুহুত্তিকা চ ধনক্কীতা চ…পে॰… মুহুত্তিকা চ ছন্দৰাসিনী চ…পে॰… মুহুত্তিকা চ ধজাহটা চা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। একমূলকং নিট্ঠিতং। দুমূলকাদীনিপি এৰমেৰ কাতব্বানি। ইদং দসমূলকং ৩১৯. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ধনক্কীতা চ ছন্দৰাসিনী চ ভোগৰাসিনী চ পটৰাসিনী চ ওদপত্তকিনী চ ওভটচুম্বটা চ দাসী চ ভরিযা চ কম্মকারী চ ভরিযা চ ধজাহটা চ মুহুত্তিকা চা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। মাতুরক্খিতাচক্কং নিট্ঠিতং। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতং…পে॰… মাতাপিতুরক্খিতং… ভাতুরক্খিতং… ভগিনিরক্খিতং … ঞাতিরক্খিতং… গোত্তরক্খিতং… ধম্মরক্খিতং … সারক্খং… সপরিদণ্ডং ব্রূহি – ‘হোহি কির ইত্থন্নামস্স ভরিযা ধনক্কীতা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডং ব্রূহি – ‘হোহি কির ইত্থন্নামস্স ভরিযা ছন্দৰাসিনী…পে॰… ভোগৰাসিনী, পটৰাসিনী, ওদপত্তকিনী, ওভটচুম্বটা, দাসী চ ভরিযা চ, কম্মকারী চ ভরিযা চ, ধজাহটা, মুহুত্তিকা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। নিক্খেপপদানি। ৩২০. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডং ব্রূহি – ‘হোহি কির ইত্থন্নামস্স ভরিযা ধনক্কীতা চ ছন্দৰাসিনী চা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডং ব্রূহি – ‘হোহি কির ইত্থন্নামস্স ভরিযা ধনক্কীতা চ ভোগৰাসিনী চ…পে॰… ধনক্কীতা চ মুহুত্তিকা চা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। খণ্ডচক্কং। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডং ব্রূহি – ‘হোহি কির ইত্থন্নামস্স ভরিযা ছন্দৰাসিনী চ ভোগৰাসিনী চ…পে॰… ছন্দৰাসিনী চ মুহুত্তিকা চ, ছন্দৰাসিনী চ ধনক্কীতা চা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। বদ্ধচক্কং মূলং সংখিত্তং। পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডং ব্রূহি – ‘হোহি কির ইত্থন্নামস্স ভরিযা মুহুত্তিকা চ ধনক্কীতা চ…পে॰… মুহুত্তিকা চ ছন্দৰাসিনী চ, মুহুত্তিকা চ ধজাহটা চা’’’তি। পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স। একমূলকং নিট্ঠিতং। দুমূলকম্পি তিমূলকম্পি যাৰ নৰমূলকং এৰমেৰ কাতব্বং। ইদং দসমূলকং। |
Copyright © 2011 Bangladesh Buddhist . All Rights Reserved. |