১০. পাযাসিসুত্তং
৪০৬. এৰং মে সুতং – একং সমযং আযস্মা কুমারকস্সপো কোসলেসু চারিকং চরমানো মহতা ভিক্খুসঙ্ঘেন সদ্ধিং পঞ্চমত্তেহি ভিক্খুসতেহি যেন সেতব্যা নাম কোসলানং নগরং তদৰসরি। তত্র সুদং আযস্মা কুমারকস্সপো সেতব্যাযং ৰিহরতি উত্তরেন সেতব্যং সিংসপাৰনে [সীসপাৰনে (স্যা॰)]। তেন খো পন সমযেন পাযাসি রাজঞ্ঞো সেতব্যং অজ্ঝাৰসতি সত্তুস্সদং সতিণকট্ঠোদকং সধঞ্ঞং রাজভোগ্গং রঞ্ঞা পসেনদিনা কোসলেন দিন্নং রাজদাযং ব্রহ্মদেয্যং। পাযাসিরাজঞ্ঞৰত্থু ৪০৭. তেন খো পন সমযেন পাযাসিস্স রাজঞ্ঞস্স এৰরূপং পাপকং দিট্ঠিগতং উপ্পন্নং হোতি – ‘‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং[সুকটক্কটানং (সী॰ পী॰)] কম্মানং ফলং ৰিপাকো’’তি। অস্সোসুং খো সেতব্যকা ব্রাহ্মণগহপতিকা – ‘‘সমণো খলু ভো কুমারকস্সপো সমণস্স গোতমস্স সাৰকো কোসলেসু চারিকং চরমানো মহতা ভিক্খুসঙ্ঘেন সদ্ধিং পঞ্চমত্তেহি ভিক্খুসতেহি সেতব্যং অনুপ্পত্তো সেতব্যাযং ৰিহরতি উত্তরেন সেতব্যং সিংসপাৰনে। তং খো পন ভৰন্তং কুমারকস্সপং এৰং কল্যাণো কিত্তিসদ্দো অব্ভুগ্গতো – ‘পণ্ডিতো ব্যত্তো মেধাৰী বহুস্সুতো চিত্তকথী কল্যাণপটিভানো ৰুদ্ধো [বুদ্ধো (স্যা॰ ক॰)] চেৰ অরহা চ। সাধু খো পন তথারূপানং অরহতং দস্সনং হোতী’’’তি। অথ খো সেতব্যকা ব্রাহ্মণগহপতিকা সেতব্যায নিক্খমিত্ৰা সঙ্ঘসঙ্ঘী গণীভূতা উত্তরেনমুখা গচ্ছন্তি যেন সিংসপাৰনং [যেন সিংসপাৰনং, তেনুপসঙ্কমন্তি (সী॰ পী॰)]। ৪০৮. তেন খো পন সমযেন পাযাসি রাজঞ্ঞো উপরিপাসাদে দিৰাসেয্যং উপগতো হোতি। অদ্দসা খো পাযাসি রাজঞ্ঞো সেতব্যকে ব্রাহ্মণগহপতিকে সেতব্যায নিক্খমিত্ৰা সঙ্ঘসঙ্ঘী গণীভূতে উত্তরেনমুখে গচ্ছন্তে যেন সিংসপাৰনং [যেন সিংসপাৰনং, তেনুপসঙ্কমন্তে (সী॰ পী॰)], দিস্ৰা খত্তং আমন্তেসি – ‘‘কিং নু খো, ভো খত্তে, সেতব্যকা ব্রাহ্মণগহপতিকা সেতব্যায নিক্খমিত্ৰা সঙ্ঘসঙ্ঘী গণীভূতা উত্তরেনমুখা গচ্ছন্তি যেন সিংসপাৰন’’ন্তি [এত্থ পন সব্বত্থপি এৰমেৰ দিস্সতি, নত্থি পাঠন্তরং]? ‘‘অত্থি খো, ভো, সমণো কুমারকস্সপো, সমণস্স গোতমস্স সাৰকো কোসলেসু চারিকং চরমানো মহতা ভিক্খুসঙ্ঘেন সদ্ধিং পঞ্চমত্তেহি ভিক্খুসতেহি সেতব্যং অনুপ্পত্তো সেতব্যাযং ৰিহরতি উত্তরেন সেতব্যং সিংসপাৰনে। তং খো পন ভৰন্তং কুমারকস্সপং এৰং কল্যাণো কিত্তিসদ্দো অব্ভুগ্গতো – ‘পণ্ডিতো ব্যত্তো মেধাৰী বহুস্সুতো চিত্তকথী কল্যাণপটিভানো ৰুদ্ধো চেৰ অরহা চা’তি [অরহা চ (স্যা॰ ক॰)]। তমেতে [তমেনং তে (সী॰ ক॰), তমেনং (পী॰)] ভৰন্তং কুমারকস্সপং দস্সনায উপসঙ্কমন্তী’’তি। ‘‘তেন হি, ভো খত্তে, যেন সেতব্যকা ব্রাহ্মণগহপতিকা তেনুপসঙ্কম; উপসঙ্কমিত্ৰা সেতব্যকে ব্রাহ্মণগহপতিকে এৰং ৰদেহি – ‘পাযাসি, ভো, রাজঞ্ঞো এৰমাহ – আগমেন্তু কির ভৰন্তো, পাযাসিপি রাজঞ্ঞো সমণং কুমারকস্সপং দস্সনায উপসঙ্কমিস্সতী’তি। পুরা সমণো কুমারকস্সপো সেতব্যকে ব্রাহ্মণগহপতিকে বালে অব্যত্তে সঞ্ঞাপেতি – ‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’তি। নত্থি হি, ভো খত্তে, পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’তি। ‘‘এৰং ভো’’তি খো সো খত্তা পাযাসিস্স রাজঞ্ঞস্স পটিস্সুত্ৰা যেন সেতব্যকা ব্রাহ্মণগহপতিকা তেনুপসঙ্কমি; উপসঙ্কমিত্ৰা সেতব্যকে ব্রাহ্মণগহপতিকে এতদৰোচ – ‘‘পাযাসি, ভো, রাজঞ্ঞো এৰমাহ, আগমেন্তু কির ভৰন্তো, পাযাসিপি রাজঞ্ঞো সমণং কুমারকস্সপং দস্সনায উপসঙ্কমিস্সতী’’তি। ৪০৯. অথ খো পাযাসি রাজঞ্ঞো সেতব্যকেহি ব্রাহ্মণগহপতিকেহি পরিৰুতো যেন সিংসপাৰনং যেনাযস্মা কুমারকস্সপো তেনুপসঙ্কমি; উপসঙ্কমিত্ৰা আযস্মতা কুমারকস্সপেন সদ্ধিং সম্মোদি, সম্মোদনীযং কথং সারণীযং ৰীতিসারেত্ৰা একমন্তং নিসীদি। সেতব্যকাপি খো ব্রাহ্মণগহপতিকা অপ্পেকচ্চে আযস্মন্তং কুমারকস্সপং অভিৰাদেত্ৰা একমন্তংনিসীদিংসু; অপ্পেকচ্চে আযস্মতা কুমারকস্সপেন সদ্ধিং সম্মোদিংসু; সম্মোদনীযং কথং সারণীযং ৰীতিসারেত্ৰা একমন্তং নিসীদিংসু। অপ্পেকচ্চে যেনাযস্মা কুমারকস্সপো তেনঞ্জলিং পণামেত্ৰা একমন্তং নিসীদিংসু। অপ্পেকচ্চে নামগোত্তং সাৰেত্ৰা একমন্তং নিসীদিংসু। অপ্পেকচ্চে তুণ্হীভূতা একমন্তং নিসীদিংসু। নত্থিকৰাদো ৪১০. একমন্তং নিসিন্নো খো পাযাসি রাজঞ্ঞো আযস্মন্তং কুমারকস্সপং এতদৰোচ – ‘‘অহঞ্হি, ভো কস্সপ, এৰংৰাদী এৰংদিট্ঠী – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। ‘‘নাহং, রাজঞ্ঞ, এৰংৰাদিং এৰংদিট্ঠিং অদ্দসং ৰা অস্সোসিং ৰা। কথঞ্হি নাম এৰং ৰদেয্য – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’তি? চন্দিমসূরিযউপমা ৪১১. ‘‘তেন হি, রাজঞ্ঞ, তঞ্ঞেৰেত্থ পটিপুচ্ছিস্সামি, যথা তে খমেয্য, তথা নং ব্যাকরেয্যাসি। তং কিং মঞ্ঞসি, রাজঞ্ঞ, ইমে চন্দিমসূরিযা ইমস্মিং ৰা লোকে পরস্মিং ৰা, দেৰা ৰা তে মনুস্সা ৰা’’তি? ‘‘ইমে, ভো কস্সপ, চন্দিমসূরিযা পরস্মিং লোকে, ন ইমস্মিং; দেৰা তে ন মনুস্সা’’তি। ‘‘ইমিনাপি খো তে, রাজঞ্ঞ, পরিযাযেন এৰং হোতু – ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’’তি। ৪১২. ‘‘কিঞ্চাপি ভৰং কস্সপো এৰমাহ, অথ খো এৰং মে এত্থ হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। ‘‘অত্থি পন, রাজঞ্ঞ, পরিযাযো, যেন তে পরিযাযেন এৰং হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি? ‘‘অত্থি , ভো কস্সপ, পরিযাযো, যেন মে পরিযাযেন এৰং হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। ‘‘যথা কথং ৰিয, রাজঞ্ঞা’’তি? ‘‘ইধ মে, ভো কস্সপ, মিত্তামচ্চা ঞাতিসালোহিতা পাণাতিপাতী অদিন্নাদাযী কামেসুমিচ্ছাচারী মুসাৰাদী পিসুণৰাচা ফরুসৰাচা সম্ফপ্পলাপী অভিজ্ঝালূ ব্যাপন্নচিত্তা মিচ্ছাদিট্ঠী। তে অপরেন সমযেন আবাধিকা হোন্তি দুক্খিতা বাল়্হগিলানা। যদাহং জানামি – ‘ন দানিমে ইমম্হা আবাধা ৰুট্ঠহিস্সন্তী’তি ত্যাহং উপসঙ্কমিত্ৰা এৰং ৰদামি – ‘সন্তি খো, ভো, একে সমণব্রাহ্মণা এৰংৰাদিনো এৰংদিট্ঠিনো – যে তে পাণাতিপাতী অদিন্নাদাযী কামেসুমিচ্ছাচারী মুসাৰাদী পিসুণৰাচা ফরুসৰাচা সম্ফপ্পলাপী অভিজ্ঝালূ ব্যাপন্নচিত্তা মিচ্ছাদিট্ঠী, তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জন্তী’তি। ভৰন্তো খো পাণাতিপাতী অদিন্নাদাযী কামেসুমিচ্ছাচারী মুসাৰাদী পিসুণৰাচা ফরুসৰাচা সম্ফপ্পলাপী অভিজ্ঝালূ ব্যাপন্নচিত্তা মিচ্ছাদিট্ঠী। সচে তেসং ভৰতং সমণব্রাহ্মণানং সচ্চং ৰচনং, ভৰন্তো কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জিস্সন্তি। সচে, ভো, কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জেয্যাথ, যেন মে আগন্ত্ৰা আরোচেয্যাথ – ‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’তি । ভৰন্তো খো পন মে সদ্ধাযিকা পচ্চযিকা, যং ভৰন্তেহি দিট্ঠং, যথা সামং দিট্ঠং এৰমেতং ভৰিস্সতী’তি। তে মে ‘সাধূ’তি পটিস্সুত্ৰা নেৰ আগন্ত্ৰা আরোচেন্তি, ন পন দূতং পহিণন্তি। অযম্পি খো, ভো কস্সপ, পরিযাযো, যেন মে পরিযাযেন এৰং হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। চোরউপমা ৪১৩. ‘‘তেন হি, রাজঞ্ঞ, তঞ্ঞেৰেত্থ পটিপুচ্ছিস্সামি। যথা তে খমেয্য তথা নং ব্যাকরেয্যাসি। তং কিং মঞ্ঞসি, রাজঞ্ঞ, ইধ তে পুরিসা চোরং আগুচারিং গহেত্ৰা দস্সেয্যুং – ‘অযং তে, ভন্তে, চোরো আগুচারী; ইমস্স যং ইচ্ছসি, তং দণ্ডং পণেহী’তি। তে ত্ৰং এৰং ৰদেয্যাসি – ‘তেন হি, ভো, ইমং পুরিসং দল়্হায রজ্জুযা পচ্ছাবাহং গাল়্হবন্ধনং বন্ধিত্ৰা খুরমুণ্ডং করিত্ৰা [কারেত্ৰা (স্যা॰ ক॰)] খরস্সরেন পণৰেন রথিকায রথিকং [রথিযায রথিযং (বহূসূ)] সিঙ্ঘাটকেন সিঙ্ঘাটকং পরিনেত্ৰা দক্খিণেন দ্ৰারেন নিক্খমিত্ৰা দক্খিণতো নগরস্স আঘাতনে সীসং ছিন্দথা’তি। তে ‘সাধূ’তি পটিস্সুত্ৰা তং পুরিসং দল়্হায রজ্জুযা পচ্ছাবাহং গাল়্হবন্ধনং বন্ধিত্ৰা খুরমুণ্ডং করিত্ৰা খরস্সরেন পণৰেন রথিকায রথিকং সিঙ্ঘাটকেন সিঙ্ঘাটকং পরিনেত্ৰা দক্খিণেন দ্ৰারেন নিক্খমিত্ৰা দক্খিণতো নগরস্স আঘাতনে নিসীদাপেয্যুং। লভেয্য নু খো সো চোরো চোরঘাতেসু – ‘আগমেন্তু তাৰ ভৰন্তো চোরঘাতা, অমুকস্মিং মে গামে ৰা নিগমে ৰা মিত্তামচ্চা ঞাতিসালোহিতা, যাৰাহং তেসং উদ্দিসিত্ৰা আগচ্ছামী’তি , উদাহু ৰিপ্পলপন্তস্সেৰ চোরঘাতা সীসং ছিন্দেয্যু’’ন্তি? ‘‘ন হি সো, ভো কস্সপ, চোরো লভেয্য চোরঘাতেসু – ‘আগমেন্তু তাৰ ভৰন্তো চোরঘাতা অমুকস্মিং মে গামে ৰা নিগমে ৰা মিত্তামচ্চা ঞাতিসালোহিতা, যাৰাহং তেসং উদ্দিসিত্ৰা আগচ্ছামী’তি। অথ খো নং ৰিপ্পলপন্তস্সেৰ চোরঘাতা সীসং ছিন্দেয্যু’’ন্তি। ‘‘সো হি নাম, রাজঞ্ঞ, চোরো মনুস্সো মনুস্সভূতেসু চোরঘাতেসু ন লভিস্সতি – ‘আগমেন্তু তাৰ ভৰন্তো চোরঘাতা, অমুকস্মিং মে গামে ৰা নিগমে ৰা মিত্তামচ্চা ঞাতিসালোহিতা, যাৰাহং তেসং উদ্দিসিত্ৰা আগচ্ছামী’তি। কিং পন তে মিত্তামচ্চা ঞাতিসালোহিতা পাণাতিপাতী অদিন্নাদাযী কামেসুমিচ্ছাচারী মুসাৰাদী পিসুণৰাচা ফরুসৰাচা সম্ফপ্পলাপী অভিজ্ঝালূ ব্যাপন্নচিত্তা মিচ্ছাদিট্ঠী, তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না লভিস্সন্তি নিরযপালেসু – ‘আগমেন্তু তাৰ ভৰন্তো নিরযপালা, যাৰ মযং পাযাসিস্স রাজঞ্ঞস্স গন্ত্ৰা আরোচেম – ‘‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’’’তি? ইমিনাপি খো তে, রাজঞ্ঞ, পরিযাযেন এৰং হোতু – ‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’’’তি। ৪১৪. ‘‘কিঞ্চাপি ভৰং কস্সপো এৰমাহ, অথ খো এৰং মে এত্থ হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’তি। ‘‘অত্থি পন, রাজঞ্ঞ, পরিযাযো যেন তে পরিযাযেন এৰং হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি? ‘‘অত্থি, ভো কস্সপ, পরিযাযো, যেন মে পরিযাযেন এৰং হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। ‘‘যথা কথং ৰিয, রাজঞ্ঞা’’তি? ‘‘ইধ মে, ভো কস্সপ, মিত্তামচ্চা ঞাতিসালোহিতা পাণাতিপাতা পটিৰিরতা অদিন্নাদানা পটিৰিরতা কামেসুমিচ্ছাচারা পটিৰিরতা মুসাৰাদা পটিৰিরতা পিসুণায ৰাচায পটিৰিরতা ফরুসায ৰাচায পটিৰিরতা সম্ফপ্পলাপা পটিৰিরতা অনভিজ্ঝালূ অব্যাপন্নচিত্তা সম্মাদিট্ঠী। তে অপরেন সমযেন আবাধিকা হোন্তি দুক্খিতা বাল়্হগিলানা। যদাহং জানামি – ‘ন দানিমে ইমম্হা আবাধা ৰুট্ঠহিস্সন্তী’তি ত্যাহং উপসঙ্কমিত্ৰা এৰং ৰদামি – ‘সন্তি খো, ভো, একে সমণব্রাহ্মণা এৰংৰাদিনো এৰংদিট্ঠিনো – যে তে পাণাতিপাতা পটিৰিরতা অদিন্নাদানা পটিৰিরতা কামেসুমিচ্ছাচারা পটিৰিরতা মুসাৰাদা পটিৰিরতা পিসুণায ৰাচায পটিৰিরতা ফরুসায ৰাচায পটিৰিরতা সম্ফপ্পলাপা পটিৰিরতা অনভিজ্ঝালূ অব্যাপন্নচিত্তা সম্মাদিট্ঠী তে কাযস্স ভেদা পরং মরণা সুগতিং সগ্গং লোকং উপপজ্জন্তীতি । ভৰন্তো খো পাণাতিপাতা পটিৰিরতা অদিন্নাদানা পটিৰিরতা কামেসুমিচ্ছাচারা পটিৰিরতা মুসাৰাদা পটিৰিরতা পিসুণায ৰাচায পটিৰিরতা ফরুসায ৰাচায পটিৰিরতা সম্ফপ্পলাপা পটিৰিরতা অনভিজ্ঝালূ অব্যাপন্নচিত্তা সম্মাদিট্ঠী। সচে তেসং ভৰতং সমণব্রাহ্মণানং সচ্চং ৰচনং, ভৰন্তো কাযস্স ভেদা পরং মরণা সুগতিং সগ্গং লোকং উপপজ্জিস্সন্তি। সচে, ভো, কাযস্স ভেদা পরং মরণা সুগতিং সগ্গং লোকং উপপজ্জেয্যাথ, যেন মে আগন্ত্ৰা আরোচেয্যাথ – ‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’তি। ভৰন্তো খো পন মে সদ্ধাযিকা পচ্চযিকা, যং ভৰন্তেহি দিট্ঠং, যথা সামং দিট্ঠং এৰমেতং ভৰিস্সতী’তি। তে মে ‘সাধূ’তি পটিস্সুত্ৰা নেৰ আগন্ত্ৰা আরোচেন্তি, ন পন দূতং পহিণন্তি। অযম্পি খো, ভো কস্সপ, পরিযাযো, যেন মে পরিযাযেন এৰং হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। গূথকূপপুরিসউপমা ৪১৫. ‘‘তেন হি, রাজঞ্ঞ, উপমং তে করিস্সামি। উপমায মিধেকচ্চে [উপমাযপিধেকচ্চে (সী॰ স্যা॰), উপমাযপিইধেকচ্চে (পী॰)] ৰিঞ্ঞূ পুরিসা ভাসিতস্স অত্থং আজানন্তি। সেয্যথাপি, রাজঞ্ঞ, পুরিসো গূথকূপে সসীসকং [সসীসকো (স্যা॰)] নিমুগ্গো অস্স। অথ ত্ৰং পুরিসে আণাপেয্যাসি – ‘তেন হি, ভো, তং পুরিসং তম্হা গূথকূপা উদ্ধরথা’তি। তে ‘সাধূ’তি পটিস্সুত্ৰা তং পুরিসং তম্হা গূথকূপা উদ্ধরেয্যুং। তে ত্ৰং এৰং ৰদেয্যাসি – ‘তেন হি, ভো, তস্স পুরিসস্স কাযা ৰেল়ুপেসিকাহি গূথং সুনিম্মজ্জিতং নিম্মজ্জথা’তি। তে ‘সাধূ’তি পটিস্সুত্ৰা তস্স পুরিসস্স কাযা ৰেল়ুপেসিকাহি গূথং সুনিম্মজ্জিতং নিম্মজ্জেয্যুং। তে ত্ৰং এৰং ৰদেয্যাসি – ‘তেন হি, ভো, তস্স পুরিসস্স কাযং পণ্ডুমত্তিকায তিক্খত্তুং সুব্বট্টিতং উব্বট্টেথা’তি [সুপ্পট্টিতং উপ্পট্টেথাতি (ক॰)]। তে তস্স পুরিসস্স কাযং পণ্ডুমত্তিকায তিক্খত্তুং সুব্বট্টিতং উব্বট্টেয্যুং। তে ত্ৰং এৰং ৰদেয্যাসি – ‘তেন হি, ভো, তং পুরিসং তেলেন অব্ভঞ্জিত্ৰা সুখুমেন চুণ্ণেন তিক্খত্তুং সুপ্পধোতং করোথা’তি। তে তং পুরিসং তেলেন অব্ভঞ্জিত্ৰা সুখুমেন চুণ্ণেন তিক্খত্তুং সুপ্পধোতং করেয্যুং। তে ত্ৰং এৰং ৰদেয্যাসি – ‘তেন হি, ভো, তস্স পুরিসস্স কেসমস্সুং কপ্পেথা’তি। তে তস্স পুরিসস্স কেসমস্সুং কপ্পেয্যুং। তে ত্ৰং এৰং ৰদেয্যাসি – ‘তেন হি, ভো, তস্স পুরিসস্স মহগ্ঘঞ্চ মালং মহগ্ঘঞ্চ ৰিলেপনং মহগ্ঘানি চ ৰত্থানি উপহরথা’তি। তে তস্স পুরিসস্স মহগ্ঘঞ্চ মালং মহগ্ঘঞ্চ ৰিলেপনং মহগ্ঘানি চ ৰত্থানি উপহরেয্যুং। তে ত্ৰং এৰং ৰদেয্যাসি – ‘তেন হি, ভো, তং পুরিসং পাসাদং আরোপেত্ৰা পঞ্চকামগুণানি উপট্ঠাপেথা’তি। তে তং পুরিসং পাসাদং আরোপেত্ৰা পঞ্চকামগুণানি উপট্ঠাপেয্যুং। ‘‘তং কিং মঞ্ঞসি, রাজঞ্ঞ, অপি নু তস্স পুরিসস্স সুন্হাতস্স সুৰিলিত্তস্স সুকপ্পিতকেসমস্সুস্স আমুক্কমালাভরণস্স ওদাতৰত্থৰসনস্স উপরিপাসাদৰরগতস্স পঞ্চহিকামগুণেহি সমপ্পিতস্স সমঙ্গীভূতস্স পরিচারযমানস্স পুনদেৰ তস্মিং গূথকূপে নিমুজ্জিতুকামতা [নিমুজ্জিতুকাম্যতা (স্যা॰ ক॰)] অস্সা’’তি? ‘‘নো হিদং, ভো কস্সপ’’। ‘‘তং কিস্স হেতু’’? ‘‘অসুচি, ভো কস্সপ, গূথকূপো অসুচি চেৰ অসুচিসঙ্খাতো চ দুগ্গন্ধো চ দুগ্গন্ধসঙ্খাতো চ জেগুচ্ছো চ জেগুচ্ছসঙ্খাতো চ পটিকূলো চ পটিকূলসঙ্খাতো চা’’তি। ‘‘এৰমেৰ খো, রাজঞ্ঞ, মনুস্সা দেৰানং অসুচী চেৰ অসুচিসঙ্খাতা চ, দুগ্গন্ধা চ দুগ্গন্ধসঙ্খাতা চ, জেগুচ্ছা চ জেগুচ্ছসঙ্খাতা চ, পটিকূলা চ পটিকূলসঙ্খাতা চ। যোজনসতং খো, রাজঞ্ঞ, মনুস্সগন্ধো দেৰে উব্বাধতি। কিং পন তে মিত্তামচ্চা ঞাতিসালোহিতা পাণাতিপাতা পটিৰিরতা অদিন্নাদানা পটিৰিরতা কামেসুমিচ্ছাচারা পটিৰিরতা মুসাৰাদা পটিৰিরতা পিসুণায ৰাচায পটিৰিরতা ফরুসায ৰাচায পটিৰিরতা সম্ফপ্পলাপা পটিৰিরতা অনভিজ্ঝালূ অব্যাপন্নচিত্তা সম্মাদিট্ঠী, কাযস্স ভেদা পরং মরণা সুগতিং সগ্গং লোকং উপপন্না তে আগন্ত্ৰা আরোচেস্সন্তি – ‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’তি? ইমিনাপি খো তে, রাজঞ্ঞ, পরিযাযেন এৰং হোতু – ‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’’’তি। ৪১৬. ‘‘কিঞ্চাপি ভৰং কস্সপো এৰমাহ, অথ খো এৰং মে এত্থ হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। ‘‘অত্থি পন, রাজঞ্ঞ, পরিযাযো …পে॰… ‘‘অত্থি, ভো কস্সপ, পরিযাযো…পে॰… ``যথা কথং ৰিয, রাজঞ্ঞাতি? ‘‘ইধ মে, ভো কস্সপ, মিত্তামচ্চা ঞাতিসালোহিতা পাণাতিপাতা পটিৰিরতা অদিন্নাদানা পটিৰিরতা কামেসুমিচ্ছাচারা পটিৰিরতা মুসাৰাদা পটিৰিরতা সুরামেরযমজ্জপমাদট্ঠানা পটিৰিরতা, তে অপরেন সমযেন আবাধিকা হোন্তি দুক্খিতা বাল়্হগিলানা। যদাহং জানামি – ‘ন দানিমে ইমম্হা আবাধা ৰুট্ঠহিস্সন্তী’তি ত্যাহং উপসঙ্কমিত্ৰা এৰং ৰদামি – ‘সন্তি খো, ভো, একে সমণব্রাহ্মণা এৰংৰাদিনো এৰংদিট্ঠিনো – যে তে পাণাতিপাতা পটিৰিরতা অদিন্নাদানা পটিৰিরতা কামেসুমিচ্ছাচারা পটিৰিরতা মুসাৰাদা পটিৰিরতা সুরামেরযমজ্জপমাদট্ঠানা পটিৰিরতা, তে কাযস্স ভেদা পরং মরণা সুগতিং সগ্গং লোকং উপপজ্জন্তি দেৰানং তাৰতিংসানং সহব্যতন্তি। ভৰন্তো খো পাণাতিপাতা পটিৰিরতা অদিন্নাদানা পটিৰিরতা কামেসুমিচ্ছাচারা পটিৰিরতা মুসাৰাদা পটিৰিরতা সুরামেরযমজ্জপমাদট্ঠানা পটিৰিরতা। সচে তেসং ভৰতং সমণব্রাহ্মণানং সচ্চং ৰচনং, ভৰন্তো কাযস্স ভেদা পরং মরণা সুগতিং সগ্গং লোকং উপপজ্জিস্সন্তি, দেৰানং তাৰতিংসানং সহব্যতং। সচে, ভো, কাযস্স ভেদা পরং মরণা সুগতিং সগ্গং লোকং উপপজ্জেয্যাথ দেৰানং তাৰতিংসানং সহব্যতং, যেন মে আগন্ত্ৰা আরোচেয্যাথ – `ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকোতি। ভৰন্তো খো পন মে সদ্ধাযিকা পচ্চযিকা, যং ভৰন্তেহি দিট্ঠং, যথা সামং দিট্ঠং এৰমেতং ভৰিস্সতীতি। তে মে ‘সাধূ’তি পটিস্সুত্ৰা নেৰ আগন্ত্ৰা আরোচেন্তি, ন পন দূতং পহিণন্তি। অযম্পি খো, ভো কস্সপ, পরিযাযো, যেন মে পরিযাযেন এৰং হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। তাৰতিংসদেৰউপমা ৪১৭. ‘‘তেন হি, রাজঞ্ঞ, তঞ্ঞেৰেত্থ পটিপুচ্ছিস্সামি; যথা তে খমেয্য, তথা নং ব্যাকরেয্যাসি। যং খো পন, রাজঞ্ঞ, মানুস্সকং ৰস্সসতং, দেৰানং তাৰতিংসানং এসো একো রত্তিন্দিৰো [রত্তিদিৰো (ক॰)], তায রত্তিযা তিংসরত্তিযো মাসো, তেন মাসেন দ্ৰাদসমাসিযো সংৰচ্ছরো, তেন সংৰচ্ছরেন দিব্বং ৰস্সসহস্সং দেৰানং তাৰতিংসানং আযুপ্পমাণং। যে তে মিত্তামচ্চা ঞাতিসালোহিতা পাণাতিপাতা পটিৰিরতা অদিন্নাদানা পটিৰিরতা কামেসুমিচ্ছাচারা পটিৰিরতা মুসাৰাদা পটিৰিরতা সুরামেরযমজ্জপমাদট্ঠানা পটিৰিরতা, তে কাযস্স ভেদা পরং মরণা সুগতিং সগ্গং লোকং উপপন্না দেৰানং তাৰতিংসানং সহব্যতং। সচে পন তেসং এৰং ভৰিস্সতি – ‘যাৰ মযং দ্ৰে ৰা তীণি ৰা রত্তিন্দিৰা দিব্বেহি পঞ্চহি কামগুণেহি সমপ্পিতা সমঙ্গীভূতা পরিচারেম, অথ মযং পাযাসিস্স রাজঞ্ঞস্স গন্ত্ৰা আরোচেয্যাম – ‘‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’’তি। অপি নু তে আগন্ত্ৰা আরোচেয্যুং – ‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’’’তি? ‘‘নো হিদং, ভো কস্সপ। অপি হি মযং, ভো কস্সপ, চিরং কালঙ্কতাপি ভৰেয্যাম। কো পনেতং ভোতো কস্সপস্স আরোচেতি – ‘অত্থি দেৰা তাৰতিংসা’তি ৰা ‘এৰংদীঘাযুকা দেৰা তাৰতিংসা’তি ৰা। ন মযং ভোতো কস্সপস্স সদ্দহাম – ‘অত্থি দেৰা তাৰতিংসা’তি ৰা ‘এৰংদীঘাযুকা দেৰা তাৰতিংসা’তি ৰা’’তি। জচ্চন্ধউপমা ৪১৮. ‘‘সেয্যথাপি, রাজঞ্ঞ, জচ্চন্ধো পুরিসো ন পস্সেয্য কণ্হ – সুক্কানি রূপানি , ন পস্সেয্য নীলকানি রূপানি, ন পস্সেয্য পীতকানি [মঞ্জেট্ঠকানি (স্যা॰)] রূপানি, ন পস্সেয্য লোহিতকানি রূপানি, ন পস্সেয্য মঞ্জিট্ঠকানি রূপানি, ন পস্সেয্য সমৰিসমং, ন পস্সেয্য তারকানি রূপানি, ন পস্সেয্য চন্দিমসূরিযে। সো এৰং ৰদেয্য – ‘নত্থি কণ্হসুক্কানি রূপানি, নত্থি কণ্হসুক্কানং রূপানং দস্সাৰী। নত্থি নীলকানি রূপানি, নত্থি নীলকানং রূপানং দস্সাৰী। নত্থি পীতকানি রূপানি, নত্থি পীতকানং রূপানং দস্সাৰী। নত্থি লোহিতকানি রূপানি, নত্থি লোহিতকানং রূপানং দস্সাৰী। নত্থি মঞ্জিট্ঠকানি রূপানি, নত্থি মঞ্জিট্ঠকানং রূপানং দস্সাৰী। নত্থি সমৰিসমং, নত্থি সমৰিসমস্স দস্সাৰী। নত্থি তারকানি রূপানি, নত্থি তারকানং রূপানং দস্সাৰী। নত্থি চন্দিমসূরিযা, নত্থি চন্দিমসূরিযানং দস্সাৰী। অহমেতং ন জানামি, অহমেতং ন পস্সামি, তস্মা তং নত্থী’তি। সম্মা নু খো সো, রাজঞ্ঞ, ৰদমানো ৰদেয্যা’’তি? ‘‘নো হিদং, ভো কস্সপ। অত্থি কণ্হসুক্কানি রূপানি, অত্থি কণ্হসুক্কানং রূপানং দস্সাৰী। অত্থি নীলকানি রূপানি, অত্থি নীলকানং রূপানং দস্সাৰী…পে॰… অত্থি সমৰিসমং, অত্থি সমৰিসমস্স দস্সাৰী। অত্থি তারকানি রূপানি, অত্থি তারকানং রূপানং দস্সাৰী। অত্থি চন্দিমসূরিযা, অত্থি চন্দিমসূরিযানং দস্সাৰী। ‘অহমেতং ন জানামি, অহমেতং ন পস্সামি, তস্মা তং নত্থী’তি। ন হি সো, ভো কস্সপ, সম্মা ৰদমানো ৰদেয্যা’’তি। ‘‘এৰমেৰ খো ত্ৰং, রাজঞ্ঞ, জচ্চন্ধূপমো মঞ্ঞে পটিভাসি যং মং ত্ৰং এৰং ৰদেসি’’। ‘‘কো পনেতং ভোতো কস্সপস্স আরোচেতি – ‘অত্থি দেৰা তাৰতিংসা’’তি ৰা, ‘এৰংদীঘাযুকা দেৰা তাৰতিংসা’তি ৰা? ন মযং ভোতো কস্সপস্স সদ্দহাম – ‘অত্থি দেৰা তাৰতিংসা’তি ৰা ‘এৰংদীঘাযুকা দেৰা তাৰতিংসা’তি ৰা’’তি। ‘‘ন খো, রাজঞ্ঞ, এৰং পরো লোকো দট্ঠব্বো, যথা ত্ৰং মঞ্ঞসি ইমিনা মংসচক্খুনা। যে খো তে রাজঞ্ঞ সমণব্রাহ্মণা অরঞ্ঞৰনপত্থানি পন্তানি সেনাসনানি পটিসেৰন্তি , তে তত্থ অপ্পমত্তা আতাপিনো পহিতত্তা ৰিহরন্তা দিব্বচক্খুং ৰিসোধেন্তি। তে দিব্বেন চক্খুনা ৰিসুদ্ধেন অতিক্কন্তমানুসকেন ইমং চেৰ লোকং পস্সন্তি পরঞ্চ সত্তে চ ওপপাতিকে। এৰঞ্চ খো, রাজঞ্ঞ, পরো লোকো দট্ঠব্বো; নত্ৰেৰ যথা ত্ৰং মঞ্ঞসি ইমিনা মংসচক্খুনা। ইমিনাপি খো তে, রাজঞ্ঞ, পরিযাযেন এৰং হোতু – ‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’’’তি। ৪১৯. ‘‘কিঞ্চাপি ভৰং কস্সপো এৰমাহ, অথ খো এৰং মে এত্থ হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’তি। ‘‘অত্থি পন, রাজঞ্ঞ, পরিযাযো…পে॰… অত্থি, ভো কস্সপ, পরিযাযো…পে॰… যথা কথং ৰিয, রাজঞ্ঞা’’তি? ‘‘ইধাহং, ভো কস্সপ, পস্সামি সমণব্রাহ্মণে সীলৰন্তে কল্যাণধম্মে জীৰিতুকামে অমরিতুকামে সুখকামে দুক্খপটিকূলে। তস্স ময্হং, ভো কস্সপ, এৰং হোতি – সচে খো ইমে ভোন্তো সমণব্রাহ্মণা সীলৰন্তো কল্যাণধম্মা এৰং জানেয্যুং – ‘ইতো নো মতানং সেয্যো ভৰিস্সতী’তি। ইদানিমে ভোন্তো সমণব্রাহ্মণা সীলৰন্তো কল্যাণধম্মা ৰিসং ৰা খাদেয্যুং, সত্থং ৰা আহরেয্যুং, উব্বন্ধিত্ৰা ৰা কালঙ্করেয্যুং, পপাতে ৰা পপতেয্যুং। যস্মা চ খো ইমে ভোন্তো সমণব্রাহ্মণা সীলৰন্তো কল্যাণধম্মা ন এৰং জানন্তি – ‘ইতো নো মতানং সেয্যো ভৰিস্সতী’তি, তস্মা ইমে ভোন্তো সমণব্রাহ্মণা সীলৰন্তো কল্যাণধম্মা জীৰিতুকামা অমরিতুকামা সুখকামা দুক্খপটিকূলা অত্তানং ন মারেন্তি [( ) নত্থি (স্যা॰ পী॰)]। অযম্পি খো, ভো কস্সপ, পরিযাযো, যেন মে পরিযাযেন এৰং হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। গব্ভিনীউপমা ৪২০. ‘‘তেন হি, রাজঞ্ঞ, উপমং তে করিস্সামি। উপমায মিধেকচ্চে ৰিঞ্ঞূ পুরিসা ভাসিতস্স অত্থং আজানন্তি। ভূতপুব্বং, রাজঞ্ঞ, অঞ্ঞতরস্স ব্রাহ্মণস্স দ্ৰে পজাপতিযো অহেসুং। একিস্সা পুত্তো অহোসি দসৰস্সুদ্দেসিকো ৰা দ্ৰাদসৰস্সুদ্দেসিকো ৰা, একা গব্ভিনী উপৰিজঞ্ঞা। অথ খো সো ব্রাহ্মণো কালমকাসি। অথ খো সো মাণৰকো মাতুসপত্তিং [মাতুসপতিং (স্যা॰)] এতদৰোচ – ‘যমিদং, ভোতি, ধনং ৰা ধঞ্ঞং ৰা রজতং ৰা জাতরূপং ৰা, সব্বং তং ময্হং ; নত্থি তুয্হেত্থ কিঞ্চি। পিতু মে[পিতু মে সন্তকো (স্যা॰)] ভোতি, দাযজ্জং নিয্যাদেহী’তি [নীয্যাতেহীতি (সী॰ পী॰)]। এৰং ৰুত্তে সা ব্রাহ্মণী তং মাণৰকং এতদৰোচ – ‘আগমেহি তাৰ, তাত, যাৰ ৰিজাযামি। সচে কুমারকো ভৰিস্সতি, তস্সপি একদেসো ভৰিস্সতি; সচে কুমারিকা ভৰিস্সতি, সাপি তে ওপভোগ্গা [উপভোগ্গা (স্যা॰)] ভৰিস্সতী’তি। দুতিযম্পি খো সো মাণৰকো মাতুসপত্তিং এতদৰোচ – ‘যমিদং, ভোতি, ধনং ৰা ধঞ্ঞং ৰা রজতং ৰা জাতরূপং ৰা, সব্বং তং ময্হং; নত্থি তুয্হেত্থ কিঞ্চি। পিতু মে, ভোতি, দাযজ্জং নিয্যাদেহী’তি। দুতিযম্পি খো সা ব্রাহ্মণী তং মাণৰকং এতদৰোচ – ‘আগমেহি তাৰ, তাত, যাৰ ৰিজাযামি। সচে কুমারকো ভৰিস্সতি, তস্সপি একদেসো ভৰিস্সতি; সচে কুমারিকা ভৰিস্সতি সাপি তে ওপভোগ্গা [উপভোগ্গা (স্যা॰)] ভৰিস্সতী’তি। ততিযম্পি খো সো মাণৰকো মাতুসপত্তিং এতদৰোচ – ‘যমিদং, ভোতি, ধনং ৰা ধঞ্ঞং ৰা রজতং ৰা জাতরূপং ৰা , সব্বং তং ময্হং; নত্থি তুয্হেত্থ কিঞ্চি। পিতু মে, ভোতি, দাযজ্জং নিয্যাদেহী’তি। ‘‘অথ খো সা ব্রাহ্মণী সত্থং গহেত্ৰা ওৰরকং পৰিসিত্ৰা উদরং ওপাদেসি [উপ্পাতেসি (স্যা॰)] – ‘যাৰ ৰিজাযামি যদি ৰা কুমারকো যদি ৰা কুমারিকা’তি। সা অত্তানং চেৰ জীৰিতঞ্চ গব্ভঞ্চ সাপতেয্যঞ্চ ৰিনাসেসি। যথা তং বালা অব্যত্তা অনযব্যসনং আপন্না অযোনিসো দাযজ্জং গৰেসন্তী, এৰমেৰ খো ত্ৰং, রাজঞ্ঞ, বালো অব্যত্তো অনযব্যসনং আপজ্জিস্সসি অযোনিসো পরলোকং গৰেসন্তো ; সেয্যথাপি সা ব্রাহ্মণী বালা অব্যত্তা অনযব্যসনং আপন্না অযোনিসো দাযজ্জং গৰেসন্তী। ন খো, রাজঞ্ঞ, সমণব্রাহ্মণা সীলৰন্তো কল্যাণধম্মা অপক্কং পরিপাচেন্তি; অপি চ পরিপাকং আগমেন্তি। পণ্ডিতানং অত্থো হি, রাজঞ্ঞ, সমণব্রাহ্মণানং সীলৰন্তানং কল্যাণধম্মানং জীৰিতেন। যথা যথা খো, রাজঞ্ঞ, সমণব্রাহ্মণা সীলৰন্তো কল্যাণধম্মা চিরং দীঘমদ্ধানং তিট্ঠন্তি, তথা তথা বহুং পুঞ্ঞং পসৰন্তি, বহুজনহিতায চ পটিপজ্জন্তি বহুজনসুখায লোকানুকম্পায অত্থায হিতায সুখায দেৰমনুস্সানং। ইমিনাপি খো তে, রাজঞ্ঞ, পরিযাযেন এৰং হোতু – ‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’’’তি। ৪২১. ‘‘কিঞ্চাপি ভৰং কস্সপো এৰমাহ, অথ খো এৰং মে এত্থ হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। ‘‘অত্থি পন, রাজঞ্ঞ, পরিযাযো…পে॰… অত্থি, ভো কস্সপ, পরিযাযো…পে॰… যথা কথং ৰিয, রাজঞ্ঞা’’তি? ‘‘ইধ মে, ভো কস্সপ, পুরিসা চোরং আগুচারিং গহেত্ৰা দস্সেন্তি – ‘অযং তে, ভন্তে, চোরো আগুচারী; ইমস্স যং ইচ্ছসি, তং দণ্ডং পণেহী’তি। ত্যাহং এৰং ৰদামি – ‘তেন হি, ভো, ইমং পুরিসং জীৰন্তংযেৰ কুম্ভিযা পক্খিপিত্ৰা মুখং পিদহিত্ৰা অল্লেন চম্মেন ওনন্ধিত্ৰা অল্লায মত্তিকায বহলাৰলেপনং [বহলৰিলেপনং (স্যা॰ ক॰)] করিত্ৰা উদ্ধনং আরোপেত্ৰা অগ্গিং দেথা’তি। তে মে ‘সাধূ’তি পটিস্সুত্ৰা তং পুরিসং জীৰন্তংযেৰ কুম্ভিযা পক্খিপিত্ৰা মুখং পিদহিত্ৰা অল্লেন চম্মেন ওনন্ধিত্ৰা অল্লায মত্তিকায বহলাৰলেপনং করিত্ৰা উদ্ধনং আরোপেত্ৰা অগ্গিং দেন্তি। যদা মযং জানাম ‘কালঙ্কতো সো পুরিসো’তি, অথ নং কুম্ভিং ওরোপেত্ৰা উব্ভিন্দিত্ৰা মুখং ৰিৰরিত্ৰা সণিকং নিল্লোকেম [ৰিলোকেম (স্যা॰)] – ‘অপ্পেৰ নামস্স জীৰং নিক্খমন্তং পস্সেয্যামা’তি। নেৰস্স মযং জীৰং নিক্খমন্তং পস্সাম। অযম্পি খো, ভো কস্সপ, পরিযাযো, যেন মে পরিযাযেন এৰং হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। সুপিনকউপমা ৪২২. ‘‘তেন হি, রাজঞ্ঞ, তঞ্ঞেৰেত্থ পটিপুচ্ছিস্সামি, যথা তে খমেয্য, তথা নং ব্যাকরেয্যাসি। অভিজানাসি নো ত্ৰং, রাজঞ্ঞ, দিৰা সেয্যং উপগতো সুপিনকং পস্সিতা আরামরামণেয্যকং ৰনরামণেয্যকং ভূমিরামণেয্যকং পোক্খরণীরামণেয্যক’’ন্তি? ‘‘অভিজানামহং, ভো কস্সপ, দিৰাসেয্যং উপগতো সুপিনকং পস্সিতা আরামরামণেয্যকং ৰনরামণেয্যকং ভূমিরামণেয্যকং পোক্খরণীরামণেয্যক’’ন্তি। ‘‘রক্খন্তি তং তম্হি সমযে খুজ্জাপি ৰামনকাপি ৰেলাসিকাপি [চেলাৰিকাপি (স্যা॰), কেল়াযিকাপি (সী॰)]কোমারিকাপী’’তি? ‘‘এৰং, ভো কস্সপ, রক্খন্তি মং তম্হি সমযে খুজ্জাপি ৰামনকাপি ৰেলাসিকাপি [চেলাৰিকাপি (স্যা॰), কেল়াযিকাপি (সী॰)] কোমারিকাপী’’তি। ‘‘অপি নু তা তুয্হং জীৰং পস্সন্তি পৰিসন্তং ৰা নিক্খমন্তং ৰা’’তি? ‘‘নো হিদং, ভো কস্সপ’’। ‘‘তা হি নাম, রাজঞ্ঞ, তুয্হং জীৰন্তস্স জীৰন্তিযো জীৰং ন পস্সিস্সন্তি পৰিসন্তং ৰা নিক্খমন্তং ৰা। কিং পন ত্ৰং কালঙ্কতস্স জীৰং পস্সিস্সসি পৰিসন্তং ৰা নিক্খমন্তং ৰা। ইমিনাপি খো তে, রাজঞ্ঞ, পরিযাযেন এৰং হোতু – ‘‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’’’তি। ৪২৩. ‘‘কিঞ্চাপি ভৰং কস্সপো এৰমাহ, অথ খো এৰং মে এত্থ হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। ‘‘অত্থি পন, রাজঞ্ঞ, পরিযাযো…পে॰… ‘‘অত্থি, ভো কস্সপ, পরিযাযো…পে॰… যথা কথং ৰিয রাজঞ্ঞা’’তি? ‘‘ইধ মে, ভো কস্সপ, পুরিসা চোরং আগুচারিং গহেত্ৰা দস্সেন্তি – ‘অযং তে, ভন্তে, চোরো আগুচারী; ইমস্স যং ইচ্ছসি, তং দণ্ডং পণেহী’তি। ত্যাহং এৰং ৰদামি – ‘তেন হি, ভো, ইমং পুরিসং জীৰন্তংযেৰ তুলায তুলেত্ৰা জিযায অনস্সাসকং মারেত্ৰা পুনদেৰ তুলায তুলেথা’তি। তে মে ‘সাধূ’তি পটিস্সুত্ৰা তং পুরিসং জীৰন্তংযেৰ তুলায তুলেত্ৰা জিযায অনস্সাসকং মারেত্ৰা পুনদেৰ তুলায তুলেন্তি। যদা সো জীৰতি, তদা লহুতরো চ হোতি মুদুতরো চ কম্মঞ্ঞতরো চ। যদা পন সো কালঙ্কতো হোতি তদা গরুতরো চ হোতি পত্থিন্নতরো চ অকম্মঞ্ঞতরো চ। অযম্পি খো, ভো কস্সপ, পরিযাযো, যেন মে পরিযাযেন এৰং হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। সন্তত্তঅযোগুল়উপমা ৪২৪. ‘‘তেন হি, রাজঞ্ঞ, উপমং তে করিস্সামি। উপমায মিধেকচ্চে ৰিঞ্ঞূ পুরিসা ভাসিতস্স অত্থং আজানন্তি। সেয্যথাপি, রাজঞ্ঞ, পুরিসো দিৰসং সন্তত্তং অযোগুল়ং আদিত্তং সম্পজ্জলিতং সজোতিভূতং তুলায তুলেয্য। তমেনং অপরেন সমযেন সীতং নিব্বুতং তুলায তুলেয্য। কদা নু খো সো অযোগুল়ো লহুতরো ৰা হোতি মুদুতরো ৰা কম্মঞ্ঞতরো ৰা, যদা ৰা আদিত্তো সম্পজ্জলিতো সজোতিভূতো, যদা ৰা সীতো নিব্বুতো’’তি? ‘‘যদা সো, ভো কস্সপ, অযোগুল়ো তেজোসহগতো চ হোতি ৰাযোসহগতো চ আদিত্তো সম্পজ্জলিতো সজোতিভূতো, তদা লহুতরো চ হোতি মুদুতরো চ কম্মঞ্ঞতরো চ। যদা পন সো অযোগুল়ো নেৰ তেজোসহগতো হোতি ন ৰাযোসহগতো সীতো নিব্বুতো, তদা গরুতরো চ হোতি পত্থিন্নতরো চ অকম্মঞ্ঞতরো চা’’তি। ‘‘এৰমেৰ খো, রাজঞ্ঞ, যদাযং কাযো আযুসহগতো চ হোতি উস্মাসহগতো চ ৰিঞ্ঞাণসহগতো চ, তদা লহুতরো চ হোতি মুদুতরো চ কম্মঞ্ঞতরো চ। যদা পনাযং কাযো নেৰ আযুসহগতো হোতি ন উস্মাসহগতো ন ৰিঞ্ঞাণসহগতো তদা গরুতরো চ হোতি পত্থিন্নতরো চ অকম্মঞ্ঞতরো চ। ইমিনাপি খো তে, রাজঞ্ঞ, পরিযাযেন এৰং হোতু – ‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’’’তি। ৪২৫. ‘‘কিঞ্চাপি ভৰং কস্সপো এৰমাহ, অথ খো এৰং মে এত্থ হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। ‘‘অত্থি পন, রাজঞ্ঞ, পরিযাযো…পে॰… অত্থি, ভো কস্সপ, পরিযাযো…পে॰… যথা কথং ৰিয রাজঞ্ঞা’’তি? ‘‘ইধ মে, ভো কস্সপ, পুরিসা চোরং আগুচারিং গহেত্ৰা দস্সেন্তি – ‘অযং তে, ভন্তে, চোরো আগুচারী; ইমস্স যং ইচ্ছসি , তং দণ্ডং পণেহী’তি। ত্যাহং এৰং ৰদামি – ‘তেন হি, ভো, ইমং পুরিসং অনুপহচ্চ ছৰিঞ্চ চম্মঞ্চ মংসঞ্চ ন্হারুঞ্চ অট্ঠিঞ্চ অট্ঠিমিঞ্জঞ্চ জীৰিতা ৰোরোপেথ, অপ্পেৰ নামস্স জীৰং নিক্খমন্তং পস্সেয্যামা’তি। তে মে ‘সাধূ’তি পটিস্সুত্ৰা তং পুরিসং অনুপহচ্চ ছৰিঞ্চ…পে॰… জীৰিতা ৰোরোপেন্তি। যদা সো আমতো হোতি, ত্যাহং এৰং ৰদামি – ‘তেন হি, ভো, ইমং পুরিসং উত্তানং নিপাতেথ, অপ্পেৰ নামস্স জীৰং নিক্খমন্তং পস্সেয্যামা’তি। তে তং পুরিসং উত্তানং নিপাতেন্তি। নেৰস্স মযং জীৰং নিক্খমন্তং পস্সাম। ত্যাহং এৰং ৰদামি – ‘তেন হি, ভো, ইমং পুরিসং অৰকুজ্জং নিপাতেথ… পস্সেন নিপাতেথ… দুতিযেন পস্সেন নিপাতেথ… উদ্ধং ঠপেথ… ওমুদ্ধকং ঠপেথ… পাণিনা আকোটেথ… লেড্ডুনা আকোটেথ… দণ্ডেন আকোটেথ… সত্থেন আকোটেথ… ওধুনাথ সন্ধুনাথ নিদ্ধুনাথ, অপ্পেৰ নামস্স জীৰং নিক্খমন্তং পস্সেয্যামা’তি। তে তং পুরিসং ওধুনন্তি সন্ধুনন্তি নিদ্ধুনন্তি। নেৰস্স মযং জীৰং নিক্খমন্তং পস্সাম। তস্স তদেৰ চক্খু হোতি তে রূপা, তঞ্চাযতনং নপ্পটিসংৰেদেতি। তদেৰ সোতং হোতি তে সদ্দা, তঞ্চাযতনং নপ্পটিসংৰেদেতি। তদেৰ ঘানং হোতি তে গন্ধা, তঞ্চাযতনং নপ্পটিসংৰেদেতি । সাৰ জিৰ্হা হোতি তে রসা, তঞ্চাযতনং নপ্পটিসংৰেদেতি। স্ৰেৰ কাযো হোতি তে ফোট্ঠব্বা, তঞ্চাযতনং নপ্পটিসংৰেদেতি। অযম্পি খো, ভো কস্সপ, পরিযাযো, যেন মে পরিযাযেন এৰং হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। সঙ্খধমউপমা ৪২৬. ‘‘তেন হি, রাজঞ্ঞ, উপমং তে করিস্সামি। উপমায মিধেকচ্চে ৰিঞ্ঞূ পুরিসা ভাসিতস্স অত্থং আজানন্তি। ভূতপুব্বং, রাজঞ্ঞ, অঞ্ঞতরো সঙ্খধমো সঙ্খং আদায পচ্চন্তিমং জনপদং অগমাসি। সো যেন অঞ্ঞতরো গামো তেনুপসঙ্কমি; উপসঙ্কমিত্ৰা মজ্ঝে গামস্স ঠিতো তিক্খত্তুং সঙ্খং উপলাপেত্ৰা সঙ্খং ভূমিযং নিক্খিপিত্ৰা একমন্তং নিসীদি। অথ খো, রাজঞ্ঞ, তেসং পচ্চন্তজনপদানং [পচ্চন্তজানং (সী॰)] মনুস্সানং এতদহোসি – ‘অম্ভো কস্স নু খো [এতদহোসি ‘‘কিস্স দুখো (পী॰)] এসো সদ্দো এৰংরজনীযো এৰংকমনীযো এৰংমদনীযো এৰংবন্ধনীযো এৰংমুচ্ছনীযো’তি। সন্নিপতিত্ৰা তং সঙ্খধমং এতদৰোচুং – ‘অম্ভো, কস্স নু খো এসো সদ্দো এৰংরজনীযো এৰংকমনীযো এৰংমদনীযো এৰংবন্ধনীযো এৰংমুচ্ছনীযো’তি। ‘এসো খো, ভো, সঙ্খো নাম যস্সেসো সদ্দো এৰংরজনীযো এৰংকমনীযো এৰংমদনীযো এৰংবন্ধনীযো এৰংমুচ্ছনীযো’তি। তে তং সঙ্খং উত্তানং নিপাতেসুং – ‘ৰদেহি, ভো সঙ্খ, ৰদেহি, ভো সঙ্খা’তি। নেৰ সো সঙ্খো সদ্দমকাসি। তে তং সঙ্খং অৰকুজ্জং নিপাতেসুং, পস্সেন নিপাতেসুং, দুতিযেন পস্সেন নিপাতেসুং, উদ্ধং ঠপেসুং, ওমুদ্ধকং ঠপেসুং, পাণিনা আকোটেসুং, লেড্ডুনা আকোটেসুং, দণ্ডেন আকোটেসুং, সত্থেন আকোটেসুং, ওধুনিংসুসন্ধুনিংসু নিদ্ধুনিংসু – ‘ৰদেহি, ভো সঙ্খ, ৰদেহি, ভো সঙ্খা’তি। নেৰ সো সঙ্খো সদ্দমকাসি। ‘‘অথ খো, রাজঞ্ঞ, তস্স সঙ্খধমস্স এতদহোসি – ‘যাৰ বালা ইমে পচ্চন্তজনপদামনুস্সা, কথঞ্হি নাম অযোনিসো সঙ্খসদ্দং গৰেসিস্সন্তী’তি। তেসং পেক্খমানানং সঙ্খং গহেত্ৰা তিক্খত্তুং সঙ্খং উপলাপেত্ৰা সঙ্খং আদায পক্কামি। অথ খো, রাজঞ্ঞ, তেসং পচ্চন্তজনপদানং মনুস্সানং এতদহোসি – ‘যদা কির, ভো, অযং সঙ্খো নাম পুরিসসহগতোচ হোতি ৰাযামসহগতো [ৰাযোসহগতো (স্যা॰)] চ ৰাযুসহগতো চ, তদাযং সঙ্খো সদ্দং করোতি, যদা পনাযং সঙ্খো নেৰ পুরিসসহগতো হোতি ন ৰাযামসহগতো ন ৰাযুসহগতো, নাযং সঙ্খো সদ্দং করোতী’তি । এৰমেৰ খো, রাজঞ্ঞ, যদাযং কাযো আযুসহগতো চ হোতি উস্মাসহগতো চ ৰিঞ্ঞাণসহগতো চ, তদা অভিক্কমতিপি পটিক্কমতিপি তিট্ঠতিপি নিসীদতিপি সেয্যম্পি কপ্পেতি, চক্খুনাপি রূপং পস্সতি, সোতেনপি সদ্দং সুণাতি, ঘানেনপি গন্ধং ঘাযতি, জিৰ্হাযপি রসং সাযতি, কাযেনপি ফোট্ঠব্বং ফুসতি, মনসাপি ধম্মং ৰিজানাতি। যদা পনাযং কাযো নেৰ আযুসহগতো হোতি, ন উস্মাসহগতো, ন ৰিঞ্ঞাণসহগতো, তদা নেৰ অভিক্কমতি ন পটিক্কমতি ন তিট্ঠতি ন নিসীদতি ন সেয্যং কপ্পেতি, চক্খুনাপি রূপং ন পস্সতি, সোতেনপি সদ্দং ন সুণাতি, ঘানেনপি গন্ধং ন ঘাযতি, জিৰ্হাযপি রসং ন সাযতি, কাযেনপি ফোট্ঠব্বং ন ফুসতি, মনসাপি ধম্মং ন ৰিজানাতি। ইমিনাপি খো তে, রাজঞ্ঞ, পরিযাযেন এৰং হোতু – ‘ইতিপি অত্থি পরো লোকো, অত্থি সত্তা ওপপাতিকা, অত্থি সুকতদুক্কটানং কম্মানং ফলং ৰিপাকো’তি [ৰিপাকোতি, পঠমভাণৰারং (স্যা॰)]। ৪২৭. ‘‘কিঞ্চাপি ভৰং কস্সপো এৰমাহ, অথ খো এৰং মে এত্থ হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। ‘‘অত্থি পন, রাজঞ্ঞ, পরিযাযো…পে॰… অত্থি, ভো কস্সপ, পরিযাযো…পে॰… যথা কথং ৰিয রাজঞ্ঞা’’তি? ‘‘ইধ মে, ভো কস্সপ, পুরিসা চোরং আগুচারিং গহেত্ৰা দস্সেন্তি – ‘অযং তে, ভন্তে, চোরো আগুচারী, ইমস্স যং ইচ্ছসি, তং দণ্ডং পণেহী’তি। ত্যাহং এৰং ৰদামি – ‘তেন হি, ভো, ইমস্স পুরিসস্স ছৰিং ছিন্দথ , অপ্পেৰ নামস্স জীৰং পস্সেয্যামা’তি। তে তস্স পুরিসস্স ছৰিং ছিন্দন্তি। নেৰস্স মযং জীৰং পস্সাম। ত্যাহং এৰং ৰদামি – ‘তেন হি, ভো, ইমস্স পুরিসস্স চম্মং ছিন্দথ, মংসং ছিন্দথ, ন্হারুং ছিন্দথ, অট্ঠিং ছিন্দথ, অট্ঠিমিঞ্জং ছিন্দথ, অপ্পেৰ নামস্স জীৰং পস্সেয্যামা’তি। তে তস্স পুরিসস্স অট্ঠিমিঞ্জং ছিন্দন্তি, নেৰস্স মযং জীৰং পস্সেয্যাম। অযম্পি খো, ভো কস্সপ, পরিযাযো, যেন মে পরিযাযেন এৰং হোতি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি। অগ্গিকজটিলউপমা ৪২৮. ‘‘তেন হি, রাজঞ্ঞ, উপমং তে করিস্সামি। উপমায মিধেকচ্চে ৰিঞ্ঞূ পুরিসা ভাসিতস্স অত্থং আজানন্তি। ভূতপুব্বং, রাজঞ্ঞ, অঞ্ঞতরো অগ্গিকো জটিলো অরঞ্ঞাযতনে পণ্ণকুটিযা সম্মতি [ৰসতি (সী॰ পী॰)]। অথ খো, রাজঞ্ঞ, অঞ্ঞতরো জনপদে সত্থো [সত্থো জনপদপদেসা (সী॰), জনপদো সত্থৰাসো (স্যা॰), জনপদপদেসো (পী॰)] ৰুট্ঠাসি। অথ খো সো সত্থো [সত্থৰাসো (স্যা॰)] তস্স অগ্গিকস্স জটিলস্স অস্সমস্স সামন্তা একরত্তিং ৰসিত্ৰা পক্কামি। অথ খো, রাজঞ্ঞ, তস্স অগ্গিকস্স জটিলস্স এতদহোসি – ‘যংনূনাহং যেন সো সত্থৰাসো তেনুপসঙ্কমেয্যং, অপ্পেৰ নামেত্থ কিঞ্চি উপকরণং অধিগচ্ছেয্য’ন্তি। অথ খো সো অগ্গিকো জটিলো কালস্সেৰ ৰুট্ঠায যেন সো সত্থৰাসো তেনুপসঙ্কমি; উপসঙ্কমিত্ৰা অদ্দস তস্মিং সত্থৰাসে দহরং কুমারং মন্দং উত্তানসেয্যকং ছড্ডিতং। দিস্ৰানস্স এতদহোসি – ‘ন খো মে তং পতিরূপং যং মে পেক্খমানস্স মনুস্সভূতো কালঙ্করেয্য; যংনূনাহং ইমং দারকং অস্সমং নেত্ৰা আপাদেয্যং পোসেয্যং ৰড্ঢেয্য’ন্তি। অথ খো সো অগ্গিকো জটিলো তং দারকং অস্সমং নেত্ৰা আপাদেসি পোসেসি ৰড্ঢেসি। যদা সো দারকো দসৰস্সুদ্দেসিকো ৰা হোতি [অহোসি (?)] দ্ৰাদসৰস্সুদ্দেসিকো ৰা, অথ খো তস্স অগ্গিকস্স জটিলস্স জনপদে কঞ্চিদেৰ করণীযং উপ্পজ্জি। অথ খো সো অগ্গিকো জটিলো তং দারকং এতদৰোচ – ‘ইচ্ছামহং, তাত, জনপদং [নগরং (ক॰)] গন্তুং; অগ্গিং, তাত, পরিচরেয্যাসি। মা চ তে অগ্গি নিব্বাযি। সচে চ তে অগ্গি নিব্বাযেয্য, অযং ৰাসী ইমানি কট্ঠানি ইদং অরণিসহিতং, অগ্গিং নিব্বত্তেত্ৰা অগ্গিং পরিচরেয্যাসী’তি। অথ খো সো অগ্গিকো জটিলো তং দারকং এৰং অনুসাসিত্ৰা জনপদং অগমাসি। তস্স খিড্ডাপসুতস্স অগ্গি নিব্বাযি। ‘‘অথ খো তস্স দারকস্স এতদহোসি – ‘পিতা খো মং এৰং অৰচ – ‘‘অগ্গিং, তাত, পরিচরেয্যাসি। মা চ তে অগ্গি নিব্বাযি। সচে চ তে অগ্গি নিব্বাযেয্য, অযং ৰাসী ইমানি কট্ঠানি ইদং অরণিসহিতং, অগ্গিং নিব্বত্তেত্ৰা অগ্গিং পরিচরেয্যাসী’’তি। যংনূনাহং অগ্গিং নিব্বত্তেত্ৰা অগ্গিং পরিচরেয্য’ন্তি। অথ খো সো দারকো অরণিসহিতং ৰাসিযা তচ্ছি – ‘অপ্পেৰ নাম অগ্গিং অধিগচ্ছেয্য’ন্তি। নেৰ সো অগ্গিং অধিগচ্ছি। অরণিসহিতং দ্ৰিধা ফালেসি, তিধা ফালেসি, চতুধা ফালেসি, পঞ্চধা ফালেসি, দসধা ফালেসি, সতধা[ৰীসতিধা (স্যা॰)] ফালেসি, সকলিকং সকলিকং অকাসি, সকলিকং সকলিকং করিত্ৰা উদুক্খলে কোট্টেসি, উদুক্খলে কোট্টেত্ৰা মহাৰাতে ওপুনি [ওফুনি (স্যা॰ ক॰)] – ‘অপ্পেৰ নাম অগ্গিং অধিগচ্ছেয্য’ন্তি। নেৰ সো অগ্গিং অধিগচ্ছি। ‘‘অথ খো সো অগ্গিকো জটিলো জনপদে তং করণীযং তীরেত্ৰা যেন সকো অস্সমো তেনুপসঙ্কমি; উপসঙ্কমিত্ৰা তং দারকং এতদৰোচ – ‘কচ্চি তে, তাত, অগ্গি ন নিব্বুতো’তি? ‘ইধ মে, তাত, খিড্ডাপসুতস্স অগ্গি নিব্বাযি। তস্স মে এতদহোসি – ‘‘পিতা খো মং এৰং অৰচ অগ্গিং, তাত, পরিচরেয্যাসি। মা চ তে, তাত, অগ্গি নিব্বাযি। সচে চ তে অগ্গি নিব্বাযেয্য, অযং ৰাসী ইমানি কট্ঠানি ইদং অরণিসহিতং, অগ্গিং নিব্বত্তেত্ৰা অগ্গিং পরিচরেয্যাসীতি। যংনূনাহং অগ্গিং নিব্বত্তেত্ৰা অগ্গিং পরিচরেয্য’’ন্তি। অথ খ্ৰাহং, তাত, অরণিসহিতং ৰাসিযা তচ্ছিং – ‘‘অপ্পেৰ নাম অগ্গিং অধিগচ্ছেয্য’’ন্তি। নেৰাহং অগ্গিং অধিগচ্ছিং। অরণিসহিতং দ্ৰিধা ফালেসিং, তিধা ফালেসিং, চতুধা ফালেসিং, পঞ্চধা ফালেসিং, দসধা ফালেসিং , সতধা ফালেসিং, সকলিকং সকলিকং অকাসিং, সকলিকং সকলিকং করিত্ৰা উদুক্খলে কোট্টেসিং, উদুক্খলে কোট্টেত্ৰা মহাৰাতে ওপুনিং – ‘‘অপ্পেৰ নাম অগ্গিং অধিগচ্ছেয্য’’ন্তি। নেৰাহং অগ্গিং অধিগচ্ছি’’’ন্তি। অথ খো তস্স অগ্গিকস্স জটিলস্স এতদহোসি – ‘যাৰ বালো অযং দারকো অব্যত্তো, কথঞ্হি নাম অযোনিসো অগ্গিং গৰেসিস্সতী’তি। তস্স পেক্খমানস্স অরণিসহিতং গহেত্ৰা অগ্গিং নিব্বত্তেত্ৰা তং দারকং এতদৰোচ – ‘এৰং খো, তাত, অগ্গি নিব্বত্তেতব্বো। ন ত্ৰেৰ যথা ত্ৰং বালো অব্যত্তো অযোনিসো অগ্গিং গৰেসী’তি। এৰমেৰ খো ত্ৰং, রাজঞ্ঞ, বালো অব্যত্তো অযোনিসো পরলোকং গৰেসিস্সসি। পটিনিস্সজ্জেতং, রাজঞ্ঞ, পাপকং দিট্ঠিগতং, পটিনিস্সজ্জেতং, রাজঞ্ঞ, পাপকং দিট্ঠিগতং, মা তে অহোসি দীঘরত্তং অহিতায দুক্খাযা’’তি। ৪২৯. ‘‘কিঞ্চাপি ভৰং কস্সপো এৰমাহ, অথ খো নেৰাহং সক্কোমি ইদং পাপকং দিট্ঠিগতং পটিনিস্সজ্জিতুং। রাজাপি মং পসেনদি কোসলো জানাতি তিরোরাজানোপি – ‘পাযাসি রাজঞ্ঞো এৰংৰাদী এৰংদিট্ঠী – ‘‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’তি। সচাহং, ভো কস্সপ, ইদং পাপকং দিট্ঠিগতং পটিনিস্সজ্জিস্সামি, ভৰিস্সন্তি মে ৰত্তারো – ‘যাৰ বালো পাযাসি রাজঞ্ঞো অব্যত্তো দুগ্গহিতগাহী’তি। কোপেনপি নং হরিস্সামি, মক্খেনপি নং হরিস্সামি, পলাসেনপি নং হরিস্সামী’’তি। দ্ৰে সত্থৰাহউপমা ৪৩০. ‘‘তেন হি, রাজঞ্ঞ, উপমং তে করিস্সামি। উপমায মিধেকচ্চে ৰিঞ্ঞূ পুরিসা ভাসিতস্স অত্থং আজানন্তি। ভূতপুব্বং, রাজঞ্ঞ, মহাসকটসত্থো সকটসহস্সং পুরত্থিমা জনপদা পচ্ছিমং জনপদং অগমাসি। সো যেন যেন গচ্ছি, খিপ্পংযেৰ পরিযাদিযতি তিণকট্ঠোদকং হরিতকপণ্ণং। তস্মিং খো পন সত্থে দ্ৰে সত্থৰাহা অহেসুং একোপঞ্চন্নং সকটসতানং, একো পঞ্চন্নং সকটসতানং। অথ খো তেসং সত্থৰাহানং এতদহোসি – ‘অযং খো মহাসকটসত্থো সকটসহস্সং; তে মযং যেন যেন গচ্ছাম, খিপ্পমেৰ পরিযাদিযতি তিণকট্ঠোদকং হরিতকপণ্ণং। যংনূন মযং ইমং সত্থং দ্ৰিধা ৰিভজেয্যাম – একতো পঞ্চ সকটসতানি একতো পঞ্চ সকটসতানী’তি। তে তং সত্থং দ্ৰিধা ৰিভজিংসু [ৰিভজেসুং (ক॰)] একতো পঞ্চ সকটসতানি, একতো পঞ্চ সকটসতানি। একো সত্থৰাহো বহুং তিণঞ্চ কট্ঠঞ্চ উদকঞ্চ আরোপেত্ৰা সত্থং পযাপেসি [পাযাপেসি (সী॰ পী॰)]। দ্ৰীহতীহপযাতো খো পন সো সত্থো অদ্দস পুরিসং কাল়ং লোহিতক্খং [লোহিতক্খিং (স্যা॰)] সন্নদ্ধকলাপং [আসন্নদ্ধকলাপং (স্যা॰)] কুমুদমালিং অল্লৰত্থং অল্লকেসং কদ্দমমক্খিতেহি চক্কেহি ভদ্রেন রথেন পটিপথং আগচ্ছন্তং’, দিস্ৰা এতদৰোচ – ‘কুতো, ভো, আগচ্ছসী’তি? ‘অমুকম্হা জনপদা’তি। ‘কুহিং গমিস্সসী’তি? ‘অমুকং নাম জনপদ’ন্তি। ‘কচ্চি, ভো, পুরতো কন্তারে মহামেঘো অভিপ্পৰুট্ঠো’তি? ‘এৰং, ভো, পুরতো কন্তারে মহামেঘো অভিপ্পৰুট্ঠো, আসিত্তোদকানি ৰটুমানি, বহু তিণঞ্চ কট্ঠঞ্চউদকঞ্চ। ছড্ডেথ, ভো, পুরাণানি তিণানি কট্ঠানি উদকানি, লহুভারেহি সকটেহি সীঘং সীঘং গচ্ছথ, মা যোগ্গানি কিলমিত্থা’তি। ‘‘অথ খো সো সত্থৰাহো সত্থিকে আমন্তেসি – ‘অযং, ভো, পুরিসো এৰমাহ – ‘‘পুরতো কন্তারে মহামেঘো অভিপ্পৰুট্ঠো, আসিত্তোদকানি ৰটুমানি, বহু তিণঞ্চ কট্ঠঞ্চ উদকঞ্চ। ছড্ডেথ, ভো, পুরাণানি তিণানি কট্ঠানি উদকানি, লহুভারেহি সকটেহি সীঘং সীঘং গচ্ছথ, মা যোগ্গানি কিলমিত্থা’’তি। ছড্ডেথ, ভো, পুরাণানি তিণানি কট্ঠানি উদকানি, লহুভারেহি সকটেহি সত্থং পযাপেথা’তি। ‘এৰং, ভো’তি খো তে সত্থিকা তস্স সত্থৰাহস্স পটিস্সুত্ৰা ছড্ডেত্ৰা পুরাণানি তিণানি কট্ঠানি উদকানি লহুভারেহি সকটেহি সত্থং পযাপেসুং। তে পঠমেপি সত্থৰাসে ন অদ্দসংসু তিণং ৰা কট্ঠং ৰা উদকং ৰা। দুতিযেপি সত্থৰাসে… ততিযেপি সত্থৰাসে… চতুত্থেপি সত্থৰাসে… পঞ্চমেপি সত্থৰাসে… ছট্ঠেপি সত্থৰাসে… সত্তমেপি সত্থৰাসে ন অদ্দসংসু তিণং ৰা কট্ঠং ৰা উদকং ৰা। সব্বেৰ অনযব্যসনং আপজ্জিংসু। যে চ তস্মিং সত্থে অহেসুং মনুস্সা ৰা পসূ ৰা, সব্বে সো যক্খো অমনুস্সো ভক্খেসি। অট্ঠিকানেৰ সেসানি। ‘‘যদা অঞ্ঞাসি দুতিযো সত্থৰাহো – ‘বহুনিক্খন্তো খো, ভো, দানি সো সত্থো’তি বহুং তিণঞ্চ কট্ঠঞ্চ উদকঞ্চ আরোপেত্ৰা সত্থং পযাপেসি। দ্ৰীহতীহপযাতো খো পন সো সত্থো অদ্দস পুরিসং কাল়ং লোহিতক্খং সন্নদ্ধকলাপং কুমুদমালিং অল্লৰত্থং অল্লকেসং কদ্দমমক্খিতেহি চক্কেহি ভদ্রেন রথেন পটিপথং আগচ্ছন্তং, দিস্ৰা এতদৰোচ – ‘কুতো, ভো, আগচ্ছসী’তি? ‘অমুকম্হা জনপদা’তি। ‘কুহিং গমিস্সসী’তি? ‘অমুকং নাম জনপদ’ন্তি। ‘কচ্চি, ভো, পুরতো কন্তারে মহামেঘো অভিপ্পৰুট্ঠো’তি? ‘এৰং, ভো, পুরতো কন্তারে মহামেঘো অভিপ্পৰুট্ঠো। আসিত্তোদকানি ৰটুমানি, বহু তিণঞ্চ কট্ঠঞ্চ উদকঞ্চ। ছড্ডেথ , ভো, পুরাণানি তিণানি কট্ঠানি উদকানি, লহুভারেহি সকটেহি সীঘং সীঘং গচ্ছথ, মা যোগ্গানি কিলমিত্থা’তি। ‘‘অথ খো সো সত্থৰাহো সত্থিকে আমন্তেসি – ‘অযং, ভো, ‘‘পুরিসো এৰমাহ – পুরতো কন্তারে মহামেঘো অভিপ্পৰুট্ঠো, আসিত্তোদকানি ৰটুমানি, বহু তিণঞ্চ কট্ঠঞ্চ উদকঞ্চ। ছড্ডেথ, ভো, পুরাণানি তিণানি কট্ঠানি উদকানি, লহুভারেহি সকটেহি সীঘং সীঘং গচ্ছথ; মা যোগ্গানি কিলমিত্থা’’তি। অযং ভো পুরিসো নেৰ অম্হাকং মিত্তো, ন ঞাতিসালোহিতো, কথং মযং ইমস্স সদ্ধায গমিস্সাম। ন ৰো ছড্ডেতব্বানি পুরাণানি তিণানি কট্ঠানি উদকানি, যথাভতেন ভণ্ডেন সত্থং পযাপেথ। ন নো পুরাণং ছড্ডেস্সামা’তি। ‘এৰং, ভো’তি খো তে সত্থিকা তস্স সত্থৰাহস্স পটিস্সুত্ৰা যথাভতেন ভণ্ডেন সত্থং পযাপেসুং। তে পঠমেপি সত্থৰাসে ন অদ্দসংসু তিণং ৰা কট্ঠং ৰা উদকং ৰা। দুতিযেপি সত্থৰাসে… ততিযেপি সত্থৰাসে… চতুত্থেপি সত্থৰাসে… পঞ্চমেপি সত্থৰাসে… ছট্ঠেপি সত্থৰাসে… সত্তমেপি সত্থৰাসে ন অদ্দসংসু তিণং ৰা কট্ঠং ৰা উদকং ৰা। তঞ্চ সত্থং অদ্দসংসু অনযব্যসনং আপন্নং। যে চ তস্মিং সত্থেপি অহেসুং মনুস্সা ৰা পসূ ৰা, তেসঞ্চ অট্ঠিকানেৰ অদ্দসংসু তেন যক্খেন অমনুস্সেন ভক্খিতানং। ‘‘অথ খো সো সত্থৰাহো সত্থিকে আমন্তেসি – ‘অযং খো, ভো, সত্থো অনযব্যসনং আপন্নো, যথা তং তেন বালেন সত্থৰাহেন পরিণাযকেন। তেন হি, ভো, যানম্হাকং সত্থে অপ্পসারানি পণিযানি, তানি ছড্ডেত্ৰা, যানি ইমস্মিং সত্থে মহাসারানি পণিযানি, তানি আদিযথা’তি। ‘এৰং, ভো’তি খো তে সত্থিকা তস্স সত্থৰাহস্স পটিস্সুত্ৰা যানি সকস্মিং সত্থে অপ্পসারানি পণিযানি, তানি ছড্ডেত্ৰা যানি তস্মিং সত্থে মহাসারানি পণিযানি, তানি আদিযিত্ৰা সোত্থিনা তং কন্তারং নিত্থরিংসু, যথা তং পণ্ডিতেন সত্থৰাহেন পরিণাযকেন। এৰমেৰ খো ত্ৰং, রাজঞ্ঞ, বালো অব্যত্তো অনযব্যসনং আপজ্জিস্সসি অযোনিসো পরলোকং গৰেসন্তো সেয্যথাপি সো পুরিমো সত্থৰাহো। যেপি তৰ [তে (ক॰)]সোতব্বং সদ্ধাতব্বং [সদ্দহাতব্বং (পী॰ ক॰)] মঞ্ঞিস্সন্তি, তেপি অনযব্যসনং আপজ্জিস্সন্তি, সেয্যথাপি তে সত্থিকা। পটিনিস্সজ্জেতং, রাজঞ্ঞ , পাপকং দিট্ঠিগতং; পটিনিস্সজ্জেতং, রাজঞ্ঞ, পাপকং দিট্ঠিগতং। মা তে অহোসি দীঘরত্তং অহিতায দুক্খাযা’’তি। ৪৩১. ‘‘কিঞ্চাপি ভৰং কস্সপো এৰমাহ, অথ খো নেৰাহং সক্কোমি ইদং পাপকং দিট্ঠিগতং পটিনিস্সজ্জিতুং। রাজাপি মং পসেনদি কোসলো জানাতি তিরোরাজানোপি – ‘পাযাসি রাজঞ্ঞো এৰংৰাদী এৰংদিট্ঠী – ‘‘ইতিপি নত্থি পরো লোকো…পে॰… ৰিপাকো’’’তি। সচাহং, ভো কস্সপ, ইদং পাপকং দিট্ঠিগতং পটিনিস্সজ্জিস্সামি, ভৰিস্সন্তি মে ৰত্তারো – ‘যাৰ বালো পাযাসি রাজঞ্ঞো, অব্যত্তো দুগ্গহিতগাহী’তি। কোপেনপি নং হরিস্সামি, মক্খেনপি নং হরিস্সামি, পলাসেনপি নং হরিস্সামী’’তি। গূথভারিকউপমা ৪৩২. ‘‘তেন হি, রাজঞ্ঞ, উপমং তে করিস্সামি। উপমায মিধেকচ্চে ৰিঞ্ঞূ পুরিসা ভাসিতস্স অত্থং আজানন্তি। ভূতপুব্বং, রাজঞ্ঞ, অঞ্ঞতরো সূকরপোসকো পুরিসো সকম্হা গামা অঞ্ঞং গামং অগমাসি। তত্থ অদ্দস পহূতং সুক্খগূথং ছড্ডিতং। দিস্ৰানস্স এতদহোসি – ‘অযং খো পহুতো সুক্খগূথো ছড্ডিতো, মম চ সূকরভত্তং [সূকরানং ভক্খো (স্যা॰)]; যংনূনাহং ইতো সুক্খগূথং হরেয্য’ন্তি। সো উত্তরাসঙ্গং পত্থরিত্ৰা পহূতং সুক্খগূথং আকিরিত্ৰা ভণ্ডিকং বন্ধিত্ৰা সীসে উব্বাহেত্ৰা [উচ্চারোপেত্ৰা (ক॰ সী॰ ক॰)]অগমাসি। তস্স অন্তরামগ্গে মহাঅকালমেঘো পাৰস্সি। সো উগ্ঘরন্তং পগ্ঘরন্তং যাৰ অগ্গনখা গূথেন মক্খিতো গূথভারং আদায অগমাসি। তমেনং মনুস্সা দিস্ৰা এৰমাহংসু – ‘কচ্চি নো ত্ৰং, ভণে, উম্মত্তো, কচ্চি ৰিচেতো, কথঞ্হি নাম উগ্ঘরন্তং পগ্ঘরন্তং যাৰ অগ্গনখা গূথেন মক্খিতো গূথভারং হরিস্সসী’তি। ‘তুম্হে খ্ৰেত্থ, ভণে, উম্মত্তা, তুম্হে ৰিচেতা, তথা হি পন মে সূকরভত্ত’ন্তি। এৰমেৰ খো ত্ৰং, রাজঞ্ঞ, গূথভারিকূপমো [গূথহারিকূপমো (সী॰ পী॰)] মঞ্ঞে পটিভাসি। পটিনিস্সজ্জেতং, রাজঞ্ঞ, পাপকং দিট্ঠিগতং। পটিনিস্সজ্জেতং, রাজঞ্ঞ, পাপকং দিট্ঠিগতং। মা তে অহোসি দীঘরত্তং অহিতায দুক্খাযা’’তি। ৪৩৩. ‘‘কিঞ্চাপি ভৰং কস্সপো এৰমাহ, অথ খো নেৰাহং সক্কোমি ইদং পাপকং দিট্ঠিগতং পটিনিস্সজ্জিতুং। রাজাপি মং পসেনদি কোসলো জানাতি তিরোরাজানোপি – ‘পাযাসি রাজঞ্ঞো এৰংৰাদী এৰংদিট্ঠী – ‘‘ইতিপি নত্থি পরো লোকো…পে॰… ৰিপাকো’’তি। সচাহং, ভো কস্সপ, ইদং পাপকং দিট্ঠিগতং পটিনিস্সজ্জিস্সামি, ভৰিস্সন্তি মে ৰত্তারো – ‘যাৰ বালো পাযাসি রাজঞ্ঞো অব্যত্তো দুগ্গহিতগাহী’তি। কোপেনপি নং হরিস্সামি, মক্খেনপি নং হরিস্সামি, পলাসেনপি নং হরিস্সামী’’তি। অক্খধুত্তকউপমা ৪৩৪. ‘‘তেন হি, রাজঞ্ঞ, উপমং তে করিস্সামি, উপমায মিধেকচ্চে ৰিঞ্ঞূ পুরিসা ভাসিতস্স অত্থং আজানন্তি। ভূতপুব্বং, রাজঞ্ঞ, দ্ৰে অক্খধুত্তা অক্খেহি দিব্বিংসু। একো অক্খধুত্তো আগতাগতং কলিং গিলতি। অদ্দসা খো দুতিযো অক্খধুত্তো তং অক্খধুত্তং আগতাগতং কলিং গিলন্তং, দিস্ৰা তং অক্খধুত্তং এতদৰোচ – ‘ত্ৰং খো, সম্ম, একন্তিকেন জিনাসি, দেহি মে, সম্ম, অক্খে পজোহিস্সামী’তি। ‘এৰং সম্মা’তি খো সো অক্খধুত্তো তস্স অক্খধুত্তস্স অক্খে পাদাসি। অথ খো সো অক্খধুত্তো অক্খে ৰিসেন পরিভাৰেত্ৰা তং অক্খধুত্তং এতদৰোচ – ‘এহি খো, সম্ম, অক্খেহি দিব্বিস্সামা’তি। ‘এৰং সম্মা’তি খো সো অক্খধুত্তো তস্স অক্খধুত্তস্স পচ্চস্সোসি। দুতিযম্পি খো তে অক্খধুত্তা অক্খেহি দিব্বিংসু। দুতিযম্পি খো সো অক্খধুত্তো আগতাগতং কলিং গিলতি। অদ্দসা খো দুতিযো অক্খধুত্তো তং অক্খধুত্তং দুতিযম্পি আগতাগতং কলিং গিলন্তং, দিস্ৰা তং অক্খধুত্তং এতদৰোচ – ‘‘লিত্তং পরমেন তেজসা, গিলমক্খং পুরিসো ন বুজ্ঝতি। গিল রে গিল পাপধুত্তক [গিলি রে পাপধুত্তক (ক॰)], পচ্ছা তে কটুকং ভৰিস্সতীতি॥ ‘‘এৰমেৰ খো ত্ৰং, রাজঞ্ঞ, অক্খধুত্তকূপমো মঞ্ঞে পটিভাসি। পটিনিস্সজ্জেতং, রাজঞ্ঞ, পাপকং দিট্ঠিগতং; পটিনিস্সজ্জেতং, রাজঞ্ঞ, পাপকং দিট্ঠিগতং। মা তে অহোসি দীঘরত্তং অহিতায দুক্খাযা’’তি। ৪৩৫. ‘‘কিঞ্চাপি ভৰং কস্সপো এৰমাহ, অথ খো নেৰাহং সক্কোমি ইদং পাপকং দিট্ঠিগতং পটিনিস্সজ্জিতুং। রাজাপি মং পসেনদি কোসলো জানাতি তিরোরাজানোপি – ‘পাযাসি রাজঞ্ঞো এৰংৰাদী এৰংদিট্ঠী – ‘‘ইতিপি নত্থি পরো লোকো…পে॰… ৰিপাকো’’তি। সচাহং, ভো কস্সপ, ইদং পাপকং দিট্ঠিগতং পটিনিস্সজ্জিস্সামি, ভৰিস্সন্তি মে ৰত্তারো – ‘যাৰ বালো পাযাসি রাজঞ্ঞো অব্যত্তো দুগ্গহিতগাহী’তি। কোপেনপি নং হরিস্সামি, মক্খেনপি নং হরিস্সামি, পলাসেনপি নং হরিস্সামী’’তি। সাণভারিকউপমা ৪৩৬. ‘‘তেন হি, রাজঞ্ঞ, উপমং তে করিস্সামি, উপমায মিধেকচ্চে ৰিঞ্ঞূ পুরিসা ভাসিতস্স অত্থং আজানন্তি। ভূতপুব্বং, রাজঞ্ঞ, অঞ্ঞতরো জনপদো ৰুট্ঠাসি। অথ খো সহাযকো সহাযকং আমন্তেসি – ‘আযাম, সম্ম, যেন সো জনপদো তেনুপসঙ্কমিস্সাম, অপ্পেৰ নামেত্থ কিঞ্চি ধনং অধিগচ্ছেয্যামা’তি। ‘এৰং সম্মা’তি খো সহাযকো সহাযকস্স পচ্চস্সোসি। তে যেন সো জনপদো, যেন অঞ্ঞতরং গামপট্টং [গামপজ্জং (স্যা॰), গামপত্তং (সী॰)] তেনুপসঙ্কমিংসু , তত্থ অদ্দসংসু পহূতং সাণং ছড্ডিতং, দিস্ৰা সহাযকো সহাযকং আমন্তেসি – ‘ইদং খো, সম্ম, পহূতং সাণং ছড্ডিতং, তেন হি, সম্ম, ত্ৰঞ্চ সাণভারং বন্ধ, অহঞ্চ সাণভারং বন্ধিস্সামি, উভো সাণভারং আদায গমিস্সামা’তি। ‘এৰং সম্মা’তি খো সহাযকো সহাযকস্স পটিস্সুত্ৰা সাণভারং বন্ধিত্ৰা তে উভো সাণভারং আদায যেন অঞ্ঞতরং গামপট্টং তেনুপসঙ্কমিংসু। তত্থ অদ্দসংসু পহূতং সাণসুত্তং ছড্ডিতং, দিস্ৰা সহাযকো সহাযকং আমন্তেসি – ‘যস্স খো, সম্ম, অত্থায ইচ্ছেয্যাম সাণং, ইদং পহূতং সাণসুত্তং ছড্ডিতং। তেন হি, সম্ম, ত্ৰঞ্চ সাণভারং ছড্ডেহি, অহঞ্চ সাণভারং ছড্ডেস্সামি, উভো সাণসুত্তভারং আদায গমিস্সামা’তি। ‘অযং খো মে, সম্ম, সাণভারো দূরাভতো চ সুসন্নদ্ধো চ, অলং মে ত্ৰং পজানাহী’তি। অথ খো সো সহাযকো সাণভারং ছড্ডেত্ৰা সাণসুত্তভারং আদিযি। ‘‘তে যেন অঞ্ঞতরং গামপট্টং তেনুপসঙ্কমিংসু। তত্থ অদ্দসংসু পহূতা সাণিযো ছড্ডিতা, দিস্ৰা সহাযকো সহাযকং আমন্তেসি – ‘যস্স খো , সম্ম, অত্থায ইচ্ছেয্যাম সাণং ৰা সাণসুত্তং ৰা, ইমা পহূতা সাণিযো ছড্ডিতা। তেন হি, সম্ম, ত্ৰঞ্চ সাণভারং ছড্ডেহি, অহঞ্চ সাণসুত্তভারং ছড্ডেস্সামি, উভো সাণিভারং আদায গমিস্সামা’তি । ‘অযং খো মে, সম্ম, সাণভারো দূরাভতো চ সুসন্নদ্ধো চ, অলং মে, ত্ৰং পজানাহী’তি। অথ খো সো সহাযকো সাণসুত্তভারং ছড্ডেত্ৰা সাণিভারং আদিযি। ‘‘তে যেন অঞ্ঞতরং গামপট্টং তেনুপসঙ্কমিংসু। তত্থ অদ্দসংসু পহূতং খোমং ছড্ডিতং, দিস্ৰা…পে॰… পহূতং খোমসুত্তং ছড্ডিতং, দিস্ৰা… পহূতং খোমদুস্সং ছড্ডিতং, দিস্ৰা… পহূতং কপ্পাসং ছড্ডিতং, দিস্ৰা… পহূতং কপ্পাসিকসুত্তং ছড্ডিতং, দিস্ৰা… পহূতং কপ্পাসিকদুস্সং ছড্ডিতং, দিস্ৰা… পহূতং অযং [অযসং (স্যা॰)] ছড্ডিতং, দিস্ৰা… পহূতং লোহং ছড্ডিতং, দিস্ৰা… পহূতং তিপুং ছড্ডিতং, দিস্ৰা… পহূতং সীসং ছড্ডিতং, দিস্ৰা… পহূতং সজ্ঝং [সজ্ঝুং (সী॰ স্যা॰ পী॰)] ছড্ডিতং, দিস্ৰা… পহূতং সুৰণ্ণং ছড্ডিতং, দিস্ৰা সহাযকো সহাযকং আমন্তেসি – ‘যস্স খো, সম্ম, অত্থায ইচ্ছেয্যাম সাণং ৰা সাণসুত্তং ৰা সাণিযো ৰা খোমং ৰা খোমসুত্তং ৰা খোমদুস্সং ৰা কপ্পাসং ৰা কপ্পাসিকসুত্তং ৰা কপ্পাসিকদুস্সং ৰা অযং ৰা লোহং ৰা তিপুং ৰা সীসং ৰা সজ্ঝং ৰা, ইদং পহূতং সুৰণ্ণং ছড্ডিতং। তেন হি, সম্ম, ত্ৰঞ্চ সাণভারং ছড্ডেহি, অহঞ্চ সজ্ঝভারং [সজ্ঝুভারং (সী॰ স্যা॰ পী॰)] ছড্ডেস্সামি, উভো সুৰণ্ণভারং আদায গমিস্সামা’তি। ‘অযং খো মে, সম্ম, সাণভারো দূরাভতো চ সুসন্নদ্ধো চ, অলং মে ত্ৰং পজানাহী’তি। অথ খো সো সহাযকো সজ্ঝভারং ছড্ডেত্ৰা সুৰণ্ণভারং আদিযি। ‘‘তে যেন সকো গামো তেনুপসঙ্কমিংসু। তত্থ যো সো সহাযকো সাণভারং আদায অগমাসি, তস্স নেৰ মাতাপিতরো অভিনন্দিংসু, ন পুত্তদারা অভিনন্দিংসু, ন মিত্তামচ্চা অভিনন্দিংসু, ন চ ততোনিদানং সুখং সোমনস্সং অধিগচ্ছি। যো পন সো সহাযকো সুৰণ্ণভারং আদায অগমাসি, তস্স মাতাপিতরোপি অভিনন্দিংসু, পুত্তদারাপি অভিনন্দিংসু, মিত্তামচ্চাপি অভিনন্দিংসু, ততোনিদানঞ্চ সুখং সোমনস্সং অধিগচ্ছি। ‘‘এৰমেৰ খো ত্ৰং, রাজঞ্ঞ, সাণভারিকূপমো মঞ্ঞে পটিভাসি। পটিনিস্সজ্জেতং, রাজঞ্ঞ, পাপকং দিট্ঠিগতং; পটিনিস্সজ্জেতং, রাজঞ্ঞ, পাপকং দিট্ঠিগতং। মা তে অহোসি দীঘরত্তং অহিতায দুক্খাযা’’তি। সরণগমনং ৪৩৭. ‘‘পুরিমেনেৰ অহং ওপম্মেন ভোতো কস্সপস্স অত্তমনো অভিরদ্ধো। অপি চাহং ইমানি ৰিচিত্রানি পঞ্হাপটিভানানি সোতুকামো এৰাহং ভৰন্তং কস্সপং পচ্চনীকং কাতব্বং অমঞ্ঞিস্সং। অভিক্কন্তং, ভো কস্সপ, অভিক্কন্তং, ভো কস্সপ। সেয্যথাপি, ভো কস্সপ, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য ‘চক্খুমন্তো রূপানি দক্খন্তী’তি এৰমেৰং ভোতা কস্সপেন অনেকপরিযাযেন ধম্মো পকাসিতো। এসাহং, ভো কস্সপ, তং ভৰন্তং গোতমং সরণং গচ্ছামি, ধম্মঞ্চ, ভিক্খুসঙ্ঘঞ্চ। উপাসকং মং ভৰং কস্সপো ধারেতু অজ্জতগ্গে পাণুপেতং সরণং গতং। ‘‘ইচ্ছামি চাহং, ভো কস্সপ, মহাযঞ্ঞং যজিতুং, অনুসাসতু মং ভৰং কস্সপো, যং মমস্স দীঘরত্তং হিতায সুখাযা’’তি। যঞ্ঞকথা ৪৩৮. ‘‘যথারূপে খো, রাজঞ্ঞ, যঞ্ঞে গাৰো ৰা হঞ্ঞন্তি অজেল়কা ৰা হঞ্ঞন্তি, কুক্কুটসূকরা ৰা হঞ্ঞন্তি, ৰিৰিধা ৰা পাণা সংঘাতং আপজ্জন্তি, পটিগ্গাহকা চ হোন্তি মিচ্ছাদিট্ঠী মিচ্ছাসঙ্কপ্পা মিচ্ছাৰাচা মিচ্ছাকম্মন্তা মিচ্ছাআজীৰা মিচ্ছাৰাযামা মিচ্ছাসতী মিচ্ছাসমাধী, এৰরূপো খো, রাজঞ্ঞ, যঞ্ঞো ন মহপ্ফলো হোতি ন মহানিসংসো ন মহাজুতিকো ন মহাৰিপ্ফারো। সেয্যথাপি, রাজঞ্ঞ, কস্সকো বীজনঙ্গলং আদায ৰনং পৰিসেয্য। সো তত্থ দুক্খেত্তে দুব্ভূমে অৰিহতখাণুকণ্টকে বীজানি পতিট্ঠাপেয্য খণ্ডানি পূতীনি ৰাতাতপহতানি অসারদানি অসুখসযিতানি। দেৰো চ ন কালেন কালং সম্মাধারং অনুপ্পৰেচ্ছেয্য। অপি নু তানি বীজানি ৰুদ্ধিং ৰিরূল়্হিং [ৰিরুল়্হিং (মোগ্গলানে)] ৰেপুল্লং আপজ্জেয্যুং, কস্সকো ৰা ৰিপুলং ফলং অধিগচ্ছেয্যা’’তি? ‘‘নো হিদং [ন এৰং (স্যা॰ ক॰)] ভো কস্সপ’’। ‘‘এৰমেৰ খো, রাজঞ্ঞ, যথারূপে যঞ্ঞে গাৰো ৰা হঞ্ঞন্তি, অজেল়কা ৰা হঞ্ঞন্তি, কুক্কুটসূকরা ৰা হঞ্ঞন্তি, ৰিৰিধা ৰা পাণা সংঘাতং আপজ্জন্তি, পটিগ্গাহকা চ হোন্তি মিচ্ছাদিট্ঠী মিচ্ছাসঙ্কপ্পা মিচ্ছাৰাচা মিচ্ছাকম্মন্তা মিচ্ছাআজীৰা মিচ্ছাৰাযামা মিচ্ছাসতী মিচ্ছাসমাধী, এৰরূপো খো , রাজঞ্ঞ, যঞ্ঞো ন মহপ্ফলো হোতি ন মহানিসংসো ন মহাজুতিকো ন মহাৰিপ্ফারো। ‘‘যথারূপে চ খো, রাজঞ্ঞ, যঞ্ঞে নেৰ গাৰো হঞ্ঞন্তি, ন অজেল়কা হঞ্ঞন্তি, ন কুক্কুটসূকরা হঞ্ঞন্তি, ন ৰিৰিধা ৰা পাণা সংঘাতং আপজ্জন্তি, পটিগ্গাহকা চ হোন্তি সম্মাদিট্ঠী সম্মাসঙ্কপ্পা সম্মাৰাচা সম্মাকম্মন্তা সম্মাআজীৰা সম্মাৰাযামা সম্মাসতী সম্মাসমাধী, এৰরূপো খো, রাজঞ্ঞ, যঞ্ঞো মহপ্ফলো হোতি মহানিসংসো মহাজুতিকো মহাৰিপ্ফারো। সেয্যথাপি, রাজঞ্ঞ, কস্সকো বীজনঙ্গলং আদায ৰনং পৰিসেয্য। সো তত্থ সুখেত্তে সুভূমে সুৰিহতখাণুকণ্টকে বীজানি পতিট্ঠপেয্য অখণ্ডানি অপূতীনি অৰাতাতপহতানি সারদানি সুখসযিতানি। দেৰো চ কালেন কালং সম্মাধারং অনুপ্পৰেচ্ছেয্য। অপি নু তানি বীজানি ৰুদ্ধিং ৰিরূল়্হিং ৰেপুল্লং আপজ্জেয্যুং, কস্সকো ৰা ৰিপুলং ফলং অধিগচ্ছেয্যা’’তি? ‘‘এৰং, ভো কস্সপ’’। ‘‘এৰমেৰ খো, রাজঞ্ঞ, যথারূপে যঞ্ঞে নেৰ গাৰো হঞ্ঞন্তি, ন অজেল়কা হঞ্ঞন্তি, ন কুক্কুটসূকরা হঞ্ঞন্তি, ন ৰিৰিধা ৰা পাণা সংঘাতং আপজ্জন্তি, পটিগ্গাহকা চ হোন্তি সম্মাদিট্ঠী সম্মাসঙ্কপ্পা সম্মাৰাচা সম্মাকম্মন্তা সম্মাআজীৰা সম্মাৰাযামা সম্মাসতী সম্মাসমাধী, এৰরূপো খো, রাজঞ্ঞ, যঞ্ঞো মহপ্ফলো হোতি মহানিসংসো মহাজুতিকো মহাৰিপ্ফারো’’তি। উত্তরমাণৰৰত্থু ৪৩৯. অথ খো পাযাসি রাজঞ্ঞো দানং পট্ঠপেসি সমণব্রাহ্মণকপণদ্ধিকৰণিব্বকযাচকানং । তস্মিং খো পন দানে এৰরূপং ভোজনং দীযতি কণাজকং বিলঙ্গদুতিযং, ধোরকানি[থোরকানি (সী॰ পী॰), চোরকানি (স্যা॰)] চ ৰত্থানি গুল়ৰালকানি [গুল়গাল়কানি (ক॰)]। তস্মিং খো পন দানে উত্তরো নাম মাণৰো ৰাৰটো [ব্যাৰটো (সী॰ পী॰)] অহোসি। সো দানং দত্ৰা এৰং অনুদ্দিসতি – ‘‘ইমিনাহং দানেন পাযাসিং রাজঞ্ঞমেৰ ইমস্মিং লোকে সমাগচ্ছিং, মা পরস্মি’’ন্তি। অস্সোসি খো পাযাসি রাজঞ্ঞো – ‘‘উত্তরো কির মাণৰো দানং দত্ৰা এৰং অনুদ্দিসতি – ‘ইমিনাহং দানেন পাযাসিং রাজঞ্ঞমেৰ ইমস্মিং লোকে সমাগচ্ছিং, মা পরস্মি’’’ন্তি। অথ খো পাযাসি রাজঞ্ঞো উত্তরং মাণৰং আমন্তাপেত্ৰা এতদৰোচ – ‘‘সচ্চং কির ত্ৰং, তাত উত্তর, দানং দত্ৰা এৰং অনুদ্দিসসি – ‘ইমিনাহং দানেন পাযাসিং রাজঞ্ঞমেৰ ইমস্মিং লোকে সমাগচ্ছিং, মা পরস্মি’’’ন্তি? ‘‘এৰং, ভো’’। ‘‘কিস্স পন ত্ৰং, তাত উত্তর, দানং দত্ৰা এৰং অনুদ্দিসসি – ‘ইমিনাহং দানেন পাযাসিং রাজঞ্ঞমেৰ ইমস্মিং লোকে সমাগচ্ছিং, মা পরস্মি’ন্তি? ননু মযং, তাত উত্তর, পুঞ্ঞত্থিকা দানস্সেৰ ফলং পাটিকঙ্খিনো’’তি? ‘‘ভোতো খো দানে এৰরূপং ভোজনং দীযতি কণাজকং বিলঙ্গদুতিযং, যং ভৰং পাদাপি [পাদাসি (ক॰)] ন ইচ্ছেয্য সম্ফুসিতুং [ছুপিতুং (পী॰ ক॰)], কুতো ভুঞ্জিতুং, ধোরকানি চ ৰত্থানি গুল়ৰালকানি, যানি ভৰং পাদাপি [অচিত্তিকতং (ক॰)] ন ইচ্ছেয্য সম্ফুসিতুং, কুতো পরিদহিতুং। ভৰং খো পনম্হাকং পিযো মনাপো, কথং মযং মনাপং অমনাপেন সংযোজেমা’’তি? ‘‘তেন হি ত্ৰং, তাত উত্তর, যাদিসাহং ভোজনং ভুঞ্জামি, তাদিসং ভোজনংপট্ঠপেহি। যাদিসানি চাহং ৰত্থানি পরিদহামি, তাদিসানি চ ৰত্থানি পট্ঠপেহী’’তি। ‘‘এৰং, ভো’’তি খো উত্তরো মাণৰো পাযাসিস্স রাজঞ্ঞস্স পটিস্সুত্ৰা যাদিসং ভোজনং পাযাসি রাজঞ্ঞো ভুঞ্জতি, তাদিসং ভোজনং পট্ঠপেসি। যাদিসানি চ ৰত্থানি পাযাসি রাজঞ্ঞো পরিদহতি, তাদিসানি চ ৰত্থানি পট্ঠপেসি। ৪৪০. অথ খো পাযাসি রাজঞ্ঞো অসক্কচ্চং দানং দত্ৰা অসহত্থা দানং দত্ৰা অচিত্তীকতং দানং দত্ৰা অপৰিদ্ধং দানং দত্ৰা কাযস্স ভেদা পরং মরণা চাতুমহারাজিকানং দেৰানং সহব্যতং উপপজ্জি সুঞ্ঞং সেরীসকং ৰিমানং। যো পন তস্স দানে ৰাৰটো অহোসি উত্তরো নাম মাণৰো। সো সক্কচ্চং দানং দত্ৰা সহত্থা দানং দত্ৰা চিত্তীকতং দানং দত্ৰা অনপৰিদ্ধং দানং দত্ৰা কাযস্স ভেদা পরং মরণা সুগতিং সগ্গং লোকং উপপজ্জি দেৰানং তাৰতিংসানং সহব্যতং। পাযাসিদেৰপুত্তো ৪৪১. তেন খো পন সমযেন আযস্মা গৰম্পতি অভিক্খণং সুঞ্ঞং সেরীসকং ৰিমানং দিৰাৰিহারং গচ্ছতি। অথ খো পাযাসি দেৰপুত্তো যেনাযস্মা গৰম্পতি তেনুপসঙ্কমি; উপসঙ্কমিত্ৰা আযস্মন্তং গৰম্পতিং অভিৰাদেত্ৰা একমন্তং অট্ঠাসি। একমন্তং ঠিতং খো পাযাসিং দেৰপুত্তং আযস্মা গৰম্পতি এতদৰোচ – ‘‘কোসি ত্ৰং, আৰুসো’’তি? ‘‘অহং, ভন্তে, পাযাসি রাজঞ্ঞো’’তি। ‘‘ননু ত্ৰং, আৰুসো, এৰংদিট্ঠিকো অহোসি – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’’’তি? ‘‘সচ্চাহং, ভন্তে, এৰংদিট্ঠিকো অহোসিং – ‘ইতিপি নত্থি পরো লোকো, নত্থি সত্তা ওপপাতিকা, নত্থি সুকতদুক্কটানং কম্মানং ফলং ৰিপাকো’তি। অপি চাহং অয্যেন কুমারকস্সপেন এতস্মা পাপকা দিট্ঠিগতা ৰিৰেচিতো’’তি। ‘‘যো পন তে, আৰুসো, দানে ৰাৰটো অহোসি উত্তরো নাম মাণৰো, সো কুহিং উপপন্নো’’তি? ‘‘যো মে, ভন্তে, দানে ৰাৰটো অহোসি উত্তরো নাম মাণৰো, সো সক্কচ্চং দানং দত্ৰা সহত্থা দানং দত্ৰা চিত্তীকতং দানং দত্ৰা অনপৰিদ্ধং দানং দত্ৰা কাযস্স ভেদা পরং মরণা সুগতিং সগ্গং লোকং উপপন্নো দেৰানং তাৰতিংসানং সহব্যতং। অহং পন, ভন্তে, অসক্কচ্চং দানং দত্ৰা অসহত্থা দানং দত্ৰা অচিত্তীকতং দানং দত্ৰা অপৰিদ্ধং দানং দত্ৰা কাযস্স ভেদা পরং মরণা চাতুমহারাজিকানং দেৰানং সহব্যতং উপপন্নো সুঞ্ঞং সেরীসকং ৰিমানং। তেন হি, ভন্তে গৰম্পতি, মনুস্সলোকং গন্ত্ৰা এৰমারোচেহি – ‘সক্কচ্চং দানং দেথ, সহত্থা দানং দেথ, চিত্তীকতং দানং দেথ, অনপৰিদ্ধং দানং দেথ। পাযাসি রাজঞ্ঞো অসক্কচ্চং দানং দত্ৰা অসহত্থা দানং দত্ৰা অচিত্তীকতং দানং দত্ৰা অপৰিদ্ধং দানং দত্ৰা কাযস্স ভেদা পরং মরণা চাতুমহারাজিকানং দেৰানং সহব্যতং উপপন্নো সুঞ্ঞং সেরীসকং ৰিমানং। যো পন তস্স দানে ৰাৰটো অহোসি উত্তরো নাম মাণৰো, সো সক্কচ্চং দানং দত্ৰা সহত্থা দানং দত্ৰা চিত্তীকতং দানং দত্ৰা অনপৰিদ্ধং দানং দত্ৰা কাযস্স ভেদা পরং মরণা সুগতিং সগ্গং লোকং উপপন্নো দেৰানং তাৰতিংসানং সহব্যত’’’ন্তি। অথ খো আযস্মা গৰম্পতি মনুস্সলোকং আগন্ত্ৰা এৰমারোচেসি – ‘‘সক্কচ্চং দানং দেথ, সহত্থা দানং দেথ, চিত্তীকতং দানং দেথ, অনপৰিদ্ধং দানং দেথ। পাযাসি রাজঞ্ঞো অসক্কচ্চং দানং দত্ৰা অসহত্থা দানং দত্ৰা অচিত্তীকতং দানং দত্ৰা অপৰিদ্ধং দানং দত্ৰা কাযস্স ভেদা পরং মরণা চাতুমহারাজিকানং দেৰানং সহব্যতং উপপন্নো সুঞ্ঞং সেরীসকং ৰিমানং। যো পন তস্স দানে ৰাৰটো অহোসি উত্তরো নাম মাণৰো, সো সক্কচ্চং দানং দত্ৰা সহত্থা দানং দত্ৰা চিত্তীকতং দানং দত্ৰা অনপৰিদ্ধং দানং দত্ৰা কাযস্স ভেদা পরং মরণা সুগতিং সগ্গং লোকং উপপন্নো দেৰানং তাৰতিংসানং সহব্যত’’ন্তি। পাযাসিসুত্তং নিট্ঠিতং দসমং। মহাৰগ্গো নিট্ঠিতো। তস্সুদ্দানং – মহাপদান নিদানং, নিব্বানঞ্চ সুদস্সনং। জনৰসভ গোৰিন্দং, সমযং সক্কপঞ্হকং। মহাসতিপট্ঠানঞ্চ, পাযাসি দসমং ভৰে [সতিপট্ঠানপাযাসি, মহাৰগ্গস্স সঙ্গহো (সী॰ পী॰) সতিপট্ঠানপাযাসি, মহাৰগ্গোতি ৰুচ্চতীতি (স্যা॰)]॥ মহাৰগ্গপাল়ি নিট্ঠিতা। |