৬. পাটিদেসনীযকণ্ডং
১. পঠমপাটিদেসনীযসিক্খাপদং ইমে খো পনাযস্মন্তো চত্তারো পাটিদেসনীযা ধম্মা উদ্দেসং আগচ্ছন্তি। ৫৫২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন অঞ্ঞতরা ভিক্খুনী সাৰত্থিযং পিণ্ডায চরিত্ৰা পটিক্কমনকালে অঞ্ঞতরং ভিক্খুং পস্সিত্ৰা এতদৰোচ – ‘‘হন্দায্য, ভিক্খং পটিগ্গণ্হা’’তি। ‘‘সুট্ঠু, ভগিনী’’তি সব্বেৰ অগ্গহেসি। সা উপকট্ঠে কালে নাসক্খি পিণ্ডায চরিতুং, ছিন্নভত্তা অহোসি। অথ খো সা ভিক্খুনী দুতিযম্পি দিৰসং…পে॰… ততিযম্পি দিৰসং সাৰত্থিযং পিণ্ডায চরিত্ৰা পটিক্কমনকালে তং ভিক্খুং পস্সিত্ৰা এতদৰোচ – ‘‘হন্দায্য, ভিক্খং পটিগ্গণ্হা’’তি। ‘‘সুট্ঠু, ভগিনী’’তি সব্বেৰ অগ্গহেসি। সা উপকট্ঠে কালে নাসক্খি পিণ্ডায চরিতুং, ছিন্নভত্তা অহোসি। অথ খো সা ভিক্খুনী চতুত্থে দিৰসে রথিকায পৰেধেন্তী গচ্ছতি। সেট্ঠি গহপতি রথেন পটিপথং আগচ্ছন্তো তং ভিক্খুনিং এতদৰোচ – ‘‘অপেহায্যে’’তি। সা ৰোক্কমন্তী তত্থেৰ পরিপতি। সেট্ঠি গহপতি তং ভিক্খুনিং খমাপেসি – ‘‘খমাহায্যে, মযাসি পাতিতা’’তি। ‘‘নাহং, গহপতি, তযা পাতিতা। অপিচ, অহমেৰ দুব্বলা’’তি। ‘‘কিস্স পন ত্ৰং, অয্যে, দুব্বলা’’তি? অথ খো সা ভিক্খুনী সেট্ঠিস্স গহপতিস্স এতমত্থং আরোচেসি। সেট্ঠি গহপতি তং ভিক্খুনিং ঘরং নেত্ৰা ভোজেত্ৰা উজ্ঝাযতি খিয্যতি ৰিপাচেতি – ‘‘কথঞ্হি নাম ভদন্তা ভিক্খুনিযা হত্থতো আমিসং পটিগ্গহেস্সন্তি! কিচ্ছলাভো মাতুগামো’’তি! অস্সোসুং খো ভিক্খূ তস্স সেট্ঠিস্স গহপতিস্স উজ্ঝাযন্তস্স খিয্যন্তস্স ৰিপাচেন্তস্স। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খু ভিক্খুনিযা হত্থতো আমিসং পটিগ্গহেস্সতী’’তি …পে॰… সচ্চং কির ত্ৰং, ভিক্খু, ভিক্খুনিযা হত্থতো আমিসং পটিগ্গহেসীতি ? ‘‘সচ্চং, ভগৰা’’তি। ‘‘ঞাতিকা তে, ভিক্খু, অঞ্ঞাতিকা’’তি? ‘‘অঞ্ঞাতিকা, ভগৰা’’তি। ‘‘অঞ্ঞাতকো, মোঘপুরিস, অঞ্ঞাতিকায ন জানাতি পতিরূপং ৰা অপ্পতিরূপং ৰা সন্তং ৰা অসন্তং ৰা। কথঞ্হি নাম ত্ৰং, মোঘপুরিস, অঞ্ঞাতিকায ভিক্খুনিযা হত্থতো আমিসং পটিগ্গহেস্সসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ৫৫৩. ‘‘যো পন ভিক্খু অঞ্ঞাতিকায ভিক্খুনিযা অন্তরঘরং পৰিট্ঠায হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা খাদেয্য ৰা ভুঞ্জেয্য ৰা, পটিদেসেতব্বং তেন ভিক্খুনা – ‘গারয্হং, আৰুসো, ধম্মং আপজ্জিং অসপ্পাযং পাটিদেসনীযং, তং পটিদেসেমী’’’তি। ৫৫৪. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি। অঞ্ঞাতিকা নাম মাতিতো ৰা । পিতিতো ৰা যাৰ সত্তমা পিতামহযুগা অসম্বদ্ধা। ভিক্খুনী নাম উভতোসঙ্ঘে উপসম্পন্না। অন্তরঘরং নাম রথিকা ব্যূহং সিঙ্ঘাটকং ঘরং। খাদনীযং নাম পঞ্চ ভোজনানি – যামকালিকং সত্তাহকালিকং যাৰজীৰিকং ঠপেত্ৰা অৰসেসং খাদনীযং নাম। ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং। ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি পাটিদেসনীযস্স। ৫৫৫. অঞ্ঞাতিকায অঞ্ঞাতিকসঞ্ঞী অন্তরঘরং পৰিট্ঠায হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা খাদতি ৰা ভুঞ্জতি ৰা, আপত্তি পাটিদেসনীযস্স। অঞ্ঞাতিকায ৰেমতিকো অন্তরঘরং পৰিট্ঠায হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা খাদতি ৰা ভুঞ্জতি ৰা, আপত্তি পাটিদেসনীযস্স। অঞ্ঞাতিকায ঞাতিকসঞ্ঞী অন্তরঘরং পৰিট্ঠায হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা খাদতি ৰা ভুঞ্জতি ৰা, আপত্তি পাটিদেসনীযস্স। যামকালিকং সত্তাহকালিকং যাৰজীৰিকং আহারত্থায পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি দুক্কটস্স। একতোউপসম্পন্নায হত্থতো খাদনীযং ৰা ভোজনীযং ৰা – ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি দুক্কটস্স। ঞাতিকায অঞ্ঞাতিকসঞ্ঞী, আপত্তি দুক্কটস্স। ঞাতিকায ৰেমতিকো, আপত্তি দুক্কটস্স। ঞাতিকায ঞাতিকসঞ্ঞী, অনাপত্তি। ৫৫৬. অনাপত্তি ঞাতিকায, দাপেতি ন দেতি, উপনিক্খিপিত্ৰা দেতি অন্তরারামে, ভিক্খুনুপস্সযে, তিত্থিযসেয্যায, পটিক্কমনে , গামতো নীহরিত্ৰা দেতি, যামকালিকং সত্তাহকালিকং যাৰজীৰিকং ‘‘সতি পচ্চযে পরিভুঞ্জা’’তি দেতি, সিক্খমানায, সামণেরিযা, উম্মত্তকস্স, আদিকম্মিকস্সাতি। পঠমপাটিদেসনীযসিক্খাপদং নিট্ঠিতং। ২. দুতিযপাটিদেসনীযসিক্খাপদং ৫৫৭. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে। তেন খো পন সমযেন ভিক্খূ কুলেসু নিমন্তিতা ভুঞ্জন্তি। ছব্বগ্গিযা ভিক্খুনিযো ছব্বগ্গিযানং ভিক্খূনং ৰোসাসন্তিযো ঠিতা হোন্তি – ‘‘ইধ সূপং দেথ, ইধ ওদনং দেথা’’তি। ছব্বগ্গিযা ভিক্খূ যাৰদত্থং ভুঞ্জন্তি। অঞ্ঞে ভিক্খূ ন চিত্তরূপং ভুঞ্জন্তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খুনিযো ৰোসাসন্তিযো ন নিৰারেস্সন্তী’’তি…পে॰… সচ্চং কির তুম্হে, ভিক্খৰে, ভিক্খুনিযো ৰোসাসন্তিযো ন নিৰারেথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা …পে॰… কথঞ্হি নাম তুম্হে, মোঘপুরিসা, ভিক্খুনিযো ৰোসাসন্তিযো ন নিৰারেস্সথ ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ৫৫৮. ‘‘ভিক্খূ পনেৰ কুলেসু নিমন্তিতা ভুঞ্জন্তি, তত্র চে সা [তত্র চে (স্যা॰)] ভিক্খুনী ৰোসাসমানরূপা ঠিতা হোতি – ‘ইধ সূপং দেথ, ইধ ওদনং দেথা’তি, তেহি ভিক্খূহি সা ভিক্খুনী অপসাদেতব্বা – ‘অপসক্ক তাৰ, ভগিনি, যাৰ ভিক্খূ ভুঞ্জন্তী’তি। একস্স চেপি [একস্সপি চে (সী॰ স্যা॰)] ভিক্খুনো ন পটিভাসেয্য তং ভিক্খুনিং অপসাদেতুং – ‘অপসক্ক তাৰ, ভগিনি, যাৰ ভিক্খূ ভুঞ্জন্তী’তি পটিদেসেতব্বং তেহি ভিক্খূহি – ‘গারয্হং, আৰুসো, ধম্মং আপজ্জিম্হা অসপ্পাযং পাটিদেসনীযং, তং পটিদেসেমা’’’তি। ৫৫৯. ভিক্খূ পনেৰ কুলেসু নিমন্তিতা ভুঞ্জন্তীতি কুলং নাম চত্তারি কুলানি – খত্তিযকুলং, ব্রাহ্মণকুলং, ৰেস্সকুলং, সুদ্দকুলং। নিমন্তিতা ভুঞ্জন্তীতি পঞ্চন্নং ভোজনানং অঞ্ঞতরেন ভোজনেন নিমন্তিতা ভুঞ্জন্তি। ভিক্খুনী নাম উভতোসঙ্ঘে উপসম্পন্না। ৰোসাসন্তী নাম যথামিত্ততা যথাসন্দিট্ঠতা যথাসম্ভত্ততা যথাসমানুপজ্ঝাযকতা যথাসমানাচরিযকতা – ‘‘ইধ সূপং দেথ, ইধ ওদনং দেথা’’তি। এসা ৰোসাসন্তী নাম। তেহি ভিক্খূহীতি ভুঞ্জমানেহি ভিক্খূহি। সা ভিক্খুনীতি যা সা ৰোসাসন্তী ভিক্খুনী। তেহি ভিক্খূহি সা ভিক্খুনী অপসাদেতব্বা – ‘‘অপসক্ক তাৰ, ভগিনি, যাৰ ভিক্খূ ভুঞ্জন্তী’’তি। একস্স চেপি [একস্সপি চে (সী॰ স্যা॰)] ভিক্খুনো অনপসাদিতো [অনপসাদিতে (সী॰ স্যা॰)] – ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি পাটিদেসনীযস্স। ৫৬০. উপসম্পন্নায উপসম্পন্নসঞ্ঞী ৰোসাসন্তিযা ন নিৰারেতি, আপত্তি পাটিদেসনীযস্স । উপসম্পন্নায ৰেমতিকো ৰোসাসন্তিযা ন নিৰারেতি, আপত্তি পাটিদেসনীযস্স। উপসম্পন্নায অনুপসম্পন্নসঞ্ঞী ৰোসাসন্তিযা ন নিৰারেতি, আপত্তি পাটিদেসনীযস্স। একতোউপসম্পন্নায ৰোসাসন্তিযা ন নিৰারেতি, আপত্তি দুক্কটস্স। অনুপসম্পন্নায উপসম্পন্নসঞ্ঞী, আপত্তি দুক্কটস্স। অনুপসম্পন্নায ৰেমতিকো, আপত্তি দুক্কটস্স। অনুপসম্পন্নায অনুপসম্পন্নসঞ্ঞী, অনাপত্তি। ৫৬১. অনাপত্তি অত্তনো ভত্তং দাপেতি ন দেতি, অঞ্ঞেসং ভত্তং দেতি ন দাপেতি, যং ন দিন্নং তং দাপেতি, যত্থ ন দিন্নং তত্থ দাপেতি, সব্বেসং সমকং দাপেতি, সিক্খমানা ৰোসাসতি, সামণেরী ৰোসাসতি, পঞ্চ ভোজনানি ঠপেত্ৰা সব্বত্থ, অনাপত্তি, উম্মত্তকস্স, আদিকম্মিকস্সাতি। দুতিযপাটিদেসনীযসিক্খাপদং নিট্ঠিতং। ৩. ততিযপাটিদেসনীযসিক্খাপদং ৫৬২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন সাৰত্থিযং অঞ্ঞতরং কুলং উভতোপসন্নং হোতি। সদ্ধায ৰড্ঢতি, ভোগেন হাযতি, যং তস্মিং কুলে উপ্পজ্জতি পুরেভত্তং খাদনীযং ৰা ভোজনীযং ৰা তং সব্বং ভিক্খূনং ৰিস্সজ্জেত্ৰা অপ্পেকদা অনসিতা অচ্ছন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা ন মত্তং জানিত্ৰা পটিগ্গহেস্সন্তি! ইমে ইমেসং দত্ৰা অপ্পেকদা অনসিতা অচ্ছন্তী’’তি!! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, যং কুলং সদ্ধায ৰড্ঢতি, ভোগেন হাযতি এৰরূপস্স কুলস্স ঞত্তিদুতিযেন কম্মেন সেক্খসম্মুতিং দাতুং। এৰঞ্চ পন, ভিক্খৰে, দাতব্বা। ব্যত্তেন ভিক্খুনা পটিবলেন সঙ্ঘো ঞাপেতব্বো – ৫৬৩. ‘‘সুণাতু মে, ভন্তে, সঙ্ঘো। ইত্থন্নামং কুলং সদ্ধায ৰড্ঢতি, ভোগেন হাযতি। যদি সঙ্ঘস্স পত্তকল্লং, সঙ্ঘো ইত্থন্নামস্স কুলস্স সেক্খসম্মুতিং দদেয্য। এসা ঞত্তি। ‘‘সুণাতু মে, ভন্তে, সঙ্ঘো। ইত্থন্নামং কুলং সদ্ধায ৰড্ঢতি, ভোগেন হাযতি। সঙ্ঘো ইত্থন্নামস্স কুলস্স সেক্খসম্মুতিং দেতি। যস্সাযস্মতো খমতি ইত্থন্নামস্স কুলস্স সেক্খসম্মুতিযা দানং, সো তুণ্হস্স; যস্স নক্খমতি, সো ভাসেয্য। ‘‘দিন্না সঙ্ঘেন ইত্থন্নামস্স কুলস্স সেক্খসম্মুতি। খমতি সঙ্ঘস্স, তস্মা তুণ্হী, এৰমেতং ধারযামী’’তি। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘যানি খো পন তানি সেক্খসম্মতানি কুলানি, যো পন ভিক্খু তথারূপেসু সেক্খসম্মতেসু কুলেসু খাদনীযং ৰা ভোজনীযং ৰা সহত্থা পটিগ্গহেত্ৰা খাদেয্য ৰা ভুঞ্জেয্য ৰা, পটিদেসেতব্বং তেন ভিক্খুনা – ‘গারয্হং, আৰুসো, ধম্মং আপজ্জিং অসপ্পাযং পাটিদেসনীযং তং পটিদেসেমী’’’তি। এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি। ৫৬৪. তেন খো পন সমযেন সাৰত্থিযং উস্সৰো হোতি। মনুস্সা ভিক্খূ নিমন্তেত্ৰা ভোজেন্তি। তম্পি খো কুলং ভিক্খূ নিমন্তেসি। ভিক্খূ কুক্কুচ্চাযন্তা নাধিৰাসেন্তি – ‘‘পটিক্খিত্তং ভগৰতা সেক্খসম্মতেসু কুলেসু খাদনীযং ৰা ভোজনীযং ৰা সহত্থা পটিগ্গহেত্ৰা খাদিতুং ভুঞ্জিতু’’ন্তি। তে উজ্ঝাযন্তি খিয্যন্তি ৰিপাচেন্তি – ‘‘কিং নু খো নাম অম্হাকং জীৰিতেন যং অয্যা অম্হাকং ন পটিগ্গণ্হন্তী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, নিমন্তিতেন সেক্খসম্মতেসু কুলেসু খাদনীযং ৰা ভোজনীযং ৰা সহত্থা পটিগ্গহেত্ৰা খাদিতুং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘যানি খো পন তানি সেক্খসম্মতানি কুলানি, যো পন ভিক্খু তথারূপেসু সেক্খসম্মতেসু কুলেসু পুব্বে অনিমন্তিতো খাদনীযং ৰা ভোজনীযং ৰা সহত্থা পটিগ্গহেত্ৰা খাদেয্য ৰা ভুঞ্জেয্য ৰা , পটিদেসেতব্বং তেন ভিক্খুনা – ‘গারয্হং, আৰুসো, ধম্মং আপজ্জিং অসপ্পাযং পাটিদেসনীযং, তং পটিদেসেমী’’’তি। এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি। ৫৬৫. তেন খো পন সমযেন অঞ্ঞতরো ভিক্খু তস্স কুলস্স কুলূপকো হোতি। অথ খো সো ভিক্খু পুব্বণ্হসমযং নিৰাসেত্ৰা পত্তচীৰরমাদায যেন তং কুলং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি। তেন খো পন সমযেন সো ভিক্খু গিলানো হোতি। অথ খো তে মনুস্সা তং ভিক্খুং এতদৰোচুং – ‘‘ভুঞ্জথ, ভন্তে’’তি। অথ খো সো ভিক্খু – ‘‘ভগৰতা পটিক্খিত্তং অনিমন্তিতেন সেক্খসম্মতেসু কুলেসু খাদনীযং ৰা ভোজনীযং ৰা সহত্থা পটিগ্গহেত্ৰা খাদিতুং ভুঞ্জিতু’’ন্তি কুক্কুচ্চাযন্তো ন পটিগ্গহেসি; নাসক্খি পিণ্ডায চরিতুং; ছিন্নভত্তো অহোসি। অথ খো সো ভিক্খু আরামং গন্ত্ৰা ভিক্খূনং এতমত্থং আরোচেসি। ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, গিলানেন ভিক্খুনা সেক্খসম্মতেসু কুলেসু খাদনীযং ৰা ভোজনীযং ৰা সহত্থা পটিগ্গহেত্ৰা খাদিতুং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ৫৬৬. ‘‘যানি খো পন তানি সেক্খসম্মতানি কুলানি, যো পন ভিক্খু তথারূপেসু সেক্খসম্মতেসু কুলেসু পুব্বে অনিমন্তিতো অগিলানো খাদনীযং ৰা ভোজনীযং ৰা সহত্থা পটিগ্গহেত্ৰা খাদেয্য ৰা ভুঞ্জেয্য ৰা, পটিদেসেতব্বং তেন ভিক্খুনা – ‘গারয্হং, আৰুসো, ধম্মং আপজ্জিং অসপ্পাযং পাটিদেসনীযং, তং পটিদেসেমী’’তি। ৫৬৭. যানি খো পন তানি সেক্খসম্মতানি কুলানীতি সেক্খসম্মতং নাম কুলং যং কুলং সদ্ধায ৰড্ঢতি, ভোগেন হাযতি। এৰরূপস্স কুলস্স ঞত্তিদুতিযেন কম্মেন সেক্খসম্মুতি দিন্না হোতি। যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি। তথারূপেসু সেক্খসম্মতেসু কুলেসূতি এৰরূপেসু সেক্খসম্মতেসু কুলেসু। অনিমন্তিতো নাম অজ্জতনায ৰা স্ৰাতনায ৰা অনিমন্তিতো, ঘরূপচারং ওক্কমন্তে নিমন্তেতি, এসো অনিমন্তিতো নাম। নিমন্তিতো নাম অজ্জতনায ৰা স্ৰাতনায ৰা নিমন্তিতো, ঘরূপচারং অনোক্কমন্তে নিমন্তেতি, এসো নিমন্তিতো নাম। অগিলানো নাম সক্কোতি পিণ্ডায চরিতুং। গিলানো নাম ন সক্কোতি পিণ্ডায চরিতুং। খাদনীযং নাম পঞ্চ ভোজনানি – যামকালিকং সত্তাহকালিকং যাৰজীৰিকং ঠপেত্ৰা অৰসেসং খাদনীযং নাম। ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং। অনিমন্তিতো অগিলানো ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স । অজ্ঝোহারে অজ্ঝোহারে আপত্তি পাটিদেসনীযস্স। ৫৬৮. সেক্খসম্মতে সেক্খসম্মতসঞ্ঞী অনিমন্তিতো অগিলানো খাদনীযং ৰা ভোজনীযংৰ সহত্থা পটিগ্গহেত্ৰা খাদতি ৰা ভুঞ্জতি ৰা, আপত্তি পাটিদেসনীযস্স। সেক্খসম্মতে ৰেমতিকো…পে॰… সেক্খসম্মতে অসেক্খসম্মতসঞ্ঞী অনিমন্তিতো অগিলানো খাদনীযং ৰা ভোজনীযং ৰা সহত্থা পটিগ্গহেত্ৰা খাদতি ৰা ভুঞ্জতি ৰা, আপত্তি পাটিদেসনীযস্স। যামকালিকং সত্তাহকালিকং যাৰজীৰিকং আহারত্থায পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি দুক্কটস্স। অসেক্খসম্মতে সেক্খসম্মতসঞ্ঞী, আপত্তি দুক্কটস্স। অসেক্খসম্মতে ৰেমতিকো, আপত্তি দুক্কটস্স। অসেক্খসম্মতে অসেক্খসম্মতসঞ্ঞী, অনাপত্তি। ৫৬৯. অনাপত্তি নিমন্তিতস্স, গিলানস্স, নিমন্তিতস্স ৰা গিলানস্স ৰা সেসকং ভুঞ্জতি , অঞ্ঞেসং ভিক্খা তত্থ পঞ্ঞত্তা হোতি, ঘরতো নীহরিত্ৰা দেন্তি, নিচ্চভত্তে, সলাকভত্তে, পক্খিকে, উপোসথিকে, পাটিপদিকে, যামকালিকং সত্তাহকালিকং যাৰজীৰিকং – ‘‘সতি পচ্চযে পরিভুঞ্জা’’তি দেতি, উম্মত্তকস্স, আদিকম্মিকস্সাতি। ততিযপাটিদেসনীযসিক্খাপদং নিট্ঠিতং। ৪. চতুত্থপাটিদেসনীযসিক্খাপদং ৫৭০. তেন সমযেন বুদ্ধো ভগৰা সক্কেসু ৰিহরতি কপিলৰত্থুস্মিং নিগ্রোধারামে। তেন খো পন সমযেন সাকিযদাসকা অৰরুদ্ধা হোন্তি। সাকিযানিযো ইচ্ছন্তি আরঞ্ঞকেসু সেনাসনেসু ভত্তং কাতুং। অস্সোসুং খো সাকিযদাসকা – ‘‘সাকিযানিযো কির আরঞ্ঞকেসু সেনাসনেসু ভত্তং কত্তুকামা’’তি। তে মগ্গে পরিযুট্ঠিংসু। সাকিযানিযো পণীতং খাদনীযং ভোজনীযং আদায আরঞ্ঞকং সেনাসনং অগমংসু। সাকিযদাসকা নিক্খমিত্ৰা সাকিযানিযো অচ্ছিন্দিংসু চ দূসেসুঞ্চ। সাকিযা নিক্খমিত্ৰা তে চোরে সভণ্ডে [সহ ভণ্ডেন (ক॰)] গহেত্ৰা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভদন্তা আরামে চোরে পটিৰসন্তে নারোচেস্সন্তী’’তি! অস্সোসুং খো ভিক্খূ সাকিযানং উজ্ঝাযন্তানং খিয্যন্তানং ৰিপাচেন্তানং। অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, ভিক্খূনং সিক্খাপদং পঞ্ঞপেস্সামি দস অত্থৰসে পটিচ্চ – সঙ্ঘসুট্ঠুতায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ‘‘যানি খো পন তানি আরঞ্ঞকানি সেনাসনানি সাসঙ্কসম্মতানি সপ্পটিভযানি, যো পন ভিক্খু তথারূপেসু সেনাসনেসু [সেনাসনেসু ৰিহরন্তো (সী॰ স্যা॰)] পুব্বে অপ্পটিসংৰিদিতং খাদনীযং ৰা ভোজনীযং ৰা অজ্ঝারামে সহত্থা পটিগ্গহেত্ৰা খাদেয্য ৰা ভুঞ্জেয্য ৰা, পটিদেসেতব্বং তেন ভিক্খুনা – ‘গারয্হং, আৰুসো, ধম্মং আপজ্জিং অসপ্পাযং পাটিদেসনীযং তং পটিদেসেমী’’’তি। এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি। ৫৭১. তেন খো পন সমযেন অঞ্ঞতরো ভিক্খু আরঞ্ঞকেসু সেনাসনেসু গিলানো হোতি । মনুস্সা খাদনীযং ৰা ভোজনীযং ৰা আদায আরঞ্ঞকং সেনাসনং অগমংসু। অথ খো তে মনুস্সা তং ভিক্খুং এতদৰোচুং – ‘‘ভুঞ্জথ, ভন্তে’’তি। অথ খো সো ভিক্খু – ‘‘ভগৰতা পটিক্খিত্তং আরঞ্ঞকেসু সেনাসনেসু খাদনীযং ৰা ভোজনীযং ৰা সহত্থা পটিগ্গহেত্ৰা খাদিতুং ভুঞ্জিতু’’ন্তি কুক্কুচ্চাযন্তো ন পটিগ্গহেসি, নাসক্খি পিণ্ডায চরিতুং [পৰিসিতুং (ক॰)], ছিন্নভত্তো অহোসি। অথ খো সো ভিক্খু ভিক্খূনং এতমত্থং আরোচেসি। ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, গিলানেন ভিক্খুনা আরঞ্ঞকেসু সেনাসনেসু পুব্বে অপ্পটিসংৰিদিতং খাদনীযং ৰা ভোজনীযং ৰা সহত্থা পটিগ্গহেত্ৰা খাদিতুং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ – ৫৭২. ‘‘যানি খো পন তানি আরঞ্ঞকানি সেনাসনানি সাসঙ্কসম্মতানি সপ্পটিভযানি, যো পন ভিক্খু তথারূপেসু সেনাসনেসু পুব্বে অপ্পটিসংৰিদিতং খাদনীযং ৰা ভোজনীযং ৰা অজ্ঝারামে সহত্থা পটিগ্গহেত্ৰা অগিলানো খাদেয্য ৰা ভুঞ্জেয্য ৰা, পটিদেসেতব্বং তেন ভিক্খুনা – ‘গারয্হং, আৰুসো, ধম্মং আপজ্জিং অসপ্পাযং পাটিদেসনীযং, তং পটিদেসেমী’’’তি। ৫৭৩. যানি খো পন তানি আরঞ্ঞকানি সেনাসনানীতি আরঞ্ঞকং নাম সেনাসনং পঞ্চধনুসতিকং পচ্ছিমং। সাসঙ্কং নাম আরামে আরামূপচারে চোরানং নিৰিট্ঠোকাসো দিস্সতি, ভুত্তোকাসো দিস্সতি, ঠিতোকাসো দিস্সতি, নিসিন্নোকাসো দিস্সতি, নিপন্নোকাসো দিস্সতি। সপ্পটিভযং নাম আরামে আরামূপচারে চোরেহি মনুস্সা হতা দিস্সন্তি, ৰিলুত্তা দিস্সন্তি, আকোটিতা দিস্সন্তি। যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি। তথারূপেসু সেনাসনেসূতি এৰরূপেসু সেনাসনেসু। অপ্পটিসংৰিদিতং নাম পঞ্চন্নং পটিসংৰিদিতং, এতং অপ্পটিসংৰিদিতং নাম। আরামং আরামূপচারং ঠপেত্ৰা পটিসংৰিদিতং, এতং [এতম্পি (সী॰)] অপ্পটিসংৰিদিতং নাম। পটিসংৰিদিতং নাম যো কোচি ইত্থী ৰা পুরিসো ৰা আরামং আরামূপচারং আগন্ত্ৰা আরোচেতি – ‘‘ইত্থন্নামস্স, ভন্তে, খাদনীযং ৰা ভোজনীযং ৰা আহরিস্সন্তী’’তি। সচে সাসঙ্কং হোতি, সাসঙ্কন্তি আচিক্খিতব্বং; সচে সপ্পটিভযং হোতি, সপ্পটিভযন্তি আচিক্খিতব্বং; সচে – ‘‘হোতু, ভন্তে, আহরিযিস্সতী’’তি ভণতি, চোরা ৰত্তব্বা – ‘‘মনুস্সা ইধূপচরন্তি অপসক্কথা’’তি। যাগুযা পটিসংৰিদিতে তস্সা পরিৰারো আহরিয্যতি, এতং পটিসংৰিদিতং নাম। ভত্তেন পটিসংৰিদিতে তস্স পরিৰারো আহরিয্যতি, এতং পটিসংৰিদিতং নাম । খাদনীযেন পটিসংৰিদিতে তস্স পরিৰারো আহরিয্যতি, এতং পটিসংৰিদিতং নাম। কুলেন পটিসংৰিদিতে যো তস্মিং কুলে মনুস্সো খাদনীযং ৰা ভোজনীযং ৰা আহরতি, এতং পটিসংৰিদিতং নাম। গামেন পটিসংৰিদিতে যো তস্মিং গামে মনুস্সো খাদনীযং ৰা ভোজনীযং ৰা আহরতি, এতং পটিসংৰিদিতং নাম। পূগেন পটিসংৰিদিতে যো তস্মিং পূগে মনুস্সো খাদনীযং ৰা ভোজনীযং ৰা আহরতি, এতং পটিসংৰিদিতং নাম। খাদনীযং নাম পঞ্চ ভোজনানি – যামকালিকং সত্তাহকালিকং যাৰজীৰিকং ঠপেত্ৰা অৰসেসং খাদনীযং নাম। ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং। অজ্ঝারামো নাম পরিক্খিত্তস্স আরামস্স অন্তোআরামো। অপরিক্খিত্তস্স উপচারো। অগিলানো নাম সক্কোতি পিণ্ডায চরিতুং [গন্তুং (ক॰)]। গিলানো নাম ন সক্কোতি পিণ্ডায চরিতুং [গন্তুং (ক॰)]। অপ্পটিসংৰিদিতং অগিলানো ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি পাটিদেসনীযস্স। ৫৭৪. অপ্পটিসংৰিদিতে অপ্পটিসংৰিদিতসঞ্ঞী খাদনীযং ৰা ভোজনীযং ৰা অজ্ঝারামে সহত্থা পটিগ্গহেত্ৰা অগিলানো খাদতি ৰা ভুঞ্জতি ৰা, আপত্তি পাটিদেসনীযস্স। অপ্পটিসংৰিদিতে ৰেমতিকো খাদনীযং ৰা ভোজনীযং ৰা অজ্ঝারামে সহত্থা পটিগ্গহেত্ৰা অগিলানো খাদতি ৰা ভুঞ্জতি ৰা, আপত্তি পাটিদেসনীযস্স। অপ্পটিসংৰিদিতে পটিসংৰিদিতসঞ্ঞী খাদনীযং ৰা ভোজনীযং ৰা অজ্ঝারামে সহত্থা পটিগ্গহেত্ৰা অগিলানো খাদতি ৰা ভুঞ্জতি ৰা, আপত্তি পাটিদেসনীযস্স। যামকালিকং সত্তাহকালিকং যাৰজীৰিকং আহারত্থায পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি দুক্কটস্স। পটিসংৰিদিতে অপ্পটিসংৰিদিতসঞ্ঞী, আপত্তি দুক্কটস্স। পটিসংৰিদিতে ৰেমতিকো, আপত্তি দুক্কটস্স। পটিসংৰিদিতে পটিসংৰিদিতসঞ্ঞী, অনাপত্তি। ৫৭৫. অনাপত্তি পটিসংৰিদিতে, গিলানস্স, পটিসংৰিদিতে ৰা গিলানস্স ৰা সেসকং ভুঞ্জতি, বহারামে পটিগ্গহেত্ৰা অন্তোআরামে ভুঞ্জতি, তত্থ জাতকং মূলং ৰা তচং ৰা পত্তং ৰা পুপ্ফং ৰা ফলং ৰা ভুঞ্জতি, যামকালিকং সত্তাহকালিকং যাৰজীৰিকং সতি পচ্চযে পরিভুঞ্জতি, উম্মত্তকস্স, আদিকম্মিকস্সাতি। চতুত্থপাটিদেসনীযসিক্খাপদং নিট্ঠিতং। উদ্দিট্ঠা খো, আযস্মন্তো, চত্তারো পাটিদেসনীযা ধম্মা। তত্থাযস্মন্তে পুচ্ছামি – ‘‘কচ্চিত্থ পরিসুদ্ধা’’? দুতিযম্পি পুচ্ছামি – ‘‘কচ্চিত্থ পরিসুদ্ধা’’? ততিযম্পি পুচ্ছামি – ‘‘কচ্চিত্থ পরিসুদ্ধা’’? পরিসুদ্ধেত্থাযস্মন্তো, তস্মা তুণ্হী, এৰমেতং ধারযামীতি। পাটিদেসনীযকণ্ডং নিট্ঠিতং। |
Copyright © 2011 Bangladesh Buddhist. All rights reserved. |