১. পারাজিককণ্ডং (ভিক্খুনীৰিভঙ্গো)
১. পঠমপারাজিকং ৬৫৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন সাল়্হো মিগারনত্তা ভিক্খুনিসঙ্ঘস্স ৰিহারং কত্তুকামো হোতি। অথ খো সাল়্হো মিগারনত্তা ভিক্খুনিযো উপসঙ্কমিত্ৰা এতদৰোচ – ‘‘ইচ্ছামহং, অয্যে, ভিক্খুনিসঙ্ঘস্স ৰিহারং কাতুং। দেথ মে নৰকম্মিকং ভিক্খুনি’’ন্তি। তেন খো পন সমযেন চতস্সো ভগিনিযো ভিক্খুনীসু পব্বজিতা হোন্তি – নন্দা, নন্দৰতী, সুন্দরীনন্দা, থুল্লনন্দাতি। তাসু সুন্দরীনন্দা ভিক্খুনী তরুণপব্বজিতা অভিরূপা হোতি দস্সনীযা পাসাদিকা পণ্ডিতা ব্যত্তা মেধাৰিনী দক্খা অনলসা, তত্রুপাযায ৰীমংসায সমন্নাগতা, অলং কাতুং অলং সংৰিধাতুং। অথ খো ভিক্খুনিসঙ্ঘো সুন্দরীনন্দং ভিক্খুনিং সম্মন্নিত্ৰা সাল়্হস্স মিগারনত্তুনো নৰকম্মিকং অদাসি। তেন খো পন সমযেন সুন্দরীনন্দা ভিক্খুনী সাল়্হস্স মিগারনত্তুনো নিৰেসনং অভিক্খণং গচ্ছতি – ‘‘ৰাসিং দেথ, পরসুং [ফরসুং (স্যা॰ ক॰)] দেথ, কুঠারিং [কুধারিং (ক॰)] দেথ, কুদ্দালং দেথ, নিখাদনং দেথা’’তি। সাল়্হোপি মিগারনত্তা ভিক্খুনুপস্সযং অভিক্খণং গচ্ছতি কতাকতং জানিতুং। তে অভিণ্হদস্সনেন পটিবদ্ধচিত্তা অহেসুং। অথ খো সাল়্হো মিগারনত্তা সুন্দরীনন্দং ভিক্খুনিং দূসেতুং ওকাসং অলভমানো এতদেৰত্থায ভিক্খুনিসঙ্ঘস্স ভত্তং অকাসি। অথ খো সাল়্হো মিগারনত্তা ভত্তগ্গে আসনং পঞ্ঞপেন্তো – ‘‘এত্তকা ভিক্খুনিযো অয্যায সুন্দরীনন্দায ৰুড্ঢতরা’’তি একমন্তং আসনং পঞ্ঞপেসি ‘‘এত্তকা নৰকতরা’’তি – একমন্তং আসনং পঞ্ঞপেসি। পটিচ্ছন্নে ওকাসে নিকূটে সুন্দরীনন্দায ভিক্খুনিযা আসনং পঞ্ঞপেসি, যথা থেরা ভিক্খুনিযো জানেয্যুং – ‘‘নৰকানং ভিক্খুনীনং সন্তিকে নিসিন্না’’তি; নৰকাপি ভিক্খুনিযো জানেয্যুং – ‘‘থেরানং ভিক্খুনীনং সন্তিকে নিসিন্না’’তি। অথ খো সাল়্হো মিগারনত্তা ভিক্খুনিসঙ্ঘস্স কালং আরোচাপেসি – ‘‘কালো, অয্যে, নিট্ঠিতং ভত্ত’’ন্তি। সুন্দরীনন্দা ভিক্খুনী সল্লক্খেত্ৰা – ‘‘ন বহুকতো সাল়্হো মিগারনত্তা ভিক্খুনিসঙ্ঘস্স ভত্তং অকাসি; মং সো দূসেতুকামো। সচাহং গমিস্সামি ৰিস্সরো মে ভৰিস্সতী’’তি, অন্তেৰাসিনিং ভিক্খুনিং আণাপেসি – ‘‘গচ্ছ মে পিণ্ডপাতং নীহর। যো চে মং পুচ্ছতি, ‘গিলানা’তি পটিৰেদেহী’’তি। ‘‘এৰং, অয্যে’’তি খো সা ভিক্খুনী সুন্দরীনন্দায ভিক্খুনিযা পচ্চস্সোসি। তেন খো পন সমযেন সাল়্হো মিগারনত্তা বহিদ্ৰারকোট্ঠকে ঠিতো হোতি সুন্দরীনন্দং ভিক্খুনিং পটিপুচ্ছন্তো – ‘‘কহং, অয্যে, অয্যা সুন্দরীনন্দা? কহং, অয্যে, অয্যা সুন্দরীনন্দা’’তি? এৰং ৰুত্তে সুন্দরীনন্দায ভিক্খুনিযা অন্তেৰাসিনী ভিক্খুনী সাল়্হং মিগারনত্তারং এতদৰোচ – ‘‘গিলানাৰুসো; পিণ্ডপাতং নীহরিস্সামী’’তি। অথ খো সাল়্হো মিগারনত্তা – ‘‘যম্পাহং অত্থায [যংপাহং (স্যা॰)] ভিক্খুনিসঙ্ঘস্স ভত্তং অকাসিং অয্যায সুন্দরীনন্দায কারণা’’তি মনুস্সে আণাপেত্ৰা – ‘‘ভিক্খুনিসঙ্ঘং ভত্তেন পরিৰিসথা’’তি ৰত্ৰা যেন ভিক্খুনুপস্সযো তেনুপসঙ্কমি। তেন খো পন সমযেন সুন্দরীনন্দা ভিক্খুনী বহারামকোট্ঠকে ঠিতা হোতি সাল়্হং মিগারনত্তারং পতিমানেন্তী। অদ্দসা খো সুন্দরীনন্দা ভিক্খুনী সাল়্হং মিগারনত্তারং দূরতোৰ আগচ্ছন্তং। দিস্ৰান উপস্সযং পৰিসিত্ৰা সসীসং পারুপিত্ৰা মঞ্চকে নিপজ্জি। অথ খো সাল়্হো মিগারনত্তা যেন সুন্দরীনন্দা ভিক্খুনী তেনুপসঙ্কমি; উপসঙ্কমিত্ৰা সুন্দরীনন্দং ভিক্খুনিং এতদৰোচ – ‘‘কিং তে, অয্যে, অফাসু, কিস্স নিপন্নাসী’’তি? ‘‘এৰঞ্হেতং, আৰুসো, হোতি যা অনিচ্ছন্তং ইচ্ছতী’’তি। ‘‘ক্যাহং তং, অয্যে , ন ইচ্ছিস্সামি? অপি চাহং ওকাসং ন লভামি তং দূসেতু’’ন্তি। অৰস্সুতো অৰস্সুতায সুন্দরীনন্দায ভিক্খুনিযা কাযসংসগ্গং সমাপজ্জি। তেন খো পন সমযেন অঞ্ঞতরা ভিক্খুনী জরাদুব্বলা চরণগিলানা সুন্দরীনন্দায ভিক্খুনিযা অৰিদূরে নিপন্না হোতি। অদ্দসা খো সা ভিক্খুনী সাল়্হং মিগারনত্তারং অৰস্সুতং অৰস্সুতায সুন্দরীনন্দায ভিক্খুনিযা কাযসংসগ্গংসমাপজ্জন্তং। দিস্ৰান উজ্ঝাযতি খিয্যতি ৰিপাচেতি – ‘‘কথঞ্হি নাম অয্যা সুন্দরীনন্দা অৰস্সুতা অৰস্সুতস্স পুরিসপুগ্গলস্স কাযসংসগ্গং সাদিযিস্সতী’’তি ! অথ খো সা ভিক্খুনী ভিক্খুনীনং এতমত্থং আরোচেসি। যা তা ভিক্খুনিযো অপ্পিচ্ছা সন্তুট্ঠা লজ্জিনিযো কুক্কুচ্চিকা সিক্খাকামা তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা সুন্দরীনন্দা অৰস্সুতা অৰস্সুতস্স পুরিসপুগ্গলস্স কাযসংসগ্গং সাদিযিস্সতী’’তি! অথ খো তা ভিক্খুনিযো ভিক্খূনং এতমত্থং আরোচেসুং। যে তে ভিক্খূ অপ্পিচ্ছা সন্তুট্ঠা লজ্জিনো কুক্কুচ্চকা সিক্খাকামা তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সুন্দরীনন্দা ভিক্খুনী অৰস্সুতা অৰস্সুতস্স পুরিসপুগ্গলস্স কাযসংসগ্গং সাদিযিস্সতী’’তি! অথ খো তে ভিক্খূ সুন্দরীনন্দং ভিক্খুনিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ভিক্খূ পটিপুচ্ছি – ‘‘সচ্চং কির, ভিক্খৰে, সুন্দরীনন্দা ভিক্খুনী অৰস্সুতা অৰস্সুতস্স পুরিসপুগ্গলস্স কাযসংসগ্গং সাদিযতী’’তি [সাদিযীতি (ক॰)]? ‘‘সচ্চং, ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং, ভিক্খৰে, সুন্দরীনন্দায ভিক্খুনিযা অননুলোমিকং অপ্পতিরূপং অস্সামণকং অকপ্পিযং অকরণীযং। কথঞ্হি নাম, ভিক্খৰে, সুন্দরীনন্দা ভিক্খুনী অৰস্সুতা অৰস্সুতস্স পুরিসপুগ্গলস্স কাযসংসগ্গং সাদিযিস্সতি! নেতং, ভিক্খৰে, অপ্পসন্নানং ৰা পসাদায পসন্নানং ৰা ভিয্যোভাৰায। অথ খ্ৰেতং, ভিক্খৰে , অপ্পসন্নানঞ্চেৰ অপ্পসাদায পসন্নানঞ্চ একচ্চানং অঞ্ঞথত্তাযা’’তি। অথ খো ভগৰা সুন্দরীনন্দং ভিক্খুনিং অনেকপরিযাযেন ৰিগরহিত্ৰা দুব্ভরতায দুপ্পোসতায মহিচ্ছতায অসন্তুট্ঠিতায [অসন্তুট্ঠতায (স্যা॰), অসন্তুট্ঠিযা (ক॰)] সঙ্গণিকায কোসজ্জস্স অৰণ্ণং ভাসিত্ৰা, অনেকপরিযাযেন সুভরতায সুপোসতায অপ্পিচ্ছস্স সন্তুট্ঠস্স [সন্তুট্ঠিযা (ক॰)] সল্লেখস্স ধুতস্স পাসাদিকস্স অপচযস্স ৰীরিযারম্ভস্স ৰণ্ণং ভাসিত্ৰা, ভিক্খূনং তদনুচ্ছৰিকং তদনুলোমিকং ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, ভিক্খুনীনং সিক্খাপদং পঞ্ঞপেস্সামি দস অত্থৰসে পটিচ্চ – সঙ্ঘসুট্ঠুতায, সঙ্ঘফাসুতায, দুম্মঙ্কূনং ভিক্খুনীনং নিগ্গহায , পেসলানং ভিক্খুনীনং ফাসুৰিহারায, দিট্ঠধম্মিকানং আসৰানং সংৰরায, সম্পরাযিকানং আসৰানং পটিঘাতায, অপ্পসন্নানং পসাদায, পসন্নানং ভিয্যোভাৰায, সদ্ধম্মট্ঠিতিযা ৰিনযানুগ্গহায। এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৬৫৭. ‘‘যা পন ভিক্খুনী অৰস্সুতা অৰস্সুতস্স পুরিসপুগ্গলস্স অধক্খকং উব্ভজাণুমণ্ডলং আমসনং ৰা পরামসনং ৰা গহণং ৰা ছুপনং ৰা পটিপীল়নং ৰা সাদিযেয্য, অযম্পি পারাজিকা হোতি অসংৰাসা উব্ভজাণুমণ্ডলিকা’’তি। ৬৫৮. যা পনাতি যা যাদিসা যথাযুত্তা যথাজচ্চা যথানামা যথাগোত্তা যথাসীলা যথাৰিহারিনী যথাগোচরা থেরা ৰা নৰা ৰা মজ্ঝিমা ৰা, এসা ৰুচ্চতি যা পনাতি। ভিক্খুনীতি ভিক্খিকাতি ভিক্খুনী; ভিক্খাচরিযং অজ্ঝুপগতাতি ভিক্খুনী; ভিন্নপটধরাতি ভিক্খুনী ; সমঞ্ঞায ভিক্খুনী; পটিঞ্ঞায ভিক্খুনী; এহি ভিক্খুনীতি ভিক্খুনী; তীহি সরণগমনেহি উপসম্পন্নাতি ভিক্খুনী; ভদ্রা ভিক্খুনী; সারা ভিক্খুনী; সেখা ভিক্খুনী; অসেখা ভিক্খুনী; সমগ্গেন উভতোসঙ্ঘেন ঞত্তিচতুত্থেন কম্মেন অকুপ্পেন ঠানারহেন উপসম্পন্নাতি ভিক্খুনী। তত্র যাযং ভিক্খুনী সমগ্গেন উভতোসঙ্ঘেন ঞত্তিচতুত্থেন কম্মেন অকুপ্পেন ঠানারহেন উপসম্পন্না, অযং ইমস্মিং অত্থে অধিপ্পেতা ভিক্খুনীতি। অৰস্সুতা নাম সারত্তা অপেক্খৰতী পটিবদ্ধচিত্তা। অৰস্সুতো নাম সারত্তো অপেক্খৰা পটিবদ্ধচিত্তো। পুরিসপুগ্গলো নাম মনুস্সপুরিসো ন যক্খো ন পেতো ন তিরচ্ছানগতো ৰিঞ্ঞূ পটিবলো কাযসংসগ্গং সমাপজ্জিতুং। অধক্খকন্তি হেট্ঠক্খকং। উব্ভজাণুমণ্ডলন্তি উপরিজাণুমণ্ডলং। আমসনং নাম আমট্ঠমত্তং। পরামসনং নাম ইতোচিতো চ সঞ্চোপনং। গহণং নাম গহিতমত্তং। ছুপনং নাম ফুট্ঠমত্তং। পটিপীল়নং ৰা সাদিযেয্যাতি অঙ্গং গহেত্ৰা নিপ্পীল়নং সাদিযতি। অযম্পীতি পুরিমাযো উপাদায ৰুচ্চতি। পারাজিকা হোতীতি সেয্যথাপি নাম পুরিসো সীসচ্ছিন্নো অভব্বো তেন সরীরবন্ধনেন জীৰিতুং, এৰমেৰ ভিক্খুনী অৰস্সুতা অৰস্সুতস্স পুরিসপুগ্গলস্স অধক্খকং উব্ভজাণুমণ্ডলং আমসনং ৰা পরামসনং ৰা গহণং ৰা ছুপনং ৰা পটিপীল়নং ৰা সাদিযন্তী অস্সমণী হোতি অসক্যধীতা। তেন ৰুচ্চতি পারাজিকা হোতীতি। অসংৰাসাতি সংৰাসো নাম এককম্মং একুদ্দেসো সমসিক্খতা, এসো সংৰাসো নাম। সো তায সদ্ধিং নত্থি, তেন ৰুচ্চতি অসংৰাসাতি। ৬৫৯. উভতোঅৰস্সুতে অধক্খকং উব্ভজাণুমণ্ডলং কাযেন কাযং আমসতি, আপত্তি পারাজিকস্স। কাযেন কাযপটিবদ্ধং আমসতি, আপত্তি থুল্লচ্চযস্স। কাযপটিবদ্ধেন কাযং আমসতি, আপত্তি থুল্লচ্চযস্স। কাযপটিবদ্ধেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন কাযং আমসতি , আপত্তি দুক্কটস্স। নিস্সগ্গিযেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন নিস্সগ্গিযং আমসতি, আপত্তি দুক্কটস্স। উব্ভক্খকং অধোজাণুমণ্ডলং কাযেন কাযং আমসতি, আপত্তি থুল্লচ্চযস্স। কাযেন কাযপটিবদ্ধং আমসতি, আপত্তি দুক্কটস্স। কাযপটিবদ্ধেন কাযং আমসতি, আপত্তি দুক্কটস্স। কাযপটিবদ্ধেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন কাযং আমসতি, আপত্তি দুক্কটস্স। নিস্সগ্গিযেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন নিস্সগ্গিযং আমসতি, আপত্তি দুক্কটস্স। ৬৬০. একতোঅৰস্সুতে অধক্খকং উব্ভজাণুমণ্ডলং কাযেন কাযং আমসতি , আপত্তি থুল্লচ্চযস্স। কাযেন কাযপটিবদ্ধং আমসতি , আপত্তি দুক্কটস্স। কাযপটিবদ্ধেন কাযং আমসতি, আপত্তি দুক্কটস্স। কাযপটিবদ্ধেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন কাযং আমসতি, আপত্তি দুক্কটস্স। নিস্সগ্গিযেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন নিস্সগ্গিযং আমসতি, আপত্তি দুক্কটস্স। উব্ভক্খকং অধোজাণুমণ্ডলং কাযেন কাযং আমসতি, আপত্তি দুক্কটস্স। কাযেন কাযপটিবদ্ধং আমসতি, আপত্তি দুক্কটস্স। কাযপটিবদ্ধেন কাযং আমসতি, আপত্তি দুক্কটস্স। কাযপটিবদ্ধেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন কাযং আমসতি, আপত্তি দুক্কটস্স। নিস্সগ্গিযেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন নিস্সগ্গিযং আমসতি, আপত্তি দুক্কটস্স। ৬৬১. উভতোঅৰস্সুতে যক্খস্স ৰা পেতস্স ৰা পণ্ডকস্স ৰা তিরচ্ছানগতমনুস্সৰিগ্গহস্স ৰা অধক্খকং উব্ভজাণুমণ্ডলং কাযেন কাযং আমসতি, আপত্তি থুল্লচ্চযস্স। কাযেন কাযপটিবদ্ধং আমসতি, আপত্তি দুক্কটস্স। কাযপটিবদ্ধেন কাযং আমসতি, আপত্তি দুক্কটস্স। কাযপটিবদ্ধেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন কাযং আমসতি, আপত্তি দুক্কটস্স। নিস্সগ্গিযেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন নিস্সগ্গিযং আমসতি, আপত্তি দুক্কটস্স। উব্ভক্খকং অধোজাণুমণ্ডলং কাযেন কাযং আমসতি, আপত্তি দুক্কটস্স। কাযেন কাযপটিবদ্ধং আমসতি, আপত্তি দুক্কটস্স। কাযপটিবদ্ধেন কাযং আমসতি, আপত্তি দুক্কটস্স। কাযপটিবদ্ধেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন কাযং আমসতি, আপত্তি দুক্কটস্স। নিস্সগ্গিযেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন নিস্সগ্গিযং আমসতি, আপত্তি দুক্কটস্স। ৬৬২. একতোঅৰস্সুতে অধক্খকং উব্ভজাণুমণ্ডলং কাযেন কাযং আমসতি, আপত্তি দুক্কটস্স। কাযেন কাযপটিবদ্ধং আমসতি, আপত্তি দুক্কটস্স। কাযপটিবদ্ধেন কাযং আমসতি, আপত্তি দুক্কটস্স। কাযপটিবদ্ধেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন কাযং আমসতি, আপত্তি দুক্কটস্স। নিস্সগ্গিযেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন নিস্সগ্গিযং আমসতি, আপত্তি দুক্কটস্স। উব্ভক্খকং অধোজাণুমণ্ডলং কাযেন কাযং আমসতি, আপত্তি দুক্কটস্স। কাযেন কাযপটিবদ্ধং আমসতি, আপত্তি দুক্কটস্স। কাযপটিবদ্ধেন কাযং আমসতি, আপত্তি দুক্কটস্স। কাযপটিবদ্ধেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন কাযং আমসতি, আপত্তি দুক্কটস্স। নিস্সগ্গিযেন কাযপটিবদ্ধং আমসতি, আপত্তি দুক্কটস্স। নিস্সগ্গিযেন নিস্সগ্গিযং আমসতি, আপত্তি দুক্কটস্স। ৬৬৩. অনাপত্তি অসঞ্চিচ্চ, অস্সতিযা, অজানন্তিযা, অসাদিযন্তিযা, উম্মত্তিকায, খিত্তচিত্তায, ৰেদনাট্টায, আদিকম্মিকাযাতি। পঠমপারাজিকং সমত্তং [ভিক্খুনিৰিভঙ্গে সিক্খাপদগণনা ভিক্খূহি§অসাধারণৰসেন পকাসিতাতি ৰেদিতব্বা]। ২. দুতিযপারাজিকং ৬৬৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন সুন্দরীনন্দা ভিক্খুনী সাল়্হেন মিগারনত্তুনা গব্ভিনী হোতি । যাৰ গব্ভো তরুণো অহোসি তাৰ ছাদেসি। পরিপক্কে গব্ভে ৰিব্ভমিত্ৰা ৰিজাযি। ভিক্খুনিযো থুল্লনন্দং ভিক্খুনিং এতদৰোচুং – ‘‘সুন্দরীনন্দা খো, অয্যে, অচিরৰিব্ভন্তা ৰিজাতা। কচ্চি নো সা ভিক্খুনীযেৰ সমানা গব্ভিনী’’তি? ‘‘এৰং, অয্যে’’তি। ‘‘কিস্স পন ত্ৰং, অয্যে, জানং পারাজিকং ধম্মং অজ্ঝাপন্নং ভিক্খুনিং নেৰত্তনা পটিচোদেসি ন গণস্স আরোচেসী’’তি? ‘‘যো এতিস্সা অৰণ্ণো ময্হেসো অৰণ্ণো, যা এতিস্সা অকিত্তি ময্হেসা অকিত্তি, যো এতিস্সা অযসো ময্হেসো অযসো, যো এতিস্সা অলাভো ময্হেসোঅলাভো। ক্যাহং, অয্যে, অত্তনো অৰণ্ণং অত্তনো অকিত্তিং অত্তনো অযসং অত্তনো অলাভং পরেসং আরোচেস্সামী’’তি? যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা জানং পারাজিকং ধম্মং অজ্ঝাপন্নং ভিক্খুনিং নেৰত্তনা পটিচোদেস্সতি ন গণস্স আরোচেস্সতী’’তি! অথ খো তা ভিক্খুনিযো ভিক্খূনং এতমত্থং আরোচেসুং। ভিক্খূ [যে তে ভিক্খূ…পে॰… (?)] ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ভিক্খূ পটিপুচ্ছি – ‘‘সচ্চং কির, ভিক্খৰে, থুল্লনন্দা ভিক্খুনী জানং পারাজিকং ধম্মং অজ্ঝাপন্নং ভিক্খুনিং নেৰত্তনা পটিচোদেতি [পটিচোদেসি… আরোচেসীতি (ক॰)]ন গণস্স আরোচেতী’’তি [পটিচোদেসি… আরোচেসীতি (ক॰)]? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী জানং পারাজিকং ধম্মং অজ্ঝাপন্নং ভিক্খুনিং নেৰত্তনা পটিচোদেস্সতি ন গণস্স আরোচেস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৬৬৫. ‘‘যা পন ভিক্খুনী জানং পারাজিকং ধম্মং অজ্ঝাপন্নং ভিক্খুনিং নেৰত্তনা পটিচোদেয্য ন গণস্স আরোচেয্য, যদা চ সা ঠিতা ৰা অস্স চুতা ৰা নাসিতা ৰা অৰস্সটা ৰা, সা পচ্ছা এৰং ৰদেয্য – ‘পুব্বেৰাহং, অয্যে, অঞ্ঞাসিং এতং ভিক্খুনিং এৰরূপা চ এৰরূপা চ সা ভগিনীতি , নো চ খো অত্তনা পটিচোদেস্সং ন গণস্স আরোচেস্স’ন্তি, অযম্পি পারাজিকা হোতি অসংৰাসা ৰজ্জপ্পটিচ্ছাদিকা’’তি। ৬৬৬. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি। জানাতি নাম সামং ৰা জানাতি, অঞ্ঞে ৰা তস্সা আরোচেন্তি, সা ৰা আরোচেতি। পারাজিকং ধম্মং অজ্ঝাপন্নন্তি অট্ঠন্নং পারাজিকানং অঞ্ঞতরং পারাজিকং অজ্ঝাপন্নং। নেৰত্তনা পটিচোদেয্যাতি ন সযং চোদেয্য। ন গণস্স আরোচেয্যাতি ন অঞ্ঞাসং ভিক্খুনীনং আরোচেয্য। যদা চ সা ঠিতা ৰা অস্স চুতা ৰাতি ঠিতা নাম সলিঙ্গে ঠিতা ৰুচ্চতি। চুতা নাম কালঙ্কতা ৰুচ্চতি। নাসিতা নাম সযং ৰা ৰিব্ভন্তা হোতি অঞ্ঞেহি ৰা নাসিতা। অৰস্সটা নাম তিত্থাযতনং সঙ্কন্তা ৰুচ্চতি। সা পচ্ছা এৰং ৰদেয্য – ‘‘পুব্বেৰাহং, অয্যে, অঞ্ঞাসিং এতং ভিক্খুনিং এৰরূপা চ এৰরূপা চ সা ভগিনী’’তি। নো চ খো অত্তনা পটিচোদেস্সন্তি সযং ৰা ন চোদেস্সং। ন গণস্স আরোচেস্সন্তি ন অঞ্ঞাসং ভিক্খুনীনং আরোচেস্সং। অযম্পীতি পুরিমাযো উপাদায ৰুচ্চতি। পারাজিকা হোতীতি সেয্যথাপি নাম পণ্ডুপলাসো বন্ধনা পমুত্তো অভব্বো হরিতত্থায, এৰমেৰ ভিক্খুনী জানং পারাজিকং ধম্মং অজ্ঝাপন্নং ভিক্খুনিং নেৰত্তনা পটিচোদেস্সামি ন গণস্স আরোচেস্সামীতি ধুরং নিক্খিত্তমত্তে অস্সমণী হোতি অসক্যধীতা। তেন ৰুচ্চতি পারাজিকা হোতীতি। অসংৰাসাতি সংৰাসো নাম এককম্মং একুদ্দেসো সমসিক্খতা। এসো সংৰাসো নাম। সো তায সদ্ধিং নত্থি। তেন ৰুচ্চতি অসংৰাসাতি। ৬৬৭. অনাপত্তি ‘‘সঙ্ঘস্স ভণ্ডনং ৰা কলহো ৰা ৰিগ্গহো ৰা ৰিৰাদো ৰা ভৰিস্সতী’’তি নারোচেতি, ‘‘সঙ্ঘভেদো ৰা সঙ্ঘরাজি ৰা ভৰিস্সতী’’তি নারোচেতি, ‘‘অযং কক্খল়া ফরুসা জীৰিতন্তরাযং ৰা ব্রহ্মচরিযন্তরাযং ৰা করিস্সতী’’তি নারোচেতি, অঞ্ঞা পতিরূপা ভিক্খুনিযো অপস্সন্তী নারোচেতি, নচ্ছাদেতুকামা নারোচেতি, পঞ্ঞাযিস্সতি সকেন কম্মেনাতি নারোচেতি, উম্মত্তিকায…পে॰… আদিকম্মিকাযাতি। দুতিযপারাজিকং সমত্তং। ৩. ততিযপারাজিকং ৬৬৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী সমগ্গেন সঙ্ঘেন উক্খিত্তং অরিট্ঠং ভিক্খুং গদ্ধবাধিপুব্বং অনুৰত্ততি। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা ভিক্খুনী সমগ্গেন সঙ্ঘেন উক্খিত্তং অরিট্ঠং ভিক্খুং গদ্ধবাধিপুব্বং অনুৰত্তিস্সতী’’তি…পে॰… সচ্চং কির, ভিক্খৰে, থুল্লনন্দা ভিক্খুনী সমগ্গেন সঙ্ঘেন উক্খিত্তং অরিট্ঠং ভিক্খুং গদ্ধবাধিপুব্বং অনুৰত্ততীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী সমগ্গেন সঙ্ঘেন উক্খিত্তং অরিট্ঠং ভিক্খুং গদ্ধবাধিপুব্বং অনুৰত্তিস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৬৬৯. ‘‘যা পন ভিক্খুনী সমগ্গেন সঙ্ঘেন উক্খিত্তং ভিক্খুং ধম্মেন ৰিনযেন সত্থুসাসনেন অনাদরং অপ্পটিকারং অকতসহাযং তমনুৰত্তেয্য, সা ভিক্খুনী ভিক্খুনীহি এৰমস্স ৰচনীযা – ‘এসো খো, অয্যে, ভিক্খু সমগ্গেন সঙ্ঘেন উক্খিত্তো ধম্মেন ৰিনযেন সত্থুসাসনেন অনাদরো অপ্পটিকারো অকতসহাযো, মায্যে, এতং ভিক্খুং অনুৰত্তী’তি। এৰঞ্চ সা ভিক্খুনী ভিক্খুনীহি ৰুচ্চমানা তথেৰ পগ্গণ্হেয্য, সা ভিক্খুনী ভিক্খুনীহি যাৰততিযং সমনুভাসিতব্বা তস্স পটিনিস্সগ্গায। যাৰততিযং চে সমনুভাসিযমানা তং পটিনিস্সজ্জেয্য, ইচ্চেতং কুসলং। নো চে পটিনিস্সজ্জেয্য, অযম্পি পারাজিকা হোতি অসংৰাসা উক্খিত্তানুৰত্তিকা’’তি। ৬৭০. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি। সমগ্গো নাম সঙ্ঘো সমানসংৰাসকো সমানসীমাযং ঠিতো। উক্খিত্তো নাম আপত্তিযা অদস্সনে ৰা অপ্পটিকম্মে ৰা অপ্পটিনিস্সগ্গে ৰা [অদস্সনেন ৰা অপ্পটিকম্মেন ৰা অপ্পটিনিস্সগ্গেন ৰা (ক॰), অদস্সনে ৰা অপ্পটিকম্মে ৰা পাপিকায দিট্ঠিযা অপ্পটিনিস্সগ্গে ৰা (?)] উক্খিত্তো। ধম্মেন ৰিনযেনাতি যেন ধম্মেন যেন ৰিনযেন। সত্থুসাসনেনাতি জিনসাসনেন বুদ্ধসাসনেন। অনাদরো নাম সঙ্ঘং ৰা গণং ৰা পুগ্গলং ৰা কম্মং ৰা নাদিযতি। অপ্পটিকারো নাম উক্খিত্তো অনোসারিতো। অকতসহাযো নাম সমানসংৰাসকা ভিক্খূ ৰুচ্চন্তি সহাযা। সো তেহি সদ্ধিং নত্থি, তেন ৰুচ্চতি অকতসহাযোতি। তমনুৰত্তেয্যাতি যংদিট্ঠিকো সো হোতি যংখন্তিকো যংরুচিকো, সাপি তংদিট্ঠিকা হোতি তংখন্তিকা তংরুচিকা। সা ভিক্খুনীতি যা সা উক্খিত্তানুৰত্তিকা ভিক্খুনী। ভিক্খুনীহীতি অঞ্ঞাহি ভিক্খুনীহি। যা পস্সন্তি যা সুণন্তি তাহি ৰত্তব্বা – ‘‘এসো খো, অয্যে, ভিক্খু সমগ্গেন সঙ্ঘেন উক্খিত্তো ধম্মেন ৰিনযেন সত্থুসাসনেন অনাদরো অপ্পটিকারো অকতসহাযো। মায্যে, এতং ভিক্খুং অনুৰত্তী’’তি। দুতিযম্পি ৰত্তব্বা। ততিযম্পি ৰত্তব্বা। সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স। সুত্ৰা ন ৰদন্তি, আপত্তি দুক্কটস্স। সা ভিক্খুনী সঙ্ঘমজ্ঝম্পি আকড্ঢিত্ৰা ৰত্তব্বা – ‘‘এসো খো, অয্যে, ভিক্খু সমগ্গেন সঙ্ঘেন উক্খিত্তো ধম্মেন ৰিনযেন সত্থুসাসনেন অনাদরো অপ্পটিকারো অকতসহাযো। মায্যে, এতং ভিক্খুং অনুৰত্তী’’তি। দুতিযম্পি ৰত্তব্বা। ততিযম্পি ৰত্তব্বা। সচে পটিনিস্সজ্জতি, ইচ্চেতং কুসলং। নো চে পটিনিস্সজ্জতি, আপত্তি দুক্কটস্স। সা ভিক্খুনী সমনুভাসিতব্বা। এৰঞ্চ পন, ভিক্খৰে, সমনুভাসিতব্বা। ব্যত্তায ভিক্খুনিযা পটিবলায সঙ্ঘো ঞাপেতব্বো – ৬৭১. ‘‘সুণাতু মে, অয্যে, সঙ্ঘো। অযং ইত্থন্নামা ভিক্খুনী সমগ্গেন সঙ্ঘেন উক্খিত্তং ভিক্খুং ধম্মেন ৰিনযেন সত্থুসাসনেন অনাদরং অপ্পটিকারং অকতসহাযং তমনুৰত্ততি, সা তং ৰত্থুং ন পটিনিস্সজ্জতি। যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুনিং সমনুভাসেয্য তস্স ৰত্থুস্স পটিনিস্সগ্গায। এসা ঞত্তি। ‘‘সুণাতু মে, অয্যে, সঙ্ঘো। অযং ইত্থন্নামা ভিক্খুনী সমগ্গেন সঙ্ঘেন উক্খিত্তং ভিক্খুং ধম্মেন ৰিনযেন সত্থুসাসনেন অনাদরং অপ্পটিকারং অকতসহাযং তমনুৰত্ততি। সা তং ৰত্থুং ন পটিনিস্সজ্জতি। সঙ্ঘো ইত্থন্নামং ভিক্খুনিং সমনুভাসতি তস্স ৰত্থুস্স পটিনিস্সগ্গায। যস্সা অয্যায খমতি ইত্থন্নামায ভিক্খুনিযা সমনুভাসনা তস্স ৰত্থুস্স পটিনিস্সগ্গায, সা তুণ্হস্স; যস্সা নক্খমতি, সা ভাসেয্য। ‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি…পে॰…। ‘‘সমনুভট্ঠা সঙ্ঘেন ইত্থন্নামা ভিক্খুনী তস্স ৰত্থুস্স পটিনিস্সগ্গায। খমতি সঙ্ঘস্স, তস্মা তুণ্হী, এৰমেতং ধারযামী’’তি। ঞত্তিযা দুক্কটং, দ্ৰীহি কম্মৰাচাহি থুল্লচ্চযা, কম্মৰাচা পরিযোসানে আপত্তি পারাজিকস্স। অযম্পীতি পুরিমাযো উপাদায ৰুচ্চতি। পারাজিকা হোতীতি সেয্যথাপি নাম পুথুসিলা দ্ৰেধা ভিন্না অপ্পটিসন্ধিকা হোতি, এৰমেৰ ভিক্খুনী যাৰততিযং সমনুভাসনায ন পটিনিস্সজ্জন্তী অস্সমণী হোতি অসক্যধীতা। তেন ৰুচ্চতি পারাজিকা হোতীতি। অসংৰাসাতি সংৰাসো নাম এককম্মং একুদ্দেসো সমসিক্খতা। এসো সংৰাসো নাম। সো তায সদ্ধিং নত্থি। তেন ৰুচ্চতি অসংৰাসাতি। ৬৭২. ধম্মকম্মে ধম্মকম্মসঞ্ঞা ন পটিনিস্সজ্জতি, আপত্তি পারাজিকস্স। ধম্মকম্মে ৰেমতিকা ন পটিনিস্সজ্জতি, আপত্তি পারাজিকস্স। ধম্মকম্মে অধম্মকম্মসঞ্ঞা ন পটিনিস্সজ্জতি, আপত্তি পারাজিকস্স। অধম্মকম্মে ধম্মকম্মসঞ্ঞা, আপত্তি দুক্কটস্স। অধম্মকম্মে ৰেমতিকা, আপত্তি দুক্কটস্স। অধম্মকম্মে অধম্মকম্মসঞ্ঞা, আপত্তি দুক্কটস্স। ৬৭৩. অনাপত্তি অসমনুভাসন্তিযা, পটিনিস্সজ্জন্তিযা, উম্মত্তিকায…পে॰… আদিকম্মিকাযাতি। ততিযপারাজিকং সমত্তং। ৪. চতুত্থপারাজিকং ৬৭৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খুনিযো অৰস্সুতা অৰস্সুতস্স পুরিসপুগ্গলস্স হত্থগ্গহণম্পি সাদিযন্তি, সঙ্ঘাটিকণ্ণগ্গহণম্পি সাদিযন্তি, সন্তিট্ঠন্তিপি, সল্লপন্তিপি, সঙ্কেতম্পি গচ্ছন্তি, পুরিসস্সপি অব্ভাগমনং সাদিযন্তি, ছন্নম্পি অনুপৰিসন্তি, কাযম্পি তদত্থায উপসংহরন্তি এতস্স অসদ্ধম্মস্স পটিসেৰনত্থায। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো অৰস্সুতা অৰস্সুতস্স পুরিসপুগ্গলস্স হত্থগ্গহণম্পি সাদিযিস্সন্তি, সঙ্ঘাটিকণ্ণগ্গহণম্পি সাদিযিস্সন্তি, সন্তিট্ঠিস্সন্তিপি, সল্লপিস্সন্তিপি, সঙ্কেতম্পি গচ্ছিস্সন্তি, পুরিসস্সপি অব্ভাগমনং সাদিযিস্সন্তি, ছন্নম্পি অনুপৰিসিস্সন্তি, কাযম্পি তদত্থায উপসংহরিস্সন্তি এতস্স অসদ্ধম্মস্স পটিসেৰনত্থাযা’’তি…পে॰… সচ্চং কির, ভিক্খৰে, ছব্বগ্গিযা ভিক্খুনিযো অৰস্সুতা অৰস্সুতস্স পুরিসপুগ্গলস্স হত্থগ্গহণম্পি সাদিযন্তি, সঙ্ঘাটিকণ্ণগ্গহণম্পি সাদিযন্তি, সন্তিট্ঠন্তিপি, সল্লপন্তিপি, সঙ্কেতম্পি গচ্ছন্তি, পুরিসস্সপি অব্ভাগমনং সাদিযন্তি, ছন্নম্পি অনুপৰিসন্তি, কাযম্পি তদত্থায উপসংহরন্তি এতস্স অসদ্ধম্মস্স পটিসেৰনত্থাযাতি? ‘‘সচ্চং, ভগৰা’’তি। ৰিগরহিবুদ্ধো ভগৰা…পে॰… কথঞ্হি নাম, ভিক্খৰে, ছব্বগ্গিযা ভিক্খুনিযো অৰস্সুতা অৰস্সুতস্স পুরিসপুগ্গলস্স হত্থগ্গহণম্পি সাদিযিস্সন্তি, সঙ্ঘাটিকণ্ণগ্গহণম্পি সাদিযিস্সন্তি, সন্তিট্ঠিস্সন্তিপি, সল্লপিস্সন্তিপি, সঙ্কেতম্পি গচ্ছিস্সন্তি, পুরিসস্সপি অব্ভাগমনং সাদিযিস্সন্তি, ছন্নম্পি অনুপৰিসিস্সন্তি, কাযম্পি তদত্থায উপসংহরিস্সন্তি এতস্স অসদ্ধম্মস্স পটিসেৰনত্থায! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৬৭৫. ‘‘যা পন ভিক্খুনী অৰস্সুতা অৰস্সুতস্স পুরিসপুগ্গলস্স হত্থগ্গহণং ৰা সাদিযেয্য, সঙ্ঘাটিকণ্ণগ্গহণং ৰা সাদিযেয্য, সন্তিট্ঠেয্য ৰা, সল্লপেয্য ৰা, সঙ্কেতং ৰা গচ্ছেয্য , পুরিসস্স ৰা অব্ভাগমনং সাদিযেয্য, ছন্নং ৰা অনুপৰিসেয্য, কাযং ৰা তদত্থায উপসংহরেয্য এতস্স অসদ্ধম্মস্স পটিসেৰনত্থায, অযম্পি পারাজিকা হোতি অসংৰাসা অট্ঠৰত্থুকা’’তি। ৬৭৬. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি। অৰস্সুতা নাম সারত্তা অপেক্খৰতী পটিবদ্ধচিত্তা। অৰস্সুতো নাম সারত্তো অপেক্খৰা পটিবদ্ধচিত্তো। পুরিসপুগ্গলো নাম মনুস্সপুরিসো, ন যক্খো ন পেতো ন তিরচ্ছানগতো ৰিঞ্ঞূ পটিবলো কাযসংসগ্গং সমাপজ্জিতুং। হত্থগ্গহণং ৰা সাদিযেয্যাতি হত্থো নাম কপ্পরং উপাদায যাৰ অগ্গনখা। এতস্স অসদ্ধম্মস্স পটিসেৰনত্থায উব্ভক্খকং অধোজাণুমণ্ডলং গহণং সাদিযতি, আপত্তি থুল্লচ্চযস্স। সঙ্ঘাটিকণ্ণগ্গহণং ৰা সাদিযেয্যাতি এতস্স অসদ্ধম্মস্স পটিসেৰনত্থায নিৰত্থং ৰা পারুতং ৰা গহণং সাদিযতি, আপত্তি থুল্লচ্চযস্স। সন্তিট্ঠেয্য ৰাতি এতস্স অসদ্ধম্মস্স পটিসেৰনত্থায পুরিসস্স হত্থপাসে তিট্ঠতি, আপত্তি থুল্লচ্চযস্স। সল্লপেয্য ৰাতি এতস্স অসদ্ধম্মস্স পটিসেৰনত্থায পুরিসস্স হত্থপাসে ঠিতা সল্লপতি, আপত্তি থুল্লচ্চযস্স। সঙ্কেতং ৰা গচ্ছেয্যাতি এতস্স অসদ্ধম্মস্স পটিসেৰনত্থায পুরিসেন – ‘‘ইত্থন্নামং ওকাসং [ইদং পদং অট্ঠকথাযং ন দিস্সতি] আগচ্ছা’’তি – ৰুত্তা গচ্ছতি। পদে পদে আপত্তি দুক্কটস্স। পুরিসস্স হত্থপাসং ওক্কন্তমত্তে আপত্তি থুল্লচ্চযস্স। পুরিসস্স ৰা অব্ভাগমনং সাদিযেয্যাতি এতস্স অসদ্ধম্মস্স পটিসেৰনত্থায পুরিসস্স অব্ভাগমনং সাদিযতি, আপত্তি দুক্কটস্স। হত্থপাসং ওক্কন্তমত্তে আপত্তি থুল্লচ্চযস্স। ছন্নং ৰা অনুপৰিসেয্যাতি এতস্স অসদ্ধম্মস্স পটিসেৰনত্থায যেন কেনচি পটিচ্ছন্নং ওকাসং পৰিট্ঠমত্তে আপত্তি থুল্লচ্চযস্স। কাযং ৰা তদত্থায উপসংহরেয্যাতি এতস্স অসদ্ধম্মস্স পটিসেৰনত্থায পুরিসস্স হত্থপাসে ঠিতা কাযং উপসংহরতি, আপত্তি থুল্লচ্চযস্স। অযম্পীতি পুরিমাযো উপাদায ৰুচ্চতি। পারাজিকা হোতীতি সেয্যথাপি নাম তালো মত্থকচ্ছিন্নো অভব্বো পুন ৰিরুল়্হিযা এৰমেৰ ভিক্খুনী অট্ঠমং ৰত্থুং পরিপূরেন্তী অস্সমণী হোতি অসক্যধীতা। তেন ৰুচ্চতি পারাজিকা হোতীতি। অসংৰাসাতি সংৰাসো নাম এককম্মং একুদ্দেসো সমসিক্খতা। এসো সংৰাসো নাম। সো তায সদ্ধিং নত্থি। তেন ৰুচ্চতি অসংৰাসাতি। ৬৭৭. অনাপত্তি অসঞ্চিচ্চ, অস্সতিযা, অজানন্তিযা, অসাদিযন্তিযা, উম্মত্তিকায, খিত্তচিত্তায, ৰেদনাট্টায, আদিকম্মিকাযাতি। চতুত্থপারাজিকং সমত্তং। উদ্দিট্ঠা খো, অয্যাযো, অট্ঠ পারাজিকা ধম্মা। যেসং ভিক্খুনী অঞ্ঞতরং ৰা অঞ্ঞতরং ৰা আপজ্জিত্ৰা ন লভতি ভিক্খুনীহি সদ্ধিং সংৰাসং, যথা পুরে তথা পচ্ছা, পারাজিকা হোতি অসংৰাসা। তত্থায্যাযো পুচ্ছামি – ‘‘কচ্চিত্থ পরিসুদ্ধা’’? দুতিযম্পি পুচ্ছামি – ‘‘কচ্চিত্থ পরিসুদ্ধা’’? ততিযম্পি পুচ্ছামি – ‘‘কচ্চিত্থ পরিসুদ্ধা’’? পরিসুদ্ধেত্থায্যাযো, তস্মা তুণ্হী, এৰমেতং ধারযামীতি। ভিক্খুনিৰিভঙ্গে পারাজিককণ্ডং নিট্ঠিতং। |
Copyright © 2011 Bangladesh Buddhist. All rights reserved. |