১১. পঞ্চসতিকক্খন্ধকং
১. সঙ্গীতিনিদানং ৪৩৭. অথ খো আযস্মা মহাকস্সপো ভিক্খূ আমন্তেসি – ‘‘একমিদাহং, আৰুসো, সমযং পাৰায কুসিনারং অদ্ধানমগ্গপ্পটিপন্নো মহতা ভিক্খুসঙ্ঘেন সদ্ধিং পঞ্চমত্তেহি ভিক্খুসতেহি। অথ খ্ৰাহং, আৰুসো, মগ্গা ওক্কম্ম অঞ্ঞতরস্মিং রুক্খমূলে নিসীদিং। [দী॰ নি॰ ২.২৩১] ‘‘তেন খো পন সমযেন অঞ্ঞতরো আজীৰকো কুসিনারায মন্দারৰপুপ্ফং গহেত্ৰা পাৰং অদ্ধানমগ্গপ্পটিপন্নো হোতি। অদ্দসং খো অহং, আৰুসো, তং আজীৰকং দূরতোৰ আগচ্ছন্তং। দিস্ৰান তং আজীৰকং এতদৰোচং – ‘অপাৰুসো, অম্হাকং সত্থারং জানাসী’তি? ‘আমাৰুসো, জানামি। অজ্জ সত্তাহপরিনিব্বুতো সমণো গোতমো। ততো মে ইদং মন্দারৰপুপ্ফং গহিত’ন্তি। তত্রাৰুসো, যে তে ভিক্খূ অৰীতরাগা অপ্পেকচ্চে বাহা পগ্গয্হ কন্দন্তি, ছিন্নপাতং পপতন্তি, আৰট্টন্তি, ৰিৰট্টন্তি – অতিখিপ্পং ভগৰা পরিনিব্বুতো, অতিখিপ্পং সুগতো পরিনিব্বুতো, অতিখিপ্পং চক্খুং লোকে অন্তরহিতন্তি। যে পন তে ভিক্খূ ৰীতরাগা তে সতা সম্পজানা অধিৰাসেন্তি – অনিচ্চা সঙ্খারা, তং কুতেত্থ লব্ভাতি। ‘‘অথ খ্ৰাহং, আৰুসো, তে ভিক্খূ এতদৰোচং – ‘অলং, আৰুসো, মা সোচিত্থ; মা পরিদেৰিত্থ। নন্ৰেতং, আৰুসো, ভগৰতা পটিকচ্চেৰ অক্খাতং – সব্বেহেৰ পিযেহি মনাপেহি নানাভাৰো ৰিনাভাৰো অঞ্ঞথাভাৰো। তং কুতেত্থ আৰুসো লব্ভা, যং তং জাতং ভূতং সঙ্খতং পলোকধম্মং, তং ৰত মা পলুজ্জীতি – নেতং ঠানং ৰিজ্জতী’তি। ‘‘তেন খো পনাৰুসো, সমযেন সুভদ্দো নাম ৰুড্ঢপব্বজিতো তস্সং পরিসাযং নিসিন্নো হোতি । অথ খো, আৰুসো, সুভদ্দো ৰুড্ঢপব্বজিতো তে ভিক্খূ এতদৰোচ – ‘অলং, আৰুসো, মা সোচিত্থ; মা পরিদেৰিত্থ। সুমুত্তা মযং তেন মহাসমণেন ; উপদ্দুতা চ মযং হোম – ইদং ৰো কপ্পতি, ইদং ৰো ন কপ্পতীতি। ইদানি পন মযং যং ইচ্ছিস্সাম তং করিস্সাম, যং ন ইচ্ছিস্সাম ন তং করিস্সামা’তি। হন্দ মযং, আৰুসো, ধম্মঞ্চ ৰিনযঞ্চ সঙ্গাযাম। পুরে অধম্মো দিপ্পতি[দিব্বতি (ক॰)], ধম্মো পটিবাহিয্যতি; পুরে অৰিনযো দিপ্পতি ৰিনযো পটিবাহিয্যতি; পুরে অধম্মৰাদিনো বলৰন্তো হোন্তি, ধম্মৰাদিনো দুব্বলা হোন্তি; পুরে অৰিনযৰাদিনো বলৰন্তো হোন্তি, ৰিনযৰাদিনো দুব্বলা হোন্তী’’তি। ‘‘তেন হি, ভন্তে, থেরো ভিক্খূ উচ্চিনতূ’’তি। অথ খো আযস্মা মহাকস্সপো একেনূনপঞ্চঅরহন্তসতানি উচ্চিনি। ভিক্খূ আযস্মন্তং মহাকস্সপং এতদৰোচুং – ‘‘অযং, ভন্তে, আযস্মা আনন্দো কিঞ্চাপি সেক্খো, অভব্বো ছন্দা দোসা মোহা ভযা অগতিং গন্তুং। বহু চ অনেন ভগৰতো সন্তিকে ধম্মো চ ৰিনযো চ পরিযত্তো। তেন হি, ভন্তে, থেরো আযস্মন্তম্পি আনন্দং উচ্চিনতূ’’তি । অথ খো আযস্মা মহাকস্সপো আযস্মন্তম্পি আনন্দং উচ্চিনি। অথ খো থেরানং ভিক্খূনং এতদহোসি – ‘‘কত্থ নু খো মযং ধম্মঞ্চ ৰিনযঞ্চ সঙ্গাযেয্যামা’’তি? অথ খো থেরানং ভিক্খূনং এতদহোসি – ‘‘রাজগহং খো মহাগোচরং পহূতসেনাসনং, যংনূন মযং রাজগহে ৰস্সং ৰসন্তা ধম্মঞ্চ ৰিনযঞ্চ সঙ্গাযেয্যাম। ন অঞ্ঞে ভিক্খূ রাজগহে ৰস্সং উপগচ্ছেয্যু’’ন্তি। অথ খো আযস্মা মহাকস্সপো সঙ্ঘং ঞাপেসি – ৪৩৮. ‘‘সুণাতু মে, আৰুসো, সঙ্ঘো। যদি সঙ্ঘস্স পত্তকল্লং, সঙ্ঘো ইমানি পঞ্চ ভিক্খুসতানি সম্মন্নেয্য – রাজগহে ৰস্সং ৰসন্তানি ধম্মঞ্চ ৰিনযঞ্চ সঙ্গাযিতুং, ন অঞ্ঞেহি ভিক্খূহি রাজগহে ৰস্সং ৰসিতব্বন্তি। এসা ঞত্তি। ‘‘সুণাতু মে, আৰুসো, সঙ্ঘো। ইমানি পঞ্চ ভিক্খুসতানি সম্মন্নতি – রাজগহে ৰস্সং ৰসন্তানি ধম্মঞ্চ ৰিনযঞ্চ সঙ্গাযিতুং, ন অঞ্ঞেহি ভিক্খূহি রাজগহে ৰস্সং ৰসিতব্বন্তি। যস্সাযস্মতো খমতি ইমেসং পঞ্চন্নং ভিক্খুসতানং সম্মুতি – রাজগহে ৰস্সং ৰসন্তানং ধম্মঞ্চ ৰিনযঞ্চ সঙ্গাযিতুং, ন অঞ্ঞেহি ভিক্খূহি রাজগহে ৰস্সং ৰসিতব্বন্তি – সো তুণ্হস্স; যস্স নক্খমতি, সো ভাসেয্য। ‘‘সম্মতানি সঙ্ঘেন ইমানি পঞ্চ ভিক্খুসতানি রাজগহে ৰস্সং ৰসন্তানি ধম্মঞ্চ ৰিনযঞ্চ সঙ্গাযিতুং, ন অঞ্ঞেহি ভিক্খূহি রাজগহে ৰস্সং ৰসিতব্বন্তি। খমতি সঙ্ঘস্স, তস্মা তুণ্হী, এৰমেতং ধারযামী’’তি। অথ খো থেরা ভিক্খূ রাজগহং অগমংসু ধম্মঞ্চ ৰিনযঞ্চ সঙ্গাযিতুং। অথ খো থেরানং ভিক্খূনং এতদহোসি – ‘‘ভগৰতা খো, আৰুসো, খণ্ডফুল্লপ্পটিসঙ্খরণং ৰণ্ণিতং। হন্দ মযং, আৰুসো, পঠমং মাসং খণ্ডফুল্লং পটিসঙ্খরোম; মজ্ঝিমং মাসং সন্নিপতিত্ৰা ধম্মঞ্চ ৰিনযঞ্চ সঙ্গাযিস্সামা’’তি। অথ খো থেরা ভিক্খূ পঠমং মাসং খণ্ডফুল্লং পটিসঙ্খরিংসু। অথ খো আযস্মা আনন্দো – স্ৰে সন্নিপাতো [সন্নিপাতোতি (ক॰)] ন খো মেতং পতিরূপং, যোহং সেক্খো সমানো সন্নিপাতং গচ্ছেয্যন্তি – বহুদেৰ রত্তিং কাযগতায সতিযা ৰীতিনামেত্ৰা রত্তিযা পচ্চূসসমযং ‘নিপজ্জিস্সামী’তি কাযং আৰজ্জেসি। অপ্পত্তঞ্চ সীসং বিব্বোহনং, ভূমিতো চ পাদা মুত্তা। এতস্মিং অন্তরে অনুপাদায আসৰেহি চিত্তং ৰিমুচ্চি। ৪৩৯. অথ খো আযস্মা আনন্দো অরহা সমানো সন্নিপাতং অগমাসি। অথ খো আযস্মা মহাকস্সপো সঙ্ঘং ঞাপেসি – ‘‘সুণাতু মে, আৰুসো, সঙ্ঘো। যদি সঙ্ঘস্স পত্তকল্লং, অহং উপালিং ৰিনযং পুচ্ছেয্য’’ন্তি। আযস্মা উপালি সঙ্ঘং ঞাপেসি – ‘‘সুণাতু মে, ভন্তে, সঙ্ঘো। যদি সঙ্ঘস্স পত্তকল্লং, অহং আযস্মতা মহাকস্সপেন ৰিনযং পুট্ঠো ৰিস্সজ্জেয্য’’ন্তি। অথ খো আযস্মা মহাকস্সপো আযস্মন্তং উপালিং এতদৰোচ – ‘‘পঠমং, আৰুসো উপালি , পারাজিকং কত্থ পঞ্ঞত্ত’’ন্তি? ‘‘ৰেসালিযং ভন্তে’’তি। ‘‘কং আরব্ভা’’তি? ‘‘সুদিন্নং কলন্দপুত্তং আরব্ভা’’তি। ‘‘কিস্মিং ৰত্থুস্মি’’ন্তি? ‘‘মেথুনধম্মে’’তি। অথ খো আযস্মা মহাকস্সপো আযস্মন্তং উপালিং পঠমস্স পারাজিকস্স ৰত্থুম্পি পুচ্ছি, নিদানম্পি পুচ্ছি, পুগ্গলম্পি পুচ্ছি, পঞ্ঞত্তিম্পি পুচ্ছি, অনুপঞ্ঞত্তিম্পি পুচ্ছি, আপত্তিম্পি পুচ্ছি, অনাপত্তিম্পি পুচ্ছি। ‘‘দুতিযং পনাৰুসো উপালি, পারাজিকং কত্থ পঞ্ঞত্ত’’ন্তি? ‘‘রাজগহে ভন্তে’’তি। ‘‘কং আরব্ভা’’তি? ‘‘ধনিযং কুম্ভকারপুত্তং আরব্ভা’’তি। ‘‘কিস্মিং ৰত্থুস্মি’’ন্তি? ‘‘অদিন্নাদানে’’তি। অথ খো আযস্মা মহাকস্সপো আযস্মন্তং উপালিং দুতিযস্স পারাজিকস্স ৰত্থুম্পি পুচ্ছি, নিদানম্পি পুচ্ছি, পুগ্গলম্পি পুচ্ছি, পঞ্ঞত্তিম্পি পুচ্ছি, অনুপঞ্ঞত্তিম্পি পুচ্ছি, আপত্তিম্পি পুচ্ছি, অনাপত্তিম্পি পুচ্ছি। ‘‘ততিযং পনাৰুসো উপালি, পারাজিকং কত্থ পঞ্ঞত্ত’’ন্তি? ‘‘ৰেসালিযং ভন্তে’’তি। ‘‘কং আরব্ভা’’তি? ‘‘সম্বহুলে ভিক্খূ আরব্ভা’’তি। ‘‘কিস্মিং ৰত্থুস্মি’’ন্তি? ‘‘মনুস্সৰিগ্গহে’’তি। অথ খো আযস্মা মহাকস্সপো আযস্মন্তং উপালিং ততিযস্স পারাজিকস্স ৰত্থুম্পি পুচ্ছি, নিদানম্পি পুচ্ছি, পুগ্গলম্পি পুচ্ছি, পঞ্ঞত্তিম্পি পুচ্ছি, অনুপঞ্ঞত্তিম্পি পুচ্ছি, আপত্তিম্পি পুচ্ছি, অনাপত্তিম্পি পুচ্ছি। ‘‘চতুত্থং পনাৰুসো উপালি, পারাজিকং কত্থ পঞ্ঞত্ত’’ন্তি? ‘‘ৰেসালিযং ভন্তে’’তি। ‘‘কং আরব্ভা’’তি? ‘‘ৰগ্গুমুদাতীরিযে ভিক্খূ আরব্ভা’’তি। ‘‘কিস্মিং ৰত্থুস্মি’’ন্তি? ‘‘উত্তরিমনুস্সধম্মে’’তি। অথ খো আযস্মা মহাকস্সপো আযস্মন্তং উপালিং চতুত্থস্স পারাজিকস্স ৰত্থুম্পি পুচ্ছি, নিদানম্পি পুচ্ছি, পুগ্গলম্পি পুচ্ছি, পঞ্ঞত্তিম্পি পুচ্ছি, অনুপঞ্ঞত্তিম্পি পুচ্ছি, আপত্তিম্পি পুচ্ছি, অনাপত্তিম্পি পুচ্ছি। এতেনেৰ উপাযেন উভতোৰিভঙ্গে পুচ্ছি। পুট্ঠো পুট্ঠো আযস্মা উপালি ৰিস্সজ্জেসি। ৪৪০. অথ খো আযস্মা মহাকস্সপো সঙ্ঘং ঞাপেসি – ‘‘সুণাতু মে, আৰুসো, সঙ্ঘো। যদি সঙ্ঘস্স পত্তকল্লং, অহং আনন্দং ধম্মং পুচ্ছেয্য’’ন্তি। আযস্মা আনন্দো সঙ্ঘং ঞাপেসি – ‘‘সুণাতু মে, ভন্তে, সঙ্ঘো। যদি সঙ্ঘস্স পত্তকল্লং, অহং আযস্মতা মহাকস্সপেন ধম্মং পুট্ঠো ৰিস্সজ্জেয্য’’ন্তি। অথ খো আযস্মা মহাকস্সপো আযস্মন্তং আনন্দং এতদৰোচ – ‘‘ব্রহ্মজালং, আৰুসো আনন্দ, কত্থ ভাসিত’’ন্তি? ‘‘অন্তরা চ, ভন্তে, রাজগহং অন্তরা চ নাল়ন্দং রাজাগারকে অম্বলট্ঠিকাযা’’তি। ‘‘কং আরব্ভা’’তি? ‘‘সুপ্পিযঞ্চ পরিব্বাজকং ব্রহ্মদত্তঞ্চ মাণৰ’’ন্তি। অথ খো আযস্মা মহাকস্সপো আযস্মন্তং আনন্দং ব্রহ্মজালস্স নিদানম্পি পুচ্ছি, পুগ্গলম্পি পুচ্ছি। ‘‘সামঞ্ঞফলং পনাৰুসো আনন্দ, কত্থ ভাসিত’’ন্তি? ‘‘রাজগহে, ভন্তে, জীৰকম্বৰনে’’তি। ‘‘কেন সদ্ধি’’ন্তি? ‘‘অজাতসত্তুনা ৰেদেহিপুত্তেন সদ্ধি’’ন্তি। অথ খো আযস্মা মহাকস্সপো আযস্মন্তং আনন্দং সামঞ্ঞফলস্স নিদানম্পি পুচ্ছি, পুগ্গলম্পি পুচ্ছি। এতেনেৰ উপাযেন পঞ্চপি নিকাযে পুচ্ছি। পুট্ঠো পুট্ঠো আযস্মা আনন্দো ৰিস্সজ্জেসি। ২. খুদ্দানুখুদ্দকসিক্খাপদকথা ৪৪১. অথ খো আযস্মা আনন্দো থেরে ভিক্খূ এতদৰোচ – ‘‘ভগৰা মং, ভন্তে, পরিনিব্বানকালে এৰমাহ – ‘আকঙ্খমানো, আনন্দ, সঙ্ঘো মমচ্চযেন খুদ্দানুখুদ্দকানি সিক্খাপদানি সমূহনেয্যা’’’তি। ‘‘পুচ্ছি পন ত্ৰং, আৰুসো আনন্দ, ভগৰন্তং – ‘কতমানি পন, ভন্তে, খুদ্দানুখুদ্দকানি সিক্খাপদানী’’’তি? ‘‘ন খোহং, ভন্তে, ভগৰন্তং পুচ্ছিং – ‘কতমানি পন, ভন্তে, খুদ্দানুখুদ্দকানি সিক্খাপদানী’’তি। একচ্চে থেরা এৰমাহংসু – ‘‘চত্তারি পারাজিকানি ঠপেত্ৰা, অৰসেসানি খুদ্দানুখুদ্দকানি সিক্খাপদানী’’তি। একচ্চে থেরা এৰমাহংসু – ‘‘চত্তারি পারাজিকানি ঠপেত্ৰা , তেরস সঙ্ঘাদিসেসে ঠপেত্ৰা, অৰসেসানি খুদ্দানুখুদ্দকানি সিক্খাপদানী’’তি। একচ্চে থেরা এৰমাহংসু – ‘‘চত্তারি পারাজিকানি ঠপেত্ৰা, তেরস সঙ্ঘাদিসেসে ঠপেত্ৰা, দ্ৰে অনিযতে ঠপেত্ৰা, অৰসেসানি খুদ্দানুখুদ্দকানি সিক্খাপদানী’’তি। একচ্চে থেরা এৰমাহংসু – ‘‘চত্তারি পারাজিকানি ঠপেত্ৰা, তেরস সঙ্ঘাদিসেসে ঠপেত্ৰা, দ্ৰে অনিযতে ঠপেত্ৰা, তিংস নিস্সগ্গিযে পাচিত্তিযে ঠপেত্ৰা, অৰসেসানি খুদ্দানুখুদ্দকানি সিক্খাপদানী’’তি। একচ্চে থেরা এৰমাহংসু – ‘‘চত্তারি পারাজিকানি ঠপেত্ৰা, তেরস সঙ্ঘাদিসেসে ঠপেত্ৰা, দ্ৰে অনিযতে ঠপেত্ৰা, তিংস নিস্সগ্গিযে পাচিত্তিযে ঠপেত্ৰা, দ্ৰেনৰুতি পাচিত্তিযে ঠপেত্ৰা, অৰসেসানি খুদ্দানুখুদ্দকানি সিক্খাপদানী’’তি। একচ্চে থেরা এৰমাহংসু – ‘‘চত্তারি পারাজিকানি ঠপেত্ৰা, তেরস সঙ্ঘাদিসেসে ঠপেত্ৰা, দ্ৰে অনিযতে ঠপেত্ৰা, তিংস নিস্সগ্গিযে পাচিত্তিযে ঠপেত্ৰা, দ্ৰেনৰুতি পাচিত্তিযে ঠপেত্ৰা, চত্তারো পাটিদেসনীযে ঠপেত্ৰা, অৰসেসানি খুদ্দানুখুদ্দকানি সিক্খাপদানী’’তি। ৪৪২. অথ খো আযস্মা মহাকস্সপো সঙ্ঘং ঞাপেসি – ‘‘সুণাতু মে, আৰুসো, সঙ্ঘো। সন্তম্হাকং সিক্খাপদানি গিহিগতানি। গিহিনোপি জানন্তি – ‘ইদং ৰো সমণানং সক্যপুত্তিযানং কপ্পতি, ইদং ৰো ন কপ্পতী’তি। সচে মযং খুদ্দানুখুদ্দকানি সিক্খাপদানি সমূহনিস্সাম, ভৰিস্সন্তি ৰত্তারো – ‘ধূমকালিকং সমণেন গোতমেন সাৰকানং সিক্খাপদং পঞ্ঞত্তং। যাৰিমেসং সত্থা অট্ঠাসি তাৰিমে সিক্খাপদেসু সিক্খিংসু। যতো ইমেসং সত্থা পরিনিব্বুতো, ন দানিমে সিক্খাপদেসু সিক্খন্তী’তি। যদি সঙ্ঘস্স পত্তকল্লং, সঙ্ঘো অপ্পঞ্ঞত্তং নপ্পঞ্ঞপেয্য, পঞ্ঞত্তং ন সমুচ্ছিন্দেয্য, যথাপঞ্ঞত্তেসু সিক্খাপদেসু সমাদায ৰত্তেয্য। এসা ঞত্তি। ‘‘সুণাতু মে, আৰুসো, সঙ্ঘো। সন্তম্হাকং সিক্খাপদানি গিহিগতানি। গিহিনোপি জানন্তি – ‘ইদং ৰো সমণানং সক্যপুত্তিযানং কপ্পতি, ইদং ৰো ন কপ্পতী’তি। সচে মযং খুদ্দানুখুদ্দকানি সিক্খাপদানি সমূহনিস্সাম, ভৰিস্সন্তি ৰত্তারো – ‘ধূমকালিকং সমণেন গোতমেন সাৰকানং সিক্খাপদং পঞ্ঞত্তং । যাৰিমেসং সত্থা অট্ঠাসি তাৰিমে সিক্খাপদেসু সিক্খিংসু। যতো ইমেসং সত্থা পরিনিব্বুতো, ন দানিমে সিক্খাপদেসু সিক্খন্তী’তি। সঙ্ঘো অপ্পঞ্ঞত্তং নপ্পঞ্ঞপেতি, পঞ্ঞত্তং ন সমুচ্ছিন্দতি, যথাপঞ্ঞত্তেসু সিক্খাপদেসু সমাদায ৰত্ততি। যস্সাযস্মতো খমতি অপ্পঞ্ঞত্তস্স অপ্পঞ্ঞাপনা, পঞ্ঞত্তস্স অসমুচ্ছেদো, যথাপঞ্ঞত্তেসু সিক্খাপদেসু সমাদায ৰত্তনা, সো তুণ্হস্স; যস্স নক্খমতি, সো ভাসেয্য। ‘‘সঙ্ঘো অপ্পঞ্ঞত্তং নপ্পঞ্ঞপেতি, পঞ্ঞত্তং ন সমুচ্ছিন্দতি, যথাপঞ্ঞত্তেসু সিক্খাপদেসু সমাদায ৰত্ততি। খমতি সঙ্ঘস্স, তস্মা তুণ্হী, এৰমেতং ধারযামী’’তি। ৪৪৩. অথ খো থেরা ভিক্খূ আযস্মন্তং আনন্দং এতদৰোচুং – ‘‘ইদং তে, আৰুসো আনন্দ, দুক্কটং, যং ত্ৰং ভগৰন্তং ন পুচ্ছি – ‘কতমানি পন, ভন্তে, খুদ্দানুখুদ্দকানি সিক্খাপদানী’তি। দেসেহি তং দুক্কট’’ন্তি। ‘‘অহং খো, ভন্তে, অস্সতিযা ভগৰন্তং ন পুচ্ছিং – ‘কতমানি পন, ভন্তে, খুদ্দানুখুদ্দকানি সিক্খাপদানী’তি। নাহং তং দুক্কটং পস্সামি, অপি চাযস্মন্তানং সদ্ধায দেসেমি তং দুক্কট’’ন্তি। ‘‘ইদম্পি তে, আৰুসো আনন্দ, দুক্কটং, যং ত্ৰং ভগৰতো ৰস্সিকসাটিকং অক্কমিত্ৰা সিব্বেসি। দেসেহি তং দুক্কট’’ন্তি। ‘‘অহং খো, ভন্তে, ন অগারৰেন ভগৰতো ৰস্সিকসাটিকং অক্কমিত্ৰা সিব্বেসিং। নাহং তং দুক্কটং পস্সামি, অপি চাযস্মন্তানং সদ্ধায দেসেমি তং দুক্কট’’ন্তি। ‘‘ইদম্পি তে, আৰুসো আনন্দ, দুক্কটং, যং ত্ৰং মাতুগামেহি ভগৰতো সরীরং পঠমং ৰন্দাপেসি, তাসং রোদন্তীনং ভগৰতো সরীরং অস্সুকেন মক্খিতং। দেসেহি তং দুক্কট’’ন্তি। অহং খো, ভন্তে – মাযিমাসং [মাযিমা (সী॰ স্যা॰)] ৰিকালে অহেসুন্তি – মাতুগামেহি ভগৰতো সরীরং পঠমং ৰন্দাপেসিং। নাহং তং দুক্কটং পস্সামি, অপি চাযস্মন্তানং সদ্ধায দেসেমি তং দুক্কট’’ন্তি। ‘‘ইদম্পি তে, আৰুসো আনন্দ, দুক্কটং, যং ত্ৰং ভগৰতা ওল়ারিকে নিমিত্তে কযিরমানে, ওল়ারিকে ওভাসে কযিরমানে, ন ভগৰন্তং যাচি – ‘তিট্ঠতু ভগৰা কপ্পং, তিট্ঠতু সুগতো কপ্পং, বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সান’ন্তি। দেসেহি তং দুক্কট’’ন্তি। ‘‘অহং খো, ভন্তে, মারেন পরিযুট্ঠিতচিত্তো ন ভগৰন্তং যাচিং – ‘তিট্ঠতু ভগৰা কপ্পং, তিট্ঠতু সুগতো কপ্পং, বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সান’ন্তি। নাহং তং দুক্কটং পস্সামি, অপি চাযস্মন্তানং সদ্ধায দেসেমি তং দুক্কট’’ন্তি। ‘‘ইদম্পি তে, আৰুসো আনন্দ, দুক্কটং যং ত্ৰং মাতুগামস্স তথাগতপ্পৰেদিতে ধম্মৰিনযে পব্বজ্জং উস্সুক্কং অকাসি। দেসেহি তং দুক্কট’’ন্তি। ‘‘অহং খো, ভন্তে, অযং মহাপজাপতি গোতমী ভগৰতো মাতুচ্ছা আপাদিকা পোসিকা খীরস্স দাযিকা ভগৰন্তং জনেত্তিযা কালঙ্কতায থঞ্ঞং পাযেসীতি মাতুগামস্স তথাগতপ্পৰেদিতে ধম্মৰিনযে পব্বজ্জং উস্সুক্কং অকাসিং। নাহং তং দুক্কটং পস্সামি, অপি চাযস্মন্তানং সদ্ধায দেসেমি তং দুক্কট’’ন্তি। ৪৪৪. তেন খো পন সমযেন আযস্মা পুরাণো দক্খিণাগিরিস্মিং চারিকং চরতি মহতা ভিক্খুসঙ্ঘেন সদ্ধিং পঞ্চমত্তেহি ভিক্খুসতেহি। অথ খো আযস্মা পুরাণো থেরেহি ভিক্খূহি ধম্মে চ ৰিনযে চ সঙ্গীতে দক্খিণাগিরিস্মিং যথাভিরন্তং ৰিহরিত্ৰা যেন রাজগহং যেন ৰেল়ুৰনং কলন্দকনিৰাপো যেন থেরা ভিক্খূ তেনুপসঙ্কমি, উপসঙ্কমিত্ৰা থেরেহি ভিক্খূহি সদ্ধিং পটিসম্মোদিত্ৰা একমন্তং নিসীদি। একমন্তং নিসিন্নং খো আযস্মন্তং পুরাণং থেরা ভিক্খূ এতদৰোচুং – ‘‘থেরেহি, আৰুসো পুরাণ, ধম্মো চ ৰিনযো চ সঙ্গীতো। উপেহি তং সঙ্গীতি’’ন্তি। ‘‘সুসঙ্গীতাৰুসো, থেরেহি ধম্মো চ ৰিনযো চ। অপিচ যথেৰ মযা ভগৰতো সম্মুখা সুতং, সম্মুখা পটিগ্গহিতং, তথেৰাহং ধারেস্সামী’’তি। ৩. ব্রহ্মদণ্ডকথা ৪৪৫. অথ খো আযস্মা আনন্দো থেরে ভিক্খূ এতদৰোচ – ‘‘ভগৰা মং, ভন্তে, পরিনিব্বানকালে এৰমাহ – ‘তেন হানন্দ, সঙ্ঘো মমচ্চযেন ছন্নস্স ভিক্খুনো ব্রহ্মদণ্ডং আণাপেতূ’’’তি । ‘‘পুচ্ছি পন ত্ৰং, আৰুসো আনন্দ, ভগৰন্তং – ‘কতমো পন, ভন্তে, ব্রহ্মদণ্ডো’’’তি? ‘‘পুচ্ছিং খোহং, ভন্তে, ভগৰন্তং – ‘কতমো পন, ভন্তে, ব্রহ্মদণ্ডো’’’তি? ‘‘ছন্নো, আনন্দ, ভিক্খু যং ইচ্ছেয্য তং ৰদেয্য। ভিক্খূহি ছন্নো ভিক্খু নেৰ ৰত্তব্বো, ন ওৰদিতব্বো, নানুসাসিতব্বো’’তি। ‘‘তেন হাৰুসো আনন্দ, ত্ৰংযেৰ ছন্নস্স ভিক্খুনো ব্রহ্মদণ্ডং আণাপেহী’’তি। ‘‘কথাহং, ভন্তে, ছন্নস্স ভিক্খুনো ব্রহ্মদণ্ডং আণাপেমি, চণ্ডো সো ভিক্খু ফরুসো’’তি? ‘তেন হাৰুসো আনন্দ, বহুকেহি ভিক্খূহি সদ্ধিং গচ্ছাহী’’তি। ‘‘এৰং ভন্তে’’তি খো আযস্মা আনন্দো থেরানং ভিক্খূনং পটিস্সুত্ৰা মহতা ভিক্খুসঙ্ঘেন সদ্ধিং পঞ্চমত্তেহি ভিক্খুসতেহি নাৰায উজ্জৰনিকায কোসম্বিং উজ্জৰি, নাৰায পচ্চোরোহিত্ৰা রঞ্ঞো উদেনস্স [উতেনস্স (ক॰)] উয্যানস্স অৰিদূরে অঞ্ঞতরস্মিং রুক্খমূলে নিসীদি। তেন খো পন সমযেন রাজা উদেনো উয্যানে পরিচারেসি সদ্ধিং ওরোধেন। অস্সোসি খো রঞ্ঞো উদেনস্স ওরোধো – ‘‘অম্হাকং কির আচরিযো অয্যো আনন্দো উয্যানস্স অৰিদূরে অঞ্ঞতরস্মিং রুক্খমূলে নিসিন্নো’’তি। অথ খো রঞ্ঞো উদেনস্স ওরোধো রাজানং উদেনং এতদৰোচ – ‘‘অম্হাকং কির, দেৰ, আচরিযো অয্যো আনন্দো উয্যানস্স অৰিদূরে অঞ্ঞতরস্মিং রুক্খমূলে নিসিন্নো। ইচ্ছাম মযং, দেৰ, অয্যং আনন্দং পস্সিতু’’ন্তি। ‘‘তেন হি তুম্হে সমণং আনন্দং পস্সথা’’তি। অথ খো রঞ্ঞো উদেনস্স ওরোধো যেনাযস্মা আনন্দো তেনুপসঙ্কমি, উপসঙ্কমিত্ৰা আযস্মন্তং আনন্দং অভিৰাদেত্ৰা একমন্তং নিসীদি। একমন্তং নিসিন্নং খো রঞ্ঞো উদেনস্স ওরোধং আযস্মা আনন্দো ধম্মিযা কথায সন্দস্সেসি সমাদপেসিসমুত্তেজেসি সম্পহংসেসি । অথ খো রঞ্ঞো উদেনস্স ওরোধো আযস্মতা আনন্দেন ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো আযস্মতো আনন্দস্স পঞ্চ উত্তরাসঙ্গসতানি পাদাসি। অথ খো রঞ্ঞো উদেনস্স ওরোধো আযস্মতো আনন্দস্স ভাসিতং অভিনন্দিত্ৰা অনুমোদিত্ৰা উট্ঠাযাসনা আযস্মন্তং আনন্দং অভিৰাদেত্ৰা পদক্খিণং কত্ৰা যেন রাজা উদেনো তেনুপসঙ্কমি। অদ্দসা খো রাজা উদেনো ওরোধং দূরতোৰ আগচ্ছন্তং। দিস্ৰান ওরোধং এতদৰোচ – ‘‘অপি নু খো তুম্হে সমণং আনন্দং পস্সিত্থা’’তি? ‘‘অপস্সিম্হা খো মযং, দেৰ, অয্যং আনন্দ’’ন্তি। ‘‘অপি নু তুম্হে সমণস্স আনন্দস্স কিঞ্চি অদত্থা’’তি? ‘‘অদম্হা খো মযং, দেৰ, অয্যস্স আনন্দস্স পঞ্চ উত্তরাসঙ্গসতানী’’তি। রাজা উদেনো উজ্ঝাযতি খিয্যতি ৰিপাচেতি – ‘‘কথঞ্হি নাম সমণো আনন্দো তাৰ বহুং চীৰরং পটিগ্গহেস্সতি! দুস্সৰাণিজ্জং ৰা সমণো আনন্দো করিস্সতি, পগ্গাহিকসালং ৰা পসারেস্সতী’’তি! অথ খো রাজা উদেনো যেনাযস্মা আনন্দো তেনুপসঙ্কমি, উপসঙ্কমিত্ৰা আযস্মতা আনন্দেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো রাজা উদেনো আযস্মন্তং আনন্দং এতদৰোচ – ‘‘আগমা নু খ্ৰিধ, ভো আনন্দ, অম্হাকং ওরোধো’’তি? ‘‘আগমাসি খো তে ইধ, মহারাজ, ওরোধো’’তি। ‘‘অপি পন ভোতো আনন্দস্স কিঞ্চি অদাসী’’তি? ‘‘অদাসি খো মে, মহারাজ, পঞ্চ উত্তরাসঙ্গসতানী’’তি। ‘‘কিং পন ভৰং আনন্দো তাৰ বহুং চীৰরং করিস্সতী’’তি? ‘‘যে [যে পন (ক॰)] তে, মহারাজ, ভিক্খূ দুব্বলচীৰরা তেহি সদ্ধিং সংৰিভজিস্সামী’’তি। ‘‘যানি খো পন, ভো আনন্দ, পোরাণকানি দুব্বলচীৰরানি তানি কথং করিস্সথা’’তি? ‘‘তানি, মহারাজ, উত্তরত্থরণং করিস্সামা’’তি। ‘‘যানি পন, ভো আনন্দ, পোরাণকানি উত্তরত্থরণানি তানি কথং করিস্সথা’’তি? ‘‘তানি, মহারাজ, ভিসিচ্ছৰিযো করিস্সামা’’তি। ‘‘যা পন, ভো আনন্দ, পোরাণকা ভিসিচ্ছৰিযো তা কথং করিস্সথা’’তি? ‘‘তা, মহারাজ, ভূমত্থরণং করিস্সামা’’তি। ‘‘যানি পন, ভো আনন্দ, পোরাণকানি ভূমত্থরণানি তানি কথং করিস্সথা’’তি? ‘‘তানি, মহারাজ, পাদপুঞ্ছনিযো করিস্সামা’’তি। ‘‘যা পন, ভো আনন্দ, পোরাণকা পাদপুঞ্ছনিযো তা কথং করিস্সথা’’তি?। ‘‘তা, মহারাজ, রজোহরণং করিস্সামা’’তি। ‘‘যানি পন, ভো আনন্দ, পোরাণকানি রজোহরণানি তানি কথং করিস্সথা’’তি? ‘‘তানি, মহারাজ, কোট্টেত্ৰা চিক্খল্লেন মদ্দিত্ৰা পরিভণ্ডং লিম্পিস্সামা’’তি। অথ খো রাজা উদেনো – সব্বেৰিমে সমণা সক্যপুত্তিযা যোনিসো উপনেন্তি, ন কুলৰং গমেন্তীতি – আযস্মতো আনন্দস্স অঞ্ঞানিপি পঞ্চ দুস্সসতানি পাদাসি। অযঞ্চরহি আযস্মতো আনন্দস্স পঠমং চীৰরভিক্খা উপ্পজ্জি চীৰরসহস্সং। অথ খো আযস্মা আনন্দো যেন ঘোসিতারামো তেনুপসঙ্কমি, উপসঙ্কমিত্ৰা পঞ্ঞত্তে আসনে নিসীদি। অথ খো আযস্মা ছন্নো যেনাযস্মা আনন্দো তেনুপসঙ্কমি, উপসঙ্কমিত্ৰা আযস্মন্তং আনন্দং অভিৰাদেত্ৰা একমন্তং নিসীদি। একমন্তং নিসিন্নং খো আযস্মন্তং ছন্নং আযস্মা আনন্দো এতদৰোচ – ‘‘সঙ্ঘেন তে, আৰুসো ছন্ন, ব্রহ্মদণ্ডো আণাপিতো’’তি। ‘‘কতমো পন, ভন্তে আনন্দ, ব্রহ্মদণ্ডো আণাপিতো’’তি? ‘‘ত্ৰং, আৰুসো ছন্ন, ভিক্খূ যং ইচ্ছেয্যাসি তং ৰদেয্যাসি। ভিক্খূহি ত্ৰং নেৰ ৰত্তব্বো, ন ওৰদিতব্বো, নানুসাসিতব্বো’’তি। ‘‘নন্ৰাহং, ভন্তে আনন্দ, হতো এত্তাৰতা, যতোহং ভিক্খূহি নেৰ ৰত্তব্বো, ন ওৰদিতব্বো, নানুসাসিতব্বো’’তি তত্থেৰ মুচ্ছিতো পপতো। অথ খো আযস্মা ছন্নো ব্রহ্মদণ্ডেন অট্টীযমানো হরাযমানো জিগুচ্ছমানো একো ৰূপকট্ঠো অপ্পমত্তো আতাপী পহিতত্তো ৰিহরন্তো নচিরস্সেৰ যস্সত্থায কুলপুত্তা সম্মদেৰ অগারস্মা অনগারিযং পব্বজন্তি, তদনুত্তরং ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহাসি। ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি অব্ভঞ্ঞাসি। অঞ্ঞতরো চ পনাযস্মা ছন্নো অরহতং অহোসি। অথ খো আযস্মা ছন্নো অরহত্তং পত্তো যেনাযস্মা আনন্দো তেনুপসঙ্কমি, উপসঙ্কমিত্ৰা আযস্মন্তং আনন্দং এতদৰোচ – ‘‘পটিপ্পস্সম্ভেহি দানি মে, ভন্তে আনন্দ, ব্রহ্মদণ্ড’’ন্তি। ‘‘যদগ্গেন তযা, আৰুসো ছন্ন, অরহত্তং সচ্ছিকতং তদগ্গেন তে ব্রহ্মদণ্ডো পটিপ্পস্সদ্ধো’’তি। ইমায খো পন ৰিনযসঙ্গীতিযা পঞ্চ ভিক্খুসতানি অনূনানি অনধিকানি অহেসুং। তস্মা অযং ৰিনযসঙ্গীতি ‘‘পঞ্চসতিকা’’তি ৰুচ্চতীতি। পঞ্চসতিকক্খন্ধকো একাদসমো। ইমম্হি খন্ধকে ৰত্থূ তেৰীসতি। তস্সুদ্দানং – পরিনিব্বুতে সম্বুদ্ধে, থেরো কস্সপসৰ্হযো। আমন্তযি ভিক্খুগণং, সদ্ধম্মমনুপালকো। পাৰাযদ্ধানমগ্গম্হি, সুভদ্দেন পৰেদিতং। সঙ্গাযিস্সাম সদ্ধম্মং, অধম্মো পুরে দিপ্পতি॥ একেনূন পঞ্চসতং, আনন্দম্পি চ উচ্চিনি। ধম্মৰিনযসঙ্গীতিং, ৰসন্তো গুহমুত্তমে॥ উপালিং ৰিনযং পুচ্ছি, সুত্তন্তানন্দপণ্ডিতং। পিটকং তীণি সঙ্গীতিং, অকংসু জিনসাৰকা॥ ন পুচ্ছি অক্কমিত্ৰান, ৰন্দাপেসি ন যাচি চ॥ পব্বজ্জং মাতুগামস্স, সদ্ধায দুক্কটানি মে। পুরাণো ব্রহ্মদণ্ডঞ্চ, ওরোধো উদেনেন সহ॥ তাৰ বহু দুব্বলঞ্চ, উত্তরত্থরণা ভিসি। ভূমত্থরণা পুঞ্ছনিযো, রজো চিক্খল্লমদ্দনা॥ সহস্সচীৰরং উপ্পজ্জি, পঠমানন্দসৰ্হযো। তজ্জিতো ব্রহ্মদণ্ডেন, চতুস্সচ্চং অপাপুণি। ৰসীভূতা পঞ্চসতা, তস্মা পঞ্চসতী ইতি॥ পঞ্চসতিকক্খন্ধকং নিট্ঠিতং। |
Copyright © 2011 Bangladesh Buddhist. All rights reserved |