৩. নিস্সগ্গিযকণ্ডং (ভিক্খুনীৰিভঙ্গো)
১. পত্তৰগ্গো ১. পঠমসিক্খাপদং ইমে খো পনায্যাযো তিংস নিস্সগ্গিযা পাচিত্তিযা ধম্মা উদ্দেসং আগচ্ছন্তি। ৭৩৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খুনিযো বহূ পত্তে সন্নিচযং করোন্তি। মনুস্সা ৰিহারচারিকং আহিণ্ডন্তা পস্সিত্ৰা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো বহূ পত্তে সন্নিচযং করিস্সন্তি, পত্তৰাণিজ্জং ৰা ভিক্খুনিযো করিস্সন্তি, আমত্তিকাপণং ৰা পসারেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খুনিযো পত্তসন্নিচযং করিস্সন্তী’’তি…পে॰… সচ্চং কির, ভিক্খৰে, ছব্বগ্গিযা ভিক্খুনিযো পত্তসন্নিচযং করোন্তীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, ছব্বগ্গিযা ভিক্খুনিযো পত্তসন্নিচযং করিস্সন্তি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৭৩৪. ‘‘যা পন ভিক্খুনী পত্তসন্নিচযং করেয্য , নিস্সগ্গিযং পাচিত্তিয’’ন্তি। ৭৩৫. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি। পত্তো নাম দ্ৰে পত্তা – অযোপত্তো, মত্তিকাপত্তো। তযো পত্তস্স ৰণ্ণা – উক্কট্ঠো পত্তো, মজ্ঝিমো পত্তো, ওমকো পত্তো। উক্কট্ঠো নাম পত্তো অড্ঢাল়্হকোদনং গণ্হাতি চতুভাগং খাদনং তদুপিযং ব্যঞ্জনং। মজ্ঝিমো নাম পত্তো নাল়িকোদনং গণ্হাতি চতুভাগং খাদনং তদুপিযং ব্যঞ্জনং। ওমকো নাম পত্তো পত্থোদনং গণ্হাতি চতুভাগং খাদনং তদুপিযং ব্যঞ্জনং। ততো উক্কট্ঠো অপত্তো ওমকো অপত্তো। সন্নিচযং করেয্যাতি অনধিট্ঠিতো অৰিকপ্পিতো। নিস্সগ্গিযো হোতীতি সহ অরুণুগ্গমনা নিস্সগ্গিযো হোতি। নিস্সজ্জিতব্বো সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বো। তায ভিক্খুনিযা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খুনীনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অযং মে, অয্যে, পত্তো রত্তাতিক্কন্তো নিস্সগ্গিযো, ইমাহং সঙ্ঘস্স নিস্সজ্জামী’’তি। নিস্সজ্জিত্ৰা আপত্তি দেসেতব্বা। ব্যত্তায ভিক্খুনিযা পটিবলায আপত্তি পটিগ্গহেতব্বা। নিস্সট্ঠপত্তো দাতব্বো – ‘‘সুণাতু মে, অয্যে, সঙ্ঘো। অযং পত্তো ইত্থন্নামায ভিক্খুনিযা নিস্সগ্গিযো সঙ্ঘস্স নিস্সট্ঠো। যদি সঙ্ঘস্স পত্তকল্লং, সঙ্ঘো ইমং পত্তং ইত্থন্নামায ভিক্খুনিযা দদেয্যা’’তি। তায ভিক্খুনিযা সম্বহুলা ভিক্খুনিযো উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খুনীনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্সু ৰচনীযা – ‘‘অযং মে, অয্যাযো, পত্তো রত্তাতিক্কন্তো নিস্সগ্গিযো, ইমাহং অয্যানং নিস্সজ্জামী’’তি। নিস্সজ্জিত্ৰা আপত্তি দেসেতব্বা। ব্যত্তায ভিক্খুনিযা পটিবলায আপত্তি পটিগ্গহেতব্বা। নিস্সট্ঠপত্তো দাতব্বো – ‘‘সুণন্তু মে অয্যাযো। অযং পত্তো ইত্থন্নামায ভিক্খুনিযা নিস্সগ্গিযো অয্যানং নিস্সট্ঠো। যদি অয্যানং পত্তকল্লং, অয্যাযো ইমং পত্তং ইত্থন্নামায ভিক্খুনিযা দদেয্যু’’ন্তি। তায ভিক্খুনিযা একং ভিক্খুনিং উপসঙ্কমিত্ৰা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযা – ‘‘অযং মে, অয্যে, পত্তো রত্তাতিক্কন্তো নিস্সগ্গিযো। ইমাহং অয্যায নিস্সজ্জামী’’তি। নিস্সজ্জিত্ৰা আপত্তি দেসেতব্বা। তায ভিক্খুনিযা আপত্তি পটিগ্গহেতব্বা। নিস্সট্ঠপত্তো দাতব্বো – ‘‘ইমং পত্তং অয্যায দম্মী’’তি। ৭৩৬. রত্তাতিক্কন্তে অতিক্কন্তসঞ্ঞা, নিস্সগ্গিযং পাচিত্তিযং। রত্তাতিক্কন্তে ৰেমতিকা, নিস্সগ্গিযং পাচিত্তিযং। রত্তাতিক্কন্তে অনতিক্কন্তসঞ্ঞা, নিস্সগ্গিযং পাচিত্তিযং। অনধিট্ঠিতে অধিট্ঠিতসঞ্ঞা, নিস্সগ্গিযং পাচিত্তিযং। অৰিকপ্পিতে ৰিকপ্পিতসঞ্ঞা, নিস্সগ্গিযং পাচিত্তিযং। অৰিস্সজ্জিতে ৰিস্সজ্জিতসঞ্ঞা , নিস্সগ্গিযং পাচিত্তিযং। অনট্ঠে নট্ঠসঞ্ঞা… অৰিনট্ঠে ৰিনট্ঠসঞ্ঞা… অভিন্নে ভিন্নসঞ্ঞা… অৰিলুত্তে ৰিলুত্তসঞ্ঞা, নিস্সগ্গিযং পাচিত্তিযং। নিস্সগ্গিযং পত্তং অনিস্সজ্জিত্ৰা পরিভুঞ্জতি, আপত্তি দুক্কটস্স। রত্তানতিক্কন্তে অতিক্কন্তসঞ্ঞা, আপত্তি দুক্কটস্স। রত্তানতিক্কন্তে ৰেমতিকা, আপত্তি দুক্কটস্স। রত্তানতিক্কন্তে অনতিক্কন্তসঞ্ঞা অনাপত্তি। ৭৩৭. অনাপত্তি অন্তোঅরুণে অধিট্ঠেতি, ৰিকপ্পেতি, ৰিস্সজ্জেতি, নস্সতি, ৰিনস্সতি, ভিজ্জতি, অচ্ছিন্দিত্ৰা গণ্হন্তি, ৰিস্সাসং গণ্হন্তি, উম্মত্তিকায, আদিকম্মিকাযাতি। তেন খো পন সমযেন ছব্বগ্গিযা ভিক্খুনিযো নিস্সট্ঠপত্তং ন দেন্তি। ভগৰতো এতমত্থং আরোচেসুং। ন, ভিক্খৰে, নিস্সট্ঠপত্তো ন দাতব্বো। যা ন দদেয্য, আপত্তি দুক্কটস্সাতি। পঠমসিক্খাপদং নিট্ঠিতং। ২. দুতিযসিক্খাপদং ৭৩৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে । তেন খো পন সমযেন সম্বহুলা ভিক্খুনিযো গামকাৰাসে ৰস্সংৰুট্ঠা [ৰস্সংৰুত্থা (সী॰ স্যা॰)] সাৰত্থিং অগমংসু ৰত্তসম্পন্না ইরিযাপথসম্পন্না দুচ্চোল়া লূখচীৰরা। উপাসকা তা ভিক্খুনিযো পস্সিত্ৰা – ‘‘ইমা ভিক্খুনিযো ৰত্তসম্পন্না ইরিযাপথসম্পন্না দুচ্চোল়া লূখচীৰরা, ইমা ভিক্খুনিযো অচ্ছিন্না ভৰিস্সন্তী’’তি ভিক্খুনিসঙ্ঘস্স অকালচীৰরং অদংসু। থুল্লনন্দা ভিক্খুনী – ‘‘অম্হাকং কথিনং অত্থতং কালচীৰর’’ন্তি অধিট্ঠহিত্ৰা ভাজাপেসি। উপাসকা তা ভিক্খুনিযো পস্সিত্ৰা এতদৰোচুং – ‘‘অপয্যাহি চীৰরং লদ্ধ’’ন্তি? ‘‘ন মযং, আৰুসো, চীৰরং লভাম। অয্যা থুল্লনন্দা – ‘অম্হাকং কথিনং অত্থতং কালচীৰর’ন্তি অধিট্ঠহিত্ৰা ভাজাপেসী’’তি। উপাসকা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা অকালচীৰরং ‘কালচীৰর’ন্তি অধিট্ঠহিত্ৰা ভাজাপেস্সতী’’তি! অস্সোসুং খো ভিক্খুনিযো তেসং উপাসকানং উজ্ঝাযন্তানং খিয্যন্তানং ৰিপাচেন্তানং। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা অকালচীৰরং ‘কালচীৰর’ন্তি অধিট্ঠহিত্ৰা ভাজাপেস্সতী’’তি! অথ খো তা ভিক্খুনিযো ভিক্খূনং এতমত্থং আরোচেসুং। ভিক্খূ ভগৰতো এতমত্থং আরোচেসুং …পে॰… সচ্চং কির, ভিক্খৰে , থুল্লনন্দা ভিক্খুনী অকালচীৰরং ‘‘কালচীৰর’’ন্তি অধিট্ঠহিত্ৰা ভাজাপেতীতি [ভাজাপেসীতি (ক॰)]? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী অকালচীৰরং ‘‘কালচীৰর’’ন্তি অধিট্ঠহিত্ৰা ভাজাপেস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৭৩৯. ‘‘যা পন ভিক্খুনী অকালচীৰরং ‘কালচীৰর’ন্তি অধিট্ঠহিত্ৰা ভাজাপেয্য, নিস্সগ্গিযং পাচিত্তিয’’ন্তি। ৭৪০. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি। অকালচীৰরং নাম অনত্থতে কথিনে একাদসমাসে উপ্পন্নং, অত্থতে কথিনে সত্তমাসে উপ্পন্নং, কালেপি আদিস্স দিন্নং, এতং অকালচীৰরং নাম। অকালচীৰরং ‘‘কালচীৰর’’ন্তি অধিট্ঠহিত্ৰা ভাজাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন , ভিক্খৰে, নিস্সজ্জিতব্বং…পে॰… ইদং মে, অয্যে, অকালচীৰরং ‘‘কালচীৰর’ন্তি অধিট্ঠহিত্ৰা ভাজাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি। ৭৪১. অকালচীৰরে অকালচীৰরসঞ্ঞা ‘‘কালচীৰর’’ন্তি অধিট্ঠহিত্ৰা ভাজাপেতি, নিস্সগ্গিযং পাচিত্তিযং। অকালচীৰরে ৰেমতিকা ‘‘কালচীৰর’’ন্তি অধিট্ঠহিত্ৰা ভাজাপেতি, আপত্তি দুক্কটস্স। অকালচীৰরে কালচীৰরসঞ্ঞা ‘‘কালচীৰর’’ন্তি অধিট্ঠহিত্ৰা ভাজাপেতি , অনাপত্তি। কালচীৰরে অকালচীৰরসঞ্ঞা, আপত্তি দুক্কটস্স। কালচীৰরে ৰেমতিকা, আপত্তি দুক্কটস্স। কালচীৰরে কালচীৰরসঞ্ঞা, অনাপত্তি। ৭৪২. অনাপত্তি অকালচীৰরং কালচীৰরসঞ্ঞা ভাজাপেতি, কালচীৰরং কালচীৰরসঞ্ঞা ভাজাপেতি, উম্মত্তিকায, আদিকম্মিকাযাতি। দুতিযসিক্খাপদং নিট্ঠিতং। ৩. ততিযসিক্খাপদং ৭৪৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী অঞ্ঞতরায ভিক্খুনিযা সদ্ধিং চীৰরং পরিৰত্তেত্ৰা পরিভুঞ্জি। অথ খো সা ভিক্খুনী তং চীৰরং সঙ্ঘরিত্ৰা[সংহরিত্ৰা (ক॰)] নিক্খিপি। থুল্লনন্দা ভিক্খুনী তং ভিক্খুনিং এতদৰোচ – ‘‘যং তে, অয্যে, মযা সদ্ধিং চীৰরং পরিৰত্তিতং, কহং তং চীৰর’’ন্তি? অথ খো সা ভিক্খুনী তং চীৰরং নীহরিত্ৰা থুল্লনন্দায ভিক্খুনিযা দস্সেসি। থুল্লনন্দা ভিক্খুনী তং ভিক্খুনিং এতদৰোচ – ‘‘হন্দায্যে, তুয্হং চীৰরং, আহর মে’তং চীৰরং, যং তুয্হং তুয্হমেৰেতং, যং ময্হং ময্হমেৰেতং, আহর মে’তং, সকং পচ্চাহরা’’তি অচ্ছিন্দি। অথ খো সা ভিক্খুনী ভিক্খুনীনং এতমত্থং আরোচেসি। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা ভিক্খুনিযা সদ্ধিং চীৰরং পরিৰত্তেত্ৰা অচ্ছিন্দিস্সতী’’তি! অথ খো তা ভিক্খুনিযো ভিক্খূনং এতমত্থং আরোচেসুং। ভিক্খূ ভগৰতো এতমত্থং আরাচেসুং…পে॰… সচ্চং কির, ভিক্খৰে, থুল্লনন্দা ভিক্খুনী ভিক্খুনিযা সদ্ধিং চীৰরং পরিৰত্তেত্ৰা অচ্ছিন্দতীতি [অচ্ছিন্দীতি (ক॰)]? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী ভিক্খুনিযা সদ্ধিং চীৰরং পরিৰত্তেত্ৰা অচ্ছিন্দিস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৭৪৪. ‘‘যা পন ভিক্খুনী ভিক্খুনিযা সদ্ধিং চীৰরং পরিৰত্তেত্ৰা সা পচ্ছা এৰং ৰদেয্য – ‘হন্দায্যে, তুয্হং চীৰরং আহর, মেতং চীৰরং, যং তুয্হং তুয্হমেৰেতং, যং ময্হং ময্হমেৰেতং, আহর মেতং, সকং পচ্চাহরা’তি অচ্ছিন্দেয্য ৰা অচ্ছিন্দাপেয্য ৰা, নিস্সগ্গিযং পাচিত্তিয’’ন্তি। ৭৪৫. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি। ভিক্খুনিযা সদ্ধিন্তি অঞ্ঞায ভিক্খুনিযা সদ্ধিং। চীৰরং নাম ছন্নং চীৰরানং অঞ্ঞতরং চীৰরং ৰিকপ্পনুপগং পচ্ছিমং। পরিৰত্তেত্ৰাতি পরিত্তেন ৰা ৰিপুলং, ৰিপুলেন ৰা পরিত্তং। অচ্ছিন্দেয্যাতি সযং অচ্ছিন্দতি নিস্সগ্গিযং পাচিত্তিযং। অচ্ছিন্দাপেয্যাতি অঞ্ঞং আণাপেতি, আপত্তি দুক্কটস্স। সকিং আণত্তা বহুকম্পি অচ্ছিন্দতি, নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে অয্যে চীৰরং ভিক্খুনিযা সদ্ধিং পরিৰত্তেত্ৰা অচ্ছিন্নং নিস্সগ্গিযং, ইমাহং সঙ্ঘস্স নিস্সজ্জামী’’তি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি। ৭৪৬. উপসম্পন্নায উপসম্পন্নসঞ্ঞা চীৰরং পরিৰত্তেত্ৰা অচ্ছিন্দতি ৰা অচ্ছিন্দাপেতি ৰা, নিস্সগ্গিযং পাচিত্তিযং। উপসম্পন্নায ৰেমতিকা চীৰরং পরিৰত্তেত্ৰা অচ্ছিন্দতি ৰা অচ্ছিন্দাপেতি ৰা, নিস্সগ্গিযং পাচিত্তিযং। উপসম্পন্নায অনুপসম্পন্নসঞ্ঞা চীৰরং পরিৰত্তেত্ৰা অচ্ছিন্দতি ৰা অচ্ছিন্দাপেতি ৰা, নিস্সগ্গিযং পাচিত্তিযং। অঞ্ঞং পরিক্খারং পরিৰত্তেত্ৰা অচ্ছিন্দতি ৰা অচ্ছিন্দাপেতি ৰা, আপত্তি দুক্কটস্স। অনুপসম্পন্নায সদ্ধিং চীৰরং ৰা অঞ্ঞং ৰা পরিক্খারং পরিৰত্তেত্ৰা অচ্ছিন্দতি ৰা অচ্ছিন্দাপেতি ৰা, আপত্তি দুক্কটস্স। অনুপসম্পন্নায উপসম্পন্নসঞ্ঞা, আপত্তি দুক্কটস্স। অনুপসম্পন্নায ৰেমতিকা, আপত্তি দুক্কটস্স। অনুপসম্পন্নায অনুপসম্পন্নসঞ্ঞা, আপত্তি দুক্কটস্স। ৭৪৭. অনাপত্তি সা ৰা দেতি, তস্সা ৰা ৰিস্সসন্তী গণ্হাতি, উম্মত্তিকায, আদিকম্মিকাযাতি। ততিযসিক্খাপদং নিট্ঠিতং। ৪. চতুত্থসিক্খাপদং ৭৪৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী গিলানা হোতি। অথ খো অঞ্ঞতরো উপাসকো যেন থুল্লনন্দা ভিক্খুনী তেনুপসঙ্কমি; উপসঙ্কমিত্ৰা থুল্লনন্দং ভিক্খুনিং এতদৰোচ – ‘‘কিং তে, অয্যে, অফাসু, কিং আহরীযতূ’’তি? ‘‘সপ্পিনা মে, আৰুসো, অত্থো’’তি। অথ খো সো উপাসকো অঞ্ঞতরস্স আপণিকস্স ঘরা কহাপণস্স সপ্পিং আহরিত্ৰা থুল্লনন্দায ভিক্খুনিযা অদাসি। থুল্লনন্দা ভিক্খুনী এৰমাহ – ‘‘ন মে, আৰুসো, সপ্পিনা অত্থো; তেলেন মে অত্থো’’তি। অথ খো সো উপাসকো যেন সো আপণিকো তেনুপসঙ্কমি; উপসঙ্কমিত্ৰা তং আপণিকং এতদৰোচ – ‘‘ন কিরায্যো অয্যায সপ্পিনা অত্থো, তেলেন অত্থো। হন্দ তে সপ্পিং, তেলং মে দেহী’’তি। ‘‘সচে মযং অয্যো ৰিক্কীতং ভণ্ডং পুন আদিযিস্সাম [আহরিস্সাম (ক॰)], কদা অম্হাকং ভণ্ডং ৰিক্কাযিস্সতি [ৰিক্কীযিস্সতি (?)]; সপ্পিস্স কযেন সপ্পি হটং, তেলস্স কযং আহর, তেলং হরিস্সসী’’তি। অথ খো সো উপাসকো উজ্ঝাযতি খিয্যতি ৰিপাচেতি – ‘‘কথঞ্হি নাম অয্যা থুল্লনন্দা অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপেস্সতী’’তি! অস্সোসুং খো ভিক্খুনিযো তস্স উপাসকস্স উজ্ঝাযন্তস্স খিয্যন্তস্স ৰিপাচেন্তস্স। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি…পে॰… অথ খো তা ভিক্খুনিযো ভিক্খূনং এতমত্থং আরোচেসুং। ভিক্খূ ভগৰতো এতমত্থং আরোচেসুং…পে॰… সচ্চং কির, ভিক্খৰে, থুল্লনন্দা ভিক্খুনী অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপেতীতি [ৰিঞ্ঞাপেসীতি (ক॰)]? ‘‘সচ্চং, ভগৰা’’তি। ৰিগরহি বুদ্ধো ভগৰা …পে॰… কথঞ্হি নাম, ভিক্খৰে, থুল্লনন্দা ভিক্খুনী অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপেস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৭৪৯. ‘‘যা পন ভিক্খুনী অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপেয্য, নিস্সগ্গিযং পাচিত্তিয’’ন্তি। ৭৫০. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি। অঞ্ঞং ৰিঞ্ঞাপেত্ৰাতি যং কিঞ্চি ৰিঞ্ঞাপেত্ৰা। অঞ্ঞং ৰিঞ্ঞাপেয্যাতি তং ঠপেত্ৰা অঞ্ঞং ৰিঞ্ঞাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে অয্যে অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপিতং নিস্সগ্গিযং, ইমাহং সঙ্ঘস্স নিস্সজ্জামীতি…পে॰… দদেয্যাতি…পে॰… দদেয্যুন্তি…পে॰… অয্যায দম্মী’’তি। ৭৫১. অঞ্ঞে অঞ্ঞসঞ্ঞা অঞ্ঞং ৰিঞ্ঞাপেতি, নিস্সগ্গিযং পাচিত্তিযং। অঞ্ঞে ৰেমতিকা অঞ্ঞং ৰিঞ্ঞাপেতি, নিস্সগ্গিযং পাচিত্তিযং। অঞ্ঞে অনঞ্ঞসঞ্ঞা অঞ্ঞং ৰিঞ্ঞাপেতি, নিস্সগ্গিযং পাচিত্তিযং। অনঞ্ঞে অঞ্ঞসঞ্ঞা অনঞ্ঞং ৰিঞ্ঞাপেতি, আপত্তি দুক্কটস্স। অনঞ্ঞে ৰেমতিকা অনঞ্ঞং ৰিঞ্ঞাপেতি, আপত্তি দুক্কটস্স। অনঞ্ঞে অনঞ্ঞসঞ্ঞা, অনাপত্তি। ৭৫২. অনাপত্তি তঞ্ঞেৰ [তঞ্চেৰ (স্যা॰)] ৰিঞ্ঞাপেতি, অঞ্ঞঞ্চ ৰিঞ্ঞাপেতি, আনিসংসং দস্সেত্ৰা ৰিঞ্ঞাপেতি, উম্মত্তিকায, আদিকম্মিকাযাতি। চতুত্থসিক্খাপদং নিট্ঠিতং। ৫. পঞ্চমসিক্খাপদং ৭৫৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী গিলানা হোতি। অথ খো অঞ্ঞতরো উপাসকো যেন থুল্লনন্দা ভিক্খুনী তেনুপসঙ্কমি; উপসঙ্কমিত্ৰা থুল্লনন্দং ভিক্খুনিং এতদৰোচ – ‘‘কচ্চি, অয্যে, খমনীযং কচ্চি যাপনীয’’ন্তি? ‘‘ন মে, আৰুসো, খমনীযং, ন যাপনীয’’ন্তি। ‘‘অমুকস্স, অয্যে, আপণিকস্স ঘরে কহাপণং নিক্খিপিস্সামি, ততো যং ইচ্ছেয্যাসি তং আহরাপেয্যাসী’’তি। থুল্লনন্দা ভিক্খুনী অঞ্ঞতরং সিক্খমানং আণাপেসি – ‘‘গচ্ছ, সিক্খমানে, অমুকস্স আপণিকস্স ঘরা কহাপণস্স তেলং আহরা’’তি। অথ খো সা সিক্খমানা তস্স আপণিকস্স ঘরা কহাপণস্স তেলং আহরিত্ৰা থুল্লনন্দায ভিক্খুনিযা অদাসি। থুল্লনন্দা ভিক্খুনী এৰমাহ – ‘‘ন মে, সিক্খমানে, তেলেন অত্থো, সপ্পিনা মে অত্থো’’তি। অথ খো সা সিক্খমানা যেন সো আপণিকো তেনুপসঙ্কমি; উপসঙ্কমিত্ৰা তং আপণিকং এতদৰোচ – ‘‘ন কির, আৰুসো, অয্যায তেলেন অত্থো, সপ্পিনা অত্থো, হন্দ তে তেলং, সপ্পিং মে দেহী’’তি। ‘‘সচে মযং, অয্যে, ৰিক্কীতং ভণ্ডং পুন আদিযিস্সাম, কদা অম্হাকং ভণ্ডং ৰিক্কাযিস্সতি! তেলস্স কযেন তেলং হটং, সপ্পিস্স কযং আহর, সপ্পিং হরিস্সসী’’তি। অথ খো সা সিক্খমানা রোদন্তী অট্ঠাসি। ভিক্খুনিযো তং সিক্খমানং এতদৰোচুং – ‘‘কিস্স ত্ৰং, সিক্খমানে, রোদসী’’তি? অথ খো সা সিক্খমানা ভিক্খুনীনং এতমত্থং আরোচেসি। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা অঞ্ঞং চেতাপেত্ৰা অঞ্ঞং চেতাপেস্সতী’’তি…পে॰… সচ্চং কির, ভিক্খৰে, থুল্লনন্দা ভিক্খুনী অঞ্ঞং চেতাপেত্ৰা অঞ্ঞং চেতাপেতীতি [চেতাপেসীতি (ক॰)]? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী অঞ্ঞং চেতাপেত্ৰা অঞ্ঞং চেতাপেস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৭৫৪. ‘‘যা পন ভিক্খুনী অঞ্ঞং চেতাপেত্ৰা অঞ্ঞং চেতাপেয্য, নিস্সগ্গিযং পাচিত্তিয’’ন্তি। ৭৫৫. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি। অঞ্ঞং চেতাপেত্ৰাতি যং কিঞ্চি চেতাপেত্ৰা। অঞ্ঞং চেতাপেয্যাতি তং ঠপেত্ৰা অঞ্ঞং চেতাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে, অয্যে, অঞ্ঞং চেতাপেত্ৰা অঞ্ঞং চেতাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি। ৭৫৬. অঞ্ঞে অঞ্ঞসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞে ৰেমতিকা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞে অনঞ্ঞসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। অনঞ্ঞে অঞ্ঞসঞ্ঞা অনঞ্ঞং চেতাপেতি, আপত্তি দুক্কটস্স। অনঞ্ঞে ৰেমতিকা অনঞ্ঞং চেতাপেতি, আপত্তি দুক্কটস্স। অনঞ্ঞে অনঞ্ঞসঞ্ঞা অনাপত্তি। ৭৫৭. অনাপত্তি তঞ্ঞেৰ [তঞ্চেৰ (স্যা॰)] চেতাপেতি, অঞ্ঞঞ্চ চেতাপেতি, আনিসংসং দস্সেত্ৰা চেতাপেতি, উম্মত্তিকায, আদিকম্মিকাযাতি। পঞ্চমসিক্খাপদং নিট্ঠিতং। ৬. ছট্ঠসিক্খাপদং ৭৫৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন উপাসকা ভিক্খুনিসঙ্ঘস্স চীৰরত্থায ছন্দকং সঙ্ঘরিত্ৰা অঞ্ঞতরস্স পাৰারিকস্স ঘরে পরিক্খারং নিক্খিপিত্ৰা ভিক্খুনিযো উপসঙ্কমিত্ৰা এতদৰোচুং – ‘‘অমুকস্স, অয্যে, পাৰারিকস্স ঘরে চীৰরত্থায পরিক্খারো নিক্খিত্তো, ততো চীৰরং আহরাপেত্ৰা ভাজেথা’’তি। ভিক্খুনিযো তেন পরিক্খারেন ভেসজ্জং চেতাপেত্ৰা পরিভুঞ্জিংসু। উপাসকা জানিত্ৰা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন অঞ্ঞং চেতাপেস্সন্তী’’তি! অস্সোসুং খো ভিক্খুনিযো তেসং উপাসকানং উজ্ঝাযন্তানং খিয্যন্তানং ৰিপাচেন্তানং। যা তা ভিক্খুনিযো অপ্পিচ্ছা …পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন অঞ্ঞং চেতাপেস্সন্তী’’তি…পে॰… সচ্চং কির, ভিক্খৰে, ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন অঞ্ঞং চেতাপেন্তীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন অঞ্ঞং চেতাপেস্সন্তি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৭৫৯. ‘‘যা পন ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন অঞ্ঞং চেতাপেয্য, নিস্সগ্গিযং পাচিত্তিয’’ন্তি। ৭৬০. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি। অঞ্ঞদত্থিকেন পরিক্খারেন অঞ্ঞুদ্দিসিকেনাতি অঞ্ঞস্সত্থায দিন্নেন। সঙ্ঘিকেনাতি সঙ্ঘস্স, ন গণস্স, ন একভিক্খুনিযা। অঞ্ঞং চেতাপেয্যাতি যংঅত্থায দিন্নং, তং ঠপেত্ৰা অঞ্ঞং চেতাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে, অয্যে, অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন অঞ্ঞং চেতাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি।…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি। ৭৬১. অঞ্ঞদত্থিকে অঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞদত্থিকে ৰেমতিকা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞদত্থিকে অনঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। নিস্সট্ঠং পটিলভিত্ৰা যথাদানে উপনেতব্বং। অনঞ্ঞদত্থিকে অঞ্ঞদত্থিকসঞ্ঞা, আপত্তি দুক্কটস্স। অনঞ্ঞদত্থিকে ৰেমতিকা, আপত্তি দুক্কটস্স। অনঞ্ঞদত্থিকে অনঞ্ঞদত্থিকসঞ্ঞা, অনাপত্তি। ৭৬২. অনাপত্তি সেসকং উপনেতি, সামিকে অপলোকেত্ৰা উপনেতি, আপদাসু, উম্মত্তিকায, আদিকম্মিকাযাতি। ছট্ঠসিক্খাপদং নিট্ঠিতং। ৭. সত্তমসিক্খাপদং ৭৬৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন উপাসকা ভিক্খুনিসঙ্ঘস্স চীৰরত্থায ছন্দকং সঙ্ঘরিত্ৰা অঞ্ঞতরস্স পাৰারিকস্স ঘরে পরিক্খারং নিক্খিপিত্ৰাভিক্খুনিযো উপসঙ্কমিত্ৰা এতদৰোচুং – ‘‘অমুকস্স, অয্যে, পাৰারিকস্স ঘরে চীৰরত্থায পরিক্খারো নিক্খিত্তো, ততো চীৰরং আহরাপেত্ৰা ভাজেথা’’তি। ভিক্খুনিযো তেন চ পরিক্খারেন সযম্পি যাচিত্ৰা ভেসজ্জং চেতাপেত্ৰা পরিভুঞ্জিংসু। উপাসকা জানিত্ৰা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপেস্সন্তী’’তি…পে॰… সচ্চং কির, ভিক্খৰে, ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপেন্তীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপেস্সন্তি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৭৬৪. ‘‘যা পন ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপেয্য, নিস্সগ্গিযং পাচিত্তিয’’ন্তি। ৭৬৫. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি। অঞ্ঞদত্থিকেন পরিক্খারেন অঞ্ঞুদ্দিসিকেনাতি অঞ্ঞস্সত্থায দিন্নেন। সঙ্ঘিকেনাতি সঙ্ঘস্স, ন গণস্স, ন একভিক্খুনিযা। সঞ্ঞাচিকেনাতি সযং যাচিত্ৰা। অঞ্ঞং চেতাপেয্যাতি যংঅত্থায দিন্নং তং ঠপেত্ৰা অঞ্ঞং চেতাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে, অয্যে, অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি। ৭৬৬. অঞ্ঞদত্থিকে অঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞদত্থিকে ৰেমতিকা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞদত্থিকে অনঞ্ঞদত্থিকসঞ্ঞা অঞ্ঞং চেতাপেতি , নিস্সগ্গিযং পাচিত্তিযং। নিস্সট্ঠং পটিলভিত্ৰা যথাদানে উপনেতব্বং। অনঞ্ঞদত্থিকে অঞ্ঞদত্থিকসঞ্ঞা, আপত্তি দুক্কটস্স। অনঞ্ঞদত্থিকে ৰেমতিকা, আপত্তি দুক্কটস্স। অনঞ্ঞদত্থিকে অনঞ্ঞদত্থিকসঞ্ঞা, অনাপত্তি। ৭৬৭. অনাপত্তি সেসকং উপনেতি, সামিকে অপলোকেত্ৰা উপনেতি, আপদাসু, উম্মত্তিকায, আদিকম্মিকাযাতি। সত্তমসিক্খাপদং নিট্ঠিতং। ৮. অট্ঠমসিক্খাপদং ৭৬৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন অঞ্ঞতরস্স পূগস্স পরিৰেণৰাসিকা ভিক্খুনিযো যাগুযা কিলমন্তি। অথ খো সো পূগো ভিক্খুনীনং যাগুঅত্থায ছন্দকং সঙ্ঘরিত্ৰা অঞ্ঞতরস্স আপণিকস্স ঘরে পরিক্খারং নিক্খিপিত্ৰা ভিক্খুনিযো উপসঙ্কমিত্ৰা এতদৰোচ – ‘‘অমুকস্স, অয্যে, আপণিকস্স ঘরে যাগুঅত্থায পরিক্খারো নিক্খিত্তো, ততো তণ্ডুলং আহরাপেত্ৰা যাগুং পচাপেত্ৰা পরিভুঞ্জথা’’তি। ভিক্খুনিযো তেন পরিক্খারেন ভেসজ্জং চেতাপেত্ৰা পরিভুঞ্জিংসু। সো পূগো জানিত্ৰা উজ্ঝাযতি খিয্যতি ৰিপাচেতি – ‘‘কথঞ্হি নাম ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন অঞ্ঞং চেতাপেস্সন্তী’’তি…পে॰… সচ্চং কির, ভিক্খৰে, ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন অঞ্ঞং চেতাপেন্তীতি? ‘‘সচ্চং, ভগৰা’’তি । ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন অঞ্ঞং চেতাপেস্সন্তি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৭৬৯. ‘‘যা পন ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন অঞ্ঞং চেতাপেয্য, নিস্সগ্গিযং পাচিত্তিয’’ন্তি। ৭৭০. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি। অঞ্ঞদত্থিকেন পরিক্খারেন অঞ্ঞুদ্দিসিকেনাতি অঞ্ঞস্সত্থায দিন্নেন। মহাজনিকেনাতি গণস্স, ন সঙ্ঘস্স, ন একভিক্খুনিযা। অঞ্ঞং চেতাপেয্যাতি যংঅত্থায দিন্নং তং ঠপেত্ৰা অঞ্ঞং চেতাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে, অয্যে, অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন অঞ্ঞং চেতাপিতং নিস্সগ্গিযং ইমাহং সঙ্ঘস্স নিস্সজ্জামী’’তি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি। ৭৭১. অঞ্ঞদত্থিকে অঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞদত্থিকে ৰেমতিকা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞদত্থিকে অনঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। নিস্সট্ঠং পটিলভিত্ৰা যথাদানে উপনেতব্বং। অনঞ্ঞদত্থিকে অঞ্ঞদত্থিকসঞ্ঞা, আপত্তি দুক্কটস্স। অনঞ্ঞদত্থিকে ৰেমতিকা, আপত্তি দুক্কটস্স। অনঞ্ঞদত্থিকে অনঞ্ঞদত্থিকসঞ্ঞা, অনাপত্তি। ৭৭২. অনাপত্তি সেসকং উপনেতি, সামিকে অপলোকেত্ৰা উপনেতি, আপদাসু, উম্মত্তিকায, আদিকম্মিকাযাতি। অট্ঠমসিক্খাপদং নিট্ঠিতং। ৯. নৰমসিক্খাপদং ৭৭৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন অঞ্ঞতরস্স পূগস্স পরিৰেণৰাসিকা ভিক্খুনিযো যাগুযা কিলমন্তি। অথ খো সো পূগো ভিক্খুনীনং যাগুঅত্থায ছন্দকং সঙ্ঘরিত্ৰা অঞ্ঞতরস্স আপণিকস্স ঘরে পরিক্খারং নিক্খিপিত্ৰা ভিক্খুনিযো উপসঙ্কমিত্ৰা এতদৰোচ – ‘‘অমুকস্স, অয্যে, আপণিকস্স ঘরে যাগুঅত্থায পরিক্খারো নিক্খিত্তো। ততো তণ্ডুলে আহরাপেত্ৰা যাগুং পচাপেত্ৰা পরিভুঞ্জথা’’তি। ভিক্খুনিযো তেন চ পরিক্খারেন সযম্পি যাচিত্ৰা ভেসজ্জং চেতাপেত্ৰা পরিভুঞ্জিংসু। সো পূগো জানিত্ৰা উজ্ঝাযতি খিয্যতি ৰিপাচেতি – ‘‘কথঞ্হি নাম ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপেস্সন্তী’’তি…পে॰… সচ্চং কির, ভিক্খৰে, ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপেন্তীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, ভিক্খুনিযো অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপেস্সন্তি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৭৭৪. ‘‘যা পন ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপেয্য, নিস্সগ্গিযং পাচিত্তিয’’ন্তি। ৭৭৫. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি। অঞ্ঞদত্থিকেন পরিক্খারেন অঞ্ঞুদ্দিসিকেনাতি অঞ্ঞস্সত্থায দিন্নেন। মহাজনিকেনাতি গণস্স, ন সঙ্ঘস্স, ন একভিক্খুনিযা। সঞ্ঞাচিকেনাতি সযং যাচিত্ৰা। অঞ্ঞং চেতাপেয্যাতি যংঅত্থায দিন্নং তং ঠপেত্ৰা অঞ্ঞং চেতাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে, অয্যে, অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপিতং নিস্সগ্গিযং। ইমাহং সঙ্ঘস্স নিস্সজ্জামী’’তি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি। ৭৭৬. অঞ্ঞদত্থিকে অঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞদত্থিকে ৰেমতিকা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞদত্থিকে অনঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। নিস্সট্ঠং পটিলভিত্ৰা যথাদানে উপনেতব্বং। অনঞ্ঞদত্থিকে অঞ্ঞদত্থিকসঞ্ঞা, আপত্তি দুক্কটস্স। অনঞ্ঞদত্থিকে ৰেমতিকা, আপত্তি দুক্কটস্স। অনঞ্ঞদত্থিকে অনঞ্ঞদত্থিকসঞ্ঞা অনাপত্তি। ৭৭৭. অনাপত্তি সেসকং উপনেতি, সামিকে অপলোকেত্ৰা উপনেতি, আপদাসু, উম্মত্তিকায, আদিকম্মিকাযাতি। নৰমসিক্খাপদং নিট্ঠিতং। ১০. দসমসিক্খাপদং ৭৭৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী বহুস্সুতা হোতি ভাণিকা ৰিসারদা পট্টা ধম্মিং কথং কাতুং। বহূ মনুস্সা থুল্লনন্দং ভিক্খুনিং পযিরুপাসন্তি। তেন খো পন সমযেন থুল্লনন্দায ভিক্খুনিযা পরিৰেণং উন্দ্রিযতি [উদ্রীযতি (স্যা॰)]। মনুস্সা থুল্লনন্দং ভিক্খুনিং এতদৰোচুং – ‘‘কিস্সিদং তে, অয্যে, পরিৰেণং উন্দ্রিযতী’’তি? ‘‘নত্থাৰুসো, দাযকা, নত্থি কারকা’’তি। অথ খো তে মনুস্সা থুল্লনন্দায ভিক্খুনিযা পরিৰেণত্থায ছন্দকং সঙ্ঘরিত্ৰা থুল্লনন্দায ভিক্খুনিযা পরিক্খারং অদংসু। থুল্লনন্দা ভিক্খুনী তেন চ পরিক্খারেন সযম্পি যাচিত্ৰা ভেসজ্জং চেতাপেত্ৰা পরিভুঞ্জি। মনুস্সা জানিত্ৰা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা অঞ্ঞদত্থিকেন পরিক্খারেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেস্সতী’’তি…পে॰… সচ্চং কির, ভিক্খৰে, থুল্লনন্দা ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেতীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৭৭৯. ‘‘যা পন ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেয্য, নিস্সগ্গিযং পাচিত্তিয’’ন্তি। ৭৮০. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি। অঞ্ঞদত্থিকেন পরিক্খারেন অঞ্ঞুদ্দিসিকেনাতি অঞ্ঞস্সত্থায দিন্নেন। পুগ্গলিকেনাতি একায ভিক্খুনিযা, ন সঙ্ঘস্স, ন গণস্স। সঞ্ঞাচিকেনাতি সযং যাচিত্ৰা। অঞ্ঞং চেতাপেয্যাতি যংঅত্থায দিন্নং তং ঠপেত্ৰা অঞ্ঞং চেতাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে, অয্যে, অঞ্ঞদত্থিকেন পরিক্খারেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি। ৭৮১. অঞ্ঞদত্থিকে অঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞদত্থিকে ৰেমতিকা অঞ্ঞং চেতাপেতি, নিস্সগ্গিযং পাচিত্তিযং। অঞ্ঞদত্থিকে অনঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং। নিস্সট্ঠং পটিলভিত্ৰা যথাদানে উপনেতব্বং। অনঞ্ঞদত্থিকে অঞ্ঞদত্থিকসঞ্ঞা, আপত্তি দুক্কটস্স। অনঞ্ঞদত্থিকে ৰেমতিকা, আপত্তি দুক্কটস্স। অনঞ্ঞদত্থিকে অনঞ্ঞদত্থিকসঞ্ঞা, অনাপত্তি। ৭৮২. অনাপত্তি সেসকং উপনেতি, সামিকে অপলোকেত্ৰা উপনেতি, আপদাসু, উম্মত্তিকায, আদিকম্মিকাযাতি। দসমসিক্খাপদং নিট্ঠিতং। ১১. একাদসমসিক্খাপদং ৭৮৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী বহুস্সুতা হোতি ভাণিকা ৰিসারদা পট্টা ধম্মিং কথং কাতুং। অথ খো রাজা পসেনদি কোসলো সীতকালে মহগ্ঘং কম্বলং পারুপিত্ৰা যেন থুল্লনন্দা ভিক্খুনী তেনুপসঙ্কমি; উপসঙ্কমিত্ৰা থুল্লনন্দং ভিক্খুনিং অভিৰাদেত্ৰা একমন্তং নিসীদি। একমন্তং নিসিন্নং খো রাজানং পসেনদিং কোসলং থুল্লনন্দা ভিক্খুনী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো রাজা পসেনদি কোসলো থুল্লনন্দায ভিক্খুনিযা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো থুল্লনন্দং ভিক্খুনিং এতদৰোচ – ‘‘ৰদেয্যাসি, অয্যে, যেন অত্থো’’তি? ‘‘সচে মে ত্ৰং, মহারাজ, দাতুকামোসি, ইমং কম্বলং দেহী’’তি। অথ খো রাজা পসেনদি কোসলো থুল্লনন্দায ভিক্খুনিযা কম্বলং দত্ৰা উট্ঠাযাসনা থুল্লনন্দং ভিক্খুনিং অভিৰাদেত্ৰা পদক্খিণং কত্ৰা পক্কামি। মনুস্সা উজ্ঝাযন্তি খিয্যন্তি ৰিপাচেন্তি – ‘‘মহিচ্ছা ইমা ভিক্খুনিযো অসন্তুট্ঠা। কথঞ্হি নাম রাজানং কম্বলং ৰিঞ্ঞাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা রাজানং কম্বলং ৰিঞ্ঞাপেস্সতী’’তি…পে॰… সচ্চং কির, ভিক্খৰে, থুল্লনন্দা ভিক্খুনী রাজানং কম্বলং ৰিঞ্ঞাপেতীতি [ৰিঞ্ঞাপেসীতি (ক॰)]? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী রাজানং কম্বলং ৰিঞ্ঞাপেস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৭৮৪. ‘‘গরুপাৰুরণং [পাপুরণং (সী॰ স্যা॰)] পন ভিক্খুনিযা চেতাপেন্তিযা চতুক্কংসপরমং চেতাপেতব্বং। ততো চে উত্তরি চেতাপেয্য, নিস্সগ্গিযং পাচিত্তিয’’ন্তি। ৭৮৫. গরুপাৰুরণং নাম যং কিঞ্চি সীতকালে পাৰুরণং। চেতাপেন্তিযাতি ৰিঞ্ঞাপেন্তিযা। চতুক্কংসপরমং চেতাপেতব্বন্তি সোল়সকহাপণগ্ঘনকং চেতাপেতব্বং। ততো চে উত্তরি চেতাপেয্যাতি ততুত্তরি ৰিঞ্ঞাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে, অয্যে, গরুপাৰুরণং অতিরেকচতুক্কংসপরমং চেতাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি। ৭৮৬. অতিরেকচতুক্কংসে অতিরেকসঞ্ঞা চেতাপেতি, নিস্সগ্গিযং পাচিত্তিযং। অতিরেকচতুক্কংসে ৰেমতিকা চেতাপেতি, নিস্সগ্গিযং পাচিত্তিযং । অতিরেকচতুক্কংসে ঊনকসঞ্ঞা চেতাপেতি, নিস্সগ্গিযং পাচিত্তিযং। ঊনকচতুক্কংসে অতিরেকসঞ্ঞা, আপত্তি দুক্কটস্স। ঊনকচতুক্কংসে ৰেমতিকা, আপত্তি দুক্কটস্স। ঊনকচতুক্কংসে ঊনকসঞ্ঞা, অনাপত্তি। ৭৮৭. অনাপত্তি চতুক্কংসপরমং চেতাপেতি, ঊনকচতুক্কংসপরমং চেতাপেতি, ঞাতকানং, পৰারিতানং, অঞ্ঞস্সত্থায, অত্তনো ধনেন, মহগ্ঘং চেতাপেতুকামস্স অপ্পগ্ঘং চেতাপেতি, উম্মত্তিকায, আদিকম্মিকাযাতি। একাদসমসিক্খাপদং নিট্ঠিতং। ১২. দ্ৰাদসমসিক্খাপদং ৭৮৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী বহুস্সুতা হোতি ভাণিকা ৰিসারদা পট্টা ধম্মিং কথং কাতুং। অথ খো রাজা পসেনদি কোসলো উণ্হকালে মহগ্ঘং খোমং পারুপিত্ৰা যেন থুল্লনন্দা ভিক্খুনী তেনুপসঙ্কমি; উপসঙ্কমিত্ৰা থুল্লনন্দং ভিক্খুনিং অভিৰাদেত্ৰা একমন্তং নিসীদি। একমন্তং নিসিন্নং খো রাজানং পসেনদিং কোসলং থুল্লনন্দা ভিক্খুনী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো রাজা পসেনদি কোসলো থুল্লনন্দায ভিক্খুনিযা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো থুল্লনন্দং ভিক্খুনিং এতদৰোচ – ‘‘ৰদেয্যাসি, অয্যে, যেন অত্থো’’তি । ‘‘সচে মে ত্ৰং, মহারাজ, দাতুকামোসি, ইমং খোমং দেহী’’তি। অথ খো রাজা পসেনদি কোসলো থুল্লনন্দায ভিক্খুনিযা খোমং দত্ৰা উট্ঠাযাসনা থুল্লনন্দং ভিক্খুনিং অভিৰাদেত্ৰা পদক্খিণং কত্ৰা পক্কামি। মনুস্সা উজ্ঝাযন্তি খিয্যন্তি ৰিপাচেন্তি – ‘‘মহিচ্ছা ইমা ভিক্খুনিযো অসন্তুট্ঠা। কথঞ্হি নাম রাজানং খোমং ৰিঞ্ঞাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা রাজানং খোমং ৰিঞ্ঞাপেস্সতী’’তি…পে॰… সচ্চং কির, ভিক্খৰে, থুল্লনন্দা ভিক্খুনী রাজানং খোমং ৰিঞ্ঞাপেতীতি [ৰিঞ্ঞাপেসীতি (ক॰)]? ‘‘সচ্চং, ভগৰাতি’’। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী রাজানং খোমং ৰিঞ্ঞাপেস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু – ৭৮৯. ‘‘লহুপাৰুরণং পন ভিক্খুনিযা চেতাপেন্তিযা অড্ঢতেয্যকংসপরমং চেতাপেতব্বং। ততো চে উত্তরি চেতাপেয্য, নিস্সগ্গিযং পাচিত্তিয’’ন্তি। ৭৯০. লহুপাৰুরণং নাম যং কিঞ্চি উণ্হকালে পাৰুরণং। চেতাপেন্তিযাতি ৰিঞ্ঞাপেন্তিযা। অড্ঢতেয্যকংসপরমং চেতাপেতব্বন্তি দসকহাপণগ্ঘনকং চেতাপেতব্বং। ততো চে উত্তরি চেতাপেয্যাতি ততুত্তরি ৰিঞ্ঞাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ইদং মে, অয্যে, লহুপাৰুরণং অতিরেকঅড্ঢতেয্যকংসপরমং চেতাপিতং নিস্সগ্গিযং, ইমাহং সঙ্ঘস্স নিস্সজ্জামীতি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি। ৭৯১. অতিরেকঅড্ঢতেয্যকংসে অতিরেকসঞ্ঞা চেতাপেতি, নিস্সগ্গিযং পাচিত্তিযং। অতিরেকঅড্ঢতেয্যকংসে ৰেমতিকা চেতাপেতি, নিস্সগ্গিযং পাচিত্তিযং। অতিরেকঅড্ঢতেয্যকংসে ঊনকসঞ্ঞা চেতাপেতি, নিস্সগ্গিযং পাচিত্তিযং। ঊনকঅড্ঢতেয্যকংসে অতিরেকসঞ্ঞা, আপত্তি দুক্কটস্স। ঊনকঅড্ঢতেয্যকংসে ৰেমতিকা, আপত্তি দুক্কটস্স। ঊনকঅড্ঢতেয্যকংসে ঊনকসঞ্ঞা , অনাপত্তি। ৭৯২. অনাপত্তি অড্ঢতেয্যকংসপরমং চেতাপেতি, ঊনকঅড্ঢতেয্যকংসপরমং চেতাপেতি, ঞাতকানং, পৰারিতানং, অঞ্ঞস্সত্থায, অত্তনো ধনেন, মহগ্ঘং চেতাপেতুকামস্স অপ্পগ্ঘং চেতাপেতি, উম্মত্তিকায, আদিকম্মিকাযাতি। দ্ৰাদসমসিক্খাপদং নিট্ঠিতং। উদ্দিট্ঠা খো, অয্যাযো, তিংস নিস্সগ্গিযা পাচিত্তিযা ধম্মা। তত্থায্যাযো পুচ্ছামি – ‘‘কচ্চিত্থ পরিসুদ্ধা’’? দুতিযম্পি পুচ্ছামি – ‘‘কচ্চিত্থ পরিসুদ্ধা’’? ততিযম্পি পুচ্ছামি – ‘‘কচ্চিত্থ পরিসুদ্ধা’’? পরিসুদ্ধেত্থায্যাযো, তস্মা তুণ্হী, এৰমেতং ধারযামীতি। ভিক্খুনিৰিভঙ্গে নিস্সগ্গিযকণ্ডং নিট্ঠিতং। |
Copyright © 2011 Bangladesh Buddhist. All rights reserved |