৪. মহাসুদস্সনসুত্তং
২৪১. এৰং মে সুতং – একং সমযং ভগৰা কুসিনারাযং ৰিহরতি উপৰত্তনে মল্লানং সালৰনে অন্তরেন যমকসালানং পরিনিব্বানসমযে। অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘মা, ভন্তে, ভগৰা ইমস্মিং খুদ্দকনগরকে উজ্জঙ্গলনগরকে সাখানগরকে পরিনিব্বাযি। সন্তি, ভন্তে, অঞ্ঞানি মহানগরানি। সেয্যথিদং – চম্পা, রাজগহং, সাৰত্থি, সাকেতং, কোসম্বী, বারাণসী; এত্থ ভগৰা পরিনিব্বাযতু। এত্থ বহূ খত্তিযমহাসালা ব্রাহ্মণমহাসালা গহপতিমহাসালা তথাগতে অভিপ্পসন্না, তে তথাগতস্স সরীরপূজং করিস্সন্তী’’তি। ২৪২. ‘‘মা হেৰং, আনন্দ, অৰচ; মা হেৰং, আনন্দ, অৰচ – খুদ্দকনগরকং উজ্জঙ্গলনগরকং সাখানগরক’’ন্তি। কুসাৰতীরাজধানী ‘‘ভূতপুব্বং, আনন্দ, রাজা মহাসুদস্সনো নাম অহোসি খত্তিযো মুদ্ধাৰসিত্তো [খত্তিযো মুদ্ধাভিসিত্তো (ক॰), চক্কৰত্তীধম্মিকো ধম্মরাজা (মহাপরিনিব্বানসুত্ত)] চাতুরন্তো ৰিজিতাৰী জনপদত্থাৰরিযপ্পত্তো । রঞ্ঞো, আনন্দ, মহাসুদস্সনস্স অযং কুসিনারা কুসাৰতী নাম রাজধানী অহোসি। পুরত্থিমেন চ পচ্ছিমেন চ দ্ৰাদসযোজনানি আযামেন, উত্তরেন চ দক্খিণেন চ সত্তযোজনানি ৰিত্থারেন। কুসাৰতী, আনন্দ, রাজধানী ইদ্ধা চেৰ অহোসি ফীতা চ বহুজনা চ আকিণ্ণমনুস্সা চ সুভিক্খা চ। সেয্যথাপি, আনন্দ , দেৰানং আল়কমন্দা নাম রাজধানী ইদ্ধা চেৰ হোতি ফীতা চ [ইদ্ধা চেৰ অহোসি ফীতা চ (স্যা॰)] বহুজনা চ আকিণ্ণযক্খা চ সুভিক্খা চ; এৰমেৰ খো, আনন্দ, কুসাৰতী রাজধানী ইদ্ধা চেৰ অহোসি ফীতা চ বহুজনা চ আকিণ্ণমনুস্সা চ সুভিক্খা চ। কুসাৰতী, আনন্দ , রাজধানী দসহি সদ্দেহি অৰিৰিত্তা অহোসি দিৰা চেৰ রত্তিঞ্চ, সেয্যথিদং – হত্থিসদ্দেন অস্সসদ্দেন রথসদ্দেন ভেরিসদ্দেন মুদিঙ্গসদ্দেন ৰীণাসদ্দেন গীতসদ্দেন সঙ্খসদ্দেন সম্মসদ্দেন পাণিতাল়সদ্দেন ‘অস্নাথ পিৰথ খাদথা’তি দসমেন সদ্দেন। ‘‘কুসাৰতী, আনন্দ, রাজধানী সত্তহি পাকারেহি পরিক্খিত্তা অহোসি। একো পাকারো সোৰণ্ণমযো, একো রূপিযমযো, একো ৰেল়ুরিযমযো, একো ফলিকমযো, একো লোহিতঙ্কমযো [লোহিতঙ্গমযো (ক॰), লোহিতকমযো (ব্যাকরণেসু)], একো মসারগল্লমযো, একো সব্বরতনমযো। কুসাৰতিযা, আনন্দ, রাজধানিযা চতুন্নং ৰণ্ণানং দ্ৰারানি অহেসুং। একং দ্ৰারং সোৰণ্ণমযং, একং রূপিযমযং, একং ৰেল়ুরিযমযং, একং ফলিকমযং । একেকস্মিং দ্ৰারে সত্ত সত্ত এসিকা নিখাতা অহেসুং তিপোরিসঙ্গা তিপোরিসনিখাতা দ্ৰাদসপোরিসা উব্বেধেন। একা এসিকা সোৰণ্ণমযা, একা রূপিযমযা, একা ৰেল়ুরিযমযা, একা ফলিকমযা, একা লোহিতঙ্কমযা, একা মসারগল্লমযা, একা সব্বরতনমযা। কুসাৰতী, আনন্দ, রাজধানী সত্তহি তালপন্তীহি পরিক্খিত্তা অহোসি। একা তালপন্তি সোৰণ্ণমযা, একা রূপিযমযা, একা ৰেল়ুরিযমযা, একা ফলিকমযা, একা লোহিতঙ্কমযা, একা মসারগল্লমযা, একা সব্বরতনমযা। সোৰণ্ণমযস্স তালস্স সোৰণ্ণমযো খন্ধো অহোসি, রূপিযমযানি পত্তানি চ ফলানি চ। রূপিযমযস্স তালস্স রূপিযমযো খন্ধো অহোসি, সোৰণ্ণমযানি পত্তানি চ ফলানি চ। ৰেল়ুরিযমযস্স তালস্স ৰেল়ুরিযমযো খন্ধো অহোসি, ফলিকমযানি পত্তানি চ ফলানি চ। ফলিকমযস্স তালস্স ফলিকমযো খন্ধো অহোসি, ৰেল়ুরিযমযানি পত্তানি চ ফলানি চ। লোহিতঙ্কমযস্স তালস্স লোহিতঙ্কমযো খন্ধো অহোসি, মসারগল্লমযানি পত্তানি চ ফলানি চ। মসারগল্লমযস্স তালস্স মসারগল্লমযো খন্ধো অহোসি, লোহিতঙ্কমযানি পত্তানি চ ফলানি চ। সব্বরতনমযস্স তালস্স সব্বরতনমযো খন্ধো অহোসি, সব্বরতনমযানি পত্তানি চ ফলানি চ। তাসং খো পনানন্দ, তালপন্তীনং ৰাতেরিতানং সদ্দো অহোসি ৰগ্গু চ রজনীযো চ খমনীযো [কমনীযো (সী॰ স্যা॰ পী॰)] চ মদনীযো চ। সেয্যথাপি, আনন্দ, পঞ্চঙ্গিকস্স তূরিযস্স সুৰিনীতস্স সুপ্পটিতাল়িতস্স সুকুসলেহি সমন্নাহতস্স সদ্দো হোতি ৰগ্গু চ রজনীযো চ খমনীযো চ মদনীযো চ , এৰমেৰ খো, আনন্দ, তাসং তালপন্তীনং ৰাতেরিতানং সদ্দো অহোসি ৰগ্গু চ রজনীযো চ খমনীযো চ মদনীযো চ। যে খো পনানন্দ, তেন সমযেন কুসাৰতিযা রাজধানিযা ধুত্তা অহেসুং সোণ্ডা পিপাসা, তে তাসং তালপন্তীনং ৰাতেরিতানং সদ্দেন পরিচারেসুং। চক্করতনং ২৪৩. ‘‘রাজা , আনন্দ, মহাসুদস্সনো সত্তহি রতনেহি সমন্নাগতো অহোসি চতূহি চ ইদ্ধীহি। কতমেহি সত্তহি? ইধানন্দ, রঞ্ঞো মহাসুদস্সনস্স তদহুপোসথে পন্নরসে সীসংন্হাতস্স উপোসথিকস্স উপরিপাসাদৰরগতস্স দিব্বং চক্করতনং পাতুরহোসি সহস্সারং সনেমিকং সনাভিকং সব্বাকারপরিপূরং। দিস্ৰা রঞ্ঞো মহাসুদস্সনস্স এতদহোসি – ‘সুতং খো পনেতং – ‘‘যস্স রঞ্ঞো খত্তিযস্স মুদ্ধাৰসিত্তস্স তদহুপোসথে পন্নরসে সীসংন্হাতস্স উপোসথিকস্স উপরিপাসাদৰরগতস্স দিব্বং চক্করতনং পাতুভৰতি সহস্সারং সনেমিকং সনাভিকং সব্বাকারপরিপূরং, সো হোতি রাজা চক্কৰত্তী’’তি। অস্সং নু খো অহং রাজা চক্কৰত্তী’তি। ২৪৪. ‘‘অথ খো, আনন্দ, রাজা মহাসুদস্সনো উট্ঠাযাসনা একংসং উত্তরাসঙ্গং করিত্ৰা ৰামেন হত্থেন সুৰণ্ণভিঙ্কারং গহেত্ৰা দক্খিণেন হত্থেন চক্করতনং অব্ভুক্কিরি – ‘পৰত্ততু ভৰং চক্করতনং, অভিৰিজিনাতু ভৰং চক্করতন’ন্তি। অথ খো তং, আনন্দ, চক্করতনং পুরত্থিমং দিসং পৰত্তি [পৰত্ততি (স্যা॰ ক॰)], অন্ৰদেৰ [অনুদেৰ (স্যা॰)] রাজা মহাসুদস্সনো সদ্ধিং চতুরঙ্গিনিযা সেনায, যস্মিং খো পনানন্দ, পদেসে চক্করতনং পতিট্ঠাসি, তত্থ রাজা মহাসুদস্সনো ৰাসং উপগচ্ছি সদ্ধিং চতুরঙ্গিনিযা সেনায। যে খো পনানন্দ, পুরত্থিমায দিসায পটিরাজানো, তে রাজানং মহাসুদস্সনং উপসঙ্কমিত্ৰা এৰমাহংসু – ‘এহি খো মহারাজ, স্ৰাগতং তে মহারাজ, সকং তে মহারাজ, অনুসাস মহারাজা’তি। রাজা মহাসুদস্সনো এৰমাহ – ‘পাণো ন হন্তব্বো, অদিন্নং ন আদাতব্বং, কামেসু মিচ্ছা ন চরিতব্বা, মুসা ন ভণিতব্বা, মজ্জং ন পাতব্বং, যথাভুত্তঞ্চ ভুঞ্জথা’তি । যে খো পনানন্দ, পুরত্থিমায দিসায পটিরাজানো, তে রঞ্ঞো মহাসুদস্সনস্স অনুযন্তা অহেসুং। অথ খো তং, আনন্দ, চক্করতনং পুরত্থিমং সমুদ্দং অজ্ঝোগাহেত্ৰা পচ্চুত্তরিত্ৰা দক্খিণং দিসং পৰত্তি…পে॰… দক্খিণং সমুদ্দং অজ্ঝোগাহেত্ৰা পচ্চুত্তরিত্ৰা পচ্ছিমং দিসং পৰত্তি…পে॰… পচ্ছিমং সমুদ্দং অজ্ঝোগাহেত্ৰা পচ্চুত্তরিত্ৰা উত্তরং দিসং পৰত্তি, অন্ৰদেৰ রাজা মহাসুদস্সনো সদ্ধিং চতুরঙ্গিনিযা সেনায। যস্মিং খো পনানন্দ, পদেসে চক্করতনং পতিট্ঠাসি, তত্থ রাজা মহাসুদস্সনো ৰাসং উপগচ্ছি সদ্ধিং চতুরঙ্গিনিযা সেনায। যে খো পনানন্দ, উত্তরায দিসায পটিরাজানো, তে রাজানং মহাসুদস্সনং উপসঙ্কমিত্ৰা এৰমাহংসু – ‘এহি খো মহারাজ, স্ৰাগতং তে মহারাজ, সকং তে মহারাজ, অনুসাস মহারাজা’তি। রাজা মহাসুদস্সনো এৰমাহ – ‘পাণো ন হন্তব্বো, অদিন্নং ন আদাতব্বং, কামেসু মিচ্ছা ন চরিতব্বা, মুসা ন ভণিতব্বা, মজ্জং ন পাতব্বং, যথাভুত্তঞ্চ ভুঞ্জথা’তি। যে খো পনানন্দ, উত্তরায দিসায পটিরাজানো , তে রঞ্ঞো মহাসুদস্সনস্স অনুযন্তা অহেসুং। ২৪৫. ‘‘অথ খো তং, আনন্দ, চক্করতনং সমুদ্দপরিযন্তং পথৰিং অভিৰিজিনিত্ৰা কুসাৰতিং রাজধানিং পচ্চাগন্ত্ৰা রঞ্ঞো মহাসুদস্সনস্স অন্তেপুরদ্ৰারে অত্থকরণপমুখে অক্খাহতং মঞ্ঞে অট্ঠাসি রঞ্ঞো মহাসুদস্সনস্স অন্তেপুরং উপসোভযমানং। রঞ্ঞো, আনন্দ, মহাসুদস্সনস্স এৰরূপং চক্করতনং পাতুরহোসি। হত্থিরতনং ২৪৬. ‘‘পুন চপরং, আনন্দ, রঞ্ঞো মহাসুদস্সনস্স হত্থিরতনং পাতুরহোসি সব্বসেতো সত্তপ্পতিট্ঠো ইদ্ধিমা ৰেহাসঙ্গমো উপোসথো নাম নাগরাজা। তং দিস্ৰা রঞ্ঞো মহাসুদস্সনস্স চিত্তং পসীদি – ‘ভদ্দকং ৰত ভো হত্থিযানং, সচে দমথং উপেয্যা’তি। অথ খো তং, আনন্দ, হত্থিরতনং – সেয্যথাপি নাম গন্ধহত্থাজানিযো দীঘরত্তং সুপরিদন্তো, এৰমেৰ দমথং উপগচ্ছি। ভূতপুব্বং, আনন্দ, রাজা মহাসুদস্সনো তমেৰ হত্থিরতনং ৰীমংসমানো পুব্বণ্হসমযং অভিরুহিত্ৰা সমুদ্দপরিযন্তং পথৰিং অনুযাযিত্ৰা কুসাৰতিং রাজধানিং পচ্চাগন্ত্ৰা পাতরাসমকাসি। রঞ্ঞো, আনন্দ, মহাসুদস্সনস্স এৰরূপং হত্থিরতনং পাতুরহোসি। অস্সরতনং ২৪৭. ‘‘পুন চপরং, আনন্দ, রঞ্ঞো মহাসুদস্সনস্স অস্সরতনং পাতুরহোসি সব্বসেতো কাল়সীসো মুঞ্জকেসো ইদ্ধিমা ৰেহাসঙ্গমো ৰলাহকো নাম অস্সরাজা। তং দিস্ৰা রঞ্ঞো মহাসুদস্সনস্স চিত্তং পসীদি – ‘ভদ্দকং ৰত ভো অস্সযানং সচে দমথং উপেয্যা’তি। অথ খো তং , আনন্দ, অস্সরতনং সেয্যথাপি নাম ভদ্দো অস্সাজানিযো দীঘরত্তং সুপরিদন্তো, এৰমেৰ দমথং উপগচ্ছি। ভূতপুব্বং, আনন্দ, রাজা মহাসুদস্সনো তমেৰ অস্সরতনং ৰীমংসমানো পুব্বণ্হসমযং অভিরুহিত্ৰা সমুদ্দপরিযন্তং পথৰিং অনুযাযিত্ৰা কুসাৰতিং রাজধানিং পচ্চাগন্ত্ৰা পাতরাসমকাসি। রঞ্ঞো, আনন্দ, মহাসুদস্সনস্স এৰরূপং অস্সরতনং পাতুরহোসি। মণিরতনং ২৪৮. ‘‘পুন চপরং, আনন্দ, রঞ্ঞো মহাসুদস্সনস্স মণিরতনং পাতুরহোসি। সো অহোসি মণি ৰেল়ুরিযো সুভো জাতিমা অট্ঠংসো সুপরিকম্মকতো অচ্ছো ৰিপ্পসন্নো অনাৰিলো সব্বাকারসম্পন্নো। তস্স খো পনানন্দ, মণিরতনস্স আভা সমন্তা যোজনং ফুটা অহোসি। ভূতপুব্বং, আনন্দ, রাজা মহাসুদস্সনো তমেৰ মণিরতনং ৰীমংসমানো চতুরঙ্গিনিং সেনং সন্নয্হিত্ৰা মণিং ধজগ্গং আরোপেত্ৰা রত্তন্ধকারতিমিসায পাযাসি। যে খো পনানন্দ, সমন্তা গামা অহেসুং, তে তেনোভাসেন কম্মন্তে পযোজেসুং দিৰাতি মঞ্ঞমানা। রঞ্ঞো, আনন্দ, মহাসুদস্সনস্স এৰরূপং মণিরতনং পাতুরহোসি। ইত্থিরতনং ২৪৯. ‘‘পুন চপরং, আনন্দ, রঞ্ঞো মহাসুদস্সনস্স ইত্থিরতনং পাতুরহোসি অভিরূপা দস্সনীযা পাসাদিকা পরমায ৰণ্ণপোক্খরতায সমন্নাগতা নাতিদীঘা নাতিরস্সা নাতিকিসা নাতিথূলা নাতিকাল়িকা নাচ্চোদাতা অতিক্কন্তা মানুসিৰণ্ণং [মানুস্সিৰণ্ণং (স্যা॰)] অপ্পত্তা দিব্বৰণ্ণং। তস্স খো পনানন্দ, ইত্থিরতনস্স এৰরূপো কাযসম্ফস্সোহোতি, সেয্যথাপি নাম তূলপিচুনো ৰা কপ্পাসপিচুনো ৰা। তস্স খো পনানন্দ, ইত্থিরতনস্স সীতে উণ্হানি গত্তানি হোন্তি, উণ্হে সীতানি। তস্স খো পনানন্দ, ইত্থিরতনস্স কাযতো চন্দনগন্ধো ৰাযতি, মুখতো উপ্পলগন্ধো। তং খো পনানন্দ, ইত্থিরতনং রঞ্ঞো মহাসুদস্সনস্স পুব্বুট্ঠাযিনী অহোসি পচ্ছানিপাতিনী কিঙ্কারপটিস্সাৰিনী মনাপচারিনী পিযৰাদিনী। তং খো পনানন্দ, ইত্থিরতনং রাজানং মহাসুদস্সনং মনসাপি নো অতিচরি [অতিচরী (ক॰), অতিচারী (সী॰ স্যা॰ পী॰)], কুতো পন কাযেন। রঞ্ঞো, আনন্দ, মহাসুদস্সনস্স এৰরূপং ইত্থিরতনং পাতুরহোসি। গহপতিরতনং ২৫০. ‘‘পুন চপরং, আনন্দ, রঞ্ঞো মহাসুদস্সনস্স গহপতিরতনং পাতুরহোসি। তস্স কম্মৰিপাকজং দিব্বচক্খু পাতুরহোসি যেন নিধিং পস্সতি সস্সামিকম্পি অস্সামিকম্পি। সো রাজানং মহাসুদস্সনং উপসঙ্কমিত্ৰা এৰমাহ – ‘অপ্পোস্সুক্কো ত্ৰং, দেৰ, হোহি, অহং তে ধনেন ধনকরণীযং করিস্সামী’তি। ভূতপুব্বং, আনন্দ, রাজা মহাসুদস্সনো তমেৰ গহপতিরতনং ৰীমংসমানো নাৰং অভিরুহিত্ৰা মজ্ঝে গঙ্গায নদিযা সোতং ওগাহিত্ৰা গহপতিরতনং এতদৰোচ – ‘অত্থো মে, গহপতি, হিরঞ্ঞসুৰণ্ণেনা’তি। ‘তেন হি, মহারাজ, একং তীরং নাৰা উপেতূ’তি। ‘ইধেৰ মে, গহপতি, অত্থো হিরঞ্ঞসুৰণ্ণেনা’তি। অথ খো তং, আনন্দ, গহপতিরতনং উভোহি হত্থেহি উদকং ওমসিত্ৰা পূরং হিরঞ্ঞসুৰণ্ণস্স কুম্ভিং উদ্ধরিত্ৰা রাজানং মহাসুদস্সনং এতদৰোচ – ‘অলমেত্তাৰতা মহারাজ, কতমেত্তাৰতা মহারাজ, পূজিতমেত্তাৰতা মহারাজা’তি? রাজা মহাসুদস্সনো এৰমাহ – ‘অলমেত্তাৰতা গহপতি, কতমেত্তাৰতা গহপতি, পূজিতমেত্তাৰতা গহপতী’তি। রঞ্ঞো , আনন্দ, মহাসুদস্সনস্স এৰরূপং গহপতিরতনং পাতুরহোসি। পরিণাযকরতনং ২৫১. ‘‘পুন চপরং, আনন্দ, রঞ্ঞো মহাসুদস্সনস্স পরিণাযকরতনং পাতুরহোসি পণ্ডিতো ৰিযত্তো মেধাৰী পটিবলো রাজানং মহাসুদস্সনং উপযাপেতব্বং উপযাপেতুং, অপযাপেতব্বং অপযাপেতুং, ঠপেতব্বং ঠপেতুং। সো রাজানং মহাসুদস্সনং উপসঙ্কমিত্ৰা এৰমাহ – ‘অপ্পোস্সুক্কো ত্ৰং, দেৰ, হোহি, অহমনুসাসিস্সামী’তি। রঞ্ঞো, আনন্দ, মহাসুদস্সনস্স এৰরূপং পরিণাযকরতনং পাতুরহোসি। ‘‘রাজা, আনন্দ, মহাসুদস্সনো ইমেহি সত্তহি রতনেহি সমন্নাগতো অহোসি। চতুইদ্ধিসমন্নাগতো ২৫২. ‘‘রাজা, আনন্দ, মহাসুদস্সনো চতূহি ইদ্ধীহি সমন্নাগতো অহোসি। কতমাহি চতূহি ইদ্ধীহি? ইধানন্দ, রাজা মহাসুদস্সনো অভিরূপো অহোসি দস্সনীযো পাসাদিকো পরমায ৰণ্ণপোক্খরতায সমন্নাগতো অতিৰিয অঞ্ঞেহি মনুস্সেহি। রাজা, আনন্দ, মহাসুদস্সনো ইমায পঠমায ইদ্ধিযা সমন্নাগতো অহোসি। ‘‘পুন চপরং, আনন্দ, রাজা মহাসুদস্সনো দীঘাযুকো অহোসি চিরট্ঠিতিকো অতিৰিয অঞ্ঞেহি মনুস্সেহি। রাজা, আনন্দ, মহাসুদস্সনো ইমায দুতিযায ইদ্ধিযা সমন্নাগতো অহোসি। ‘‘পুন চপরং, আনন্দ, রাজা মহাসুদস্সনো অপ্পাবাধো অহোসি অপ্পাতঙ্কো সমৰেপাকিনিযা গহণিযা সমন্নাগতো নাতিসীতায নাচ্চুণ্হায অতিৰিয অঞ্ঞেহি মনুস্সেহি। রাজা, আনন্দ, মহাসুদস্সনো ইমায ততিযায ইদ্ধিযা সমন্নাগতো অহোসি। ‘‘পুন চপরং , আনন্দ, রাজা মহাসুদস্সনো ব্রাহ্মণগহপতিকানং পিযো অহোসি মনাপো। সেয্যথাপি, আনন্দ, পিতা পুত্তানং পিযো হোতি মনাপো, এৰমেৰ খো, আনন্দ, রাজা মহাসুদস্সনো ব্রাহ্মণগহপতিকানং পিযো অহোসি মনাপো। রঞ্ঞোপি, আনন্দ, মহাসুদস্সনস্স ব্রাহ্মণগহপতিকা পিযা অহেসুং মনাপা। সেয্যথাপি, আনন্দ, পিতু পুত্তা পিযা হোন্তি মনাপা, এৰমেৰ খো, আনন্দ, রঞ্ঞোপি মহাসুদস্সনস্স ব্রাহ্মণগহপতিকা পিযা অহেসুং মনাপা। ‘‘ভূতপুব্বং, আনন্দ, রাজা মহাসুদস্সনো চতুরঙ্গিনিযা সেনায উয্যানভূমিং নিয্যাসি। অথ খো, আনন্দ, ব্রাহ্মণগহপতিকা রাজানং মহাসুদস্সনং উপসঙ্কমিত্ৰা এৰমাহংসু – ‘অতরমানো, দেৰ, যাহি, যথা তং মযং চিরতরং পস্সেয্যামা’তি। রাজাপি, আনন্দ, মহাসুদস্সনো সারথিং আমন্তেসি – ‘অতরমানো, সারথি, রথং পেসেহি, যথা অহং ব্রাহ্মণগহপতিকে চিরতরং পস্সেয্য’ন্তি। রাজা, আনন্দ, মহাসুদস্সনো ইমায চতুত্থিযা [চতুত্থায (স্যা॰)] ইদ্ধিযা সমন্নাগতো অহোসি। রাজা, আনন্দ, মহাসুদস্সনো ইমাহিচতূহি ইদ্ধীহি সমন্নাগতো অহোসি। ধম্মপাসাদপোক্খরণী ২৫৩. ‘‘অথ খো, আনন্দ, রঞ্ঞো মহাসুদস্সনস্স এতদহোসি – ‘যংনূনাহং ইমাসু তালন্তরিকাসু ধনুসতে ধনুসতে পোক্খরণিযো মাপেয্য’ন্তি। ‘‘মাপেসি খো, আনন্দ, রাজা মহাসুদস্সনো তাসু তালন্তরিকাসু ধনুসতে ধনুসতে পোক্খরণিযো। তা খো পনানন্দ, পোক্খরণিযো চতুন্নং ৰণ্ণানং ইট্ঠকাহি চিতা অহেসুং – একা ইট্ঠকা সোৰণ্ণমযা, একা রূপিযমযা, একা ৰেল়ুরিযমযা, একা ফলিকমযা। ‘‘তাসু খো পনানন্দ, পোক্খরণীসু চত্তারি চত্তারি সোপানানি অহেসুং চতুন্নং ৰণ্ণানং, একং সোপানং সোৰণ্ণমযং একং রূপিযমযং একং ৰেল়ুরিযমযং একং ফলিকমযং। সোৰণ্ণমযস্স সোপানস্স সোৰণ্ণমযা থম্ভা অহেসুং, রূপিযমযা সূচিযো চ উণ্হীসঞ্চ। রূপিযমযস্স সোপানস্স রূপিযমযা থম্ভা অহেসুং, সোৰণ্ণমযা সূচিযো চ উণ্হীসঞ্চ। ৰেল়ুরিযমযস্স সোপানস্স ৰেল়ুরিযমযা থম্ভা অহেসুং, ফলিকমযা সূচিযো চ উণ্হীসঞ্চ। ফলিকমযস্স সোপানস্স ফলিকমযা থম্ভা অহেসুং, ৰেল়ুরিযমযা সূচিযো চ উণ্হীসঞ্চ। তা খো পনানন্দ, পোক্খরণিযো দ্ৰীহি ৰেদিকাহি পরিক্খিত্তা অহেসুং একা ৰেদিকা সোৰণ্ণমযা, একা রূপিযমযা। সোৰণ্ণমযায ৰেদিকায সোৰণ্ণমযা থম্ভা অহেসুং, রূপিযমযা সূচিযো চ উণ্হীসঞ্চ। রূপিযমযায ৰেদিকায রূপিযমযা থম্ভা অহেসুং, সোৰণ্ণমযা সূচিযো চ উণ্হীসঞ্চ। অথ খো, আনন্দ , রঞ্ঞো মহাসুদস্সনস্স এতদহোসি – ‘যংনূনাহং ইমাসু পোক্খরণীসু এৰরূপং মালং রোপাপেয্যং উপ্পলং পদুমং কুমুদং পুণ্ডরীকং সব্বোতুকং সব্বজনস্স অনাৰট’ন্তি। রোপাপেসি খো , আনন্দ, রাজা মহাসুদস্সনো তাসু পোক্খরণীসু এৰরূপং মালং উপ্পলং পদুমং কুমুদং পুণ্ডরীকং সব্বোতুকং সব্বজনস্স অনাৰটং। ২৫৪. ‘‘অথ খো, আনন্দ, রঞ্ঞো মহাসুদস্সনস্স এতদহোসি – ‘যংনূনাহং ইমাসং পোক্খরণীনং তীরে ন্হাপকে পুরিসে ঠপেয্যং, যে আগতাগতং জনং ন্হাপেস্সন্তী’তি। ঠপেসি খো, আনন্দ, রাজা মহাসুদস্সনো তাসং পোক্খরণীনং তীরে ন্হাপকে পুরিসে, যে আগতাগতং জনং ন্হাপেসুং। ‘‘অথ খো, আনন্দ, রঞ্ঞো মহাসুদস্সনস্স এতদহোসি – ‘যংনূনাহং ইমাসং পোক্খরণীনং তীরে এৰরূপং দানং পট্ঠপেয্যং – অন্নং অন্নট্ঠিকস্স [অন্নত্থিতস্স (সী॰ স্যা॰ কং॰ পী॰), এৰং সব্বত্থ পকভিরূপেনেৰ দিস্সতি], পানং পানট্ঠিকস্স, ৰত্থং ৰত্থট্ঠিকস্স, যানং যানট্ঠিকস্স, সযনং সযনট্ঠিকস্স, ইত্থিং ইত্থিট্ঠিকস্স, হিরঞ্ঞং হিরঞ্ঞট্ঠিকস্স, সুৰণ্ণং সুৰণ্ণট্ঠিকস্সা’তি। পট্ঠপেসি খো, আনন্দ, রাজা মহাসুদস্সনো তাসং পোক্খরণীনং তীরে এৰরূপং দানং – অন্নং অন্নট্ঠিকস্স, পানং পানট্ঠিকস্স, ৰত্থং ৰত্থট্ঠিকস্স, যানং যানট্ঠিকস্স, সযনং সযনট্ঠিকস্স, ইত্থিং ইত্থিট্ঠিকস্স, হিরঞ্ঞং হিরঞ্ঞট্ঠিকস্স, সুৰণ্ণং সুৰণ্ণট্ঠিকস্স। ২৫৫. ‘‘অথ খো, আনন্দ, ব্রাহ্মণগহপতিকা পহূতং সাপতেয্যং আদায রাজানং মহাসুদস্সনং উপসঙ্কমিত্ৰা এৰমাহংসু – ‘ইদং, দেৰ, পহূতং সাপতেয্যং দেৰঞ্ঞেৰ উদ্দিস্স আভতং, তং দেৰো পটিগ্গণ্হতূ’তি। ‘অলং ভো, মমপিদং পহূতং সাপতেয্যং ধম্মিকেন বলিনা অভিসঙ্খতং, তঞ্চ ৰো হোতু, ইতো চ ভিয্যো হরথা’তি। তে রঞ্ঞা পটিক্খিত্তা একমন্তং অপক্কম্ম এৰং সমচিন্তেসুং – ‘ন খো এতং অম্হাকং পতিরূপং, যং মযং ইমানি সাপতেয্যানি পুনদেৰ সকানি ঘরানি পটিহরেয্যাম। যংনূন মযং রঞ্ঞো মহাসুদস্সনস্স নিৰেসনং মাপেয্যামা’তি। তে রাজানং মহাসুদস্সনং উপসঙ্কমিত্ৰা এৰমাহংসু – ‘নিৰেসনং তে দেৰ, মাপেস্সামা’তি। অধিৰাসেসি খো, আনন্দ, রাজা মহাসুদস্সনো তুণ্হীভাৰেন। ২৫৬. ‘‘অথ খো, আনন্দ, সক্কো দেৰানমিন্দো রঞ্ঞো মহাসুদস্সনস্স চেতসা চেতোপরিৰিতক্কমঞ্ঞায ৰিস্সকম্মং [ৰিসুকম্মং (ক॰)] দেৰপুত্তং আমন্তেসি – ‘এহি ত্ৰং, সম্ম ৰিস্সকম্ম, রঞ্ঞো মহাসুদস্সনস্স নিৰেসনং মাপেহি ধম্মং নাম পাসাদ’ন্তি। ‘এৰং ভদ্দন্তৰা’তি খো, আনন্দ, ৰিস্সকম্মো দেৰপুত্তো সক্কস্স দেৰানমিন্দস্স পটিস্সুত্ৰা সেয্যথাপি নাম বলৰা পুরিসো সমিঞ্জিতং ৰা বাহং পসারেয্য পসারিতং ৰা বাহং সমিঞ্জেয্য, এৰমেৰ দেৰেসু তাৰতিংসেসু অন্তরহিতো রঞ্ঞো মহাসুদস্সনস্স পুরতো পাতুরহোসি। অথ খো, আনন্দ, ৰিস্সকম্মো দেৰপুত্তো রাজানং মহাসুদস্সনং এতদৰোচ – ‘নিৰেসনং তে দেৰ, মাপেস্সামি ধম্মং নাম পাসাদ’ন্তি। অধিৰাসেসি খো, আনন্দ, রাজা মহাসুদস্সনো তুণ্হীভাৰেন। ‘‘মাপেসি খো, আনন্দ, ৰিস্সকম্মো দেৰপুত্তো রঞ্ঞো মহাসুদস্সনস্স নিৰেসনং ধম্মং নাম পাসাদং। ধম্মো, আনন্দ, পাসাদো পুরত্থিমেন পচ্ছিমেন চ যোজনং আযামেন অহোসি। উত্তরেন দক্খিণেন চ অড্ঢযোজনং ৰিত্থারেন। ধম্মস্স, আনন্দ, পাসাদস্স তিপোরিসং উচ্চতরেন ৰত্থু চিতং অহোসি চতুন্নং ৰণ্ণানং ইট্ঠকাহি – একা ইট্ঠকা সোৰণ্ণমযা, একা রূপিযমযা, একা ৰেল়ুরিযমযা, একা ফলিকমযা। ‘‘ধম্মস্স, আনন্দ, পাসাদস্স চতুরাসীতি থম্ভসহস্সানি অহেসুং চতুন্নং ৰণ্ণানং – একো থম্ভো সোৰণ্ণমযো, একো রূপিযমযো, একো ৰেল়ুরিযমযো, একো ফলিকমযো। ধম্মো, আনন্দ, পাসাদো চতুন্নং ৰণ্ণানং ফলকেহি সন্থতো অহোসি – একং ফলকং সোৰণ্ণমযং, একং রূপিযমযং, একং ৰেল়ুরিযমযং, একং ফলিকমযং। ‘‘ধম্মস্স, আনন্দ, পাসাদস্স চতুৰীসতি সোপানানি অহেসুং চতুন্নং ৰণ্ণানং – একং সোপানং সোৰণ্ণমযং, একং রূপিযমযং, একং ৰেল়ুরিযমযং, একং ফলিকমযং। সোৰণ্ণমযস্স সোপানস্স সোৰণ্ণমযা থম্ভা অহেসুং রূপিযমযা সূচিযো চ উণ্হীসঞ্চ। রূপিযমযস্স সোপানস্স রূপিযমযা থম্ভা অহেসুং সোৰণ্ণমযা সূচিযো চ উণ্হীসঞ্চ। ৰেল়ুরিযমযস্স সোপানস্স ৰেল়ুরিযমযা থম্ভা অহেসুং ফলিকমযা সূচিযো চ উণ্হীসঞ্চ। ফলিকমযস্স সোপানস্স ফলিকমযা থম্ভা অহেসুং ৰেল়ুরিযমযা সূচিযো চ উণ্হীসঞ্চ। ‘‘ধম্মে, আনন্দ, পাসাদে চতুরাসীতি কূটাগারসহস্সানি অহেসুং চতুন্নং ৰণ্ণানং – একং কূটাগারং সোৰণ্ণমযং, একং রূপিযমযং, একং ৰেল়ুরিযমযং , একং ফলিকমযং। সোৰণ্ণমযে কূটাগারে রূপিযমযো পল্লঙ্কো পঞ্ঞত্তো অহোসি, রূপিযমযে কূটাগারে সোৰণ্ণমযো পল্লঙ্কো পঞ্ঞত্তো অহোসি, ৰেল়ুরিযমযে কূটাগারে দন্তমযো পল্লঙ্কো পঞ্ঞত্তো অহোসি, ফলিকমযে কূটাগারে সারমযো পল্লঙ্কো পঞ্ঞত্তো অহোসি। সোৰণ্ণমযস্স কূটাগারস্স দ্ৰারে রূপিযমযো তালো ঠিতো অহোসি, তস্স রূপিযমযো খন্ধো সোৰণ্ণমযানি পত্তানি চ ফলানি চ। রূপিযমযস্স কূটাগারস্স দ্ৰারে সোৰণ্ণমযো তালো ঠিতো অহোসি, তস্স সোৰণ্ণমযো খন্ধো, রূপিযমযানি পত্তানি চ ফলানি চ। ৰেল়ুরিযমযস্স কূটাগারস্স দ্ৰারে ফলিকমযো তালো ঠিতো অহোসি, তস্স ফলিকমযো খন্ধো, ৰেল়ুরিযমযানি পত্তানি চ ফলানি চ। ফলিকমযস্স কূটাগারস্স দ্ৰারে ৰেল়ুরিযমযো তালো ঠিতো অহোসি, তস্স ৰেল়ুরিযমযো খন্ধো, ফলিকমযানি পত্তানি চ ফলানি চ। ২৫৭. ‘‘অথ খো, আনন্দ, রঞ্ঞো মহাসুদস্সনস্স এতদহোসি – ‘যংনূনাহং মহাৰিযূহস্স কূটাগারস্স দ্ৰারে সব্বসোৰণ্ণমযং তালৰনং মাপেয্যং, যত্থ দিৰাৰিহারং নিসীদিস্সামী’তি। মাপেসি খো, আনন্দ, রাজা মহাসুদস্সনো মহাৰিযূহস্স কূটাগারস্স দ্ৰারে সব্বসোৰণ্ণমযং তালৰনং, যত্থ দিৰাৰিহারং নিসীদি। ধম্মো, আনন্দ , পাসাদো দ্ৰীহি ৰেদিকাহি পরিক্খিত্তো অহোসি, একা ৰেদিকা সোৰণ্ণমযা, একা রূপিযমযা। সোৰণ্ণমযায ৰেদিকায সোৰণ্ণমযা থম্ভা অহেসুং, রূপিযমযা সূচিযো চ উণ্হীসঞ্চ। রূপিযমযায ৰেদিকায রূপিযমযা থম্ভা অহেসুং, সোৰণ্ণমযা সূচিযো চ উণ্হীসঞ্চ। ২৫৮. ‘‘ধম্মো, আনন্দ, পাসাদো দ্ৰীহি কিঙ্কিণিকজালেহি [কিঙ্কণিকজালেহি (স্যা॰ ক॰)] পরিক্খিত্তো অহোসি – একং জালং সোৰণ্ণমযং একং রূপিযমযং। সোৰণ্ণমযস্স জালস্স রূপিযমযা কিঙ্কিণিকা অহেসুং, রূপিযমযস্স জালস্স সোৰণ্ণমযা কিঙ্কিণিকা অহেসুং। তেসং খো পনানন্দ, কিঙ্কিণিকজালানং ৰাতেরিতানং সদ্দো অহোসি ৰগ্গু চ রজনীযো চ খমনীযো চ মদনীযো চ। সেয্যথাপি, আনন্দ, পঞ্চঙ্গিকস্স তূরিযস্স সুৰিনীতস্স সুপ্পটিতাল়িতস্স সুকুসলেহি [কুসলেহি (সী॰ স্যা॰ কং॰ পী॰)] সমন্নাহতস্স সদ্দো হোতি, ৰগ্গু চ রজনীযো চ খমনীযো চ মদনীযো চ, এৰমেৰ খো, আনন্দ, তেসং কিঙ্কিণিকজালানং ৰাতেরিতানং সদ্দো অহোসি ৰগ্গু চ রজনীযো চ খমনীযো চ মদনীযো চ। যে খো পনানন্দ, তেন সমযেন কুসাৰতিযা রাজধানিযা ধুত্তা অহেসুং সোণ্ডা পিপাসা, তে তেসং কিঙ্কিণিকজালানং ৰাতেরিতানং সদ্দেন পরিচারেসুং। নিট্ঠিতো খো পনানন্দ, ধম্মো পাসাদো দুদ্দিক্খো অহোসি মুসতি চক্খূনি। সেয্যথাপি, আনন্দ, ৰস্সানং পচ্ছিমে মাসে সরদসমযে ৰিদ্ধে ৰিগতৰলাহকে দেৰে আদিচ্চো নভং অব্ভুস্সক্কমানো[অব্ভুগ্গমমানো (সী॰ পী॰ ক॰)] দুদ্দিক্খো [দুদিক্খো (পী॰)] হোতি মুসতি চক্খূনি; এৰমেৰ খো, আনন্দ, ধম্মো পাসাদো দুদ্দিক্খো অহোসি মুসতি চক্খূনি। ২৫৯. ‘‘অথ খো, আনন্দ, রঞ্ঞো মহাসুদস্সনস্স এতদহোসি – ‘যংনূনাহং ধম্মস্স পাসাদস্স পুরতো ধম্মং নাম পোক্খরণিং মাপেয্য’ন্তি। মাপেসি খো, আনন্দ, রাজা মহাসুদস্সনো ধম্মস্স পাসাদস্স পুরতো ধম্মং নাম পোক্খরণিং। ধম্মা, আনন্দ, পোক্খরণী পুরত্থিমেন পচ্ছিমেন চ যোজনং আযামেন অহোসি, উত্তরেন দক্খিণেন চ অড্ঢযোজনং ৰিত্থারেন। ধম্মা, আনন্দ, পোক্খরণী চতুন্নং ৰণ্ণানং ইট্ঠকাহি চিতা অহোসি – একা ইট্ঠকা সোৰণ্ণমযা, একা রূপিযমযা, একা ৰেল়ুরিযমযা, একা ফলিকমযা। ‘‘ধম্মায, আনন্দ, পোক্খরণিযা চতুৰীসতি সোপানানি অহেসুং চতুন্নং ৰণ্ণানং – একং সোপানং সোৰণ্ণমযং, একং রূপিযমযং, একং ৰেল়ুরিযমযং, একং ফলিকমযং। সোৰণ্ণমযস্স সোপানস্স সোৰণ্ণমযা থম্ভা অহেসুং রূপিযমযা সূচিযো চ উণ্হীসঞ্চ। রূপিযমযস্স সোপানস্স রূপিযমযা থম্ভা অহেসুং সোৰণ্ণমযা সূচিযো চ উণ্হীসঞ্চ। ৰেল়ুরিযমযস্স সোপানস্স ৰেল়ুরিযমযা থম্ভা অহেসুং ফলিকমযা সূচিযো চ উণ্হীসঞ্চ। ফলিকমযস্স সোপানস্স ফলিকমযা থম্ভা অহেসুং ৰেল়ুরিযমযা সূচিযো চ উণ্হীসঞ্চ। ‘‘ধম্মা, আনন্দ, পোক্খরণী দ্ৰীহি ৰেদিকাহি পরিক্খিত্তা অহোসি – একা ৰেদিকা সোৰণ্ণমযা, একা রূপিযমযা। সোৰণ্ণমযায ৰেদিকায সোৰণ্ণমযা থম্ভা অহেসুং রূপিযমযা সূচিযো চ উণ্হীসঞ্চ। রূপিযমযায ৰেদিকায রূপিযমযা থম্ভা অহেসুং সোৰণ্ণমযা সূচিযো চ উণ্হীসঞ্চ। ‘‘ধম্মা, আনন্দ, পোক্খরণী সত্তহি তালপন্তীহি পরিক্খিত্তা অহোসি – একা তালপন্তি সোৰণ্ণমযা, একা রূপিযমযা, একা ৰেল়ুরিযমযা, একা ফলিকমযা, একা লোহিতঙ্কমযা, একা মসারগল্লমযা, একা সব্বরতনমযা। সোৰণ্ণমযস্স তালস্স সোৰণ্ণমযো খন্ধো অহোসি রূপিযমযানি পত্তানি চ ফলানি চ। রূপিযমযস্স তালস্স রূপিযমযো খন্ধো অহোসি সোৰণ্ণমযানি পত্তানি চ ফলানি চ। ৰেল়ুরিযমযস্স তালস্স ৰেল়ুরিযমযো খন্ধো অহোসি ফলিকমযানি পত্তানি চ ফলানি চ। ফলিকমযস্স তালস্স ফলিকমযো খন্ধো অহোসি ৰেল়ুরিযমযানি পত্তানি চ ফলানি চ। লোহিতঙ্কমযস্স তালস্স লোহিতঙ্কমযো খন্ধো অহোসি মসারগল্লমযানি পত্তানি চ ফলানি চ। মসারগল্লমযস্স তালস্স মসারগল্লমযো খন্ধো অহোসি লোহিতঙ্কমযানি পত্তানি চ ফলানি চ। সব্বরতনমযস্স তালস্স সব্বরতনমযো খন্ধো অহোসি, সব্বরতনমযানি পত্তানি চ ফলানি চ। তাসং খো পনানন্দ, তালপন্তীনং ৰাতেরিতানং সদ্দো অহোসি, ৰগ্গু চ রজনীযো চ খমনীযো চ মদনীযো চ। সেয্যথাপি, আনন্দ, পঞ্চঙ্গিকস্স তূরিযস্স সুৰিনীতস্স সুপ্পটিতাল়িতস্স সুকুসলেহি সমন্নাহতস্স সদ্দো হোতি ৰগ্গু চ রজনীযো চ খমনীযো চ মদনীযো চ, এৰমেৰ খো, আনন্দ, তাসং তালপন্তীনং ৰাতেরিতানং সদ্দো অহোসি ৰগ্গু চ রজনীযো চ খমনীযো চ মদনীযো চ। যে খো পনানন্দ, তেন সমযেন কুসাৰতিযা রাজধানিযা ধুত্তা অহেসুং সোণ্ডা পিপাসা, তে তাসং তালপন্তীনং ৰাতেরিতানং সদ্দেন পরিচারেসুং। ‘‘নিট্ঠিতে খো পনানন্দ, ধম্মে পাসাদে নিট্ঠিতায ধম্মায চ পোক্খরণিযা রাজা মহাসুদস্সনো ‘যে [যে কো পনানন্দ (স্যা॰ ক॰)] তেন সমযেন সমণেসু ৰা সমণসম্মতা ব্রাহ্মণেসু ৰা ব্রাহ্মণসম্মতা’, তে সব্বকামেহি সন্তপ্পেত্ৰা ধম্মং পাসাদং অভিরুহি। পঠমভাণৰারো। ঝানসম্পত্তি ২৬০. ‘‘অথ খো, আনন্দ, রঞ্ঞো মহাসুদস্সনস্স এতদহোসি – ‘কিস্স নু খো মে ইদং কম্মস্স ফলং কিস্স কম্মস্স ৰিপাকো, যেনাহং এতরহি এৰংমহিদ্ধিকো এৰংমহানুভাৰো’তি? অথ খো, আনন্দ, রঞ্ঞো মহাসুদস্সনস্স এতদহোসি – ‘তিণ্ণং খো মে ইদং কম্মানং ফলং তিণ্ণং কম্মানং ৰিপাকো, যেনাহং এতরহি এৰংমহিদ্ধিকো এৰংমহানুভাৰো, সেয্যথিদং দানস্স দমস্স সংযমস্সা’তি। ‘‘অথ খো, আনন্দ, রাজা মহাসুদস্সনো যেন মহাৰিযূহং কূটাগারং তেনুপসঙ্কমি; উপসঙ্কমিত্ৰা মহাৰিযূহস্স কূটাগারস্স দ্ৰারে ঠিতো উদানং উদানেসি – ‘তিট্ঠ, কামৰিতক্ক, তিট্ঠ, ব্যাপাদৰিতক্ক, তিট্ঠ, ৰিহিংসাৰিতক্ক। এত্তাৰতা কামৰিতক্ক, এত্তাৰতা ব্যাপাদৰিতক্ক, এত্তাৰতা ৰিহিংসাৰিতক্কা’তি। ২৬১. ‘‘অথ খো, আনন্দ, রাজা মহাসুদস্সনো মহাৰিযূহং কূটাগারং পৰিসিত্ৰা সোৰণ্ণমযে পল্লঙ্কে নিসিন্নো ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহাসি। ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহাসি। পীতিযা চ ৰিরাগা উপেক্খকো চ ৰিহাসি, সতো চ সম্পজানো সুখঞ্চ কাযেন পটিসংৰেদেসি, যং তং অরিযা আচিক্খন্তি – ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহাসি। সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহাসি। ২৬২. ‘‘অথ খো, আনন্দ, রাজা মহাসুদস্সনো মহাৰিযূহা কূটাগারা নিক্খমিত্ৰা সোৰণ্ণমযং কূটাগারং পৰিসিত্ৰা রূপিযমযে পল্লঙ্কে নিসিন্নো মেত্তাসহগতেন চেতসা একং দিসং ফরিত্ৰা ৰিহাসি। তথা দুতিযং তথা ততিযং তথা চতুত্থং। ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহাসি। করুণাসহগতেন চেতসা…পে॰… মুদিতাসহগতেন চেতসা…পে॰… উপেক্খাসহগতেন চেতসা একং দিসং ফরিত্ৰা ৰিহাসি তথা দুতিযং তথা ততিযং তথা চতুত্থং। ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহাসি। চতুরাসীতি নগরসহস্সাদি ২৬৩. ‘‘রঞ্ঞো, আনন্দ, মহাসুদস্সনস্স চতুরাসীতি নগরসহস্সানি অহেসুং কুসাৰতীরাজধানিপ্পমুখানি; চতুরাসীতি পাসাদসহস্সানি অহেসুং ধম্মপাসাদপ্পমুখানি; চতুরাসীতি কূটাগারসহস্সানি অহেসুং মহাৰিযূহকূটাগারপ্পমুখানি; চতুরাসীতি পল্লঙ্কসহস্সানি অহেসুং সোৰণ্ণমযানি রূপিযমযানি দন্তমযানি সারমযানি গোনকত্থতানি পটিকত্থতানি পটলিকত্থতানি কদলিমিগপৰরপচ্চত্থরণানি সউত্তরচ্ছদানি উভতোলোহিতকূপধানানি; চতুরাসীতি নাগসহস্সানি অহেসুং সোৰণ্ণালঙ্কারানি সোৰণ্ণধজানি হেমজালপটিচ্ছন্নানি উপোসথনাগরাজপ্পমুখানি; চতুরাসীতি অস্সসহস্সানি অহেসুং সোৰণ্ণালঙ্কারানি সোৰণ্ণধজানি হেমজালপটিচ্ছন্নানি ৰলাহকঅস্সরাজপ্পমুখানি; চতুরাসীতি রথসহস্সানি অহেসুং সীহচম্মপরিৰারানি ব্যগ্ঘচম্মপরিৰারানি দীপিচম্মপরিৰারানি পণ্ডুকম্বলপরিৰারানি সোৰণ্ণালঙ্কারানি সোৰণ্ণধজানি হেমজালপটিচ্ছন্নানি ৰেজযন্তরথপ্পমুখানি; চতুরাসীতি মণিসহস্সানি অহেসুং মণিরতনপ্পমুখানি; চতুরাসীতি ইত্থিসহস্সানি অহেসুং সুভদ্দাদেৰিপ্পমুখানি; চতুরাসীতি গহপতিসহস্সানি অহেসুং গহপতিরতনপ্পমুখানি; চতুরাসীতি খত্তিযসহস্সানি অহেসুং অনুযন্তানি পরিণাযকরতনপ্পমুখানি; চতুরাসীতি ধেনুসহস্সানি অহেসুং দুহসন্দনানি [দুকূলসন্দনানি(পী॰)]দুকূলসন্দানানি [দুকূলসন্দনানি (পী॰) দুকূলসন্দানানি (সং॰ নি॰ ৩.৯৬)] কংসূপধারণানি; চতুরাসীতি ৰত্থকোটিসহস্সানি অহেসুং খোমসুখুমানং কপ্পাসিকসুখুমানং কোসেয্যসুখুমানং কম্বলসুখুমানং ; (রঞ্ঞো, আনন্দ, মহাসুদস্সনস্স) [( ) সী॰ ইপোত্থকেসু নত্থি] চতুরাসীতি থালিপাকসহস্সানি অহেসুং সাযং পাতং ভত্তাভিহারো অভিহরিযিত্থ। ২৬৪. ‘‘তেন খো পনানন্দ, সমযেন রঞ্ঞো মহাসুদস্সনস্স চতুরাসীতি নাগসহস্সানি সাযং পাতং উপট্ঠানং আগচ্ছন্তি। অথ খো, আনন্দ, রঞ্ঞো মহাসুদস্সনস্স এতদহোসি – ‘ইমানি খো মে চতুরাসীতি নাগসহস্সানি সাযং পাতং উপট্ঠানং আগচ্ছন্তি, যংনূন ৰস্সসতস্স ৰস্সসতস্স অচ্চযেন দ্ৰেচত্তালীসং দ্ৰেচত্তালীসং নাগসহস্সানি সকিং সকিং উপট্ঠানং আগচ্ছেয্যু’ন্তি। অথ খো, আনন্দ, রাজা মহাসুদস্সনো পরিণাযকরতনং আমন্তেসি – ‘ইমানি খো মে, সম্ম পরিণাযকরতন, চতুরাসীতি নাগসহস্সানি সাযং পাতং উপট্ঠানং আগচ্ছন্তি, তেন হি, সম্ম পরিণাযকরতন, ৰস্সসতস্স ৰস্সসতস্স অচ্চযেন দ্ৰেচত্তালীসং দ্ৰেচত্তালীসং নাগসহস্সানি সকিং সকিং উপট্ঠানং আগচ্ছন্তূ’তি। ‘এৰং, দেৰা’তি খো, আনন্দ, পরিণাযকরতনং রঞ্ঞো মহাসুদস্সনস্স পচ্চস্সোসি। অথ খো, আনন্দ, রঞ্ঞো মহাসুদস্সনস্স অপরেন সমযেন ৰস্সসতস্স ৰস্সসতস্স অচ্চযেন দ্ৰেচত্তালীসং দ্ৰেচত্তালীসং নাগসহস্সানি সকিং সকিং উপট্ঠানং আগমংসু। সুভদ্দাদেৰিউপসঙ্কমনং ২৬৫. ‘‘অথ খো, আনন্দ, সুভদ্দায দেৰিযা বহুন্নং ৰস্সানং বহুন্নং ৰস্সসতানং বহুন্নং ৰস্সসহস্সানং অচ্চযেন এতদহোসি – ‘চিরং দিট্ঠো খো মে রাজা মহাসুদস্সনো। যংনূনাহং রাজানং মহাসুদস্সনং দস্সনায উপসঙ্কমেয্য’ন্তি। অথ খো, আনন্দ, সুভদ্দা দেৰী ইত্থাগারং আমন্তেসি – ‘এথ তুম্হে সীসানি ন্হাযথ পীতানি ৰত্থানি পারুপথ। চিরং দিট্ঠো নো রাজা মহাসুদস্সনো, রাজানং মহাসুদস্সনং দস্সনায উপসঙ্কমিস্সামা’তি। ‘এৰং, অয্যে’তি খো, আনন্দ, ইত্থাগারং সুভদ্দায দেৰিযা পটিস্সুত্ৰা সীসানি ন্হাযিত্ৰা পীতানি ৰত্থানি পারুপিত্ৰা যেন সুভদ্দা দেৰী তেনুপসঙ্কমি। অথ খো, আনন্দ, সুভদ্দা দেৰী পরিণাযকরতনং আমন্তেসি – ‘কপ্পেহি, সম্ম পরিণাযকরতন, চতুরঙ্গিনিং সেনং, চিরং দিট্ঠো নো রাজা মহাসুদস্সনো, রাজানং মহাসুদস্সনং দস্সনায উপসঙ্কমিস্সামা’তি। ‘এৰং, দেৰী’তি খো, আনন্দ, পরিণাযকরতনং সুভদ্দায দেৰিযা পটিস্সুত্ৰা চতুরঙ্গিনিং সেনং কপ্পাপেত্ৰা সুভদ্দায দেৰিযা পটিৰেদেসি – ‘কপ্পিতা খো, দেৰি, চতুরঙ্গিনী সেনা, যস্সদানি কালং মঞ্ঞসী’তি। অথ খো, আনন্দ, সুভদ্দা দেৰী চতুরঙ্গিনিযা সেনায সদ্ধিং ইত্থাগারেন যেন ধম্মো পাসাদো তেনুপসঙ্কমি; উপসঙ্কমিত্ৰা ধম্মং পাসাদং অভিরুহিত্ৰা যেন মহাৰিযূহং কূটাগারং তেনুপসঙ্কমি। উপসঙ্কমিত্ৰা মহাৰিযূহস্স কূটাগারস্স দ্ৰারবাহং আলম্বিত্ৰা অট্ঠাসি। অথ খো, আনন্দ, রাজা মহাসুদস্সনো সদ্দং সুত্ৰা – ‘কিং নু খো মহতো ৰিয জনকাযস্স সদ্দো’তি মহাৰিযূহা কূটাগারা নিক্খমন্তো অদ্দস সুভদ্দং দেৰিং দ্ৰারবাহং আলম্বিত্ৰা ঠিতং, দিস্ৰান সুভদ্দং দেৰিং এতদৰোচ – ‘এত্থেৰ, দেৰি, তিট্ঠ মা পাৰিসী’তি। অথ খো, আনন্দ, রাজা মহাসুদস্সনো অঞ্ঞতরং পুরিসং আমন্তেসি – ‘এহি ত্ৰং, অম্ভো পুরিস, মহাৰিযূহা কূটাগারা সোৰণ্ণমযং পল্লঙ্কং নীহরিত্ৰা সব্বসোৰণ্ণমযে তালৰনে পঞ্ঞপেহী’তি। ‘এৰং, দেৰা’তি খো, আনন্দ, সো পুরিসো রঞ্ঞো মহাসুদস্সনস্স পটিস্সুত্ৰা মহাৰিযূহা কূটাগারা সোৰণ্ণমযং পল্লঙ্কং নীহরিত্ৰা সব্বসোৰণ্ণমযে তালৰনে পঞ্ঞপেসি। অথ খো, আনন্দ, রাজা মহাসুদস্সনো দক্খিণেন পস্সেন সীহসেয্যং কপ্পেসি পাদে পাদং অচ্চাধায সতো সম্পজানো। ২৬৬. ‘‘অথ খো, আনন্দ, সুভদ্দায দেৰিযা এতদহোসি – ‘ৰিপ্পসন্নানি খো রঞ্ঞো মহাসুদস্সনস্স ইন্দ্রিযানি, পরিসুদ্ধো ছৰিৰণ্ণো পরিযোদাতো, মা হেৰ খো রাজা মহাসুদস্সনো কালমকাসী’তি রাজানং মহাসুদস্সনং এতদৰোচ – ‘ইমানি তে, দেৰ, চতুরাসীতি নগরসহস্সানি কুসাৰতীরাজধানিপ্পমুখানি। এত্থ, দেৰ, ছন্দং জনেহি জীৰিতে অপেক্খং করোহি। ইমানি তে, দেৰ, চতুরাসীতি পাসাদসহস্সানি ধম্মপাসাদপ্পমুখানি। এত্থ, দেৰ, ছন্দং জনেহি জীৰিতে অপেক্খং করোহি। ইমানি তে, দেৰ, চতুরাসীতি কূটাগারসহস্সানি মহাৰিযূহকূটাগারপ্পমুখানি। এত্থ, দেৰ, ছন্দং জনেহি জীৰিতে অপেক্খং করোহি। ইমানি তে, দেৰ, চতুরাসীতি পল্লঙ্কসহস্সানি সোৰণ্ণমযানি রূপিযমযানি দন্তমযানি সারমযানি গোনকত্থতানি পটিকত্থতানি পটলিকত্থতানি কদলিমিগপৰরপচ্চত্থরণানি সউত্তরচ্ছদানি উভতোলোহিতকূপধানানি। এত্থ, দেৰ, ছন্দং জনেহি, জীৰিতে অপেক্খং করোহি। ইমানি তে, দেৰ, চতুরাসীতি নাগসহস্সানি সোৰণ্ণালঙ্কারানি সোৰণ্ণধজানি হেমজালপটিচ্ছন্নানি উপোসথনাগরাজপ্পমুখানি। এত্থ, দেৰ , ছন্দং জনেহি জীৰিতে অপেক্খং করোহি। ইমানি তে, দেৰ, চতুরাসীতি অস্সসহস্সানি সোৰণ্ণালঙ্কারানি সোৰণ্ণধজানি হেমজালপটিচ্ছন্নানি ৰলাহকঅস্সরাজপ্পমুখানি। এত্থ, দেৰ, ছন্দং জনেহি জীৰিতে অপেক্খং করোহি। ইমানি তে, দেৰ চতুরাসীতি রথসহস্সানি সীহচম্মপরিৰারানি ব্যগ্ঘচম্মপরিৰারানি দীপিচম্মপরিৰারানি পণ্ডুকম্বলপরিৰারানি সোৰণ্ণালঙ্কারানি সোৰণ্ণধজানি হেমজালপটিচ্ছন্নানি ৰেজযন্তরথপ্পমুখানি। এত্থ, দেৰ, ছন্দং জনেহি জীৰিতে অপেক্খং করোহি। ইমানি তে, দেৰ, চতুরাসীতি মণিসহস্সানি মণিরতনপ্পমুখানি। এত্থ, দেৰ, ছন্দং জনেহি জীৰিতে অপেক্খং করোহি। ইমানি তে, দেৰ, চতুরাসীতি ইত্থিসহস্সানি ইত্থিরতনপ্পমুখানি। এত্থ, দেৰ, ছন্দং জনেহি জীৰিতে অপেক্খং করোহি। ইমানি তে, দেৰ, চতুরাসীতি গহপতিসহস্সানি গহপতিরতনপ্পমুখানি। এত্থ, দেৰ, ছন্দং জনেহি জীৰিতে অপেক্খং করোহি। ইমানি তে, দেৰ, চতুরাসীতি খত্তিযসহস্সানি অনুযন্তানি পরিণাযকরতনপ্পমুখানি। এত্থ, দেৰ, ছন্দং জনেহি জীৰিতে অপেক্খং করোহি। ইমানি তে, দেৰ, চতুরাসীতি ধেনুসহস্সানি দুহসন্দনানি কংসূপধারণানি। এত্থ, দেৰ, ছন্দং জনেহি জীৰিতে অপেক্খং করোহি। ইমানি তে, দেৰ, চতুরাসীতি ৰত্থকোটিসহস্সানি খোমসুখুমানং কপ্পাসিকসুখুমানং কোসেয্যসুখুমানং কম্বলসুখুমানং। এত্থ, দেৰ, ছন্দং জনেহি, জীৰিতে অপেক্খং করোহি। ইমানি তে, দেৰ, চতুরাসীতি থালিপাকসহস্সানি সাযং পাতং ভত্তাভিহারো অভিহরিযতি। এত্থ, দেৰ, ছন্দং জনেহি জীৰিতে অপেক্খং করোহী’তি। ২৬৭. ‘‘এৰং ৰুত্তে, আনন্দ, রাজা মহাসুদস্সনো সুভদ্দং দেৰিং এতদৰোচ – ‘দীঘরত্তং খো মং ত্ৰং, দেৰি, ইট্ঠেহি কন্তেহি পিযেহি মনাপেহি সমুদাচরিত্থ; অথ চ পন মং ত্ৰং পচ্ছিমে কালে অনিট্ঠেহি অকন্তেহি অপ্পিযেহি অমনাপেহি সমুদাচরসী’তি। ‘কথং চরহি তং, দেৰ, সমুদাচরামী’তি? ‘এৰং খো মং ত্ৰং, দেৰি, সমুদাচর – ‘‘সব্বেহেৰ, দেৰ, পিযেহি মনাপেহি নানাভাৰো ৰিনাভাৰো অঞ্ঞথাভাৰো, মা খো ত্ৰং, দেৰ, সাপেক্খো কালমকাসি, দুক্খা সাপেক্খস্স কালঙ্কিরিযা, গরহিতা চ সাপেক্খস্স কালঙ্কিরিযা। ইমানি তে, দেৰ, চতুরাসীতি নগরসহস্সানি কুসাৰতীরাজধানিপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি পাসাদসহস্সানি ধম্মপাসাদপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে , দেৰ, চতুরাসীতি কূটাগারসহস্সানি মহাৰিযূহকূটাগারপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি পল্লঙ্কসহস্সানি সোৰণ্ণমযানি রূপিযমযানি দন্তমযানি সারমযানি গোনকত্থতানি পটিকত্থতানি পটলিকত্থতানি কদলিমিগপৰরপচ্চত্থরণানি সউত্তরচ্ছদানি উভতোলোহিতকূপধানানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি নাগসহস্সানি সোৰণ্ণালঙ্কারানি সোৰণ্ণধজানি হেমজালপটিচ্ছন্নানি উপোসথনাগরাজপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি অস্সসহস্সানি সোৰণ্ণালঙ্কারানি সোৰণ্ণধজানি হেমজালপটিচ্ছন্নানি ৰলাহকঅস্সরাজপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি রথসহস্সানি সীহচম্মপরিৰারানি ব্যগ্ঘচম্মপরিৰারানি দীপিচম্মপরিৰারানি পণ্ডুকম্বলপরিৰারানি সোৰণ্ণালঙ্কারানি সোৰণ্ণধজানি হেমজালপটিচ্ছন্নানি ৰেজযন্তরথপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি মণিসহস্সানি মণিরতনপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি ইত্থিসহস্সানি সুভদ্দাদেৰিপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি গহপতিসহস্সানি গহপতিরতনপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি খত্তিযসহস্সানি অনুযন্তানি পরিণাযকরতনপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি ধেনুসহস্সানি দুহসন্দনানি কংসূপধারণানি। এত্থ দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি ৰত্থকোটিসহস্সানি খোমসুখুমানং কপ্পাসিকসুখুমানং কোসেয্যসুখুমানং কম্বলসুখুমানং। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে দেৰ চতুরাসীতি থালিপাকসহস্সানি সাযং পাতং ভত্তাভিহারো অভিহরিযতি। এত্থ, দেৰ, ছন্দং পজহ জীৰিতে অপেক্খং মাকাসী’’’তি। ২৬৮. ‘‘এৰং ৰুত্তে, আনন্দ, সুভদ্দা দেৰী পরোদি অস্সূনি পৰত্তেসি। অথ খো, আনন্দ, সুভদ্দা দেৰী অস্সূনি পুঞ্ছিত্ৰা [পমজ্জিত্ৰা (সী॰ স্যা॰ পী॰), পুঞ্জিত্ৰা (ক॰)] রাজানং মহাসুদস্সনং এতদৰোচ – ‘সব্বেহেৰ , দেৰ, পিযেহি মনাপেহি নানাভাৰো ৰিনাভাৰো অঞ্ঞথাভাৰো, মা খো ত্ৰং, দেৰ, সাপেক্খো কালমকাসি, দুক্খা সাপেক্খস্স কালঙ্কিরিযা, গরহিতা চ সাপেক্খস্স কালঙ্কিরিযা। ইমানি তে, দেৰ, চতুরাসীতি নগরসহস্সানি কুসাৰতীরাজধানিপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি পাসাদসহস্সানি ধম্মপাসাদপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি কূটাগারসহস্সানি মহাৰিযূহকূটাগারপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি পল্লঙ্কসহস্সানি সোৰণ্ণমযানি রূপিযমযানি দন্তমযানি সারমযানি গোনকত্থতানি পটিকত্থতানি পটলিকত্থতানি কদলিমিগপৰরপচ্চত্থরণানি সউত্তরচ্ছদানি উভতোলোহিতকূপধানানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি নাগসহস্সানি সোৰণ্ণালঙ্কারানি সোৰণ্ণধজানি হেমজালপটিচ্ছন্নানি উপোসথনাগরাজপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে , দেৰ, চতুরাসীতি অস্সসহস্সানি সোৰণ্ণালঙ্কারানি সোৰণ্ণধজানি হেমজালপটিচ্ছন্নানি ৰলাহকঅস্সরাজপ্পমুখানি । এত্থ, দেৰ, ছন্দং পজহ, জীৰিতে অপেক্খং মাকাসি। ইমানি তে, দেৰ, চতুরাসীতি রথসহস্সানি সীহচম্মপরিৰারানি ব্যগ্ঘচম্মপরিৰারানি দীপিচম্মপরিৰারানি পণ্ডুকম্বলপরিৰারানি সোৰণ্ণালঙ্কারানি সোৰণ্ণধজানি হেমজালপটিচ্ছন্নানি ৰেজযন্তরথপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি মণিসহস্সানি মণিরতনপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি ইত্থিসহস্সানি ইত্থিরতনপ্পমুখানি। এত্থ, দেৰ, ছন্দং পজহ, জীৰিতে অপেক্খং মাকাসি। ইমানি তে , দেৰ, চতুরাসীতি গহপতিসহস্সানি গহপতিরতনপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি খত্তিযসহস্সানি অনুযন্তানি পরিণাযকরতনপ্পমুখানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি ধেনুসহস্সানি দুহসন্দনানি কংসূপধারণানি। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি ৰত্থকোটিসহস্সানি খোমসুখুমানং কপ্পাসিকসুখুমানং কোসেয্যসুখুমানং কম্বলসুখুমানং। এত্থ, দেৰ, ছন্দং পজহ জীৰিতে অপেক্খং মাকাসি। ইমানি তে, দেৰ, চতুরাসীতি থালিপাকসহস্সানি সাযং পাতং ভত্তাভিহারো অভিহরিযতি। এত্থ , দেৰ, ছন্দং পজহ জীৰিতে অপেক্খং মাকাসী’তি। ব্রহ্মলোকূপগমং ২৬৯. ‘‘অথ খো, আনন্দ, রাজা মহাসুদস্সনো নচিরস্সেৰ কালমকাসি। সেয্যথাপি, আনন্দ, গহপতিস্স ৰা গহপতিপুত্তস্স ৰা মনুঞ্ঞং ভোজনং ভুত্তাৰিস্স ভত্তসম্মদো হোতি, এৰমেৰ খো, আনন্দ, রঞ্ঞো মহাসুদস্সনস্স মারণন্তিকা ৰেদনা অহোসি। কালঙ্কতো চ, আনন্দ, রাজা মহাসুদস্সনো সুগতিং ব্রহ্মলোকং উপপজ্জি। রাজা, আনন্দ, মহাসুদস্সনো চতুরাসীতি ৰস্সসহস্সানি কুমারকীল়ং [কীল়িতং (ক॰), কীল়িকং (সী॰ পী॰)] কীল়ি। চতুরাসীতি ৰস্সসহস্সানি ওপরজ্জং কারেসি। চতুরাসীতি ৰস্সসহস্সানি রজ্জং কারেসি। চতুরাসীতি ৰস্সসহস্সানি গিহিভূতো [গিহীভূতো (সী॰ পী॰)] ধম্মে পাসাদে ব্রহ্মচরিযং চরি [ব্রহ্মচরিযমচরি (ক॰)]। সো চত্তারো ব্রহ্মৰিহারে ভাৰেত্ৰা কাযস্স ভেদা পরং মরণা ব্রহ্মলোকূপগো অহোসি। ২৭০. ‘‘সিযা খো পনানন্দ, এৰমস্স – ‘অঞ্ঞো নূন তেন সমযেন রাজা মহাসুদস্সনো অহোসী’তি, ন খো পনেতং, আনন্দ, এৰং দট্ঠব্বং। অহং তেন সমযেন রাজা মহাসুদস্সনো অহোসিং। মম তানি চতুরাসীতি নগরসহস্সানি কুসাৰতীরাজধানিপ্পমুখানি, মম তানি চতুরাসীতি পাসাদসহস্সানি ধম্মপাসাদপ্পমুখানি, মম তানি চতুরাসীতি কূটাগারসহস্সানি মহাৰিযূহকূটাগারপ্পমুখানি, মম তানি চতুরাসীতি পল্লঙ্কসহস্সানি সোৰণ্ণমযানি রূপিযমযানি দন্তমযানি সারমযানি গোনকত্থতানি পটিকত্থতানি পটলিকত্থতানি কদলিমিগপৰরপচ্চত্থরণানি সউত্তরচ্ছদানি উভতোলোহিতকূপধানানি, মম তানি চতুরাসীতি নাগসহস্সানি সোৰণ্ণালঙ্কারানি সোৰণ্ণধজানি হেমজালপটিচ্ছন্নানি উপোসথনাগরাজপ্পমুখানি, মম তানি চতুরাসীতি অস্সসহস্সানি সোৰণ্ণালঙ্কারানি সোৰণ্ণধজানি হেমজালপটিচ্ছন্নানি ৰলাহকঅস্সরাজপ্পমুখানি, মম তানি চতুরাসীতি রথসহস্সানি সীহচম্মপরিৰারানি ব্যগ্ঘচম্মপরিৰারানি দীপিচম্মপরিৰারানি পণ্ডুকম্বলপরিৰারানি সোৰণ্ণালঙ্কারানি সোৰণ্ণধজানি হেমজালপটিচ্ছন্নানি ৰেজযন্তরথপ্পমুখানি, মম তানি চতুরাসীতি মণিসহস্সানি মণিরতনপ্পমুখানি, মম তানি চতুরাসীতি ইত্থিসহস্সানি সুভদ্দাদেৰিপ্পমুখানি, মম তানি চতুরাসীতি গহপতিসহস্সানি গহপতিরতনপ্পমুখানি, মম তানি চতুরাসীতি খত্তিযসহস্সানি অনুযন্তানি পরিণাযকরতনপ্পমুখানি, মম তানি চতুরাসীতি ধেনুসহস্সানি দুহসন্দনানি কংসূপধারণানি, মম তানি চতুরাসীতি ৰত্থকোটিসহস্সানি খোমসুখুমানং কপ্পাসিকসুখুমানং কোসেয্যসুখুমানং কম্বলসুখুমানং, মম তানি চতুরাসীতি থালিপাকসহস্সানি সাযং পাতং ভত্তাভিহারো অভিহরিযিত্থ। ২৭১. ‘‘তেসং খো পনানন্দ, চতুরাসীতিনগরসহস্সানং একঞ্ঞেৰ তং নগরং হোতি, যং তেন সমযেন অজ্ঝাৰসামি যদিদং কুসাৰতী রাজধানী। তেসং খো পনানন্দ, চতুরাসীতিপাসাদসহস্সানং একোযেৰ সো পাসাদো হোতি, যং তেন সমযেন অজ্ঝাৰসামি যদিদং ধম্মো পাসাদো। তেসং খো পনানন্দ, চতুরাসীতিকূটাগারসহস্সানং একঞ্ঞেৰ তং কূটাগারং হোতি, যং তেন সমযেন অজ্ঝাৰসামি যদিদং মহাৰিযূহং কূটাগারং। তেসং খো পনানন্দ, চতুরাসীতিপল্লঙ্কসহস্সানং একোযেৰ সো পল্লঙ্কো হোতি, যং তেন সমযেন পরিভুঞ্জামি যদিদং সোৰণ্ণমযো ৰা রূপিযমযো ৰা দন্তমযো ৰা সারমযো ৰা। তেসং খো পনানন্দ, চতুরাসীতিনাগসহস্সানং একোযেৰ সো নাগো হোতি, যং তেন সমযেন অভিরুহামি যদিদং উপোসথো নাগরাজা। তেসং খো পনানন্দ, চতুরাসীতিঅস্সসহস্সানং একোযেৰ সো অস্সো হোতি, যং তেন সমযেন অভিরুহামি যদিদং ৰলাহকো অস্সরাজা। তেসং খো পনানন্দ, চতুরাসীতিরথসহস্সানং একোযেৰ সো রথো হোতি, যং তেন সমযেন অভিরুহামি যদিদং ৰেজযন্তরথো। তেসং খো পনানন্দ, চতুরাসীতিইত্থিসহস্সানং একাযেৰ সা ইত্থী হোতি, যা তেন সমযেন পচ্চুপট্ঠাতি খত্তিযানী ৰা ৰেস্সিনী [ৰেস্সাযিনী (স্যা॰), ৰেলামিকানী (ক॰ সী॰ পী॰) ৰেলামিকা (সং॰ নি॰ ৩.৯৬)] ৰা। তেসং খো পনানন্দ, ৰা। তেসং খো পনানন্দ, চতুরাসীতিৰত্থকোটিসহস্সানং একংযেৰ তং দুস্সযুগং হোতি, যং তেন সমযেন পরিদহামি খোমসুখুমং ৰা কপ্পাসিকসুখুমং ৰা কোসেয্যসুখুমং ৰা কম্বলসুখুমং ৰা। তেসং খো পনানন্দ, চতুরাসীতিথালিপাকসহস্সানং একোযেৰ সো থালিপাকো হোতি, যতো নাল়িকোদনপরমং ভুঞ্জামি তদুপিযঞ্চ সূপেয্যং। ২৭২. ‘‘পস্সানন্দ, সব্বেতে সঙ্খারা অতীতা নিরুদ্ধা ৰিপরিণতা। এৰং অনিচ্চা খো, আনন্দ, সঙ্খারা; এৰং অদ্ধুৰা খো, আনন্দ, সঙ্খারা; এৰং অনস্সাসিকা খো, আনন্দ, সঙ্খারা! যাৰঞ্চিদং, আনন্দ , অলমেৰ সব্বসঙ্খারেসু নিব্বিন্দিতুং, অলং ৰিরজ্জিতুং, অলং ৰিমুচ্চিতুং। ‘‘ছক্খত্তুং খো পনাহং, আনন্দ, অভিজানামি ইমস্মিং পদেসে সরীরং নিক্খিপিতং, তঞ্চ খো রাজাৰ সমানো চক্কৰত্তী ধম্মিকো ধম্মরাজা চাতুরন্তো ৰিজিতাৰী জনপদত্থাৰরিযপত্তো সত্তরতনসমন্নাগতো, অযং সত্তমো সরীরনিক্খেপো। ন খো পনাহং, আনন্দ, তং পদেসং সমনুপস্সামি সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায যত্থ তথাগতো অট্ঠমং সরীরং নিক্খিপেয্যা’’তি। ইদমৰোচ ভগৰা, ইদং ৰত্ৰান সুগতো অথাপরং এতদৰোচ সত্থা – ‘‘অনিচ্চা ৰত সঙ্খারা, উপ্পাদৰযধম্মিনো। উপ্পজ্জিত্ৰা নিরুজ্ঝন্তি, তেসং ৰূপসমো সুখো’’তি॥ মহাসুদস্সনসুত্তং নিট্ঠিতং চতুত্থং। |