৭. লক্খণসুত্তং
দ্ৰত্তিংসমহাপুরিসলক্খণানি ১৯৮. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তত্র খো ভগৰা ভিক্খূ আমন্তেসি – ‘‘ভিক্খৰো’’তি। ‘‘ভদ্দন্তে’’তি[ভদন্তেতি (সী॰ স্যা॰ পী॰)] তে ভিক্খূ ভগৰতো পচ্চস্সোসুং। ভগৰা এতদৰোচ – ১৯৯. ‘‘দ্ৰত্তিংসিমানি, ভিক্খৰে, মহাপুরিসস্স মহাপুরিসলক্খণানি, যেহি সমন্নাগতস্স মহাপুরিসস্স দ্ৰেৰ গতিযো ভৰন্তি অনঞ্ঞা। সচে অগারং অজ্ঝাৰসতি, রাজা হোতি চক্কৰত্তী ধম্মিকো ধম্মরাজা চাতুরন্তো ৰিজিতাৰী জনপদত্থাৰরিযপ্পত্তো সত্তরতনসমন্নাগতো। তস্সিমানি সত্ত রতনানি ভৰন্তি; সেয্যথিদং, চক্করতনং হত্থিরতনং অস্সরতনং মণিরতনং ইত্থিরতনং গহপতিরতনং পরিণাযকরতনমেৰ সত্তমং। পরোসহস্সং খো পনস্স পুত্তা ভৰন্তি সূরা ৰীরঙ্গরূপা পরসেনপ্পমদ্দনা। সো ইমং পথৰিং সাগরপরিযন্তং অদণ্ডেন অসত্থেন ধম্মেন অভিৰিজিয অজ্ঝাৰসতি। সচে খো পন অগারস্মা অনগারিযং পব্বজতি, অরহং হোতি সম্মাসম্বুদ্ধো লোকে ৰিৰট্টচ্ছদো [ৰিৰটচ্ছদো (স্যা॰ ক॰), ৰিৰত্তচ্ছদো (সী॰ পী॰)]। ২০০. ‘‘কতমানি চ তানি, ভিক্খৰে, দ্ৰত্তিংস মহাপুরিসস্স মহাপুরিসলক্খণানি, যেহি সমন্নাগতস্স মহাপুরিসস্স দ্ৰেৰ গতিযো ভৰন্তি অনঞ্ঞা? সচে অগারং অজ্ঝাৰসতি, রাজা হোতি চক্কৰত্তী…পে॰… সচে খো পন অগারস্মা অনগারিযং পব্বজতি, অরহং হোতি সম্মাসম্বুদ্ধো লোকে ৰিৰট্টচ্ছদো। ‘‘ইধ, ভিক্খৰে, মহাপুরিসো সুপ্পতিট্ঠিতপাদো হোতি। যম্পি, ভিক্খৰে, মহাপুরিসো সুপ্পতিট্ঠিতপাদো হোতি, ইদম্পি, ভিক্খৰে, মহাপুরিসস্স মহাপুরিসলক্খণং ভৰতি। ‘‘পুন চপরং, ভিক্খৰে, মহাপুরিসস্স হেট্ঠাপাদতলেসু চক্কানি জাতানি হোন্তি সহস্সারানি সনেমিকানি সনাভিকানি সব্বাকারপরিপূরানি [সব্বাকারপরিপূরানি সুৰিভত্তন্তরানি (সী॰ পী॰)]। যম্পি , ভিক্খৰে, মহাপুরিসস্স হেট্ঠাপাদতলেসু চক্কানি জাতানি হোন্তি সহস্সারানি সনেমিকানি সনাভিকানি সব্বাকারপরিপূরানি, ইদম্পি, ভিক্খৰে, মহাপুরিসস্স মহাপুরিসলক্খণং ভৰতি। ‘‘পুন চপরং, ভিক্খৰে, মহাপুরিসো আযতপণ্হি হোতি…পে॰… দীঘঙ্গুলি হোতি… মুদুতলুনহত্থপাদো হোতি… জালহত্থপাদো হোতি… উস্সঙ্খপাদো হোতি… এণিজঙ্ঘো হোতি… ঠিতকোৰ অনোনমন্তো উভোহি পাণিতলেহি জণ্ণুকানি পরিমসতি পরিমজ্জতি… কোসোহিতৰত্থগুয্হো হোতি… সুৰণ্ণৰণ্ণো হোতি কঞ্চনসন্নিভত্তচো… সুখুমচ্ছৰি হোতি, সুখুমত্তা ছৰিযা রজোজল্লং কাযে ন উপলিম্পতি… একেকলোমো হোতি, একেকানি লোমানি লোমকূপেসু জাতানি… উদ্ধগ্গলোমো হোতি, উদ্ধগ্গানি লোমানি জাতানি নীলানি অঞ্জনৰণ্ণানি কুণ্ডলাৰট্টানি [কুণ্ডলাৰত্তানি (বহূসু)] দক্খিণাৰট্টকজাতানি [দক্খিণাৰত্তকজাতানি (সী॰ স্যা॰ পী॰)] … ব্রহ্মুজুগত্তো হোতি… সত্তুস্সদো হোতি… সীহপুব্বদ্ধকাযো হোতি… চিতন্তরংসো [পিতন্তরংসো (স্যা॰)] হোতি… নিগ্রোধপরিমণ্ডলো হোতি, যাৰতক্ৰস্স কাযো তাৰতক্ৰস্স ব্যামো যাৰতক্ৰস্স ব্যামো তাৰতক্ৰস্স কাযো… সমৰট্টক্খন্ধো হোতি… রসগ্গসগ্গী হোতি… সীহহনু হোতি… চত্তালীসদন্তো হোতি … সমদন্তো হোতি… অৰিরল়দন্তো হোতি… সুসুক্কদাঠো হোতি… পহূতজিৰ্হো হোতি… ব্রহ্মস্সরো হোতি করৰীকভাণী… অভিনীলনেত্তো হোতি… গোপখুমো হোতি… উণ্ণা ভমুকন্তরে জাতা হোতি, ওদাতা মুদুতূলসন্নিভা। যম্পি, ভিক্খৰে, মহাপুরিসস্স উণ্ণা ভমুকন্তরে জাতা হোতি, ওদাতা মুদুতূলসন্নিভা, ইদম্পি, ভিক্খৰে, মহাপুরিসস্স মহাপুরিসলক্খণং ভৰতি। ‘‘পুন চপরং, ভিক্খৰে, মহাপুরিসো উণ্হীসসীসো হোতি। যম্পি, ভিক্খৰে, মহাপুরিসো উণ্হীসসীসো হোতি, ইদম্পি, ভিক্খৰে, মহাপুরিসস্স মহাপুরিসলক্খণং ভৰতি। ‘‘ইমানি খো তানি, ভিক্খৰে, দ্ৰত্তিংস মহাপুরিসস্স মহাপুরিসলক্খণানি, যেহি সমন্নাগতস্স মহাপুরিসস্স দ্ৰেৰ গতিযো ভৰন্তি অনঞ্ঞা। সচে অগারং অজ্ঝাৰসতি, রাজা হোতি চক্কৰত্তী…পে॰… সচে খো পন অগারস্মা অনগারিযং পব্বজতি, অরহং হোতি সম্মাসম্বুদ্ধো লোকে ৰিৰট্টচ্ছদো। ‘‘ইমানি খো, ভিক্খৰে, দ্ৰত্তিংস মহাপুরিসস্স মহাপুরিসলক্খণানি বাহিরকাপি ইসযো ধারেন্তি, নো চ খো তে জানন্তি – ‘ইমস্স কম্মস্স কটত্তা ইদং লক্খণং পটিলভতী’তি। (১) সুপ্পতিট্ঠিতপাদতালক্খণং ২০১. ‘‘যম্পি, ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো দল়্হসমাদানো অহোসি কুসলেসু ধম্মেসু, অৰত্থিতসমাদানো কাযসুচরিতে ৰচীসুচরিতে মনোসুচরিতে দানসংৰিভাগে সীলসমাদানে উপোসথুপৰাসে মত্তেয্যতায পেত্তেয্যতায সামঞ্ঞতায ব্রহ্মঞ্ঞতায কুলে জেট্ঠাপচাযিতায অঞ্ঞতরঞ্ঞতরেসু চ অধিকুসলেসু ধম্মেসু । সো তস্স কম্মস্স কটত্তা উপচিতত্তা উস্সন্নত্তা ৰিপুলত্তা কাযস্স ভেদা পরং মরণা সুগতিং সগ্গং লোকং উপপজ্জতি। সো তত্থ অঞ্ঞে দেৰে দসহি ঠানেহি অধিগ্গণ্হাতি দিব্বেন আযুনা দিব্বেন ৰণ্ণেন দিব্বেন সুখেন দিব্বেন যসেন দিব্বেন আধিপতেয্যেন দিব্বেহি রূপেহি দিব্বেহি সদ্দেহি দিব্বেহি গন্ধেহি দিব্বেহি রসেহি দিব্বেহি ফোট্ঠব্বেহি। সো ততো চুতো ইত্থত্তং আগতো সমানো ইমং মহাপুরিসলক্খণং পটিলভতি। সুপ্পতিট্ঠিতপাদো হোতি। সমং পাদং ভূমিযং নিক্খিপতি, সমং উদ্ধরতি, সমং সব্বাৰন্তেহি পাদতলেহি ভূমিং ফুসতি। ২০২. ‘‘সো তেন লক্খণেন সমন্নাগতো সচে অগারং অজ্ঝাৰসতি, রাজা হোতি চক্কৰত্তী ধম্মিকো ধম্মরাজা চাতুরন্তো ৰিজিতাৰী জনপদত্থাৰরিযপ্পত্তো সত্তরতনসমন্নাগতো। তস্সিমানি সত্ত রতনানি ভৰন্তি; সেয্যথিদং, চক্করতনং হত্থিরতনং অস্সরতনং মণিরতনং ইত্থিরতনং গহপতিরতনং পরিণাযকরতনমেৰ সত্তমং। পরোসহস্সং খো পনস্স পুত্তা ভৰন্তি সূরা ৰীরঙ্গরূপা পরসেনপ্পমদ্দনা। সো ইমং পথৰিং সাগরপরিযন্তং অখিলমনিমিত্তমকণ্টকং ইদ্ধং ফীতং খেমং সিৰং নিরব্বুদং অদণ্ডেন অসত্থেন ধম্মেন অভিৰিজিয অজ্ঝাৰসতি । রাজা সমানো কিং লভতি? অক্খম্ভিযো [অৰিক্খম্ভিযো (সী॰ পী॰)] হোতি কেনচি মনুস্সভূতেন পচ্চত্থিকেন পচ্চামিত্তেন। রাজা সমানো ইদং লভতি। ‘‘সচে খো পন অগারস্মা অনগারিযং পব্বজতি, অরহং হোতি সম্মাসম্বুদ্ধো লোকে ৰিৰট্টচ্ছদো। বুদ্ধো সমানো কিং লভতি? অক্খম্ভিযো হোতি অব্ভন্তরেহি ৰা বাহিরেহি ৰা পচ্চত্থিকেহি পচ্চামিত্তেহি রাগেন ৰা দোসেন ৰা মোহেন ৰা সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা কেনচি ৰা লোকস্মিং। বুদ্ধো সমানো ইদং লভতি’’। এতমত্থং ভগৰা অৰোচ। ২০৩. তত্থেতং ৰুচ্চতি – ‘‘সচ্চে চ ধম্মে চ দমে চ সংযমে, সোচেয্যসীলালযুপোসথেসু চ। দানে অহিংসায অসাহসে রতো, দল়্হং সমাদায সমত্তমাচরি [সমন্তমাচরি (স্যা॰ ক॰)]॥ ‘‘সো তেন কম্মেন দিৰং সমক্কমি [অপক্কমি (স্যা॰ ক॰)], সুখঞ্চ খিড্ডারতিযো চ অন্ৰভি [অংন্ৰভি (টীকা)]। ততো চৰিত্ৰা পুনরাগতো ইধ, সমেহি পাদেহি ফুসী ৰসুন্ধরং॥ ‘‘ব্যাকংসু ৰেয্যঞ্জনিকা সমাগতা, সমপ্পতিট্ঠস্স ন হোতি খম্ভনা। গিহিস্স ৰা পব্বজিতস্স ৰা পুন [পন (স্যা॰)], তং লক্খণং ভৰতি তদত্থজোতকং॥ ‘‘অক্খম্ভিযো হোতি অগারমাৰসং, পরাভিভূ সত্তুভি নপ্পমদ্দনো। মনুস্সভূতেনিধ হোতি কেনচি, অক্খম্ভিযো তস্স ফলেন কম্মুনো॥ ‘‘সচে চ পব্বজ্জমুপেতি তাদিসো, নেক্খম্মছন্দাভিরতো ৰিচক্খণো। অগ্গো ন সো গচ্ছতি জাতু খম্ভনং, নরুত্তমো এস হি তস্স ধম্মতা’’তি॥ (২) পাদতলচক্কলক্খণং ২০৪. ‘‘যম্পি, ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো বহুজনস্স সুখাৰহো অহোসি, উব্বেগউত্তাসভযং অপনুদিতা, ধম্মিকঞ্চ রক্খাৰরণগুত্তিং সংৰিধাতা, সপরিৰারঞ্চ দানং অদাসি। সো তস্স কম্মস্স কটত্তা উপচিতত্তা উস্সন্নত্তা ৰিপুলত্তা কাযস্স ভেদা পরং মরণা সুগতিং সগ্গং লোকং উপপজ্জতি…পে॰… সো ততো চুতো ইত্থত্তং আগতো সমানো ইমং মহাপুরিসলক্খণং পটিলভতি। হেট্ঠাপাদতলেসু চক্কানি জাতানি হোন্তি সহস্সারানি সনেমিকানি সনাভিকানি সব্বাকারপরিপূরানি সুৰিভত্তন্তরানি। ‘‘সো তেন লক্খণেন সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? মহাপরিৰারো হোতি; মহাস্স হোন্তি পরিৰারা ব্রাহ্মণগহপতিকা নেগমজানপদা গণকমহামত্তা অনীকট্ঠা দোৰারিকা অমচ্চা পারিসজ্জা রাজানো ভোগিযা কুমারা। রাজা সমানো ইদং লভতি। সচে খো পন অগারস্মা অনগারিযং পব্বজতি, অরহং হোতি সম্মাসম্বুদ্ধো লোকে ৰিৰট্টচ্ছদো। বুদ্ধো সমানো কিং লভতি? মহাপরিৰারো হোতি; মহাস্স হোন্তি পরিৰারা ভিক্খূ ভিক্খুনিযো উপাসকা উপাসিকাযো দেৰা মনুস্সা অসুরা নাগা গন্ধব্বা। বুদ্ধো সমানো ইদং লভতি’’। এতমত্থং ভগৰা অৰোচ। ২০৫. তত্থেতং ৰুচ্চতি – ‘‘পুরে পুরত্থা পুরিমাসু জাতিসু, মনুস্সভূতো বহুনং সুখাৰহো। উব্ভেগউত্তাসভযাপনূদনো, গুত্তীসু রক্খাৰরণেসু উস্সুকো॥ ‘‘সো তেন কম্মেন দিৰং সমক্কমি, সুখঞ্চ খিড্ডারতিযো চ অন্ৰভি। ততো চৰিত্ৰা পুনরাগতো ইধ, চক্কানি পাদেসু দুৰেসু ৰিন্দতি॥ ‘‘সমন্তনেমীনি সহস্সরানি চ, ব্যাকংসু ৰেয্যঞ্জনিকা সমাগতা। দিস্ৰা কুমারং সতপুঞ্ঞলক্খণং, পরিৰারৰা হেস্সতি সত্তুমদ্দনো॥ তথা হী চক্কানি সমন্তনেমিনি, সচে ন পব্বজ্জমুপেতি তাদিসো। ৰত্তেতি চক্কং পথৰিং পসাসতি, তস্সানুযন্তাধ [তস্সানুযুত্তা ইধ (সী॰ পী॰), তস্সানুযন্তা ইধ (স্যা॰ ক॰)] ভৰন্তি খত্তিযা॥ ‘‘মহাযসং সংপরিৰারযন্তি নং, সচে চ পব্বজ্জমুপেতি তাদিসো। নেক্খম্মছন্দাভিরতো ৰিচক্খণো, দেৰামনুস্সাসুরসক্করক্খসা [সত্তরক্খসা (ক॰) সী॰ স্যাঅট্ঠকথা ওলোকেতব্বা]॥ ‘‘গন্ধব্বনাগা ৰিহগা চতুপ্পদা, অনুত্তরং দেৰমনুস্সপূজিতং। মহাযসং সংপরিৰারযন্তি ন’’ন্তি॥ (৩-৫) আযতপণ্হিতাদিতিলক্খণং ২০৬. ‘‘যম্পি, ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো পাণাতিপাতং পহায পাণাতিপাতা পটিৰিরতো অহোসি নিহিতদণ্ডো নিহিতসত্থো লজ্জী দযাপন্নো, সব্বপাণভূতহিতানুকম্পী ৰিহাসি। সো তস্স কম্মস্স কটত্তা উপচিতত্তা উস্সন্নত্তা ৰিপুলত্তা…পে॰… সো ততো চুতো ইত্থত্তং আগতো সমানো ইমানি তীণি মহাপুরিসলক্খণানি পটিলভতি। আযতপণ্হি চ হোতি, দীঘঙ্গুলি চ ব্রহ্মুজুগত্তো চ। ‘‘সো তেহি লক্খণেহি সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? দীঘাযুকো হোতি চিরট্ঠিতিকো, দীঘমাযুং পালেতি, ন সক্কা হোতি অন্তরা জীৰিতা ৰোরোপেতুং কেনচি মনুস্সভূতেন পচ্চত্থিকেন পচ্চামিত্তেন । রাজা সমানো ইদং লভতি… বুদ্ধো সমানো কিং লভতি? দীঘাযুকো হোতিচিরট্ঠিতিকো, দীঘমাযুং পালেতি, ন সক্কা হোতি অন্তরা জীৰিতা ৰোরোপেতুং পচ্চত্থিকেহি পচ্চামিত্তেহি সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা কেনচি ৰা লোকস্মিং। বুদ্ধো সমানো ইদং লভতি’’। এতমত্থং ভগৰা অৰোচ। ২০৭. তত্থেতং ৰুচ্চতি – ‘‘মারণৰধভযত্তনো [মরণৰধভযত্তনো (সী॰ পী॰ ক॰), মরণৰধভযমত্তনো (স্যা॰)] ৰিদিত্ৰা, পটিৰিরতো পরং মারণাযহোসি। তেন সুচরিতেন সগ্গমগমা [তেন সো সুচরিতেন সগ্গমগমাসি (স্যা॰)], সুকতফলৰিপাকমনুভোসি॥ ‘‘চৰিয পুনরিধাগতো সমানো, পটিলভতি ইধ তীণি লক্খণানি। ভৰতি ৰিপুলদীঘপাসণ্হিকো, ব্রহ্মাৰ সুজু সুভো সুজাতগত্তো॥ ‘‘সুভুজো সুসু সুসণ্ঠিতো সুজাতো, মুদুতলুনঙ্গুলিযস্স হোন্তি। দীঘা তীভি পুরিসৰরগ্গলক্খণেহি, চিরযপনায [চিরযাপনায (স্যা॰)] কুমারমাদিসন্তি॥ ‘‘ভৰতি যদি গিহী চিরং যপেতি, চিরতরং পব্বজতি যদি ততো হি। যাপযতি চ ৰসিদ্ধিভাৰনায, ইতি দীঘাযুকতায তং নিমিত্ত’’ন্তি॥ (৬) সত্তুস্সদতালক্খণং ২০৮. ‘‘যম্পি , ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো দাতা অহোসি পণীতানং রসিতানং খাদনীযানং ভোজনীযানং সাযনীযানং লেহনীযানং পানানং। সো তস্স কম্মস্স কটত্তা…পে॰… সো ততো চুতো ইত্থত্তং আগতো সমানো ইমং মহাপুরিসলক্খণং পটিলভতি, সত্তুস্সদো হোতি, সত্তস্স উস্সদা হোন্তি; উভোসু হত্থেসু উস্সদা হোন্তি, উভোসু পাদেসু উস্সদা হোন্তি, উভোসু অংসকূটেসু উস্সদা হোন্তি, খন্ধে উস্সদো হোতি। ‘‘সো তেন লক্খণেন সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? লাভী হোতি পণীতানং রসিতানং খাদনীযানং ভোজনীযানং সাযনীযানং লেহনীযানং পানানং। রাজা সমানো ইদং লভতি… বুদ্ধো সমানো কিং লভতি? লাভী হোতি পণীতানং রসিতানং খাদনীযানং ভোজনীযানং সাযনীযানং লেহনীযানং পানানং। বুদ্ধো সমানো ইদং লভতি’’। এতমত্থং ভগৰা অৰোচ। ২০৯. তত্থেতং ৰুচ্চতি – ‘‘খজ্জভোজ্জমথ লেয্য সাযিযং, উত্তমগ্গরসদাযকো অহু। তেন সো সুচরিতেন কম্মুনা, নন্দনে চিরমভিপ্পমোদতি॥ ‘‘সত্ত চুস্সদে ইধাধিগচ্ছতি, হত্থপাদমুদুতঞ্চ ৰিন্দতি। আহু ব্যঞ্জননিমিত্তকোৰিদা, খজ্জভোজ্জরসলাভিতায নং॥ ‘‘যং গিহিস্সপি [ন তং গিহিস্সাপি (স্যা॰)] তদত্থজোতকং, পব্বজ্জম্পি চ তদাধিগচ্ছতি। খজ্জভোজ্জরসলাভিরুত্তমং, আহু সব্বগিহিবন্ধনচ্ছিদ’’ন্তি॥ (৭-৮) করচরণমুদুজালতালক্খণানি ২১০. ‘‘যম্পি , ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো চতূহি সঙ্গহৰত্থূহি জনং সঙ্গাহকো অহোসি – দানেন পেয্যৰজ্জেন [পিযৰাচেন (স্যা॰ ক॰)] অত্থচরিযায সমানত্ততায। সো তস্স কম্মস্স কটত্তা…পে॰… সো ততো চুতো ইত্থত্তং আগতো সমানো ইমানি দ্ৰে মহাপুরিসলক্খণানিপটিলভতি। মুদুতলুনহত্থপাদো চ হোতি জালহত্থপাদো চ। ‘‘সো তেহি লক্খণেহি সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? সুসঙ্গহিতপরিজনো হোতি, সুসঙ্গহিতাস্স হোন্তি ব্রাহ্মণগহপতিকা নেগমজানপদা গণকমহামত্তা অনীকট্ঠা দোৰারিকা অমচ্চা পারিসজ্জা রাজানো ভোগিযা কুমারা। রাজা সমানো ইদং লভতি… বুদ্ধো সমানো কিং লভতি? সুসঙ্গহিতপরিজনো হোতি, সুসঙ্গহিতাস্স হোন্তি ভিক্খূ ভিক্খুনিযো উপাসকা উপাসিকাযো দেৰা মনুস্সা অসুরা নাগা গন্ধব্বা। বুদ্ধো সমানো ইদং লভতি’’। এতমত্থং ভগৰা অৰোচ। ২১১. তত্থেতং ৰুচ্চতি – ‘‘দানম্পি চত্থচরিযতঞ্চ [দানম্পি চ অত্থচরিযতম্পি চ (সী॰ পী॰)], পিযৰাদিতঞ্চ সমানত্ততঞ্চ [পিযৰদতঞ্চ সমানছন্দতঞ্চ (সী॰ পী॰)]। করিযচরিযসুসঙ্গহং বহূনং, অনৰমতেন গুণেন যাতি সগ্গং॥ ‘‘চৰিয পুনরিধাগতো সমানো, করচরণমুদুতঞ্চ জালিনো চ। অতিরুচিরসুৰগ্গুদস্সনেয্যং, পটিলভতি দহরো সুসু কুমারো॥ ‘‘ভৰতি পরিজনস্সৰো ৰিধেয্যো, মহিমং আৰসিতো সুসঙ্গহিতো। পিযৰদূ হিতসুখতং জিগীসমানো [জিগিং সমানো (সী॰ স্যা॰ পী॰)], অভিরুচিতানি গুণানি আচরতি॥ ‘‘যদি চ জহতি সব্বকামভোগং, কথযতি ধম্মকথং জিনো জনস্স। ৰচনপটিকরস্সাভিপ্পসন্না , সুত্ৰান ধম্মানুধম্মমাচরন্তী’’তি॥ (৯-১০) উস্সঙ্খপাদউদ্ধগ্গলোমতালক্খণানি ২১২. ‘‘যম্পি, ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো [সমানো বহুনো জনস্স (সী॰ পী॰)] অত্থূপসংহিতং ধম্মূপসংহিতং ৰাচং ভাসিতা অহোসি, বহুজনং নিদংসেসি, পাণীনং হিতসুখাৰহো ধম্মযাগী। সো তস্স কম্মস্স কটত্তা…পে॰… সো ততো চুতো ইত্থত্তং আগতো সমানো ইমানি দ্ৰে মহাপুরিসলক্খণানি পটিলভতি। উস্সঙ্খপাদো চ হোতি, উদ্ধগ্গলোমো চ। ‘‘সো তেহি লক্খণেহি সমন্নাগতো, সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? অগ্গো চ হোতি সেট্ঠো চ পামোক্খো চ উত্তমো চ পৰরো চ কামভোগীনং। রাজা সমানো ইদং লভতি… বুদ্ধো সমানো কিং লভতি? অগ্গো চ হোতি সেট্ঠো চ পামোক্খো চ উত্তমো চ পৰরো চ সব্বসত্তানং। বুদ্ধো সমানো ইদং লভতি’’। এতমত্থং ভগৰা অৰোচ। ২১৩. তত্থেতং ৰুচ্চতি – ‘‘অত্থধম্মসহিতং [অত্থধম্মসংহিতং (ক॰ সী॰ পী॰), অত্থধম্মুপসংহিতং (ক॰)] পুরে গিরং, এরযং বহুজনং নিদংসযি। পাণিনং হিতসুখাৰহো অহু, ধম্মযাগমযজী [ধম্মযাগং অস্সজি (ক॰)] অমচ্ছরী॥ ‘‘তেন সো সুচরিতেন কম্মুনা, সুগ্গতিং ৰজতি তত্থ মোদতি। লক্খণানি চ দুৰে ইধাগতো, উত্তমপ্পমুখতায [উত্তমসুখতায (স্যা॰), উত্তমপমুক্খতায (ক॰)] ৰিন্দতি॥ ‘‘উব্ভমুপ্পতিতলোমৰা সসো, পাদগণ্ঠিরহু সাধুসণ্ঠিতা। মংসলোহিতাচিতা তচোত্থতা, উপরিচরণসোভনা [উপরিজানুসোভনা (স্যা॰), উপরি চ পন সোভনা (সী॰ পী॰)] অহু॥ ‘‘গেহমাৰসতি চে তথাৰিধো, অগ্গতং ৰজতি কামভোগিনং। তেন উত্তরিতরো ন ৰিজ্জতি, জম্বুদীপমভিভুয্য ইরিযতি॥ ‘‘পব্বজম্পি চ অনোমনিক্কমো, অগ্গতং ৰজতি সব্বপাণিনং। তেন উত্তরিতরো ন ৰিজ্জতি, সব্বলোকমভিভুয্য ৰিহরতী’’তি॥ (১১) এণিজঙ্ঘলক্খণং ২১৪. ‘‘যম্পি, ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো সক্কচ্চং ৰাচেতা অহোসি সিপ্পং ৰা ৰিজ্জং ৰা চরণং ৰা কম্মং ৰা – ‘কিং তিমে খিপ্পং ৰিজানেয্যুং, খিপ্পং পটিপজ্জেয্যুং, ন চিরং কিলিস্সেয্যু’’ন্তি। সো তস্স কম্মস্স কটত্তা…পে॰… সো ততো চুতো ইত্থত্তং আগতো সমানো ইমং মহাপুরিসলক্খণং পটিলভতি। এণিজঙ্ঘো হোতি। ‘‘সো তেন লক্খণেন সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? যানি তানি রাজারহানি রাজঙ্গানি রাজূপভোগানিরাজানুচ্ছৰিকানি তানি খিপ্পং পটিলভতি। রাজা সমানো ইদং লভতি… বুদ্ধো সমানো কিং লভতি? যানি তানি সমণারহানি সমণঙ্গানি সমণূপভোগানি সমণানুচ্ছৰিকানি, তানি খিপ্পং পটিলভতি। বুদ্ধো সমানো ইদং লভতি’’। এতমত্থং ভগৰা অৰোচ। ২১৫. তত্থেতং ৰুচ্চতি – ‘‘সিপ্পেসু ৰিজ্জাচরণেসু কম্মেসু [কম্মসু (সী॰ পী॰)], কথং ৰিজানেয্যুং [ৰিজানেয্য (সী॰ পী॰), ৰিজানেয্যু (স্যা॰)] লহুন্তি ইচ্ছতি। যদূপঘাতায ন হোতি কস্সচি, ৰাচেতি খিপ্পং ন চিরং কিলিস্সতি॥ ‘‘তং কম্মং কত্ৰা কুসলং সুখুদ্রযং [সুখিন্দ্রিযং (ক॰)], জঙ্ঘা মনুঞ্ঞা লভতে সুসণ্ঠিতা। ৰট্টা সুজাতা অনুপুব্বমুগ্গতা, উদ্ধগ্গলোমা সুখুমত্তচোত্থতা॥ ‘‘এণেয্যজঙ্ঘোতি তমাহু পুগ্গলং, সম্পত্তিযা খিপ্পমিধাহু [খিপ্পমিদাহু (?)] লক্খণং। গেহানুলোমানি যদাভিকঙ্খতি, অপব্বজং খিপ্পমিধাধিগচ্ছতি [খিপ্পমিদাধিগচ্ছতি (?)]॥ ‘‘সচে চ পব্বজ্জমুপেতি তাদিসো, নেক্খম্মছন্দাভিরতো ৰিচক্খণো। অনুচ্ছৰিকস্স যদানুলোমিকং, তং ৰিন্দতি খিপ্পমনোমৰিক্কমো [নিক্কমো (সী॰ স্যা॰ পী॰)]’’তি॥ (১২) সুখুমচ্ছৰিলক্খণং ২১৬. ‘‘যম্পি, ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো সমণং ৰা ব্রাহ্মণং ৰা উপসঙ্কমিত্ৰা পরিপুচ্ছিতা অহোসি – ‘‘কিং, ভন্তে, কুসলং, কিং অকুসলং, কিং সাৰজ্জং, কিং অনৰজ্জং, কিং সেৰিতব্বং, কিং ন সেৰিতব্বং, কিং মে করীযমানং দীঘরত্তং অহিতায দুক্খায অস্স, কিং ৰা পন মে করীযমানং দীঘরত্তং হিতায সুখায অস্সা’’তি। সো তস্স কম্মস্স কটত্তা…পে॰… সো ততো চুতো ইত্থত্তং আগতো সমানো ইমং মহাপুরিসলক্খণং পটিলভতি। সুখুমচ্ছৰিহোতি, সুখুমত্তা ছৰিযা রজোজল্লং কাযে ন উপলিম্পতি। ‘‘সো তেন লক্খণেন সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? মহাপঞ্ঞো হোতি, নাস্স হোতি কোচি পঞ্ঞায সদিসো ৰা সেট্ঠো ৰা কামভোগীনং। রাজা সমানো ইদং লভতি… বুদ্ধো সমানো কিং লভতি? মহাপঞ্ঞো হোতি পুথুপঞ্ঞো হাসপঞ্ঞো [হাসুপঞ্ঞো (সী॰ পী॰)]জৰনপঞ্ঞো তিক্খপঞ্ঞো নিব্বেধিকপঞ্ঞো, নাস্স হোতি কোচি পঞ্ঞায সদিসো ৰা সেট্ঠো ৰা সব্বসত্তানং। বুদ্ধো সমানো ইদং লভতি’’। এতমত্থং ভগৰা অৰোচ। ২১৭. তত্থেতং ৰুচ্চতি – ‘‘পুরে পুরত্থা পুরিমাসু জাতিসু, অঞ্ঞাতুকামো পরিপুচ্ছিতা অহু। সুস্সূসিতা পব্বজিতং উপাসিতা, অত্থন্তরো অত্থকথং নিসামযি॥ ‘‘পঞ্ঞাপটিলাভগতেন [পঞ্ঞাপটিলাভকতেন (সী॰ পী॰) টীকা ওলোকেতব্বা] কম্মুনা, মনুস্সভূতো সুখুমচ্ছৰী অহু। ব্যাকংসু উপ্পাদনিমিত্তকোৰিদা, সুখুমানি অত্থানি অৰেচ্চ দক্খিতি॥ ‘‘সচে ন পব্বজ্জমুপেতি তাদিসো, ৰত্তেতি চক্কং পথৰিং পসাসতি। অত্থানুসিট্ঠীসু পরিগ্গহেসু চ, ন তেন সেয্যো সদিসো চ ৰিজ্জতি॥ ‘‘সচে চ পব্বজ্জমুপেতি তাদিসো, নেক্খম্মছন্দাভিরতো ৰিচক্খণো। পঞ্ঞাৰিসিট্ঠং লভতে অনুত্তরং, পপ্পোতি বোধিং ৰরভূরিমেধসো’’তি॥ (১৩) সুৰণ্ণৰণ্ণলক্খণং ২১৮. ‘‘যম্পি , ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো অক্কোধনো অহোসি অনুপাযাসবহুলো, বহুম্পি ৰুত্তো সমানো নাভিসজ্জি ন কুপ্পি ন ব্যাপজ্জি ন পতিত্থীযি, ন কোপঞ্চ দোসঞ্চ অপ্পচ্চযঞ্চ পাত্ৰাকাসি। দাতা চ অহোসি সুখুমানং মুদুকানং অত্থরণানং পাৰুরণানং [পাপুরণানং (সী॰ স্যা॰ পী॰)]খোমসুখুমানং কপ্পাসিকসুখুমানং কোসেয্যসুখুমানং কম্বলসুখুমানং। সো তস্স কম্মস্স কটত্তা উপচিতত্তা…পে॰… সো ততো চুতো ইত্থত্তং আগতো সমানো ইমং মহাপুরিসলক্খণং পটিলভতি। সুৰণ্ণৰণ্ণো হোতি কঞ্চনসন্নিভত্তচো। ‘‘সো তেন লক্খণেন সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? লাভী হোতি সুখুমানং মুদুকানং অত্থরণানং পাৰুরণানং খোমসুখুমানং কপ্পাসিকসুখুমানং কোসেয্যসুখুমানং কম্বলসুখুমানং। রাজা সমানো ইদং লভতি… বুদ্ধো সমানো কিং লভতি? লাভী হোতি সুখুমানং মুদুকানং অত্থরণানং পাৰুরণানং খোমসুখুমানং কপ্পাসিকসুখুমানং কোসেয্যসুখুমানং কম্বলসুখুমানং। বুদ্ধো সমানো ইদং লভতি’’। এতমত্থং ভগৰা অৰোচ। ২১৯. তত্থেতং ৰুচ্চতি – ‘‘অক্কোধঞ্চ অধিট্ঠহি অদাসি [অদাসি চ (সী॰ পী॰)], দানঞ্চ ৰত্থানি সুখুমানি সুচ্ছৰীনি। পুরিমতরভৰে ঠিতো অভিৰিস্সজি, মহিমিৰ সুরো অভিৰস্সং॥ ‘‘তং কত্ৰান ইতো চুতো দিব্বং, উপপজ্জি [উপপজ্জ (সী॰ পী॰)] সুকতফলৰিপাকমনুভুত্ৰা। কনকতনুসন্নিভো ইধাভিভৰতি, সুরৰরতরোরিৰ ইন্দো॥ ‘‘গেহঞ্চাৰসতি নরো অপব্বজ্জ, মিচ্ছং মহতিমহিং অনুসাসতি [পসাসতি (স্যা॰)]। পসয্হ সহিধ সত্তরতনং [পসয্হ অভিৰসন-ৰরতরং (সী॰ পী॰)], পটিলভতি ৰিমল [ৰিপুল (স্যা॰), ৰিপুলং (সী॰ পী॰)] সুখুমচ্ছৰিং সুচিঞ্চ॥ ‘‘লাভী অচ্ছাদনৰত্থমোক্খপাৰুরণানং, ভৰতি যদি অনাগারিযতং উপেতি। সহিতো [সুহিত (স্যা॰), স হি (সী॰ পী॰)] পুরিমকতফলং অনুভৰতি, ন ভৰতি কতস্স পনাসো’’তি॥ (১৪) কোসোহিতৰত্থগুয্হলক্খণং ২২০. যম্পি, ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো চিরপ্পনট্ঠে সুচিরপ্পৰাসিনো ঞাতিমিত্তে সুহজ্জে সখিনো সমানেতা অহোসি। মাতরম্পি পুত্তেন সমানেতা অহোসি, পুত্তম্পি মাতরা সমানেতা অহোসি, পিতরম্পি পুত্তেন সমানেতা অহোসি, পুত্তম্পি পিতরা সমানেতা অহোসি, ভাতরম্পি ভাতরা সমানেতা অহোসি, ভাতরম্পি ভগিনিযা সমানেতা অহোসি, ভগিনিম্পি ভাতরা সমানেতা অহোসি, ভগিনিম্পি ভগিনিযা সমানেতা অহোসি, সমঙ্গীকত্ৰা [সমগ্গিং কত্ৰা (সী॰ স্যা॰ পী॰)] চ অব্ভনুমোদিতা অহোসি। সো তস্স কম্মস্স কটত্তা…পে॰… সো ততো চুতো ইত্থত্তং আগতো সমানো ইমং মহাপুরিসলক্খণং পটিলভতি – কোসোহিতৰত্থগুয্হো হোতি। ‘‘সো তেন লক্খণেন সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? পহূতপুত্তো হোতি, পরোসহস্সং খো পনস্স পুত্তা ভৰন্তি সূরা ৰীরঙ্গরূপা পরসেনপ্পমদ্দনা। রাজা সমানো ইদং লভতি… বুদ্ধো সমানো কিং লভতি? পহূতপুত্তো হোতি, অনেকসহস্সং খো পনস্স পুত্তা ভৰন্তি সূরা ৰীরঙ্গরূপা পরসেনপ্পমদ্দনা। বুদ্ধো সমানো ইদং লভতি’’। এতমত্থং ভগৰা অৰোচ। ২২১. তত্থেতং ৰুচ্চতি – ‘‘পুরে পুরত্থা পুরিমাসু জাতিসু, চিরপ্পনট্ঠে সুচিরপ্পৰাসিনো। ঞাতী সুহজ্জে সখিনো সমানযি, সমঙ্গিকত্ৰা অনুমোদিতা অহু॥ ‘‘সো তেন [স তেন (ক॰)] কম্মেন দিৰং সমক্কমি, সুখঞ্চ খিড্ডারতিযো চ অন্ৰভি। ততো চৰিত্ৰা পুনরাগতো ইধ, কোসোহিতং ৰিন্দতি ৰত্থছাদিযং॥ ‘‘পহূতপুত্তো ভৰতী তথাৰিধো, পরোসহস্সঞ্চ [পরোসহস্সস্স (সী॰ পী॰)] ভৰন্তি অত্রজা। সূরা চ ৰীরা চ [সূরা চ ৰীরঙ্গরূপা (ক॰)] অমিত্ততাপনা, গিহিস্স পীতিংজননা পিযংৰদা॥ ‘‘বহূতরা পব্বজিতস্স ইরিযতো, ভৰন্তি পুত্তা ৰচনানুসারিনো। গিহিস্স ৰা পব্বজিতস্স ৰা পুন, তং লক্খণং জাযতি তদত্থজোতক’’ন্তি॥ পঠমভাণৰারো নিট্ঠিতো। (১৫-১৬) পরিমণ্ডলঅনোনমজণ্ণুপরিমসনলক্খণানি ২২২. ‘‘যম্পি , ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো মহাজনসঙ্গহং [মহাজনসঙ্গাহকং (ক॰)] সমেক্খমানো[সমপেক্খমানো (ক॰)] সমং জানাতি সামং জানাতি, পুরিসং জানাতি পুরিসৰিসেসং জানাতি – ‘অযমিদমরহতি অযমিদমরহতী’তি তত্থ তত্থ পুরিসৰিসেসকরো অহোসি। সো তস্স কম্মস্স কটত্তা…পে॰… সো ততো চুতো ইত্থত্তং আগতো সমানো ইমানি দ্ৰে মহাপুরিসলক্খণানি পটিলভতি। নিগ্রোধ পরিমণ্ডলো চ হোতি, ঠিতকোযেৰ চ অনোনমন্তো উভোহি পাণিতলেহি জণ্ণুকানি পরিমসতি পরিমজ্জতি। ‘‘সো তেহি লক্খণেহি সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি ? অড্ঢো হোতি মহদ্ধনো মহাভোগো পহূতজাতরূপরজতো পহূতৰিত্তূপকরণো পহূতধনধঞ্ঞো পরিপুণ্ণকোসকোট্ঠাগারো। রাজা সমানো ইদং লভতি…পে॰… বুদ্ধো সমানো কিং লভতি? অড্ঢো হোতি মহদ্ধনো মহাভোগো। তস্সিমানি ধনানি হোন্তি, সেয্যথিদং, সদ্ধাধনং সীলধনং হিরিধনং ওত্তপ্পধনং সুতধনং চাগধনং পঞ্ঞাধনং। বুদ্ধো সমানো ইদং লভতি’’। এতমত্থং ভগৰা অৰোচ। ২২৩. তত্থেতং ৰুচ্চতি – ‘‘তুলিয পটিৰিচয চিন্তযিত্ৰা, মহাজনসঙ্গহনং [মহাজনং সঙ্গাহকং (ক॰)] সমেক্খমানো। অযমিদমরহতি তত্থ তত্থ, পুরিসৰিসেসকরো পুরে অহোসি॥ ‘‘মহিঞ্চ পন [সমা চ পন (স্যা॰), স হি চ পন (সী॰ পী॰)] ঠিতো অনোনমন্তো, ফুসতি করেহি উভোহি জণ্ণুকানি। মহিরুহপরিমণ্ডলো অহোসি, সুচরিতকম্মৰিপাকসেসকেন॥ ‘‘বহুৰিৰিধনিমিত্তলক্খণঞ্ঞূ, অতিনিপুণা মনুজা ব্যাকরিংসু। বহুৰিৰিধা গিহীনং অরহানি, পটিলভতি দহরো সুসু কুমারো॥ ‘‘ইধ চ মহীপতিস্স কামভোগী, গিহিপতিরূপকা বহূ ভৰন্তি। যদি চ জহতি সব্বকামভোগং, লভতি অনুত্তরং উত্তমধনগ্গ’’ন্তি॥ (১৭-১৯) সীহপুব্বদ্ধকাযাদিতিলক্খণং ২২৪. ‘‘যম্পি , ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো বহুজনস্স অত্থকামো অহোসি হিতকামো ফাসুকামো যোগক্খেমকামো – ‘কিন্তিমে সদ্ধায ৰড্ঢেয্যুং, সীলেন ৰড্ঢেয্যুং, সুতেন ৰড্ঢেয্যুং [সুতেন ৰড্ঢেয্যুং, বুদ্ধিযা ৰড্ঢেয্যুং (স্যা॰)], চাগেন ৰড্ঢেয্যুং, ধম্মেন ৰড্ঢেয্যুং, পঞ্ঞায ৰড্ঢেয্যুং, ধনধঞ্ঞেন ৰড্ঢেয্যুং, খেত্তৰত্থুনা ৰড্ঢেয্যুং, দ্ৰিপদচতুপ্পদেহি ৰড্ঢেয্যুং, পুত্তদারেহি ৰড্ঢেয্যুং, দাসকম্মকরপোরিসেহি ৰড্ঢেয্যুং, ঞাতীহি ৰড্ঢেয্যুং, মিত্তেহি ৰড্ঢেয্যুং, বন্ধৰেহি ৰড্ঢেয্যু’ন্তি। সো তস্স কম্মস্স কটত্তা…পে॰… সো ততো চুতো ইত্থত্তং আগতো সমানো ইমানি তীণি মহাপুরিসলক্খণানি পটিলভতি। সীহপুব্বদ্ধকাযো চ হোতি চিতন্তরংসো চ সমৰট্টক্খন্ধো চ। ‘‘সো তেহি লক্খণেহি সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? অপরিহানধম্মো হোতি, ন পরিহাযতি ধনধঞ্ঞেন খেত্তৰত্থুনা দ্ৰিপদচতুপ্পদেহি পুত্তদারেহি দাসকম্মকরপোরিসেহি ঞাতীহি মিত্তেহি বন্ধৰেহি, ন পরিহাযতি সব্বসম্পত্তিযা। রাজা সমানো ইদং লভতি… বুদ্ধো সমানো কিং লভতি? অপরিহানধম্মো হোতি, ন পরিহাযতি সদ্ধায সীলেন সুতেন চাগেন পঞ্ঞায, ন পরিহাযতি সব্বসম্পত্তিযা। বুদ্ধো সমানো ইদং লভতি’’। এতমত্থং ভগৰা অৰোচ। ২২৫. তত্থেতং ৰুচ্চতি – ‘‘সদ্ধায সীলেন সুতেন বুদ্ধিযা, চাগেন ধম্মেন বহূহি সাধুহি। ধনেন ধঞ্ঞেন চ খেত্তৰত্থুনা, পুত্তেহি দারেহি চতুপ্পদেহি চ॥ ‘‘ঞাতীহি মিত্তেহি চ বন্ধৰেহি চ, বলেন ৰণ্ণেন সুখেন চূভযং। কথং ন হাযেয্যুং পরেতি ইচ্ছতি, অত্থস্স মিদ্ধী চ [ইদং সমিদ্ধঞ্চ (ক॰), অদ্ধং সমিদ্ধঞ্চ (স্যা॰)] পনাভিকঙ্খতি॥ ‘‘স সীহপুব্বদ্ধসুসণ্ঠিতো অহু, সমৰট্টক্খন্ধো চ চিতন্তরংসো। পুব্বে সুচিণ্ণেন কতেন কম্মুনা, অহানিযং পুব্বনিমিত্তমস্স তং॥ ‘‘গিহীপি ধঞ্ঞেন ধনেন ৰড্ঢতি, পুত্তেহি দারেহি চতুপ্পদেহি চ। অকিঞ্চনো পব্বজিতো অনুত্তরং, পপ্পোতি বোধিং অসহানধম্মত’’ন্তি [সম্বোধিমহানধম্মতন্তি (স্যা॰ ক॰) টীকা ওলোকেতব্বা]॥ (২০) রসগ্গসগ্গিতালক্খণং ২২৬. ‘‘যম্পি , ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো সত্তানং অৰিহেঠকজাতিকো অহোসি পাণিনা ৰা লেড্ডুনা ৰা দণ্ডেন ৰা সত্থেন ৰা। সো তস্স কম্মস্স কটত্তা উপচিতত্তা…পে॰… সো ততো চুতো ইত্থত্তং আগতো সমানো ইমং মহাপুরিসলক্খণং পটিলভতি, রসগ্গসগ্গী হোতি, উদ্ধগ্গাস্স রসহরণীযো গীৰায জাতা হোন্তি সমাভিৰাহিনিযো [সমৰাহরসহরণিযো (স্যা॰)]। ‘‘সো তেন লক্খণেন সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? অপ্পাবাধো হোতি অপ্পাতঙ্কো, সমৰেপাকিনিযা গহণিযা সমন্নাগতো নাতিসীতায নাচ্চুণ্হায। রাজা সমানো ইদং লভতি… বুদ্ধো সমানো কিং লভতি? অপ্পাবাধো হোতি অপ্পাতঙ্কো সমৰেপাকিনিযা গহণিযা সমন্নাগতো নাতিসীতায নাচ্চুণ্হায মজ্ঝিমায পধানক্খমায। বুদ্ধো সমানো ইদং লভতি’’। এতমত্থং ভগৰা অৰোচ। ২২৭. তত্থেতং ৰুচ্চতি – ‘‘ন পাণিদণ্ডেহি পনাথ লেড্ডুনা, সত্থেন ৰা মরণৰধেন [মারণৰধেন (ক॰)] ৰা পন। উব্বাধনায পরিতজ্জনায ৰা, ন হেঠযী জনতমহেঠকো অহু॥ ‘‘তেনেৰ সো সুগতিমুপেচ্চ মোদতি, সুখপ্ফলং করিয সুখানি ৰিন্দতি। সমোজসা [সম্পজ্জসা (সী॰ পী॰), পামুঞ্জসা (স্যা॰), সামঞ্চ সা (ক॰)] রসহরণী সুসণ্ঠিতা, ইধাগতো লভতি রসগ্গসগ্গিতং॥ ‘‘তেনাহু নং অতিনিপুণা ৰিচক্খণা, অযং নরো সুখবহুলো ভৰিস্সতি। গিহিস্স ৰা পব্বজিতস্স ৰা পুন [পন (স্যা॰)], তং লক্খণং ভৰতি তদত্থজোতক’’ন্তি॥ (২১-২২) অভিনীলনেত্তগোপখুমলক্খণানি ২২৮. ‘‘যম্পি, ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো ন চ ৰিসটং, ন চ ৰিসাচি [ন চ ৰিসাচিতং (সী॰ পী॰), ন চ ৰিসাৰি (স্যা॰)], ন চ পন ৰিচেয্য পেক্খিতা, উজুং তথা পসটমুজুমনো, পিযচক্খুনা বহুজনং উদিক্খিতা অহোসি। সো তস্স কম্মস্স কটত্তা…পে॰… সো ততো চুতো ইত্থত্তং আগতো সমানো ইমানি দ্ৰে মহাপুরিসলক্খণানি পটিলভতি। অভিনীলনেত্তো চ হোতি গোপখুমো চ। ‘‘সো তেহি লক্খণেহি সমন্নাগতো, সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? পিযদস্সনো হোতি বহুনো জনস্স, পিযো হোতিমনাপো ব্রাহ্মণগহপতিকানং নেগমজানপদানং গণকমহামত্তানং অনীকট্ঠানং দোৰারিকানং অমচ্চানং পারিসজ্জানং রাজূনং ভোগিযানং কুমারানং। রাজা সমানো ইদং লভতি…পে॰… বুদ্ধো সমানো কিং লভতি? পিযদস্সনো হোতি বহুনো জনস্স, পিযো হোতি মনাপো ভিক্খূনং ভিক্খুনীনং উপাসকানং উপাসিকানং দেৰানং মনুস্সানং অসুরানং নাগানং গন্ধব্বানং। বুদ্ধো সমানো ইদং লভতি’’। এতমত্থং ভগৰা অৰোচ। ২২৯. তত্থেতং ৰুচ্চতি – ‘‘ন চ ৰিসটং ন চ ৰিসাচি [ৰিসাচিতং (সী॰ পী॰), ৰিসাৰি (স্যা॰)], ন চ পন ৰিচেয্যপেক্খিতা। উজুং তথা পসটমুজুমনো, পিযচক্খুনা বহুজনং উদিক্খিতা॥ ‘‘সুগতীসু সো ফলৰিপাকং, অনুভৰতি তত্থ মোদতি। ইধ চ পন ভৰতি গোপখুমো, অভিনীলনেত্তনযনো সুদস্সনো॥ ‘‘অভিযোগিনো চ নিপুণা, বহূ পন নিমিত্তকোৰিদা। সুখুমনযনকুসলা মনুজা, পিযদস্সনোতি অভিনিদ্দিসন্তি নং॥ ‘‘পিযদস্সনো গিহীপি সন্তো চ, ভৰতি বহুজনপিযাযিতো। যদি চ ন ভৰতি গিহী সমণো হোতি, পিযো বহূনং সোকনাসনো’’তি॥ (২৩) উণ্হীসসীসলক্খণং ২৩০. ‘‘যম্পি, ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো বহুজনপুব্বঙ্গমো অহোসি কুসলেসু ধম্মেসু বহুজনপামোক্খো কাযসুচরিতে ৰচীসুচরিতে মনোসুচরিতে দানসংৰিভাগে সীলসমাদানে উপোসথুপৰাসে মত্তেয্যতায পেত্তেয্যতায সামঞ্ঞতায ব্রহ্মঞ্ঞতায কুলে জেট্ঠাপচাযিতায অঞ্ঞতরঞ্ঞতরেসু চ অধিকুসলেসু ধম্মেসু। সো তস্স কম্মস্স কটত্তা…পে॰… সো ততো চুতো ইত্থত্তং আগতো সমানো ইমং মহাপুরিসলক্খণং পটিলভতি – উণ্হীসসীসো হোতি। ‘‘সো তেন লক্খণেন সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? মহাস্স জনো অন্ৰাযিকো হোতি, ব্রাহ্মণগহপতিকা নেগমজানপদা গণকমহামত্তা অনীকট্ঠা দোৰারিকা অমচ্চা পারিসজ্জা রাজানো ভোগিযা কুমারা। রাজা সমানো ইদং লভতি… বুদ্ধো সমানো কিং লভতি? মহাস্স জনো অন্ৰাযিকো হোতি, ভিক্খূ ভিক্খুনিযো উপাসকা উপাসিকাযো দেৰা মনুস্সা অসুরা নাগা গন্ধব্বা। বুদ্ধো সমানো ইদং লভতি’’। এতমত্থং ভগৰা অৰোচ। ২৩১. তত্থেতং ৰুচ্চতি – ‘‘পুব্বঙ্গমো সুচরিতেসু অহু, ধম্মেসু ধম্মচরিযাভিরতো। অন্ৰাযিকো বহুজনস্স অহু, সগ্গেসু ৰেদযিত্থ পুঞ্ঞফলং॥ ‘‘ৰেদিত্ৰা সো সুচরিতস্স ফলং, উণ্হীসসীসত্তমিধজ্ঝগমা। ব্যাকংসু ব্যঞ্জননিমিত্তধরা, পুব্বঙ্গমো বহুজনং হেস্সতি॥ ‘‘পটিভোগিযা মনুজেসু ইধ, পুব্বেৰ তস্স অভিহরন্তি তদা। যদি খত্তিযো ভৰতি ভূমিপতি, পটিহারকং বহুজনে লভতি॥ ‘‘অথ চেপি পব্বজতি সো মনুজো, ধম্মেসু হোতি পগুণো ৰিসৰী। তস্সানুসাসনিগুণাভিরতো, অন্ৰাযিকো বহুজনো ভৰতী’’তি॥ (২৪-২৫) একেকলোমতাউণ্ণালক্খণানি ২৩২. ‘‘যম্পি, ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো মুসাৰাদং পহায মুসাৰাদা পটিৰিরতো অহোসি, সচ্চৰাদী সচ্চসন্ধো থেতো পচ্চযিকো অৰিসংৰাদকো লোকস্স । সো তস্স কম্মস্স কটত্তা উপচিতত্তা…পে॰… সো ততো চুতো ইত্থত্তং আগতো সমানো ইমানি দ্ৰে মহাপুরিসলক্খণানি পটিলভতি। একেকলোমো চ হোতি, উণ্ণা চ ভমুকন্তরে জাতা হোতি ওদাতা মুদুতূলসন্নিভা। ‘‘সো তেহি লক্খণেহি সমন্নাগতো, সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? মহাস্স জনো উপৰত্ততি, ব্রাহ্মণগহপতিকা নেগমজানপদা গণকমহামত্তা অনীকট্ঠা দোৰারিকা অমচ্চা পারিসজ্জা রাজানো ভোগিযা কুমারা। রাজা সমানো ইদং লভতি… বুদ্ধো সমানো কিং লভতি? মহাস্স জনো উপৰত্ততি, ভিক্খূ ভিক্খুনিযো উপাসকা উপাসিকাযো দেৰা মনুস্সা অসুরা নাগা গন্ধব্বা। বুদ্ধো সমানো ইদং লভতি’’। এতমত্থং ভগৰা অৰোচ। ২৩৩. তত্থেতং ৰুচ্চতি – ‘‘সচ্চপ্পটিঞ্ঞো পুরিমাসু জাতিসু, অদ্ৰেজ্ঝৰাচো অলিকং ৰিৰজ্জযি। ন সো ৰিসংৰাদযিতাপি কস্সচি, ভূতেন তচ্ছেন তথেন ভাসযি [তোসযি (সী॰ পী॰)]॥ ‘‘সেতা সুসুক্কা মুদুতূলসন্নিভা, উণ্ণা সুজাতা [উণ্ণাস্স জাতা (ক॰ সী॰)] ভমুকন্তরে অহু। ন লোমকূপেসু দুৰে অজাযিসুং, একেকলোমূপচিতঙ্গৰা অহু॥ ‘‘তং লক্খণঞ্ঞূ বহৰো সমাগতা, ব্যাকংসু উপ্পাদনিমিত্তকোৰিদা। উণ্ণা চ লোমা চ যথা সুসণ্ঠিতা, উপৰত্ততী ঈদিসকং বহুজ্জনো॥ ‘‘গিহিম্পি সন্তং উপৰত্ততী জনো, বহু পুরত্থাপকতেন কম্মুনা। অকিঞ্চনং পব্বজিতং অনুত্তরং, বুদ্ধম্পি সন্তং উপৰত্ততি জনো’’তি॥ (২৬-২৭) চত্তালীসঅৰিরল়দন্তলক্খণানি ২৩৪. ‘‘যম্পি, ভিক্খৰে তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো পিসুণং ৰাচং পহায পিসুণায ৰাচায পটিৰিরতো অহোসি। ইতো সুত্ৰা ন অমুত্র অক্খাতা ইমেসং ভেদায, অমুত্র ৰা সুত্ৰা ন ইমেসং অক্খাতা অমূসং ভেদায , ইতি ভিন্নানং ৰা সন্ধাতা, সহিতানং ৰা অনুপ্পদাতা, সমগ্গারামো সমগ্গরতো সমগ্গনন্দী সমগ্গকরণিং ৰাচং ভাসিতা অহোসি। সো তস্স কম্মস্স কটত্তা…পে॰… সো ততো চুতো ইত্থত্তং আগতো সমানো ইমানি দ্ৰে মহাপুরিসলক্খণানি পটিলভতি। চত্তালীসদন্তো চ হোতি অৰিরল়দন্তো চ। ‘‘সো তেহি লক্খণেহি সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? অভেজ্জপরিসো হোতি, অভেজ্জাস্স হোন্তি পরিসা, ব্রাহ্মণগহপতিকা নেগমজানপদা গণকমহামত্তা অনীকট্ঠা দোৰারিকা অমচ্চা পারিসজ্জা রাজানো ভোগিযা কুমারা। রাজা সমানো ইদং লভতি … বুদ্ধো সমানো কিং লভতি? অভেজ্জপরিসো হোতি, অভেজ্জাস্স হোন্তি পরিসা, ভিক্খূ ভিক্খুনিযো উপাসকা উপাসিকাযো দেৰা মনুস্সা অসুরা নাগা গন্ধব্বা। বুদ্ধো সমানো ইদং লভতি’’। এতমত্থং ভগৰা অৰোচ। ২৩৫. তত্থেতং ৰুচ্চতি – ‘‘ৰেভূতিযং সহিতভেদকারিং, ভেদপ্পৰড্ঢনৰিৰাদকারিং। কলহপ্পৰড্ঢনআকিচ্চকারিং, সহিতানং ভেদজননিং ন ভণি॥ ‘‘অৰিৰাদৰড্ঢনকরিং সুগিরং, ভিন্নানুসন্ধিজননিং অভণি। কলহং জনস্স পনুদী সমঙ্গী, সহিতেহি নন্দতি পমোদতি চ॥ ‘‘সুগতীসু সো ফলৰিপাকং, অনুভৰতি তত্থ মোদতি। দন্তা ইধ হোন্তি অৰিরল়া সহিতা, চতুরো দসস্স মুখজা সুসণ্ঠিতা॥ ‘‘যদি খত্তিযো ভৰতি ভূমিপতি, অৰিভেদিযাস্স পরিসা ভৰতি। সমণো চ হোতি ৰিরজো ৰিমলো, পরিসাস্স হোতি অনুগতা অচলা’’তি॥ (২৮-২৯) পহূতজিৰ্হাব্রহ্মস্সরলক্খণানি ২৩৬. ‘‘যম্পি , ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো ফরুসং ৰাচং পহায ফরুসায ৰাচায পটিৰিরতো অহোসি। যা সা ৰাচা নেলা কণ্ণসুখা পেমনীযা হদযঙ্গমা পোরী বহুজনকন্তা বহুজনমনাপা, তথারূপিং ৰাচং ভাসিতা অহোসি। সো তস্স কম্মস্স কটত্তা উপচিতত্তা…পে॰… সো ততো চুতো ইত্থত্তং আগতো সমানো ইমানি দ্ৰে মহাপুরিসলক্খণানি পটিলভতি। পহূতজিৰ্হো চ হোতি ব্রহ্মস্সরো চ করৰীকভাণী। ‘‘সো তেহি লক্খণেহি সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? আদেয্যৰাচো হোতি, আদিযন্তিস্স ৰচনং ব্রাহ্মণগহপতিকা নেগমজানপদা গণকমহামত্তা অনীকট্ঠা দোৰারিকা অমচ্চা পারিসজ্জা রাজানো ভোগিযা কুমারা। রাজা সমানো ইদং লভতি… বুদ্ধো সমানো কিং লভতি? আদেয্যৰাচো হোতি, আদিযন্তিস্স ৰচনং ভিক্খূ ভিক্খুনিযো উপাসকা উপাসিকাযো দেৰা মনুস্সা অসুরা নাগা গন্ধব্বা। বুদ্ধো সমানো ইদং লভতি’’। এতমত্থং ভগৰা অৰোচ। ২৩৭. তত্থেতং ৰুচ্চতি – ‘‘অক্কোসভণ্ডনৰিহেসকারিং, উব্বাধিকং [উব্বাধকরং (স্যা॰)] বহুজনপ্পমদ্দনং। অবাল়্হং গিরং সো ন ভণি ফরুসং, মধুরং ভণি সুসংহিতং [সুসহিতং (স্যা॰)] সখিলং॥ ‘‘মনসো পিযা হদযগামিনিযো, ৰাচা সো এরযতি কণ্ণসুখা। ৰাচাসুচিণ্ণফলমনুভৰি, সগ্গেসু ৰেদযথ [ৰেদযতি (?) টীকা ওলোকেতব্বা] পুঞ্ঞফলং॥ ‘‘ৰেদিত্ৰা সো সুচরিতস্স ফলং, ব্রহ্মস্সরত্তমিধমজ্ঝগমা। জিৰ্হাস্স হোতি ৰিপুলা পুথুলা, আদেয্যৰাক্যৰচনো ভৰতি॥ ‘‘গিহিনোপি ইজ্ঝতি যথা ভণতো, অথ চে পব্বজতি সো মনুজো। আদিযন্তিস্স ৰচনং জনতা, বহুনো বহুং সুভণিতং ভণতো’’তি॥ (৩০) সীহহনুলক্খণং ২৩৮. ‘‘যম্পি , ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো সম্ফপ্পলাপং পহায সম্ফপ্পলাপা পটিৰিরতো অহোসি কালৰাদী ভূতৰাদী অত্থৰাদী ধম্মৰাদী ৰিনযৰাদী, নিধানৰতিং ৰাচং ভাসিতা অহোসি কালেন সাপদেসং পরিযন্তৰতিং অত্থসংহিতং। সো তস্স কম্মস্স কটত্তা…পে॰… সো ততো চুতো ইত্থত্তং আগতো সমানো ইমং মহাপুরিসলক্খণং পটিলভতি, সীহহনু হোতি। ‘‘সো তেন লক্খণেন সমন্নাগতো সচে অগারং অজ্ঝাৰসতি, রাজা হোতি চক্কৰত্তী…পে॰… রাজা সমানো কিং লভতি? অপ্পধংসিযো হোতি কেনচি মনুস্সভূতেন পচ্চত্থিকেন পচ্চামিত্তেন। রাজা সমানো ইদং লভতি… বুদ্ধো সমানো কিং লভতি? অপ্পধংসিযো হোতি অব্ভন্তরেহি ৰা বাহিরেহি ৰা পচ্চত্থিকেহি পচ্চামিত্তেহি, রাগেন ৰা দোসেন ৰা মোহেন ৰা সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা কেনচি ৰা লোকস্মিং। বুদ্ধো সমানো ইদং লভতি’’। এতমত্থং ভগৰা অৰোচ। ২৩৯. তত্থেতং ৰুচ্চতি – ‘‘ন সম্ফপ্পলাপং ন মুদ্ধতং [বুদ্ধতন্তি (ক॰)], অৰিকিণ্ণৰচনব্যপ্পথো অহোসি। অহিতমপি চ অপনুদি, হিতমপি চ বহুজনসুখঞ্চ অভণি॥ ‘‘তং কত্ৰা ইতো চুতো দিৰমুপপজ্জি, সুকতফলৰিপাকমনুভোসি। চৰিয পুনরিধাগতো সমানো, দ্ৰিদুগমৰরতরহনুত্তমলত্থ॥ ‘‘রাজা হোতি সুদুপ্পধংসিযো, মনুজিন্দো মনুজাধিপতি মহানুভাৰো। তিদিৰপুরৰরসমো ভৰতি, সুরৰরতরোরিৰ ইন্দো॥ ‘‘গন্ধব্বাসুরযক্খরক্খসেভি [সুরসক্করক্খসেভি (স্যা॰)], সুরেহি ন হি ভৰতি সুপ্পধংসিযো। তথত্তো যদি ভৰতি তথাৰিধো, ইধ দিসা চ পটিদিসা চ ৰিদিসা চা’’তি॥ (৩১-৩২) সমদন্তসুসুক্কদাঠালক্খণানি ২৪০. ‘‘যম্পি, ভিক্খৰে, তথাগতো পুরিমং জাতিং পুরিমং ভৰং পুরিমং নিকেতং পুব্বে মনুস্সভূতো সমানো মিচ্ছাজীৰং পহায সম্মাআজীৰেন জীৰিকং কপ্পেসি, তুলাকূট কংসকূট মানকূট উক্কোটন ৰঞ্চন নিকতি সাচিযোগ ছেদন ৰধ বন্ধন ৰিপরামোস আলোপ সহসাকারা [সাহসাকারা (সী॰ স্যা॰ পী॰)] পটিৰিরতো অহোসি। সো তস্স কম্মস্সকটত্তা উপচিতত্তা উস্সন্নত্তা ৰিপুলত্তা কাযস্স ভেদা পরং মরণা সুগতিং সগ্গং লোকং উপপজ্জতি। সো তত্থ অঞ্ঞে দেৰে দসহি ঠানেহি অধিগণ্হাতি দিব্বেন আযুনা দিব্বেন ৰণ্ণেন দিব্বেন সুখেন দিব্বেন যসেন দিব্বেন আধিপতেয্যেন দিব্বেহি রূপেহি দিব্বেহি সদ্দেহি দিব্বেহি গন্ধেহি দিব্বেহি রসেহি দিব্বেহি ফোট্ঠব্বেহি। সো ততো চুতো ইত্থত্তং আগতো সমানো ইমানি দ্ৰে মহাপুরিসলক্খণানি পটিলভতি, সমদন্তো চ হোতি সুসুক্কদাঠো চ। ‘‘সো তেহি লক্খণেহি সমন্নাগতো সচে অগারং অজ্ঝাৰসতি, রাজা হোতি চক্কৰত্তী ধম্মিকো ধম্মরাজা চাতুরন্তো ৰিজিতাৰী জনপদত্থাৰরিযপ্পত্তো সত্তরতনসমন্নাগতো। তস্সিমানি সত্ত রতনানি ভৰন্তি, সেয্যথিদং – চক্করতনং হত্থিরতনং অস্সরতনং মণিরতনং ইত্থিরতনং গহপতিরতনং পরিণাযকরতনমেৰ সত্তমং। পরোসহস্সং খো পনস্স পুত্তা ভৰন্তি সূরা ৰীরঙ্গরূপা পরসেনপ্পমদ্দনা। সো ইমং পথৰিং সাগরপরিযন্তং অখিলমনিমিত্তমকণ্টকং ইদ্ধং ফীতং খেমং সিৰং নিরব্বুদং অদণ্ডেন অসত্থেন ধম্মেন অভিৰিজিয অজ্ঝাৰসতি। রাজা সমানো কিং লভতি? সুচিপরিৰারো হোতি সুচিস্স হোন্তি পরিৰারা ব্রাহ্মণগহপতিকা নেগমজানপদা গণকমহামত্তা অনীকট্ঠা দোৰারিকা অমচ্চা পারিসজ্জা রাজানো ভোগিযা কুমারা। রাজা সমানো ইদং লভতি। ‘‘সচে খো পন অগারস্মা অনগারিযং পব্বজতি, অরহং হোতি সম্মাসম্বুদ্ধো লোকে ৰিৰট্টচ্ছদো। বুদ্ধো সমানো কিং লভতি? সুচিপরিৰারো হোতি, সুচিস্স হোন্তি পরিৰারা, ভিক্খূ ভিক্খুনিযো উপাসকা উপাসিকাযো দেৰা মনুস্সা অসুরা নাগা গন্ধব্বা। বুদ্ধো সমানো ইদং লভতি’’। এতমত্থং ভগৰা অৰোচ। ২৪১. তত্থেতং ৰুচ্চতি – ‘‘মিচ্ছাজীৰঞ্চ অৰস্সজি সমেন ৰুত্তিং, সুচিনা সো জনযিত্থ ধম্মিকেন। অহিতমপি চ অপনুদি, হিতমপি চ বহুজনসুখঞ্চ অচরি॥ ‘‘সগ্গে ৰেদযতি নরো সুখপ্ফলানি, করিত্ৰা নিপুণেভি ৰিদূহি সব্ভি। ৰণ্ণিতানি তিদিৰপুরৰরসমো, অভিরমতি রতিখিড্ডাসমঙ্গী॥ ‘‘লদ্ধানং মানুসকং ভৰং ততো, চৰিত্ৰান সুকতফলৰিপাকং। সেসকেন পটিলভতি লপনজং, সমমপি সুচিসুসুক্কং [লদ্ধান মনুস্সকং ভৰং ততো চৰিয, পুন সুকতফলৰিপাকসেসকেন। পটিলভতি লপনজং সমমপি, সুচি চ সুৰিসুদ্ধসুসুক্কং (স্যা॰)]॥ ‘‘তং ৰেয্যঞ্জনিকা সমাগতা বহৰো, ব্যাকংসু নিপুণসম্মতা মনুজা। সুচিজনপরিৰারগণো ভৰতি, দিজসমসুক্কসুচিসোভনদন্তো॥ ‘‘রঞ্ঞো হোতি বহুজনো, সুচিপরিৰারো মহতিং মহিং অনুসাসতো। পসয্হ ন চ জনপদতুদনং, হিতমপি চ বহুজনসুখঞ্চ চরন্তি॥ ‘‘অথ চে পব্বজতি ভৰতি ৰিপাপো, সমণো সমিতরজো ৰিৰট্টচ্ছদো। ৰিগতদরথকিলমথো, ইমমপি চ পরমপি চ [ইমম্পি চ পরম্পি চ (পী॰), পরংপি পরমংপি চ (স্যা॰)] পস্সতি লোকং॥ ‘‘তস্সোৰাদকরা বহুগিহী চ পব্বজিতা চ, অসুচিং গরহিতং ধুনন্তি পাপং। স হি সুচিভি পরিৰুতো ভৰতি, মলখিলকলিকিলেসে পনুদেহী’’তি [তস্সোৰাদকরা বহুগিহী চ, পব্বজিতা চ অসুচিৰিগরহিত। পনুদিপাপস্স হি সুচিভিপরিৰুতো, ভৰতি মলখিলককিলেসে পনুদেতি (স্যা॰)]॥ ইদমৰোচ ভগৰা। অত্তমনা তে ভিক্খূ ভগৰতো ভাসিতং অভিনন্দুন্তি। লক্খণসুত্তং নিট্ঠিতং সত্তমং। |