১২. লোহিচ্চসুত্তং
লোহিচ্চব্রাহ্মণৰত্থু ৫০১. এৰং মে সুতং – একং সমযং ভগৰা কোসলেসু চারিকং চরমানো মহতা ভিক্খুসঙ্ঘেন সদ্ধিং পঞ্চমত্তেহি ভিক্খুসতেহি যেন সালৰতিকা তদৰসরি। তেন খো পন সমযেন লোহিচ্চো ব্রাহ্মণো সালৰতিকং অজ্ঝাৰসতি সত্তুস্সদং সতিণকট্ঠোদকং সধঞ্ঞং রাজভোগ্গং রঞ্ঞা পসেনদিনা কোসলেন দিন্নং রাজদাযং, ব্রহ্মদেয্যং। ৫০২. তেন খো পন সমযেন লোহিচ্চস্স ব্রাহ্মণস্স এৰরূপং পাপকং দিট্ঠিগতং উপ্পন্নং হোতি – ‘‘ইধ সমণো ৰা ব্রাহ্মণো ৰা কুসলং ধম্মং অধিগচ্ছেয্য, কুসলং ধম্মং অধিগন্ত্ৰা ন পরস্স আরোচেয্য, কিঞ্হি পরো পরস্স করিস্সতি। সেয্যথাপি নাম পুরাণং বন্ধনং ছিন্দিত্ৰা অঞ্ঞং নৰং বন্ধনং করেয্য, এৰংসম্পদমিদং পাপকং লোভধম্মং ৰদামি, কিঞ্হি পরো পরস্স করিস্সতী’’তি। ৫০৩. অস্সোসি খো লোহিচ্চো ব্রাহ্মণো – ‘‘সমণো খলু, ভো, গোতমো সক্যপুত্তো সক্যকুলা পব্বজিতো কোসলেসু চারিকং চরমানো মহতা ভিক্খুসঙ্ঘেন সদ্ধিং পঞ্চমত্তেহি ভিক্খুসতেহি সালৰতিকং অনুপ্পত্তো। তং খো পন ভৰন্তং গোতমং এৰং কল্যাণো কিত্তিসদ্দো অব্ভুগ্গতো – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা’। সো ইমং লোকং সদেৰকং সমারকং সব্রহ্মকং সস্সমণব্রাহ্মণিং পজং সদেৰমনুস্সং সযং অভিঞ্ঞা সচ্ছিকত্ৰা পৰেদেতি। সো ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেতি। সাধু খো পন তথারূপানং অরহতং দস্সনং হোতী’’তি। ৫০৪. অথ খো লোহিচ্চো ব্রাহ্মণো রোসিকং [ভেসিকং (সী॰ পী॰)] ন্হাপিতং আমন্তেসি – ‘‘এহি ত্ৰং, সম্ম রোসিকে, যেন সমণো গোতমো তেনুপসঙ্কম ; উপসঙ্কমিত্ৰা মম ৰচনেন সমণং গোতমং অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছ – লোহিচ্চো, ভো গোতম, ব্রাহ্মণো ভৰন্তং গোতমং অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতী’’তি। এৰঞ্চ ৰদেহি – ‘‘অধিৰাসেতু কির ভৰং গোতমো লোহিচ্চস্স ব্রাহ্মণস্স স্ৰাতনায ভত্তং সদ্ধিং ভিক্খুসঙ্ঘেনা’’তি। ৫০৫. ‘‘এৰং, ভো’’তি [এৰং ভন্তেতি (সী॰ পী॰)] খো রোসিকা ন্হাপিতো লোহিচ্চস্স ব্রাহ্মণস্স পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো রোসিকা ন্হাপিতো ভগৰন্তং এতদৰোচ – ‘‘লোহিচ্চো, ভন্তে, ব্রাহ্মণো ভগৰন্তং অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতি; এৰঞ্চ ৰদেতি – অধিৰাসেতু কির, ভন্তে, ভগৰা লোহিচ্চস্স ব্রাহ্মণস্স স্ৰাতনায ভত্তং সদ্ধিং ভিক্খুসঙ্ঘেনা’’তি। অধিৰাসেসি ভগৰা তুণ্হীভাৰেন। ৫০৬. অথ খো রোসিকা ন্হাপিতো ভগৰতো অধিৰাসনং ৰিদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা যেন লোহিচ্চো ব্রাহ্মণো তেনুপসঙ্কমি; উপসঙ্কমিত্ৰা লোহিচ্চং ব্রাহ্মণং এতদৰোচ – ‘‘অৰোচুম্হা খো মযং ভোতো [মযং ভন্তে তৰ (সী॰ পী॰)] ৰচনেন তং ভগৰন্তং – ‘লোহিচ্চো, ভন্তে, ব্রাহ্মণো ভগৰন্তং অপ্পাবাধং অপ্পাতঙ্কং লহুট্ঠানং বলং ফাসুৰিহারং পুচ্ছতি; এৰঞ্চ ৰদেতি – অধিৰাসেতু কির, ভন্তে, ভগৰা লোহিচ্চস্স ব্রাহ্মণস্স স্ৰাতনায ভত্তং সদ্ধিং ভিক্খুসঙ্ঘেনা’তি। অধিৰুত্থঞ্চ পন তেন ভগৰতা’’তি। ৫০৭. অথ খো লোহিচ্চো ব্রাহ্মণো তস্সা রত্তিযা অচ্চযেন সকে নিৰেসনে পণীতং খাদনীযং ভোজনীযং পটিযাদাপেত্ৰা রোসিকং ন্হাপিতং আমন্তেসি – ‘‘এহি ত্ৰং, সম্ম রোসিকে, যেন সমণো গোতমো তেনুপসঙ্কম; উপসঙ্কমিত্ৰা সমণস্স গোতমস্স কালং আরোচেহি – কালো ভো, গোতম, নিট্ঠিতং ভত্ত’’ন্তি। ‘‘এৰং, ভো’’তি খো রোসিকা ন্হাপিতো লোহিচ্চস্স ব্রাহ্মণস্স পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি । একমন্তং ঠিতো খো রোসিকা ন্হাপিতো ভগৰতো কালং আরোচেসি – ‘‘কালো, ভন্তে, নিট্ঠিতং ভত্ত’’ন্তি। ৫০৮. অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায সদ্ধিং ভিক্খুসঙ্ঘেন যেন সালৰতিকা তেনুপসঙ্কমি। তেন খো পন সমযেন রোসিকা ন্হাপিতো ভগৰন্তং পিট্ঠিতো পিট্ঠিতো অনুবন্ধো হোতি। অথ খো রোসিকা ন্হাপিতো ভগৰন্তং এতদৰোচ – ‘‘লোহিচ্চস্স, ভন্তে, ব্রাহ্মণস্স এৰরূপং পাপকং দিট্ঠিগতং উপ্পন্নং – ‘ইধ সমণো ৰা ব্রাহ্মণো ৰা কুসলং ধম্মং অধিগচ্ছেয্য, কুসলং ধম্মং অধিগন্ত্ৰা ন পরস্স আরোচেয্য – কিঞ্হি পরো পরস্স করিস্সতি। সেয্যথাপি নাম পুরাণং বন্ধনং ছিন্দিত্ৰা অঞ্ঞং নৰং বন্ধনং করেয্য, এৰং সম্পদমিদং পাপকং লোভধম্মং ৰদামি – কিঞ্হি পরো পরস্স করিস্সতী’তি। সাধু, ভন্তে, ভগৰা লোহিচ্চং ব্রাহ্মণং এতস্মা পাপকা দিট্ঠিগতা ৰিৰেচেতূ’’তি। ‘‘অপ্পেৰ নাম সিযা রোসিকে, অপ্পেৰ নাম সিযা রোসিকে’’তি। অথ খো ভগৰা যেন লোহিচ্চস্স ব্রাহ্মণস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি । অথ খো লোহিচ্চো ব্রাহ্মণো বুদ্ধপ্পমুখং ভিক্খুসঙ্ঘং পণীতেন খাদনীযেন ভোজনীযেন সহত্থা সন্তপ্পেসি সম্পৰারেসি। লোহিচ্চব্রাহ্মণানুযোগো ৫০৯. অথ খো লোহিচ্চো ব্রাহ্মণো ভগৰন্তং ভুত্তাৰিং ওনীতপত্তপাণিং অঞ্ঞতরং নীচং আসনং গহেত্ৰা একমন্তং নিসীদি। একমন্তং নিসিন্নং খো লোহিচ্চং ব্রাহ্মণং ভগৰা এতদৰোচ – ‘‘সচ্চং কির তে, লোহিচ্চ, এৰরূপং পাপকং দিট্ঠিগতং উপ্পন্নং – ‘ইধ সমণো ৰা ব্রাহ্মণো ৰা কুসলং ধম্মং অধিগচ্ছেয্য, কুসলং ধম্মং অধিগন্ত্ৰা ন পরস্স আরোচেয্য – কিঞ্হি পরো পরস্স করিস্সতি। সেয্যথাপি নাম পুরাণং বন্ধনং ছিন্দিত্ৰা অঞ্ঞং নৰং বন্ধনং করেয্য, এৰং সম্পদমিদং পাপকং লোভধম্মং ৰদামি, কিঞ্হি পরো পরস্স করিস্সতী’’’ তি? ‘‘এৰং, ভো গোতম’’। ‘‘তং কিং মঞ্ঞসি লোহিচ্চ ননু ত্ৰং সালৰতিকং অজ্ঝাৰসসী’’তি? ‘‘এৰং, ভো গোতম’’। ‘‘যো নু খো, লোহিচ্চ, এৰং ৰদেয্য – ‘লোহিচ্চো ব্রাহ্মণো সালৰতিকং অজ্ঝাৰসতি। যা সালৰতিকায সমুদযসঞ্জাতি লোহিচ্চোৰ তং ব্রাহ্মণো এককো পরিভুঞ্জেয্য, ন অঞ্ঞেসং দদেয্যা’তি। এৰং ৰাদী সো যে তং উপজীৰন্তি, তেসং অন্তরাযকরো ৰা হোতি, নো ৰা’’তি? ‘‘অন্তরাযকরো, ভো গোতম’’। ‘‘অন্তরাযকরো সমানো হিতানুকম্পী ৰা তেসং হোতি অহিতানুকম্পী ৰা’’তি? ‘‘অহিতানুকম্পী, ভো গোতম’’। ‘‘অহিতানুকম্পিস্স মেত্তং ৰা তেসু চিত্তং পচ্চুপট্ঠিতং হোতি সপত্তকং ৰা’’তি? ‘‘সপত্তকং, ভো গোতম’’। ‘‘সপত্তকে চিত্তে পচ্চুপট্ঠিতে মিচ্ছাদিট্ঠি ৰা হোতি সম্মাদিট্ঠি ৰা’’তি? ‘‘মিচ্ছাদিট্ঠি, ভো গোতম’’। ‘‘মিচ্ছাদিট্ঠিস্স খো অহং, লোহিচ্চ, দ্ৰিন্নং গতীনং অঞ্ঞতরং গতিং ৰদামি – নিরযং ৰা তিরচ্ছানযোনিং ৰা’’। ৫১০. ‘‘তং কিং মঞ্ঞসি, লোহিচ্চ, ননু রাজা পসেনদি কোসলো কাসিকোসলং অজ্ঝাৰসতী’’তি? ‘‘এৰং, ভো গোতম’’। ‘‘যো নু খো, লোহিচ্চ, এৰং ৰদেয্য – ‘রাজা পসেনদি কোসলো কাসিকোসলং অজ্ঝাৰসতি; যা কাসিকোসলে সমুদযসঞ্জাতি, রাজাৰ তং পসেনদি কোসলো এককো পরিভুঞ্জেয্য, ন অঞ্ঞেসং দদেয্যা’তি। এৰং ৰাদী সো যে রাজানং পসেনদিং কোসলং উপজীৰন্তি তুম্হে চেৰ অঞ্ঞে চ, তেসং অন্তরাযকরো ৰা হোতি, নো ৰা’’তি? ‘‘অন্তরাযকরো, ভো গোতম’’। ‘‘অন্তরাযকরো সমানো হিতানুকম্পী ৰা তেসং হোতি অহিতানুকম্পী ৰা’’তি? ‘‘অহিতানুকম্পী, ভো গোতম’’। ‘‘অহিতানুকম্পিস্স মেত্তং ৰা তেসু চিত্তং পচ্চুপট্ঠিতং হোতি সপত্তকং ৰা’’তি? ‘‘সপত্তকং, ভো গোতম’’। ‘‘সপত্তকে চিত্তে পচ্চুপট্ঠিতে মিচ্ছাদিট্ঠি ৰা হোতি সম্মাদিট্ঠি ৰা’’তি? ‘‘মিচ্ছাদিট্ঠি, ভো গোতম’’। ‘‘মিচ্ছাদিট্ঠিস্স খো অহং, লোহিচ্চ, দ্ৰিন্নং গতীনং অঞ্ঞতরং গতিং ৰদামি – নিরযং ৰা তিরচ্ছানযোনিং ৰা’’। ৫১১. ‘‘ইতি কির, লোহিচ্চ, যো এৰং ৰদেয্য – ‘‘লোহিচ্চো ব্রাহ্মণো সালৰতিকং অজ্ঝাৰসতি; যা সালৰতিকায সমুদযসঞ্জাতি, লোহিচ্চোৰ তং ব্রাহ্মণো এককো পরিভুঞ্জেয্য, ন অঞ্ঞেসং দদেয্যা’’তি। এৰংৰাদী সো যে তং উপজীৰন্তি, তেসং অন্তরাযকরো হোতি। অন্তরাযকরো সমানো অহিতানুকম্পী হোতি, অহিতানুকম্পিস্স সপত্তকং চিত্তং পচ্চুপট্ঠিতং হোতি, সপত্তকে চিত্তে পচ্চুপট্ঠিতে মিচ্ছাদিট্ঠি হোতি। এৰমেৰ খো, লোহিচ্চ, যো এৰং ৰদেয্য – ‘‘ইধ সমণো ৰা ব্রাহ্মণো ৰা কুসলং ধম্মং অধিগচ্ছেয্য, কুসলং ধম্মং অধিগন্ত্ৰা ন পরস্স আরোচেয্য, কিঞ্হি পরো পরস্স করিস্সতি। সেয্যথাপি নাম পুরাণং বন্ধনং ছিন্দিত্ৰা অঞ্ঞং নৰং বন্ধনং করেয্য…পে॰… করিস্সতী’’তি। এৰংৰাদী সো যে তে কুলপুত্তা তথাগতপ্পৰেদিতং ধম্মৰিনযং আগম্ম এৰরূপং উল়ারং ৰিসেসং অধিগচ্ছন্তি, সোতাপত্তিফলম্পি সচ্ছিকরোন্তি, সকদাগামিফলম্পি সচ্ছিকরোন্তি, অনাগামিফলম্পি সচ্ছিকরোন্তি, অরহত্তম্পি সচ্ছিকরোন্তি, যে চিমে দিব্বা গব্ভা পরিপাচেন্তি দিব্বানং ভৰানং অভিনিব্বত্তিযা, তেসং অন্তরাযকরো হোতি, অন্তরাযকরো সমানো অহিতানুকম্পী হোতি , অহিতানুকম্পিস্স সপত্তকং চিত্তং পচ্চুপট্ঠিতং হোতি, সপত্তকে চিত্তে পচ্চুপট্ঠিতে মিচ্ছাদিট্ঠি হোতি। মিচ্ছাদিট্ঠিস্স খো অহং, লোহিচ্চ, দ্ৰিন্নং গতীনং অঞ্ঞতরং গতিং ৰদামি – নিরযং ৰা তিরচ্ছানযোনিং ৰা। ৫১২. ‘‘ইতি কির, লোহিচ্চ, যো এৰং ৰদেয্য – ‘‘রাজা পসেনদি কোসলো কাসিকোসলং অজ্ঝাৰসতি; যা কাসিকোসলে সমুদযসঞ্জাতি, রাজাৰ তং পসেনদি কোসলো এককো পরিভুঞ্জেয্য, ন অঞ্ঞেসং দদেয্যা’’তি। এৰংৰাদী সো যে রাজানং পসেনদিং কোসলং উপজীৰন্তি তুম্হে চেৰ অঞ্ঞে চ, তেসং অন্তরাযকরো হোতি। অন্তরাযকরো সমানো অহিতানুকম্পী হোতি, অহিতানুকম্পিস্স সপত্তকং চিত্তং পচ্চুপট্ঠিতং হোতি, সপত্তকে চিত্তে পচ্চুপট্ঠিতে মিচ্ছাদিট্ঠি হোতি। এৰমেৰ খো, লোহিচ্চ, যো এৰং ৰদেয্য – ‘‘ইধ সমণো ৰা ব্রাহ্মণো ৰা কুসলং ধম্মং অধিগচ্ছেয্য, কুসলং ধম্মং অধিগন্ত্ৰা ন পরস্স আরোচেয্য, কিঞ্হি পরো পরস্স করিস্সতি। সেয্যথাপি নাম…পে॰… কিঞ্হি পরো পরস্স করিস্সতী’’তি, এৰং ৰাদী সো যে তে কুলপুত্তা তথাগতপ্পৰেদিতং ধম্মৰিনযং আগম্ম এৰরূপং উল়ারং ৰিসেসং অধিগচ্ছন্তি, সোতাপত্তিফলম্পি সচ্ছিকরোন্তি, সকদাগামিফলম্পি সচ্ছিকরোন্তি, অনাগামিফলম্পি সচ্ছিকরোন্তি, অরহত্তম্পি সচ্ছিকরোন্তি। যে চিমে দিব্বা গব্ভা পরিপাচেন্তি দিব্বানং ভৰানং অভিনিব্বত্তিযা, তেসং অন্তরাযকরো হোতি, অন্তরাযকরো সমানো অহিতানুকম্পী হোতি, অহিতানুকম্পিস্স সপত্তকং চিত্তং পচ্চুপট্ঠিতং হোতি, সপত্তকে চিত্তে পচ্চুপট্ঠিতে মিচ্ছাদিট্ঠি হোতি। মিচ্ছাদিট্ঠিস্স খো অহং, লোহিচ্চ, দ্ৰিন্নং গতীনং অঞ্ঞতরং গতিং ৰদামি – নিরযং ৰা তিরচ্ছানযোনিং ৰা। তযো চোদনারহা ৫১৩. ‘‘তযো খোমে, লোহিচ্চ, সত্থারো, যে লোকে চোদনারহা; যো চ পনেৰরূপে সত্থারো চোদেতি, সা চোদনা ভূতা তচ্ছা ধম্মিকা অনৰজ্জা । কতমে তযো? ইধ, লোহিচ্চ, একচ্চো সত্থা যস্সত্থায অগারস্মা অনগারিযং পব্বজিতো হোতি, স্ৰাস্স সামঞ্ঞত্থো অননুপ্পত্তো হোতি। সো তং সামঞ্ঞত্থং অননুপাপুণিত্ৰা সাৰকানং ধম্মং দেসেতি – ‘‘ইদং ৰো হিতায ইদং ৰো সুখাযা’’তি। তস্স সাৰকা ন সুস্সূসন্তি, ন সোতং ওদহন্তি, ন অঞ্ঞা চিত্তং উপট্ঠপেন্তি, ৰোক্কম্ম চ সত্থুসাসনা ৰত্তন্তি। সো এৰমস্স চোদেতব্বো – ‘‘আযস্মা খো যস্সত্থায অগারস্মা অনগারিযং পব্বজিতো, সো তে সামঞ্ঞত্থো অননুপ্পত্তো, তং ত্ৰং সামঞ্ঞত্থং অননুপাপুণিত্ৰা সাৰকানং ধম্মং দেসেসি – ‘ইদং ৰো হিতায ইদং ৰো সুখাযা’তি । তস্স তে সাৰকা ন সুস্সূসন্তি, ন সোতং ওদহন্তি, ন অঞ্ঞা চিত্তং উপট্ঠপেন্তি, ৰোক্কম্ম চ সত্থুসাসনা ৰত্তন্তি। সেয্যথাপি নাম ওসক্কন্তিযা ৰা উস্সক্কেয্য, পরম্মুখিং ৰা আলিঙ্গেয্য, এৰং সম্পদমিদং পাপকং লোভধম্মং ৰদামি – কিঞ্হি পরো পরস্স করিস্সতী’’তি। অযং খো, লোহিচ্চ, পঠমো সত্থা, যো লোকে চোদনারহো; যো চ পনেৰরূপং সত্থারং চোদেতি, সা চোদনা ভূতা তচ্ছা ধম্মিকা অনৰজ্জা। ৫১৪. ‘‘পুন চপরং, লোহিচ্চ, ইধেকচ্চো সত্থা যস্সত্থায অগারস্মা অনগারিযং পব্বজিতো হোতি, স্ৰাস্স সামঞ্ঞত্থো অননুপ্পত্তো হোতি। সো তং সামঞ্ঞত্থং অননুপাপুণিত্ৰা সাৰকানং ধম্মং দেসেতি – ‘‘ইদং ৰো হিতায, ইদং ৰো সুখাযা’’তি। তস্স সাৰকা সুস্সূসন্তি, সোতং ওদহন্তি, অঞ্ঞা চিত্তং উপট্ঠপেন্তি, ন চ ৰোক্কম্ম সত্থুসাসনা ৰত্তন্তি। সো এৰমস্স চোদেতব্বো – ‘‘আযস্মা খো যস্সত্থায অগারস্মা অনগারিযং পব্বজিতো, সো তে সামঞ্ঞত্থো অননুপ্পত্তো। তং ত্ৰং সামঞ্ঞত্থং অননুপাপুণিত্ৰা সাৰকানং ধম্মং দেসেসি – ‘ইদং ৰো হিতায ইদং ৰো সুখাযা’তি। তস্স তে সাৰকা সুস্সূসন্তি, সোতং ওদহন্তি , অঞ্ঞা চিত্তং উপট্ঠপেন্তি, ন চ ৰোক্কম্ম সত্থুসাসনা ৰত্তন্তি। সেয্যথাপি নাম সকং খেত্তং ওহায পরং খেত্তং নিদ্দাযিতব্বং মঞ্ঞেয্য , এৰং সম্পদমিদং পাপকং লোভধম্মং ৰদামি – কিঞ্হি পরো পরস্স করিস্সতী’’তি। অযং খো, লোহিচ্চ, দুতিযো সত্থা, যো, লোকে চোদনারহো; যো চ পনেৰরূপং সত্থারং চোদেতি, সা চোদনা ভূতা তচ্ছা ধম্মিকা অনৰজ্জা। ৫১৫. ‘‘পুন চপরং, লোহিচ্চ, ইধেকচ্চো সত্থা যস্সত্থায অগারস্মা অনগারিযং পব্বজিতো হোতি, স্ৰাস্স সামঞ্ঞত্থো অনুপ্পত্তো হোতি। সো তং সামঞ্ঞত্থং অনুপাপুণিত্ৰা সাৰকানং ধম্মং দেসেতি – ‘‘ইদং ৰো হিতায ইদং ৰো সুখাযা’’তি। তস্স সাৰকা ন সুস্সূসন্তি, ন সোতং ওদহন্তি, ন অঞ্ঞা চিত্তং উপট্ঠপেন্তি, ৰোক্কম্ম চ সত্থুসাসনা ৰত্তন্তি। সো এৰমস্স চোদেতব্বো – ‘‘আযস্মা খো যস্সত্থায অগারস্মা অনগারিযং পব্বজিতো, সো তে সামঞ্ঞত্থো অনুপ্পত্তো। তং ত্ৰং সামঞ্ঞত্থং অনুপাপুণিত্ৰা সাৰকানং ধম্মং দেসেসি – ‘ইদং ৰো হিতায ইদং ৰো সুখাযা’তি। তস্স তে সাৰকা ন সুস্সূসন্তি, ন সোতং ওদহন্তি, ন অঞ্ঞা চিত্তং উপট্ঠপেন্তি , ৰোক্কম্ম চ সত্থুসাসনা ৰত্তন্তি। সেয্যথাপি নাম পুরাণং বন্ধনং ছিন্দিত্ৰা অঞ্ঞং নৰং বন্ধনং করেয্য, এৰং সম্পদমিদং পাপকং লোভধম্মং ৰদামি, কিঞ্হি পরো পরস্স করিস্সতী’’তি। অযং খো, লোহিচ্চ, ততিযো সত্থা, যো লোকে চোদনারহো; যো চ পনেৰরূপং সত্থারং চোদেতি, সা চোদনা ভূতা তচ্ছা ধম্মিকা অনৰজ্জা। ইমে খো, লোহিচ্চ, তযো সত্থারো, যে লোকে চোদনারহা, যো চ পনেৰরূপে সত্থারো চোদেতি, সা চোদনা ভূতা তচ্ছা ধম্মিকা অনৰজ্জাতি। নচোদনারহসত্থু ৫১৬. এৰং ৰুত্তে, লোহিচ্চো ব্রাহ্মণো ভগৰন্তং এতদৰোচ – ‘‘অত্থি পন, ভো গোতম, কোচি সত্থা, যো লোকে নচোদনারহো’’তি? ‘‘অত্থি খো, লোহিচ্চ, সত্থা, যো লোকে নচোদনারহো’’তি। ‘‘কতমো পন সো, ভো গোতম, সত্থা, যো লোকে নচোদনারহো’’তি? ‘‘ইধ, লোহিচ্চ, তথাগতো লোকে উপ্পজ্জতি অরহং, সম্মাসম্বুদ্ধো…পে॰… (যথা ১৯০-২১২ অনুচ্ছেদেসু এৰং ৰিত্থারেতব্বং)। এৰং খো, লোহিচ্চ, ভিক্খু সীলসম্পন্নোহোতি…পে॰… পঠমং ঝানং উপসম্পজ্জ ৰিহরতি… যস্মিং খো, লোহিচ্চ, সত্থরি সাৰকো এৰরূপং উল়ারং ৰিসেসং অধিগচ্ছতি, অযম্পি খো, লোহিচ্চ, সত্থা, যো লোকে নচোদনারহো । যো চ পনেৰরূপং সত্থারং চোদেতি, সা চোদনা অভূতা অতচ্ছা অধম্মিকা সাৰজ্জা…পে॰… দুতিযং ঝানং…পে॰… ততিযং ঝানং…পে॰… চতুত্থং ঝানং উপসম্পজ্জ ৰিহরতি। যস্মিং খো, লোহিচ্চ, সত্থরি সাৰকো এৰরূপং উল়ারং ৰিসেসং অধিগচ্ছতি, অযম্পি খো, লোহিচ্চ, সত্থা, যো লোকে নচোদনারহো, যো চ পনেৰরূপং সত্থারং চোদেতি, সা চোদনা অভূতা অতচ্ছা অধম্মিকা সাৰজ্জা… ঞাণদস্সনায চিত্তং অভিনীহরতি অভিনিন্নামেতি…পে॰… যস্মিং খো, লোহিচ্চ, সত্থরি সাৰকো এৰরূপং উল়ারং ৰিসেসং অধিগচ্ছতি, অযম্পি খো, লোহিচ্চ, সত্থা, যো লোকে নচোদনারহো, যো চ পনেৰরূপং সত্থারং চোদেতি, সা চোদনা অভূতা অতচ্ছা অধম্মিকা সাৰজ্জা… নাপরং ইত্থত্তাযাতি পজানাতি। যস্মিং খো, লোহিচ্চ, সত্থরি সাৰকো এৰরূপং উল়ারং ৰিসেসং অধিগচ্ছতি, অযম্পি খো, লোহিচ্চ, সত্থা, যো লোকে নচোদনারহো, যো চ পনেৰরূপং সত্থারং চোদেতি, সা চোদনা অভূতা অতচ্ছা অধম্মিকা সাৰজ্জা’’তি। ৫১৭. এৰং ৰুত্তে, লোহিচ্চো ব্রাহ্মণো ভগৰন্তং এতদৰোচ – ‘‘সেয্যথাপি, ভো গোতম, পুরিসো পুরিসং নরকপপাতং পতন্তং কেসেসু গহেত্ৰা উদ্ধরিত্ৰা থলে পতিট্ঠপেয্য, এৰমেৰাহং ভোতা গোতমেন নরকপপাতং পপতন্তো উদ্ধরিত্ৰা থলে পতিট্ঠাপিতো। অভিক্কন্তং, ভো গোতম, অভিক্কন্তং, ভো গোতম, সেয্যথাপি, ভো গোতম, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য, ‘চক্খুমন্তো রূপানি দক্খন্তী’তি। এৰমেৰং ভোতা গোতমেন অনেকপরিযাযেন ধম্মো পকাসিতো । এসাহং ভৰন্তং গোতমং সরণং গচ্ছামি ধম্মঞ্চ ভিক্খুসঙ্ঘঞ্চ। উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি। লোহিচ্চসুত্তং নিট্ঠিতং দ্ৰাদসমং। |