৭. কথিনক্খন্ধকো
১৮৭. কথিনানুজাননা ৩০৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন তিংসমত্তা পাৰেয্যকা [পাঠেয্যকা (সী॰ স্যা॰)] ভিক্খূ, সব্বে আরঞ্ঞিকা সব্বে পিণ্ডপাতিকা সব্বে পংসুকূলিকা সব্বে তেচীৰরিকা সাৰত্থিং আগচ্ছন্তা ভগৰন্তং দস্সনায উপকট্ঠায ৰস্সূপনাযিকায নাসক্খিংসু সাৰত্থিযং ৰস্সূপনাযিকং সম্ভাৰেতুং; অন্তরামগ্গে সাকেতে ৰস্সং উপগচ্ছিংসু। তে উক্কণ্ঠিতরূপা ৰস্সং ৰসিংসু – আসন্নেৰ নো ভগৰা ৰিহরতি ইতো ছসু যোজনেসু, ন চ মযং লভাম ভগৰন্তং দস্সনাযাতি। অথ খো তে ভিক্খূ ৰস্সংৰুট্ঠা, তেমাসচ্চযেন কতায পৰারণায, দেৰে ৰস্সন্তে, উদকসঙ্গহে উদকচিক্খল্লে ওকপুণ্ণেহি চীৰরেহি কিলন্তরূপা যেন সাৰত্থি জেতৰনং অনাথপিণ্ডিকস্স আরামো, যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। আচিণ্ণং খো পনেতং বুদ্ধানং ভগৰন্তানং আগন্তুকেহি ভিক্খূহি সদ্ধিং পটিসম্মোদিতুং। অথ খো ভগৰা তে ভিক্খূ এতদৰোচ – ‘‘কচ্চি, ভিক্খৰে, খমনীযং, কচ্চি যাপনীযং, কচ্চি সমগ্গা সম্মোদমানা অৰিৰদমানা ফাসুকং ৰস্সং ৰসিত্থ, ন চ পিণ্ডকেন কিলমিত্থা’’তি? ‘‘খমনীযং, ভগৰা; যাপনীযং, ভগৰা; সমগ্গা চ মযং, ভন্তে, সম্মোদমানা অৰিৰদমানা ৰস্সং ৰসিম্হা, ন চ পিণ্ডকেন কিলমিম্হা । ইধ মযং, ভন্তে, তিংসমত্তা পাৰেয্যকা ভিক্খূ সাৰত্থিং আগচ্ছন্তা ভগৰন্তং দস্সনায উপকট্ঠায ৰস্সূপনাযিকায নাসক্খিম্হা সাৰত্থিযং ৰস্সূপনাযিকং সম্ভাৰেতুং, অন্তরামগ্গে সাকেতে ৰস্সং উপগচ্ছিম্হা। তে মযং, ভন্তে, উক্কণ্ঠিতরূপা ৰস্সং ৰসিম্হা – ‘আসন্নেৰ নো ভগৰা ৰিহরতি ইতো ছসু যোজনেসু, ন চ মযং লভাম ভগৰন্তং দস্সনাযা’তি। অথ খো মযং, ভন্তে, ৰস্সংৰুট্ঠা, তেমাসচ্চযেন কতায পৰারণায, দেৰে ৰস্সন্তে, উদকসঙ্গহে উদকচিক্খল্লে ওকপুণ্ণেহি চীৰরেহি কিলন্তরূপা অদ্ধানং আগতাতি। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, ৰস্সংৰুট্ঠানং ভিক্খূনং কথিনং[কঠিনং (সী॰ স্যা॰)] অত্থরিতুং। অত্থতকথিনানং ৰো, ভিক্খৰে, পঞ্চ কপ্পিস্সন্তি – অনামন্তচারো, অসমাদানচারো, গণভোজনং, যাৰদত্থচীৰরং, যো চ তত্থ চীৰরুপ্পাদো সো নেসং ভৰিস্সতীতি। অত্থতকথিনানং ৰো, ভিক্খৰে, ইমানি পঞ্চ কপ্পিস্সন্তি। এৰঞ্চ পন, ভিক্খৰে, কথিনং অত্থরিতব্বং। ব্যত্তেন ভিক্খুনা পটিবলেন সঙ্ঘো ঞাপেতব্বো – ৩০৭. ‘‘সুণাতু মে, ভন্তে, সঙ্ঘো। ইদং সঙ্ঘস্স কথিনদুস্সং উপ্পন্নং। যদি সঙ্ঘস্স পত্তকল্লং, সঙ্ঘো ইমং কথিনদুস্সং ইত্থন্নামস্স ভিক্খুনো দদেয্য কথিনং অত্থরিতুং। এসা ঞত্তি। ‘‘সুণাতু মে, ভন্তে, সঙ্ঘো। ইদং সঙ্ঘস্স কথিনদুস্সং উপ্পন্নং। সঙ্ঘো ইমং কথিনদুস্সং ইত্থন্নামস্স ভিক্খুনো দেতি কথিনং অত্থরিতুং। যস্সাযস্মতো খমতি ইমস্স কথিনদুস্সস্স ইত্থন্নামস্স ভিক্খুনো দানং কথিনং অত্থরিতুং, সো তুণ্হস্স; যস্স নক্খমতি, সো ভাসেয্য। ‘‘দিন্নং ইদং সঙ্ঘেন কথিনদুস্সং ইত্থন্নামস্স ভিক্খুনো কথিনং অত্থরিতুং। খমতি সঙ্ঘস্স, তস্মা তুণ্হী, এৰমেতং ধারযামী’’তি। ৩০৮. ‘‘এৰং খো, ভিক্খৰে, অত্থতং হোতি কথিনং, এৰং অনত্থতং। কথঞ্চ পন, ভিক্খৰে, অনত্থতং হোতি কথিনং? ন উল্লিখিতমত্তেন অত্থতং হোতি কথিনং, ন ধোৰনমত্তেন অত্থতং হোতি কথিনং, ন চীৰরৰিচারণমত্তেন [ন গণ্টুসকরণমত্তেন (ক॰)] অত্থতং হোতি কথিনং, ন ছেদনমত্তেন অত্থতং হোতি কথিনং, ন বন্ধনমত্তেন অত্থতং হোতি কথিনং, ন ওৰট্টিযকরণমত্তেন [ন ওৰট্টেয্যকরণমত্তেন (সী॰ স্যা॰), ন ওৰদেয্যকরণমত্তেন (ক॰)] অত্থতং হোতি কথিনং, ন কণ্ডুসকরণমত্তেন অত্থতং হোতি কথিনং, ন দল়্হীকম্মকরণমত্তেন অত্থতং হোতি কথিনং, ন অনুৰাতকরণমত্তেন অত্থতং হোতি কথিনং, ন পরিভণ্ডকরণমত্তেন অত্থতং হোতি কথিনং, ন ওৰদ্ধেয্যকরণমত্তেন অত্থতং হোতি কথিনং, ন কম্বলমদ্দনমত্তেন অত্থতং হোতি কথিনং, ন নিমিত্তকতেন অত্থতং হোতি কথিনং, ন পরিকথাকতেন অত্থতং হোতি কথিনং, ন কুক্কুকতেন অত্থতং হোতি কথিনং, ন সন্নিধিকতেন অত্থতং হোতি কথিনং, ন নিস্সগ্গিযেন অত্থতং হোতি কথিনং, ন অকপ্পকতেন অত্থতং হোতি কথিনং , ন অঞ্ঞত্র সঙ্ঘাটিযা অত্থতং হোতি কথিনং, ন অঞ্ঞত্র উত্তরাসঙ্গেন অত্থতং হোতি কথিনং, ন অঞ্ঞত্র অন্তরৰাসকেন অত্থতং হোতি কথিনং, ন অঞ্ঞত্র পঞ্চকেন ৰা অতিরেকপঞ্চকেন ৰা তদহেৰ সঞ্ছিন্নেন সমণ্ডলীকতেন অত্থতং হোতি কথিনং, ন অঞ্ঞত্র পুগ্গলস্স অত্থারা অত্থতং হোতি কথিনং; সম্মা চেৰ অত্থতং হোতি কথিনং, তঞ্চে নিস্সীমট্ঠো অনুমোদতি, এৰম্পি অনত্থতং হোতি কথিনং। এৰং খো, ভিক্খৰে, অনত্থতং হোতি কথিনং। ৩০৯. ‘‘কথঞ্চ, ভিক্খৰে, অত্থতং হোতি কথিনং? অহতেন অত্থতং হোতি কথিনং, অহতকপ্পেন অত্থতং হোতি কথিনং, পিলোতিকায অত্থতং হোতি কথিনং, পংসুকূলেন অত্থতং হোতি কথিনং, পাপণিকেন অত্থতং হোতি কথিনং, অনিমিত্তকতেন অত্থতং হোতি কথিনং, অপরিকথাকতেন অত্থতং হোতি কথিনং, অকুক্কুকতেন অত্থতং হোতি কথিনং, অসন্নিধিকতেন অত্থতং হোতি কথিনং, অনিস্সগ্গিযেন অত্থতং হোতি কথিনং, কপ্পকতেন অত্থতং হোতি কথিনং, সঙ্ঘাটিযা অত্থতং হোতি কথিনং, উত্তরাসঙ্গেন অত্থতং হোতি কথিনং, অন্তরৰাসকেন অত্থতং হোতি কথিনং, পঞ্চকেন ৰা অতিরেকপঞ্চকেন ৰা তদহেৰ সঞ্ছিন্নেন সমণ্ডলীকতেন অত্থতং হোতি কথিনং, পুগ্গলস্স অত্থারা অত্থতং হোতি কথিনং; সম্মা চে অত্থতং হোতি কথিনং, তঞ্চে সীমট্ঠো অনুমোদতি, এৰম্পি অত্থতং হোতি কথিনং । এৰং খো, ভিক্খৰে, অত্থতং হোতি কথিনং। ৩১০. ‘‘কথঞ্চ, ভিক্খৰে, উব্ভতং হোতি কথিনং? অট্ঠিমা, ভিক্খৰে, মাতিকা কথিনস্স উব্ভারায – পক্কমনন্তিকা, নিট্ঠানন্তিকা, সন্নিট্ঠানন্তিকা, নাসনন্তিকা, সৰনন্তিকা, আসাৰচ্ছেদিকা, সীমাতিক্কন্তিকা, সহুব্ভারা’’তি[সউব্ভারাতি (ক॰)]। কথিনানুজাননা নিট্ঠিতা। ১৮৮. আদাযসত্তকং ৩১১. ভিক্খু অত্থতকথিনো কতচীৰরং আদায পক্কমতি – ‘‘ন পচ্চেস্স’’ন্তি। তস্স ভিক্খুনো পক্কমনন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি। তস্স বহিসীমগতস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি – ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো সুণাতি ‘‘উব্ভতং কির তস্মিং আৰাসে কথিন’’ন্তি। তস্স ভিক্খুনো সৰনন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি – ‘‘পচ্চেস্স’’ন্তি । সো বহিসীমগতো তং চীৰরং কারেতি। সো কতচীৰরো – ‘‘পচ্চেস্সং পচ্চেস্স’’ন্তি – বহিদ্ধা কথিনুদ্ধারং ৰীতিনামেতি। তস্স ভিক্খুনো সীমাতিক্কন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি – ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো – ‘‘পচ্চেস্সং পচ্চেস্স’’ন্তি – সম্ভুণাতি কথিনুদ্ধারং। তস্স ভিক্খুনো সহ ভিক্খূহি কথিনুদ্ধারো। আদাযসত্তকং নিট্ঠিতং […দুতিযং নিট্ঠিতং (ক॰)]। ১৮৯. সমাদাযসত্তকং ৩১২. ভিক্খু অত্থতকথিনো কতচীৰরং সমাদায পক্কমতি ‘‘ন পচ্চেস্স’’ন্তি। তস্স ভিক্খুনো পক্কমনন্তিকো কথিনুদ্ধারো। ভিক্খু অত্থতকথিনো চীৰরং সমাদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো চীৰরং সমাদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো চীৰরং সমাদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো চীৰরং সমাদায পক্কমতি – ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো সুণাতি – ‘‘উব্ভতং কির তস্মিং আৰাসে কথিন’’ন্তি। তস্স ভিক্খুনো সৰনন্তিকো কথিনুদ্ধারো। ভিক্খু অত্থতকথিনো চীৰরং সমাদায পক্কমতি – ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো – ‘‘পচ্চেস্সং পচ্চেস্স’’ন্তি – বহিদ্ধা কথিনুদ্ধারং ৰীতিনামেতি। তস্স ভিক্খুনো সীমাতিক্কন্তিকো কথিনুদ্ধারো। ভিক্খু অত্থতকথিনো চীৰরং সমাদায পক্কমতি – ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো – ‘‘পচ্চেস্সং পচ্চেস্স’’ন্তি – সম্ভুণাতি কথিনুদ্ধারং। তস্স ভিক্খুনো সহ ভিক্খূহি কথিনুদ্ধারো। সমাদাযসত্তকং নিট্ঠিতং। ১৯০. আদাযছক্কং ৩১৩. ভিক্খু অত্থতকথিনো ৰিপ্পকতচীৰরং আদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং আদায পক্কমতি। তস্স বহিসীমগতস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং আদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং ন পচ্চেস্স’’ন্তি। সো তং চীৰরং কারেতি। তস্সং তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং আদায পক্কমতি ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো সুণাতি – ‘‘উব্ভতং কির তস্মিং আৰাসে কথিন’’ন্তি। তস্স ভিক্খুনো সৰনন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং আদায পক্কমতি ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো ‘‘পচ্চেস্সং পচ্চেস্স’’ন্তি বহিদ্ধা কথিনুদ্ধারং ৰীতিনামেতি। তস্স ভিক্খুনো সীমাতিক্কন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং আদায পক্কমতি ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো ‘‘পচ্চেস্সং পচ্চেস্স’’ন্তি সম্ভুণাতি কথিনুদ্ধারং। তস্স ভিক্খুনো সহ ভিক্খূহি কথিনুদ্ধারো। আদাযছক্কং নিট্ঠিতং। ১৯১. সমাদাযছক্কং ৩১৪. ভিক্খু অত্থতকথিনো ৰিপ্পকতচীৰরং সমাদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি। তস্স বহিসীমগতস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো সুণাতি – ‘‘উব্ভতং কির তস্মিং আৰাসে কথিন’’ন্তি। তস্স ভিক্খুনো সৰনন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো ‘‘পচ্চেস্সং পচ্চেস্স’’ন্তি বহিদ্ধা কথিনুদ্ধারং ৰীতিনামেতি। তস্স ভিক্খুনো সীমাতিক্কন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো ‘‘পচ্চেস্সং পচ্চেস্স’’ন্তি সম্ভুণাতি কথিনুদ্ধারং। তস্স ভিক্খুনো সহ ভিক্খূহি কথিনুদ্ধারো। সমাদাযছক্কং নিট্ঠিতং। ১৯২. আদাযপন্নরসকং ৩১৫. ভিক্খু অত্থতকথিনো চীৰরং আদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি। তস্স বহিসীমগতস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। তিকং। ভিক্খু অত্থতকথিনো চীৰরং আদায পক্কমতি ‘‘ন পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি ‘‘ন পচ্চেস্স’’ন্তি। তস্স বহিসীমগতস্স এৰং হোতি – ‘‘নেৰিমং চীৰরং কারেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি ‘‘ন পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্স’’ন্তি । সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। তিকং। ভিক্খু অত্থতকথিনো চীৰরং আদায পক্কমতি অনধিট্ঠিতেন; নেৰস্স হোতি ‘‘পচ্চেস্স’’ন্তি, ন পনস্স হোতি ‘‘ন পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি অনধিট্ঠিতেন; নেৰস্স হোতি ‘‘পচ্চেস্স’’ন্তি, ন পনস্স হোতি ‘‘ন পচ্চেস্স’’ন্তি। তস্স বহিসীমগতস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি অনধিট্ঠিতেন; নেৰস্স হোতি ‘‘পচ্চেস্স’’ন্তি, ন পনস্স হোতি ‘‘ন পচ্চেস্স’’ন্তি । তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। তিকং। ভিক্খু অত্থতকথিনো চীৰরং আদায পক্কমতি ‘‘পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি ‘‘পচ্চেস্স’’ন্তি। তস্স বহিসীমগতস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি ‘‘পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো সুণাতি – ‘‘উব্ভতং কির তস্মিং আৰাসে কথিন’’ন্তি। তস্স ভিক্খুনো সৰনন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো ‘‘পচ্চেস্সং পচ্চেস্স’’ন্তি – বহিদ্ধা কথিনুদ্ধারং ৰীতিনামেতি। তস্স ভিক্খুনো সীমাতিক্কন্তিকো কথিনুদ্ধারো। ভিক্খু অত্থতকথিনো চীৰরং আদায পক্কমতি ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো – ‘‘পচ্চেস্সং পচ্চেস্স’’ন্তি সম্ভুণাতি কথিনুদ্ধারং। তস্স ভিক্খুনো সহ ভিক্খূহি কথিনুদ্ধারো। ছক্কং। আদাযপন্নরসকং নিট্ঠিতং। ১৯৩. সমাদাযপন্নরসকাদি ৩১৬. ভিক্খু অত্থতকথিনো চীৰরং সমাদায পক্কমতি…পে॰…। (আদাযৰারসদিসং এৰং ৰিত্থারেতব্বং।) ভিক্খু অত্থতকথিনো ৰিপ্পকতচীৰরং আদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো…পে॰…। (সমাদাযৰারসদিসং এৰং ৰিত্থারেতব্বং।) সমাদাযপন্নরসকাদি নিট্ঠিতা। ১৯৪. ৰিপ্পকতসমাদাযপন্নরসকং ৩১৭. ভিক্খু অত্থতকথিনো ৰিপ্পকতচীৰরং সমাদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি। তস্স বহিসীমগতস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। তিকং। ভিক্খু অত্থতকথিনো ৰিপ্পকতচীৰরং সমাদায পক্কমতি ‘‘ন পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি ‘‘ন পচ্চেস্স’’ন্তি। তস্স বহিসীমগতস্স এৰং হোতি – ‘‘নেৰিমং চীৰরং কারেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি ‘‘ন পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। তিকং। ভিক্খু অত্থতকথিনো ৰিপ্পকতচীৰরং সমাদায পক্কমতি অনধিট্ঠিতেন; নেৰস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি অনধিট্ঠিতেন; নেৰস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি। তস্স বহিসীমগতস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি অনধিট্ঠিতেন; নেৰস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। তিকং। ভিক্খু অত্থতকথিনো ৰিপ্পকতচীৰরং সমাদায পক্কমতি ‘‘পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি ‘‘পচ্চেস্স’’ন্তি। তস্স বহিসীমগতস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি ‘‘পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি । সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো সুণাতি – ‘‘উব্ভতং কির তস্মিং আৰাসে কথিন’’ন্তি। তস্স ভিক্খুনো সৰনন্তিকো কথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো – ‘‘পচ্চেস্সং পচ্চেস্স’’ন্তি বহিদ্ধা কথিনুদ্ধারং ৰীতিনামেতি। তস্স ভিক্খুনো সীমাতিক্কন্তিকোকথিনুদ্ধারো। ভিক্খু অত্থতকথিনো ৰিপ্পকতচীৰরং সমাদায পক্কমতি ‘‘পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো ‘‘পচ্চেস্সং পচ্চেস্স’’ন্তি সম্ভুণাতি কথিনুদ্ধারং। তস্স ভিক্খুনো সহ ভিক্খূহি কথিনুদ্ধারো। ছক্কং। ৰিপ্পকতসমাদাযপন্নরসকং নিট্ঠিতং। আদাযভাণৰারো। ১৯৫. অনাসাদোল়সকং ৩১৮. ভিক্খু অত্থতকথিনো চীৰরাসায পক্কমতি। সো বহিসীমগতো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি। সো বহিসীমগতো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি। সো বহিসীমগতো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি। তস্স বহিসীমগতস্স এৰং হোতি – ‘‘ইধেৰিমং চীৰরাসং পযিরুপাসিস্সং, ন পচ্চেস্স’’ন্তি। সো তং চীৰরাসং পযিরুপাসতি। তস্স সা চীৰরাসা উপচ্ছিজ্জতি । তস্স ভিক্খুনো আসাৰচ্ছেদিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘ন পচ্চেস্স’’ন্তি। সো বহিসীমগতো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘ইধেৰিমং চীৰরং কারেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘ন পচ্চেস্স’’ন্তি। সো বহিসীমগতো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘নেৰিমং চীৰরং কারেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘ন পচ্চেস্স’’ন্তি। সো বহিসীমগতো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘ইধেৰিমং চীৰরং কারেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘ন পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরাসং পযিরুপাসিস্স’’ন্তি। সো তং চীৰরাসং পযিরুপাসতি । তস্স সা চীৰরাসা উপচ্ছিজ্জতি। তস্স ভিক্খুনো আসাৰচ্ছেদিকো কথিনুদ্ধারো। ভিক্খু অত্থতকথিনো চীৰরাসায পক্কমতি অনধিট্ঠিতেন; নেৰস্স হোতি – ‘‘পচ্চেস্সন্তি, ন পনস্স হোতি – ‘‘ন পচ্চেস্স’’ন্তি। সো বহিসীমগতো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি অনধিট্ঠিতেন; নেৰস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি। সো বহিসীমগতো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি অনধিট্ঠিতেন; নেৰস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি। সো বহিসীমগতো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি অনধিট্ঠিতেন; নেৰস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরাসং পযিরুপাসিস্সং, ন পচ্চেস্স’’ন্তি। সো তং চীৰরাসং পযিরুপাসতি। তস্স সা চীৰরাসা উপচ্ছিজ্জতি। তস্স ভিক্খুনো আসাৰচ্ছেদিকো কথিনুদ্ধারো। অনাসাদোল়সকং [অনাসাদ্ৰাদসকং (সী॰)] নিট্ঠিতং। ১৯৬. আসাদোল়সকং ৩১৯. ভিক্খু অত্থতকথিনো চীৰরাসায পক্কমতি ‘‘পচ্চেস্স’’ন্তি। সো বহিসীমগতো তং চীৰরাসং পযিরুপাসতি। আসায লভতি, অনাসায ন লভতি। তস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘পচ্চেস্স’’ন্তি। সো বহিসীমগতো তং চীৰরাসং পযিরুপাসতি। আসায লভতি, অনাসায ন লভতি। তস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘পচ্চেস্স’’ন্তি। সো বহিসীমগতো তং চীৰরাসং পযিরুপাসতি। আসায লভতি, অনাসায ন লভতি। তস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরাসং পযিরুপাসিস্সং, ন পচ্চেস্স’’ন্তি। সো তং চীৰরাসং পযিরুপাসতি। তস্স সা চীৰরাসা উপচ্ছিজ্জতি। তস্স ভিক্খুনো আসাৰচ্ছেদিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘পচ্চেস্স’’ন্তি। সো বহিসীমগতো সুণাতি – ‘‘উব্ভতং কির তস্মিং আৰাসে কথিন’’ন্তি। তস্স এৰং হোতি – ‘‘যতো তস্মিং আৰাসে উব্ভতং কথিনং, ইধেৰিমং চীৰরাসং পযিরুপাসিস্স’’ন্তি। সো তং চীৰরাসং পযিরুপাসতি। আসায লভতি , অনাসায ন লভতি। তস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘পচ্চেস্স’’ন্তি। সো বহিসীমগতো সুণাতি – ‘‘উব্ভতং কির তস্মিং আৰাসে কথিন’’ন্তি। তস্স এৰং হোতি – ‘‘যতো তস্মিং আৰাসে উব্ভতং কথিনং, ইধেৰিমং চীৰরাসং পযিরুপাসিস্স’’ন্তি। সো তং চীৰরাসং পযিরুপাসতি। আসায লভতি, অনাসায ন লভতি। তস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘পচ্চেস্স’’ন্তি। সো বহিসীমগতো সুণাতি – ‘‘উব্ভতং কির তস্মিং আৰাসে কথিন’’ন্তি। তস্স এৰং হোতি – ‘‘যতো তস্মিং আৰাসে উব্ভতং কথিনং, ইধেৰিমং চীৰরাসং পযিরুপাসিস্স’’ন্তি। সো তং চীৰরাসং পযিরুপাসতি। আসায লভতি, অনাসায ন লভতি। তস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘পচ্চেস্স’’ন্তি। সো বহিসীমগতো সুণাতি – ‘‘উব্ভতং কির তস্মিং আৰাসে কথিন’’ন্তি। তস্স এৰং হোতি – ‘‘যতো তস্মিং আৰাসে উব্ভতং কথিনং, ইধেৰিমং চীৰরাসং পযিরুপাসিস্সং, ন পচ্চেস্স’’ন্তি। সো তং চীৰরাসং পযিরুপাসতি। তস্স সা চীৰরাসা উপচ্ছিজ্জতি। তস্স ভিক্খুনো আসাৰচ্ছেদিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘পচ্চেস্স’’ন্তি। সো বহিসীমগতো তং চীৰরাসং পযিরুপাসতি। আসায লভতি, অনাসায ন লভতি। সো তং চীৰরং কারেতি। সো কতচীৰরো সুণাতি – ‘‘উব্ভতং কির তস্মিং আৰাসে কথিন’’ন্তি। তস্স ভিক্খুনো সৰনন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরাসং পযিরুপাসিস্সং, ন পচ্চেস্স’’ন্তি। সো তং চীৰরাসং পযিরুপাসতি। তস্স সা চীৰরাসা উপচ্ছিজ্জতি। তস্স ভিক্খুনো আসাৰচ্ছেদিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘পচ্চেস্স’’ন্তি। সো বহিসীমগতো তং চীৰরাসং পযিরুপাসতি। আসায লভতি, অনাসায ন লভতি। সো তং চীৰরং কারেতি। সো কতচীৰরো ‘‘পচ্চেস্সং পচ্চেস্স’’ন্তি – বহিদ্ধা কথিনুদ্ধারং ৰীতিনামেতি। তস্স ভিক্খুনো সীমাতিক্কন্তিকো কথিনুদ্ধারো। ভিক্খু অত্থতকথিনো চীৰরাসায পক্কমতি ‘‘পচ্চেস্স’’ন্তি। সো বহিসীমগতো তং চীৰরাসং পযিরুপাসতি। আসায লভতি, অনাসায ন লভতি। সো তং চীৰরং কারেতি। সো কতচীৰরো ‘‘পচ্চেস্সং পচ্চেস্স’’ন্তি – সম্ভুণাতি কথিনুদ্ধারং। তস্স ভিক্খুনো সহ ভিক্খূহি কথিনুদ্ধারো। আসাদোল়সকং নিট্ঠিতং। ১৯৭. করণীযদোল়সকং ৩২০. ভিক্খু অত্থতকথিনো কেনচিদেৰ করণীযেন পক্কমতি। তস্স বহিসীমগতস্স চীৰরাসা উপ্পজ্জতি। সো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো কেনচিদেৰ করণীযেন পক্কমতি। তস্স বহিসীমগতস্স চীৰরাসা উপ্পজ্জতি। সো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো কেনচিদেৰ করণীযেন পক্কমতি। তস্স বহিসীমগতস্স চীৰরাসা উপ্পজ্জতি। সো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো কেনচিদেৰ করণীযেন পক্কমতি। তস্স বহিসীমগতস্স চীৰরাসা উপ্পজ্জতি। তস্স এৰং হোতি – ‘‘ইধেৰিমং চীৰরাসং পযিরুপাসিস্সং, ন পচ্চেস্স’’ন্তি। সো তং চীৰরাসং পযিরুপাসতি। তস্স সা চীৰরাসা উপচ্ছিজ্জতি। তস্স ভিক্খুনো আসাৰচ্ছেদিকো কথিনুদ্ধারো। ভিক্খু অত্থতকথিনো কেনচিদেৰ করণীযেন পক্কমতি ‘‘ন পচ্চেস্স’’ন্তি। তস্স বহিসীমগতস্স চীৰরাসা উপ্পজ্জতি। সো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘ইধেৰিমং চীৰরং কারেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো কেনচিদেৰ করণীযেন পক্কমতি ‘‘ন পচ্চেস্স’’ন্তি। তস্স বহিসীমগতস্স চীৰরাসা উপ্পজ্জতি। সো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘নেৰিমং চীৰরং কারেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো কেনচিদেৰ করণীযেন পক্কমতি ‘‘ন পচ্চেস্স’’ন্তি। তস্স বহিসীমগতস্স চীৰরাসা উপ্পজ্জতি। সো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘ইধেৰিমং চীৰরং কারেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো কেনচিদেৰ করণীযেন পক্কমতি ‘‘ন পচ্চেস্স’’ন্তি। তস্স বহিসীমগতস্স চীৰরাসা উপ্পজ্জতি। তস্স এৰং হোতি – ‘‘ইধেৰিমং চীৰরাসং পযিরুপাসিস্স’’ন্তি। সো তং চীৰরাসং পযিরুপাসতি। তস্স সা চীৰরাসা উপচ্ছিজ্জতি। তস্স ভিক্খুনো আসাৰচ্ছেদিকো কথিনুদ্ধারো। ভিক্খু অত্থতকথিনো কেনচিদেৰ করণীযেন পক্কমতি অনধিট্ঠিতেন; নেৰস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি। তস্স বহিসীমগতস্স চীৰরাসা উপ্পজ্জতি। সো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো কেনচিদেৰ করণীযেন পক্কমতি অনধিট্ঠিতেন; নেৰস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি। তস্স বহিসীমগতস্স চীৰরাসা উপ্পজ্জতি। সো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো কেনচিদেৰ করণীযেন পক্কমতি অনধিট্ঠিতেন; নেৰস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি। তস্স বহিসীমগতস্স চীৰরাসা উপ্পজ্জতি। সো তং চীৰরাসং পযিরুপাসতি। অনাসায লভতি, আসায ন লভতি। তস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো কেনচিদেৰ করণীযেন পক্কমতি অনধিট্ঠিতেন; নেৰস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি। তস্স বহিসীমগতস্স চীৰরাসা উপ্পজ্জতি। তস্স এৰং হোতি – ‘‘ইধেৰিমং চীৰরাসং পযিরুপাসিস্সং, ন পচ্চেস্স’’ন্তি। সো তং চীৰরাসং পযিরুপাসতি। তস্স সা চীৰরাসা উপচ্ছিজ্জতি। তস্স ভিক্খুনো আসাৰচ্ছেদিকো কথিনুদ্ধারো। করণীযদোল়সকং নিট্ঠিতং। ১৯৮. অপৰিলাযননৰকং ৩২১. ভিক্খু অত্থতকথিনো দিসংগমিকো পক্কমতি চীৰরপটিৰীসং অপৰিলাযমানো [অপৰিনযমানো (সী॰), অপচিনযমানো (ক॰)]। তমেনং দিসঙ্গতং ভিক্খূ পুচ্ছন্তি – ‘‘কহং ত্ৰং, আৰুসো, ৰস্সংৰুট্ঠো, কত্থ চ তে চীৰরপটিৰীসো’’তি? সো এৰং ৰদেতি – ‘‘অমুকস্মিং আৰাসে ৰস্সংৰুট্ঠোম্হি। তত্থ চ মে চীৰরপটিৰীসো’’তি। তে এৰং ৰদন্তি – ‘‘গচ্ছাৰুসো, তং চীৰরং আহর, মযং তে ইধ চীৰরং করিস্সামা’’তি। সো তং আৰাসং গন্ত্ৰা ভিক্খূ পুচ্ছতি – ‘‘কহং মে, আৰুসো, চীৰরপটিৰীসো’’তি? তে এৰং ৰদন্তি – ‘‘অযং তে, আৰুসো, চীৰরপটিৰীসো; কহং গমিস্সসী’’তি? সো এৰং ৰদেতি – ‘‘অমুকং নাম [অমুকঞ্চ (ক॰)] আৰাসং গমিস্সামি, তত্থ মে ভিক্খূ চীৰরং করিস্সন্তী’’তি। তে এৰং ৰদন্তি – ‘‘অলং, আৰুসো, মা অগমাসি। মযং তে ইধ চীৰরং করিস্সামা’’তি। তস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো দিসংগমিকো পক্কমতি…পে॰… ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো দিসংগমিকো পক্কমতি…পে॰… ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ৩২২. ভিক্খু অত্থতকথিনো দিসংগমিকো পক্কমতি চীৰরপটিৰীসং অপৰিলাযমানো। তমেনং দিসংগতং ভিক্খূ পুচ্ছন্তি – ‘‘কহং ত্ৰং, আৰুসো, ৰস্সংৰুট্ঠো , কত্থ চ তে চীৰরপটিৰীসো’’তি? সো এৰং ৰদেতি – ‘‘অমুকস্মিং আৰাসে ৰস্সংৰুট্ঠোম্হি, তত্থ চ মে চীৰরপটিৰীসো’’তি। তে এৰং ৰদন্তি – ‘‘গচ্ছাৰুসো, তং চীৰরং আহর, মযং তে ইধ চীৰরং করিস্সামা’’তি। সো তং আৰাসং গন্ত্ৰা ভিক্খূ পুচ্ছতি – ‘‘কহং মে, আৰুসো, চীৰরপটিৰীসো’’তি? তে এৰং ৰদন্তি – ‘‘অযং তে, আৰুসো, চীৰরপটিৰীসো’’তি। সো তং চীৰরং আদায তং আৰাসং গচ্ছতি। তমেনং অন্তরামগ্গে ভিক্খূ পুচ্ছন্তি – ‘‘আৰুসো, কহং গমিস্সসী’’তি? সো এৰং ৰদেতি – ‘‘অমুকং নাম আৰাসং গমিস্সামি, তত্থ মে ভিক্খূ চীৰরং করিস্সন্তী’’তি। তে এৰং ৰদন্তি – ‘‘অলং, আৰুসো, মা অগমাসি, মযং তে ইধ চীৰরং করিস্সামা’’তি। তস্স এৰং হোতি – ‘‘ইধেৰিমং চীৰরং কারেস্সং ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো দিসংগমিকো পক্কমতি চীৰরপটিৰীসং অপৰিলাযমানো। তমেনং দিসংগতং ভিক্খূ পুচ্ছন্তি – ‘‘কহং ত্ৰং, আৰুসো, ৰস্সংৰুট্ঠো, কত্থ চ তে চীৰরপটিৰীসো’’তি? সো এৰং ৰদেতি – ‘‘অমুকস্মিং আৰাসে ৰস্সংৰুট্ঠোম্হি, তত্থ চ মে চীৰরপটিৰীসো’’তি। তে এৰং ৰদন্তি – ‘‘গচ্ছাৰুসো, তং চীৰরং আহর, মযং তে ইধ চীৰরং করিস্সামা’’তি। সো তং আৰাসং গন্ত্ৰা ভিক্খূ পুচ্ছতি – ‘‘কহং মে, আৰুসো, চীৰরপটিৰীসো’’তি? তে এৰং ৰদন্তি – ‘‘অযং তে, আৰুসো, চীৰরপটিৰীসো’’তি। সো তং চীৰরং আদায তং আৰাসং গচ্ছতি। তমেনং অন্তরামগ্গে ভিক্খূ পুচ্ছন্তি – ‘‘আৰুসো, কহং গমিস্সসী’’তি? সো এৰং ৰদেতি – ‘‘অমুকং নাম আৰাসং গমিস্সামি, তত্থ মে ভিক্খূ চীৰরং করিস্সন্তী’’তি। তে এৰং ৰদন্তি – ‘‘অলং, আৰুসো, মা অগমাসি, মযং তে ইধ চীৰরং করিস্সামা’’তি। তস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো দিসংগমিকো পক্কমতি…পে॰… ‘‘ইধেৰিমং চীৰরং কারেস্সং, ন পচ্চেস্স’’ন্তি । সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ৩২৩. ভিক্খু অত্থতকথিনো দিসংগমিকো পক্কমতি চীৰরপটিৰীসং অপৰিলাযমানো। তমেনং দিসংগতং ভিক্খূ পুচ্ছন্তি – ‘‘কহং ত্ৰং, আৰুসো, ৰস্সংৰুট্ঠো, কত্থ চ তে চীৰরপটিৰীসো’’তি? সো এৰং ৰদেতি – ‘‘অমুকস্মিং আৰাসে ৰস্সংৰুট্ঠোম্হি, তত্থ চ মে চীৰরপটিৰীসো’’তি। তে এৰং ৰদন্তি – ‘‘গচ্ছাৰুসো, তং চীৰরং আহর, মযং তে ইধ চীৰরং করিস্সামা’’তি। সো তং আৰাসং গন্ত্ৰা ভিক্খূ পুচ্ছতি – ‘‘কহং মে, আৰুসো, চীৰরপটিৰীসো’’তি? তে এৰং ৰদন্তি – ‘‘অযং তে, আৰুসো, চীৰরপটিৰীসো’’তি। সো তং চীৰরং আদায তং আৰাসং গচ্ছতি। তস্স তং আৰাসং গতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো দিসংগমিকো পক্কমতি…পে॰… ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো দিসংগমিকো পক্কমতি…পে॰… ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। অপৰিলাযননৰকং নিট্ঠিতং। ১৯৯. ফাসুৰিহারপঞ্চকং ৩২৪. ভিক্খু অত্থতকথিনো ফাসুৰিহারিকো চীৰরং আদায পক্কমতি – ‘‘অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি , নো চে মে ফাসু ভৰিস্সতি, অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স ভিক্খুনো নিট্ঠানন্তিকো কথিনুদ্ধারো। ভিক্খু অত্থতকথিনো ফাসুৰিহারিকো চীৰরং আদায পক্কমতি – ‘‘অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, পচ্চেস্স’’ন্তি। তস্স বহিসীমগতস্স এৰং হোতি – ‘‘নেৰিমং চীৰরং কারেস্সং, ন পচ্চেস্স’’ন্তি। তস্স ভিক্খুনো সন্নিট্ঠানন্তিকো কথিনুদ্ধারো। ভিক্খু অত্থতকথিনো ফাসুৰিহারিকো চীৰরং আদায পক্কমতি – ‘‘অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, পচ্চেস্স’’ন্তি। তস্স বহিসীমগতস্স এৰং হোতি – ‘‘ইধেৰিমং চীৰরং কারেস্সং, ন পচ্চেস্স’’ন্তি। সো তং চীৰরং কারেতি। তস্স তং চীৰরং কযিরমানং নস্সতি। তস্স ভিক্খুনো নাসনন্তিকো কথিনুদ্ধারো। ভিক্খু অত্থতকথিনো ফাসুৰিহারিকো চীৰরং আদায পক্কমতি – ‘‘অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো – ‘‘পচ্চেস্সং পচ্চেস্স’’ন্তি বহিদ্ধা কথিনুদ্ধারং ৰীতিনামেতি। তস্স ভিক্খুনো সীমাতিক্কন্তিকো কথিনুদ্ধারো। ভিক্খু অত্থতকথিনো ফাসুৰিহারিকো চীৰরং আদায পক্কমতি – ‘‘অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, অমুকং নাম আৰাসং গমিস্সামি; তত্থ মে ফাসু ভৰিস্সতি ৰসিস্সামি, নো চে মে ফাসু ভৰিস্সতি, পচ্চেস্স’’ন্তি। সো বহিসীমগতো তং চীৰরং কারেতি। সো কতচীৰরো ‘‘পচ্চেস্সং পচ্চেস্স’’ন্তি সম্ভুণাতি কথিনুদ্ধারং। তস্স ভিক্খুনো সহ ভিক্খূহি কথিনুদ্ধারো। ফাসুৰিহারপঞ্চকং নিট্ঠিতং। ২০০. পলিবোধাপলিবোধকথা ৩২৫. দ্ৰেমে , ভিক্খৰে, কথিনস্স পলিবোধা, দ্ৰে অপলিবোধা। কতমে চ, ভিক্খৰে, দ্ৰে কথিনস্স পলিবোধা? আৰাসপলিবোধো চ চীৰরপলিবোধো চ। কথঞ্চ, ভিক্খৰে, আৰাসপলিবোধো হোতি? ইধ, ভিক্খৰে, ভিক্খু ৰসতি ৰা তস্মিং আৰাসে, সাপেক্খো ৰা পক্কমতি ‘‘পচ্চেস্স’’ন্তি। এৰং খো, ভিক্খৰে, আৰাসপলিবোধো হোতি। কথঞ্চ, ভিক্খৰে, চীৰরপলিবোধো হোতি? ইধ, ভিক্খৰে, ভিক্খুনো চীৰরং অকতং ৰা হোতি ৰিপ্পকতং ৰা, চীৰরাসা ৰা অনুপচ্ছিন্না। এৰং খো, ভিক্খৰে, চীৰরপলিবোধো হোতি। ইমে খো, ভিক্খৰে, দ্ৰে কথিনস্স পলিবোধা। কতমে চ, ভিক্খৰে, দ্ৰে কথিনস্স অপলিবোধা? আৰাসঅপলিবোধো চ চীৰরঅপলিবোধো চ। কথঞ্চ, ভিক্খৰে, আৰাসঅপলিবোধো হোতি? ইধ, ভিক্খৰে, ভিক্খু পক্কমতি তম্হা আৰাসা চত্তেন ৰন্তেন মুত্তেন অনপেক্খো [অনপেক্খেন (ক॰)] ‘‘ন পচ্চেস্স’’ন্তি। এৰং খো, ভিক্খৰে, আৰাসঅপলিবোধো হোতি। কথঞ্চ, ভিক্খৰে, চীৰরঅপলিবোধো হোতি? ইধ, ভিক্খৰে, ভিক্খুনো চীৰরং কতং ৰা হোতি, নট্ঠং ৰা ৰিনট্ঠং ৰা দড্ঢং ৰা, চীৰরাসা ৰা উপচ্ছিন্না। এৰং খো, ভিক্খৰে, চীৰরঅপলিবোধো হোতি। ইমে খো, ভিক্খৰে, দ্ৰে কথিনস্স অপলিবোধাতি। পলিবোধাপলিবোধকথা নিট্ঠিতা। কথিনক্খন্ধকো নিট্ঠিতো সত্তমো। ২০১. তস্সুদ্দানং তিংস পাৰেয্যকা ভিক্খূ, সাকেতুক্কণ্ঠিতা ৰসুং। ৰস্সংৰুট্ঠোকপুণ্ণেহি, অগমুং জিনদস্সনং॥ ইদং ৰত্থু কথিনস্স, কপ্পিস্সন্তি চ পঞ্চকা। অনামন্তা অসমাচারা, তথেৰ গণভোজনং॥ যাৰদত্থঞ্চ উপ্পাদো, অত্থতানং ভৰিস্সতি। ঞত্তি এৰত্থতঞ্চেৰ, এৰঞ্চেৰ অনত্থতং॥ উল্লিখি ধোৰনা চেৰ, ৰিচারণঞ্চ ছেদনং। বন্ধনো ৰট্টি কণ্ডুস, দল়্হীকম্মানুৰাতিকা॥ পরিভণ্ডং ওৰদ্ধেয্যং, মদ্দনা নিমিত্তং কথা। কুক্কু সন্নিধি নিস্সগ্গি, ন কপ্পঞ্ঞত্র তে তযো॥ অঞ্ঞত্র পঞ্চাতিরেকে, সঞ্ছিন্নেন সমণ্ডলী। নাঞ্ঞত্র পুগ্গলা সম্মা, নিস্সীমট্ঠোনুমোদতি॥ কথিনানত্থতং হোতি, এৰং বুদ্ধেন দেসিতং। অহতাকপ্পপিলোতি, পংসু পাপণিকায চ॥ অনিমিত্তাপরিকথা, অকুক্কু চ অসন্নিধি। অনিস্সগ্গি কপ্পকতে, তথা তিচীৰরেন চ॥ পঞ্চকে ৰাতিরেকে ৰা, ছিন্নে সমণ্ডলীকতে। পুগ্গলস্সত্থারা সম্মা, সীমট্ঠো অনুমোদতি॥ এৰং কথিনত্থরণং, উব্ভারস্সট্ঠমাতিকা। পক্কমনন্তি নিট্ঠানং, সন্নিট্ঠানঞ্চ নাসনং॥ সৰনং আসাৰচ্ছেদি, সীমা সহুব্ভারট্ঠমী। কতচীৰরমাদায, ‘‘ন পচ্চেস্স’’ন্তি গচ্ছতি॥ তস্স তং কথিনুদ্ধারা,এ হোতি পক্কমনন্তিকো। আদায চীৰরং যাতি, নিস্সীমে ইদং চিন্তযি॥ ‘‘কারেস্সং ন পচ্চেস্স’’ন্তি, নিট্ঠানে কথিনুদ্ধারো। আদায নিস্সীমং নেৰ, ‘‘ন পচ্চেস্স’’ন্তি মানসো॥ তস্স তং কথিনুদ্ধারো, সন্নিট্ঠানন্তিকো ভৰে। আদায চীৰরং যাতি, নিস্সীমে ইদং চিন্তযি॥ ‘‘কারেস্সং ন পচ্চেস্স’’ন্তি, কযিরং তস্স নস্সতি। তস্স তং কথিনুদ্ধারো, ভৰতি নাসনন্তিকো॥ আদায যাতি ‘‘পচ্চেস্সং’’, বহি কারেতি চীৰরং। কতচীৰরো সুণাতি, উব্ভতং কথিনং তহিং॥ তস্স তং কথিনুদ্ধারো, ভৰতি সৰনন্তিকো। আদায যাতি ‘‘পচ্চেস্সং’’, বহি কারেতি চীৰরং॥ কতচীৰরো বহিদ্ধা, নামেতি কথিনুদ্ধারং। তস্স তং কথিনুদ্ধারো, সীমাতিক্কন্তিকো ভৰে॥ আদায যাতি ‘‘পচ্চেস্সং’’, বহি কারেতি চীৰরং। কতচীৰরো পচ্চেস্সং, সম্ভোতি কথিনুদ্ধারং॥ তস্স তং কথিনুদ্ধারো, সহ ভিক্খূহি জাযতি। আদায চ সমাদায, সত্ত-সত্তৰিধা গতি॥ পক্কমনন্তিকা নত্থি, ছক্কে ৰিপ্পকতে [ছট্ঠে ৰিপ্পকতা (সী॰), ছচ্চা ৰিপ্পকথা (ক॰)] গতি। আদায নিস্সীমগতং, কারেস্সং ইতি জাযতি॥ নিট্ঠানং সন্নিট্ঠানঞ্চ, নাসনঞ্চ ইমে তযো। আদায ‘‘ন পচ্চেস্স’’ন্তি, বহিসীমে করোমিতি॥ নিট্ঠানং সন্নিট্ঠানম্পি, নাসনম্পি ইদং তযো। অনধিট্ঠিতেন নেৰস্স, হেট্ঠা তীণি নযাৰিধি॥ আদায যাতি পচ্চেস্সং, বহিসীমে করোমিতি। ‘‘ন পচ্চেস্স’’ন্তি কারেতি, নিট্ঠানে কথিনুদ্ধারো॥ সন্নিট্ঠানং নাসনঞ্চ, সৰনসীমাতিক্কমা। সহ ভিক্খূহি জাযেথ, এৰং পন্নরসং গতি॥ সমাদায ৰিপ্পকতা, সমাদায পুনা তথা। ইমে তে চতুরো ৰারা, সব্বে পন্নরসৰিধি॥ অনাসায চ আসায, করণীযো চ তে তযো। নযতো তং ৰিজানেয্য, তযো দ্ৰাদস দ্ৰাদস॥ অপৰিলানা নৰেত্থ [অপৰিলাযমানেৰ (স্যা॰), অপৰিনা নৰ চেত্থ (সী॰)], ফাসু পঞ্চৰিধা তহিং। পলিবোধাপলিবোধা, উদ্দানং নযতো কতন্তি॥ ইমম্হি খন্ধকে ৰত্থূ দোল়সকপেয্যালমুখানি একসতং অট্ঠারস। কথিনক্খন্ধকো নিট্ঠিতো। |
Copyright © 2011 Bangladesh Buddhist. All rights reserved |