 |
দুতিযগাথাসঙ্গণিকং
১. কাযিকাদিআপত্তি ৪৭৪. কতি আপত্তিযো কাযিকা, কতি ৰাচসিকা কতা। ছাদেন্তস্স কতি আপত্তিযো, কতি সংসগ্গপচ্চযা॥ ছাপত্তিযো কাযিকা, ছ ৰাচসিকা কতা। ছাদেন্তস্স তিস্সো আপত্তিযো, পঞ্চ সংসগ্গপচ্চযা॥ অরুণুগ্গে কতি আপত্তিযো, কতি যাৰততিযকা। কতেত্থ অট্ঠ ৰত্থুকা, কতিহি সব্বসঙ্গহো॥ অরুণুগ্গে তিস্সো আপত্তিযো, দ্ৰে যাৰততিযকা। একেত্থ অট্ঠ ৰত্থুকা, একেন সব্বসঙ্গহো॥ ৰিনযস্স কতি মূলানি, যানি বুদ্ধেন পঞ্ঞত্তা। ৰিনযগরুকা কতি ৰুত্তা, দুট্ঠুল্লচ্ছাদনা কতি॥ ৰিনযস্স দ্ৰে মূলানি, যানি বুদ্ধেন পঞ্ঞত্তা। ৰিনযগরুকা দ্ৰে ৰুত্তা, দ্ৰে দুট্ঠুল্লচ্ছাদনা॥ গামন্তরে কতি আপত্তিযো, কতি নদিপারপচ্চযা। কতিমংসেসু থুল্লচ্চযং, কতিমংসেসু দুক্কটং॥ গামন্তরে চতস্সো আপত্তিযো, চতস্সো নদিপারপচ্চযা। একমংসে থুল্লচ্চযং, নৰমংসেসু দুক্কটং॥ কতি ৰাচসিকা রত্তিং, কতি ৰাচসিকা দিৰা। দদমানস্স কতি আপত্তিযো, পটিগ্গণ্হন্তস্স কিত্তকা॥ দ্ৰে ৰাচসিকা রত্তিং, দ্ৰে ৰাচসিকা দিৰা। দদমানস্স তিস্সো আপত্তিযো, চত্তারো চ পটিগ্গহে॥ ২. দেসনাগামিনিযাদিআপত্তি ৪৭৫. কতি দেসনাগামিনিযো, কতি সপ্পটিকম্মা কতা। কতেত্থ অপ্পটিকম্মা ৰুত্তা, বুদ্ধেনাদিচ্চবন্ধুনা॥ পঞ্চ দেসনাগামিনিযো, ছ সপ্পটিকম্মা কতা। একেত্থ অপ্পটিকম্মা ৰুত্তা, বুদ্ধেনাদিচ্চবন্ধুনা॥ ৰিনযগরুকা কতি ৰুত্তা, কাযৰাচসিকানি চ। কতি ৰিকালে ধঞ্ঞরসো, কতি ঞত্তিচতুত্থেন সম্মুতি॥ ৰিনযগরুকা দ্ৰে ৰুত্তা, কাযৰাচসিকানি চ। একো ৰিকালে ধঞ্ঞরসো, একা ঞত্তিচতুত্থেন সম্মুতি॥ পারাজিকা কাযিকা কতি, কতি সংৰাসকভূমিযো। কতিনং রত্তিচ্ছেদো, পঞ্ঞত্তা দ্ৰঙ্গুলা কতি॥ পারাজিকা কাযিকা দ্ৰে, দ্ৰে সংৰাসকভূমিযো। দ্ৰিন্নং রত্তিচ্ছেদো, পঞ্ঞত্তা দ্ৰঙ্গুলা দুৰে॥ কতত্তানং ৰধিত্ৰান, কতিহি সঙ্ঘো ভিজ্জতি। কতেত্থ পঠমাপত্তিকা, ঞত্তিযা করণা কতি॥ দ্ৰে অত্তানং ৰধিত্ৰান, দ্ৰীহি সঙ্ঘো ভিজ্জতি। দ্ৰেত্থ পঠমাপত্তিকা, ঞত্তিযা করণা দুৰে॥ পাণাতিপাতে কতি আপত্তিযো, ৰাচা পারাজিকা কতি। ওভাসনা কতি ৰুত্তা, সঞ্চরিত্তেন ৰা কতি॥ পাণাতিপাতে তিস্সো আপত্তিযো। ৰাচা পারাজিকা তযো। ওভাসনা তযো ৰুত্তা। সঞ্চরিত্তেন ৰা তযো॥ কতি পুগ্গলা ন উপসম্পাদেতব্বা, কতি কম্মানং সঙ্গহা। নাসিতকা কতি ৰুত্তা, কতিনং একৰাচিকা॥ তযো পুগ্গলা ন উপসম্পাদেতব্বা, তযো কম্মানং সঙ্গহা। নাসিতকা তযো ৰুত্তা, তিণ্ণন্নং একৰাচিকা॥ অদিন্নাদানে কতি আপত্তিযো, কতি মেথুনপচ্চযা। ছিন্দন্তস্স কতি আপত্তিযো, কতি ছড্ডিতপচ্চযা॥ অদিন্নাদানে তিস্সো আপত্তিযো, চতস্সো মেথুনপচ্চযা। ছিন্দন্তস্স তিস্সো আপত্তিযো, পঞ্চ ছড্ডিতপচ্চযা॥ ভিক্খুনোৰাদকৰগ্গস্মিং , পাচিত্তিযেন দুক্কটা। কতেত্থ নৰকা ৰুত্তা, কতিনং চীৰরেন চ॥ ভিক্খুনোৰাদকৰগ্গস্মিং , পাচিত্তিযেন দুক্কটা কতা। চতুরেত্থ নৰকা ৰুত্তা, দ্ৰিন্নং চীৰরেন চ॥ ভিক্খুনীনঞ্চ অক্খাতা, পাটিদেসনিযা কতি। ভুঞ্জন্তামকধঞ্ঞেন, পাচিত্তিযেন দুক্কটা কতি॥ ভিক্খুনীনঞ্চ অক্খাতা, অট্ঠ পাটিদেসনীযা কতা। ভুঞ্জন্তামকধঞ্ঞেন, পাচিত্তিযেন দুক্কটা কতা॥ গচ্ছন্তস্স কতি আপত্তিযো, ঠিতস্স চাপি কিত্তকা। নিসিন্নস্স কতি আপত্তিযো, নিপন্নস্সাপি কিত্তকা॥ গচ্ছন্তস্স চতস্সো আপত্তিযো, ঠিতস্স চাপি তত্তকা। নিসিন্নস্স চতস্সো আপত্তিযো, নিপন্নস্সাপি তত্তকা॥ ৩. পাচিত্তিযং ৪৭৬. কতি পাচিত্তিযানি, সব্বানি নানাৰত্থুকানি। অপুব্বং অচরিমং, আপজ্জেয্য একতো॥ পঞ্চ পাচিত্তিযানি, সব্বানি নানাৰত্থুকানি। অপুব্বং অচরিমং, আপজ্জেয্য একতো॥ কতি পাচিত্তিযানি, সব্বানি নানাৰত্থুকানি। অপুব্বং অচরিমং, আপজ্জেয্য একতো॥ ন পাচিত্তিযানি, সব্বানি নানাৰত্থুকানি। অপুব্বং অচরিমং, আপজ্জেয্য একতো॥ কতি পাচিত্তিযানি, সব্বানি নানাৰত্থুকানি। কতি ৰাচায দেসেয্য, ৰুত্তা আদিচ্চবন্ধুনা॥ পঞ্চ পাচিত্তিযানি, সব্বানি নানাৰত্থুকানি। একৰাচায দেসেয্য, ৰুত্তা আদিচ্চবন্ধুনা॥ কতি পাচিত্তিযানি, সব্বানি নানাৰত্থুকানি। কতি ৰাচায দেসেয্য, ৰুত্তা আদিচ্চবন্ধুনা॥ নৰ পাচিত্তিযানি, সব্বানি নানাৰত্থুকানি। একৰাচায দেসেয্য, ৰুত্তা আদিচ্চবন্ধুনা॥ কতি পাচিত্তিযানি, সব্বানি নানাৰত্থুকানি। কিঞ্চ কিত্তেত্ৰা দেসেয্য, ৰুত্তা আদিচ্চবন্ধুনা॥ পঞ্চ পাচিত্তিযানি, সব্বানি নানাৰত্থুকানি। ৰত্থুং কিত্তেত্ৰা দেসেয্য, ৰুত্তা আদিচ্চবন্ধুনা॥ কতি পাচিত্তিযানি, সব্বানি নানাৰত্থুকানি। কিঞ্চ কিত্তেত্ৰা দেসেয্য, ৰুত্তা আদিচ্চবন্ধুনা॥ নৰ পাচিত্তিযানি, সব্বানি নানাৰত্থুকানি। ৰত্থুং কিত্তেত্ৰা দেসেয্য, ৰুত্তা আদিচ্চবন্ধুনা॥ যাৰততিযকে কতি আপত্তিযো, কতি ৰোহারপচ্চযা। খাদন্তস্স কতি আপত্তিযো, কতি ভোজনপচ্চযা॥ যাৰততিযকে তিস্সো আপত্তিযো, ছ ৰোহারপচ্চযা। খাদন্তস্স তিস্সো আপত্তিযো, পঞ্চ ভোজনপচ্চযা॥ সব্বা যাৰততিযকা, কতি ঠানানি গচ্ছন্তি। কতিনঞ্চেৰ আপত্তি, কতিনং অধিকরণেন চ॥ সব্বা যাৰততিযকা, পঞ্চ ঠানানি গচ্ছন্তি। পঞ্চন্নঞ্চেৰ আপত্তি, পঞ্চন্নং অধিকরণেন চ॥ কতিনং ৰিনিচ্ছযো হোতি, কতিনং ৰূপসমেন চ। কতিনঞ্চেৰ অনাপত্তি, কতিহি ঠানেহি সোভতি॥ পঞ্চন্নং ৰিনিচ্ছযো হোতি, পঞ্চন্নং ৰূপসমেন চ। পঞ্চন্নঞ্চেৰ অনাপত্তি, তীহি ঠানেহি সোভতি॥ কতি কাযিকা রত্তিং, কতি কাযিকা দিৰা। নিজ্ঝাযন্তস্স কতি আপত্তি, কতি পিণ্ডপাতপচ্চযা॥ দ্ৰে কাযিকা রত্তিং, দ্ৰে কাযিকা দিৰা। নিজ্ঝাযন্তস্স একা আপত্তি, একা পিণ্ডপাতপচ্চযা॥ কতানিসংসে সম্পস্সং, পরেসং সদ্ধায দেসযে। উক্খিত্তকা কতি ৰুত্তা, কতি সম্মাৰত্তনা॥ অট্ঠানিসংসে সম্পস্সং, পরেসং সদ্ধায দেসযে। উক্খিত্তকা তযো ৰুত্তা, তেচত্তালীস সম্মাৰত্তনা॥ কতি ঠানে মুসাৰাদো, কতি পরমন্তি ৰুচ্চতি। কতি পাটিদেসনীযা, কতিনং দেসনায চ॥ পঞ্চ ঠানে মুসাৰাদো, চুদ্দস পরমন্তি ৰুচ্চতি। দ্ৰাদস পাটিদেসনীযা, চতুন্নং দেসনায চ॥ কতঙ্গিকো মুসাৰাদো, কতি উপোসথঙ্গানি। কতি দূতেয্যঙ্গানি, কতি তিত্থিযৰত্তনা॥ অট্ঠঙ্গিকো মুসাৰাদো, অট্ঠ উপোসথঙ্গানি। অট্ঠ দূতেয্যঙ্গানি, অট্ঠ তিত্থিযৰত্তনা॥ কতিৰাচিকা উপসম্পদা, কতিনং পচ্চুট্ঠাতব্বং। কতিনং আসনং দাতব্বং, ভিক্খুনোৰাদকো কতিহি॥ অট্ঠৰাচিকা উপসম্পদা, অট্ঠন্নং পচ্চুট্ঠাতব্বং। অট্ঠন্নং আসনং দাতব্বং, ভিক্খুনোৰাদকো অট্ঠহি॥ কতিনং ছেজ্জং হোতি, কতিনং থুল্লচ্চযং। কতিনঞ্চেৰ অনাপত্তি, সব্বেসং একৰত্থুকা॥ একস্স ছেজ্জং হোতি, চতুন্নং থুল্লচ্চযং। চতুন্নঞ্চেৰ অনাপত্তি, সব্বেসং একৰত্থুকা॥ কতি আঘাতৰত্থূনি, কতিহি সঙ্ঘো ভিজ্জতি। কতেত্থ পঠমাপত্তিকা, ঞত্তিযা করণা কতি॥ নৰ আঘাতৰত্থূনি, নৰহি সঙ্ঘো ভিজ্জতি। নৰেত্থ পঠমাপত্তিকা, ঞত্তিযা করণা নৰ॥ ৪. অৰন্দনীযপুগ্গলাদি ৪৭৭. কতি পুগ্গলা নাভিৰাদেতব্বা, অঞ্জলিসামিচেন চ। কতিনং দুক্কটং হোতি, কতি চীৰরধারণা॥ দস পুগ্গলা নাভিৰাদেতব্বা, অঞ্জলিসামিচেন চ। দসন্নং দুক্কটং হোতি, দস চীৰরধারণা॥ কতিনং ৰস্সংৰুট্ঠানং, দাতব্বং ইধ চীৰরং। কতিনং ভন্তে দাতব্বং, কতিনঞ্চেৰ ন দাতব্বং॥ পঞ্চন্নং ৰস্সংৰুট্ঠানং, দাতব্বং ইধ চীৰরং। সত্তন্নং সন্তে দাতব্বং, সোল়সন্নং ন দাতব্বং॥ কতিসতং রত্তিসতং, আপত্তিযো ছাদযিত্ৰান। কতি রত্তিযো ৰসিত্ৰান, মুচ্চেয্য পারিৰাসিকো॥ দসসতং রত্তিসতং, আপত্তিযো ছাদযিত্ৰান। দস রত্তিযো ৰসিত্ৰান, মুচ্চেয্য পারিৰাসিকো॥ কতি কম্মদোসা ৰুত্তা, বুদ্ধেনাদিচ্চবন্ধুনা। চম্পাযং ৰিনযৰত্থুস্মিং, সব্বেৰ অধম্মিকা [সব্বে অধম্মিকা (সী॰ স্যা॰)] কতি॥ দ্ৰাদস কম্মদোসা ৰুত্তা, বুদ্ধেনাদিচ্চবন্ধুনা। চম্পাযং ৰিনযৰত্থুস্মিং, সব্বেৰ অধম্মিকা [সব্বেৰাধম্মিকা (সী॰), সব্বে অধম্মিকা (স্যা॰)] কতা॥ কতি কম্মসম্পত্তিযো ৰুত্তা, বুদ্ধেনাদিচ্চবন্ধুনা। চম্পাযং ৰিনযৰত্থুস্মিং, সব্বেৰ ধম্মিকা কতি॥ চতস্সো কম্মসম্পত্তিযো ৰুত্তা, বুদ্ধেনাদিচ্চবন্ধুনা। চম্পাযং ৰিনযৰত্থুস্মিং, সব্বেৰ ধম্মিকা কতা॥ কতি কম্মানি ৰুত্তানি, বুদ্ধেনাদিচ্চবন্ধুনা। চম্পাযং ৰিনযৰত্থুস্মিং, ধম্মিকা অধম্মিকা কতি॥ ছ কম্মানি ৰুত্তানি, বুদ্ধেনাদিচ্চবন্ধুনা। চম্পাযং ৰিনযৰত্থুস্মিং, একেত্থ ধম্মিকা কতা। পঞ্চ অধম্মিকা ৰুত্তা, বুদ্ধেনাদিচ্চবন্ধুনা॥ কতি কম্মানি ৰুত্তানি, বুদ্ধেনাদিচ্চবন্ধুনা। চম্পাযং ৰিনযৰত্থুস্মিং, ধম্মিকা অধম্মিকা কতি॥ চত্তারি কম্মানি ৰুত্তানি, বুদ্ধেনাদিচ্চবন্ধুনা। চম্পাযং ৰিনযৰত্থুস্মিং, একেত্থ ধম্মিকা কতা। তযো অধম্মিকা ৰুত্তা, বুদ্ধেনাদিচ্চবন্ধুনা॥ যং দেসিতংনন্তজিনেন তাদিনা। আপত্তিক্খন্ধানি ৰিৰেকদস্সিনা। কতেত্থ সম্মন্তি ৰিনা সমথেহি। পুচ্ছামি তং ব্রূহি ৰিভঙ্গকোৰিদ॥ যং দেসিতংনন্তজিনেন তাদিনা। আপত্তিক্খন্ধানি ৰিৰেকদস্সিনা। একেত্থ সম্মতি ৰিনা সমথেহি। এতং তে অক্খামি ৰিভঙ্গকোৰিদ॥ কতি আপাযিকা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি [ৰিসযানি (সী॰ স্যা॰ এৰমুপরিপি)] সুণোম তে॥ ছঊনদিযড্ঢসতা ৰুত্তা, বুদ্ধেনাদিচ্চবন্ধুনা। আপাযিকা নেরযিকা, কপ্পট্ঠা সঙ্ঘভেদকা। ৰিনযং পটিজানন্তস্স, ৰিনযানি সুণোহি মে॥ কতি নাপাযিকা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ অট্ঠারস নাপাযিকা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ কতি অট্ঠকা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ অট্ঠারস অট্ঠকা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ ৫. সোল়সকম্মাদি ৪৭৮. কতি কম্মানি ৰুত্তানি, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ সোল়স কম্মানি ৰুত্তানি, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ কতি কম্মদোসা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ দ্ৰাদস কম্মদোসা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ কতি কম্মসম্পত্তিযো ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ চতস্সো কম্মসম্পত্তিযো ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ কতি কম্মানি ৰুত্তানি, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ ছ কম্মানি ৰুত্তানি, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ কতি কম্মানি ৰুত্তানি, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ চত্তারি কম্মানি ৰুত্তানি, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ কতি পারাজিকা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ অট্ঠ পারাজিকা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ কতি সঙ্ঘাদিসেসা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ তেৰীস সঙ্ঘাদিসেসা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ কতি অনিযতা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ দ্ৰে অনিযতা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ কতি নিস্সগ্গিযা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ দ্ৰেচত্তালীস নিস্সগ্গিযা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ কতি পাচিত্তিযা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ অট্ঠাসীতিসতং পাচিত্তিযা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ কতি পাটিদেসনীযা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ দ্ৰাদস পাটিদেসনীযা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ কতি সেখিযা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোম তে॥ পঞ্চসত্ততি সেখিযা ৰুত্তা, বুদ্ধেনাদিচ্চবন্ধুনা। ৰিনযং পটিজানন্তস্স, ৰিনযানি সুণোহি মে॥ যাৰ সুপুচ্ছিতং তযা, যাৰ সুৰিস্সজ্জিতং মযা। পুচ্ছাৰিস্সজ্জনায ৰা, নত্থি কিঞ্চি অসুত্তকন্তি॥ দুতিযগাথাসঙ্গণিকং নিট্ঠিতং। |
Copyright © 2011 Bangladesh Buddhist. All rights reserved |
