চোদনাকণ্ডং
১. অনুৰিজ্জকঅনুযোগো ৩৬০. অনুৰিজ্জকে চোদকো পুচ্ছিতব্বো – ‘‘যং খো ত্ৰং, আৰুসো, ইমং ভিক্খুং চোদেসি, কিম্হি নং চোদেসি, সীলৰিপত্তিযা ৰা চোদেসি, আচারৰিপত্তিযা ৰা চোদেসি, দিট্ঠিৰিপত্তিযা ৰা চোদেসী’’তি? সো চে এৰং ৰদেয্য – ‘‘সীলৰিপত্তিযা ৰা চোদেমি, আচারৰিপত্তিযা ৰা চোদেমি, দিট্ঠিৰিপত্তিযা ৰা চোদেমী’’তি, সো এৰমস্স ৰচনীযো – ‘‘জানাসি পনাযস্মা সীলৰিপত্তিং, জানাসি আচারৰিপত্তিং, জানাসি দিট্ঠিৰিপত্তি’’ন্তি? সো চে এৰং ৰদেয্য – ‘‘জানামি খো অহং, আৰুসো, সীলৰিপত্তিং, জানামি আচারৰিপত্তিং, জানামি দিট্ঠিৰিপত্তি’’ন্তি, সো এৰমস্স ৰচনীযো – ‘‘কতমা পনাৰুসো, সীলৰিপত্তি? কতমা আচারৰিপত্তি? কতমা দিট্ঠিৰিপত্তী’’তি? সো চে এৰং ৰদেয্য – ‘‘চত্তারি চ পারাজিকানি, তেরস চ সঙ্ঘাদিসেসা – অযং সীলৰিপত্তি। থুল্লচ্চযং, পাচিত্তিযং, পাটিদেসনীযং, দুক্কটং, দুব্ভাসিতং, অযং আচারৰিপত্তি। মিচ্ছাদিট্ঠি, অন্তগ্গাহিকা দিট্ঠি – অযং দিট্ঠিৰিপত্তী’’তি, সো এৰমস্স ৰচনীযো – ‘‘যং খো ত্ৰং, আৰুসো, ইমং ভিক্খুং চোদেসি, দিট্ঠেন ৰা চোদেসি সুতেন ৰা চোদেসি পরিসঙ্কায ৰা চোদেসী’’তি? সো চে এৰং ৰদেয্য – ‘‘দিট্ঠেন ৰা চোদেমি সুতেন ৰা চোদেমি পরিসঙ্কায ৰা চোদেমী’’তি, সো এৰমস্স ৰচনীযো – ‘‘যং খো ত্ৰং, আৰুসো, ইমং ভিক্খুং দিট্ঠেন চোদেসি, কিং তে দিট্ঠং কিন্তি তে দিট্ঠং, কদা তে দিট্ঠং, কত্থ তে দিট্ঠং পারাজিকং অজ্ঝাপজ্জন্তো দিট্ঠো, সঙ্ঘাদিসেসং অজ্ঝাপজ্জন্তো দিট্ঠো, থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপজ্জন্তো দিট্ঠো, কত্থ চ ত্ৰং অহোসি, কত্থ চাযং ভিক্খু অহোসি, কিঞ্চ ত্ৰং করোসি, কিং চাযং ভিক্খু করোতী’’তি? সো চে এৰং ৰদেয্য – ‘‘ন খো অহং, আৰুসো, ইমং ভিক্খুং দিট্ঠেন চোদেমি, অপি চ সুতেন চোদেমী’’তি, সো এৰমস্স ৰচনীযো – ‘‘যং খো ত্ৰং, আৰুসো, ইমং ভিক্খুং সুতেন চোদেসি, কিং তে সুতং, কিন্তি তে সুতং, কদা তে সুতং , কত্থ তে সুতং, পারাজিকং অজ্ঝাপন্নোতি সুতং, সঙ্ঘাদিসেসং… থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপন্নোতি সুতং, ভিক্খুস্স সুতং, ভিক্খুনিযা সুতং, সিক্খমানায সুতং , সামণেরস্স সুতং, সামণেরিযা সুতং, উপাসকস্স সুতং, উপাসিকায সুতং, রাজূনং সুতং, রাজমহামত্তানং সুতং, তিত্থিযানং সুতং, তিত্থিযসাৰকানং সুত’’ন্তি? সো চে এৰং ৰদেয্য – ‘‘ন খো অহং, আৰুসো, ইমং ভিক্খুং সুতেন চোদেমি, অপি চ পরিসঙ্কায চোদেমী’’তি, সো এৰমস্স ৰচনীযো – ‘‘যং খো ত্ৰং, আৰুসো, ইমং ভিক্খুং পরিসঙ্কায চোদেসি, কিং পরিসঙ্কসি, কিন্তি পরিসঙ্কসি, কদা পরিসঙ্কসি, কত্থ পরিসঙ্কসি, পারাজিকং অজ্ঝাপন্নোতি পরিসঙ্কসি, সঙ্ঘাদিসেসং অজ্ঝাপন্নোতি পরিসঙ্কসি, থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপন্নোতি পরিসঙ্কসি, ভিক্খুস্স সুত্ৰা পরিসঙ্কসি, ভিক্খুনিযা সুত্ৰা পরিসঙ্কসি, সিক্খমানায সুত্ৰা পরিসঙ্কসি, সামণেরস্স সুত্ৰা পরিসঙ্কসি, সামণেরিযা সুত্ৰা পরিসঙ্কসি, উপাসকস্স সুত্ৰা পরিসঙ্কসি, উপাসিকায সুত্ৰা পরিসঙ্কসি, রাজূনং সুত্ৰা পরিসঙ্কসি, রাজমহামত্তানং সুত্ৰা পরিসঙ্কসি, তিত্থিযানং সুত্ৰা পরিসঙ্কসি, তিত্থিযসাৰকানং সুত্ৰা পরিসঙ্কসী’’তি? ৩৬১. দিট্ঠং দিট্ঠেন সমেতি দিট্ঠেন সংসন্দতে দিট্ঠং। দিট্ঠং পটিচ্চ ন উপেতি অসুদ্ধপরিসঙ্কিতো। সো পুগ্গলো পটিঞ্ঞায কাতব্বো তেনুপোসথো॥ সুতং সুতেন সমেতি সুতেন সংসন্দতে সুতং। সুতং পটিচ্চ ন উপেতি অসুদ্ধপরিসঙ্কিতো। সো পুগ্গলো পটিঞ্ঞায কাতব্বো তেনুপোসথো॥ মুতং মুতেন সমেতি মুতেন সংসন্দতে মুতং। মুতং পটিচ্চ ন উপেতি অসুদ্ধপরিসঙ্কিতো। সো পুগ্গলো পটিঞ্ঞায কাতব্বো তেনুপোসথো॥ ৩৬২. চোদনায কো আদি, কিং মজ্ঝে, কিং পরিযোসানং? চোদনায ওকাসকম্মং আদি, কিরিযা মজ্ঝে, সমথো পরিযোসানং। চোদনায কতি মূলানি, কতি ৰত্থূনি, কতি ভূমিযো, কতিহাকারেহি চোদেতি? চোদনায দ্ৰে মূলানি, তীণি ৰত্থূনি, পঞ্চ ভূমিযো, দ্ৰীহাকারেহি চোদেতি। চোদনায কতমানি দ্ৰে মূলানি? সমূলিকা ৰা অমূলিকা ৰা – চোদনায ইমানি দ্ৰে মূলানি। চোদনায কতমানি তীণি ৰত্থূনি? দিট্ঠেন সুতেন পরিসঙ্কায – চোদনায ইমানি তীণি ৰত্থূনি। চোদনা কতমা পঞ্চ ভূমিযো? কালেন ৰক্খামি নো অকালেন, ভূতেন ৰক্খামি নো অভূতেন, সণ্হেন ৰক্খামি নো ফরুসেন, অত্থসংহিতেন ৰক্খামি নো অনত্থসংহিতেন, মেত্তাচিত্তো ৰক্খামি নো দোসন্তরোতি – চোদনায ইমা পঞ্চ ভূমিযো। কতমেহি দ্ৰীহাকারেহি চোদেতি? কাযেন ৰা চোদেতি ৰাচায ৰা চোদেতি – ইমেহি দ্ৰীহাকারেহি চোদেতি। ২. চোদকাদিপটিপত্তি ৩৬৩. চোদকেন কথং পটিপজ্জিতব্বং? চুদিতকেন কথং পটিপজ্জিতব্বং? সঙ্ঘেন কথং পটিপজ্জিতব্বং? অনুৰিজ্জকেন কথং পটিপজ্জিতব্বং? চোদকেন কথং পটিপজ্জিতব্বন্তি? চোদকেন পঞ্চসু ধম্মেসু পতিট্ঠায পরো চোদেতব্বো। কালেন ৰক্খামি নো অকালেন, ভূতেন ৰক্খামি নো অভূতেন, সণ্হেন ৰক্খামি নো ফরুসেন, অত্থসংহিতেন ৰক্খামি নো অনত্থসংহিতেন, মেত্তাচিত্তো ৰক্খামি নো দোসন্তরোতি – চোদকেন এৰং পটিপজ্জিতব্বং। চুদিতকেন কথং পটিপজ্জিতব্বন্তি? চুদিতকেন দ্ৰীসু ধম্মেসু পটিপজ্জিতব্বং। সচ্চে চ অকুপ্পে চ – চুদিতকেন এৰং পটিপজ্জিতব্বং। সঙ্ঘেন কথং পটিপজ্জিতব্বন্তি? সঙ্ঘেন ওতিণ্ণানোতিণ্ণং জানিতব্বং। সঙ্ঘেন এৰং পটিপজ্জিতব্বং। অনুৰিজ্জকেন কথং পটিপজ্জিতব্বন্তি? অনুৰিজ্জকেন যেন ধম্মেন যেন ৰিনযেন যেন সত্থুসাসনেন তং অধিকরণং ৰূপসম্মতি তথা তং অধিকরণং ৰূপসমেতব্বং। অনুৰিজ্জকেন এৰং পটিপজ্জিতব্বং। ৩৬৪. উপোসথো কিমত্থায, পৰারণা কিস্স কারণা। পরিৰাসো কিমত্থায, মূলাযপটিকস্সনা কিস্স কারণা। মানত্তং কিমত্থায, অব্ভানং কিস্স কারণা॥ উপোসথো সামগ্গত্থায, ৰিসুদ্ধত্থায পৰারণা। পরিৰাসো মানত্তত্থায, মূলাযপটিকস্সনা নিগ্গহত্থায। মানত্তং অব্ভানত্থায, ৰিসুদ্ধত্থায অব্ভানং॥ ছন্দা দোসা ভযা মোহা, থেরে চ পরিভাসতি। কাযস্স ভেদা দুপ্পঞ্ঞো, খতো উপহতিন্দ্রিযো। নিরযং গচ্ছতি দুম্মেধো, ন চ সিক্খায গারৰো॥ ন চ আমিসং নিস্সায। ন চ নিস্সায পুগ্গলং। উভো এতে ৰিৰজ্জেত্ৰা। যথাধম্মো তথা করে॥ ৩. চোদকস্সঅত্তঝাপনং কোধনো উপনাহী চ। চণ্ডো চ পরিভাসকো। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানং॥ উপকণ্ণকং জপ্পতি জিম্হং পেক্খতি। ৰীতিহরতি কুম্মগ্গং পটিসেৰতি। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানং॥ অকালেন চোদেতি অভূতেন। ফরুসেন অনত্থসংহিতেন। দোসন্তরো চোদেতি নো মেত্তাচিত্তো। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানং॥ ধম্মাধম্মং ন জানাতি। ধম্মাধম্মস্স অকোৰিদো। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানং॥ ৰিনযাৰিনযং ন জানাতি। ৰিনযাৰিনযস্স অকোৰিদো। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানং॥ ভাসিতাভাসিতং ন জানাতি। ভাসিতাভাসিতস্স অকোৰিদো। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানং॥ আচিণ্ণানাচিণ্ণং ন জানাতি। আচিণ্ণানাচিণ্ণস্স অকোৰিদো। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানং॥ পঞ্ঞত্তাপঞ্ঞত্তং ন জানাতি। পঞ্ঞত্তাপঞ্ঞত্তস্স অকোৰিদো। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানং॥ আপত্তানাপত্তিং ন জানাতি। আপত্তানাপত্তিযা অকোৰিদো। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানং॥ লহুকগরুকং ন জানাতি। লহুকগরুকস্স অকোৰিদো। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানং॥ সাৰসেসানৰসেসং ন জানাতি। সাৰসেসানৰসেসস্স অকোৰিদো। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানং॥ দুট্ঠুল্লাদুট্ঠুল্লং ন জানাতি। দুট্ঠুল্লাদুট্ঠুল্লস্স অকোৰিদো। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানং॥ পুব্বাপরং ন জানাতি। পুব্বাপরস্স অকোৰিদো। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানং॥ অনুসন্ধিৰচনপথং ন জানাতি। অনুসন্ধিৰচনপথস্স অকোৰিদো। অনাপত্তিযা আপত্তীতি রোপেতি। তাদিসো চোদকো ঝাপেতি অত্তানন্তি॥ চোদনাকণ্ডং নিট্ঠিতং। তস্সুদ্দানং – চোদনা অনুৰিজ্জা চ, আদি মূলেনুপোসথো। গতি চোদনকণ্ডম্হি, সাসনং পতিট্ঠাপযন্তি॥ |
Copyright © 2011 Bangladesh Buddhist. All rights reserved |