৩. ৰস্সূপনাযিকক্খন্ধকো
১০৭. ৰস্সূপনাযিকানুজাননা ১৮৪. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে। তেন খো পন সমযেন ভগৰতা ভিক্খূনং ৰস্সাৰাসো অপঞ্ঞত্তো হোতি। তেইধ ভিক্খূ হেমন্তম্পি গিম্হম্পি ৰস্সম্পি চারিকং চরন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা হেমন্তম্পি গিম্হম্পি ৰস্সম্পি চারিকং চরিস্সন্তি, হরিতানি তিণানি সম্মদ্দন্তা, একিন্দ্রিযং জীৰং ৰিহেঠেন্তা, বহূ খুদ্দকে পাণে সঙ্ঘাতং আপাদেন্তা। ইমে হি নাম অঞ্ঞতিত্থিযা দুরক্খাতধম্মা ৰস্সাৰাসং অল্লীযিস্সন্তি সঙ্কসাযিস্সন্তি। ইমে হি নাম সকুন্তকা রুক্খগ্গেসু কুলাৰকানি করিত্ৰা ৰস্সাৰাসং অল্লীযিস্সন্তি সঙ্কসাযিস্সন্তি [সঙ্কাসযিস্সন্তি (সী॰ স্যা॰)]। ইমে পন সমণা সক্যপুত্তিযা হেমন্তম্পি গিম্হম্পি ৰস্সম্পি চারিকং চরন্তি, হরিতানি তিণানি সম্মদ্দন্তা, একিন্দ্রিযং জীৰং ৰিহেঠেন্তা, বহূ খুদ্দকে পাণে সঙ্ঘাতং আপাদেন্তা’’তি। অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, ৰস্সং উপগন্তু’’ন্তি। অথ খো ভিক্খূনং এতদহোসি – ‘‘কদা নু খো ৰস্সং উপগন্তব্ব’’ন্তি? ভগৰতো এতমত্থং আরোচেসুং। অনুজানামি, ভিক্খৰে, ৰস্সানে ৰস্সং উপগন্তুন্তি। অথ খো ভিক্খূনং এতদহোসি – ‘‘কতি নু খো ৰস্সূপনাযিকা’’তি? ভগৰতো এতমত্থং আরোচেসুং। দ্ৰেমা, ভিক্খৰে, ৰস্সূপনাযিকা – পুরিমিকা, পচ্ছিমিকা। অপরজ্জুগতায আসাল়্হিযা পুরিমিকা উপগন্তব্বা, মাসগতায আসাল়্হিযা পচ্ছিমিকা উপগন্তব্বা – ইমা খো, ভিক্খৰে, দ্ৰে ৰস্সূপনাযিকাতি। ৰস্সূপনাযিকানুজাননা নিট্ঠিতা। ১০৮. ৰস্সানে চারিকাপটিক্খেপাদি ১৮৫. তেন খো পন সমযেন ছব্বগ্গিযা ভিক্খূ ৰস্সং উপগন্ত্ৰা অন্তরাৰস্সং চারিকং চরন্তি। মনুস্সা তথেৰ উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা হেমন্তম্পি গিম্হম্পি ৰস্সম্পি চারিকং চরিস্সন্তি, হরিতানি তিণানি সম্মদ্দন্তা, একিন্দ্রিযং জীৰং ৰিহেঠেন্তা, বহূ খুদ্দকে পাণে সঙ্ঘাতং আপাদেন্তা। ইমে হি নাম অঞ্ঞতিত্থিযা দুরক্খাতধম্মা ৰস্সাৰাসং অল্লীযিস্সন্তি সঙ্কসাযিস্সন্তি। ইমে হি নাম সকুন্তকা রুক্খগ্গেসু কুলাৰকানি করিত্ৰা ৰস্সাৰাসং অল্লীযিস্সন্তি সঙ্কসাযিস্সন্তি। ইমে পন সমণা সক্যপুত্তিযা হেমন্তম্পি গিম্হম্পি ৰস্সম্পি চারিকং চরন্তি, হরিতানি তিণানি সম্মদ্দন্তা, একিন্দ্রিযং জীৰং ৰিহেঠেন্তা, বহূ খুদ্দকে পাণে সঙ্ঘাতং আপাদেন্তা’’তি। অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ ৰস্সং উপগন্ত্ৰা অন্তরাৰস্সং চারিকং চরিস্সন্তী’’তি? অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘ন, ভিক্খৰে, ৰস্সং উপগন্ত্ৰা পুরিমং ৰা তেমাসং পচ্ছিমং ৰা তেমাসং অৰসিত্ৰা চারিকা পক্কমিতব্বা। যো পক্কমেয্য, আপত্তি দুক্কটস্সা’’তি। ১৮৬. তেন খো পন সমযেন ছব্বগ্গিযা ভিক্খূ ন ইচ্ছন্তি ৰস্সং উপগন্তুং। ভগৰতো এতমত্থং আরোচেসুং। ন, ভিক্খৰে, ৰস্সং ন উপগন্তব্বং। যো ন উপগচ্ছেয্য, আপত্তি দুক্কটস্সাতি। তেন খো পন সমযেন ছব্বগ্গিযা ভিক্খূ তদহু ৰস্সূপনাযিকায ৰস্সং অনুপগন্তুকামা সঞ্চিচ্চ আৰাসং অতিক্কমন্তি। ভগৰতো এতমত্থং আরোচেসুং। ন, ভিক্খৰে, তদহু ৰস্সূপনাযিকায ৰস্সং অনুপগন্তুকামেন সঞ্চিচ্চ আৰাসো অতিক্কমিতব্বো। যো অতিক্কমেয্য, আপত্তি দুক্কটস্সাতি। তেন খো পন সমযেন রাজা মাগধো সেনিযো বিম্বিসারো ৰস্সং উক্কড্ঢিতুকামো ভিক্খূনং সন্তিকে দূতং পাহেসি – যদি পনায্যা আগমে জুণ্হে ৰস্সং উপগচ্ছেয্যুন্তি। ভগৰতো এতমত্থং আরোচেসুং। অনুজানামি, ভিক্খৰে, রাজূনং অনুৰত্তিতুন্তি। ৰস্সানে চারিকাপটিক্খেপাদি নিট্ঠিতা। ১০৯. সত্তাহকরণীযানুজাননা ১৮৭. অথ খো ভগৰা রাজগহে যথাভিরন্তং ৰিহরিত্ৰা যেন সাৰত্থি তেন চারিকং পক্কামি। অনুপুব্বেন চারিকং চরমানো যেন সাৰত্থি তদৰসরি। তত্র সুদং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন কোসলেসু জনপদে উদেনেন উপাসকেন সঙ্ঘং উদ্দিস্স ৰিহারো কারাপিতো হোতি। সো ভিক্খূনং সন্তিকে দূতং পাহেসি – ‘‘আগচ্ছন্তু ভদন্তা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি। ভিক্খূ এৰমাহংসু – ‘‘ভগৰতা, আৰুসো, পঞ্ঞত্তং ‘ন ৰস্সং উপগন্ত্ৰা পুরিমং ৰা তেমাসং পচ্ছিমং ৰা তেমাসং অৰসিত্ৰা চারিকা পক্কমিতব্বা’তি। আগমেতু উদেনো উপাসকো, যাৰ ভিক্খূ ৰস্সং ৰসন্তি। ৰস্সংৰুট্ঠা আগমিস্সন্তি। সচে পনস্স অচ্চাযিকং করণীযং, তত্থেৰ আৰাসিকানং ভিক্খূনং সন্তিকে ৰিহারং পতিট্ঠাপেতূ’’তি। উদেনো উপাসকো উজ্ঝাযতি খিয্যতি ৰিপাচেতি – ‘‘কথঞ্হি নাম ভদন্তা মযা পহিতে ন আগচ্ছিস্সন্তি। অহঞ্হি দাযকো কারকো সঙ্ঘুপট্ঠাকো’’তি। অস্সোসুং খো ভিক্খূ উদেনস্স উপাসকস্স উজ্ঝাযন্তস্স খিয্যন্তস্স ৰিপাচেন্তস্স। অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, সত্তন্নং সত্তাহকরণীযেন পহিতে গন্তুং, ন ত্ৰেৰ অপ্পহিতে। ভিক্খুস্স, ভিক্খুনিযা, সিক্খমানায, সামণেরস্স, সামণেরিযা, উপাসকস্স, উপাসিকায – অনুজানামি, ভিক্খৰে, ইমেসং সত্তন্নং সত্তাহকরণীযেন পহিতে গন্তুং, ন ত্ৰেৰ অপ্পহিতে। সত্তাহং সন্নিৰত্তো কাতব্বো’’। ১৮৮. ইধ পন, ভিক্খৰে, উপাসকেন সঙ্ঘং উদ্দিস্স ৰিহারো কারাপিতো হোতি। সো চে ভিক্খূনং সন্তিকে দূতং পহিণেয্য – ‘‘আগচ্ছন্তু ভদন্তা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো। ইধ পন, ভিক্খৰে, উপাসকেন সঙ্ঘং উদ্দিস্স অড্ঢযোগো কারাপিতো হোতি…পে॰… পাসাদো কারাপিতো হোতি… হম্মিযং কারাপিতং হোতি… গুহা কারাপিতা হোতি… পরিৰেণং কারাপিতং হোতি… কোট্ঠকো কারাপিতো হোতি… উপট্ঠানসালা কারাপিতা হোতি… অগ্গিসালা কারাপিতা হোতি… কপ্পিযকুটি কারাপিতা হোতি… ৰচ্চকুটি কারাপিতা হোতি… চঙ্কমো কারাপিতো হোতি … চঙ্কমনসালা কারাপিতা হোতি… উদপানো কারাপিতো হোতি… উদপানসালা কারাপিতা হোতি… জন্তাঘরং কারাপিতং হোতি… জন্তাঘরসালা কারাপিতা হোতি… পোক্খরণী কারাপিতা হোতি… মণ্ডপো কারাপিতো হোতি… আরামো কারাপিতো হোতি… আরামৰত্থু কারাপিতং হোতি। সো চে ভিক্খূনং সন্তিকে দূতং পহিণেয্য – ‘‘আগচ্ছন্তু ভদন্তা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো। ইধ পন, ভিক্খৰে, উপাসকেন সম্বহুলে ভিক্খূ উদ্দিস্স…পে॰… একং ভিক্খুং উদ্দিস্স ৰিহারো কারাপিতো হোতি… অড্ঢযোগো কারাপিতো হোতি… পাসাদো কারাপিতো হোতি … হম্মিযং কারাপিতং হোতি… গুহা কারাপিতা হোতি… পরিৰেণং কারাপিতং হোতি… কোট্ঠকো কারাপিতো হোতি… উপট্ঠানসালা কারাপিতা হোতি… অগ্গিসালা কারাপিতা হোতি… কপ্পিযকুটি কারাপিতা হোতি… ৰচ্চকুটি কারাপিতা হোতি… চঙ্কমো কারাপিতো হোতি… চঙ্কমনসালা কারাপিতা হোতি… উদপানো কারাপিতো হোতি… উদপানসালা কারাপিতা হোতি… জন্তাঘরং কারাপিতং হোতি… জন্তাঘরসালা কারাপিতা হোতি… পোক্খরণী কারাপিতা হোতি… মণ্ডপো কারাপিতো হোতি… আরামো কারাপিতো হোতি… আরামৰত্থু কারাপিতং হোতি। সো চে ভিক্খূনং সন্তিকে দূতং পহিণেয্য – ‘‘আগচ্ছন্তু ভদন্তা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো। ইধ পন, ভিক্খৰে, উপাসকেন ভিক্খুনিসঙ্ঘং উদ্দিস্স…পে॰… সম্বহুলা ভিক্খুনিযো উদ্দিস্স…পে॰… একং ভিক্খুনিং উদ্দিস্স…পে॰… সম্বহুলা সিক্খমানাযো উদ্দিস্স…পে॰… একং সিক্খমানং উদ্দিস্স…পে॰… সম্বহুলে সামণেরে উদ্দিস্স…পে॰… একং সামণেরং উদ্দিস্স…পে॰… সম্বহুলা সামণেরিযো উদ্দিস্স…পে॰… একং সামণেরিং উদ্দিস্স ৰিহারো কারাপিতো হোতি…পে॰… অড্ঢযোগো কারাপিতো হোতি… পাসাদো কারাপিতো হোতি… হম্মিযং কারাপিতং হোতি… গুহা কারাপিতা হোতি… পরিৰেণং কারাপিতং হোতি… কোট্ঠকো কারাপিতো হোতি… উপট্ঠানসালা কারাপিতা হোতি… অগ্গিসালা কারাপিতা হোতি … কপ্পিযকুটি কারাপিতা হোতি… চঙ্কমো কারাপিতো হোতি… চঙ্কমনসালা কারাপিতা হোতি… উদপানো কারাপিতো হোতি… উদপানসালা কারাপিতা হোতি… পোক্খরণী কারাপিতা হোতি… মণ্ডপো কারাপিতো হোতি… আরামো কারাপিতো হোতি… আরামৰত্থু কারাপিতং হোতি। সো চে ভিক্খূনং সন্তিকে দূতং পহিণেয্য – ‘‘আগচ্ছন্তু ভদন্তা, ইচ্ছামি দানঞ্চ দাতুং , ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো। ১৮৯. ইধ পন, ভিক্খৰে, উপাসকেন অত্তনো অত্থায নিৰেসনং কারাপিতং হোতি…পে॰… সযনিঘরং কারাপিতং হোতি… উদোসিতো কারাপিতো হোতি… অট্টো কারাপিতো হোতি… মাল়ো কারাপিতো হোতি… আপণো কারাপিতো হোতি… আপণসালা কারাপিতা হোতি… পাসাদো কারাপিতো হোতি… হম্মিযং কারাপিতং হোতি… গুহা কারাপিতা হোতি… পরিৰেণং কারাপিতং হোতি… কোট্ঠকো কারাপিতো হোতি… উপট্ঠানসালা কারাপিতা হোতি… অগ্গিসালা কারাপিতা হোতি… রসৰতী কারাপিতা হোতি… চঙ্কমো কারাপিতো হোতি… চঙ্কমনসালা কারাপিতা হোতি… উদপানো কারাপিতো হোতি… উদপানসালা কারাপিতা হোতি… পোক্খরণী কারাপিতা হোতি… মণ্ডপো কারাপিতো হোতি… আরামো কারাপিতো হোতি … আরামৰত্থু কারাপিতং হোতি… পুত্তস্স ৰা ৰারেয্যং হোতি… ধীতুযা ৰা ৰারেয্যং হোতি… গিলানো ৰা হোতি… অভিঞ্ঞাতং ৰা সুত্তন্তং ভণতি। সো চে ভিক্খূনং সন্তিকে দূতং পহিণেয্য – ‘আগচ্ছন্তু ভদন্তা, ইমং সুত্তন্তং পরিযাপুণিস্সন্তি, পুরাযং সুত্তন্তো ন পলুজ্জতী’তি। অঞ্ঞতরং ৰা পনস্স কিচ্চং হোতি – করণীযং ৰা, সো চে ভিক্খূনং সন্তিকে দূতং পহিণেয্য – ‘‘আগচ্ছন্তু ভদন্তা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো। ১৯০. ইধ পন, ভিক্খৰে, উপাসিকায সঙ্ঘং উদ্দিস্স ৰিহারো কারাপিতো হোতি। সা চে ভিক্খূনং সন্তিকে দূতং পহিণেয্য – ‘‘আগচ্ছন্তু অয্যা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো। ইধ পন, ভিক্খৰে, উপাসিকায সঙ্ঘং উদ্দিস্স অড্ঢযোগো কারাপিতো হোতি…পে॰… পাসাদো কারাপিতো হোতি… হম্মিযং কারাপিতং হোতি… গুহা কারাপিতা হোতি… পরিৰেণং কারাপিতং হোতি… কোট্ঠকো কারাপিতো হোতি… উপট্ঠানসালা কারাপিতা হোতি… অগ্গিসালা কারাপিতা হোতি… কপ্পিযকুটি কারাপিতা হোতি… ৰচ্চকুটি কারাপিতা হোতি… চঙ্কমো কারাপিতো হোতি… চঙ্কমনসালা কারাপিতা হোতি… উদপানো কারাপিতো হোতি… উদপানসালা কারাপিতা হোতি… জন্তাঘরং কারাপিতং হোতি… জন্তাঘরসালা কারাপিতা হোতি… পোক্খরণী কারাপিতা হোতি… মণ্ডপো কারাপিতো হোতি… আরামো কারাপিতো হোতি… আরামৰত্থু কারাপিতং হোতি। সা চে ভিক্খূনং সন্তিকে দূতং পহিণেয্য – ‘‘আগচ্ছন্তু অয্যা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো। ইধ পন, ভিক্খৰে, উপাসিকায সম্বহুলে ভিক্খূ উদ্দিস্স…পে॰… একং ভিক্খুং উদ্দিস্স…পে॰… ভিক্খুনিসঙ্ঘং উদ্দিস্স…পে॰… সম্বহুলা ভিক্খুনিযো উদ্দিস্স…পে॰… একং ভিক্খুনিং উদ্দিস্স…পে॰… সম্বহুলা সিক্খমানাযো উদ্দিস্স…পে॰… একং সিক্খমানং উদ্দিস্স…পে॰… সম্বহুলে সামণেরে উদ্দিস্স…পে॰… একং সামণেরং উদ্দিস্স…পে॰… সম্বহুলা সামণেরিযো উদ্দিস্স…পে॰… একং সামণেরিং উদ্দিস্স…পে॰…। ১৯১. ইধ পন, ভিক্খৰে, উপাসিকায অত্তনো অত্থায নিৰেসনং কারাপিতং হোতি…পে॰… সযনিঘরং কারাপিতং হোতি… উদোসিতো কারাপিতো হোতি… অট্টো কারাপিতো হোতি… মাল়ো কারাপিতো হোতি… আপণো কারাপিতো হোতি… আপণসালা কারাপিতা হোতি… পাসাদো কারাপিতো হোতি… হম্মিযং কারাপিতং হোতি… গুহা কারাপিতা হোতি… পরিৰেণং কারাপিতং হোতি… কোট্ঠকো কারাপিতো হোতি… উপট্ঠানসালা কারাপিতা হোতি… অগ্গিসালা কারাপিতা হোতি… রসৰতী কারাপিতা হোতি… চঙ্কমো কারাপিতো হোতি… চঙ্কমনসালা কারাপিতা হোতি… উদপানো কারাপিতো হোতি … উদপানসালা কারাপিতা হোতি… পোক্খরণী কারাপিতা হোতি… মণ্ডপো কারাপিতো হোতি… আরামো কারাপিতো হোতি… আরামৰত্থু কারাপিতং হোতি… পুত্তস্স ৰা ৰারেয্যং হোতি… ধীতুযা ৰা ৰারেয্যং হোতি… গিলানা ৰা হোতি… অভিঞ্ঞাতং ৰা সুত্তন্তং ভণতি। সা চে ভিক্খূনং সন্তিকে দূতং পহিণেয্য – ‘‘আগচ্ছন্তু অয্যা, ইমং সুত্তন্তং পরিযাপুণিস্সন্তি, পুরাযং সুত্তন্তো পলুজ্জতী’’তি। অঞ্ঞতরং ৰা পনস্সা কিচ্চং হোতি করণীযং ৰা, সা চে ভিক্খূনং সন্তিকে দূতং পহিণেয্য – ‘‘আগচ্ছন্তু অয্যা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো। ১৯২. ইধ পন, ভিক্খৰে, ভিক্খুনা সঙ্ঘং উদ্দিস্স…পে॰… ভিক্খুনিযা সঙ্ঘং উদ্দিস্স… সিক্খমানায সঙ্ঘং উদ্দিস্স… সামণেরেন সঙ্ঘং উদ্দিস্স… সামণেরিযা সঙ্ঘং উদ্দিস্স … সম্বহুলে ভিক্খূ উদ্দিস্স… একং ভিক্খুং উদ্দিস্স… ভিক্খুনিসঙ্ঘং উদ্দিস্স… সম্বহুলা ভিক্খুনিযো উদ্দিস্স… একং ভিক্খুনিং উদ্দিস্স… সম্বহুলা সিক্খমানাযো উদ্দিস্স… একং সিক্খমানং উদ্দিস্স… সম্বহুলে সামণেরে উদ্দিস্স… একং সামণেরং উদ্দিস্স… সম্বহুলাসামণেরিযো উদ্দিস্স… একং সামণেরিং উদ্দিস্স… অত্তনো অত্থায ৰিহারো কারাপিতো হোতি…পে॰… অড্ঢযোগো কারাপিতো হোতি… পাসাদো কারাপিতো হোতি… হম্মিযং কারাপিতং হোতি… গুহা কারাপিতা হোতি… পরিৰেণং কারাপিতং হোতি … কোট্ঠকো কারাপিতো হোতি… উপট্ঠানসালা কারাপিতা হোতি… অগ্গিসালা কারাপিতা হোতি… কপ্পিযকুটি কারাপিতা হোতি… চঙ্কমো কারাপিতো হোতি… চঙ্কমনসালা কারাপিতা হোতি… উদপানো কারাপিতো হোতি… উদপানসালা কারাপিতা হোতি… পোক্খরণী কারাপিতা হোতি… মণ্ডপো কারাপিতো হোতি… আরামো কারাপিতো হোতি… আরামৰত্থু কারাপিতং হোতি। সা চে ভিক্খূনং সন্তিকে দূতং পহিণেয্য… ‘‘আগচ্ছন্তু অয্যা, ইচ্ছামি দানঞ্চ দাতুং, ধম্মঞ্চ সোতুং, ভিক্খূ চ পস্সিতু’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বোতি। সত্তাহকরণীযানুজানতা নিট্ঠিতা। ১১০. পঞ্চন্নং অপ্পহিতেপি অনুজাননা ১৯৩. তেন খো পন সমযেন অঞ্ঞতরো ভিক্খু গিলানো হোতি। সো ভিক্খূনং সন্তিকে দূতং পাহেসি – ‘‘অহঞ্হি গিলানো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি। ভগৰতো এতমত্থং আরোচেসুং। অনুজানামি, ভিক্খৰে, পঞ্চন্নং সত্তাহকরণীযেন অপ্পহিতেপি গন্তুং, পগেৰ পহিতে। ভিক্খুস্স, ভিক্খুনিযা, সিক্খমানায, সামণেরস্স, সামণেরিযা – অনুজানামি, ভিক্খৰে, ইমেসং পঞ্চন্নং সত্তাহকরণীযেন অপ্পহিতেপি গন্তুং, পগেৰ পহিতে। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খু গিলানো হোতি। সো চে ভিক্খূনং সন্তিকে দূতং পহিণেয্য – ‘‘অহঞ্হি গিলানো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘গিলানভত্তং ৰা পরিযেসিস্সামি, গিলানুপট্ঠাকভত্তং ৰা পরিযেসিস্সামি, গিলানভেসজ্জং ৰা পরিযেসিস্সামি, পুচ্ছিস্সামি ৰা, উপট্ঠহিস্সামি ৰা’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুস্স অনভিরতি উপ্পন্না হোতি। সো চে ভিক্খূনং সন্তিকে দূতং পহিণেয্য – ‘‘অনভিরতি মে উপ্পন্না, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘অনভিরতং ৰূপকাসেস্সামি ৰা, ৰূপকাসাপেস্সামি ৰা, ধম্মকথং ৰাস্স করিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুস্স কুক্কুচ্চং উপ্পন্নং হোতি। সো চে ভিক্খূনং সন্তিকে দূতং পহিণেয্য – ‘‘কুক্কুচ্চং মে উপ্পন্নং, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘কুক্কুচ্চং ৰিনোদেস্সামি ৰা, ৰিনোদাপেস্সামি ৰা, ধম্মকথং ৰাস্স করিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুস্স দিট্ঠিগতং উপ্পন্নং হোতি। সো চে ভিক্খূনং সন্তিকে দূতং পহিণেয্য – ‘‘দিট্ঠিগতং মে উপ্পন্নং, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘দিট্ঠিগতং ৰিৰেচেস্সামি ৰা, ৰিৰেচাপেস্সামি ৰা, ধম্মকথং ৰাস্স করিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খু গরুধম্মং অজ্ঝাপন্নো হোতি পরিৰাসারহো। সো চে ভিক্খূনং সন্তিকে দূতং পহিণেয্য – ‘‘অহঞ্হি গরুধম্মং অজ্ঝাপন্নো পরিৰাসারহো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘পরিৰাসদানং উস্সুক্কং করিস্সামি ৰা, অনুস্সাৰেস্সামি ৰা, গণপূরকো ৰা ভৰিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খু মূলায পটিকস্সনারহো হোতি। সো চে ভিক্খূনং সন্তিকে দূতং পহিণেয্য – ‘‘অহঞ্হি মূলায পটিকস্সনারহো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘মূলায পটিকস্সনং উস্সুক্কং করিস্সামি ৰা, অনুস্সাৰেস্সামি ৰা, গণপূরকো ৰা ভৰিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খু মানত্তারহো হোতি। সো চে ভিক্খূনং সন্তিকে দূতং পহিণেয্য – ‘‘অহঞ্হি মানত্তারহো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘মানত্তদানং উস্সুক্কং করিস্সামি ৰা, অনুস্সাৰেস্সামি ৰা, গণপূরকো ৰা ভৰিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খু অব্ভানারহো হোতি। সো চে ভিক্খূনং সন্তিকে দূতং পহিণেয্য – ‘‘অহঞ্হি অব্ভানারহো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘অব্ভানং উস্সুক্কং করিস্সামি ৰা, অনুস্সাৰেস্সামি ৰা, গণপূরকো ৰা ভৰিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুস্স সঙ্ঘো কম্মং কত্তুকামো হোতি তজ্জনীযং ৰা, নিযস্সং ৰা, পব্বাজনীযং ৰা, পটিসারণীযং ৰা, উক্খেপনীযং ৰা। সো চে ভিক্খূনং সন্তিকে দূতং পহিণেয্য – ‘‘সঙ্ঘো মে কম্মং কত্তুকামো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘কিন্তি নু খো সঙ্ঘো কম্মং ন করেয্য, লহুকায ৰা পরিণামেয্যা’’তি। সত্তাহং সন্নিৰত্তো কাতব্বো। কতং ৰা পনস্স হোতি সঙ্ঘেন কম্মং তজ্জনীযং ৰা নিযস্সং ৰা পব্বাজনীযং ৰা পটিসারণীযং ৰা উক্খেপনীযং ৰা। সো চে ভিক্খূনং সন্তিকে দূতং পহিণেয্য ‘‘সঙ্ঘো মে কম্মং অকাসি, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘কিন্তি নু খো সম্মা ৰত্তেয্য, লোমং পাতেয্য, নেত্থারং ৰত্তেয্য, সঙ্ঘো তং কম্মং পটিপ্পস্সম্ভেয্যা’’তি। সত্তাহং সন্নিৰত্তো কাতব্বো। ১৯৪. ইধ পন, ভিক্খৰে, ভিক্খুনী গিলানা হোতি। সা চে ভিক্খূনং সন্তিকে দূতং পহিণেয্য – ‘‘অহঞ্হি গিলানা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘গিলানভত্তং ৰা পরিযেসিস্সামি, গিলানুপট্ঠাকভত্তং ৰা পরিযেসিস্সামি, গিলানভেসজ্জং ৰা পরিযেসিস্সামি, পুচ্ছিস্সামি ৰা, উপট্ঠহিস্সামি ৰা’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুনিযা অনভিরতি উপ্পন্না হোতি। সা চে ভিক্খূনং সন্তিকে দূতং পহিণেয্য – ‘‘অনভিরতি মে উপ্পন্না, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘অনভিরতং ৰূপকাসেস্সামি ৰা, ৰূপকাসাপেস্সামি ৰা, ধম্মকথং ৰাস্সা করিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুনিযা কুক্কুচ্চং উপ্পন্নং হোতি। সা চে ভিক্খূনং সন্তিকে দূতং পহিণেয্য – ‘‘কুক্কুচ্চং মে উপ্পন্নং, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘কুক্কুচ্চং ৰিনোদেস্সামি ৰা, ৰিনোদাপেস্সামি ৰা, ধম্মকথং ৰাস্সা করিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুনিযা দিট্ঠিগতং উপ্পন্নং হোতি। সা চে ভিক্খূনং সন্তিকে দূতং পহিণেয্য – ‘‘দিট্ঠিগতং মে উপ্পন্নং, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘দিট্ঠিগতং ৰিৰেচেস্সামি ৰা, ৰিৰেচাপেস্সামি ৰা, ধম্মকথং ৰাস্সা করিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুনী গরুধম্মং অজ্ঝাপন্না হোতি মানত্তারহা। সা চে ভিক্খূনং সন্তিকে দূতং পহিণেয্য – ‘‘অহঞ্হি গরুধম্মং অজ্ঝাপন্না মানত্তারহা , আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘মানত্তদানং উস্সুক্কং করিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুনী মূলায পটিকস্সনারহা হোতি। সা চে ভিক্খূনং সন্তিকে দূতং পহিণেয্য – ‘‘অহঞ্হি মূলায পটিকস্সনারহা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘মূলায পটিকস্সনং উস্সুক্কং করিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুনী অব্ভানারহা হোতি। সা চে ভিক্খূনং সন্তিকে দূতং পহিণেয্য – ‘‘অহঞ্হি অব্ভানারহা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং , ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘অব্ভানং উস্সুক্কং করিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুনিযা সঙ্ঘো কম্মং কত্তুকামো হোতি – তজ্জনীযং ৰা, নিযস্সং ৰা, পব্বাজনীযং ৰা, পটিসারণীযং ৰা, উক্খেপনীযং ৰা। সা চে ভিক্খূনং সন্তিকে দূতং পহিণেয্য – ‘‘সঙ্ঘো মে কম্মং কত্তুকামো, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘কিন্তি নু খো সঙ্ঘো কম্মং ন করেয্য, লহুকায ৰা পরিণামেয্যা’’তি। সত্তাহং সন্নিৰত্তো কাতব্বো। কতং ৰা পনস্সা হোতি সঙ্ঘেন কম্মং – তজ্জনীযং ৰা , নিযস্সং ৰা, পব্বাজনীযং ৰা, পটিসারণীযং ৰা, উক্খেপনীযং ৰা। সা চে ভিক্খূনং সন্তিকে দূতং পহিণেয্য – ‘‘সঙ্ঘো মে কম্মং অকাসি, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘কিন্তি নু খো সম্মা ৰত্তেয্য, লোমং পাতেয্য, নেত্থারং ৰত্তেয্য, সঙ্ঘো তং কম্মং পটিপ্পস্সম্ভেয্যা’’তি। সত্তাহং সন্নিৰত্তো কাতব্বো। ১৯৫. ইধ পন, ভিক্খৰে, সিক্খমানা গিলানা হোতি। সা চে ভিক্খূনং সন্তিকে দূতং পহিণেয্য – ‘‘অহঞ্হি গিলানা, আগচ্ছন্তু অয্যা, ইচ্ছামি অয্যানং আগত’’ন্তি – গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘গিলানভত্তং ৰা পরিযেসিস্সামি, গিলানুপট্ঠাকভত্তং ৰা পরিযেসিস্সামি, গিলানভেসজ্জং ৰা পরিযেসিস্সামি, পুচ্ছিস্সামি ৰা, উপট্ঠহিস্সামি ৰা’’তি। সত্তাহং সন্নিৰত্তো কাতব্বো। ইধ পন, ভিক্খৰে, সিক্খমানায অনভিরতি উপ্পন্না হোতি…পে॰… সিক্খমানায কুক্কুচ্চং উপ্পন্নং হোতি… সিক্খমানায দিট্ঠিগতং উপ্পন্নং হোতি… সিক্খমানায সিক্খা কুপিতা হোতি। সা চে ভিক্খূনং সন্তিকে দূতং পহিণেয্য – ‘‘সিক্খা মে কুপিতা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘সিক্খাসমাদানং উস্সুক্কং করিস্সামী’’তি। সত্তাহং সন্নিৰত্তো কাতব্বো। ইধ পন, ভিক্খৰে, সিক্খমানা উপসম্পজ্জিতুকামা হোতি। সা চে ভিক্খূনং সন্তিকে দূতং পহিণেয্য – ‘‘অহঞ্হি উপসম্পজ্জিতুকামা, আগচ্ছন্তু অয্যা , ইচ্ছামি অয্যানং আগত’’ন্তি গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – উপসম্পদং উস্সুক্কং করিস্সামি ৰা, অনুস্সাৰেস্সামি ৰা, গণপূরকো ৰা ভৰিস্সামীতি। সত্তাহং সন্নিৰত্তো কাতব্বো। ১৯৬. ইধ পন, ভিক্খৰে, সামণেরো গিলানো হোতি। সো চে ভিক্খূনং সন্তিকে দূতং পহিণেয্য – ‘‘অহঞ্হি গিলানো, আগচ্ছন্তু ভিক্খূ , ইচ্ছামি ভিক্খূনং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘গিলানভত্তং ৰা পরিযেসিস্সামি, গিলানুপট্ঠাকভত্তং ৰা পরিযেসিস্সামি, গিলানভেসজ্জং ৰা পরিযেসিস্সামি, পুচ্ছিস্সামি ৰা, উপট্ঠহিস্সামি ৰা’’তি। সত্তাহং সন্নিৰত্তো কাতব্বো। ইধ পন, ভিক্খৰে, সামণেরস্স অনভিরতি উপ্পন্না হোতি…পে॰… সামণেরস্স কুক্কুচ্চং উপ্পন্নং হোতি… সামণেরস্স দিট্ঠিগতং উপ্পন্নং হোতি… সামণেরো ৰস্সং পুচ্ছিতুকামো হোতি। সো চে ভিক্খূনং সন্তিকে দূতং পহিণেয্য – ‘‘অহঞ্হি ৰস্সং পুচ্ছিতুকামো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘পুচ্ছিস্সামি ৰা, আচিক্খিস্সামি ৰা’’তি। সত্তাহং সন্নিৰত্তো কাতব্বো। ইধ পন, ভিক্খৰে, সামণেরো উপসম্পজ্জিতুকামো হোতি। সো চে ভিক্খূনং সন্তিকে দূতং পহিণেয্য – ‘‘অহঞ্হি উপসম্পজ্জিতুকামো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘উপসম্পদং উস্সুক্কং করিস্সামি ৰা, অনুস্সাৰেস্সামি ৰা, গণপূরকো ৰা ভৰিস্সামী’’তি। সত্তাহং সন্নিৰত্তো কাতব্বো। ১৯৭. ইধ পন, ভিক্খৰে, সামণেরী গিলানা হোতি। সা চে ভিক্খূনং সন্তিকে দূতং পহিণেয্য – ‘‘অহঞ্হি গিলানা, আগচ্ছন্তু অয্যা, ইচ্ছামি অয্যানং আগত’’ন্তি , গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘গিলানভত্তং ৰা পরিযেসিস্সামি, গিলানুপট্ঠাকভত্তং ৰা পরিযেসিস্সামি, গিলানভেসজ্জং ৰা পরিযেসিস্সামি, পুচ্ছিস্সামি ৰা, উপট্ঠহিস্সামি ৰা’’তি। সত্তাহং সন্নিৰত্তো কাতব্বো। ইধ পন, ভিক্খৰে, সামণেরিযা অনভিরতি উপ্পন্না হোতি…পে॰… সামণেরিযা কুক্কুচ্চং উপ্পন্নং হোতি… সামণেরিযা দিট্ঠিগতং উপ্পন্নং হোতি… সামণেরী ৰস্সং পুচ্ছিতুকামা হোতি। সা চে ভিক্খূনং সন্তিকে দূতং পহিণেয্য – ‘‘অহঞ্হি ৰস্সং পুচ্ছিতুকামা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘পুচ্ছিস্সামি ৰা, আচিক্খিস্সামি ৰা’’তি। সত্তাহং সন্নিৰত্তো কাতব্বো। ইধ পন, ভিক্খৰে, সামণেরী সিক্খং সমাদিযিতুকামা হোতি। সা চে ভিক্খূনং সন্তিকে দূতং পহিণেয্য – ‘‘অহঞ্হি সিক্খং সমাদিযিতুকামা, আগচ্ছন্তু অয্যা, ইচ্ছামি অয্যানং আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘সিক্খাসমাদানং উস্সুক্কং করিস্সামী’’তি। সত্তাহং সন্নিৰত্তো কাতব্বোতি। পঞ্চন্নং অপ্পহিতেপি অনুজাননা নিট্ঠিতা। ১১১. সত্তন্নং অপ্পহিতেপি অনুজাননা ১৯৮. তেন খো পন সমযেন অঞ্ঞতরস্স ভিক্খুনো মাতা গিলানা হোতি। সা পুত্তস্স সন্তিকে দূতং পাহেসি – ‘‘অহঞ্হি গিলানা, আগচ্ছতু মে পুত্তো, ইচ্ছামি পুত্তস্স আগত’’ন্তি। অথ খো তস্স ভিক্খুনো এতদহোসি – ‘‘ভগৰতা পঞ্ঞত্তং সত্তন্নং সত্তাহকরণীযেন পহিতে গন্তুং, ন ত্ৰেৰ অপ্পহিতে; পঞ্চন্নং সত্তাহকরণীযেন অপ্পহিতেপি গন্তুং, পগেৰ পহিতেতি। অযঞ্চ মে মাতা গিলানা, সা চ অনুপাসিকা, কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং। অনুজানামি, ভিক্খৰে, সত্তন্নং সত্তাহকরণীযেন অপ্পহিতেপি গন্তুং, পগেৰ পহিতে। ভিক্খুস্স, ভিক্খুনিযা, সিক্খমানায, সামণেরস্স, সামণেরিযা, মাতুযা চ পিতুস্স চ – অনুজানামি, ভিক্খৰে, ইমেসং সত্তন্নং সত্তাহকরণীযেন অপ্পহিতেপি গন্তুং, পগেৰ পহিতে। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুস্স মাতা গিলানা হোতি। সা চে পুত্তস্স সন্তিকে দূতং পহিণেয্য – ‘‘অহঞ্হি গিলানা, আগচ্ছতু মে পুত্তো, ইচ্ছামি পুত্তস্স আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘গিলানভত্তং ৰা পরিযেসিস্সামি, গিলানুপট্ঠাকভত্তং ৰা পরিযেসিস্সামি, গিলানভেসজ্জং ৰা পরিযেসিস্সামি, পুচ্ছিস্সামি ৰা, উপট্ঠহিস্সামি ৰা’’তি। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুস্স পিতা গিলানো হোতি। সো চে পুত্তস্স সন্তিকে দূতং পহিণেয্য – ‘‘অহঞ্হি গিলানো, আগচ্ছতু মে পুত্তো, ইচ্ছামি পুত্তস্স আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘গিলানভত্তং ৰা পরিযেসিস্সামি, গিলানুপট্ঠাকভত্তং ৰা পরিযেসিস্সামি, গিলানভেসজ্জং ৰা পরিযেসিস্সামি, পুচ্ছিস্সামি ৰা, উপট্ঠহিস্সামি ৰা’’তি। সত্তাহং সন্নিৰত্তো কাতব্বো। সত্তন্নং অপ্পহিতেপি অনুজাননা নিট্ঠিতা। ১১২. পহিতেযেৰ অনুজাননা ১৯৯ . ইধ পন, ভিক্খৰে, ভিক্খুস্স ভাতা গিলানো হোতি। সো চে ভাতুনো সন্তিকে দূতং পহিণেয্য – ‘‘অহঞ্হি গিলানো, আগচ্ছতু মে ভাতা, ইচ্ছামি ভাতুনো আগত’’ন্তি, গন্তব্বং, ভিক্খৰে , সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুস্স ভগিনী গিলানা হোতি। সা চে ভাতুনো সন্তিকে দূতং পহিণেয্য – ‘‘অহঞ্হি গিলানা, আগচ্ছতু মে ভাতা, ইচ্ছামি ভাতুনো আগত’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুস্স ঞাতকো গিলানো হোতি। সো চে ভিক্খুস্স সন্তিকে দূতং পহিণেয্য – ‘‘অহঞ্হি গিলানো, আগচ্ছতু ভদন্তো, ইচ্ছামি ভদন্তস্স আগত’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো। ইধ পন, ভিক্খৰে, ভিক্খুগতিকো গিলানো হোতি। সো চে ভিক্খূনং সন্তিকে দূতং পহিণেয্য – ‘‘অহঞ্হি গিলানো, আগচ্ছন্তু ভদন্তা, ইচ্ছামি ভদন্তানং আগত’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো। তেন খো পন সমযেন সঙ্ঘস্স ৰিহারো উন্দ্রিযতি। অঞ্ঞতরেন উপাসকেন অরঞ্ঞে ভণ্ডং ছেদাপিতং হোতি। সো ভিক্খূনং সন্তিকে দূতং পাহেসি – ‘‘সচে ভদন্তা তং ভণ্ডং আৰহাপেয্যুং, দজ্জাহং তং ভণ্ড’’ন্তি। ভগৰতো এতমত্থং আরোচেসুং। অনুজানামি, ভিক্খৰে, সঙ্ঘকরণীযেন গন্তুং। সত্তাহং সন্নিৰত্তো কাতব্বোতি। পহিতেযেৰ অনুজাননা নিট্ঠিতা। ৰস্সাৰাসভাণৰারো নিট্ঠিতো। ১১৩. অন্তরাযে অনাপত্তিৰস্সচ্ছেদৰারো ২০০. তেন খো পন সমযেন কোসলেসু জনপদে অঞ্ঞতরস্মিং আৰাসে ৰস্সূপগতা ভিক্খূ ৰাল়েহি উব্বাল়্হা হোন্তি। গণ্হিংসুপি পরিপাতিংসুপি। ভগৰতো এতমত্থং আরোচেসুং। ইধ পন, ভিক্খৰে, ৰস্সূপগতা ভিক্খূ ৰাল়েহি উব্বাল়্হা হোন্তি। গণ্হন্তিপি পরিপাতেন্তিপি। এসেৰ অন্তরাযোতি পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতা ভিক্খূ সরীসপেহি উব্বাল়্হা হোন্তি। ডংসন্তিপি পরিপাতেন্তিপি। এসেৰ অন্তরাযোতি পক্কমিতব্বং। অনাপত্তি ৰস্সচ্ছেদস্স । ইধ পন, ভিক্খৰে, ৰস্সূপগতা ভিক্খূ চোরেহি উব্বাল়্হা হোন্তি। ৰিলুম্পন্তিপি আকোটেন্তিপি। এসেৰ অন্তরাযোতি পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতা ভিক্খূ পিসাচেহি উব্বাল়্হা হোন্তি। আৰিসন্তিপি হনন্তিপি [ওজম্পি হরন্তি (সী॰), হরন্তিপি (স্যা॰)]। এসেৰ অন্তরাযোতি পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতানং ভিক্খূনং গামো অগ্গিনা দড্ঢো হোতি। ভিক্খূ পিণ্ডকেন কিলমন্তি। এসেৰ অন্তরাযোতি পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতানং ভিক্খূনং সেনাসনং অগ্গিনা দড্ঢং হোতি। ভিক্খূ সেনাসনেন কিলমন্তি। এসেৰ অন্তরাযোতি পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতানং ভিক্খূনং গামো উদকেন ৰূল়্হো হোতি। ভিক্খূ পিণ্ডকেন কিলমন্তি। এসেৰ অন্তরাযোতি পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতানং ভিক্খূনং সেনাসনং উদকেন ৰূল়্হং হোতি। ভিক্খূ সেনাসনেন কিলমন্তি। এসেৰ অন্তরাযোতি পক্কমিতব্বং। অনাপত্তি ৰস্সচ্ছেদস্সাতি। ২০১. তেন খো পন সমযেন অঞ্ঞতরস্মিং আৰাসে ৰস্সূপগতানং ভিক্খূনং গামো চোরেহি ৰুট্ঠাসি। ভগৰতো এতমত্থং আরোচেসুং। অনুজানামি, ভিক্খৰে, যেন গামো তেন গন্তুন্তি। গামো দ্ৰেধা ভিজ্জিত্থ। ভগৰতো এতমত্থং আরোচেসুং। অনুজানামি, ভিক্খৰে, যেন বহুতরা তেন গন্তুন্তি। বহুতরা অস্সদ্ধা হোন্তি অপ্পসন্না। ভগৰতো এতমত্থং আরোচেসুং। অনুজানামি, ভিক্খৰে, যেন সদ্ধা পসন্না তেন গন্তুন্তি। তেন খো পন সমযেন কোসলেসু জনপদে অঞ্ঞতরস্মিং আৰাসে ৰস্সূপগতা ভিক্খূ ন লভিংসু লূখস্স ৰা পণীতস্স ৰা ভোজনস্স যাৰদত্থং পারিপূরিং। ভগৰতো এতমত্থং আরোচেসুং। ইধ পন, ভিক্খৰে, ৰস্সূপগতা ভিক্খূ ন লভন্তি লূখস্স ৰা পণীতস্স ৰা ভোজনস্স যাৰদত্থং পারিপূরিং। এসেৰ অন্তরাযোতি পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতা ভিক্খূ লভন্তি লূখস্স ৰা পণীতস্স ৰা ভোজনস্স যাৰদত্থং পারিপূরিং, ন লভন্তি সপ্পাযানি ভোজনানি। এসেৰ অন্তরাযোতি পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতা ভিক্খূ লভন্তি লূখস্স ৰা পণীতস্স ৰা ভোজনস্স যাৰদত্থং পারিপূরিং, লভন্তি সপ্পাযানি ভোজনানি , ন লভন্তি সপ্পাযানি ভেসজ্জানি। এসেৰ অন্তরাযোতি পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতা ভিক্খূ লভন্তি লূখস্স ৰা পণীতস্স ৰা ভোজনস্স যাৰদত্থং পারিপূরিং, লভন্তি সপ্পাযানি ভোজনানি, লভন্তি সপ্পাযানি ভেসজ্জানি, ন লভন্তি পতিরূপং উপট্ঠাকং। এসেৰ অন্তরাযোতি পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতং ভিক্খুং ইত্থী নিমন্তেতি – ‘‘এহি, ভন্তে, হিরঞ্ঞং ৰা তে দেমি, সুৰণ্ণং ৰা তে দেমি, খেত্তং ৰা তে দেমি, ৰত্থুং ৰা তে দেমি, গাৰুং ৰা তে দেমি, গাৰিং ৰা তে দেমি, দাসং ৰা তে দেমি, দাসিং ৰা তে দেমি, ধীতরং ৰা তে দেমি ভরিযত্থায, অহং ৰা তে ভরিযা হোমি, অঞ্ঞং ৰা তে ভরিযং আনেমী’’তি। তত্র চে ভিক্খুনো এৰং হোতি, ‘লহুপরিৰত্তং খো চিত্তং ৰুত্তং ভগৰতা, সিযাপি মে ব্রহ্মচরিযস্স অন্তরাযো’তি, পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতং ভিক্খুং ৰেসী নিমন্তেতি…পে॰… থুল্লকুমারী নিমন্তেতি… পণ্ডকো নিমন্তেতি… ঞাতকা নিমন্তেন্তি… রাজানো নিমন্তেন্তি… চোরা নিমন্তেন্তি… ধুত্তা নিমন্তেন্তি – ‘‘এহি, ভন্তে, হিরঞ্ঞং ৰা তে দেম, সুৰণ্ণং ৰা তে দেম, খেত্তং ৰা তে দেম, ৰত্থুং ৰা তে দেম , গাৰুং ৰা তে দেম, গাৰিং ৰা তে দেম, দাসং ৰা তে দেম, দাসিং ৰা তে দেম, ধীতরং ৰা তে দেম ভরিযত্থায, অঞ্ঞং ৰা তে ভরিযং আনেমা’’তি। তত্র চে ভিক্খুনো এৰং হোতি, ‘লহুপরিৰত্তং খো চিত্তং ৰুত্তং ভগৰতা, সিযাপি মে ব্রহ্মচরিযস্স অন্তরাযো’তি, পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতো ভিক্খু অস্সামিকং নিধিং পস্সতি। তত্র চে ভিক্খুনো এৰং হোতি, ‘লহুপরিৰত্তং খো চিত্তং ৰুত্তং ভগৰতা, সিযাপি মে ব্রহ্মচরিযস্স অন্তরাযো’তি, পক্কমিতব্বং। অনাপত্তি ৰস্সচ্ছেদস্স। অন্তরাযে অনাপত্তিৰস্সচ্ছেদৰারো নিট্ঠিতো। ১১৪. সঙ্ঘভেদে অনাপত্তিৰস্সচ্ছেদৰারো ২০২. ইধ পন, ভিক্খৰে, ৰস্সূপগতো ভিক্খু পস্সতি সম্বহুলে ভিক্খূ সঙ্ঘভেদায পরক্কমন্তে। তত্র চে ভিক্খুনো এৰং হোতি, ‘গরুকো খো সঙ্ঘভেদো ৰুত্তো ভগৰতা; মা মযি সম্মুখীভূতে সঙ্ঘো ভিজ্জী’তি, পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতো ভিক্খু সুণাতি – ‘‘অসুকস্মিং কির আৰাসে সম্বহুলা ভিক্খূ সঙ্ঘভেদায পরক্কমন্তী’’তি। তত্র চে ভিক্খুনো এৰং হোতি, ‘গরুকো খো সঙ্ঘভেদো ৰুত্তো ভগৰতা; মা মযি সম্মুখীভূতে সঙ্ঘো ভিজ্জী’তি, পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতো ভিক্খু সুণাতি – ‘‘অসুকস্মিং কির আৰাসে সম্বহুলা ভিক্খূ সঙ্ঘভেদায পরক্কমন্তী’’তি। তত্র চে ভিক্খুনো এৰং হোতি – ‘‘তে খো মে ভিক্খূ মিত্তা। ত্যাহং ৰক্খামি ‘গরুকো খো, আৰুসো, সঙ্ঘভেদো ৰুত্তো ভগৰতা; মাযস্মন্তানং সঙ্ঘভেদো রুচ্চিত্থা’তি। করিস্সন্তি মে ৰচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতো ভিক্খু সুণাতি – ‘‘অসুকস্মিং কির আৰাসে সম্বহুলা ভিক্খূ সঙ্ঘভেদায পরক্কমন্তী’’তি। তত্র চে ভিক্খুনো এৰং হোতি – ‘‘তে খো মে ভিক্খূ ন মিত্তা; অপি চ যে তেসং মিত্তা, তে মে মিত্তা। ত্যাহং ৰক্খামি। তে ৰুত্তা তে ৰক্খন্তি ‘গরুকো খো, আৰুসো, সঙ্ঘভেদো ৰুত্তো ভগৰতা; মাযস্মন্তানং সঙ্ঘভেদো রুচ্চিত্থা’তি। করিস্সন্তি তেসং ৰচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতো ভিক্খু সুণাতি – ‘‘অসুকস্মিং কির আৰাসে সম্বহুলেহি ভিক্খূহি সঙ্ঘো ভিন্নো’’তি। তত্র চে ভিক্খুনো এৰং হোতি – ‘‘তে খো মে ভিক্খূ মিত্তা। ত্যাহং ৰক্খামি ‘গরুকো খো, আৰুসো, সঙ্ঘভেদো ৰুত্তো ভগৰতা; মাযস্মন্তানং সঙ্ঘভেদো রুচ্চিত্থা’তি। করিস্সন্তি মে ৰচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতো ভিক্খু সুণাতি – ‘‘অসুকস্মিং কির আৰাসে সম্বহুলেহি ভিক্খূহি সঙ্ঘো ভিন্নো’’তি। তত্র চে ভিক্খুনো এৰং হোতি – ‘‘তে খো মে ভিক্খূ ন মিত্তা; অপি চ, যে তেসং মিত্তা তে মে মিত্তা। ত্যাহং ৰক্খামি। তে ৰুত্তা তে ৰক্খন্তি ‘গরুকো খো, আৰুসো, সঙ্ঘভেদো ৰুত্তো ভগৰতা; মাযস্মন্তানং সঙ্ঘভেদো রুচ্চিত্থা’তি। করিস্সন্তি তেসং ৰচনং, সুস্সূসিস্সন্তি , সোতং ওদহিস্সন্তী’’তি, পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতো ভিক্খু সুণাতি – ‘‘অমুকস্মিং কির আৰাসে সম্বহুলা ভিক্খুনিযো সঙ্ঘভেদায পরক্কমন্তী’’তি। তত্র চে ভিক্খুনো এৰং হোতি – ‘‘তা খো মে ভিক্খুনিযো মিত্তা। তাহং ৰক্খামি ‘গরুকো খো, ভগিনিযো, সঙ্ঘভেদো ৰুত্তো ভগৰতা; মা ভগিনীনং সঙ্ঘভেদো রুচ্চিত্থা’তি। করিস্সন্তি মে ৰচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং। অনাপত্তি ৰস্সচ্ছেদস্স। ইধ পন, ভিক্খৰে, ৰস্সূপগতো ভিক্খু সুণাতি – ‘‘অমুকস্মিং কির আৰাসে সম্বহুলা ভিক্খুনিযো সঙ্ঘভেদায পরক্কমন্তী’’তি। তত্র চে ভিক্খুনো এৰং হোতি – ‘‘তা খো মে ভিক্খুনিযো ন মিত্তা। অপি চ, যা তাসং মিত্তা, তা মে মিত্তা। তাহং ৰক্খামি। তা ৰুত্তা তা ৰক্খন্তি ‘গরুকো খো, ভগিনিযো, সঙ্ঘভেদো ৰুত্তো ভগৰতা। মা ভগিনীনং সঙ্ঘভেদো রুচ্চিত্থা’তি। করিস্সন্তি তাসং ৰচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং। অনাপত্তি ৰস্সচ্ছেদস্সতি। ইধ পন, ভিক্খৰে, ৰস্সূপগতো ভিক্খু সুণাতি – ‘‘অমুকস্মিং কির আৰাসে সম্বহুলাহি ভিক্খুনীহি সঙ্ঘো ভিন্নো’’তি। তত্র চে ভিক্খুনো এৰং হোতি – ‘‘তা খো মে ভিক্খুনিযো মিত্তা। তাহং ৰক্খামি ‘গরুকো খো, ভগিনিযো, সঙ্ঘভেদো ৰুত্তো ভগৰতা। মা ভগিনীনং সঙ্ঘভেদো রুচ্চিত্থা’তি। করিস্সন্তি মে ৰচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং। অনাপত্তি ৰস্সচ্ছেদস্সতি। ইধ পন, ভিক্খৰে, ৰস্সূপগতো ভিক্খু সুণাতি – ‘‘অমুকস্মিং কির আৰাসে সম্বহুলাহি ভিক্খুনীহি সঙ্ঘো ভিন্নো’’তি। তত্র চে ভিক্খুনো এৰং হোতি – ‘‘তা খো মে ভিক্খুনিযো ন মিত্তা। অপি চ, যা তাসং মিত্তা তা মে মিত্তা। তাহং ৰক্খামি। তা ৰুত্তা তা ৰক্খন্তি ‘গরুকো খো, ভগিনিযো [অয্যাযো (সী॰)], সঙ্ঘভেদো ৰুত্তো ভগৰতা; মা ভগিনীনং [অয্যানং (সী॰)] সঙ্ঘভেদো রুচ্চিত্থা’তি। করিস্সন্তি তাসং ৰচনং, সুস্সূসিস্সন্তি, সোতং ওদহিস্সন্তী’’তি, পক্কমিতব্বং। অনাপত্তি ৰস্সচ্ছেদস্সাতি। সঙ্ঘভেদে অনাপত্তিৰস্সচ্ছেদৰারো নিট্ঠিতো। ১১৫. ৰজাদীসু ৰস্সূপগমনং ২০৩. তেন খো পন সমযেন অঞ্ঞতরো ভিক্খু ৰজে ৰস্সং উপগন্তুকামো হোতি। ভগৰতো এতমত্থং আরোচেসুং। অনুজানামি, ভিক্খৰে, ৰজে ৰস্সং উপগন্তুন্তি। ৰজো ৰুট্ঠাসি। ভগৰতো এতমত্থং আরোচেসুং। অনুজানামি, ভিক্খৰে, যেন ৰজো তেন গন্তুন্তি। তেন খো পন সমযেন অঞ্ঞতরো ভিক্খু উপকট্ঠায ৰস্সূপনাযিকায সত্থেন গন্তুকামো হোতি। ভগৰতো এতমত্থং আরোচেসুং। অনুজানামি, ভিক্খৰে, সত্থে ৰস্সং উপগন্তুন্তি। তেন খো পন সমযেন অঞ্ঞতরো ভিক্খু উপকট্ঠায ৰস্সূপনাযিকায নাৰায গন্তুকামো হোতি। ভগৰতো এতমত্থং আরোচেসুং। অনুজানামি, ভিক্খৰে, নাৰায ৰস্সং উপগন্তুন্তি। ৰজাদীসু ৰস্সূপগমনং নিট্ঠিতং। ১১৬. ৰস্সং অনুপগন্তব্বট্ঠানানি ২০৪. তেন খো পন সমযেন ভিক্খূ রুক্খসুসিরে ৰস্সং উপগচ্ছন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘সেয্যথাপি পিসাচিল্লিকা’’তি। ভগৰতো এতমত্থং আরোচেসুং। ন, ভিক্খৰে, রুক্খসুসিরে ৰস্সং উপগন্তব্বং। যো উপগচ্ছেয্য, আপত্তি দুক্কটস্সাতি। তেন খো পন সমযেন ভিক্খূ রুক্খৰিটভিযা ৰস্সং উপগচ্ছন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘সেয্যথাপি মিগলুদ্দকা’’তি। ভগৰতো এতমত্থং আরোচেসুং। ন, ভিক্খৰে, রুক্খৰিটভিযা ৰস্সং উপগন্তব্বং। যো উপগচ্ছেয্য, আপত্তি দুক্কটস্সাতি। তেন খো পন সমযেন ভিক্খূ অজ্ঝোকাসে ৰস্সং উপগচ্ছন্তি। দেৰে ৰস্সন্তে রুক্খমূলম্পি নিব্বকোসম্পি উপধাৰন্তি। ভগৰতো এতমত্থং আরোচেসুং। ন, ভিক্খৰে, অজ্ঝোকাসে ৰস্সং উপগন্তব্বং। যো উপগচ্ছেয্য, আপত্তি দুক্কটস্সাতি। তেন খো পন সমযেন ভিক্খূ অসেনাসনিকা ৰস্সং উপগচ্ছন্তি। সীতেনপি কিলমন্তি, উণ্হেনপি কিলমন্তি। ভগৰতো এতমত্থং আরোচেসুং। ন, ভিক্খৰে, অসেনাসনিকেন ৰস্সং উপগন্তব্বং। যো উপগচ্ছেয্য, আপত্তি দুক্কটস্সাতি। তেন খো পন সমযেন ভিক্খূ ছৰকুটিকায ৰস্সং উপগচ্ছন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘সেয্যথাপি ছৰডাহকা’’তি। ভগৰতো এতমত্থং আরোচেসুং। ন, ভিক্খৰে, ছৰকুটিকায ৰস্সং উপগন্তব্বং। যো উপগচ্ছেয্য, আপত্তি দুক্কটস্সাতি। তেন খো পন সমযেন ভিক্খূ ছত্তে ৰস্সং উপগচ্ছন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘সেয্যথাপি গোপালকা’’তি। ভগৰতো এতমত্থং আরোচেসুং। ন, ভিক্খৰে, ছত্তে ৰস্সং উপগন্তব্বং। যো উপগচ্ছেয্য, আপত্তি দুক্কটস্সাতি। তেন খো পন সমযেন ভিক্খূ চাটিযা ৰস্সং উপগচ্ছন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘সেয্যথাপি তিত্থিযা’’তি। ভগৰতো এতমত্থং আরোচেসুং। ন, ভিক্খৰে, চাটিযা ৰস্সং উপগন্তব্বং। যো উপগচ্ছেয্য, আপত্তি দুক্কটস্সাতি। ৰস্সং অনুপগন্তব্বট্ঠানানি নিট্ঠিতা। ১১৭. অধম্মিককতিকা ২০৫. তেন খো পন সমযেন সাৰত্থিযা সঙ্ঘেন এৰরূপা কতিকা কতা হোতি – অন্তরাৰস্সং ন পব্বাজেতব্বন্তি। ৰিসাখায মিগারমাতুযা নত্তা ভিক্খূ উপসঙ্কমিত্ৰা পব্বজ্জং যাচি। ভিক্খূ এৰমাহংসু – ‘‘সঙ্ঘেন খো, আৰুসো, এৰরূপা কতিকা কতা ‘অন্তরাৰস্সং ন পব্বাজেতব্ব’ন্তি। আগমেহি, আৰুসো, যাৰ ভিক্খূ ৰস্সং ৰসন্তি। ৰস্সংৰুট্ঠা পব্বাজেস্সন্তী’’তি। অথ খো তে ভিক্খূ ৰস্সংৰুট্ঠা ৰিসাখায মিগারমাতুযা নত্তারং এতদৰোচুং – ‘‘এহি, দানি, আৰুসো, পব্বজাহী’’তি। সো এৰমাহ – ‘‘সচাহং, ভন্তে, পব্বজিতো অস্সং, অভিরমেয্যামহং [অভিরমেয্যং চাহং (সী॰)]। ন দানাহং, ভন্তে, পব্বজিস্সামী’’তি। ৰিসাখা মিগারমাতা উজ্ঝাযতি খিয্যতি ৰিপাচেতি – ‘‘কথঞ্হি নাম অয্যা এৰরূপং কতিকং করিস্সন্তি ‘ন অন্তরাৰস্সং পব্বাজেতব্ব’ন্তি। কং কালং ধম্মো ন চরিতব্বো’’তি? অস্সোসুং খো ভিক্খূ ৰিসাখায মিগারমাতুযা উজ্ঝাযন্তিযা খিয্যন্তিযা ৰিপাচেন্তিযা। অথ খো তে ভিক্খূ ভগৰতো এতমত্থং আরোচেসুং। ন, ভিক্খৰে, এৰরূপা কতিকা কাতব্বা – ‘ন অন্তরাৰস্সং পব্বাজেতব্ব’ন্তি। যো করেয্য, আপত্তি দুক্কটস্সাতি। অধম্মিককতিকা নিট্ঠিতা। ১১৮. পটিস্সৰদুক্কটাপত্তি ২০৬. তেন খো পন সমযেন আযস্মতা উপনন্দেন সক্যপুত্তেন রঞ্ঞো পসেনদিস্স কোসলস্স ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো অদ্দস অন্তরামগ্গে দ্ৰে আৰাসে বহুচীৰরকে। তস্স এতদহোসি – ‘‘যংনূনাহং ইমেসু দ্ৰীসু আৰাসেসু ৰস্সং ৰসেয্যং। এৰং মে বহুং চীৰরং [বহুচীৰরং (ক॰)] উপ্পজ্জিস্সতী’’তি। সো তেসু দ্ৰীসু আৰাসেসু ৰস্সং ৰসি। রাজা পসেনদি কোসলো উজ্ঝাযতি খিয্যতি ৰিপাচেতি – ‘‘কথঞ্হি নাম অয্যো উপনন্দো সক্যপুত্তো অম্হাকং ৰস্সাৰাসং পটিস্সুণিত্ৰা ৰিসংৰাদেস্সতি। ননু ভগৰতা অনেকপরিযাযেন মুসাৰাদো গরহিতো, মুসাৰাদা ৰেরমণী পসত্থা’’তি। অস্সোসুং খো ভিক্খূ রঞ্ঞো পসেনদিস্স কোসলস্স উজ্ঝাযন্তস্স খিয্যন্তস্স ৰিপাচেন্তস্স। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো রঞ্ঞো পসেনদিস্স কোসলস্স ৰস্সাৰাসং পটিস্সুণিত্ৰা ৰিসংৰাদেস্সতি। ননু ভগৰতা অনেকপরিযাযেন মুসাৰাদো গরহিতো, মুসাৰাদা ৰেরমণী পসত্থা’’তি। অথ খো তে ভিক্খূ ভগৰতো এতমত্থং আরোচেসুং…পে॰… অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং উপনন্দং সক্যপুত্তং পটিপুচ্ছি – ‘‘সচ্চং কির ত্ৰং, উপনন্দ, রঞ্ঞো পসেনদিস্স কোসলস্স ৰস্সাৰাসং পটিস্সুণিত্ৰা ৰিসংৰাদেসী’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, রঞ্ঞো পসেনদিস্স কোসলস্স ৰস্সাৰাসং পটিস্সুণিত্ৰা ৰিসংৰাদেস্সসি। ননু মযা, মোঘপুরিস, অনেকপরিযাযেন মুসাৰাদো গরহিতো, মুসাৰাদা ৰেরমণী পসত্থা। নেতং, মোঘপুরিস, অপ্পসন্নানং ৰা পসাদায…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি – ২০৭. ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো পস্সতি অন্তরামগ্গে দ্ৰে আৰাসে বহুচীৰরকে। তস্স এৰং হোতি – ‘‘যংনূনাহং ইমেসু দ্ৰীসু আৰাসেসু ৰস্সং ৰসেয্যং। এৰং মে বহুং চীৰরং উপ্পজ্জিস্সতী’’তি। সো তেসু দ্ৰীসু আৰাসেসু ৰস্সং ৰসতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে [পাটিপদেন (ক॰)] ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ অকরণীযো পক্কমতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ সকরণীযো পক্কমতি। তস্স , ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা অকরণীযো পক্কমতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা সকরণীযো পক্কমতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং বহিদ্ধা ৰীতিনামেতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা সত্তাহকরণীযেন পক্কমতি । সো তং সত্তাহং অন্তো সন্নিৰত্তং করোতি। তস্স, ভিক্খৰে, ভিক্খুনো পুরিমিকা চ পঞ্ঞাযতি, পটিস্সৰে চ অনাপত্তি। ইধ পন, ভিক্খৰে , ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি , পরিৰেণং সম্মজ্জতি। সো সত্তাহং অনাগতায পৰারণায সকরণীযো পক্কমতি। আগচ্ছেয্য ৰা সো, ভিক্খৰে, ভিক্খু তং আৰাসং ন ৰা আগচ্ছেয্য, তস্স, ভিক্খৰে, ভিক্খুনো পুরিমিকা চ পঞ্ঞাযতি, পটিস্সৰে চ অনাপত্তি। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গন্ত্ৰা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ অকরণীযো পক্কমতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পুরিমিকায। সো তং আৰাসং গন্ত্ৰা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ সকরণীযো পক্কমতি…পে॰… সো দ্ৰীহতীহং ৰসিত্ৰা অকরণীযো পক্কমতি…পে॰… সো দ্ৰীহতীহং ৰসিত্ৰা সকরণীযো পক্কমতি…পে॰… সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং বহিদ্ধা ৰীতিনামেতি। তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স…পে॰… সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং অন্তো সন্নিৰত্তং করোতি। তস্স, ভিক্খৰে, ভিক্খুনো পুরিমিকা চ পঞ্ঞাযতি, পটিস্সৰে চ অনাপত্তি…পে॰… সো সত্তাহং অনাগতায পৰারণায সকরণীযো পক্কমতি। আগচ্ছেয্য ৰা সো, ভিক্খৰে, ভিক্খু তং আৰাসং ন ৰা আগচ্ছেয্য, তস্স, ভিক্খৰে, ভিক্খুনো পুরিমিকা চ পঞ্ঞাযতি, পটিস্সৰে চ অনাপত্তি। ২০৮. ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ অকরণীযো পক্কমতি। তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ সকরণীযো পক্কমতি। তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা অকরণীযো পক্কমতি । তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা সকরণীযো পক্কমতি। তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং বহিদ্ধা ৰীতিনামেতি। তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং অন্তো সন্নিৰত্তং করোতি। তস্স, ভিক্খৰে, ভিক্খুনো পচ্ছিমিকা চ পঞ্ঞাযতি, পটিস্সৰে চ অনাপত্তি। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গচ্ছন্তো বহিদ্ধা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো সত্তাহং অনাগতায কোমুদিযা চাতুমাসিনিযা সকরণীযো পক্কমতি। আগচ্ছেয্য ৰা সো, ভিক্খৰে, ভিক্খু তং আৰাসং ন ৰা আগচ্ছেয্য, তস্স, ভিক্খৰে, ভিক্খুনো পচ্ছিমিকা চ পঞ্ঞাযতি, পটিস্সৰে চ অনাপত্তি। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গন্ত্ৰা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ অকরণীযো পক্কমতি। তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গন্ত্ৰা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো তদহেৰ সকরণীযো পক্কমতি…পে॰… সো দ্ৰীহতীহং ৰসিত্ৰা অকরণীযো পক্কমতি …পে॰… সো দ্ৰীহতীহং ৰসিত্ৰা সকরণীযো পক্কমতি…পে॰… সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং বহিদ্ধা ৰীতিনামেতি। তস্স, ভিক্খৰে, ভিক্খুনো পচ্ছিমিকা চ ন পঞ্ঞাযতি, পটিস্সৰে চ আপত্তি দুক্কটস্স…পে॰… সো দ্ৰীহতীহং ৰসিত্ৰা সত্তাহকরণীযেন পক্কমতি। সো তং সত্তাহং অন্তো সন্নিৰত্তং করোতি। তস্স ভিক্খৰে, ভিক্খুনো পচ্ছিমিকা চ পঞ্ঞাযতি, পটিস্সৰে চ অনাপত্তি। ইধ পন, ভিক্খৰে, ভিক্খুনা ৰস্সাৰাসো পটিস্সুতো হোতি পচ্ছিমিকায। সো তং আৰাসং গন্ত্ৰা উপোসথং করোতি, পাটিপদে ৰিহারং উপেতি, সেনাসনং পঞ্ঞপেতি, পানীযং পরিভোজনীযং উপট্ঠাপেতি, পরিৰেণং সম্মজ্জতি। সো সত্তাহং অনাগতায কোমুদিযা চাতুমাসিনিযা সকরণীযো পক্কমতি। আগচ্ছেয্য ৰা সো, ভিক্খৰে, ভিক্খু তং আৰাসং ন ৰা আগচ্ছেয্য, তস্স, ভিক্খৰে, ভিক্খুনো পচ্ছিমিকা চ পঞ্ঞাযতি, পটিস্সৰে চ অনাপত্তীতি। পটিস্সৰদুক্কটাপত্তি নিট্ঠিতা। ৰস্সূপনাযিকক্খন্ধকো ততিযো। ১১৯. তস্সুদ্দানং উপগন্তুং কদা চেৰ, কতি অন্তরাৰস্স চ। ন ইচ্ছন্তি চ সঞ্চিচ্চ, উক্কড্ঢিতুং উপাসকো॥ গিলানো মাতা চ পিতা, ভাতা চ অথ ঞাতকো। ভিক্খুগতিকো ৰিহারো, ৰাল়া চাপি সরীসপা॥ চোরো চেৰ পিসাচা চ, দড্ঢা তদুভযেন চ। ৰূল়্হোদকেন ৰুট্ঠাসি, বহুতরা চ দাযকা॥ লূখপ্পণীতসপ্পায, ভেসজ্জুপট্ঠকেন চ। ইত্থী ৰেসী কুমারী চ, পণ্ডকো ঞাতকেন চ॥ রাজা চোরা ধুত্তা নিধি, ভেদঅট্ঠৰিধেন [ভেদা অট্ঠৰিধেন (সী॰ স্যা॰)] চ। ৰজসত্থা চ নাৰা চ, সুসিরে ৰিটভিযা চ॥ অজ্ঝোকাসে ৰস্সাৰাসো, অসেনাসনিকেন চ। ছৰকুটিকা ছত্তে চ, চাটিযা চ উপেন্তি তে॥ কতিকা পটিস্সুণিত্ৰা, বহিদ্ধা চ উপোসথা। পুরিমিকা পচ্ছিমিকা, যথাঞাযেন যোজযে॥ অকরণী পক্কমতি, সকরণী তথেৰ চ। দ্ৰীহতীহা চ পুন চ [দ্ৰীহতীহং ৰসিত্ৰান (সী॰)], সত্তাহকরণীযেন চ॥ সত্তাহনাগতা চেৰ, আগচ্ছেয্য ন এয্য ৰা। ৰত্থুদ্দানে অন্তরিকা, তন্তিমগ্গং নিসামযেতি॥ ইমম্হি খন্ধকে ৰত্থূনি দ্ৰেপণ্ণাস। ৰস্সূপনাযিকক্খন্ধকো নিট্ঠিতো। |
Copyright © 2011 Bangladesh Buddhist. All rights reserved |