 |
অপরগাথাসঙ্গণিকং
১. চোদনাদিপুচ্ছাৰিস্সজ্জনা ৩৫৯. চোদনা কিমত্থায, সারণা কিস্স কারণা। সঙ্ঘো কিমত্থায, মতিকম্মং পন কিস্স কারণা॥ চোদনা সারণত্থায, নিগ্গহত্থায সারণা। সঙ্ঘো পরিগ্গহত্থায, মতিকম্মং পন পাটিযেক্কং॥ মা খো তুরিতো অভণি, মা খো চণ্ডিকতো ভণি। মা খো পটিঘং জনযি, সচে অনুৰিজ্জকো তুৰং॥ মা খো সহসা অভণি, কথং ৰিগ্গাহিকং অনত্থসংহিতং। সুত্তে ৰিনযে অনুলোমে, পঞ্ঞত্তে অনুলোমিকে॥ অনুযোগৰত্তং নিসাময, কুসলেন বুদ্ধিমতা কতং। সুৰুত্তং সিক্খাপদানুলোমিকং, গতিং ন নাসেন্তো সম্পরাযিকং। হিতেসী অনুযুঞ্জস্সু, কালেনত্থূপসংহিতং॥ চুদিতস্স চ চোদকস্স চ। সহসা ৰোহারং মা পধারেসি। চোদকো আহ আপন্নোতি। চুদিতকো আহ অনাপন্নোতি॥ উভো অনুক্খিপন্তো, পটিঞ্ঞানুসন্ধিতেন কারযে। পটিঞ্ঞা লজ্জীসু কতা, অলজ্জীসু এৰং ন ৰিজ্জতি। বহুম্পি অলজ্জী ভাসেয্য, ৰত্তানুসন্ধিতেন [ৰুত্তানুসন্ধিতেন (সী॰ স্যা॰ ক॰)] কারযে॥ অলজ্জী কীদিসো হোতি, পটিঞ্ঞা যস্স ন রূহতি। এতঞ্চ [এৰঞ্চ (ক॰)] তাহং পুচ্ছামি, কীদিসো ৰুচ্চতি অলজ্জী পুগ্গলো॥ সঞ্চিচ্চ আপত্তিং আপজ্জতি, আপত্তিং পরিগূহতি। অগতিগমনঞ্চ গচ্ছতি, এদিসো ৰুচ্চতি অলজ্জীপুগ্গলো॥ সচ্চং অহম্পি জানামি, এদিসো ৰুচ্চতি অলজ্জীপুগ্গলো। অঞ্ঞঞ্চ তাহং পুচ্ছামি, কীদিসো ৰুচ্চতি লজ্জীপুগ্গলো॥ সঞ্চিচ্চ আপত্তিং নাপজ্জতি, আপত্তিং ন পরিগূহতি। অগতিগমনং ন গচ্ছতি, এদিসো ৰুচ্চতি লজ্জীপুগ্গলো॥ সচ্চং অহম্পি জানামি, এদিসো ৰুচ্চতি লজ্জীপুগ্গলো। অঞ্ঞঞ্চ তাহং পুচ্ছামি, কীদিসো ৰুচ্চতি অধম্মচোদকো॥ অকালে চোদেতি অভূতেন। ফরুসেন অনত্থসংহিতেন। দোসন্তরো চোদেতি নো মেত্তাচিত্তো। এদিসো ৰুচ্চতি অধম্মচোদকো॥ সচ্চং অহম্পি জানামি, এদিসো ৰুচ্চতি অধম্মচোদকো। অঞ্ঞঞ্চ তাহং পুচ্ছামি, কীদিসো ৰুচ্চতি ধম্মচোদকো॥ কালেন চোদেতি ভূতেন, সণ্হেন অত্থসংহিতেন। মেত্তাচিত্তো চোদেতি নো দোসন্তরো। এদিসো ৰুচ্চতি ধম্মচোদকো॥ সচ্চং অহম্পি জানামি, এদিসো ৰুচ্চতি ধম্মচোদকো। অঞ্ঞঞ্চ তাহং পুচ্ছামি, কীদিসো ৰুচ্চতি বালচোদকো॥ পুব্বাপরং ন জানাতি, পুব্বাপরস্স অকোৰিদো। অনুসন্ধিৰচনপথং ন জানাতি। অনুসন্ধিৰচনপথস্স অকোৰিদো। এদিসো ৰুচ্চতি বালচোদকো॥ সচ্চং অহম্পি জানামি, এদিসো ৰুচ্চতি বালচোদকো। অঞ্ঞঞ্চ তাহং পুচ্ছামি, কীদিসো ৰুচ্চতি পণ্ডিতচোদকো॥ পুব্বাপরম্পি জানাতি, পুব্বাপরস্স কোৰিদো। অনুসন্ধিৰচনপথং জানাতি, অনুসন্ধিৰচনপথস্স কোৰিদো। এদিসো ৰুচ্চতি পণ্ডিতচোদকো॥ সচ্চং অহম্পি জানামি, এদিসো ৰুচ্চতি পণ্ডিতচোদকো। অঞ্ঞঞ্চ তাহং পুচ্ছামি, চোদনা কিন্তি ৰুচ্চতি॥ সীলৰিপত্তিযা চোদেতি, অথো আচারদিট্ঠিযা। আজীৰেনপি চোদেতি, চোদনা তেন ৰুচ্চতীতি॥ অপরং গাথাসঙ্গণিকং নিট্ঠিতং। |
Copyright © 2011 Bangladesh Buddhist. All rights reserved |
