অধিকরণভেদো
১. উক্কোটনভেদাদি ৩৪০. [চূল়ৰ॰ ২১৫; পরি॰ ২৭৫] চত্তারি অধিকরণানি। ৰিৰাদাধিকরণং, অনুৰাদাধিকরণং, আপত্তাধিকরণং, কিচ্চাধিকরণং – ইমানি চত্তারি অধিকরণানি। ইমেসং চতুন্নং অধিকরণানং কতি উক্কোটা? ইমেসং চতুন্নং অধিকরণানং দস উক্কোটা। ৰিৰাদাধিকরণস্স দ্ৰে উক্কোটা, অনুৰাদাধিকরণস্স চত্তারো উক্কোটা, আপত্তাধিকরণস্স তযো উক্কোটা, কিচ্চাধিকরণস্স একো উক্কোটো – ইমেসং চতুন্নং অধিকরণানং ইমে দস উক্কোটা। ৰিৰাদাধিকরণং উক্কোটেন্তো কতি সমথে উক্কোটেতি? অনুৰাদাধিকরণং উক্কোটেন্তো কতি সমথে উক্কোটেতি? আপত্তাধিকরণং উক্কোটেন্তো কতি সমথে উক্কোটেতি? কিচ্চাধিকরণং উক্কোটেন্তো কতি সমথে উক্কোটেতি? ৰিৰাদাধিকরণং উক্কোটেন্তো দ্ৰে সমথে উক্কোটেতি। অনুৰাদাধিকরণং উক্কোটেন্তো চত্তারো সমথে উক্কোটেতি। আপত্তাধিকরণং উক্কোটেন্তো তযো সমথে উক্কোটেতি। কিচ্চাধিকরণং উক্কোটেন্তো একং সমথং উক্কোটেতি। ৩৪১. কতি উক্কোটা? কতিহাকারেহি উক্কোটনং পসৰতি? কতিহঙ্গেহি সমন্নাগতো পুগ্গলো অধিকরণং উক্কোটেতি? কতি পুগ্গলা অধিকরণং উক্কোটেন্তা আপত্তিং আপজ্জন্তি? দ্ৰাদস উক্কোটা। দসহাকারেহি উক্কোটনং পসৰতি। চতূহঙ্গেহি সমন্নাগতো পুগ্গলো অধিকরণং উক্কোটেতি। চত্তারো পুগ্গলা অধিকরণং উক্কোটেন্তা আপত্তিং আপজ্জন্তি? কতমে দ্ৰাদস উক্কোটা? অকতং কম্মং, দুক্কটং কম্মং, পুন কাতব্বং কম্মং, অনিহতং, দুন্নিহতং, পুন নিহনিতব্বং, অৰিনিচ্ছিতং, দুৰিনিচ্ছিতং, পুন ৰিনিচ্ছিতব্বং, অৰূপসন্তং, দুৰূপসন্তং, পুন ৰূপসমেতব্বন্তি – ইমে দ্ৰাদস উক্কোটা। কতমেহি দসহাকারেহি উক্কোটনং পসৰতি? তত্থ জাতকং অধিকরণং উক্কোটেতি, তত্থ জাতকং ৰূপসন্তং অধিকরণং উক্কোটেতি, অন্তরামগ্গে অধিকরণং উক্কোটেতি, অন্তরামগ্গে ৰূপসন্তং অধিকরণং উক্কোটেতি, তত্থ গতং অধিকরণং উক্কোটেতি, তত্থ গতং ৰূপসন্তং অধিকরণং উক্কোটেতি, সতিৰিনযং উক্কোটেতি, অমূল়্হৰিনযং উক্কোটেতি, তস্সপাপিযসিকং উক্কোটেতি, তিণৰত্থারকং উক্কোটেতি – ইমেহি দসহাকারেহি উক্কোটনং পসৰতি। কতমেহি চতূহঙ্গেহি সমন্নাগতো পুগ্গলো অধিকরণং উক্কোটেতি? ছন্দাগতিং গচ্ছন্তো অধিকরণং উক্কোটেতি, দোসাগতিং গচ্ছন্তো অধিকরণং উক্কোটেতি, মোহাগতিং গচ্ছন্তো অধিকরণং উক্কোটেতি, ভযাগতিং গচ্ছন্তো অধিকরণং উক্কোটেতি – ইমেহি চতূহঙ্গেহি সমন্নাগতো পুগ্গলো অধিকরণং উক্কোটেতি। কতমে চত্তারো পুগ্গলা অধিকরণং উক্কোটেন্তা আপত্তিং আপজ্জন্তি? তদহুপসম্পন্নো উক্কোটেতি উক্কোটনকং পাচিত্তিযং, আগন্তুকো উক্কোটেতি উক্কোটনকং পাচিত্তিযং, কারকো উক্কোটেতি উক্কোটনকং পাচিত্তিযং, ছন্দদাযকো উক্কোটেতি উক্কোটনকং পাচিত্তিযং – ইমে চত্তারো পুগ্গলা অধিকরণং উক্কোটেন্তা আপত্তিং আপজ্জন্তি। ২. অধিকরণনিদানাদি ৩৪২. ৰিৰাদাধিকরণং কিংনিদানং, কিংসমুদযং, কিংজাতিকং, কিংপভৰং, কিংসম্ভারং, কিংসমুট্ঠানং? অনুৰাদাধিকরণং কিংনিদানং, কিংসমুদযং, কিংজাতিকং, কিংপভৰং, কিংসম্ভারং, কিংসমুট্ঠানং? আপত্তাধিকরণং কিংনিদানং, কিংসমুদযং, কিংজাতিকং, কিংপভৰং, কিংসম্ভারং, কিংসমুট্ঠানং ? কিচ্চাধিকরণং কিংনিদানং, কিংসমুদযং, কিংজাতিকং, কিংপভৰং, কিংসম্ভারং, কিংসমুট্ঠানং? ৰিৰাদাধিকরণং ৰিৰাদনিদানং ৰিৰাদসমুদযং ৰিৰাদজাতিকং ৰিৰাদপভৰং ৰিৰাদসম্ভারং ৰিৰাদসমুট্ঠানং। অনুৰাদাধিকরণং অনুৰাদনিদানং অনুৰাদসমুদযং অনুৰাদজাতিকং অনুৰাদপভৰং অনুৰাদসম্ভারং অনুৰাদসমুট্ঠানং। আপত্তাধিকরণং আপত্তিনিদানং আপত্তিসমুদযং আপত্তিজাতিকং আপত্তিপভৰং আপত্তিসম্ভারং আপত্তিসমুট্ঠানং। কিচ্চাধিকরণং কিচ্চযনিদানং কিচ্চযসমুদযং কিচ্চযজাতিকং কিচ্চযপভৰং কিচ্চযসম্ভারং কিচ্চযসমুট্ঠানং। ৰিৰাদাধিকরণং কিংনিদানং, কিংসমুদযং, কিংজাতিকং, কিংপভৰং, কিংসম্ভারং, কিংসমুট্ঠানং? অনুৰাদাধিকরণং…পে॰… আপত্তাধিকরণং…পে॰… কিচ্চাধিকরণং কিংনিদানং, কিংসমুদযং, কিংজাতিকং, কিংপভৰং, কিংসম্ভারং, কিংসমুট্ঠানং? ৰিৰাদাধিকরণং হেতুনিদানং, হেতুসমুদযং, হেতুজাতিকং, হেতুপভৰং, হেতুসম্ভারং, হেতুসমুট্ঠানং। অনুৰাদাধিকরণং…পে॰… আপত্তাধিকরণং…পে॰… কিচ্চাধিকরণং হেতুনিদানং, হেতুসমুদযং, হেতুজাতিকং, হেতুপভৰং, হেতুসম্ভারং, হেতুসমুট্ঠানং। ৰিৰাদাধিকরণং কিংনিদানং, কিংসমুদযং, কিংজাতিকং, কিংপভৰং, কিংসম্ভারং, কিংসমুট্ঠানং? অনুৰাদাধিকরণং …পে॰… আপত্তাধিকরণং…পে॰… কিচ্চাধিকরণং কিংনিদানং, কিংসমুদযং, কিংজাতিকং, কিংপভৰং, কিংসম্ভারং, কিংসমুট্ঠানং? ৰিৰাদাধিকরণং পচ্চযনিদানং, পচ্চযসমুদযং, পচ্চযজাতিকং, পচ্চযপভৰং, পচ্চযসম্ভারং, পচ্চযসমুট্ঠানং। অনুৰাদাধিকরণং…পে॰… আপত্তাধিকরণং…পে॰… কিচ্চাধিকরণং পচ্চযনিদানং, পচ্চযসমুদযং, পচ্চযজাতিকং, পচ্চযপভৰং, পচ্চযসম্ভারং, পচ্চযসমুট্ঠানং। ৩. অধিকরণমূলাদি ৩৪৩. চতুন্নং অধিকরণানং কতি মূলানি, কতি সমুট্ঠানা? চতুন্নং অধিকরণানং তেত্তিংস মূলানি, তেত্তিংস সমুট্ঠানা। চতুন্নং অধিকরণানং কতমানি তেত্তিংস মূলানি? ৰিৰাদাধিকরণস্স দ্ৰাদস মূলানি, অনুৰাদাধিকরণস্স চুদ্দস মূলানি, আপত্তাধিকরণস্স ছ মূলানি, কিচ্চাধিকরণস্স একং মূলং, সঙ্ঘো – চতুন্নং অধিকরণানং ইমানি তেত্তিংস মূলানি। চতুন্নং অধিকরণানং কতমে তেত্তিংস সমুট্ঠানা? ৰিৰাদাধিকরণস্স অট্ঠারসভেদকরৰত্থূনি সমুট্ঠানা, অনুৰাদাধিকরণস্স চতস্সো ৰিপত্তিযো সমুট্ঠানা, আপত্তাধিকরণস্স সত্তাপত্তিক্খন্ধা সমুট্ঠানা, কিচ্চাধিকরণস্স চত্তারি কম্মানি সমুট্ঠানা – চতুন্নং অধিকরণানং ইমে তেত্তিংস সমুট্ঠানা। ৪. অধিকরণপচ্চযাপত্তি ৩৪৪. ৰিৰাদাধিকরণং আপত্তানাপত্তীতি? ৰিৰাদাধিকরণং ন আপত্তি। কিং পন ৰিৰাদাধিকরণপচ্চযা আপত্তিং আপজ্জেয্যাতি? আম, ৰিৰাদাধিকরণপচ্চযা আপত্তিং আপজ্জেয্য। ৰিৰাদাধিকরণপচ্চযা কতি আপত্তিযো আপজ্জতি? ৰিৰাদাধিকরণপচ্চযা দ্ৰে আপত্তিযো আপজ্জতি। উপসম্পন্নং ওমসতি, আপত্তি পাচিত্তিযস্স; অনুপসম্পন্নং ওমসতি, আপত্তি দুক্কটস্স – ৰিৰাদাধিকরণপচ্চযা ইমা দ্ৰে আপত্তিযো আপজ্জতি। তা আপত্তিযো চতুন্নং ৰিপত্তীনং কতি ৰিপত্তিযো ভজন্তি? চতুন্নং অধিকরণানং কতমং অধিকরণং? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি? কতিহি অধিকরণেহি কতিসু ঠানেসু কতিহি সমথেহি সম্মন্তি? তা আপত্তিযো চতুন্নং ৰিপত্তীনং একং ৰিপত্তিং ভজন্তি – আচারৰিপত্তিং। চতুন্নং অধিকরণানং , আপত্তাধিকরণং। সত্তন্নং আপত্তিক্খন্ধানং দ্ৰীহি আপত্তিক্খন্ধেহি সঙ্গহিতা – সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন। ছন্নং আপত্তিসমুট্ঠানানং তীহি সমুট্ঠানেহি সমুট্ঠন্তি। একেন অধিকরণেন – কিচ্চাধিকরণেন; তীসু ঠানেসু – সঙ্ঘমজ্ঝে, গণমজ্ঝে, পুগ্গলস্স সন্তিকে; তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ। ৩৪৫. অনুৰাদাধিকরণং আপত্তানাপত্তীতি? অনুৰাদাধিকরণং ন আপত্তি। কিং পন অনুৰাদাধিকরণপচ্চযা আপত্তিং আপজ্জেয্যাতি? আম, অনুৰাদাধিকরণপচ্চযা আপত্তিং আপজ্জেয্য। অনুৰাদাধিকরণপচ্চযা, কতি আপত্তিযো আপজ্জতি? অনুৰাদাধিকরণপচ্চযা তিস্সো আপত্তিযো আপজ্জতি। ভিক্খুং অমূলকেন পারাজিকেন ধম্মেন অনুদ্ধংসেতি, আপত্তি সঙ্ঘাদিসেসস্স; অমূলকেন সঙ্ঘাদিসেসেন অনুদ্ধংসেতি, আপত্তি পাচিত্তিযস্স; অমূলিকায আচারৰিপত্তিযা অনুদ্ধংসেতি, আপত্তি দুক্কটস্স – অনুৰাদাধিকরণপচ্চযা ইমা তিস্সো আপত্তিযো আপজ্জতি। তা আপত্তিযো চতুন্নং ৰিপত্তীনং কতি ৰিপত্তিযো ভজন্তি? চতুন্নং অধিকরণানং কতমং অধিকরণং? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি? কতিহি অধিকরণেহি কতিসু ঠানেসু কতিহি সমথেহি সম্মন্তি? তা আপত্তিযো চতুন্নং ৰিপত্তীনং দ্ৰে ৰিপত্তিযো ভজন্তি – সিযা সীলৰিপত্তিং, সিযা আচারৰিপত্তিং। চতুন্নং অধিকরণানং, আপত্তাধিকরণং। সত্তন্নং আপত্তিক্খন্ধানং তীহি আপত্তিক্খন্ধেহি সঙ্গহিতা – সিযা সঙ্ঘাদিসেসাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন। ছন্নং আপত্তিসমুট্ঠানানং তীহি সমুট্ঠানেহি সমুট্ঠন্তি। যা তা আপত্তিযো গরুকা তা আপত্তিযো একেন অধিকরণেন – কিচ্চাধিকরণেন; একম্হি ঠানে – সঙ্ঘমজ্ঝে; দ্ৰীহি সমথেহি সম্মন্তি – সম্মুখাৰিনযেন চ পটিঞ্ঞাতকরণেন চ। যা তা আপত্তিযো লহুকা তা আপত্তিযো একেন অধিকরণেন – কিচ্চাধিকরণেন; তীসু ঠানেসু – সঙ্ঘমজ্ঝে গণমজ্ঝে পুগ্গলস্স সন্তিকে; তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ , সিযা সম্মুখাৰিনযেন চ তিণৰত্থারকেন চ। ৩৪৬. আপত্তাধিকরণং আপত্তানাপত্তীতি? আপত্তাধিকরণং আপত্তি। কিং পন আপত্তাধিকরণপচ্চযা আপত্তিং আপজ্জেয্যাতি? আম, আপত্তাধিকরণপচ্চযা আপত্তিং আপজ্জেয্য। আপত্তাধিকরণপচ্চযা কতি আপত্তিযো আপজ্জতি? আপত্তাধিকরণপচ্চযা চতস্সো আপত্তিযো আপজ্জতি। ভিক্খুনী জানং পারাজিকং ধম্মং [পারাজিকং ধম্মং অজ্ঝাপন্নং (স্যা॰)] পটিচ্ছাদেতি, আপত্তি পারাজিকস্স; ৰেমতিকা পটিচ্ছাদেতি, আপত্তি থুল্লচ্চযস্স; ভিক্খু সঙ্ঘাদিসেসং পটিচ্ছাদেতি, আপত্তি পাচিত্তিযস্স; আচারৰিপত্তিং পটিচ্ছাদেতি, আপত্তি দুক্কটস্স – আপত্তাধিকরণপচ্চযা ইমা চতস্সো আপত্তিযো আপজ্জতি। তা আপত্তিযো চতুন্নং ৰিপত্তীনং কতি ৰিপত্তিযো ভজন্তি? চতুন্নং অধিকরণানং কতমং অধিকরণং? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি ? কতিহি অধিকরণেহি কতিসু ঠানেসু কতিহি সমথেহি সম্মন্তি? তা আপত্তিযো চতুন্নং ৰিপত্তীনং দ্ৰে ৰিপত্তিযো ভজন্তি – সিযা সীলৰিপত্তিং সিযা আচারৰিপত্তিং। চতুন্নং অধিকরণানং – আপত্তাধিকরণং। সত্তন্নং আপত্তিক্খন্ধানং চতূহি আপত্তিক্খন্ধেহি সঙ্গহিতা – সিযা পারাজিকাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন। ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ ৰাচতো চ চিত্ততো চ সমুট্ঠন্তি। যা সা আপত্তি অনৰসেসা সা আপত্তি ন কতমেন অধিকরণেন, ন কতমম্হি ঠানে, ন কতমেন সমথেন সম্মতি। যা তা আপত্তিযো লহুকা তা আপত্তিযো একেন অধিকরণেন – কিচ্চাধিকরণেন; তীসু ঠানেসু – সঙ্ঘমজ্ঝে, গণমজ্ঝে, পুগ্গলস্স সন্তিকে; তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ। ৩৪৭. কিচ্চাধিকরণং আপত্তানাপত্তীতি? কিচ্চাধিকরণং ন আপত্তি। কিং পন কিচ্চাধিকরণপচ্চযা আপত্তিং আপজ্জেয্যাতি? আম, কিচ্চাধিকরণপচ্চযা আপত্তিং আপজ্জেয্য। কিচ্চাধিকরণপচ্চযা কতি আপত্তিযো আপজ্জতি? কিচ্চাধিকরণপচ্চযা পঞ্চ আপত্তিযো আপজ্জতি। উক্খিত্তানুৰত্তিকা ভিক্খুনী যাৰততিযং সমনুভাসনায ন পটিনিস্সজ্জতি, ঞত্তিযা দুক্কটং; দ্ৰীহি কম্মৰাচাহি থুল্লচ্চযা; কম্মৰাচাপরিযোসানে আপত্তি পারাজিকস্স; ভেদকানুৰত্তকা ভিক্খূ যাৰততিযং সমনুভাসনায ন পটিনিস্সজ্জন্তি, আপত্তি সঙ্ঘাদিসেসস্স; পাপিকায দিট্ঠিযা যাৰততিযং সমনুভাসনায ন পটিনিস্সজ্জন্তি, আপত্তি পাচিত্তিযস্স – কিচ্চাধিকরণপচ্চযা ইমা পঞ্চ আপত্তিযো আপজ্জতি। তা আপত্তিযো চতুন্নং ৰিপত্তীনং কতি ৰিপত্তিযো ভজন্তি? চতুন্নং অধিকরণানং কতমং অধিকরণং? সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা? ছন্নং আপত্তিসমুট্ঠানানং কতিহি সমুট্ঠানেহি সমুট্ঠন্তি? কতিহি অধিকরণেহি কতিসু ঠানেসু কতিহি সমথেহি সম্মন্তি? তা আপত্তিযো চতুন্নং ৰিপত্তীনং দ্ৰে ৰিপত্তিযো ভজন্তি – সিযা সীলৰিপত্তিং সিযা আচারৰিপত্তিং। চতুন্নং অধিকরণানং – আপত্তাধিকরণং। সত্তন্নং আপত্তিক্খন্ধানং পঞ্চহি আপত্তিক্খন্ধেহি সঙ্গহিতা – সিযা পারাজিকাপত্তিক্খন্ধেন, সিযা সঙ্ঘাদিসেসাপত্তিক্খন্ধেন, সিযা থুল্লচ্চযাপত্তিক্খন্ধেন, সিযা পাচিত্তিযাপত্তিক্খন্ধেন, সিযা দুক্কটাপত্তিক্খন্ধেন। ছন্নং আপত্তিসমুট্ঠানানং একেন সমুট্ঠানেন সমুট্ঠন্তি – কাযতো চ ৰাচতো চ চিত্ততো চ সমুট্ঠন্তি। যা সা আপত্তি অনৰসেসা সা আপত্তি ন কতমেন অধিকরণেন, ন কতমম্হি ঠানে, ন কতমেন সমথেন সম্মতি। যা সা আপত্তি গরুকা সা আপত্তি একেন অধিকরণেন – কিচ্চাধিকরণেন; একম্হি ঠানে – সঙ্ঘমজ্ঝে; দ্ৰীহি সমথেহি সম্মতি – সম্মুখাৰিনযেন চ পটিঞ্ঞাতকরণেন চ। যা তা আপত্তিযো লহুকা তা আপত্তিযো একেন অধিকরণেন – কিচ্চাধিকরণেন; তীসু ঠানেসু – সঙ্ঘমজ্ঝে, গণমজ্ঝে, পুগ্গলস্স সন্তিকে; তীহি সমথেহি সম্মন্তি – সিযা সম্মুখাৰিনযেন চ পটিঞ্ঞাতকরণেন চ, সিযা সম্মুখাৰিনযেন চ তিণৰত্থারকেন চ। ৫. অধিকরণাধিপ্পাযো ৩৪৮. ৰিৰাদাধিকরণং হোতি অনুৰাদাধিকরণং, হোতি আপত্তাধিকরণং, হোতি কিচ্চাধিকরণং। ৰিৰাদাধিকরণং ন হোতি অনুৰাদাধিকরণং, ন হোতি আপত্তাধিকরণং, ন হোতি কিচ্চাধিকরণং; অপি চ, ৰিৰাদাধিকরণপচ্চযা হোতি অনুৰাদাধিকরণং, হোতি আপত্তাধিকরণং, হোতি কিচ্চাধিকরণং। যথা কথং ৰিয? [চূল়ৰ॰ ২১৫; পরি॰ ৩১৪] ইধ ভিক্খূ ৰিৰদন্তি – ধম্মোতি ৰা অধম্মোতি ৰা দুট্ঠুল্লাপত্তীতি ৰা অদুট্ঠুল্লাপত্তীতি ৰা। যং তত্থ ভণ্ডনং কলহো ৰিগ্গহো ৰিৰাদো নানাৰাদো অঞ্ঞথাৰাদো ৰিপচ্চতায ৰোহারো মেধকং, ইদং ৰুচ্চতি ৰিৰাদাধিকরণং। ৰিৰাদাধিকরণে সঙ্ঘো ৰিৰদতি ৰিৰাদাধিকরণং। ৰিৰদমানো অনুৰদতি অনুৰাদাধিকরণং। অনুৰদমানো আপত্তিং আপজ্জতি আপত্তাধিকরণং। তায আপত্তিযা সঙ্ঘো কম্মং করোতি কিচ্চাধিকরণং। এৰং ৰিৰাদাধিকরণপচ্চযা হোতি অনুৰাদাধিকরণং, হোতি আপত্তাধিকরণং, হোতি কিচ্চাধিকরণং। অনুৰাদাধিকরণং হোতি আপত্তাধিকরণং, হোতি কিচ্চাধিকরণং, হোতি ৰিৰাদাধিকরণং। অনুৰাদাধিকরণং ন হোতি আপত্তাধিকরণং, ন হোতি কিচ্চাধিকরণং, ন হোতি ৰিৰাদাধিকরণং; অপি চ, অনুৰাদাধিকরণপচ্চযা হোতি আপত্তাধিকরণং, হোতি কিচ্চাধিকরণং, হোতি ৰিৰাদাধিকরণং। যথা কথং ৰিয? ইধ ভিক্খূ ভিক্খুং অনুৰদন্তি সীলৰিপত্তিযা ৰা আচারৰিপত্তিযা ৰা দিট্ঠিৰিপত্তিযা ৰা আজীৰৰিপত্তিযা ৰা। যো তত্থ অনুৰাদো অনুৰদনা অনুল্লপনা অনুভণনা অনুসম্পৰঙ্কতা অব্ভুস্সহনতা অনুবলপ্পদানং, ইদং ৰুচ্চতি অনুৰাদাধিকরণং। অনুৰাদাধিকরণে সঙ্ঘো ৰিৰদতি, ৰিৰাদাধিকরণং। ৰিৰদমানো অনুৰদতি, অনুৰাদাধিকরণং। অনুৰদমানো আপত্তিং আপজ্জতি, আপত্তাধিকরণং। তায আপত্তিযা সঙ্ঘো কম্মং করোতি, কিচ্চাধিকরণং। এৰং অনুৰাদাধিকরণপচ্চযা হোতি আপত্তাধিকরণং, হোতি কিচ্চাধিকরণং, হোতি ৰিৰাদাধিকরণং। আপত্তাধিকরণং হোতি কিচ্চাধিকরণং, হোতি ৰিৰাদাধিকরণং, হোতি অনুৰাদাধিকরণং। আপত্তাধিকরণং ন হোতি কিচ্চাধিকরণং, ন হোতি ৰিৰাদাধিকরণং, ন হোতি অনুৰাদাধিকরণং; অপি চ, আপত্তাধিকরণপচ্চযা হোতি কিচ্চাধিকরণং, হোতি ৰিৰাদাধিকরণং, হোতি অনুৰাদাধিকরণং। যথা কথং ৰিয? [চূল়ৰ॰ ২১৫; পরি॰ ৩৪৮] পঞ্চপি আপত্তিক্খন্ধা আপত্তাধিকরণং, সত্তপি আপত্তিক্খন্ধা আপত্তাধিকরণং, ইদং ৰুচ্চতি আপত্তাধিকরণং। আপত্তাধিকরণে সঙ্ঘো ৰিৰদতি ৰিৰাদাধিকরণং। ৰিৰদমানো অনুৰদতি অনুৰাদাধিকরণং। অনুৰদমানো আপত্তিং আপজ্জতি আপত্তাধিকরণং। তায আপত্তিযা সঙ্ঘো কম্মং করোতি কিচ্চাধিকরণং। এৰং আপত্তাধিকরণপচ্চযা হোতি কিচ্চাধিকরণং, হোতি ৰিৰাদাধিকরণং, হোতি অনুৰাদাধিকরণং। কিচ্চাধিকরণং হোতি ৰিৰাদাধিকরণং, হোতি অনুৰাদাধিকরণং, হোতি আপত্তাধিকরণং। কিচ্চাধিকরণং ন হোতি ৰিৰাদাধিকরণং, ন হোতি অনুৰাদাধিকরণং, ন হোতি আপত্তাধিকরণং; অপি চ, কিচ্চাধিকরণপচ্চযা হোতি ৰিৰাদাধিকরণং, হোতি অনুৰাদাধিকরণং, হোতি আপত্তাধিকরণং। যথা কথং ৰিয? যা সঙ্ঘস্স কিচ্চযতা করণীযতা অপলোকনকম্মং ঞত্তিকম্মং ঞত্তিদুতিযকম্মং ঞত্তিচতুত্থকম্মং, ইদং ৰুচ্চতি কিচ্চাধিকরণং। কিচ্চাধিকরণে সঙ্ঘো ৰিৰদতি ৰিৰাদাধিকরণং। ৰিৰদমানো অনুৰদতি অনুৰাদাধিকরণং। অনুৰদমানো আপত্তিং আপজ্জতি আপত্তাধিকরণং। তায আপত্তিযা সঙ্ঘো কম্মং করোতি কিচ্চাধিকরণং। এৰং কিচ্চাধিকরণপচ্চযা হোতি ৰিৰাদাধিকরণং, হোতি অনুৰাদাধিকরণং, হোতি আপত্তাধিকরণং। ৬. পুচ্ছাৰারো ৩৪৯. যত্থ সতিৰিনযো তত্থ সম্মুখাৰিনযো? যত্থ সম্মুখাৰিনযো তত্থ সতিৰিনযো? যত্থ অমূল়্হৰিনযো তত্থ সম্মুখাৰিনযো? যত্থ সম্মুখাৰিনযো তত্থ অমূল়্হৰিনযো? যত্থ পটিঞ্ঞাতকরণং তত্থ সম্মুখাৰিনযো? যত্থ সম্মুখাৰিনযো তত্থ পটিঞ্ঞাতকরণং? যত্থ যেভুয্যসিকা তত্থ সম্মুখাৰিনযো? যত্থ সম্মুখাৰিনযো তত্থ যেভুয্যসিকা? যত্থ তস্সপাপিযসিকা তত্থ সম্মুখাৰিনযো? যত্থ সম্মুখাৰিনযো তত্থ তস্সপাপিযসিকা? যত্থ তিণৰত্থারকো তত্থ সম্মুখাৰিনযো? যত্থ সম্মুখাৰিনযো তত্থ তিণৰত্থারকো? ৭. ৰিস্সজ্জনাৰারো ৩৫০. যস্মিং সমযে সম্মুখাৰিনযেন চ সতিৰিনযেন চ অধিকরণং ৰূপসম্মতি – যত্থ সতিৰিনযো তত্থ সম্মুখাৰিনযো, যত্থ সম্মুখাৰিনযো তত্থ সতিৰিনযো, ন তত্থ অমূল়্হৰিনযো, ন তত্থ পটিঞ্ঞাতকরণং, ন তত্থ যেভুয্যসিকা, ন তত্থ তস্সপাপিযসিকা, ন তত্থ তিণৰত্থারকো। যস্মিং সমযে সম্মুখাৰিনযেন চ অমূল়্হৰিনযেন চ…পে॰… সম্মুখাৰিনযেন চ পটিঞ্ঞাতকরণেন চ…পে॰… সম্মুখাৰিনযেন চ যেভুয্যসিকায চ…পে॰… সম্মুখাৰিনযেন চ তস্সপাপিযসিকায চ…পে॰… সম্মুখাৰিনযেন চ তিণৰত্থারকেন চ অধিকরণং ৰূপসম্মতি – যত্থ তিণৰত্থারকো তত্থ সম্মুখাৰিনযো, যত্থ সম্মুখাৰিনযো তত্থ তিণৰত্থারকো, ন তত্থ সতিৰিনযো, ন তত্থ অমূল়্হৰিনযো, ন তত্থ পটিঞ্ঞাতকরণং, ন তত্থ যেভুয্যসিকা, ন তত্থ তস্সপাপিযসিকা। ৮. সংসট্ঠৰারো ৩৫১. সম্মুখাৰিনযোতি ৰা সতিৰিনযোতি ৰা – ইমে ধম্মা সংসট্ঠা উদাহু ৰিসংসট্ঠা? লব্ভা চ পনিমেসং ধম্মানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতুং? সম্মুখাৰিনযোতি ৰা অমূল়্হৰিনযোতি ৰা…পে॰… সম্মুখাৰিনযোতি ৰা পটিঞ্ঞাতকরণন্তি ৰা… সম্মুখাৰিনযোতি ৰা যেভুয্যসিকাতি ৰা… সম্মুখাৰিনযোতি ৰা তস্সপাপিযসিকাতি ৰা… সম্মুখাৰিনযোতি ৰা তিণৰত্থারকোতি – ইমে ধম্মা সংসট্ঠা উদাহু ৰিসংসট্ঠা ? লব্ভা চ পনিমেসং ধম্মানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতুং? সম্মুখাৰিনযোতি ৰা সতিৰিনযোতি ৰা – ইমে ধম্মা সংসট্ঠা, নো ৰিসংসট্ঠা; ন চ লব্ভা ইমেসং ধম্মানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতুং। সম্মুখাৰিনযোতি ৰা অমূল়্হৰিনযোতি ৰা…পে॰… সম্মুখাৰিনযোতি ৰা পটিঞ্ঞাতকরণন্তি ৰা… সম্মুখাৰিনযোতি ৰা যেভুয্যসিকাতি ৰা… সম্মুখাৰিনযোতি ৰা তস্সপাপিযসিকাতি ৰা… সম্মুখাৰিনযোতি ৰা তিণৰত্থারকোতি ৰা – ইমে ধম্মা সংসট্ঠা, নো ৰিসংসট্ঠা; ন চ লব্ভা ইমেসং ধম্মানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতুং। ৯. সত্তসমথনিদানং ৩৫২. সম্মুখাৰিনযো কিংনিদানো, কিংসমুদযো, কিংজাতিকো, কিংপভৰো, কিংসম্ভারো কিংসমুট্ঠানো? সতিৰিনযো কিংনিদানো, কিংসমুদযো, কিংজাতিকো, কিংপভৰো, কিংসম্ভারো, কিংসমুট্ঠানো? অমূল়্হৰিনযো কিংনিদানো, কিংসমুদযো, কিংজাতিকো, কিংপভৰো, কিংসম্ভারো, কিংসমুট্ঠানো? পটিঞ্ঞাতকরণং কিংনিদানং, কিংসমুদযং, কিংজাতিকং, কিংপভৰং, কিংসম্ভারং, কিংসমুট্ঠানং? যেভুয্যসিকা কিংনিদানা, কিংসমুদযা, কিংজাতিকা, কিংপভৰা, কিংসম্ভারা, কিংসমুট্ঠানা? তস্সপাপিযসিকা কিংনিদানা, কিংসমুদযা, কিংজাতিকা, কিংপভৰা, কিংসম্ভারা, কিংসমুট্ঠানা তিণৰত্থারকো কিংনিদানো, কিংসমুদযো, কিংজাতিকো, কিংপভৰো, কিংসম্ভারো, কিংসমুট্ঠানো? সম্মুখাৰিনযো নিদাননিদানো, নিদানসমুদযো, নিদানজাতিকো, নিদানপভৰো, নিদানসম্ভারো, নিদানসমুট্ঠানো। সতিৰিনযো…পে॰… অমূল়্হৰিনযো…পে॰… পটিঞ্ঞাতকরণং নিদাননিদানং, নিদানসমুদযং, নিদানজাতিকং, নিদানপভৰং, নিদানসম্ভারং, নিদানসমুট্ঠানং। যেভুয্যসিকা…পে॰… তস্সপাপিযসিকা নিদাননিদানা, নিদানসমুদযা, নিদানজাতিকা, নিদানপভৰা, নিদানসম্ভারা , নিদানসমুট্ঠানা। তিণৰত্থারকো নিদাননিদানো, নিদানসমুদযো, নিদানজাতিকো, নিদানপভৰো, নিদানসম্ভারো, নিদানসমুট্ঠানো। সম্মুখাৰিনযো কিংনিদানো, কিংসমুদযো, কিংজাতিকো, কিংপভৰো, কিংসম্ভারো, কিংসমুট্ঠানো ? সতিৰিনযো…পে॰… অমূল়্হৰিনযো…পে॰… পটিঞ্ঞাতকরণং…পে॰… যেভুয্যসিকা…পে॰… তস্সপাপিযসিকা…পে॰… তিণৰত্থারকো কিংনিদানো, কিংসমুদযো, কিংজাতিকো, কিংপভৰো, কিংসম্ভারো, কিংসমুট্ঠানো? সম্মুখাৰিনযো হেতুনিদানো, হেতুসমুদযো, হেতুজাতিকো, হেতুপভৰো, হেতুসম্ভারো, হেতুসমুট্ঠানো । সতিৰিনযো…পে॰… অমূল়্হৰিনযো…পে॰… পটিঞ্ঞাতকরণং হেতুনিদানং, হেতুসমুদযং, হেতুজাতিকং, হেতুপভৰং, হেতুসম্ভারং, হেতুসমুট্ঠানং। যেভুয্যসিকা…পে॰… তস্সপাপিযসিকা হেতুনিদানা, হেতুসমুদযা, হেতুজাতিকা, হেতুপভৰা, হেতুসম্ভারা, হেতুসমুট্ঠানা। তিণৰত্থারকো হেতুনিদানো, হেতুসমুদযো, হেতুজাতিকো, হেতুপভৰো, হেতুসম্ভারো, হেতুসমুট্ঠানো। সম্মুখাৰিনযো কিংনিদানো, কিংসমুদযো, কিংজাতিকো, কিংপভৰো, কিংসম্ভারো, কিংসমুট্ঠানো? সতিৰিনযো…পে॰… অমূল়্হৰিনযো…পে॰… পটিঞ্ঞাতকরণং…পে॰… যেভুয্যসিকা…পে॰… তস্সপাপিযসিকা…পে॰… তিণৰত্থারকো কিংনিদানো, কিংসমুদযো, কিংজাতিকো, কিংপভৰো, কিংসম্ভারো, কিংসমুট্ঠানো? সম্মুখাৰিনযো পচ্চযনিদানো, পচ্চযসমুদযো, পচ্চযজাতিকো, পচ্চযপভৰো, পচ্চযসম্ভারো, পচ্চযসমুট্ঠানো। সতিৰিনযো…পে॰… অমূল়্হৰিনযো…পে॰… পটিঞ্ঞাতকরণং পচ্চযনিদানং, পচ্চযসমুদযং, পচ্চযজাতিকং, পচ্চযপভৰং, পচ্চযসম্ভারং, পচ্চযসমুট্ঠানং। যেভুয্যসিকা…পে॰… তস্সপাপিযসিকা পচ্চযনিদানা, পচ্চযসমুদযা, পচ্চযজাতিকা, পচ্চযপভৰা, পচ্চযসম্ভারা, পচ্চযসমুট্ঠানা। তিণৰত্থারকো পচ্চযনিদানো, পচ্চযসমুদযো, পচ্চযজাতিকো, পচ্চযপভৰো, পচ্চযসম্ভারো, পচ্চযসমুট্ঠানো। ৩৫৩. সত্তন্নং সমথানং কতি মূলানি, কতি সমুট্ঠানা? সত্তন্নং সমথানং ছব্বীস মূলানি, ছত্তিংস সমুট্ঠানা। সত্তন্নং সমথানং কতমানি ছব্বী মূলানি? সম্মুখাৰিনযস্স চত্তারি মূলানি। সঙ্ঘসম্মুখতা, ধম্মসম্মুখতা, ৰিনযসম্মুখতা, পুগ্গলসম্মুখতা; সতিৰিনযস্স চত্তারি মূলানি; অমূল়্হৰিনযস্স চত্তারি মূলানি; পটিঞ্ঞাতকরণস্স দ্ৰে মূলানি – যো চ দেসেতি যস্স চ দেসেতি; যেভুয্যসিকায চত্তারি মূলানি; তস্সপাপিযসিকায চত্তারি মূলানি; তিণৰত্থারকস্স চত্তারি মূলানি – সঙ্ঘসম্মুখতা, ধম্মসম্মুখতা, ৰিনযসম্মুখতা, পুগ্গলসম্মুখতা – সত্তন্নং সমথানং ইমানি ছব্বীস মূলানি। সত্তন্নং সমথানং কতমে ছত্তিংস সমুট্ঠানা? সতিৰিনযস্স কম্মস্স কিরিযা, করণং, উপগমনং, অজ্ঝুপগমনং, অধিৰাসনা, অপ্পটিক্কোসনা। অমূল়্হৰিনযস্স কম্মস্স…পে॰… পটিঞ্ঞাতকরণস্স কম্মস্স… যেভুয্যসিকায কম্মস্স… তস্সপাপিযসিকায কম্মস্স… তিণৰত্থারকস্স কম্মস্স কিরিযা, করণং, উপগমনং, অজ্ঝুপগমনং, অধিৰাসনা, অপ্পটিক্কোসনা – সত্তন্নং সমথানং ইমে ছত্তিংস সমুট্ঠানা। ১০. সত্তসমথনানত্থাদি ৩৫৪. সম্মুখাৰিনযোতি ৰা সতিৰিনযোতি ৰা – ইমে ধম্মা নানত্থা নানাব্যঞ্জনা উদাহু একত্থা ব্যঞ্জনমেৰ নানং? সম্মুখাৰিনযোতি ৰা অমূল়্হৰিনযোতি ৰা…পে॰… সম্মুখাৰিনযোতি ৰা পটিঞ্ঞাতকরণন্তি ৰা… সম্মুখাৰিনযোতি ৰা যেভুয্যসিকাতি ৰা… সম্মুখাৰিনযোতি ৰা তস্সপাপিযসিকাতি ৰা… সম্মুখাৰিনযোতি ৰা তিণৰত্থারকোতি ৰা – ইমে ধম্মা নানত্থা নানাব্যঞ্জনা উদাহু একত্থা ব্যঞ্জনমেৰ নানং? সম্মুখাৰিনযোতি ৰা সতিৰিনযোতি ৰা – ইমে ধম্মা নানত্থা চেৰ নানাব্যঞ্জনা চ। সম্মুখাৰিনযোতি ৰা অমূল়্হৰিনযোতি ৰা…পে॰… সম্মুখাৰিনযোতি ৰা পটিঞ্ঞাতকরণন্তি ৰা… সম্মুখাৰিনযোতি ৰা যেভুয্যসিকাতি ৰা… সম্মুখাৰিনযোতি ৰা তস্সপাপিযসিকাতি ৰা… সম্মুখাৰিনযোতি ৰা তিণৰত্থারকোতি ৰা – ইমে ধম্মা নানত্থা চেৰ নানা ব্যঞ্জনা চ। ৩৫৫. [চূল়ৰ॰ ২২৪] ৰিৰাদো ৰিৰাদাধিকরণং, ৰিৰাদো নো অধিকরণং, অধিকরণং নো ৰিৰাদো, অধিকরণঞ্চেৰ ৰিৰাদো চ? সিযা ৰিৰাদো ৰিৰাদাধিকরণং, সিযা ৰিৰাদো নো অধিকরণং, সিযা অধিকরণং নো ৰিৰাদো, সিযা অধিকরণঞ্চেৰ ৰিৰাদো চ। তত্থ কতমো ৰিৰাদো ৰিৰাদাধিকরণং? ইধ ভিক্খূ ৰিৰদন্তি ধম্মোতি ৰা অধম্মোতি ৰা…পে॰… দুট্ঠুল্লা আপত্তীতি ৰা অদুট্ঠুল্লা আপত্তীতি ৰা। যং তত্থ ভণ্ডনং, কলহো, ৰিগ্গহো, ৰিৰাদো, নানাৰাদো, অঞ্ঞথাৰাদো, ৰিপচ্চতায ৰোহারো, মেধকং – অযং ৰিৰাদো ৰিৰাদাধিকরণং। তত্থ কতমো ৰিৰাদো নো অধিকরণং? মাতাপি পুত্তেন ৰিৰদতি, পুত্তোপি মাতরা ৰিৰদতি, পিতাপি পুত্তেন ৰিৰদতি, পুত্তোপি পিতরা ৰিৰদতি, ভাতাপি ভাতরা ৰিৰদতি, ভাতাপি ভগিনিযা ৰিৰদতি, ভগিনীপি ভাতরা ৰিৰদতি, সহাযোপি সহাযেন ৰিৰদতি – অযং ৰিৰাদো নো অধিকরণং। তত্থ কতমং অধিকরণং নো ৰিৰাদো? অনুৰাদাধিকরণং, আপত্তাধিকরণং, কিচ্চাধিকরণং – ইদং অধিকরণং নো ৰিৰাদো। তত্থ কতমং অধিকরণঞ্চেৰ ৰিৰাদো চ? ৰিৰাদাধিকরণং অধিকরণঞ্চেৰ ৰিৰাদো চ। ৩৫৬. [চূল়ৰ॰ ২২৪ আদযো] অনুৰাদো অনুৰাদাধিকরণং, অনুৰাদো নো অধিকরণং, অধিকরণং নো অনুৰাদো, অধিকরণঞ্চেৰ অনুৰাদো চ? সিযা অনুৰাদো অনুৰাদাধিকরণং, সিযা অনুৰাদো নো অধিকরণং, সিযা অধিকরণং নো অনুৰাদো, সিযা অধিকরণঞ্চেৰ অনুৰাদো চ। তত্থ কতমো অনুৰাদো অনুৰাদাধিকরণং? ইধ ভিক্খূ ভিক্খুং অনুৰদন্তি সীলৰিপত্তিযা ৰা আচারৰিপত্তিযা ৰা দিট্ঠিৰিপত্তিযা ৰা আজীৰৰিপত্তিযা ৰা। যো তত্থ অনুৰাদো, অনুৰদনা অনুল্লপনা অনুভণনা অনুসম্পৰঙ্কতা অব্ভুস্সহনতা অনুবলপ্পদানং – অযং অনুৰাদো অনুৰাদাধিকরণং। তত্থ কতমো অনুৰাদো নো অধিকরণং? মাতাপি পুত্তং অনুৰদতি, পুত্তোপি মাতরং অনুৰদতি, পিতাপি পুত্তং অনুৰদতি, পুত্তোপি পিতরং অনুৰদতি, ভাতাপি ভাতরং অনুৰদতি, ভাতাপি ভগিনিং অনুৰদতি, ভগিনীপি ভাতরং অনুৰদতি, সহাযোপি সহাযং অনুৰদতি – অযং অনুৰাদো নো অধিকরণং। তত্থ কতমং অধিকরণং নো অনুৰাদো? আপত্তাধিকরণং কিচ্চাধিকরণং ৰিৰাদাধিকরণং – ইদং অধিকরণং নো অনুৰাদো। তত্থ কতমং অধিকরণঞ্চেৰ অনুৰাদো চ? অনুৰাদাধিকরণং অধিকরণঞ্চেৰ অনুৰাদো চ। ৩৫৭. আপত্তি আপত্তাধিকরণং, আপত্তি নো অধিকরণং, অধিকরণং নো আপত্তি, অধিকরণঞ্চেৰ আপত্তি চ? সিযা আপত্তি আপত্তাধিকরণং, সিযা আপত্তি নো অধিকরণং, সিযা অধিকরণং নো আপত্তি, সিযা অধিকরণঞ্চেৰ আপত্তি চ। তত্থ কতমা আপত্তি আপত্তাধিকরণং? পঞ্চপি আপত্তিক্খন্ধা আপত্তাধিকরণং । সত্তপি আপত্তিক্খন্ধা আপত্তাধিকরণং। অযং আপত্তি আপত্তাধিকরণং। তত্থ কতমা আপত্তি নো অধিকরণং? সোতাপত্তি সমাপত্তি – অযং আপত্তি নো অধিকরণং। তত্থ কতমং অধিকরণং নো আপত্তি? কিচ্চাধিকরণং ৰিৰাদাধিকরণং অনুৰাদাধিকরণং – ইদং অধিকরণং নো আপত্তি। তত্থ কতমং অধিকরণঞ্চেৰ আপত্তি চ? আপত্তাধিকরণং অধিকরণঞ্চেৰ আপত্তি চ। ৩৫৮. [চূল়ৰ॰ ২২৩] কিচ্চং কিচ্চাধিকরণং, কিচ্চং নো অধিকরণং, অধিকরণং নো কিচ্চং, অধিকরণঞ্চেৰ কিচ্চঞ্চ? সিযা কিচ্চং কিচ্চাধিকরণং, সিযা কিচ্চং নো অধিকরণং, সিযা অধিকরণং নো কিচ্চং, সিযা অধিকরণঞ্চেৰ কিচ্চঞ্চ। তত্থ কতমং কিচ্চং কিচ্চাধিকরণং? যা সঙ্ঘস্স কিচ্চযতা করণীযতা অপলোকনকম্মং ঞত্তিকম্মং ঞত্তিদুতিযকম্মং ঞত্তিচতুত্থকম্মং – ইদং কিচ্চং কিচ্চাধিকরণং। তত্থ কতমং কিচ্চং নো অধিকরণং? আচরিযকিচ্চং উপজ্ঝাযকিচ্চং [উপজ্ঝাযকিচ্চং সকিচ্চং (ক॰)] সমানুপজ্ঝাযকিচ্চং সমানাচরিযকিচ্চং – ইদং কিচ্চং নো অধিকরণং। তত্থ কতমং অধিকরণং নো কিচ্চং? ৰিৰাদাধিকরণং অনুৰাদাধিকরণং আপত্তাধিকরণং – ইদং অধিকরণং নো কিচ্চং। তত্থ কতমং অধিকরণঞ্চেৰ কিচ্চঞ্চ? কিচ্চাধিকরণং অধিকরণঞ্চেৰ কিচ্চং চাতি। অধিকরণভেদো নিট্ঠিতো। তস্সুদ্দানং – অধিকরণং উক্কোটা, আকারা পুগ্গলেন চ। নিদানহেতুপচ্চযা, মূলং সমুট্ঠানেন চ॥ আপত্তি হোতি যত্থ চ, সংসট্ঠা নিদানেন চ [সংসট্ঠা নিদানপভৰা (সী॰)]। হেতুপচ্চযমূলানি, সমুট্ঠানেন ব্যঞ্জনা। ৰিৰাদো অধিকরণন্তি, ভেদাধিকরণে ইদন্তি॥ |
Copyright © 2011 Bangladesh Buddhist. All rights reserved |